ماذا نصـــنعُ بالوعــي أذا كانت الحبيبة مســطـولة !!؟

فـاجأ المخاض عيون سيجارتي و فاضت بعد ان أسلمت نفسها الي
عود ثقاب شهواني !! ولكنها لم تكن تبكي الخطيئة و أنا كانت
تبكي التجاهل الشديد ,, فقد كان الجميع يصر علي تكريم الغيمة
ومنحها وسام الهطول من المطرة الاولي !! ويتجاهلون الماء ,, و
لا يزكرونهُ الا حين ألتقاء زرتي هيدروجين مع أكسجينة في معادلة
كيمائية !! والناس أيضاً يحتفون بالغابة و ينكرون علي اللون
الاخضر دورهُ ,, تري لو كانت الغابة صفراء عل كانت تسر الناظرين؟

لذا بدت لي سيدتي السيجارة متجهّمة عابسة هذه الليلة فحاولت أن
أحاور نفسيتها قبل أن تحتضر في المنفضة وتتحول ألي رماد,, و في
الوقت نفسه قرأت أصرار رفيقتي الجميلة لمعرفة ما يدورُ بخاطري
ولكني لم أشأ أن أمحــو أميــّة توقـّعها بتصريح !!!

يا حبيب انت بتفكر في شنو ؟
قلت لها : ولا حاجة انشغلت بي موضوع كدة و أنتهيت.
ياخي دة علي انا انت من قبيل ما قلت كلمة ؟
والله يا روحي مافي حاجة خليك مع السيجارة اللزيزة دي

و بالفعل تطاوفت أخيلتي مرة أخري في عوالم سيجارتي,, وفي داخلي
أحتراز لم تساعدني اللغة في الأفصاح عنهُ ,,و لكني اّثرت مباغتة
خواطري بسؤال عن اللاوعي كحالة واللاوعي كذهنيّة منفلتة من سلطة
الوعي اللاواعي ,, و أدركت أن الخط الفاصل بينهما لحظة شهــيق!
و أنا أحبو ألي سيجارتي المشهرة في وجه أدراكي لحدود الذماكنية
اللحظية بأنامل لاهـثة !! وقتلت عيناي مرة أخري عندما أهدتني هي
قبلة الحيـاة و لكني أستطعت ان أسألها عن كيفية نجاحها في تغييب
عقلي و أحساسي حضور !! و لخـّصت أجابتها في أن الوعي هو جمهورية
ديكتاتورية بحتة ,, واللاوعي هو حصان طراودة !! الذي علي صهوتهِ
نرتحل الي ديمقراطية الادراك الواعي وهو قادر علي أحتمالنا و
يتـّسع لكل أنفعالاتنا ويضيق بهواجسنا حتي نخرج في المنتهي بقرن
أستشعـار بحجم الزمن والمكان ,, وهو بوصلتناالي مراسي الرهق اللذيذ

تتصاعد الألسنة الدخان الزرقاء من فوق رأسينا... وبدأت تتراءي لي

كأنها حبات مسبحة.. قذفها طفلٌ شقي.. أفسدهُ دلال جده.

فتبوّل علي المصلاة ورمي المسبحة التي لم ترضخ لتنظيرات ( نيوتن)

ولم تغادر مدي تحديقنا... الا بعد أن أكملنا العدد وجردنا ألفـية الكيف!!



وحينها بدأت اللحظات تتعرّي من وقارها المزعوم... فتعهّرت أفكاري ’ و أنا

أنظر لعينيها الفاترة في أسترخاء وخمول مع شئ من التوثّب.. فكنت كلما

أقفذ أليهما بنظرةٍ أجدها قد تواضعت وركعت عند ساقيها المتوحشتين ,



لم نستطع أستبقاء الشمس أكثر من ذلك ,, فلفحت توبها مسرعة, وألقت

بخرقةٍ من الظلام علي الساقين فتـاّلف بياضها مع السواد,, ولم تعبأ هي

برزاز الماء المتناثر من خرطوم المياه , الذي كنت أحاول به تلطيف الجو

قليلاً ,, وبدأت أنثاي تثرثر تارةً ,, وتارة تلوز بغـار الصمت وعقلها باسطٌ زراعيه بالوصيد ! .. أكتشفنا أن الوقت مرة بسرعةٍ فسألتها كم لبثنا؟؟



ردّت : ياخ انا عارفة؟ هو صحيح نحن جينا متين؟ لكن يتخيّل لي من بكرة!

