Post: #1
Title: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-06-2009, 03:27 PM
Parent: #0
لأنه بسبب هزيمة الهلال من مازيمبي كاد إبني محمد أن يتعرض لصدمة نفسية -
التفاصيل كالآتي:
محمد هلالابي متعصب - حين تدهور مستوى الهلال العام الماضي وتعرض لهزائم متوالية من المريخ
قرر ترك تشجيع الهلال والتحول لأمل عطبرة نكاية في المريخ.
هذا الغرير بحسب رواية والدته لم يستطع إكمال المباراة ونام أول البارحة وكان الهلال حينها متقدم 2/1
- تقول السيدة حرمنا المصون - مريخابية على السكين - أنها سمعت آخر الليل أصوات زعيق وصفافير وبواري عربات - فظنت أن الهلال قد فاز - حسن ظن بالهلال - فالهلالاب في حلتنا يفرحون بمثل ما تقدم في حال فوزهم أو خسارة المريخ.
حين نهض الإبن محمد فجر الأمس سأل والدته عن نتيجة المباراة فقالت له والله أنا ما عارفه لكن أظن الهلال فاز لأني سمعت أصوات ناس مبتهجين فأكيد الهلال فاز.
فأبتهج وفرح فرحاً شديداً وقال لها أنا عارف انه الهلال بفوز في المقبرة رغم انه مازيمبي ده فريق صعب شديد، وبعد كده الكأس بقى مضمون للهلال.
في هذه الأثناء كان أخاه الأصغر (الأمين) - مريخابي - قد تحرك في الناحية الثانية من منزلنا وأتى بالخبر اليقين من عمه - فعاد مهرولاً أن االنتيجة 5/2 لصالح مازيمبى.
والعهدة على رواية حرمنا المصون أن إبننا محمد قد دخل في حالة نفسية سيئة ألجمته عن الكلام لمدة طويلة - وقالت والله لما حنيت عليهو.... فطيبت خاطره - رغم الشماتة - ..
هسع بعد كده محمد ده إلا يشجع .... منو؟ أنا ذاتي ماعارف
|
Post: #2
Title: Re: شكيناك علي الله يا الهلال كان دائر تضيع لينا محمد ولدنا
Author: Mahmoud Mustafa Mahmoud
Date: 10-06-2009, 06:16 PM
Parent: #1
أبو عبيدة الحبيب...
ولدنا (محمد) دا..العقوق ليهو شنو؟؟؟
الوالد والوالدة مريخاب...والأمين أنا من شفتو مع أولادي يجبد ليك في شفع المغتربين (الغُلاد) ديلاك... عرفته ليك زول (ضو قبيلة)...
الجنا دا قول ليهو عمك محمود بيقول ليك يا ولدي الله يهديك بس..
عاد ماشي تغالط الله في حكمو؟؟
شناة الطبع دي حدها وين آآآآولدي؟؟
الله يقطع الدلع والتدليل وتربية الحبوبات...هسع الولد دا قرب يمرق من ايدنا..
تشجيع الهلال طبعا يعتبر من العادات السيئة..إن شاء الله بكرة محمد يكبر ويعقل ويقول ليك:
"تتذكر زمان يا أبوي لما أنا كنت مدلع وطبعي شين لدرجة إني شجعت الهلال؟؟"
الولد يا أبو عبيدة ودوهو يزور شيخ محمد في مناقزا...
يلحقنا (أبو السري)...أب فزعاً جري..
