Post: #1
Title: وصية
Author: أبوذر بابكر
Date: 09-30-2009, 01:00 PM
Parent: #0
يا رحيبة
وإنتى جايه
جيبى لينا معاك حبه
ولو شويه
من ريحة الفرح الهناك
من طينة الواطا القديمة
ضريرة لى عرس القمر
يا حبيبة
وإنتى مارقه
من ترتيل القرايه
شاقه طوفان الزحام
جاهره بى ضوك
متاوقه العيون
الساكنه فى جوه الكلام
حايمه زى العيد
تعطرى فى المحلات
فجه فجه
وساحه ساحه
تطفى نيران الهزيمة
الشخبطت وش المحبه
طاله زى ضحكة صباح
شهقة وتر
مطرة نهار
خدرة شدر
طعم إبتسام
غازله الشوارع بالسماحه
وبالتفاصيل الوسيمه
حتى الأرض شهقت بقت
زى الشمس ساعة تعاين
جوه فى وش المرايه
مشدوهة بى صندل غناك
عطر الجنان
الجانا مارق من صفاك
سكن المسام
وما تنسى برضو
وإنتى جايه
أعشى فرقان السما
قسمى الأعياد علينا
أملى عب الليل غنا
اديهو من جرتق بهاك
فى كل شارع قومى شدرة
وابقى رايه
وكل زول اديهو آيه
وإنت جايه
ابقى حفلة يا رتينه
ابقى حنه
كونى زغرودة وبشاره
ابقى حوليه وذكر
هاديه زى موية المحاية
وهادرة زى نيلنا الطمح
زى نداوتك يا رزينه
الباينه فى وشك إشارة
وإنت جايه
زرقا زى حلم الأرض
لملمى الغنوات معاك
كبيها فوق حزن البشر
شيلى المواجع من قلوبن
ولونى الآفاق فرح
امليها بالطول والعرض
وإنتى جايه
خلينا بس
نقراك حكايه
تشحتف الروح فى القصيدة
نقراكى كلك
نبدا بالحرف البدايه
روح المواويل الحنينه
قصة الريدة الروايه
ونشحد الله
يا الله هوى
يا الله هوى
يا الله هوى
اصلو ما نصل النهايه
وإنتى جايه
دهشة فى آخر السؤال
ونشوة شارقة من وجيهك
نابعه من جوه الإجابه
يا حبابك
يا حبابك
ويا حبابه
وإنتى جايه
وديمه نتمناكى غايه
وكونه إنه تجى وتفوتى
ما كفايه
زى خريف بزور ويرحل
مطره مبروكة وسقايه
والبريدك
شد حيل قلبو
وتوكل
شد خيل ريدو
وتوكل
جايى ليكى
عليك عيونك
خلى لى حبه يقين
اسقى بيهو الروح
واوصل
====================
زمان فى الرياض 1990م
|
Post: #2
Title: Re: وصية
Author: أبوذر بابكر
Date: 10-01-2009, 11:59 AM
Parent: #1
فى ذمة المسافة
فى روح الليل
ووش النهار
|
Post: #3
Title: Re: وصية
Author: ابو جهينة
Date: 10-01-2009, 12:21 PM
Parent: #2
ابا ذر
كل سنة و إنت طيب
Quote: وإنتى جايه
خلينا بس
نقراك حكايه
تشحتف الروح فى القصيدة |
الوصية في منتهى الروعة يديك العافية
|
Post: #4
Title: Re: وصية
Author: أبوذر بابكر
Date: 10-02-2009, 05:29 PM
Parent: #3
والله إنت الفى منتهى الروعة
والطيبة
شكرا ليك يا جلال على المشاركة
|
Post: #5
Title: Re: وصية
Author: abdalla osman
Date: 10-02-2009, 07:32 PM
Parent: #4
غازله الشوارع بالسماحه
وبالتفاصيل الوسيمه
حتى الأرض شهقت بقت
زى الشمس ساعة تعاين
جوه فى وش المرايه
مشدوهة بى صندل غناك
|
Post: #6
Title: Re: وصية
Author: أبوذر بابكر
Date: 10-03-2009, 07:33 AM
Parent: #5
كيف الحال يا عبد الله
والله كويس فى حاجة ما بطالة فى القصيدة دى
تعرف
أنا كلما أقراها بقعد اضحك
جد والله
أضحك على نفسى وعلى القصيدة
دى من القصائد الساذجة جدا
من ناحية التوبيك والمفردة وطريقة النظم نفسه
الغريبة مافى زول لاحظ للحتة دى