هسة السجارة دي ما كانت عندك مالك بتقابضي؟

أسمعني يا لزيز جيب القصة دي أنا ما عايزة معاك أيي مفاوضات.....

وواااااااي أكتل التمساح الماشي فوق الحيطة دة!!!

رديت ضاحكاً : أنتي أنسطـلتي واللا شنو ؟ يا بنت دة ضــب! وبعدين انا

وريتك أسم السجارة دي شنو؟

ياخي انا ضبحت ليها؟

دي أسمها نيفـاشا!!

الله هسة يجو يقولو لينا السلام و قسمة الثروة وقسمة البترول , و قسمة

وزهرمان.. ونحن ما عندنا غير الفي رأسنا دة ...

أها رأيك في ناس الحكومة شنو هسة؟

وحياة ديني انت كدة بتطيـّر لينا المزاج دة.. يا عب ديل عاملين زي بنات

نعمات المشاطة.. كل سنة أمهم جايبة ليهم راجل جديد وهم حايمين بي

بيوت الفريق.. واحد جعان وواحد عيان وواحد حردان.. ونعمات كل يوم تغير

في التياب وفي بيتها مافي كبابي شاي ولا صاج عواسة!!!

الساعة كم هسة يا بنت أنتي الليلة بايتة واللا شنو؟

ياخي انت شايلني في راسك ؟ الحاج بايت في الشغل و أمي مشت بكـاء



يعني الليلة محمداني محمداني ؟!! أمرنا لله...




وبدأت أتفرّس في ملامحها من جديد , بينما أناملي تضع دراسة جدوي لمشروع سيجارة جديد
فيبدو أن الفتاة رأسها لا يمتلئ تماماً مثل ترعة كنانة والرهد وخزان الحماداب ,!

بدت لي جميلةً في غير ترتيب ,, عيونها لا تنتمي لهذا الوجه ,, أو وجهها هاربٌ من صطوة
وجرئة هذه العيون ,, فأستسلمت شفتيها لهذا النزاع ,, فيما أصرّت تلك الخصلة النافرة علي
العصيان وتخطت حدود تماس الضفائر وطاشت في البعيد ولم ترفع الا الراية السوداء ,,
ومن الواضح ان نهديها فياجـرا جاهزة للأشخاص المحالين للمعاش جـنسيـاً !! قبل ان يجور
عليهما قانون زحف الانامل الغازية,, أجدها أنثي أنقلابية ,, يتوفر فيها الشرط الثوري
لا تخضع لقانون الا لسلطان الكيف ,, مع صحوة ضمير تبرز في شكل دمعة او اّهـة
تموت عن أشتعال اول عود ثقاب في مجـمرة الدخان الازرق ..

أنا لا أنتمي الا اليّا ,, ولا أعرف تفسيراً منطقياً لحجم المعاناة بداخلي ,, علمتني الايام عدم
التوقّف في كل المحطات ,, أترك لخطواتي حرية الخيار الاخير في شكل المشاوير وطول
المسافات ... لا ادري لماذا أحببتها ... وخطبتها !! ؟
هي معروفة في أوساط الحلّة كبنت ليل !! و انا أبن شيخ القرية ,,
هي أفضل مني ,, علي الاقل لم تجهد نفسها في البحث عن ورقـة توت ,, ولم تبعثر أوراق الجنة
ولكنّي طويت السنين في مداراة خوائي بالنفاق !!! ... و أنا بين هذا وهذا ,, باغتتني متسـائلة :

يا معلّـم أنت سرحت وين ؟
مالك ياخي دقيقة بس هسـّة بجي .
يا عب أنت ركبت قدام ؟
قدام شنو يا بنت الناس ؟ هو الاختلاط دة الا في البصات ؟ ما البلد كلها جايطـة .. شوية شوية
يقولو ليك الدفاع الشعبي و لواء فلان الفلاني ويزيدوا ليك التعريفة وتسمع في الجرايد وتقرأ
في التلفزيون انهم مزقوا فاتورة السكــر!! ياخي السكر دة هسة أرتفع سـتة صلايب ,, و المستشفيات
مافيها غير الكدسـة ,, وقناة جونقلي لسة كمان عشرين سنة ,, وواحة الخرطوم بقت مطمورة ,,
تقولي لي قدام ,, قدام شنو ياخ !! ؟؟
يا لزيز فك النفــس !!
وتضحك في جنون

أسابيعُ لم يراودني الإحساس بالدهشة و لم يغمرني شعورٌ بالضحك يا حبيب نوره ، يا حبيبها و حبيبنا !!