تحياتي ومحبتي لك ..وشماتتي التي لا تنقضي ...طبعاً ظاااااااااهرة..
|
Post: #3
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-07-2009, 06:49 AM
Parent: #2
أخونا وحبيبنا محمود
السلام عليكم ورحمة الله وبركاته
تداعي شامت:
ما عارف أبدأ ليك من وين ، لكن أتاري الشماتة دي حاجة غريبة خلاص بالذات علينا نحن كصفوة
وفكر الصفوة ده هو الذي كاد بسببه أن يفقد إبني محمد عقله - لأنه أنحن كصفوة بنفتكر إنه
مسألة التشجيع والميول الرياضية دي ما نتدخل فيها - سيما وأن تفتح محمد على الحياة وشغفه
بكرة القدم قد صادف سيطرة هلالية كانت سائدة في سنوات مضت. ووالله العظيم فوتنا فرصة كبيرة
في عودته الي الفطرة السليمة وتشجيع الصفوة - عقب لفة طمبل الشهيرة ومتواليات كلتشي -
حيث ساوم محمد على تشجيع المريخ بمقابل مادي - فقلنا له دي مسألة إختيارية - لو دائر
تعال - وحين إصطدمت فكرته الطفولية هذه بفكر الصفوة - طوالي زولك مشى يشجع الأمل عطبرة
ولم يعد لتشجيع الهلال إلا في منتصف هذا الموسم.
حروب ردة المريخاب:
بعدين محمد ده زول هلالابي جعجاع ومتآمر - تخيل حاول يصطاد في المياه العكرة عقب هزيمة المريخ
الأخيرة من الهلال بالثلاثة - حيث صحيت من النوم متأخر - وكان هو قد سيطر على أجواء المنزل تماماً
حيث أنقلب الأمين وتبعته أخته آمنة وحتى الصغيرة أمل.
وقد أبلغني هو بذلك ، فحاولت تجميع قواي المنهكة بفعل تلك الثلاثية القاتلة - وحدثت أنجالي
حديث أسد جريح - وقلت ليهم يا أخوانا دي كورة والهزيمة ما بتدوم ، أها بكره كان الهلال ده إتغلب
بتقلبوا تاني؟
فكان ردهم لا - وقلت لهم الدائر المريخ يقبل المريخ على علاته والدائر الهلال
يبقى هلالابى هسع بس يتحمل الجاياهو - بس ما كنت متوقع تكون الجاياهو قدر مازيمبي.
وسنواصل هذه الشماتة أخي محمود باذن الله
|
Post: #4
Title: Re: شكيناك علي الله يا الهلال كان دائر تضيع لينا محمد ولدنا
Author: ارصد محمد جلال
Date: 10-07-2009, 07:01 AM
Parent: #3
| Quote: (الأمين) - مريخابي |
ولد عاقل
ربنا يخلي ليك اولادك
تحياتي
|
Post: #5
Title: Re: شكيناك علي الله يا الهلال كان دائر تضيع لينا محمد ولدنا
Author: حمزاوي
Date: 10-07-2009, 07:09 AM
Parent: #4
ابوعبيدة اخوي
مسكاقمي
الهلال عمل في البلد عمايل ما كويسة
شال حسنا وفضحنا
وجاب لينا من كل بلد حكم
ولكن نقول شنو اليجي من السما يتلاقاه الواطا
قول لي ولدك اصبر واحتسب
هالة سأأأأأأأأبة
والهمسة كعبة
من مازيمبي
|
Post: #12
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-08-2009, 12:16 PM
Parent: #5
]العم المريخابي
خفيف الظل حمزاوي
السلام عليكم ورحمةالله
محمد ولدي ده أنا رضيان عليهو عشان هسع بي الحالة النفسية بتاعتوا دي
أعطى فرصة لأعمامه الهلالاب إنه يتنفسوا ويجوا طالعين بعد كم يوم من (اللبتون)
لا تتحسر على الهلال بل تحسر على التحكيم في قارتنا فبسببه وصل الهلال
لنصف النهائي ولنبدأ بحكم مباراة ريونيون وننتهي بحكم مباراة مازيمبي.
