Post: #1 Title: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-28-2009, 07:28 PM Parent: #0
جيراننا زوج لطيف.. الزوجة زميلتي في العمل.. وجارتي الباب بي الباب... نوع الجارات البودي ليها صحن وتودي لي صحن في الغربة المحتاجه دعم معنوي زي ده.. ولو عملته شي لازم أرسّل ليها.. ولو عملت شي بتقسم لي وترسل لي... زوجها رجل بتاع واجب.. وبعرفه كويس.. اصدقاءه كالاخوان عنده....بعد زواجه استمر يواصلهم... ويشد من أزرهم...
الليله المغرب، سمعته الزغاريد عند جارتي... وبعدها بشوية اتصلت بي.. واحد من أصدقاء زوجها جاهم عشان يحننوه.. ويزفوه لزوجته المسافر ليها في السودان.... كان سألهم عننا انا ونادر، بالصدفة! قالوا ليهو هديل بابهم فاتح في بابنا...
وللحظة شعرت بالحزن عشان الغربة بتختصر كتير من فرحنا... لكن بعدها، شهرت بالكثير من الفرح لHatim Yousif بهؤلاء الاصدقاء الذين تجمعوا من اجل ان يباركوا له....
فهلا نكمل نحن بقية الفرح، ونبارك لزميلنا هنا!
ألف مبروك يا حاتم.. وان شاء الله بيت مال وعيال....
شكل المباركة يكون كالتالي... أي سيدة/آنسة تجي هنا تدينا زغروده... واي زول يجي هنا يبشر لينا.... قلنا عايزين نتم الفرح
وعقبال العايزين... والعايزات...
بالمناسبة السعيدة دي برضه بقول انه حاتم الباسورد بتاعه اتهكّر قبل يومين.. وبكري لحدي حسي ما رجعه ليه...
Post: #13 Title: Re: حنّتو عند جيراننا! اخونا Hatim Yousif، وزميل البورد... عريساً Author: هند محمد Date: 09-29-2009, 08:41 AM
الف مبروك للاخ حاتم يوسف .. ربنا يتمم على خير
Post: #14 Title: Re: حنّتو عند جيراننا! اخونا Hatim Yousif، وزميل البورد... عريساً Author: محمد عبد الماجد الصايم Date: 09-29-2009, 09:16 AM
ألف مبروكـ يا حاتم ربنا يتمم ليكـ على خير!
شكرا يا مريم على الأخبار السعيدة وعقبال ما نسمع عرس نادر!
_________ عرس الباسوورد ياخ!
Post: #16 Title: Re: حنّتو عند جيراننا! اخونا Hatim Yousif، وزميل البورد... عريساً Author: احمد التجانى احمد Date: 09-29-2009, 09:36 AM Parent: #14
كنت باتكلم معاه لقيته فى الحلاق زى الساعة اربعة كدة المهم احكى لينا الحنة كانت كيف ولو فى صور تكونى ابدعت يامريم بت الحسين تقريبا دلوقت العريس دة فى صالة الترانزيت بمطار الدوحة (تلفونه مقفول) متوجها لمطار الخرطوم وزى ما انتو عارفين مطار الخرطوم بقى بيستقبل الطيارات بعد الرابعة عصرا بسبب اعمال تمديد المدرج المهم العرس يوم الخميس ان شاء الله وربنا يتم على خير وعقبال كل العزابة و ح نعمل بوست تهنئة بعد يوم الخميس وشكرا مريم بت الحسين
Post: #28 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 01:37 PM Parent: #14
Shibka.. صاحبتي... عقبال نحننك ونزغرد ليك.. ونملا الدنيا كلها فرح...
هند ازيك.. وشكرا ليك على المرور، وكل سنة وانت طيبة
Quote: شكرا يا مريم على الأخبار السعيدة وعقبال ما نسمع عرس نادر!