لنا عوده ..

سنوات و انا في صف الرغيف للظفر بأبتسامة
فقد تركت في الدار أطفالٌ جياع
يشتهون طبق كسرة
وقدرة فول
بينما الظروف تتوحـّم علي ورقة من فئة مئة دولار

أظنني عائدٌ
حين أشتداد الريح
حين الهطول
فقد تمسكوا بالمطرة الوثقي !!
ففي البيت أنثي مسكينة
تنتظر أيضاً
حفنة سجــائر
ودفتر خبز

منوت
ينكرون علي الاخضر دورهُ
وغداً يحسدونك علي اللون الليموني!!
و كأن السقاية عليهم



انا زاتي راجع
بس لو جيت فك النفس سريع

برضو هى المسطولة

دا كلام ملفوف بحذق
اقصد مخدوم جداً
و مهموم بأنثى فى البيت و ترع لم تشق الا فى جيوب البسطاء و المغتربين المقترين
ذكرنى ثرثرة فوق النيل لنجيب محفوظ
صدقنى لو كان الزمن مصالح لتسابق الناشرون للحظو بالحصول على شرف الحصول على
اخراج هذا الابداع المتفلت عن المعهود على الناس

حمدا لهذا المكان الذى اعاضنا عن غياب النشر
اخد نفسك و واصل
و نحن هنا مستمتعون

اخاف ان اعلق ياحبيب نورة و(تفك) سوف احتفظ بها لاطول مدة .. اقصد هذه الكلمات الزرقاء..وارجو ان لا لا تنعتني بان شيخ بي جهالة لم تنتهي ..لا ولكني اهوى الجمال والموسيقى وكلماتك هذه تجعلني بملمس الهواء ورطوبة الكهوف ..
يوما ما وانا اجلس مع زميلتي الاسبانية في ضاحية(نايتسبرج) دعتني بلكنتها الغجرية ان اشاركها (السطله) وعندما رفضت قالت(Spiritual & uplifting ) وانها تساعد الارواح الشريرة لكي تخرج من السجن الأبدي .. قصدت الجسم البشرى وتفك قيود الجنس الجنسي ليتجانس مع العقل الحجري ..

Quote: هي معروفة في أوساط الحلّة كبنت ليل !! و انا أبن شيخ القرية ,, هي أفضل مني ,, علي الاقل لم تجهد نفسها في البحث عن ورقـة توت ,, ولم تبعثر أوراق الجنة

حبيب نورة
تحياتي
آسف لو قطعنا عليكم السباحة الزرقاء
و لكنه حوار خارج عن المألوف و المعهود و قد كسر حاجزا لم تخترقه من قبل أي ( نفاثات ) أو مقاتلات ، و هنا تكمن روعة هذا النص بحق و حقيق.
لقد إستمتعت أيما إستمتاع رغم أنني أكره ( كل ما يمت إلى الدخان ما عدا دخان حفرة الدخان ).
أرجو أن تكتمل دراسة جدوى أصابعك و تلف واحدة ماكنة ( بستة كروت ) و تتحفنا برائعة أخرى ، فغاية روعتك تبررها وسيلة ما بين أصابعك.
تسلم و دمت لنا.

أبو جهينة يا حبيب

الدخاخين ضربت السما .... و أظنُّوا الراعي الليلة
أخـّر الغنم .. ووقت الحليب فات ... جاعت النجمات
و ضو ّها أنقرش من النبيح ... الشمس مرقت بعد صلاة
العشــاء... تفتش في الغنم شان العشــا ....وكايسة
الدبارة في الزمن الكعب .... أصلو الســغار بطونهم
ضـلّمت !! دخان العشم جرتق وش الشمش بالضو !! سقت
الفريق غنوات !! و أحمد غايب في الركايب !!.........
الشمش بقت ترجف زي المراية .0.. عارف الحصل شنو يا
أبو جهينة !!؟؟؟
تاني يوم صحت العصر من رقدتها !!! وبعد دة القيامة
ما قامت .... الا الخلق نامت.... في حفرة الدخان !!

