Post: #1 Title: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 05:38 PM Parent: #0
أهداء لي أيي زول عشقوا البلد!
مرتاح مكوِّع فوق ضل كمنجـــــــــــة حتـَّة في مسامعو ... صفق الوتر الضليل !! متلفـِّح ورقــــــــــة التوت يستر بي نغيمــا نشاز حر الضنــي نقرش النسام يدوزن في العصب ... أيقاعو كان تُم تُم خفيف!! رقَّص الدنيا وهبش... عالي التضاريس المخصمة المزازيك والغنــا!
مقطوعة جيتك .... أشتر رحيلك قطع مصارين الوتر يحرق حشا النوتة ويعطِّش غابة كمنجــــــــات الحنين كُبـــِّي مزيكة أنينك يحرد الناي النواح شدي اوتار حنينك ..... الليل بقول ما داير صباح خلي كل الكون سجينك نهتف نقول حي علي الفلاح!
أضبطي الأيقاع علي شهيق وجع النصوص خلي الحروف كورال نشيد....... زمناً نشيد من جزيل حزنو أوركسترة فرح! خاتفــــــــــــــة لونين من زفيرك حارقة دمك أنو زفــــَّة الغنيات جوقــة جروح لمن تجيك سيرة المحن!
نغمك يخش يغشي المسام ... يبقي الكلام صفقة ونغم أيقاعو كان تُم تُم خفيف رقصك يرد أعتبار طمبور حزين .. أوتارو كان لابسات سواد مشدودة لي زمن الحداد!
حاجة تطرب ....! أليمة زي وجع طلقــــــــاً صناعي في رحم فاصل موسيقي! صولة جيتك!! سلم الشوق الخماسي ... رابع مستحيلات النشاز مثلث أضلاعو شوقين وانت! وتاني حسك يمرق علي الخلا ويقول أول حروف أسمك ...دو ري مي يابت القوافي الطاعمة دي !
مرتاح مكوِّع فوق ضل كمنجــــــــــــة تشاغلك بي نديـَّات الثمر تعزف بي فروعا نغمة تطرب العالم نسيم تحلم تقيِّل في مسرح الزولة الموسيقي .... متوسد الناي حلم تتمني في زمناً جميل !
حسك طبلة .... وماك دلوكـــــــــــــة ! لو قسمتي علي ربع التون بديك الفاصل الجاي ! ولسة الليل شافعاً بحبي اللحظة السمحة بتعدي في سرعة تُم تُم خفيف ! زي سوبرانو بِطل من صوتك ... بايع روحو عشان مزيكـــــــــــــة !
ونحن نلم في كراسي الحفلة ! ولمة ناس راجيين الجرتق ... شايفك مرتاح مكوِّع فوق ضل كمنجــــــــــــــة ! متلفح ورقة التوت تستر بي نغيما نشاز حر الضني نقرش النسام يدوزن في العصــب
أيـــقاعـو كان تُم تُم خــفــــــيــــــف !
التعديل ساهي !!
Post: #2 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-03-2007, 06:29 PM Parent: #1
يااه ..يانغم فيني إنسياب وين ماشي بيّ ؟؟ ماسألتك.. وجاوبتا.. أهلاً بي مشاويرك..حبــاب شوقي غرقان في الذنوب.. مرّة... ماصلى الغياب ياريتو بس لو لحظة تــــاب مرتاح ..مكوّع في ضل كمنجة ؟؟ مانحنا ريدتنا الرباب ماقلتا ليّ ؟؟ إشتقتا لي حفلة مجيك ...؟؟ عزمنا أشواقنا الصحاب وحتغني ليلاتنا الشباب
Post: #5 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 08:26 PM Parent: #2
تماضر العسل
ياااااااااه من جيتك فيني بتطرب ويااااااااه من شوفتك زمن المغرب أحتفالية حروفك مهرجان قصيد و بفضل فرحي بيك لسة مراهق ربنا يديكي العافية قولي آمين!
Post: #8 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-03-2007, 09:02 PM Parent: #5
هل كنتا بتعرف سر المغرب ؟؟ خاويت الشمس المنشرّة بين خيط الضلمة ووعد القمرة لا قِدرت من وهجك ..تشرب.. لاقِدرت من ضيّك ..تهرب !
Post: #9 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 09:12 PM Parent: #8
تماضر
انا كنت بشوفك قبال تطلع وانا بشرب قهوة مع شمسك لكنوا رحيلك كان أسرع و الحزن البشبه لي أمسك زي نخلة طويلة بتتفدع لكن للقمرة محال تمسك
Post: #12 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-03-2007, 09:31 PM Parent: #9
لسه بشوفك جوّاي خيطين من نور .. شمسين.. ماكنتا بتقبّل تتقسّم.. بس كنتا..غصباً عن شوقك.. إتنين..
ليه ؟؟
Post: #13 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 09:38 PM Parent: #12
يا طمطم !!!!
Quote: ليه ؟؟
شان يفضح صمتك خيط النور وتمددي نوري علي البلور وتهدي السور و تبقي تغني ورانا طيور انا شوقي وشوقك حكاية أتنين من حلمين ح يبنوا قصور
Post: #14 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-03-2007, 09:45 PM Parent: #13
بس أصبح ..فرحك مبتور.. أنا ليه أعيش فيك السكات ؟؟ والفيك..بيستنطق..صخور.. مش قلتا ليك..إنّك براك ؟؟ إتفردتا على ..مرّ الدهور.. ماشان سماحتك في الكلام.. بس.. شان.. بريدك.. بي ..غرور ؟؟
دقيقة.. عاوز تسالم؟؟
خلاس.. مِحِل تقبّل..إغشاكا نور..
Post: #15 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 09:53 PM Parent: #14
يا طمطم
ما تزيدي هديلك نجضتيني انا خايف الوجع الكان مستور لو قلتي تزيدي و تديني انا شايف انو بكون مغرور خايف نيرانك تكويني يا البرضو غيابك عندي حضور وبين قوسين كدة
( نجاضة)
نجاضة نارية أنتي لمن فتي ولما أتحكرتي وكمان بالغتي خايف البوست يصبح في الخور!! ما عارفة الريس عندوا أمور؟؟؟
Post: #16 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-03-2007, 10:02 PM Parent: #15
Post: #20 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-04-2007, 05:34 PM Parent: #18
يا طمطم
برضو باكر ما أمبارح دة من الأول ومن الآخر عشان العالم ما يكون جارح لا يكمل قولي و يبقي مشاتر
Post: #22 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-04-2007, 05:53 PM Parent: #20
بس لاقيتك أنا أمبارح سبقتك شوق إنتا و باكر أصلك فيني وضيّك سارح إنتا بتعرف إنك قادر.. تجمّل حتى القول الجارح.
Post: #23 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-04-2007, 05:59 PM Parent: #22
طمطم
طعمك لون الغنية أنيق وشكلك فرح الحزن الجانا قريب
وجعك سماحة الزمن الضيق و شعرك زي الألم اللاقي طبيب
زمنك مطر الفرح الصب حريق ونجمك فينا ومابي يغيب!!
Post: #3 Title: Re: الصلاة في مصلاية كمنجة .. عقلانية جن الحروف الكلكــي ! Author: منوت Date: 03-03-2007, 07:51 PM Parent: #1
" ... ونحن نلم في كراسي الحفلة ! ولمة ناس راجيين الجرتق ... شايفك مرتاح مكوِّع فوق ضل كمنجــــــــــــــة ! متلفح ورقة التوت تستر بي نغيما نشاز حر الضني نقرش النسام يدوزن في العصــب
أيـــقاعـو كان تُم تُم خــفــــــيــــــف ! ... " .
* يا حبيبها ، تلكم النورانية ، الليمونية ..
أها صليتو على التُم تُم ، أم على الكمنجه ؟
شنو الحاصل عليك و عليّ اليومين دي ؟ !! أهو كلكي الحروف اللابس ملكي العقلانية ؟ أم بطئ خرير النهرِ ، وغرق البحر ؟
Post: #4 Title: Re: الصلاة في مصلاية كمنجة .. عقلانية جن الحروف الكلكــي ! Author: Mustafa Mahmoud Date: 03-03-2007, 08:00 PM Parent: #3
salaam ya habeeb ya al habeeb >> التجاني يوسف بشير >> انشودة الجن
انشودة الجن
رقم القصيدة : 69245 نوع القصيدة : فصحى ملف صوتي: لا يوجد
قم يا طرير الشباب غنِِ ِ لـنا غنِِ ِ يا حلو يا مستطاب أنشــودة الجن وأقطف لى الأعناب وأمـلأ بها دنى من عبقري الرباب أو حرمِ ِ الفن ِ صِح فى الرُبى والوهاد واسترقص البيدا وأسكب على كل نـاد ما يسحر الغيدا وفـجر الاعـواد رجعـاً وترديدا حتى ترى فى البلاد من فرحةٍ عيدا وامسح على زرياب واطمس على معبد وأمش ِ على الاحقاب وطُف على المربد وأغشى كنار الغاب فى هدأة المرقد صور على الأعصاب وأرسم على حسي جمـالك الهياب من روعة الجرس ِ واستدنِ ِ باباً باب وأقعـد على نفسي حتى يجف الشراب فى حافةِ الكأس
for you
dr mustafa
Post: #7 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 08:42 PM Parent: #4
دكتور مصطفي
ياخي شكراً علي القصيدة الرائعة
Quote: قم يا طرير الشباب غنِِ ِ لـنا غنِِ ِ يا حلو يا مستطاب أنشــودة الجن وأقطف لى الأعناب وأمـلأ بها دنى من عبقري الرباب أو حرمِ ِ الفن ِ
تسلم كتير
Post: #6 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 08:37 PM Parent: #3
منوووووت يا أيها السادر في ليمونيتك المموسقة الممتنع عن نداءات النشاز
Quote: أها صليتو على التُم تُم ، أم على الكمنجه ؟
يا هذا صلينا علي الحنين صلاة الغائب!! وكان يأمنا صلاتئذٍ شيخنا داؤووود ألا هل بُورِكنــا؟؟؟!!!!!!!