الهلال ده ياهو حالو دائما في أي نزال مفصلي - خارجي -
لكن للأمانة لم نعهده ولم نتوقعه أن يكون بذلك المستوى المتهالك
وأول مرة أشوف مباراة تتلعب بالكاتالوج -
ياعمك ناس مازميبي ديل طلعوا الكاتالوج وقالوا لناس الهلال
هيا (مين داسك) (لعبة شعبية سودانية قديمة) 1+2+3+4+5
ولوممباشي صعيبة خلاص
|
Post: #6
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-08-2009, 06:21 AM
Parent: #4
ارصد محمد جلال
يا حبيب
لكن ياخي مازيمبي ده عمل عمائل
البلد كلها (مهجومة) لي هسع
الله يقبل دعاك ويكبر العقول كمان
|
Post: #7
Title: Re: شكيناك علي الله يا الهلال كان دائر تضيع لينا محمد ولدنا
Author: مجدي عبدالرحيم فضل
Date: 10-08-2009, 08:43 AM
Parent: #6
أبوعبيدة محمد الأمين
ياصديقي أولاً: نترحم علي تغيب الهلال من يوم 10 شوال ولم يكتمل البدر لا يوم 14 ولا حتي خمسة عشر وكانت الظلم تغطي سماء البلد بحالة المهم الرد مافي داعي ليهو لأنو بتمو الخمسة عشر رجل ماتو من أجل الهلال ههههه.
أما عند أبو أحميد فمصيرة التوبة الدخلتو عطبرة بتمرقو فوق حد النجيمات حلاته وأمرخته لا بد قادمة علي نااار هادئة له الشوق محمد أبوعبيدة الأمين
وأما عند بقيت أهل الصفوة من الأمين وأمه وآمنة وأمل فهم حق أشتياقنا لهم مساحة جداوية تفوق المليون ميل مربع
لك شوق لا يوصف لا بالخمسة ولا حتي باللمسة عني زيارة ولا عمرة كده ياصاحبي سلام من كل جده فردا فردا
،،،،أبوقصي،،،،
|
Post: #14
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-08-2009, 01:42 PM
Parent: #8
الأخ عمران حسن صالح
سبحان الله الذي له في خلقه شئون
وجمع بيننا في هذا الحوش الكبير بصور مقلوبة
يجمع بيننا هذا الإسم الخالد (محمد)
فببركة (محمدك) توقف (بوستيك) بتاريخ (4/10/2009) حيث لم تعد اليه
إلا هذا اليوم ببركة (محمدي)
لكن بصراحة ياعمران يا أخوي بالنسبة لحالتك دي إنت العاق الحالة الشاذة
ياخي ناس بيتك كلهم على الفطرة يبقى الخلل فيك انت.
أسأل الله أن تصحى من صدمة مازيمبي وتجد نفسك على نهج أهل بيتك الكرام.
قول آمين وكان أبيت أرجى الراجيك وفي لوممباشي بلاقيك....
ونشامت الشماتة....