حسن المك
والله ملك ود ملوك



أغادرني أليّا !!! الي حيث شهقة المراكب في مواني الزفير
أجرُّ نفســاً عميقاً !!! من لفافة التبغ تلك التي تسمونها زرقاء
أجدها بطعم القهوة السوداء في شفاه المومس الرفيقة

أرتدُّ أليّا !!! أجدني بعيداً بيني وبين نفسي... مسبحة من
الدخان الازرق الذي سطوت عليه من محفظة ألوان الطيف....
فيرتد المطر وهو يهزي بالكثير....


أرتد أليكم !!! أجدكم بملأ الزمان وكل المكان


عفوا أحبك يا هذا ؟؟؟؟؟؟؟؟؟؟؟؟؟

ازيك يا سوارتي نصار
عارف كل الكتاب كضابين
و انا كاتب !!! يا ربي انا صادق في هذه العبارة ...
واللا كضباً كاضب ؟؟؟ لأنو نهر النيل يتّسع للمطرة
ويضيق بي موية الزير !! ودي ما بتعامل معاها الا
( كوز كبير ) غصباً عن ترعة الرهد وكنانة والغريب
في الشغلانة انو الحكومة لغت رسوم العبور لكن بعد دة
يقولو ليك دمغة جريح وكسور و بواقي !!! هسة دي علاقتها
بي مجاعة البطاطس في هولندا شنو كان سعلوك ؟؟؟



ملحوظة

التدخين ضار بالصحة !!!!

جيب النفس دة سرييييييييييييييع!!!

أسكت ما تفضحنا يا زول

الاخ حبيب نورة
غيمت علينا بدخان سجائرك
فكان الرزاز ....... انت رائعاً بحق

* من المتابعين لك في نادي القلم السوداني
يعجبني تلاعبك وتناغمك مع الحرف

أختنا الحبيبة مناهل
أزيك ياخ
والله تسلمي عديل كدة

لكن انا مسؤليتي عن هذا النص محدودة جداً
لكن بالتأكيد أمتدادهُ داخلي يتعرّج في
شراييني !!! بنفس القدر الذي يحدثهُ الخدر
اللذيذ في الأوصال الممغـنطـة لاشعوريـــاً
فيما تحتفظ كرويات دمي الحمراء بالحق في
التجــلّط !!! عند أنفجـار أية وريد مستاء
من سؤ الاحوال الامنية في الدورة الدموية الكبري

مناهل مرحب بي كل قراء نادي القلم السوداني

الإسم : بدرالدين شنا
السكن : هذا البوست منذ اليوم
الهواية : قراءة كل ما يسطره يراع حبيب نورة
الحالة المادية : مسطولة والحمدة لله
يديك العافية

يا بدر الدين يا شنا


أحححح


مقدمة سريعة كدة



يتعالي هتاف الشهيق والزفير... وتضجُّ الرئة بالفوضي
فيأخذ لساني خطاهُ بعيداً ... ويبدأ عطلته الصيفية !!!
والان فقط ..... أدركت ُ عظمة ثرثرة الصمت !!!!!!!!


الاسم : حبيب فلانة
المهنة: شركة لاف السيجارية
الهواية: المزاكرة في كل الدفاتر
المؤهلات: شهادة من مصحة كوبر
الحالة المادية: مجنونة والحمد لله

Quote: ولم تعبأ هي برزاز الماء المتناثر من خرطوم المياه , الذي كنت أحاول به تلطيف الجو

عارف يا حبيب انا هسع قاعد عكس بوستك.اقصد عكس الهواء والله مستمخ لما ما عرفت ده بوست والا

تمساح والا ضب....المهم قفة

واصل كفاحك يا ضنين.سلمت،،،

يا صديق الموج
لا حولة لا قوة !
القال ليك منو اقعد هنا
ياخي انا والله خايف علي سمعتك من كلام الناس
هسة لو الجماعة لمّوا فيك
ما خلاس التمانين جلدة محمداك محمداك


وبعد دة الجماعة ديل يقولوا ليك مبدع
ياخي أبداع شنو في السخانة دي ؟؟
كدي خليني اّخد لي غمدة في الكهربة القاطعة دي
وبعدين بتاع الايسكريم دة حمانا النوم
انا لو عندي حق الباسطة كان تميت عليها
وخشيت الفلم الهندي
يعني البزار لزومو شنو هسة ؟؟؟