Post: #10 Title: Re: الصلاة في مصلاية كمنجة .. عقلانية جن الحروف الكلكــي ! Author: منوت Date: 03-03-2007, 09:17 PM Parent: #1
يا حبيبها ، تلكم الليمونية ، النورانية ،
يا داووووووووووووووووووووووووووووووووووود ، يا داوووووووووووووووووووووووووووووووووووووووود ، يا شيخنا الحميم !
هذا كلامٌ كما البسكويت !! لذيذٌ ، ممتعٌ ، و لا يُقاوَمُ إلا بالمزيدِ منه !!!
Post: #11 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-03-2007, 09:30 PM Parent: #10
أخالك يا صديقي ماذلت في عنفوانك القديم الذي يستدعي نزق القصيد و يعلن عن قيام جبهة ثوار الكلمة الدغرية من أين لك بهذا!! أحايين عديدة تصيبني بالخدر اللذيذ أتراها لسعات الخدار الليموني الممتع؟ أم هي رشفةٌ من خرير النهر حين بداية الحياة السرمدية في بويضة الخرير اظنك رحم لا يعقم من أنجاب الدهشة و أكيدٌ أنا من دهشة الدهشة حين تلتقيك!! فقل لي بربك أين المفر!! النهر أمامي والليمون خلفي! لم يتبقي غير الثلج!!
أنعلنها لومنة ؟؟
أم تراها أضغاث نورنة لاتسمن ولا تغني من صباح!!!؟؟
Post: #19 Title: Re: الصلاة في مصلاية كمنجة .. عقلانية جن الحروف الكلكــي ! Author: Mustafa Mahmoud Date: 03-03-2007, 10:27 PM Parent: #11
التجاني يوسف بشير >> الصوفيّ المعذّب
الصوفيّ المعذّب
i think this is 4 u ya habeeb dr mustafa
هذهَِ الذَّرَّةُ كمَْ تَحــمِلُ في العالَمِ سِرَّا
ذاتِها عُمْقاً وغَوْرا
قِفْ لَديْها وامْتَزِجْ في
وانْطَلِقْ في جَوِّها المَمْـلوءِ إِيماناً وبِرَّا
Post: #21 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-04-2007, 05:40 PM Parent: #19
دكتور مصطفي ما أجملك وما أعجبها من كلمات مثلها تماماً الصلاة في سجادة كمنجة قمة جن الحروف الكلكي!!
Post: #24 Title: Re: الصلاة في مصلاية كمنجة .. عقلانية جن الحروف الكلكــي ! Author: يوسف الولى Date: 03-04-2007, 06:19 PM Parent: #1
Quote: مرتاح مكوِّع فوق ضل كمنجـــــــــــة
ولى متين ؟؟؟
Post: #25 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-04-2007, 06:26 PM Parent: #24
يوسف الولي لي متين!!! لحدي ما تطلع شمس الغنا!! وتفك نورة المحنة دي!!
Post: #26 Title: Re: الصلاة في مصلاية كمنجة .. عقلانية جن الحروف الكلكــي ! Author: خالد المحرب Date: 03-04-2007, 09:34 PM Parent: #25
معجب جدا مستمتع خالص شكرن جزيلن
Post: #27 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-04-2007, 10:37 PM Parent: #26
خالد المحرب فاقدك ومشتاق ليك بشدة وتعرف كيف يا أجمل طيف ضيعنا سنين وسنين ودنين ما بنتقابل و أكيد ح نتقابل
Post: #28 Title: Re: الصلاة في مصلاية كمنجة .. عقلانية جن الحروف الكلكــي ! Author: علي طاهر Date: 03-04-2007, 11:50 PM Parent: #27
الى حدود الكلمات تأخذني الدهشة .. و الاستمتاع رفيقي و أنا اتابع هذه الدوزنة .. على اوتار الاحاسيس ..
Post: #29 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-05-2007, 05:36 AM Parent: #28
كوع....طوع روح انغامك واسرق صوت الوتر الخامس جوع ... روع ..وتر السجدة وسلم قلبك شفعا هامس رتل سرا شعبك ...شفع شجر الناس ..الكاس ..العطشت فترت .. عترت تبقى متارس لي الاحزان..للجوع الكافر وبرضو تدافر ترمي اللقمة تتف الجغمة النيل الهارس كبد الليل..السيل الطول وهد الحيل اترصا سنابل في الحيشان الكبرت سحتا سحقا سحقا لي الرجعية وكل وليه.. وكل مدارس تدي النور لي شفع تقرأ سجم الجن ..الحرف الكلكي وجن الجن البفضل حارس وتر الروح ان طق المفصل في الجزلان او سكر الشارع بي (البن بان)..الزان الطالع من حيشان الهم ان صفق وادي الكف لي زولا فارس يا مطموس بي سحر اخوانك يا مدسوس في رحم الفكرة وناقر جرس الريح العطشت مين الرسمك انت الداقس؟ شد اوتار مصلايتك غني حتحت شعر الاسمو كمنجة ورص نعلاتك ضد المرقة وادخل في الاوتار بي ذاتك انقر طار البلد الحرقت نقز.... نقز.. اعرض وبشر بالشبال جرتق نخلاتك اصلو الحال من بعضو بفسر يا موهوم بي كل الحاصل يا مجنون بي باقي صلاتك اركع... اسجد ضد الفاصل وضد الجن ان جاكا مقبل وسبح بس بي باقي صلاتك وطوع نغم الريح ان ركّت ركبت راس العوج الصالح وفجت باقي الليل الدامس ورجع تاني الوتر الاول كان الكم؟ تتذكر ياخي؟ امكن كان الوتر الخامس ما الاوتار اتلخبت صوتا وحتى النغم القلنا اتدوزن عاكس فينا الحس الخامس زي ما راحوا الاربعة ديلك وكنا بنحلم بي المستقبل واستكشاف الحس السادس كوّع ياخي...و واصل جنك
Post: #31 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-05-2007, 05:31 PM Parent: #29
عبد الله وداعة
انت كدة علي طول تجيني و تبكمني نهائياً وحاة الله فتشت لي مود الكتابة ما لقيتوا خليتني برة الفورمة تسلم يا غالي
Post: #30 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-05-2007, 05:27 PM Parent: #28
علي طاهر
والله دة أنت المايسترو بتاع الفرقة الموسيقية دي!!
تسلم يا سيدي والله
Post: #32 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-05-2007, 05:57 PM Parent: #1
معليش..لو كان القول ..مرّات بتأخّر.. أصلو بسافر ..وجوّه الحلق ..مرّات بتعثّر.. لما تقابلو الغصّة.. تعكس سكة حسو.. وأنا أتمرجح ..مابين قولاً لابس أشتر.. ومابين قولاً قلتو بحسو..
Post: #33 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-05-2007, 06:04 PM Parent: #32
يا بت النيل الطاعم يا بت الزمن الأخضر أنا أصلي مسافر زيك ورحيلي كتير بتأثر ما بين جنحين تتلفّت وما بين أحساس بتعثّر
مرات انا حزني بدسّو جواة القلب البهتف ليك يا أسمر ومرة ومرة بخلي العالم كلو يحسو
شكررررن جززززيلن يا خُناس !!
Post: #34 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-06-2007, 07:02 AM Parent: #33
القلب الرادك أنا شاكلتو وشوق جادّعتو كيف بيريدك ..وإصبح زولاً سادي أناني أصلو بريد في ذاتو ..أنا كالمتو مش إنتا..النبض الطالع منّك ..ياها رويحتي..وماتتنكّر ..أنا غالطتو ولما إتبيّن ..إنّك ذاتك..فيني بتنبض..جاني مؤكد.. وأنا سالمتو.. قولة إنّي بريدك..ماها الكلمة..الجاية..مطاطية..أنا شاغلتو شان إتوهّط ..وإفضح..ريدو..كمان غازلتو وماهو الغزل ..الخالي الحِشمة..ولا جاملتو.. كنتا بسيطة ..وصفتا العِشتو..أنا واجهتو..
