لـمـاذا إنـهـزمـنـا وكـيـف نـنـتـصـر ؟!

ــــــ
طبعاً البارحة أول مرة أفتح لي بوست بخصوص (الكورة) وحتي إنه (مجوووبك) بحاجات تانية, لكن وسط (الربة) التي حدثت في المنبر بعد أن دخلت علي كثير من البوستات خاصة بتاعات المريخاب التي ما زالت موجودة في مسألة الهزيمة (قنعت) من خيرها , وقلت أمشي يا ولد وشوف ليك عشاء , وبالفعل مشيت و(إتعشيت) كويس وكمان وصلت البيت (كرطعطة) لي كاسة حليب ما أصلو باقي البلد القاعد فيها دي ما فيها أمي عشان (تحنسني) ما هي من زمان وأنا صغير أمي الله يدها العافية وكما أبوي زاتو الله يدهو العافية _ قولوا أمين بالله عليكم _, قالت لي لا (هلال بينفعك ولا مريخ ) تري كاست الحليب هي البتنفعك أشربها ياولدي بلا (الثلعب) بلا (بخيت) , كبرت وختيت كلامها حلقة في أضاني وبعد ما كملت كاسة الحليب قلت بصحتك يا بخيت ما أصلو بلدنا ثعالبها كثرت وحمدت ربي وكمان ختيت (بطييخت أوباما) الــ في برفايل صديقي حيدر الزين فوووق بطني ,

آها كل مرة سوف ننهزم كان آياهو دا الحال .

نواصل

ــــ
دخلت في البطانية الما خمج باقي بيوت أبو (الدنان) دي ما بتتنام إلا بالبطاطين لكن الليلة بالذااات قلت إن شاء الله تسترني من الخجلة , ومع العلم ليكم أنا كنت بشجع الهلال وكتين كنا (شفع) (بحماس) بس ما حقت فلسطين علي كل حال مازلت أشجع الهلال بس زي الأستاذ المراقب للطلاب في الإمتحانات .

ــــ
أكثر شيء متعب إنك تفتش للنوم ودي حقيقة والله , فالنوم لوجاك هو ونمت فترة قليلة جداً بتكون مرتاح والعكس , لكن حالة ربة المنبر مازالت بذهني و شتت الإنتباه (عايره وأدوها سوط ), فتحت التلفزيون , دورت ودوري بي , وما لقيت شيء أكمل بيهو السهرة .

ــــ
ده البوست المجوووبك بتاع البارحة


الهزيمة ما فيها ( مذمة ) لكن الإشكال في البلد الماعندها وجيييييع

ـــــ
قلت أنوم والدنيا معايش وورانا دوام حتي كان بالعافية ,إنتو قايلني نمت ؟! أبداً تقلبت يمين ويسار , والأسي برضو معاي , وما شارده ولا وارده في الحال العلينا إلا وهي طافت بي , وأنداحت عليّ كمية من الأسئلة خلصت منها بالسؤال لماذا إنهزمنا وكيف ننتصر ؟!

ــــ
قلت فيّ نفسي ياخي ده سؤال كبير شديد آآي والله شنو البنزلوا في بوست , ده سؤال بتاع (بحث) عديل وعنوان ليّ كتاب كامل ودسم كمان .

ـــ
الهزيمة التي أقصدها تشمل هزائم الهلال والمريخ والفريق القومي والخرطوم ثلاث والدوري الممتاز والمحلي والليييق والدورة المدرسية والشباب والناشئين في المدن والضهاري بالإحياء والفرقان ...

وبرضو بتشمل هزائم الحكومة والحركة الشعبية والمعارضة والحركات الأخري وجميع الأحزاب

بتشمل هزائم وفشل كل الوزارات الدفاع والصحة والتعليم والتخطيط والثقافة والإعلام والتعليم العالي والصناعة ...الخ

وبرضو بتشمل هزائم وفشل المتعلمين والمعلمين والثقافة والمثقفين والمسرح والمبدعين والفنانيين

وبتشمل كل هزيمة صغيرة وكبيرة في المجتمع السوداني هذا بكل إختصار .

ــــ
لانو الخاسر الأول من تلك الهزائم هو الإنسان السوداني الذي هو نواة لشعب كامل بكل تعددياته وثافاته وسحناته ... هو الخاسر الأكبر ..!