سأعود


وكلي شوق



خليكم علي الوعد القديم


أخخخخخخ

يا حبيب نورة...والله ابداع برائحة المسك وارد الضعين..ولون العنبر من نوع الردوم..........عشنا معك وأنت تلعب بالكلمات كما المايسترو يلاعب عصاته الصغيرة تلك
يا أخي لا تحرمنا من هذا الأبداع..ودايما أدينا معاك نفس ( بفتح الحاء والفاء)

أسامة يا ميرغني
يديك العافية يا حبيب
وما عندك مشكلة أكبر نفس والله
بس انت كان تجي بدري
والله قربت تنطفي أديك من الشوشاوة؟؟

up

شنو يعني أب يا أبنوسي؟؟
يعني انت بتحاول تعمل أستنفار مثاني وكدة ؟؟
يا زول راجيك ونشوف!!!

أيناك يا أنا ؟؟
تراني سألتقيك من قديم !!!؟؟
لا أريد أن أراك جديداً !!
كل الأناقة في الأمس
لم يعد هنالك متسعاً من جرح
أنتظرك يا هذا....

تحتشد اللحظــأت بطعم القهوة السوداء
نفس الفنجان الذي كان في شفة الرفيقة
الانيقة في يوم كنا هنالك ننادي الامس

بكينا في حرقة

ما قلناه في حضرة الزكري المنسية
اصبح هو الاخر في قسم الارشيف
وصارع صفحات التأريخ
لن أنادي اليوم سوي أنا!!!
وماذا نستفيد يا هذا من هذا الوعي
وماذا جنينا من أـكتسابهِ؟
أنه ضربٌ من الوعي الجأئر
تبـّاً يا أنا وعيئذٍ !!!!!

نفس أخير



في ضل الشجرة الابيض
لون الفل
في طرف البحر الاحمر
شكل الضل
في ضل الموج الازرق
رمز الكل



لاقيتك و أستنيتك عشم لي هناك
شان ألقاك
فتـّرت السنين تفتيش
علي الواطة و سنام القمرة لي عينيك
سروج فرحة
وتعب عينين



وشان ألقاك ولاقيتك

زغرووووووودة



عارفين انا ناوي علي شنو هسة؟؟

بعد الاستنفار
قطر نيالا صارقيل
قطر العيد صارقيلين تابعين بعض
قطر عيدنا داك صادف خريف
غرابتنا بقولوا
أكل التفاتيف
سفر الخريف
وزواج بت اللفيف
كلهن منهن اقيف
صادف سفرنا خريف
ما عملت بي نصيحة المثل لانو هناك في الدهشة واصل الجمال لأن أهل الأصل مثله
وبداية الحكي
قطر بحوم العشرة مدن الكبيرة , من الخرتوم خرتوم الفيل مرورا بي مدني السني , سنار السكر , ربك الياي _ والياي دي قصة تانية _ , كوستي الوساع , تندلتي الخضرة , أم روابة ام موية زمزمة , الرهد أب دكنة الفاتو ما سكنه , أبوزبد , بابنوسة إطلالة الكردافة علي بوادي دارفور و واو , الضعين دار رزيقات , وهناك تحت الجبل في الوادي ..
رحلة التلتاشر يوم والبلد التحت الوادي كلامي ليك عنها كتير ومنها شي ليهو علاقة بي بوستك حاكتبو حتى حين استفزاز قريب

هههههههههههههه
ضحكة من نفس الشهيق
حتـّة جليد جوة الحريق
شوكة وهن داخل الطريق



لكن ما بالغت يا أبنووسي
نحن الراس دة خسرانيين عليه كتير
تجي تفكها لينا
وثم ثانياً
القال ليك منو نحن بنتعاطي السفر؟
ياخي حليلك !!!
لينا سنين ما فارقت خطواتنا كراسي المحطات
و جاييك
وعامل كمان أستنفار للمثانة

حبيب نورة
سطلتنا معاك ، ولا وريتنا كيف نفك السطلة ،،
أعلان حبك لنورة يعجبني ، ويملأ راسي بالدخان ،
ممتع أن تكون الحبيبة مسطولة ، وممتع أن نتخلى عن وعينا ولو مؤقتا ، فكثيرا ما نحتاج تغييب الوعي ،،
الراعي ذاتو مرات بيدقس والغنم تدخل الحواشات ، ويسوقوها الدخولية ، ويدفّعوا صاحب الغنم غرامة ، لكن دقسة الراعي تتكرر لأنه يحتاجها ،، ولأن الغنم تحتاجها ، ولأن سياسة توزيع الدخل تحتاجها ..
أديني معاك نفس ،، ولو من دخان أبوجهينة ،، دخان في حفرة يا أبو جهينة ؟ لماذا كل الدخان يسعى للأعالي لكن ذاك لا ...