تقدر إنتا تشاكل قلبك ؟؟ قلبي بخاصمك كان شاكلتو
Post: #35 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 02:12 PM Parent: #34
يا طمطم
القلب الرادك انا ودّعتوا ما أظن يرجع لي و سلمتوا غالطني حنينك و غالطتوا قال لي يا طمطم وين فتوا
Quote: شان إتوهّط ..وإفضح..ريدو..كمان غازلتو
أتوهطي انتي انا قلبي عشانك كلمتوا !!!
Post: #36 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-06-2007, 03:12 PM Parent: #35
قلبك أنا هامستو..(هاتي وريدك ) أنقر ..ماوشوشتو ؟؟ وكمان ساءلتو..قلبي بريدك ..ما إشتقتو ؟؟ في دماي ..كالمتو.. بي ..كل.. البيّ ..صارحتو..
إنتا ..البيَّ ..وحشتو ؟؟
Post: #37 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-06-2007, 04:12 PM Parent: #36
حبيبه وتماضر
واسو الصف
استووا يرحمكم
جنن زعمط حزن الهم الغم
السم
التم الناقص وجا يغازلكم
مستوارات العارض قطن
كل خميرة العشق الاول
ريد البت البركت تحلب
في جاموس الحاصل هسا
والاتدسا
ولافح مرق البحر الاعوج
وجا يكاتلكم
العن كل الشوق الجابكم
موهومين
انداد السجم
الساكت
ساكت وما بتكلم
وقايل روحو كمان كلمكم
واصل ياخ الجن الكلكي
وحب مصلاية وهمك برضو
وخلي الوتر القطّع ايدو
في الانغام مرة يضحكم
او يحكمكم
و واصل جنك
Post: #38 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-06-2007, 04:38 PM Parent: #37
Post: #47 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 08:33 PM Parent: #43
عبد المنعم
انا آآآآه من رقة جيتك طاهر و ابيض وضوك من موية الشجن السلسبيل
خدرت البوست بي نضميك شكرن جزيلن
Quote: مرفوع القوس
في الوتر
الرابع ..
ياتو كمنجة
بتعرش سقف الجامع..
Post: #48 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 08:36 PM Parent: #43
ياخي الكلام دة بقي حلاتو !!!
الحلوين عبد المنعم عبد الله وداعة خُناس طبعن انا مستمتع جدن شكرن جزيلن!!
Post: #46 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 08:30 PM Parent: #37
عبد الله وداعة
Quote: حبيبه وتماضر
واسو الصف
استووا يرحمكم
جنن زعمط حزن الهم الغم
السم
ياااااااااااااااااااااااه!!!!!!
Post: #45 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 08:26 PM Parent: #36
طمطم
مدي الأيد عشان أسالمك وانا بمشي أتوضأ و أجيك !!!
Post: #49 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-06-2007, 08:36 PM Parent: #45
طيّب .. أديني من كلي المعاك.. مدّة إيد .. وماتبقى ذي واقف براك
Post: #50 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 08:40 PM Parent: #49
بديك معاي بعض الكلام الكان زمان كل الشجن كل الحنان شان تبقي في العالم براك زول فيك كل لمسة حنان ضمير ما شفتوا في أنسان خليني بس أقعد حداك
Post: #51 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-06-2007, 08:53 PM Parent: #50
خلاس.. أصلي بس بعشق عيون.. شايلة من روح الملاك طيبة مابتعرف خداع.. وراسمة من حِنّك براك ريدة والحلم المشاع مشتولة في زولاً هناك لاخان ضميرو ولاهو باع.
Post: #53 Title: Re: الصلاة في مصلاية كمنجة .. عقلانية جن الحروف الكلكــي ! Author: بركات بشير نجار بشير Date: 03-06-2007, 09:11 PM Parent: #51
تسجيل اعجاب براحة كدة من غير شوشرة شكراً جميلاً
Post: #56 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 09:17 PM Parent: #53
بشير بشير أعتمدنا خطوتك في سكة أحلامنا الدروب معبدة والمحطات مستنية سافر سافر سافر انا في رجاك
Post: #54 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 09:12 PM Parent: #51
خناس ما بين الليل و جيتك عالم جديد من الألق وانا زي هناك مجدوع بعيد بتلوّي في الشوق والأرق
Post: #52 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-06-2007, 09:08 PM Parent: #1
شايف الناس تتجادع ساكت وردة بوردة و حزن بحزن قلت أنش القلب الساكت و أجدع زي ما الناس جادعين هاكم طيرة و غنية و تفاحتين وسعوا لي في القعدة معاكم أصلوا حواسي إتمردوا فجأة
داير أطلع و ما دايرين
Post: #55 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 09:15 PM Parent: #52
فاضلابي أندفق طيبة وشجن ما تخلي باب يفتح وجع خلينا للهم والحزن حزاني لكن برضو عالمنا جميل ناشفين لكن ملامحنا خدراء شكرن جزيلن
Post: #58 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-06-2007, 09:37 PM Parent: #52
Quote: وسعوا لي في القعدة معاكم أصلوا حواسي إتمردوا فجأة
داير أطلع و ما دايرين
يافضلابي النوتة قريتا
معانا كمنجة
وحال قوسين
من قزح الشالع
من عبار الديمة
ومارق بين
لونين..
فكّ عيار احساسك
من جبروت اغلالو
يناتق شوق
زي رايش طايش
لامس جفن العين
فجينا مساحة تون
شان تدخل كونتربوين
بين وترين..
او هارموني
داخل عصب الحضرة
تطلع وين ؟
Post: #59 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 09:44 PM Parent: #58
عبد المنعم شكرن لي جيتك و انضمامك لي فرقتنا أعزف معانا بي أناملك الخدراء خلي النيل يكب فوق النشاز ماشاء الله عليك وانت بتطلق سراح الشجن و بتلغي تكشيرة زمن مليان حزن مبسوط بي قلمك الحنين دة
Post: #57 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-06-2007, 09:36 PM Parent: #1
تسليم يا حبيب نورة الشاعر
شفت عجاجكم برة البوست
و قلت معاكم حقو أدافر
طالما الحب لازال مجاني
نكتب ما معروف البحصل باكر
Post: #60 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-06-2007, 09:47 PM Parent: #57
فضلابي
فاضل كم من باقي حنينك فاضل كم من كل أنينك فاضل كتير وانا لساتي أنتظار جواتي بنده ليك ما تغادر جواي أرحل مني الوجع الكافر وتعالا نغني لي يومنا وباكر تسلم كتير أوشفك حلم عشم ممدود قدح كسرة حلم بنوتة بالسترة كلام ناساً حنان بالحيل ولي قدام
Post: #62 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-06-2007, 09:59 PM Parent: #57
خناس
شينة القمرة بدون
الليل واقف
متراس..
وتسهك في الفضة
عيون الشافت
ماس..
حبرين اتلاقو علي
الكراس
واتشخبط قلبي
الحاس..
دكتورة الشجر
القرضة
تداوي الراس
يسلم فاضلابي من
الكباس
Post: #68 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-07-2007, 06:31 AM Parent: #62
عبد المنعم..
جننتا القلب الرادك واقف نص الملعب ورافض إشارك حكم الأشواق..لعيبة تعارك وبس ذي جاني سؤال متدارك
صحيح الناس تتجارى .. قلوبها حنينة ومرّة حجارة..
بس وين الكورة الريدة ؟؟ وعلى أيه الناس تتبارى ؟؟ وليه الطبع الزين دايماً بتضارى ؟؟
Post: #99 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:24 PM Parent: #62
عبد المنعم أبراهيم
Quote: شينة القمرة بدون
الليل واقف
متراس..
وشينة الدنيا بدون أحساس وزول وناس وواحد تاني خليه في سرك قاعد وباقي ليا أساس جوة الراس و في الكراس!
Post: #61 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-06-2007, 09:58 PM Parent: #1
وين?
لي جوة أكيد يا منعم
أفتح لي قصادك شارع
لو حاولت أفوتكم و أمشي
ببعد و قلبي قصادكم راجع
Post: #63 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-06-2007, 10:14 PM Parent: #61
حبيب نورة
مبسوط انا من كم
يوم مانمت مساهر
باريتا حروف الكلكي
مشاعر..
مصلاية جن مبسوطة
مساير..
صليناعليها صلاة الغايب
وحاضر..
Post: #65 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-06-2007, 10:27 PM Parent: #63
Quote: وين?
لي جوة أكيد يا منعم
أفتح لي قصادك شارع
لو حاولت أفوتكم و أمشي
ببعد و قلبي قصادكم راجع
فاتحلك تنقير للريدة
وشارع..
وحاجزلك بيتين في
قلبي قصيدة..