|
Post: #9
Title: Re: شكيناك علي الله يا الهلال كان دائر تضيع لينا محمد ولدنا
Author: جمال السنوسي
Date: 10-08-2009, 09:04 AM
Parent: #7
هيييييييييييييييع
التور ان وقع تكتر سكاكينو
وان وقع الصقر كتر البتابت عيب
بركة الـ مازيمبي خلاكم تكتبوا في البوستات وتقدلوا اخوان واخوات وخد وهات ثنائيات
زي معارضة العراق ايام صدام (الله يرحمه) لما ما قدرت تعمل حاجة انتظروا امريكا
قتلت ليهم صدام وبقوا هسه هم يقدلوا في البلد
بس الهلال ما مات
الهلال حي وراجع ليكم
عشان حيدفنكم تاني
في استادكم ونحن اسيادكم
ويا ابوعبيدة
ولدك ده هدي ورضي
والزول بالفطرة كده من يلدوهو
بحب امه
ثم ابوهو
ثم الهلال
ودي الفطرة
لانه أي جنى في السودان يولد هلالابي بالفطرة
ثم يأتي فعل الأهل أو الزعل فينتقل لفريق آخر
ومحمود ده عملها واضحة
ونحن قاعدين ليهو
وبنجيهو ليك زي جيهة يوم 11 سبتمبر
يمينا بالله في الحريق يحرق من 3 شوتات
في العيد نزوره تالت يوم
ولو دايرين نزوره ما بنزوره إلا يوم الثلاثاء
وتاني لو اتصلت بيهو بنتظر 3 جرس ما رد بقفل الخط طوالي
ياخي محمود ده شدة ما زعلان
اشتري عربية اتوماتيك عشان ما يعشق نمرة 3
ولا تكون مكتوبة في التعشيقة جنبو
|
Post: #10
Title: Re: شكيناك علي الله يا الهلال كان دائر تضيع لينا محمد ولدنا
Author: ALGARADABI
Date: 10-08-2009, 09:48 AM
Parent: #9
(من بين فرث ودم لبنا خالصا سائغا للشاربين)
صدق الله العظيم
|
Post: #11
Title: Re: شكيناك علي الله يا الهلال كان دائر تضيع لينا محمد ولدنا
Author: معتصم دفع الله
Date: 10-08-2009, 10:30 AM
Parent: #10
| Quote: هسع بعد كده محمد ده إلا يشجع .... منو؟ أنا ذاتي ماعارف |
عليك الله ولدك دا غير الهلال سيد البلد يشجع منو ..
ياخي دي فطرة البني آدم كده يطلع هلالابي ..
إنت عارف الولد لما يلدوهو بقولوا ليهو شنو بعد الآذان ..
الله .. الوطن .. الهلال ..
عافي منك يا محمد ولد نجيض ..
موتوا بغيظكم يا ضللة ..
|
Post: #20
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-12-2009, 02:04 PM
Parent: #11
معتصم دفع الله
عساك طيب ياخي
(بالمناسبة سلم لينا على أخونا عثمان الوسيلة لو قاعد تتمرن لحدي الآن)
- ومعذرة للعودة المتأخرة
ياخي والله الهزيمة صاعقة ومذلة بشكل
ياخي لدرجةإنه الهلالاب كلهم قطعوا النفس
وماقادرين اتكلموا
يعني الحالة النفسية دي ماعند ولدنا وولدكم محمد براهو
قلت الفطرة شنو؟
ياخي شكلو كده البرد في الرياض زاد اليومين دي
تعيشوا وتاخدوا (دش) دافئ في لوممباشي
|
Post: #18
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-11-2009, 11:09 AM
Parent: #10
ALGARADABI
تشكر على المشامتة، عفواً أقصد المشاركة
قلت لي | Quote: [(من بين فرث ودم لبنا خالصا سائغا للشاربين) |
صدق الله العظيم
لكن سؤال أخي القرضابي - حد جاب سيرة سيد اللبن؟
بالذات بعد ما لبنكم (إتقطع ) وزولكم رقد واطا
تعرف أمس بتكلم مع محمد قلت ليهو يامحمد ياخي كدي عليك الله وريني الحصل شنو؟
قال لي والله أنا لما النتيجة بقت 2/2 أصلاً كنت نعسان وزهجت من الهلال شديد.
فقلت له أها شعورك كان شن ولما عرفت انه النتيجة (خمسة) لصالح مازيمبي؟
- قال لى والله إحبطت إحباط شديد
- قلت ليهو أها هسع رأيك شنو في مازيمبي ده ؟
- قال لي والله مازيمبي ده (وكره) -(بالفتح في كل) (الله يمرقنا منها).
- أها والنتيجة كم تتوقعها في لوممباشي؟
فاضطرب مره يقول لو فزنا على مازيمبي بنشيل الكاس ومرة يقول(غايتو الهلال بفوز).
