مظهر المذيعات السودانيات فى القنوات السودانية

مظهر المذيعات السودانيات فى القنوات السودانية


10-10-2009, 09:27 AM


  » http://sudaneseonline.com/cgi-bin/sdb/2bb.cgi?seq=msg&board=250&msg=1255163253&rn=0


Post: #1
Title: مظهر المذيعات السودانيات فى القنوات السودانية
Author: هاشم محمد الحسن عبدالله
Date: 10-10-2009, 09:27 AM

هناك أمر اسهبت كثيرا فى التفكير فيه فنحن بحكم التواصل اليومى مع التلفاز فى دار الغربة، وبالذات القنوات السودانية الرسمية والخاصة، نطالع مظهر المذيعات السودانيات، وقد لاحظت ان هناك مبالغة فى استخدام التبرج والزينة بشكل ملفت للنظر، وبالتحديد الحناء الصارخة التى أصبحت مظهرا مشاعا لدى المذيعات وأصبحن يتفنن فى إظهارها وكذلك المصوغات الذهبية وهذه الملاحظات تمتد أيضا لبعض المسئوليات فى الدولة من النساء ، حيث تلاحظ الكم الهائل من المصوغات الذهبية والثياب الغالية التى يظهرن بها فى وسائل الأعلام، وكان ينبغى ان يكن قدوة لنساء السودان فى البساطة والتواضع فهذه المظاهر البذخة تؤثر سلبيا لدى الكثيرات اللائى لايملكن الكفاف وتكون نتائجها وبالا على النساء اللائى يعشن فى معسكرات النزوح فى دارفور والجنوب وكذلك طالبات الجامعات المغتربات المقيمات فى جامعات العاصمة واللائى يعشن فى ظروف مادية صعبة للغاية .

ومن ناحية جمالية نلاحظ ترهل أجسام بعض المذيعات بشكل مزعج فلا بد من مراعاة معايير مقبولة فى العمل بأجهزة الاعلام المختلفة، وضرورة الرشاقة والوزن المثالي ، ويزدان ذلك وقار وحشمة ليست غريبة على المرأة السودانية .
هذه ملاحظات عابرة أرجو ان يتقبلها المعنيون فالهدف منها المصلحة العامة، ودمتم.

Post: #2
Title: Re: مظهر المذيعات السودانيات فى القنوات السودانية
Author: علي الكرار هاشم
Date: 10-10-2009, 12:40 PM
Parent: #1

يا هشام
والله طلبات كتيره خالص
والمذيعه السودانيه لو نظرنا لها بعيون غير سودانيه فسوف تصبح نفس المذيعة الاخري لو نظرنا لها بعيون سودانيه
يعني حتى الاخوات بتلفزيون sstv قناة الجنوب فهن يلبسن ملابس افرنجيه ويضعن الحنه شأنهن شأن المرأة السودانية
من هنا لازم يكون عندنا تميز سوداني زي عقالات ناس الخليج
والله رايك شنو

Post: #3
Title: Re: مظهر المذيعات السودانيات فى القنوات السودانية
Author: هاشم محمد الحسن عبدالله
Date: 10-11-2009, 07:07 AM
Parent: #2

شكرا أخى الكرار على المرور والمداخلة، هذه الملاحظات التى أوردتها القصد منها التنويه الى المبالغة فى المظهر، وأنا أنظر للمذيعات كسودانى أحب بلدى وأريد أن تظهر المذيعات السودانية بالمظهر الذى يشرف السودان وأهله، بصراحة شوف أى مذيعة المبالغة فى الحناء والتبرج بالبدر والكريمات وغيرها، طبعا المظهر الطيب مطلوب ، لكن فى حدود الذوق العام، الذى لايستفز بنات بلدى الفقيرات اللائى غير قادرات على مجاراة ذلك ، والمنتشرات فى معسكرات النازحين فى دار فور والجنوب وغيرها من مواقع النزوح والحروب ، فيه أحباط شديد له، وهناك من يتشدق بالمحافظة على نسيج المجتمع ودمج ضحايا الحروب فيه ، كيف يكون ذلك وهن يشاهدن المذيعات وقيادات الحركة النسوية يلبسن أغلى الملابس والذهب والزينة المترفة؟ الخكاية تتطلب معالجات سوية دون الاخلال بالمظهر العام المفترض فى كل من يعمل فى العمل العام، والله من وراء القصد.

Post: #4
Title: Re: مظهر المذيعات السودانيات فى القنوات السودانية
Author: HAIDER ALZAIN
Date: 10-11-2009, 08:22 AM
Parent: #3

سلامات اخي هاشم .. ولك التحية

ملاحظات غالبها صحيح وكتر الكلام عن ظاهرة المذيعات ديل في الفترة الاخيرة ..
خاصة الواحد بقي يمتعض منقصة المكياج التقيل والشين البيواجهنا بالشاشة ..

بس المشكلة مين يسمع ..


مودتي

Post: #5
Title: Re: مظهر المذيعات السودانيات فى القنوات السودانية
Author: Muna Khugali
Date: 10-11-2009, 10:22 AM
Parent: #4

أتفق معك تماما في النقاط التي ذكرتها..
وخاصة موضوع الحنه والرسوم الكثيره والدهب!
كذلك عدم التناسق في اشكال الثياب والالوان مع أغلبهن..
لا يفرق كثيرا عند أغلبهن ان كان البرنامج ترفيهي..فني..تعليمي أو سياسي..

ممكن اتفشي شويه؟؟
مغبونة والله من البيحصل!