اللهم كتر الهلالاب الراكزين البجو ويكتبوا طوالي ديل دا الفرق بينهم وبين غيرهم

انت اخير عندك شغل ودوام بس انا عندي الانين عندي صاحبي قتع عديل قال ما بمشي المستشفي الليلة والحالة هو ما في السودان
ضربت ليهو قلت اخفف علي روحي حبة

المهمة انا زاتي عندي شغل والمشكلة الكبيرة عندي امتحان

افتح اقراء لي كلمتين تلاتة تجيني ضلابة الجزء والكرت الاصفر بتاع علا الدين اقول يا جماعة دا كان بقي احمر كان نكون وين هس

غايتو المم نمت كويس وصحيت الصباح مننعش حبة

الحاجات البيضة ناس زبادي وجبنة ليها سر في الحكاية تخف حبة

المهم الموية برضو فيها سر
فيا عمدة اخوي الكلام دا م بقعد كتير مع الهلال صدقني الموضوع دا اسبوعين وبتمسح تب

بتقعد حبة مكاواة وليك علي الغبينة دي احسن من الفرحة النص نص

بنفشها في ناس كدا قريب

كمان

الفاتح - هلالابي

ـــــ
الفاتح سليمان سلام ..
والمشكلة الكبيرة عندي امتحان

هذا المهم في الأمر

الله يوقفك في الإمتحان

والباقي هزائم هزائم

ـــــ
إنهزمنا تعني فشلنا, وإنتصرنا تعني نجحنا

فأول أسباب الفشل :

موت الضمير العام :

والكل يشهد علي مانحن عليه فلا نبريء أنفسنا فنحن شئنا أم أبينا مساهمون في العبء وموت هذا الضمير العام , فواقعنا مرّ ومستقلبنا مظلم وللإسف هذا نتاج طبيعي لتراكمات الماضي القريب , فلا بد أن ننادي بإيقاظ الضمير العام وبث روح الهمة والغيرة والمثابرة فيه قبل أن تقع الأخطاء الجسام و قبل أن يتمزق الجسد تماماً فالزمن في غير صالحنا...

كيف إيقاظ الضمير العام ؟!

ــــ
كيفية إيقاظ الضمير العام ؟!

يقول علماءالنفس يولد الطفل بريئاً, تلقائي التصرف , سليم الطوية , وفي سنوات التنشئة الأولي يتكون لهذا الطفل (ضمير) هو في الواقع رافد من ضمير والديه يعرف من خلاله الثواب والعقاب إذا أحسن من نظر وجهة والديه يثاب وإن أساء من وجهة نظرهم والديه يعاقب .

حضور ومتابعة ...

ــــ
حضور ومتابعة ...

أستاذنا عماد خليفة تحياتي لك والأسرة الكريمة


شرف عظيم ليّ ,الحضوروالمتابعة وهي دافع ومحفز للإستمرارية .


تسلم .

ــــ
بالتأكيد لم يكن يسع إدراك هذا الطفل إلي مفاهيم أكبر مثل الوطنية والجمال والقبح والخير والشر ولا حتي المرتكزات العقدية ...الخ , ولكن علي الوالدين دوراً فعند ما يتكون (الضميرالرشدي) من الرشد وليست الإرشاد لهذا الطفل فللوالدين نصيب مما كسب طفلهم الراشد , فهنا يدخل الدور الأول للمرشيدين الإجتماعيين والنفسيين والعلماء من خلال الإعلام بكل أطيافه في توجيه الأمهات والأباء في كيفية التنشئة السليمة للطفال , حتي تسد كل الثقرات .

ـــــ
الأسرة تحتوي طفلها , ويختلف التعامل من أسرة إلي أسرة , ولكن أقل مايكون بعد تربية المنزل داخل الاسرة (النواة أو الممتدة )أن يكون الطفل علي أهبة الإستعداد للنزول للشارع في المكان الاول للعبور إلي (المدرسة) وللإسف فإن شارعنا السوداني ليس له ضوابط , ولا نظام ولا قانون فمن السهل جداً , أن نجد من يمارس الأبوه والأموه كسلوك علي طفل غير طفله , ولذا قلنا أن يكون علي أهبة الأستعد من داخل الأسرة حتي لا يعطي من يسلك الشارع أن يتسلط , وإن كانت جرعة التربية كافية يستطيع الطفل ويجتاز الشارع سلوكياته بكل يسر وهذا ممكناً .

ــــ
الثاني فشل المدارس في (التربية) علي وجه الخصوص فالتربية قبل التعليم وفشل التعليم أيضاً.


المدرسه هي ركزية أساسية في صناعة الأجيال ودورها متعاظم ومتكامل مع دور الأسرة وهي عماد المجتمع وهي التي تكتشف مواهب وإبداعات وميول الطفل وهي في مرحلة مبكرة وهي الملاحظ الأقرب لنمو شخصية الطفل بطرق علمية فكلما تضاءل دورها كلما إهتز المجتمع والأسر والشخصية .