حبيب نورة:

الفينا مسطولة..

ويا عم باسطة أديني "بَيِّن " بي خمسين؟؟؟ّّّ!!!

خضر الله اليراع ...

ألنكتل التمساح ونرجع..

هاك نفس !

الفينا مسطولة عارفانا السجارة انحنا بنطولة


جورج بنيوتي يا حبيب
والله فاتتك
المطرة كانت صابة والعقول غابّة
والنار شابّة والمزيكة كابــّة
اتمنيت لو كنت معايا

ود قاسم
تحية بقدر الاحتراق
سلام بعمق الانفاس داخل شفة المومس الرفيقة
وكل الفرررررح الذي اصبح داخل لفافة تبغ
صنعت بمنتهي سؤ النية

الوعــي الجائر يا ود قاسم؟؟؟

ياخ البوست دا مالو كتمة كدي..؟؟
كدي يا حبيب افتح الشباك شويه

وبعدين السجارة دي سخنت وسرحت..
ولا اقول ليك.. فك المسجون يا فرده
وانا بريحو عندي

وووووين يا طيفور
المسجونة محكومة بي تأبيدة
طريقة ليها مافي
الا يصدر عفو عام
لكن بيني وبينك نستاهلا والله

وزي ما قلت ليك
القطر بمر شاقي حلة , وادي , ومرات خلاء إتشتت في جنباتو شديرات لا يقين ذا حاجة بضراء .
الرحلة كان مداها تلاتة يوم , لكن الخريف , عمال دريسة سكنوا تاريخ ماضي , سكة حديد بالكاد متماسكة تحت عجل الحديد المدردق مغرب , لكن الشماعية بي أسبابا المذكورة أطالت مداها الرحلة أكتر وأكتر .
تلاتة يوم كان مفروض
شال زادو الأخدر حد ايامو التلاتة وكمين نفس لزوم سد حاجة المتطفلين وفك النفس .
قابلتو معاهم فوق في السطح , ناس السطح عالم تاني , قالوا ليهو ده طالب ضيف ماشي البحير , إنفجر ضاحك وضحكوا , سكت وما كان لي خيار غير إنتظار كلمتين تفسيرتين من بين الدخان الدخل أخدر ومرق بي لون دخاني من بين مناخيرو وتحت السنون الضاحكة , وبعد ما سكت قال البحير جنة وبدا يغتي , صابرين , صابرين , صابرين
اليوم التالت
يا دوب كنا في أطراف كوستي , وشوية شوية بدا يتخلى عن كرم النفس يا سيد النفس .
قال ما بدي زول نفس تاني ولو كان كتكت _ فكها الماسك فيها وضم كافين كتكت واقراها علي وزن هدهد _ وعرفت منو الكتكت ود عم الخدرة , والخدرة في أعالي النيل والنيل سليل فراديس وفردوسو بحير قاصدناهو وحبيبة ,
صباح اليوم الرابع
سكت , قل ضحكو وقل كلامو الطالع مع دخان الخدرة من تحت أسنانو , ولما جن مساالأربع , إشتقت ليها , صابرين , كنا مفترشين فج الرملة , صابرين يا نفس , ناديتو , قال وين مع النفس التلاقيط , وصب جام غضبو علي اليوم الرفعو فيهو راية إستقلال , وبدوا نقاش سياسة , سياسة نقاش , نقاش الكورة ,نقاش حتى عن شدرة البنقو الكان حيزرعا بديل لي الجهنمية , قال كنت حأطلع مساء واسقيها واحاحي منها الشفع وابيع قناديلي في طبلية زيها زي تمنة حليب إنتاج هولندة حسبما مكتوب في التمنة , وفي نص الليل دارت عجل الصارقيل الممدد جنازة , تجاها البحير .
خامس يوم
لساتو بلعن جهرا قطرنا , القطر الحرن , وبيناتنا وبين الوادي مسير , داعبوهو , هظار , مواساة , وقالوا ليهو أزرع حبة في خريف البلد الكان زرعت فيها ولاد يطلعوا ولاد ضراعاتهم خضر , وقبل ما تخمر الفكرة في راسو زي قندول راكب هوستن وشاقي من اعالي شمال اعاليهو النيل , وقبل ما يشرع في زراعة قندولو الاول دور قطرنا .
اليوم السادس الساعة ستة عند المغيب
وقف في السطح , عاين لي ضاحك , دي آخر نفس , دي آخر طلقة , وضحك , القطر بدا كأنو واقف والطين المخلوط خدار يطلع وينزل تجاهنا , غمض عيونو وبدا يغني صابرين , نردد , يسكت , يجبد نفس , ننجبر نسكت , فجّانا وقعد جمبي , طلع كيسو , كيس جيلاني لافي فيهو الزوادة , كان , فضلت رتوش بدا يلفها ,وهو بحكي عنها , فردوسو الساكنة فردوس , شال قهرو ورماهو هناك وبين إيدينو ,
كرت طويل ؟ وطي صوتك يجوهو يشيلوا عليهو ضريبة عتب , طويل كفّـو , ضحكات , والبرنسيسة تحت صوابعو ترجف , نشوة , ضحكة , صوتو القرمشة , صابرين , ضحكة طويلة مكسرة حشرجة وكحة في نصها , ترجف برنسيستو . فجأة ...
مساء سادس يوم كان خريفي دعاش وفوايح خدر كتيرة , وجات نسمة عنيدة شالت ما تبقى من رتوش , وقبل مايكمل نداهو ليها صابرين إنفجرت عروقو غضب ونط يقبض في بواقيها بواقيها, الخدرة , قبل ما تصل الأرض , ووصل معاها الأرض .
نهار يوم سبعة جاب واحد الخبر الاكيد , قال الدكتور فاد سبب الوفاة كسر في الضهر
اليوم التامن
اليوم التاسع
اليوم العاشر
اليوم ,,,

