القيكنه...والكولنس وإختلاف الثقافات

فى محادثه تلفونيه مع صديق بمناسبة العيد قلت ليه الله يخليى ليك أولادك
ينجحهم ويفلحهم...ضحك وقال ليك النجاح هو مش مرادف للفلاح؟
قلت ليه ..لأ ..الفلاح ده هو عكس القيكنه..الله يكفى أولادنا شرها..
والقيكنه دى جايه من قييك..(geek)والدفنشن بتاعها هو:

a peculiar or otherwise dislikable person, esp. one who is perceived to be overly intellectual.

a computer expert or enthusiast (a term of pride as self-reference, but often considered offensive when used by outsiders.)

a carnival performer who performs sensationally morbid or disgusting acts, as biting off the head of a live chicken.
ودى ذكرتنى حوار مع أمى ...امى قالت لى مالهم عيالكم المربيين بره ديل ذى الجداد البطرى..شُــتُر ...شُــتر
وفعلاً دى ملاحظه فى محلها..ولما عاينت ليها بنظره فاحصه ..لقيت قيـك ثقافه هو ما قيك فى ثقافه تانيه
ودى ذى يسرى بتى هى معتبره نفسها ( كــول) خالص..وبتهتمه بالموضه..والحاجه كان حست بأنها ما كول
كان كسرته رقبتى كشششش ..ما بتلبسها لى حتى ولو كانت كول فى نظرى!!

وطبعاً مسألة ما كول دى بترفع ضغطى بالرغم من إنه ما عندى ضغط..
أشترى البلوزه ولا الفستان بالشئ الفلانى..(الشئ الفلانى دى ما تاخدوها جد...ههه ههه ها)
تقول لى ثانكيو ماما..وبعد داك القى الحاجه قاعده فى الدولاب بعد شهر ولسه فيها التاق بتاعها..
ما تلبسى دى الليله يا حبيبتى..لأ ما الليله يا ماما !!
ولما أحكها شدييييد..تقول لى ( دى ما كول يا ماما)؟؟؟!!!
أحيي يا فشفاشى...ما تقولى عشان ألحق أرجعها!!
I don't (wna) heart your feeling
هي لكن ما يو heartماى أبو(خاش )ذاتو؟

ولما شرحته أبو خاش ومعانيها قالت لى كووول
أحييي يا قلبى ودى الكول..وبدت تستعملها..

ولما مشينا السودان بدت تستعملها هناك..بت أخوى أصغر منها بى سنه ونص لكنها شفته شدييييد
لما يسرى تستعمل كلمتها القاشره بيها ديك بتديها نظره معناها دى شنو القيك دى!!؟؟
قال خاش قال!!!
فى حين أنو الكبار بتبسموا إعجاباً..بى بت أمريكا العرفت خاش!!

تكون فى حفله فى عز البرد...
السودانيات (لا أثتثنى نفسى فى بعض الأحايين) نجى لابسيين تياب الشفون ومعاها الشباشب
والبرد مش ينعل أبو خاشنا بس...يشهينا العافيه ...فى الدقيقه من العربيه لحدى محل الحفله
وكل ده من أجل الكولنس !!!
فى حين إنو الامريكان بفتكروا إنو ده جنون تتحدى البرد بالشكل ده!!!
فى حين إنو عندهم الأجن مننا..البمشو يغطسو فى البحيرات المتجمده ولو كانت لمدة لحظه!!!

القيك ده فى التعريف بتاع زول الشارع العادى هو زول شاطر لكن عنده social disorder
يعنى ما بقدر يتعامل مع الناس..ودايماً بكون لابس نظارات قعر كبايه..
وقمصان ما أنزل الله بها من سلطان..
وكان بت... بتكون الألوان ما متناسقه...وكده
والأهم رغم شطارتو ما بعرف يتصرف فى المحكات..

يعنى عكس الشفت...
الشفت ما شرط يكون شاطر فى المدرسه..
لكن فى الحياه ممكن يبيعك ويشتريك!!

Quote: امى قالت لى مالهم عيالكم المربيين بره ديل ذى الجداد البطرى..شُــتُر ...شُــتر

بتى بالرغم من انها بتتكلم عربى كويس...(نسبياً)
يعنى مخارج الحروف العربيه الرئيسيه زى ال(ح خ ظ ص) دى ما عندها فيها مشكله...
تراكيب الجمل مرات بتكون فارقه شويه بعد رجعتنا من السودان بى زى تسعه عشره شهور...

لكن الشتاره بتجى فى الحاجات التانيه..
مثلاً نمشى حته...أعرفها بى زوله ..دى بت عمى يا يسرى...
طبعاً جنى وجن الشفع الما بسلمو...
عشان كده دايماً الإتفاق إنها تسلم على أى زول سودانى /سودانيه ...سلام حار

تقوم تدى الموضوع (كوز)ما الكيزان ديلك كفانا الله شرهم...
إزيك يا خالتو ..كيفك اولادك كويسين..إنتى كويسه..مشتاقين يا خالتو..(التقول كانت معاها فى فصل)
وبعد لحظه من السلام الحار ده تقيف متنحه..وتدى أكتافا هزه وتمشى..