ولكن هنالك إشكاليات كثيرة ومعقدة أومتداخلة ومترابطة داخل تلك المؤسسة , ولا يمكن فصل تلك الحلقات من بعضها البعض , وتبداء الإشكاليات في (آحادية) المناهج ولا وجود بدائل _الإختيارات للإسرة _المنهج التي ترقب فيه للتدريس طفلها , فوطن مثل السودان فهو في شكل قارة بحالها نكثر فيه اللهجات والعادات والتقاليد والأعراق , فالصور والرسمومات التوضيحية لربما تتحيز لجهة ما, مما تخلق (النمطية) 0 و(المقولبات) والآحادية في المناهج يؤالب الضغائن ويضيع كنوز من المعرفة ويساعد إندثارها وموتها بسبب الإهمال , فكيف تتلاقح الثقافات في ظل الأحادية؟! بالتاكيد لا يحدث تلاقح بل تحدث (الهيمنة) بقصد أو دون قصد ..! هذا فيما يخص بإختصار جهاز تطوير المناهج بعلمائة وخبرائه فهم مسؤلون مسؤلية كبيرة وتقع علي عاتقهم كل الجهود فالأمانة العمية التي يمتلكوها تجعلهم يرفضون آيها أحادية حتي لا يشاركون في خيانة الأمانة العلمية ولا يقعون في فخ الفشل , ومن حقهم أن يرفضون آي سياسات تخطيط يراد لها أن تمرر عبرهم من أجل مصالح ضيقة وإن فعلوها فقد خانوا الأمانة وهم من الفاشلون .

ــــ
من الإشكاليات داخل فشل المدرس/ة والناظر/ة داخل المدرسة :


إذا لم يحبب المدرس/ة مادته إلي طلابه فهو/ي فاشل/ة وإذا لم يحبب الناظر/ة المدرسة إلي التلاميذ/ات والمدرسين/ المدرسات فهو/ فاشل .

ـــ
المدرسة والبيئة الداخلية :

لم تكن البيئة الداخلية للمدرسةأحسن حالاً من المنهج فجدارها الداخلي الذي يمتد بالظل إن وجد أصلاً جدار هو الذي يتبول عليه التلميذ ...؟! فالذي لا يحفر باطن الأرض ليقام دورات مياة , لا يستطيع أن يحفر في عقل الطفل مكاناً لنور العلم..!

ومع العلم عمليةالإخراج فسولوجية وضرورية لإستمرار الحياة .

ــــ
المدرس /ة:

من المفترض أن قبل وصول المدرس/ة إلي المدرسة أن يكون مرة بمراحل ويجب عليه أن يكون إجتاز كل مرحلة بجدارة , وأي أخفاق في مرحلة يؤدي إلي فشل .

ـــــ
المدرس/ة والمادة :

كل صاحب تخصص في تخصصه الدراسي , وعليه أن يكون هاضم مادته ولديه روح التطلع في الزيادة من العلم والإطلاع يوماً, ومن المفترض أن يكتسب معلومة جديدة لنفسه أولاً وإلي تلاميذه , ويتلقي من الدورات التأهيلية الكافية .

فلا يعقل خريج زراعة يدرس مادة (العلوم) أو(الرياضيات) ...!

اذا عرفت سبب الخمسة الا تبقي حاوي يا قريبي.
اي زول شايفوا قاعد يقول سبب في المنبر دا...
المهم .
الطيشاب ديل انغلبوا...

العمدة الرجل الجميل

ننتصر بالحب

نحن لا نحب بعضنا البعض

ونحسد بعضنا البعض

لا نخطط وليس لنا منهج

وطموحاتنا اكبر من امكانياتنا

ـــــ

Quote: العمدة الرجل الجميل ننتصر بالحب نحن لا نحب بعضنا البعض ونحسد بعضنا البعض لا نخطط وليس لنا منهج وطموحاتنا اكبر من امكانياتنا

إنت الأجمل يا خليل

الشيء الوحيد الما فيهو كلام أبداً هو الحب وحتماً سوف ننتصربه

هو حسه كما الحب البخلينا نكتب زاتو شنو ؟!


لكن والله يا خليل أخوي النصيحة , قدراتنا قدر طموحاتنا الكبيرة ويمين يفضل باقي

لكن الله إبتلانا بي حكومات وأحزاب أصلها ماخافت فينا الله ولا نظرة برحمة فوق خلق الله وأحلامهم

تسلم يا عزيز ..

ـــــ

Quote: اذا عرفت سبب الخمسة الا تبقي حاوي يا قريبي. اي زول شايفوا قاعد يقول سبب في المنبر دا... المهم . الطيشاب ديل انغلبوا...

هلا يا احمد

تصدق بعتقد عن قناعة إنو الأشياء لا تتجزاء أبداً

بعدين يأأحمد والله الهزيمة مافيها شيء عادي تحدث لفرق أكبر برشلونة وريال مدريد ..

لكن وريني قعطة الكهرباء سببها شنو ؟! والله انا حارقاني أكثر من الهزيمة لوتصدق


بالله عليك ما قريت في موقع كورة المصرين بيتضحكوا علينا كيف ؟!


وتحياتي يا قريبي ..

ــــ
المدرس/ة والفصل :
يمارس المعلم الناجح بمهارة عالية الجانيين التربوي والتعليمي داخل الفصل وخارجه مع طلابه .

فالتعليم (فن) فمن لم يكن فناً لم يكن مدرساً .

فالذي يحسب الزمن بالمال والحصة بالمال يسقط قيمة التربية والتعليم والدولة إن لم (ترعي) و(تهتم)بالمدريسين شباباً وشياباً , فلن تخلق جيلاً متقدماً ومتطوراً بل هي والفشل تؤامان ومن بويضة واحدة .