"كهربتك.. إن شاء الله تضوي ليك"!

خط الإستواء
عبد الله الشيخ
"كهربتك.. إن شاء الله تضوي ليك"!
تذكرني كهرباء "السد" بما أعرف، وبما لا أعرف من "الإنجازات العظيمة لثورة "الألغاز"..
تذكرني كهرباء السد التي صنعت خصيصاً من أجل "الرد" وليس من أجل الإنارة والإستنارة.. تذكرني بحديث قديم، مرّت عليه سنوات قاله د. منصور خالد في تلفزيون جمهورية السودان "الديمقراطية" فور عودته من الغربة الطويلة بعد توقيع اتفاق السلام..
كان مقدم البرنامج مجتهداً جداً في التقاط اعتراف من شيخنا منصور "بانجازات الإنقاذ" ما يُرى منها وما لا يُرى! فسأل د. منصور عن الخرطوم.. كيف يراها بعد غيبة؟.. وأضاف: "لتسهيل الإجابة على د. منصور خالد صاحب الفجر الكاذب" وصاحب كتاب: "حوار مع الصفوة"..وصاحب كتاب" النخبة السودانية وإدمان الفشل".. وصاحب كتاب "لا خير فينا إن لم نقلها".. وصاحب كتاب "هكذا يتحدث قرنق"!!.. إلخ..
مزيع تلفزيونكم القومي أراد- لله دره- تسهيل الإجابة عن شيخنا منصور ليشيد "بانجازاتهم" فى الخرطوم "الجديدة" وانقاذييها، وكيف أنّها لبست لبوس الحضارة فى عهدهم بكباريها الطائرة، وشوارعها الواسعة، ومنتزهاتها الباذخة.. وأضاف ما معناه "لا شك أنّ د. منصور قد "اندهش" من كل هذه الحضارة الإنقاذية!!..
مذيع تلفزيونكم القومي- جزاه الله خيراً- لكونه صمت قليلاً في انتظار إجابة شيخنا منصور، الذي لم يزد على أن قال ما معناه: "ربما تعلم أنّني لا تدهشني البنايات والحوائط وشوارع الأسفلت والكباري.. ربما تعلم اننى لا افهم الحضارة فى مثل هذا "!..
تذكرت هذا وأنا أرى كهرباء السد تنسحب أو تُسحب من الشبكة القومية ربما ليس بسبب الخلاف المعروف بين أسامة عبد الله والهيئة القومية.. ربما..
وحتى لو كان الأمر كذلك!..بين رب ، وربما ، أو فوق تلك الروابى فإننا على كل حال لا نستطيع الحديث "في هذا الشأن" رغم انهم اعلنوا عن رفع الرقابة!...
لماذا؟..
لأننا لا نملك معلومات عن هذا.. فهذا صراع بين رئاسة الجمهورية التي يتبع لها السد، وإحدى ربائبها "الهيئة"..
أضف إلى ذلك أنّ الحكمة تقتضي أن نبقى في الظلام بانتظار أن يتقفوا ويعيدوا التيار الكهربائي.. لأنّ الصراع "من أساسو" تتم إدارته بمفاهيم "زيتنا في بيتنا"!..
ذكرتني كهرباء السد هذه بقصة الشافع المشيحيد، وحيد أمو..
ذلك الشافع الدلعان كان أول من لبس الشراب في حلتنا، و"تقريباً"! كان أول من تذوق طعم حلاوة لبن كوكو و الكاكاو..
وكان كل رهطنا .. أقصى أمانيه أن يجد قطعة من حلويات "سعد"!.. ولأنّ الشافع دلعان.. أمو تجيب ليهو، خالتو تجيب ليهو، جدو يديهو!.. كان الشويفع المشيحيد في حال، ونحن في حال!..
ذات يوم من الايام نحن نلعب كرة الشراب المشحونة بالعشميق وسط "جضول المريق" جاءنا الشويفع الدلعان شايل كورة "منفوخة" عديل.. كورة زي اللى بيلعب بيها مازينبي!.. رمينا كرة الشراب بعيد و وافقنا على طلبه بأن "يلعب معانا"!..
بعد شوتة والثانية، والثالثة وصلت الكورة إلى الشويفع الدلعان المشيحيد!..
الشويفع الدلعان المشيحيد أخذ كورتو و " فك البيرك" ، وجرى إلى بيت أمو وهو يقول: ما بتلعبوا بى كورتى .. "دي كورتي.. مش على كيفي"؟!..
والله هسى أنا ما شايف شبه لكهرباء "الرد بالسد" هذه إلا بـ "كورة الشافع دا"!.. وياريت تشيلوها طوالى .. إن شاء الله تضوى ليكم..!!..