يا أبنوووس
والله يادوب أتزكرت !!! انا ما كنت معاكم هناك
أيوة لكن ما جيتكم في اليوم الاول ولا اليوم
العاشر... انا جيتكم في اليوم الحلم!! اليوم
داك كان منزوع من دفتر الايام .. فجأة السنين
أتلاحقن والبنيات كبرن... وزرعن نهيداتن عشم
جوة الصدور الممكنة الماسكة دربين شان تجيك




أستنيتك !!!


لفيتك ساعة الميعاد مطرة كضبت علي رمال العتامير
وقالت ليها بكرة تبقي ضواية بالقمحات
وشليل داك مات !!
حداي شوقين وجمبك ساكن الاحساس....حداي فرحين




عارف؟؟

بجيك وما بسيب سكات تودي الشوق عليك ؟؟؟؟؟؟؟؟؟

دوماً علي الموعد
نفس ٌ جديد
ولم يعد هنالك المتـّسع من عقلانية
أذن فتذهب الي الجحيم
والله أكبر ولا نامت أعين الوعي

حبيب نورة
احييك علي هذه القدرة الرهيبة في الكتابة
وبي الجد كدا اعجبني وامتعني هذا البوست للغاية
شكرا ليك
وربنا يفرحك ويبسطك زي مابسطتني

up

فوق عزتنا فوق يا عبد العاطي
اشوفك حلم عشم مدود قدح كسرة
حلم بنوتنا بالسترة
كلام ناساً حنان بالحيل
ولي قدام

يديك العافية يا ود رملية
والله رفعت من روحنا المسطولية
اريتك تكون عشم زي ما كنت نغم
ياريت يزيد فيك الطعم وياريت
يموت فيك الالم وتصبح حلم....

فوق
للذين فاتهم خمر الكلام وسطلت الحرف الموتد في السماحة
عجبا!!!
بي سكُر ولاكأس تري؟؟؟
..
اسمعني .. فك النفس
ماتبخل
سلمت ياجميل

ود رملية
والله خجلتنا
كدة انا بعمل فيها أبو عرام
ودة ما كويس
انت بس تسلم والباقي كلو هين
بجضم لي واحدة تاني
و حتشوف النيران قايدة في البورد

0090533*******