Post: #1
Title: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:20 AM
ناس نوبل العالمية العجيبة سويتوها شينة خلاااص...
وجوائزكم دي كنتم تنوعو فيها اللعب كما نوعه مازيمبي ذات ليل..
وشكو القصة الصالح والطالح يجب ان يرش بجائزة ليها ضل حتي يسلط الضوء علي الايجابي والسلبي في هذه الدنيا ام قدود..
لذا نحن كشعب سوداني فضل نطالب بجائزة ليها ضل لنظامنا الانقاذي العتيق.. في الاشياء الاتية
1- جائزة نوبل للمشاريع الحضارية المنهارة
2- جائزة نوبل للكنكشة التي تهابش العقدين ونيف
3- جائزة نوبل للتمزيق والتمزق الوطني
4- جائزة نوبل لاتفاقيات الجهوية
5-نوبل للخرخرة النيفاشية
6-نوبل للسدود الماسورة
7- نوبل للروساء العلي راس عملهم ومطلوبين للعدالة الدولية
8- جائزة نوبل للموتمرات الوطنية العجيبة وغريبة( يستحقها موتمرنا الوطني بجدارة)
وسنعود لمزيد من النوبلات..
|
Post: #2
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:25 AM
Parent: #1
وكون رئيسنا لا يستطيع تكبد المشاق والسفر الي حيث تسلم الجائزة في اروبا في ظل وجود المارق اوكامبو علي مرمي حجر من مكان الحدث لذا في كل الجوائز التي نقترحها سنرسل لكم رائدا لايكذب اهله من اهل الانقاذ واللاحقين حتي يستلمها بالنيابة عن رئيسنا وقائد اسطولنا النحرير..
وسناتي لاحقا الي المختاريين للانابة عن الريس
|
Post: #3
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:31 AM
Parent: #2
Quote: 1- جائزة نوبل للمشاريع الحضارية المنهارة
|
...
وهذا يا مستر نوبل..
لن نجد لها غير شيخنا الكبير النحرير (حسن عبدالله الترابي) لكي ينوب عن البشير مكرها..
فالرجل لا يود ان يسمع اسم هذا البشير كلو كلو..
ولكن المسئولية الوطنية العليا ومصلحة الشعب السوداني ستجعله يجازف ويذهب الي العمق الاروبي
لكي يستلم جائزة المشروع الحضاري الذي كان هو منظره ومشرعه وفيلسوفه..
لو نوبل وزعتها بينو وبين البشير يكون ما قصرت معانا كشعب سوداني فضل
|
Post: #4
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:39 AM
Parent: #3
Quote: 2- جائزة نوبل للكنكشة التي تهابش العقدين ونيف
|
هنا يا نوبل لم نجد لكم غير (علي كرتي) ولا ادري لماذا علي كرتي
ولكن الذي ادريه واعلمه جيدا بان ما ذكرت الانقاذ في اي محفل حتي وجال في خاطري
الشيخ علي كرتي..
اذن انه علي كرتي.. فبروه بالجايزة نيابة عن اصلب العناصر لاصلب المواقف
|
Post: #5
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:42 AM
Parent: #4
| Quote: 3- جائزة نوبل للتمزيق والتمزق الوطني |
سياتكم من قلب الارض السودانية نافع علي نافع... زعلان ديمة ومتوعد لمتمردي الهامش والمعارضين بالويل والعذاب..
ان ظلله عارض حال دون حضوره فهناك قطبي المهدي جاهز موية ونور وانجليزية مية مية
|
Post: #6
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 07:49 AM
Parent: #5
| Quote: 4- جائزة نوبل لاتفاقيات الجهوية |
هنا يا نوبل يا لجنة
لن نجد لكم خيرا من مني اركو مناي.. وموسي ادروب بتاع جبهة الشرق
حملتهم جيوش المهمشين الي القصر (فعلمو نايمين).. ووقعو اتفاقيات جفت قبل وصولهم الي كراسي القصر الوثيرة وبدات الخرخرات تاتي بها رياح (الهبباي) لتتزمر من موسي...وخور برنغا حملت مياهه الغضب الدارفوري ضد اركو مناي..
مني وموسي عليكم بالتوجه فورا الي مقر جائزة نوبل للاستلام بدلا عن الريس
|
Post: #7
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 08:03 AM
Parent: #6
| Quote: 5-نوبل للخرخرة النيفاشية |
هنا عزيرتي لجنة نوبل سنقدم لكم باقة من الاشخاص والاجسام ولكم ان تختاروا منها حسب مواصفات فيفا نوبل..
1- مندور المهدي
2-غازي صلاح الدين
3-مصطفي اسماعيل
4- تلفزيون السودان
5- البشير شخصيا وتحجبو الجايزة وتسلم بعد انتهاء كركبة اوكامبو
6- صحيفة الانتباه
7- البوردابي محمد فرح
|
Post: #8
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 08:16 AM
Parent: #7
| Quote: 6-نوبل للسدود الماسورة |
اسامة عبدالله.. جاهز للرد الرد واستلام جايزة السد..
وبعد بالعدم سنرسل لكم وزير البنية التحتية بتاع كنتور الخرتوم..
وان غاب الاثنين فلنا في الاسافير عمر ود الباوقة اكبر مطبل ومبشر بالسد في الفضاء الاسفيري
والوسائط الالكترونية المعاصرة
|
Post: #9
Title: Re: شنو يا ناس نوبل..بشيرنا ده ماعندو جايزة معاكم ولاشنو....؟؟؟
Author: عبدالكريم الامين احمد
Date: 10-10-2009, 08:22 AM
Parent: #8
| Quote: نوبل دس كورة البترول السوداني عن الشعب الفضل.. |
عوض الجاز جاهز موية ونور ولو عز المجي يمكنه ارسال صينين للاستلام وياخد الصينين حقهم من الجائزة بنسبة واضحة ومثبتة في عقود لا يري الشعب منها الا لحظات التوقيع في التلفاز من اجل الشووووو..
|
|