الله يجازى محنك يا ود الشيخ

أضحكتنا الله يعلم... يعنى

الكهربا ختفوها وقامو صوف؟

المحيرنى حيقولوا نفس القالو الشافع

المشكلة يا شمس انو الشافع المشيحيد دا حيجى تانى ، شايل الكورة ، وحيقول لينا تعالوا العبوا معاي .. وبرضو حنلعب معاهو .. وبرضو حيهبر ..!.. والكهربا حتجى ، وبرضو حتهبر ..!!..
دحين دي حالة دي؟

0

غايتو يا عبد الله محنك محن
عارف صديقنا مصطفى احمد الخليفة عنده مثل جديد لنج
لمن رحل فى بيته الجديد "ايجار طبعا "
سيد البيت اداهو الكرت الغلط
قال
ـ مشيت جبت كهربا وقعدت اسوط فى الكرت حلف ما يخلى الكهربا توصل
الصباح "طبعا الكهربا قطعت بالليل " مشى لسيد البيت
ـ ياخ الكرت دا جبت بيهو امس وابت تدخل معاى
ـ اسف يا ابن العم اصلو الكرت بتاعك وكرت الزول الجديد الاجر امس اتبدلو
اها مصطفى طلع بالمثل الجديد
ـ كهربا ما كهربتك ما بتولع ليك كان كسرت رقبتك
هسى يا عبد الله الناس ديل على راى مصطفى "كهربتنا ما بتولع لغيرنا كان كسر رقبتو "
وماتكسرو رقبتكم لكين كسرو القوانين الله يجازيها

غايتو يا سلمى دى حتكون الحلقة الثانية من العمود..

بالله يا عبد الله حتى تلاجة الموز يتاعتك سحبو منها الكهرباء

دايرين سد بالطاقة الشمسية المرة الجاية أو اقول ليك بالطاقة النووية الايرانية عديل كده

تحياتي ومشتاقين .. قلت شهر اكتوبر موعدنا وح يمر ذي غيرو

بمناسبة الكهربا دى احكى ليك قصة ..
النميرى فى السبعينيات زار مايرنو ..
ناس طيبين جدا وما عندهم شدايد وما فاضين للسياسة ..
وولكن قبل وصول النميرى وزع الحزب الشيوعى بيان انتقد فيه مايو ، وقال البيان بضرورة توصيل الكهرباء الى القرى التى بجوار خزانات الكهرباء فى النيل الازرق ..
النميرى جاء منفوخ وزعلان من الحزب ووقف يخطب فى الجماهير ..
والناس المساكين اعتقدوا ان النميرى حيحل ليهم مشكلة ..
وكانوا يهتفون.. ( كهرابا كهربا ولو بالنيم)..
فظن النميرى ان الحزب الشيوعى هو من يقود هذه الهتافات ..
بالطبع اصدر قراره من المنصة ... وقال .. ( اقبضوهم)..
ياراشد ..
باقى ليك احسن كهربة النيم دى أم الافضل هذه الكهرباء الموجهة " للرد" فقط؟

0

ـــ
فوق ...

إلي ان تضوي كل الاحيان والفرقان .




شكراً الاستاذ عبد الله

يا عبدالله ود ابوى
بعد دا بنزور فيك
لانه موضوع الكهربا دا بقى سخانة عديل
عمك اتلحس زى ما ذكر الخبر
لكين قلت لى ودالحكيومة اسامة خت الكهربا فى جيبو ونام؟
عفيت منه
دا بكون عنده المولد بتاع الكهربا الما بعمل صوت فى بيتو
وانشا الله ام الحسن تتنفخ
وعنها ما ولعت
"يسد دى بطينة ودى بعجينة "
وكان رجال اعملو مظاهرة بالله ؟
وعلى ذكر المظاهرة

مرة يا عبدالله كنا فى بيت اصحابنا عبدالله وزوجته فى اركويت
لمن وصلنا الحتة البركبو منها المواصلات كان فى مؤتمر غايتو الكلام دا سنة 2006
الساحة ملانة عن اخرها بشر
قلت للزول المعاى
ـ والله اللمة دى فيها حتة مظاهرة سمحة خلاس
ضحك كدا وعاين لى
ـ انتى بى صحك ؟الكلام دا كان ايامنا نحنا لمن كنا شباب هسى ديل عاينى ليهم
مجكسين فى امان الله وبضحكوا ولا هماهم
استغربت جدا لكين زال استغرابى لمن عاينت ولقيتهم جاريين محصلين الهايص وانا لايص
هسى كمان انتو الكهربا تقطع ولا ما تقطع كلو واحد لاعندك تلاجة موز ولا مكيف صحراوى

تلاجة موز ... ومكيف صحراوى؟
فى بداية التسعينيات كنت فى بيتنا فى حمور ..وبعدين فلسان ، حق التمباك ماعندى .. وكنت ( قادي ليك الجماعة كلام فى الحكومة .. يازولة جندت ليك عجايز الحلة كلهم .. كنت متخصص فى اقناع الحريم العجايز .. جندت عدد لا بأس به ضد النظام (إلا من ابى) .. لكن جاتنى هجمة مرتدة من حيث لا ادرى .. من الجماعة طبعاً..
بقوا يكلموا زول زول بى حكاية الفلسة التاريخية بتاعتى ..
فاجأتنى خالتى ذات يوم .. وهى من الجماعة اللى جندتهم لصالح (القوى الوطنية الديمقراطية)..
عبرت عن عطفها علي قائلة:ـ
ياوليدى ما تتحوج للقروش .. القروش تمشى وتجى ، ثم غمتت لى فى جيبى كيس تمباك تخين ..!
الآن يا سلمى ذكرتينى بايام التمكين الاولى ..

اقرأ غداً فى اجراس الحرية ..
( التوربينات سفروها الاردن)!!

زى ما بقولوا
بدل ما تضوى الفرقان و الحلال ..
ضوت لاسامة .
الله يضوى ايامن نحنا .. انشالله بفانوس ..
"ما نحنا ذاتنا البنلعن الضلام .. و مستخسرين فيهو شمعة"