واقفلك بهناك في
الضوء الساطع
ضابحلك نهرين
والبحر الشاسع
شان روحك يازول
شايلك شافع
Post: #101 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:30 PM Parent: #63
عبد المنعم أبراهيم هضرب بي حمي الزمن الجاي خليك في غناي أحساس و شعور في كرش الناي
Quote: مبسوط انا من كم
يوم مانمت مساهر
باريتا حروف الكلكي
مشاعر.
تسلم كتيرررررر
Post: #100 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:28 PM Parent: #61
فاضلابي لي جوة مصاريين القول الصامت ولسة بنادي تعال يا زول فترتة حروف الكلمة الخيل
Post: #64 Title: Re: الصلاة في مصلاية كمنجة .. عقلانية جن الحروف الكلكــي ! Author: taha Date: 03-06-2007, 10:22 PM Parent: #1
والله انتو ناس مجانين جنس جن ......... وانا زهجان منكم جنس زهج ... لكن كا تقولوا لي ليييييي ؟؟؟؟
Post: #102 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:33 PM Parent: #64
يا طه انا بعد بسم الله بخش في طه الآية الفيك الما بتختاها غناوي الروح حرير الكلمة الشوق شجون يادوبك ح تبداها
Quote: والله انتو ناس مجانين جنس جن
بس ما تقول بسم الله!!!
Post: #66 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-07-2007, 01:38 AM Parent: #1
الليل في أواخره و عيني لسع ساهرة و روحي حرامي ناسي الموت و ناسي الآخرة تتلب في الجروح تسرق و ما كافيها يا ليل ليه بدون حراس كده مخليها? لقيتها تعد غنايم من جميل الحزن و در دمعات غمايم هابرة زي المزن نهرتها: غوري قالت ليا ما بإيدي و صرت لي شتمتني و نعلت سلسبيل أيامي و اليوم الجمعني معاها و لفت مني تنفخ ناري: زيدي و زيدي! عارفين يا شباب دايمن زمنا مشاتر يا منعم و يا حبيب نورة عارفين إلا تعملوا ساتر جايكم زمن لاحولاااااا بس يا ساتر!
Post: #67 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-07-2007, 04:13 AM Parent: #66
Quote: الليل في أواخره و عيني لسع ساهرة و روحي حرامي ناسي الموت و ناسي الآخرة تتلب في الجروح تسرق و ما كافيها يا ليل ليه بدون حراس كده مخليها
لا حولا
من زولن روحو حرامي
تنط في روحو..
ما ضهبانة، مجنونة تفتش
ساعة الهجعة عشان
تسرقلهاحس
شريان..
حيرني سؤال الروح
الفيها حراميها
البحميها..
Post: #69 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-07-2007, 06:45 AM Parent: #67
مامعيوبة الروح إن سرقت ماإتولدت زمناً أشتر خليها تنط في بيوت الدم اللابس نفسو وأحمر خليها تشيل عدم الإحساس تدينا الحِس الأخدر خليها تشيل العِرق القاسي وتخت شرياناً أرحم تملاو بي حب الناس والفيو إحساسو أهم ماأصلو الطيبة مشاتل مزروعة في جوّة الدم
Post: #70 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-07-2007, 07:03 AM Parent: #69
هوي انا صاحي
تلاتة ليالي
عشان الروح ماتهيب
تالا الروح..
وقلبي مفتح وشاخر
حبة دم معصوم
في وريدي التاني
اتسلفت
عيونك غمضة
قدر مسدار
ما يعصي جفين..
يا شايلة حروفك
زي محجان
حتحت خروم الريدة
حرازة..
مالك محزونة قدر
ما كبت غيمة..
ملياني مشاعرك شوك
سيال..
او سدرة خوف
من نبق اللحظة
الحالي..
جننتك مش؟
Post: #71 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-07-2007, 07:17 AM Parent: #70
الجن ده معاك إجباري فرحان..ماأصلو خياري سلفتك أنا روحي شان تعرف شوقي الماهو خرافي وسلفتك غمضة عين رغم إنو النوم جواها ومافي وسلفتك حتى العافية إن شاءالله البيَّ تعافي
Post: #72 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-07-2007, 07:37 AM Parent: #71
الجن ما ختا
قزاز افكارو بدون
كاسات
في قعدة قوية..
الجن عاقل ونجيض
بس علا حروف
الكلكي النية..
يابنية هدتلي
العافية عشان اتمدد
بين أهدابا
وشبكة عين
كحلية ..
من دغش احلام
وردية ..
لي ضل مرصوف
بي ريحة بن
عصرية..
Post: #73 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-07-2007, 07:56 AM Parent: #72
يازول الجن أهو داك من الفيك إتبرا وجاك خلاس إستغفر ربو قال البيك مامنو والكلك الفيك سويتو براك
إنت الجن خليتو يآمن !! مين التاني وراك ببراك ؟؟
Post: #74 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-07-2007, 07:58 AM Parent: #72
Quote: الجن ما ختّا
قزاز افكارو بدون
كاسات
في قعدة قوية..
والله الكلام دة عجبني
ما عارف ليه
وكيف انا كتبتو
كانت دايرة منعم سليمان
Post: #75 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-07-2007, 08:09 AM Parent: #74
Post: #120 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-14-2007, 06:17 PM Parent: #75
plllllllz
Dream what you want to dream; go where you want to go; be what you want to be, because you have only one life and one chance to do all the things you want to do The happiest of people don't necessarily have the best of everything; they just make the most of everything that comes along their way When you were born, you were crying and everyone around you was smiling. Live your life so that when you die, you're the one who is smiling and everyone around you is crying When the door of happiness closes, another opens, but often times we look so long at the closed door that we don't see the one which has been opened for us
Post: #76 Title: Re: الصلاة في مصلاية كمنجة .. عقلانية جن الحروف الكلكــي ! Author: Sidig Rahama Elnour Date: 03-07-2007, 09:00 AM Parent: #72
تعالوا هنا يا خيانة .... خنساء وحبيب نورة ومنعم وعبدالله وفاضلابي ومنوت ومصطفى في فد مرة ضاربين همبريب القعدة وناسين أحبابكم برة شكيتكم على الله ، كان عوستوها حروف الغنا سويتوها مجرة تفتح باب الكون العالي ، وتعزف لحناً كلو مسرة شن راجين بعد نصابكم كمل ، ما تقيموا صلاتكم ، وأدعو الوتر يفك الزرة مزرورين في سوق الغنية بلحن مشاتر مدعوكين في ناصية لزمة مُضرة كدي فكوها ، وواصلوا عشان نلحق باقي الجرة ...
حبيب نورا يارئيس الخيانة الكابي الزوغة بالجاحات السمحة اصبر لي يا دلو
التعديل أملته سقوط كلمة (باقي)
Post: #77 Title: Re: الصلاة في مصلاية كمنجة .. عقلانية جن الحروف الكلكــي ! Author: ابو جهينة Date: 03-07-2007, 09:49 AM Parent: #76
حبيب نورة و محبوب عشاق جنون الحرف و الكلِم
Quote: رقَّص الدنيا وهبش... عالي التضاريس المخصمة المزازيك والغنــا
و نضمكيك دة مش تضاريس .. دي جغرافيا و أطلس
ياخي إنت مترع و روعة
Post: #106 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:59 PM Parent: #77
أبو جهينة ربنا يديك العافية ويا زول حصل أجر الجماعة دة بوست بي سبعة وعشرين درجة!!
Post: #79 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-09-2007, 11:55 PM Parent: #76
Post: #80 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-10-2007, 00:14 AM Parent: #79
Quote: تعالوا هنا يا خيانة .... خنساء وحبيب نورة ومنعم وعبدالله وفاضلابي ومنوت ومصطفى في فد مرة ضاربين همبريب القعدة وناسين أحبابكم برة شكيتكم على الله ، كان عوستوها حروف الغنا سويتوها مجرة تفتح باب الكون العالي ، وتعزف لحناً كلو مسرة شن راجين بعد نصابكم كمل ، ما تقيموا صلاتكم ، وأدعو الوتر يفك الزرة مزرورين في سوق الغنية بلحن مشاتر مدعوكين في ناصية لزمة مُضرة كدي فكوها ، وواصلوا عشان نلحق باقي الجرة ...
حبيب نورا يارئيس الخيانة الكابي الزوغة بالجاحات السمحة اصبر لي يا دلو
التعديل أملته سقوط كلمة (باقي)
كان غاتس وين الكان
مدعوك في ناصية بيت
جيرانم..
وبكشّف قال ماشايف
حضرة زولو حبيبو..
كم مرة ندهتك لمن
شفتك واقف جم
خيرات بت كسلاوية..
وانا طالع من
بسبوسة شوق..
يازول يازوق
ادخل لا جاي
Post: #89 Title: Re: الصلاة في مصلاية كمنجة .. عقلانية جن الحروف الكلكــي ! Author: Sidig Rahama Elnour Date: 03-10-2007, 09:47 PM Parent: #80
Quote: كان غاتس وين الكان
مدعوك في ناصية بيت
جيرانم..
وبكشّف قال ماشايف
حضرة زولو حبيبو..