ده محمد لأنه علىالفطرة فقد بانت عنده الفكرة - أها إنتو رأيكم شنو كأسياد لبن عفواً أسياد بلد؟
وبعد ما لبنكم (إتقطع) إلى (خمسة) أوجه لك الدعوة أخي القرضابي لتشرب معانا (خمسة) كاسات (غُُباشة) اصلاً الغباشة بتقطع العطشة
ولو كانت عطشة كؤوس مزمنة كحال سيد اللبن.
|
Post: #17
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-11-2009, 08:13 AM
Parent: #9
جيمي حبيبي وشرياني
الأخ الحبيب السليط/جمال السنوسي
ياخي ما رضيناها ليك قطعة اللسان
وطالما بدأت بالأمثال السودانية
هاك المثل ده وهو أحد أبلغ أمثال أهلنا في دارفور
(موية حارة ولا لعب قعونج)
دحين ياجمال ياأخوي بتعرف القعونج؟ لو ما بتعرف أضرب
لحبيبك محمود الفنااااان
قلت لي الهلال ما مات؟ يعني مدي حالة مرضية، أيوااااا
أها لما يموت بكون كيف؟
لكن يا جمال ياصاحبي والله حالتك بقتت تحنن الكافر
تعيش وتمرض تاني
كان هنا ولا كان في لوممباشي - ده إذا كان الهلال ماشي.
هو الهلال ماشي؟
|
Post: #13
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-08-2009, 01:22 PM
Parent: #7
أبوقصي ياذوق من أين أبدأ حديثي معك؟
ولنبدأ بعد السلام عليكم بالخمسة ذاتا
ونقول ياها زولتي ياها ذاتا
ياها زولتي المشتهيها بي ذوقا وصفاتا
أو كما قال فنان الشايقية
تعرف يا مجدي محمد صب جام غضبه على المدرب وقال كامبوس ده - زول خمله ساكت -
(في هذه المباراة تحديداً). ويراهن على كسب مباراة لوممباشي - مسكين صغير وجاهل
مغرور بأحلام صباه -
سمعت الأرباب قال شنو أول أمس؟ في قناة النيل الأزرق - بطنه طامه شديييييييييييد
وقال المسألة دي شبه مستحيلة. لكن بنمشي لوممباشي.
وحين أراد أن يتستدل بعدم خوفهم من اللعب خارج حدود الوطن إستدل على ذلك
بما أنجزه المريخ أمام السفاقسي في تونس وأمام زيسكو في لوساكا... والمغالطنا يسأل
ناس النيل الأزرق أو ناس مازيمبي...
الناس الصفوة الأيام دي تعيش حالة إنتشاء تغازله نسمات الشتاء التي بدأت تهب
على ربوع الوطن هذه الأيام- يعنى طراوه في طراوة - أقصد شماتة في شماتة.
والله ما حب جده سكن قلبي ولكن حب أهل جده- فهم غير -
ولذلك تجدهم دوماً في داخل الدواخل
وفي الخاطر نكتب لهم في كل ثانية رسالة شوق وحب وتحية
العمرة والزيارة نسأل الله التيسير
وعن أشواقنا فدعنا نردد أنا والأشواق في بعدك بقينا أكثر من حبايب
لكن لوأخذتنا ضروب الحياةونسيانكم شوية ما تزعل ياخي
ده ماذنبي لأنه بكون إنشغلت عنكم بناس مازيمبي
نشامت الشماتة..... باذنه تعالي
|
Post: #15
Title: Re: شكيناك علي الله يا الهلال كان دائر تضيع لينا محمد ولدنا
Author: كمال علي الزين
Date: 10-08-2009, 01:48 PM
Parent: #2
| Quote: الولد يا أبو عبيدة ودوهو يزور شيخ محمد في مناقزا... |
هوي يا الحلاويين بطلوا عنصريتكم دي
ودوه لي (الشيخ الطيب ودالسايح في أبوشنيب) مالو عيبوا لي ؟
|
Post: #16
Title: Re: شكيناك علي الله يا الهلال كان دائر تضيع لينا محمد ولدنا
Author: كمال علي الزين
Date: 10-08-2009, 01:48 PM
Parent: #2
| Quote: الولد يا أبو عبيدة ودوهو يزور شيخ محمد في مناقزا... |
هوي يا الحلاويين بطلوا عنصريتكم دي
ودوه لي (الشيخ الطيب ودالسايح في أبوشنيب) مالو عيبوا لي ؟
|
Post: #19
Title: Re: شكيناك علي الله يا الهلال كان دائر تضيع لينا محمد ولدنا
Author: فايزودالقاضي
Date: 10-11-2009, 11:39 AM
Parent: #16
ابوعبيدة محمد الامين ..ياخي ليك وحشة والله وكل سنة وانت طيب ..وسعداء عرفنا انك من الصفوة ..