تف من خشمك يا يابا... ابرى واستبرى... ده اكيد بحصل لو انا مته.. انا حيه كده.. إلا نزغرد ليك انت
Post: #23 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 12:05 PM Parent: #7
شكرا على المرور جنى.. كل عام وانت بخير... وجميع اسرتك بكامل الصحة والعافية
Als7afa_30 شكرا على المرور والمباركة لأخونا حاتم
Sidgi mattar مرحب بيك.. وتحية.. وربنا يديم الفرح ان شاء الله
Post: #17 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 10:27 AM Parent: #4
ألف شكر على الصورة الجميلة... سامي العتباني...
khleel.. الله يبارك فيك.. وعرس محمود في وجودكم ان شاء الله...
حمد فتح الرحمن.. ابو وعد .. ربنا يبارك فيكم.. وكل سنة وانتو طيبين.. تحياتي ليك ولزوجتك
Post: #15 Title: Re: حنّتو عند جيراننا! اخونا Hatim Yousif، وزميل البورد... عريساً Author: عاطف عمر Date: 09-29-2009, 09:34 AM Parent: #1
مبارك يا حاتم ربنا يتم أفراحك على ألف خير
شكراً مريم على إشراكنا في لحظاتكم الجميلة
Quote: شكل المباركة يكون كالتالي... أي سيدة/آنسة تجي هنا تدينا زغروده... واي زول يجي هنا يبشر لينا.... قلنا عايزين نتم الفرح
طيب والعاوزين ( بطان )* كيف ؟؟؟
______________________
* البطان هو أن يجتمع أصحاب العريس ويخلعون قمصانهم ليقوم العريس بجلدهم بالسوط ( حتى تدمي ظهورهم ) . يكتفي هؤلاء المجلودون بنظرات الإستحسان من حسناوات الحفل بشجاعتهم أما إن وصل الحال لسماع زغاريدهن فخراً بشجاعتهم فسوف يكون هذا سبباً قوياً لطلبهم إعادة الجلد مرة أخرى .
Post: #19 Title: Re: حنّتو عند جيراننا! اخونا Hatim Yousif، وزميل البورد... عريساً Author: عبد الفتاح زوما Date: 09-29-2009, 11:10 AM Parent: #15
مليار باقة تهنئة مع اجمل الامنيات للعريس حاتم والعروس شكرا اختنا بت الحسين وعقبال اولادك ..
Post: #39 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 08:17 PM Parent: #32
عم حمزاوي.... محمود خلي يفك الخط اول ههههههههه...
في وجودك ان شاء الله يا عم حمزاوي...
Post: #34 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 04:22 PM Parent: #25
Post: #30 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 01:42 PM Parent: #21
عبدالفتاح زوما... اولادي شنو يا عبدالفتاح، مالكم دايرين تكبرونا يا جماعة... محمود لحدي حسي عدد الكلمات البعرفها ما بتتم جمله فيها فعل وفاعل ومفعول به... هههههههه
مازن الجمّال... الله يبارك فيك يا رب.. وعلى شكر على واجب
د.مهيرة... زغردت الدكتورات ظاااااااااهره... الله يبارك فيك، وعقبال نفرح بأولادك يا رب
Post: #29 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 01:39 PM Parent: #15
احمد التجاني.. تدفع كم في الصور؟ حسي بنزلها.. ثواني بس...
استاذ عاطف... عاد انا ما بعرف البطان كمان هههههههههههه... اهل ابوي من الزيداب... وعندهم العادة دي لحدي حسي... مازن اخوي عنده نكته.. بقول يعني الواحد يتجلد عشان البت تزغرد ليه، ما يعزمها فنجان قهوة في حته حلوه وبس!
مريم بنت الحسين لك جزيل الشكر والتقدير والي كل زملاء البورد في تهنئتهم الرقيقة لزواج شقيقي آخر عنقود الاسرة حاتم وكان من المفروض المشاركة في الافراح ولكن لظروف طارئه لم استطيع الذهاب للسودان ولكن انشاء الله سوف يشرفنا هو وعروسه في الكويت في القريب العاجل
Post: #35 Title: Re: حنّتو عند جيراننا! اخونا Hatim Yousif، وزميل البورد... عريساً Author: مريم بنت الحسين Date: 09-29-2009, 04:36 PM Parent: #33