كم مرة ندهتك لمن
شفتك واقف جم
خيرات بت كسلاوية..
وانا طالع من
بسبوسة شوق..
يازول يازوق
ادخل لا جاي
يا منعم يا ذوق ياخي ما تخليني أكب رندوق أنا بفكر أني أخاصمك عشان كاتلني الشوق وأتنفس حلم الرؤيا جداول لم تغطس فيها الشمس شروق خيرات البت السمحة وفاهمة واقفة منارة تضوي بروق ما تستعجل بتديك الفيها نصيبك حشا وكلا من كلماتك بيها تزوغ بس بتفتش في أوقاتها الصعبة شوية شان تبني الساس المايل وتخت الريدة مروق أصبر أصبر أنا جايك عشان أتحسس حس كلماتك لمن فقعت بينا عروق من باحات القلب الوراء الكلها شقوق في شقوق
Post: #119 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-14-2007, 06:07 PM Parent: #80
ولي تروتسكي الغايب و حاضر نقول علي فكرة يا ولية كبّي خلينا ندفن في كاساتنا ليالي الشوق يا جماعة انا يادوب سربت لي كاشين انا أخوك ياشعدية!!!!!!!! في صحتك يا تروتسكي وصحة بكري الرافع الراية يعني شنو مافي حاجة؟؟ يا مرة انا هيّن واللا ليّن ؟؟ وحاة أمي انا كان أتديّن أتبيّن كبي لينا كاس قبال ما ناس النظام يجو يخموك خمـّة السرق ما مرق تروتسكي مالك يا صنديد يا جبل الحديد مالك يا عشا البايتات يا زول انت مالك ماشي ماذال الليل طفلاً يحبو عرقي العيش سواها فينا لكن لا شكـرنا ر قدنا طينة ما كفاية يوم الخميس الفات يوم ضبحنا التيس والمرارة والشية ديييييي تقول يا غربتي اليوم داك حاجة التاية حجزنا برمة مريستا كلها و انا دقيت سدري وقلت الليلة العدل علي حرّم زول واحد ما يدفع اها صاحبك أبنوسي قام من الكاس التاني يعني دي حالة؟؟؟؟؟؟؟؟؟ انت ما قلت حوض رملة
Post: #81 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-10-2007, 00:39 AM Parent: #79
ضل الزمن الروح يا تماضر لونو غريب أزرق و مشاتر و أنا ده غفيرو حارسو أمبارح و هسي و باكر
حارسو زمن يا خنسا .. فترت هو البتغير لامن يحب و أنا بي وراه مالك .. و عب
Post: #82 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-10-2007, 01:55 AM Parent: #81
فاضلابي ...
ضل الزمن الساكن روحك خلّي إسالم ضي بسماتك سيبو إعشعش ..إقالد ذاتك.. تعرف ..إنّو..الشمس الفيك..هي البتحرّك نورو شراعك أنا لو منّك بكسر ضل الزمن الأشتر ويصبح نورك..حاضن ناسك ولو ..يابعضك.. سبتا النبض الفيك..يحكيلي.. حكايتك بشوف ..رقراق التقوى ..الفي عينيك..رغم شقاوتك تلقى رويحتي....بتسبر غورك.. وألقى الفيك مني ..جد..مشتاقك آخر ..حتة ضل جوّاكا تودّع.. جد منكسرة.. ونورك..باهر أنا..لو تعرف..فيك..تذكارك.
Post: #107 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:02 PM Parent: #79
Post: #105 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:54 PM Parent: #76
صديق رحمة
Quote: تعالوا هنا يا خيانة .... خنساء وحبيب نورة ومنعم وعبدالله وفاضلابي ومنوت ومصطفى في فد مرة ضاربين همبريب القعدة وناسين أحبابكم برة شكيتكم على الله ، كان عوستوها حروف الغنا سويتوها مجرة
الهم أنشرّ !! و هم الشوق لي لحظات سمحة مالي العالم جوة وبرة كدي فكوها ، وواصلوا عشان نلحق باقي الجرة ...
Post: #103 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:38 PM Parent: #66
فاضلابي انا كدة ح أضطر أفكفك حاجات كتيرة جواي لكن خوفي من سرقة الحلم اللذيذ اصلاً الايام دي مافي مجال للبوح الا في كراريسنا دي
Quote: يا منعم و يا حبيب نورة عارفين إلا تعملوا ساتر جايكم زمن لاحولاااااا بس يا ساتر!
واااااااو منتظرنك في مصلاية التماس بس ما تعمل ألتماس!!
Post: #121 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-14-2007, 06:39 PM Parent: #66
الله أكبر وحي علي فلاح شوقاً يفتر سيدو مشوار طويل الله أكبر وحي علي صلاة هما يغسل زولو أحسن من قبيل
تسلم يا فاضلابي من جديد!!
Post: #83 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-10-2007, 04:11 AM Parent: #1
و لو بالليل النوم ما جاني مين البمشي يزور أحلامي باب لي باب يغشاها و يسلم يقعد حبة يقول ويكلم مين و الروح مكسور جنحاتها مين?
Post: #84 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-10-2007, 05:08 AM Parent: #83
Post: #85 Title: Re: الصلاة في مصلاية كمنجة .. عقلانية جن الحروف الكلكــي ! Author: fadlabi Date: 03-10-2007, 05:28 AM Parent: #84
طيب يبقى غلبتي الحجة و أنا ما داير تاني أقول أصلو الراجل في موروثنا عيب يتألم لامن توجعو روحو و تبكي عيب للناس بي جرحو يكلم و أنا ما داير يوم الناس للقلناه في قعدة تجيب يقولو وقعت ده طبعا عادي لكن كترة البتبتة عيب!
Post: #86 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-10-2007, 05:39 AM Parent: #85
فاضلابي :
مين الختّا العيب ؟؟ وأيه مفهوم العيب ؟؟
أنا ذي ..ذيّك إنسان.. سبحان الرحمن خلّى صلاة العين..دمع هتّان.. لو كان العيب ..تحكي بألمك.. ماساب العين..الفيك..ذيي.. أنا ربي..يوم ماظلمك.. نفس الإنسان.. ذات ..الأحزان.. وبالدمع ملان.
Post: #87 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-10-2007, 01:54 PM Parent: #86
يا سلام عليكم
فاضلابي وبقية الناس الطاعمين جدا
جر خطين فاضلابي وصنقر
وخت بي ايدك انت الساتر
وما تهتم لي الزمن الجايي
ومافي زمن تحميهو سواتر
كاتل شر البحصل هسا
وماتهتم لي البحصل باكر
بحصل ايه؟ ... ما الدنيا بتمشي
رغم الجن الفينا مشاتر
اتكي الشوق جواكا احضنو
وارمي الضل راكوبة خاتر
وما تتلفت وان ما كفت
ريح الشوق اوعاك تخاتر
كجن كل البلعن جلدك
وجرّ الشوك... رصاكا دفاتر
لي اوهام تحلم بي الجنة
وتبني وجع في جسما فاتر
ناشف عود من لحم العافية
الموية الدافية
وبعض فلاتر
ضد الجوع .. اللوح ...الضحكة
وضيق الحال الاصبح كافر
العن ...عفوا منك ياخي
اسف..... بس منك يا ساتر
واسف جدا
Post: #88 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-10-2007, 08:13 PM Parent: #87
كلما تضيق الدنيا علينا نلقى الإحساس بيطيّب خاطر نلقى سماحة الروح الفيك تدّي الريد الفينا معابر تستنهض كل خلايا الدم شعب بطالب حقو مثابر في كل شريان بترابط وكل وريد جوّاهو وساير في كل جنبات الروح تنظيم وكل تنظيم بيهتف وثائر ثورة ضد أناي والذات وحب الغير رافعنو شعاير وألقى أناي دفّق بونبان أحزاب وطريقا مُشاتر تتصارع جوّه القلب الواحد تعبان النبض وفاتر شقيان القلب الواحد واقف بين أحبابو وحاير لي متين الكل بتصارع ؟؟ ولي متين بحياتو نخاطر !
Post: #90 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-11-2007, 02:45 AM Parent: #88
Quote:
يا منعم
يا ذوق
ياخي ما تخليني
أكب رندوق
أنا بفكر أني أخاصمك
عشان كاتلني الشوق
وأتنفس حلم الرؤيا جداول
لم تغطس فيها الشمس شروق
خيرات البت السمحة وفاهمة
واقفة منارة تضوي بروق
ما تستعجل بتديك الفيها نصيبك
حاشا وكلا من كلماتك بيها تزوغ
بس بتفتش في أوقاتها الصعبة شوية
شان تبني الساس المايل وتخت الريدة مروق
أصبر أصبر أنا جايك عشان أتحسس حس كلماتك
لمن فقعت بينا عروق من باحات القلب الوراء
الكلها شقوق
في
شقوق
مالك يا صاحب داير
تفتح صالة قلبي
علي الاحزان ..