| Quote: بسبب هزيمة الهلال من مازيمبي كاد إبني محمد أن يتعرض لصدمة نفسية |
مادام ان الفطرة السليمة هي ان يكون الانسان مريخابي فيعني ان صدمة محمد ليست من هزيمة الهلال بل من تشجيعه للهلال ...ياخي هلالابي دي نفسيات لزول كبير مابالك زول صغير وطري لسه ...
نسال الله لابننا محمد عاجل الشفاء ..
تخريمه : سألت منك وعرفت انك غادرت البلاد ولم استدل لك على وسيلة اتصال ...
تحياتي لك ولاسرتك الكريمة ..
فايز ود القاضي ..
|
Post: #24
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-15-2009, 10:30 AM
Parent: #19
الأخ الحبيب فايز ودالقاضي
السلام عليكم ورحمة الله وبركاته
ربنا يجعل البركة في ولدنا محمد الخلانا نلاقيك يارجل يا صفوة
ربنا يستجيب دعوتك ويثوب محمد الى فطرته السوية
ربنا يزيل عنه هذا الكابوس الأزرق
ربنا يدينا الفي بالنا
وما تشوف وحش يافايز ياخي وإن شاء الله أمورك كلها مشت تمام
قلت لي عملت الإضافة بتاعة الولد كيف؟ وجه مشفق عليك وعليه
فقد تابعت معاناتك تلك مع ناس جهاز المغتربين
الهاتف والإيميل على المسنجر
|
Post: #21
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-13-2009, 12:49 PM
Parent: #16
الأخ الأستاذ/كمال علي الزين
السلام عليكم ورحمة الله
كدي أول حاجة ورينا انت مع محمد ولا أبوهو؟ عشان لما نمشي نزور
- مناقزا - ولا أبوشنيب يمكن ينالك من الدعاء نصيب -
لأنه إحساسي بيك إنك من الصفوة - حلوة دي مش كده؟
تاني حاجة إن كانت الجزيرة تمثل السودان المصغر من حيث إنصهار قبائل السودان
فإن منطقة الحلاوين تمثل الجزيرة المصغرة لما تضمه بين حناياها من شتى الإثنيات
السودانية والوافدة ولم يحدث أن طفرت الى السطح أي بوادر للعنصرية في هذه الرقعة الجغرافية.
وقبل ذلك كله فان شيخ محمد يمثل خير مثال لإنسان المنطقة ومن خلال تلاقح عديد من الدماء
التي سقت أصله الطاهر الطيب المبارك.
بعدين شيخ الطيب ودالسايح ما يعيبوا إلا مسخوط ساكت ياكمال يا أخوي فهو عليه رحمة الله
تشهد له الجوامع الإنبنت ضانقيل
ومنها مسجد قريتنا( البويضاء) العتيق.