هناك مشكلة حقيقية في عدم التناسق يظهر أكثر مع الديكورات المهببة في معظم الاوقات..
يعني عدة ألوان في الاستوديو..ستاير صفرا مثلا مع اخضر مع تمرهندي..
طاولة خشبية طويلة في النص عليها مفرش طربيزة ستان بني ولا بيج..وفوق الطاولة ورد بلاستيك علي فازه دايشة..
وبعدين المذيعه والمكياج .. ودهب وحنه وتوب بألوان تانية..ده غير الضيف او الضيوف..
تفتكر كده الزول يسمع كلامهم بمزاج كيف؟؟
وياخد منهم المستمع المعلومة المفيده ويستفيد منهم كيف؟؟

افتكر يحتاج التلفزيون لقراءة كل النقد عنه ليصلح حاله..
علي العموم المبالغه في المظهر لا تظهر جمالا..يل تقتل الجمال..الجمال فيما ترتاح اليه العيون..
كثرة الالوان لا تخلق فرحا..الفرح ايضا يأتي من الراحة ومن القدره علي التركيز..
الورود البلاستيكية هذه تقتل الحياة..تجدها في البرامج المختلفه ..نفس الوردات ونفس الجمود..
وبعدين هو ذاته منو بيقدم في برنامج يناقش ولا حتي يتونس وقدامه زهرية؟؟
يجب عليهم ترقية الأذواق..وليس النكوص بها!
.......
.......

طيب ايه رأيك كمان في بعض مقدمين البرامج من الرجال..
بيلبسوا بدل تشبه بدل افلام الرعب القديمة..
وبعدين عادي جدا تلقي واحدين لابسين بدل وصندل مفتوح بشراب او بدون شراب بدلا عن حذاء مقفول..
اما الكرافتات..فحدث ولا حرج..
اذ احيانا يخيل اليك ان الكرافته تمرح في شواطيء هاواي!
كرافته عريضه بمبية فيها شجرة مثلا وقميص كاروهات بالأزرق!

ولا شوف ده من وصفه ساكت عيونك توجعك خليك من تشوفه..

كرافته حمرا..بدوائر صفرا.:D مع قميص اخضر بخطوط صفرا..
اذ يري بعض المذيعين ان تكرار الألون في الكرافته والقميص كافي للتناسق حتي ولو امتلا باقي القميص بالوان قشر وبذر البطيخ!

كفاية كده..خايفة انا علي صحتي!

تحياتي..
عدلنا الاخطاء..
وكمان اضافة..

تلقي في نهاية البرنامج اسماء..مثل..
المخرج .....
مهندس الديكور...
أزياء..
مكياج...


اسه عليك الله تلوم منو ولا منو؟؟
الحاصل ده حالته بعد تخصص!

Post: #6
Title: Re: مظهر المذيعات السودانيات فى القنوات السودانية
Author: ALZOLZATOO
Date: 10-11-2009, 10:41 AM
Parent: #5

حبيبنا هاشم

دي حالتها ملاحظة عابرة وتيب لو اتفحصتهم ح تطلع لينا شنو ياربي لووول

المشكلة انو المشاهد او المجتمع بيهتم بالقشور فقط يعني على سبيل المثال انا في البيت المدام بتعاين للتياب والدهب والحنة والتناسق العام وانا بعاين لي وش مقدمة البرنامج ونوع البرنامج

فالمشكلة مشكلتنا كلنا لازم العقلية تتفتح شوية وتهتم بالمضون بدلا عن المظهر المتكلف فيهو كثيرا

في القنوات الاجنبية ملابس مقدمي البرامج او المذيعين شبه عادية وعادي جدا تلاقي فنان كبير بيغني فيديو كليب ولابس ليهو فلنة داخلية

ارقد عافية

زاتووووو

Post: #9
Title: Re: مظهر المذيعات السودانيات فى القنوات السودانية
Author: هاشم محمد الحسن عبدالله
Date: 10-11-2009, 11:18 AM
Parent: #6

شكرا للعزيز الزول زاتو على المداخلة، وأتفق معك ان هذه مشكلة الجميع ولابد من تعاضد الكل والتفكير بعمق بدلا من السطحية والشكليات تخريمة أنا مثلك أخيانا أطالع فى وجه المذيعة أثناء النشرة أو المقابلة فتقبضنى زوجتى بالجرم وتقول ساخرة (أختشى ياجدو) علما بأن الذى عملنى (جدو) هو نتيجة مشتركة بينى وبينها لكنهاالمرأة دائما صغيرة السن وزوجها عجوز ومخرف، أكرر الشكر لمداخلتك الجميلة ودمت .

Post: #8
Title: Re: مظهر المذيعات السودانيات فى القنوات السودانية
Author: هاشم محمد الحسن عبدالله
Date: 10-11-2009, 11:13 AM
Parent: #5

شكرا جزيلا المبدعة منى خوجلى على مرورك الجميل واضافاتك القيمة والتى تساهم فى شرح الفكرة والهدف من البوست ، ولقد أعجبت بافكارك النيرة ، نأمل ان يلتفت المعنيون من مذيعات ومذيعين والمسئولين فى اجهزة الاعلامالى هذه الملاحظات والتى تستهدف المصلحة العامة وابراز صورة السودان الحضارية للعالم من خلال اجهزة الاعلام السودانية، لك مودتى ودمتى.

Post: #7
Title: Re: مظهر المذيعات السودانيات فى القنوات السودانية
Author: هاشم محمد الحسن عبدالله
Date: 10-11-2009, 11:08 AM
Parent: #4

شكرا العزيز حيدر الزين على المداخلة والمرور، وضرورى متابعة نشر هذه الملاحظات والتى بأذن الله ستثمر مع أقتتناع القائمين على الامر بما نكتب ، ولست ادرى هل لنقابة الصحفيين دور فعال فى هذا الشأن ام لا ؟