عارفك مليان
اشجان من باحة
قلبك ديييك..
حسيتك ..
ممكون ومكتّم
مين الهبشك
في الشريان..
او طقّ هشابة
قديمة بفاس
الذكرى الحاذق..
حاولت اباصرك
تطلع منك فيك
من وحشة شدر الخاطر..
جرّيتك تالا
حديقة السر
شان تفصح بي
مكنونة..
لكنك كنت متربس
باحة قلبك..
بي كلمات ..
أداها "بشاري"
الذوق من روحو
معزّة..
Post: #91 Title: Re: الصلاة في مصلاية كمنجة .. عقلانية جن الحروف الكلكــي ! Author: Sidig Rahama Elnour Date: 03-12-2007, 00:27 AM Parent: #90
Quote: مالك يا صاحب داير
تفتح صالة قلبي
علي الاحزان ..
عارفك مليان
اشجان من باحة
قلبك ديييك..
حسيتك ..
ممكون ومكتّم
مين الهبشك
في الشريان..
او طقّ هشابة
قديمة بفاس
الذكرى الحاذق..
حاولت اباصرك
تطلع منك فيك
من وحشة شدر الخاطر..
جرّيتك تالا
حديقة السر
شان تفصح بي
مكنونة..
لكنك كنت متربس
باحة قلبك..
بي كلمات ..
أداها "بشاري"
الذوق من روحو
معزّة..
أها يا منعم من باحات شوقنا الزادتنا في الأسطر لقافة دايرني أبداكا من اول فراق أردم عشم كل المسافة ؟؟ ياخي أصبر بس قليل ، قلبي فتش لي مفاتيح البطين يكسر سجن دم الصبر الفاتح منابر ، يطوي المخافة يرسم بتضاريسو التعرج يكتل نبض حس الرهافة يتمدد الشوق الحنين ، يتمدد الشوق الخرافة وأنا لسع فيني شوق ، لو ختو جبل الهم عليهو زاد لُفافة
Post: #92 Title: Re: الصلاة في مصلاية كمنجة .. عقلانية جن الحروف الكلكــي ! Author: احمد العمار Date: 03-12-2007, 01:35 AM Parent: #91
طبعا مفترض البدخل هنا يكون فنان عشان يشارك بروح شاعرية
لكن دخلت مرغم عشان اقول ليكم جميعا حفظكم الله يا رائعين
( البوستات يا كدا يا بلاش )
أحمد العمار
Post: #93 Title: Re: الصلاة في مصلاية كمنجة .. عقلانية جن الحروف الكلكــي ! Author: محمد أبوعاقلة الطريفي Date: 03-12-2007, 01:46 AM Parent: #92
مسجون في خط مجنون ... اوله في كعب الخطوة ... أصغر من قعر الكون ... ضيق بشكل فظيع ... أحلام في مليمتر منسي قصاد شباك الريح الجابت عطرك لي نخرة زول عندو حساسية ... وهاك يا بوح ... يا البوخ الطالع من طاقة قلب مكسوف يتكثف في عينيك والهجرة صعيد ... حوّمتك فيني غمامة ورشه ... دعاشك صّر احساس الألفة جواز مختوم من كل الناس ضرورة ملحة ... ونقطي يا ... يا ... انسانة ... تّمري شفاف القلب بالنقطة اليود ... بّلي الناشف من ريق الصمت بالكلمة التهرس ... النظرة الحادة وكِت تغرس ... في شبكية زول احتكرت مشهد ثابت (شدرة صبار ورمال متحركة ... تدفن في واحة مراهقة ... تفتش عن فرصة إنها تحيا ... تحلب في ا
عشان خيلك تسِند حيلك ... ويصبح فعل الكبوة بسيط) إتنفض واصل ... مجهودك فردي ... رُشَاشِك فّج رحيل الرملة ليان ... آثار إترسمت في وش إنسان ... وشفت عيونك في قلب الطل ... ألوان فنان بتفوح بالفل ... أتلقاها مجاري وصهريج ... للزمن الجاري بلا رجلين ... للذكري الختت يدها في خدين ... محنه وسرحت ... رفعت يدها في وش الغربة ونزلت كف ... حار ومكربن من غيظا بايت في ريكة هم ... مين قال ليكي المجري مسرب وانا كشحت المويه رهاب ... مين جاب ليكي وشاية تنقط في زنكي الراس جوطه وازعاج ... وخلاكي تكركبي في مخي صاموله وحلجت ... بوادر أزمة ... بَنشر صوتك في حزن عميق ... وانا ضميتك رقعة نار ... منفاخ من نفس دعاشك وريحة حيط مبلول ... يا وحلانة في طين البال ... وملككه جوه شوارع الروح ... انا سميتك حرية ... تطلعي زي ما تحب عينيك مشوار عصريه ... تدخلي نص الليل صياده ونبله ... حجرك بوسه وقبله ... وطاااااخ ... فرتقتي أيادي ... أصوات بتنادي ... حنجرة بلعت كل الآه وخِنقت ... كباية ريق (انا مضايق ما بتتخيلي كيف) ... دافر موج النشوة سواحلك ... سدرك قيف ... شعرك لبلاب الليل الدافن قيفك ... صوتك بابور الليستر يشفط باقي النشوة الضاجه دفاق ... حتي الشدر النائم صَفّق ... لون الليل شفّاف ولزج ... ممزوج بالنور الفي خديك ... نظرة عينيكي فلاش وبرق ... يا بت من ضو ... غرستك إستارتر ! ولعي لمبه ناصية وشارع وغرف القلب ... لفيني برنسيس ... يربطني لعابك ... وما اتدفق الا دواخلك سلطان الكيف ... اتشوشو وانا بتأهب أدخل جوه مساحة روح ... نيكوتينة ريد ... قطران للسوط البتمايل تهديد وغنج يمحط كل الفرقة ... يفنس ضهر الغربه شمال وشرق ... اشفطي ماتخلي الريح تفضحني معاك ...
سامع صوت في الباب ... دقيقة يا في ناس بتجي تقطع حبل افكارك وتشيل باقي الحبل وتمشي ...
Post: #94 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-12-2007, 02:09 AM Parent: #93
ابوعاقلة يا ماعاقل ابدا
لمن انت تخش بي كل شجونك
تحرق جوه الجوف في بخورك
مابتتمطق الا تمد في كل الجتة
حبة... محبة
وتدي حبيبك باقي جنونك
ما بنحبك ياخي وفرتق
من ارواحنا بواقي الالفة
تش الضوء بي ابرة جيتك
كحل شوفنابـ نبض عيونك
او اعمينا وقرط ياخي
ادي مسامنا السم الهاري
وما تقوم جاري
تشوت ضفاري
بجيكم عاري ضجيج اللهفة
وما بنستحمل ياخي نخونك
العن وش الشر ان زارك
بس تتبارك
يا عوالق في الريد والصحبة
وفي الاجساد دافق اوذارك
كرهتك موت.... بس بيني وبينك
غارز فيني بواقي لحونك
وبرضو بحبك
ساهي
وساكت
متقريفلك
غور بالله
واسكن جوه
وسكّن لونك
يقرفك ياخ..... ما تطول تاني الغيبة وتغتس
Post: #95 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-13-2007, 01:56 AM Parent: #94
انتو حبيبه دا مشى زين؟
يا نورة وحبيبك الغايب
جوانا زرايب الفة بتنده
من ملكال لي حد حلايب
شوفوا الزول ياناس افتونا
ارتفع الشوق لي عشرة صلايب
وضغط الريد زاد شوق ومحبة
ولسه بيسال في ام روكايب
ويا ام احمد وين المحلب
وين الكان لي جرحنا بطايب
Post: #96 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-13-2007, 03:55 AM Parent: #95
شفتو بساسق وكايس نورا شايل الريد والوصل الغايب مابغباك الزول إتودّر وعقلو وراها أصبح ضارب مرّة تشوفو إصلّي فــ شوقو ومرّة إلوم الزمن العايب ومرّة تشوفوا ..خاشع وبتلو فيهو قليب لو تعرف راهب
لو بتشوفو إشاكل قلبو وإرجع إطبطب ..إصالح حالو كان بتقول الريد إتجنّن حليل الكتبوا وغنوا وقالوا يوم بتلاقوا بتضحك نجمة دموع الغيم تلقاهم سالوا تلقى الكون ..محتار في أمرو وكل الفيو بي ريدم مالو
Post: #97 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-13-2007, 05:23 AM Parent: #96
ابوعاقلة..
شرقت العين بالشوفة
ورقرق شوقي الطال متمحن
وهارس يوت مروادو كحل
محبوبة..
وخلاني احبها في فنجان
من بن واقراها خطوط عرضية
وطول مستقبل ..
واتقاسمن صحين من فول
احساس مرشوش بي زيت
الالفة..
وكت كايسلك بين صفقات
الخضرة متلفن
واقع زي الخيط
من خرم الابرة ..
وخرمان جد جد
للنكهة الفيها حروفك
نازلة عرق من ضهر
الفيل ،
والدنيا شتاء..