نفعنا الله بجاههم أجمعين.
|
Post: #22
Title: Re: شكيناك علي الله يا الهلال كان دائر تضيع لينا محمد ولدنا
Author: كمال علي الزين
Date: 10-13-2009, 01:00 PM
Parent: #21
Quote: كدي أول حاجة ورينا انت مع محمد ولا أبوهو؟ عشان لما نمشي نزور
- مناقزا - ولا أبوشنيب يمكن ينالك من الدعاء نصيب -
لأنه إحساسي بيك إنك من الصفوة - حلوة دي مش كده؟
|
صفوة ساي وساكن العرضة جنوب جنب إستاد المريخ علا (دباسي)
):
|
Post: #23
Title: Re: شكيناك علي الله يا الهلال كان دائر تضيع لينا محمد ولدنا
Author: كمال علي الزين
Date: 10-13-2009, 01:05 PM
Parent: #21
Quote: تاني حاجة إن كانت الجزيرة تمثل السودان المصغر من حيث إنصهار قبائل السودان
فإن منطقة الحلاوين تمثل الجزيرة المصغرة لما تضمه بين حناياها من شتى الإثنيات
السودانية والوافدة ولم يحدث أن طفرت الى السطح أي بوادر للعنصرية في هذه الرقعة الجغرافية.
|
يعني (الدباسين) و(الحلاوين) بقوا سمن على عسل ؟
):
مداخلتي كانت على خلفية المناكفات المعهودة بين القبيلتين (زي الشوايقة والجعليين)
والتي بالتأكيد لم ولن تصل إلى حد (العنصري) فالناس أهل وتجمعهم أرحام ومصاهرات ومنطقة مشتركة
Quote: .وقبل ذلك كله فان شيخ محمد يمثل خير مثال لإنسان المنطقة ومن خلال تلاقح عديد من الدماء
التي سقت أصله الطاهر الطيب المبارك.
بعدين شيخ الطيب ودالسايح ما يعيبوا إلا مسخوط ساكت ياكمال يا أخوي فهو عليه رحمة الله
تشهد له الجوامع الإنبنت ضانقيل
ومنها مسجد قريتنا( البويضاء) العتيق.
نفعنا الله بجاههم أجمعين.
|
للأسف لم أسمع عن الشيخ/ محمد المعني هنا (يلحقنا وينجدنا)
الشيخ الطيب ودالصديق ودبدر (ودالسايح)(شيد 99) مسجداً حسب علمي
جعلهاالله في ميزان حسناته ..
محبتي ..
|
Post: #25
Title: Re: شكيناك علي الله يا الهلال كان دائر تضيع لينا محمد ولدنا
Author: أبوعبيدة محمد الأمين
Date: 10-20-2009, 08:13 AM
Parent: #23
تعرفوا أسوأ ماتمخضت عنه مرمطة الهلال في المقبرة شنو؟
الجواب هو تسرب ثقافة الشعوذة والدجل لقلوب وعقول الكثيرين منا وأولهم صغارنا
حيث هاتفت الإبن محمد عقب مباراة الهلال بلوممباشي وقد قابلنى بفرحة طاغية
قائلاً لي: عشان تعرفوا يا أبوي إنه المباراة الهنا كانت (مكجرة)
وأنه (.....) قبضو البوليس لأنه كان ماشي الحبشة عشان (يكجر) مباراة لوممباشي
قلت ليهو كلام (الكجور) ده خليهو لحدي ما نتلاقى
لأناقشه برواقه وإعادة الإتزان لتفكيره في هذه الناحية
(يعني نحن قلنا القصة كورة وهي في النهاية رياضة وترويح لكن تجيب ليهاأفكار هدامة
فذلك هو المرفوض ولنتكاتف جميعاً كعشاق رياضة لمحاربة هذه الثقافة السوداء)
قلت ليهو طيب أها هسع انت معنوياتك كيف؟
قال تمام التمام
بالذات بعد ما غلبنا مازيمبي
وعشان إنتو يالمريخاب ما تقولوا إنكم الوحيدين الهزمتوا مازيمبي
|
|