Post: #1
Title: جـــوبــاك حــيـاة فـي الـدايـــات
Author: حبيب نورة
Date: 04-03-2004, 07:06 AM
Parent: #0
أتدفّق فوقي شوية شوق ....... ومرقت خطاي دافراني اللهفة ووجع
الاّهة الغربة الكربة.......... لداحة الهم الواصل الركبة.....
اصلوا الحال بطّال يا ناس ..... جاطتني مغايس زمن الترحال....
وما كضّبت ولا أتلفّتة....... كاسن عيني للباب الحنين!!!
وحلفت يمين ....... أغشي أقرب دكان اتصالات .... أضرب شوقين
للبلد الفيها النيل مترامي...... وجادع فوق جيدا مســاير عيش الريف
وصفق اللوبيا ......
البلد الزرعت فيها نجوم الليل جريد الضي فوق رمل الضلمة ... وزرعت
في الجرف الناهد....طين النور...
البلد الفيها النيل ضكران...... وفاتح بيت ضيفان المطرة ..بليلة وكسرة
وسترة حال....
كان في جيبي زي عشرة دقايق .... وشوقي حوالي تلتمية ريال!!
مديت عليّ السلك .... وعرضت فوق دلوكــة الارقام !! .... وفي البطان
أنجلدت تلتاشر سوط !! ..... قدر مسافة الشوق بين جبرة ... وجدة ..
قالدت الحاجة .... ولحست رجول الفال أتبرّك .... وبعد ما شربت سلام
الشوق البكري!!! .... تاوق حلقي بفتّش طعم البركة وكيف الحال !!!
رزاز الدمعة الهم .....شرق السماعة ...ولون المر ياناس في لهاتي...
وسعلت الحاجــّة نورة ....من العيشة .... وناس الشارع...... رطل السكر ..
غنماية شايا ....وحاجة بتول مشــاطة الحلة الوداعية ....... فطور الشــّفع
وحق الحصــّة ال في العصــرية....
الحاجــّة اصلوا ما دســّت علي ..... قالت لي يا ولدي .... القريشات
ضايعات بين تزكرة البصات ..... وبين مسوح البنيات ..... اسكت ساهي
يا ولدي ......عــاد جـــوبــاك حــياة في الدايــــات !!!
جوباك حياة ...!!؟؟؟ دة شنو يا أمي الحاجة ؟؟ دة الزمن المـر ...اليوم
ما بسـر ... الديمة بضــر.... كر يا يمة....معقولة الايام بقت كدي ؟
قالت لي سجم خشمك يا الغبيان .... كدي تعال السودان وشوف الحاصل
أندست دمعة ومرقت تاني.... وفاتت لوعة وجات تتقدّل في عبراتي...
فتحت شرفة حزنك مشهد...شفت النيل الازرق بنزف...وجوة الابيض
لون الدم الاحمر مركب....من غير مجداف سايقاهُ الشيمة...وبطن النيل
حامل بي الحرام...كيفن تلد الموجة الاخضر....البلد الطيب يا ناس مات
شكل الغصــّة وطعم المأساة...........................وزي ما قالت حاجة نورة
عاد جــوباك حـــياة....في الدايـــــات..............................................
|
Post: #2
Title: Re: جـــوبــاك حــيـاة فـي الـدايـــات
Author: حبيب نورة
Date: 04-03-2004, 07:29 AM
دايرين واحد يحكي لينا قصة المثل دة
بس واحد يكون دهري مصلّح ّّ!!!!
|
Post: #3
Title: Re: جـــوبــاك حــيـاة فـي الـدايـــات
Author: سجيمان
Date: 04-03-2004, 08:38 AM
Parent: #2
حبيب نورة
Quote:
بس واحد يكون دهري مصلّح ّّ |
كيف يعني؟
|
Post: #4
Title: Re: جـــوبــاك حــيـاة فـي الـدايـــات
Author: حبيب نورة
Date: 04-03-2004, 08:41 AM
Parent: #3
لا دة أسعل منو هشام
الزول دة بعرف لي جنس الامور دي
هسة عليك الله الكلام دة كلوا
ما لقيت حاجة تعمل ليه كوت غير الحتة دي؟
الله يجازي محنك
|
Post: #5
Title: Re: جـــوبــاك حــيـاة فـي الـدايـــات
Author: حبيب نورة
Date: 04-25-2004, 04:59 AM
Parent: #4
تاني جاطت الشغلانة دي
|
|