كتبتها يمكن قبل عشرين سنة
مع إنه ممكن مع شوية تصليح وتحديث تبقى قصيدة حقيقية
لكين قررت أخليها كده زى ما كانت
يا زول شكرا ليك
|
Post: #7
Title: Re: وصية
Author: ابو جهينة
Date: 10-03-2009, 08:35 PM
Parent: #6
عزيزي أبي ذر
تحياتي
Quote: دى من القصائد الساذجة جدا
من ناحية التوبيك والمفردة وطريقة النظم نفسه |
لفت نظري ردك أعلاه للزميل عبد الله
و لكن أخالفك الرأي
فالقصيدة بنت لحظتها تأتي بمخاض معين عند لحظة معينة
لو لاحظت أنا إقتبسْت جزئية معينة و علقت عليها بأنها وصية معتبرة
لو حاولنا نقد القصيدة فنحن ليسو في مقام مرتبتك الشعرية دون جدال
و لكننا ننظر إلى القصيدة كلوحة نختار منها الجزء المميز
لذا فلا تحكم عليها بالسذاجة .. بل بلوحة تحتاج إلى تشذيب
لذا صدقني لم أجاملك قطعاً عن طيب خاطر أو علاقة حميمة
أنا أقرأ بعمق و أعلق .. بكل أمانة
دمتم
|
Post: #8
Title: Re: وصية
Author: أبوذر بابكر
Date: 10-04-2009, 06:23 AM
Parent: #7
جلال العزيز
شكرا يا صديقى على الإهتمام والمتابعة
ما قصدته فيما جاء فى حديثى للأخ عبد الله
هو أنى أنظر للنص المكتوب بمنظار الآن ومقياس الحالة الشعرية والشعورية الراهنة
بمعنى لو أننى أردت إعادة كتابته الآن مجددا فإنه حتما سوف يخرج بطريقة مغايرة
ربما لتغير عوامل وعناصر عديدة، أهمها طبيعة النظرة ذاتها للمعانى وكذلك تغير المفردة ربما
وأتفق معك تماما فى أن القصيدة، والقصيدة تحديدا، تكون وليدة لحظة بعثها، تتشارك خلقها أشياء توفرت فى تلك اللحظة وأسهمت فى خروجها بالشكل التى هى عليه، وقد تختلف وتتشاكل فى اليوم الذى يليه
وددت القول لأخينا عبد الله بأن النص فى شكله الذى أتى عليه، لا يعجبنى الآن للأسباب آنفة الذكر، وهكذا هى بدايات الأشياء دائما، تبدأ على غير ما نحب ونرضى، وقد تتطور فى لاحق الظروف
ثم أجدد لك التقدير والإعزاز على متابعتك وإهتمامك الكريم
ودمت طيبا وسعيدا
|
Post: #9
Title: Re: وصية
Author: Aymen Tabir
Date: 10-23-2009, 05:18 PM
Parent: #8
سلام يا صديقي العزيز
وشوق ..
قريت من فوق القصيده .. ووقفته مره وقريته تاني .. وحسيت في حاجه جديده بقراها فيك لي اول مره .. نزلته وقريت التعليقات .. وتعليقك عن النص "اتكيفته"
عارف .. زمان شديد كنته بقول انا " قاص" وبحب اكتب قصه قصيره طوالي وخلاص رتبته نفسي زي ما بقولوا على كده .. لكن يوم كده حصلت حاجات جوه وكنته داير اكتب وما طلع غير شعر .. ورغم اني ما بحفظ وده عيب لكن اول واحده حافظه صم
لقيتك
فرح مبتور وشارد
عرفتك
روعه تنساب اندهاش ترسم السريالي وتدي لي عمق البنفسج عمق تاني
لمستك
......
وتمشي طوالي على هادي الوتيره
المهم .. تمر السنين وتمر .. وبحصل لي الحصل ليك .. بضحك .. وافكر فيها .. ومره كده قلته الا اكتبه تاني .. والله جاطت كيف !
يا صاحبي
القصيده ياها القصيده .. بي زمن وبي طعمه .. زي الحله والاصحاب والعشيقات .. يمضي الزمن ونتغير .. ويبقى الاحساس بهم نفس الاحساس ..
"احتفاءا بالنص العتيق .. والعوده للكتابه معك على جدار نقشك الخاص "
لك التحايا
ودالسر!
|
|