يانيل مساها جروفك
صوت هدام ،
طالع من موج نهدين..
والدنيا مساء..
وحبيبة صاحبي تلف
بي ريقها سجارة
خوف..مجبودة شمال
ويمين..
فكيت سجن الكلمات الخازنة
جرح متنوسر في
سنين..
Post: #98 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالأله زمراوي Date: 03-13-2007, 05:34 AM Parent: #97
يا لك من مدهش. شياطين شعرك هي الشياطين.. أروع من أن تدبج الكلمات هنا!
Post: #108 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-13-2007, 06:03 PM Parent: #98
عبدالإله ..
تجي تصلّي ؟؟ أوعاك تنكر.. عارفة فروضك ..ناقصة.
Post: #110 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:10 PM Parent: #98
زمراوي
Quote: لك من مدهش. شياطين شعرك هي الشياطين.. أروع من أن تدبج الكلمات هنا!
والله يا زمراوي انا خايف من قبيل يجي واحد يقول بسم الله ما أفتح عيني والا القي البوست مشي الخور!!
Post: #111 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:17 PM Parent: #95
عبد الله وداعة
Quote: انتو حبيبه دا مشى زين؟
بساسق في الدريب الماشي بحداك!!
ممكن ألقي زول يوريني محل ودرت أبريقي ما داير أجيكم الا أكون طاهر من الحزن الفرح دة حاجة مقدسة!!
Post: #113 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:26 PM Parent: #94
عارفين والله خليتوا الواحد أشجانو مشتتة وما عارف هو شايت وين! جواي زحمة كلمات ما عارف ليها مصير وقدامي كمين خطوات ما محدد ليها مسير اها! قاعد يخربش فيني كديس الميتافيزيقيا حرشتوهو فيني وقعدتوا بعيد بتعاينو وتراقبوا الموقف عارفكم الدايرنها لي ما شوية آآآآآآآآميييين
Post: #114 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:31 PM Parent: #94
عبد الله وداعة !!!!!!!
أحححححي انا
Post: #109 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:07 PM Parent: #93
ابو عاقلة !!!؟؟؟
Quote: ضيق بشكل فظيع ... أحلام في مليمتر منسي قصاد شباك الريح الجابت عطرك لي نخرة زول عندو حساسية ... وهاك يا بوح ...
ياااااااااه من لذة صمت القول في صياحك! ويااااااااه من وجعة شمس الليل في صباحك!!
مرتاح و مصنقر في المصلاية وفي القلاية أتنين فنجان من البكري وعارفك فقري وبتمرق بدري علي قدام مفتاحك أنجليزي وراس كراس هندسة فوق زمن حاجة الناس فيه لي هندسة بشر أكتر من معمارية وياااااه !!!!
Post: #112 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 06:23 PM Parent: #92
أحمد العمار شكرن جزيلن تسلم يا أمير
Post: #104 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 05:43 PM Parent: #84
خناس
عارفة انا ح أديك الأمامة في المصلاية دي!! علشان انا بجيز أمامة المرأة!! خسوساً في صلاة الروح زولة تعرف تلملم في الأسي و زمنو تطيب لي الخاطر المجروح!!
Post: #115 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-13-2007, 07:29 PM Parent: #104
وأنا بشوف إمامة الراجل ..تدِّي الفرح إحساسو الطبيعي !
Post: #116 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-13-2007, 07:53 PM Parent: #115
وانا بشوف انك أروع أنسانة في الزمن الحر دة!
Post: #117 Title: Re: الصلاة في مصلاية كمنجة .. عقلانية جن الحروف الكلكــي ! Author: كبسيبة Date: 03-13-2007, 10:28 PM Parent: #1
حبيب نورة أزيك...ليه ما جيت عرسي إنت لسة بتكسر فيهو
Post: #118 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-14-2007, 03:46 PM Parent: #117
كبسيبة والله يطرشني أكان سمعت! مبروك يا راجل لكن ما تخاف بجيكم لمن تبقوا تلاتة
Quote: إنت لسة بتكسر فيهو
عشان أكسر ليكم تلج السماية!!
Post: #122 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-14-2007, 07:02 PM Parent: #118
Quote: يا لك من مدهش. شياطين شعرك هي الشياطين.. أروع من أن تدبج الكلمات هنا!
عبد الاله
وانا كنت ضبطك
في حتة هناك
قاعد قدام الطيف
متدبج حرفك قوس
وتناوش بي سهمك
في اللون العاجبك..
يك التحية
ياشفيف
Post: #123 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-15-2007, 07:34 AM Parent: #122
Quote: عارفين والله خليتوا الواحد أشجانو مشتتة وما عارف هو شايت وين! جواي زحمة كلمات ما عارف ليها مصير وقدامي كمين خطوات ما محدد ليها مسير
العارف سرو يحس الخطوة
قبل يمشيها ..
اظنك غرقان في جرة
ملانة حصاوي
بتحسب فيك اسماء العشق
الحسنى..وخايف من ينساك
الاسم القاصدو يفطك ..
وكديسك خربش سقف الروح
واللوعة مدينة
حائر..تاهتبو الدنيا
زقاق متصوف في
درويش..
ياريش مروحلك ريح
الهجعة
هجير..
متخوزز نحل العين
طنان في جفن الحضرة
يهابي..
ياساتر حيلك صخرة
في وش السيل..
وشالك افعي
علي الادراك...
عقرب في قوس
الزمن اتنحنح
ودار..
اهتز فلك دوار في
عرش الجرة...
ياعارف سرك
يامحتار..
نجمت مدار في
الكون...
Post: #124 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-15-2007, 08:07 AM Parent: #123
كبسيبة الف مبروك
بيت مال وعيال
الوداك تكابس في العرس شنو؟
ياالله ، الله يديك العافية
Post: #125 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-15-2007, 08:16 AM Parent: #123
يا منعم اخوي اطلع من سرك
اسند الروح بي طوب عافيتك
وادخل ساكت ما تتوضى
وابدا صلاة الروح بي برك
من ايديك يممنا الجتة
غسلنا الليد بي باقي بركتك
جيب الراس
الكف
نتبرك
يا مجلوب في رقيبة فرحة
وجالب مسكك تكتب وتمحى
مين الكاتب فينا وشرّك
بالايات الفضحت عشقك
وباقي النور بين سجدة وركعة
وقاصد يكتب في الناس شرك
شرك احسن من دعواتنا
وكل الخير الفينا بيطلع
طلع زيتنا وكتر برك
يا مجنون بي الريد والصحبة
وحب الناس الجد بتريدك
العن كل الشرو بزرك
والعن جني وجنك
يا مجنون
Post: #126 Title: Re: الصلاة في مصلاية كمنجة .. عقلانية جن الحروف الكلكــي ! Author: عبد المنعم ابراهيم الحاج Date: 03-16-2007, 00:34 AM Parent: #125
ود وداعة..
شركت حبال ابليس
وهجيت في الصي
تابعت هجيرو
سراب عطشان..
ضهبني حنين في
سدرة روحك
لما ندهت مفازة
غايب..
واتيممت صعيد مكتوب
في لوح مبروك..
رقيتها محايتك يامجنون
في ليل وصباح كاتفاهو
خيوط الشم..
جبّيت في شوارع الهم
تابعت اتر في الريح
ولقيتك خازن بحر
الشوف في جراب..
ومصنقر في تبروقة عرفة..
يامجنون...
Post: #130 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 11:21 AM Parent: #125
عبد الله وداعة الجن الجنني وجنن جنك!! حنين اللحظة وفرة سنك الجن الأحمر الأحمر وكلكي الضو الشارد منك كوني أحبك دة جنناً تاني كوني افوتك تبكي أظنك والجن العاقل في كراسي العقل المجنون الفي راسي حاول تعرف مقدار جنك!!!
Quote: والعن جني وجنك
يا مجنون
Post: #127 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 11:12 AM Parent: #123
يا منعم
Quote: بتحسب فيك اسماء العشق
الحسنى..وخايف من ينساك
الاسم القاصدو يفطك ..
وكديسك خربش سقف الروح
آآآآمين يا صاحب لمن اشوف تبروقة بتفرح بي صلواتك! آآآمين يا صاحب حتي جنون الشوق الفتر لي خطواتك!
Post: #128 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 11:16 AM Parent: #122
عبد المنعم الكلام دة مغروف بعناية من جواة الروح
Quote: وانا كنت ضبطك
في حتة هناك
قاعد قدام الطيف
متدبج حرفك قوس
وتناوش بي سهمك
في اللون العاجبك..
شكرن جزيلن
Post: #129 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-17-2007, 11:18 AM Parent: #128
صليتوا ؟؟
Post: #131 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 11:26 AM Parent: #129
خناس
Quote: صليتوا ؟؟
ما صلينا لكن أتوضينا بي موية عيون شوقنا لي تكبيرة أحرامك أتنفلنا منك وكنا راجين أقامة سلامك يا أمامة الفرح الكثيف الليلة زايدين في أحترامك!
Post: #132 Title: Re: الصلاة في مصلاية كمنجة .. عقلانية جن الحروف الكلكــي ! Author: Mustafa Mahmoud Date: 03-17-2007, 11:27 AM Parent: #131
Post: #140 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 12:00 PM Parent: #139
أحساسك جوة الفجــّة
زي ما يكون الشوق متكول في الصف الأول!
Post: #143 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-17-2007, 12:48 PM Parent: #140
إحساسك ..آمي صلاتي وأنا لو تعرف ..تامي خشوعي كلما يركع شوقك..بلقى الشوق الفيني إحاكي ركوعك وكلما يسجد نبض الريد جوّاك..ألقى قليبي هوّ سجودك..
Post: #150 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-20-2007, 01:06 PM Parent: #143
يا لهويييييىىىى
Post: #141 Title: Re: الصلاة في مصلاية كمنجة .. عقلانية جن الحروف الكلكــي ! Author: عبدالله وداعه الامين Date: 03-17-2007, 12:07 PM Parent: #136
منقوضة صلاة الغايب قلبي
منكّسة ياخي وجايطة صلاتكم
ما تستهبلوا بس بالصحبة
وتدفقوا فينا مبادي صلاتكم
قيقرف كل القلب السابكم
وما اتيمم كل بقعاتكم
مجنونين.وجونكم كلكي
وفي الارواح دافقين شهواتكم؟
لموا بواقي اشواقنا وغوروا
ودسوا طواقي الحب الجاتكم
ملعونين ...بالحب وحنينو
انعل كل الجاكم وفاتكم
وما اتوضى وغسل خاطروا
وصلى صلاة الغايب....ذاتكم
مكروهين
يا وهم الدنيا
اشتر لو نقزتا وفتا
وما صبحتا الوش بي شناتكم
مجنونين
Post: #142 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-17-2007, 12:16 PM Parent: #141
عبد الله وداعة النجاض النجاض يا وليد كفااااااااااااي والله
Quote: وما اتيمم كل بقعاتكم
مجنونين.وجونكم كلكي
وفي الارواح دافقين شهواتكم؟
ولا الضالين
......!!!!
Post: #145 Title: Re: الصلاة في مصلاية كمنجة .. عقلانية جن الحروف الكلكــي ! Author: Sidig Rahama Elnour Date: 03-17-2007, 01:26 PM Parent: #142
يا حبيبها الجن الكلكي الراكب محمود أنتو خليتو فيها عقل ؟؟؟ما خليتو الشوق بندول يتلفت حائر كايس القبلة يسجد قبل ركوعو الما متضوي ، يفوت ركعة .... ينده في الله يسب الدين لما تفور أعصابو ، ويتكل سفة ، خلاص قضيت الصلاة فأنتشروا في الأرض مرتزقين
Post: #146 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-20-2007, 11:18 AM Parent: #145
صديق رحمة ما تفوت ركعة الشوق مجدوع في مصلاية و حنيني بكون زي آية وصوت الغناية تشهد أول وجيتك انت سلامو عليكم آآآآآآآآآآميييييين!!
Post: #144 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-17-2007, 12:57 PM Parent: #141
لو تتذكّر يومي الجيت ..وكلامي مشاتر.. وإنتا تصلّح فيهو شتارتو تمسح نقطة.. تغيّر مرّة فواصلو تشيل الغلط الفيهو ..وساتر إنتا عيوبو..وداسي حنينك جوّة هباتو أنا لو أقدر ..بس أتناسى وجودك في الكلمات ..النابضة بذاتو كنتا كتبتا الروح مصلايتك ووحدك إنتا النفس الدافق فينا حياتو
Post: #147 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-20-2007, 11:30 AM Parent: #144
خناس الشيخة السبحة المصلاية التبروقة القبلة الله أكبر الله أكبر الشهادة والعمل الطيب !!!
Post: #148 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-20-2007, 11:38 AM Parent: #147
حبيب نورا ..
الصعيد الطاهر..
Post: #149 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-20-2007, 11:44 AM Parent: #148
خناس صعيد الأمنية الطاهر قطع صلواتنا ليك يا شوق وانا ح أبتديك المرة دي نافلة عشان عارف أحساسك فرض!!
Post: #151 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-25-2007, 05:47 PM Parent: #129
الله أكبر الله أكبر
...........!!!!!!!!!
Post: #152 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-25-2007, 06:05 PM Parent: #151
وجيت إتهجَّى حروف الإلفة.. كان إحساسك.. لون المغرب.. وكان الوكت.. بيأذّن..صدفة..
Post: #153 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-25-2007, 06:13 PM Parent: #152
خناس كت راجيك الفجر الأول بس كانت جيتك ساعة المغرب قلت اليوم في قربك أجمل وكيف ح يكون لو جيت المغرب!!
Post: #154 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-25-2007, 06:23 PM Parent: #153
وإستيتك ..تلتي الأوّل.. إترجيتك ..فارشة نجوم الليل مصلايتك.. عدَّى التلت التاني.. لقيتك شايل آخر ليلي وجاي..
Post: #155 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-25-2007, 06:31 PM Parent: #154
الصلاة جامعة!!!!
Post: #156 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-25-2007, 06:42 PM Parent: #155
واسيت صفوف الشوق..
Post: #157 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-25-2007, 06:47 PM Parent: #156
بس أنا مستني تكبيرة الأحزان!!
أقوم أرجاك في الدمعة الأولي
عشان لو أسرع شيخنا الباكي
تكون الدمعة عجولا هطولا!!!!
Post: #158 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-25-2007, 06:53 PM Parent: #157
أنا لو تعرف إليكا.. بيمّم.. وِجهة شوق الزول الليك محتاج أنا لو تعرف بيكا بصمّم أملا الحزن الفيكا..فرح ..وهّاج..
Post: #161 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-28-2007, 06:31 PM Parent: #158
خناس جيتك أحلم في ربوعك فاتتني من الفرحة ركعة!!
قلت أرتاح من دموعك برضو سال الشوق في دمعة!!
Post: #159 Title: Re: الصلاة في مصلاية كمنجة .. عقلانية جن الحروف الكلكــي ! Author: حافظ العشا Date: 03-25-2007, 07:17 PM Parent: #1
Post: #160 Title: Re: الصلاة في مصلاية كمنجة .. عقلانية جن الحروف الكلكــي ! Author: حافظ العشا Date: 03-25-2007, 07:50 PM Parent: #1
حبيب نورة لك تحياتي انا طبعا عضو جديد لنج متابع كل كتاباتك بس كنت بتاوق بي فوق الحيطة لكن هسي جيتكم عديل بي خشم الباب ياخي نضميك سمح بلحيل وممتع جدا وهو ده زاتو الخلانا نجيكم بخشم الباب سلمت يداك يا الحبيب ولك الود والاحترام
ودالعشا
Post: #162 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-28-2007, 06:41 PM Parent: #160
حافظ العشا تسلم يا عشاي وكمان مرحب بيك في منتدي سودانيز وانشاء الله ح تكون أضافة جميلة ربنا يقدرنا علي أسعادكم شكرن جزيلن
Post: #163 Title: Re: الصلاة في مصلاية كمنجة .. عقلانية جن الحروف الكلكــي ! Author: تماضر الخنساء حمزه Date: 03-28-2007, 06:58 PM Parent: #1
جيتك .. ذي نغم فارقنا وترو.. ولسه بعزف فينا لحنو ذي خريف ضالاو سحابة جاي إسابق ..فينا زمنو والقليب عطشان إتاوق والغيوم الفيهو هطلوا فرهدت بالريدة فيهو كل شرايينو ومحلّو جاتنا من شريانو شدرة فيها كم ريداً ودلّو وكم صفق مليان محبّة الحبايب سكنوا ضلّو وفي وريدو دفقتا ريدك العذاب الفينا ..خَلّو إحنا نسعد بيهو برضو وفي هواكا رضينا ذلّو والباقي من أيّام عمرنا شيلو بي ماضيهو كلّو ليه قليبك ديمة قاسي ؟؟ ولو قساك شايفنو حِلو وليه جفاك زايد علينا وبرضو طارح فينا حَلّو إحنا نقسم ليك حنينا والباقي منك مابنملّو
Post: #164 Title: Re: الصلاة في مصلاية كمنجة .. عقلانية جن الحروف الكلكــي ! Author: حبيب نورة Date: 03-28-2007, 07:09 PM Parent: #163
خناس
Quote: جاتنا من شريانو شدرة فيها كم ريداً ودلّو وكم صفق مليان محبّة الحبايب سكنوا ضلّو وفي وريدو دفقتا ريدك العذاب الفينا ..خَلّو إحنا نسعد بيهو برضو وفي هواكا رضينا ذلّو
خناس عارفك مطرة غيمة وشجرة و نزرع شجرة شجرتين شجرة بتعمل غابة لكن ما كنت فاكرك ح تصلي بينا الحنين بي ( البقرة) !!