طيـــش الديناري

كتابة عبداللطيف احمد

ناس الوصيف بعد ما اخدو (سيك) في عقر دارهم، وفي (قبولهم)، أول أمس قالوا عاوزين يلعبوا معانا في استادنا قال عشان ما (يتسيكوا براهم)، معقولة لكن الهلال دا جايي معاها في كيسها، قال ليهم:

=يا أخوانا مافي داعي للكلام دا، انتو عاوزين تدوني (سيك) في (قبولي) انتو ما عاقلين واللا شنو؟!.

-قالوا ليه يا زول وين.. أنحنا ورقنا سمح وعاجبنا، وحالفين طلاق إننا ما (نتسيك برانا)!!.

=يا أخوانا كدي استهدوا بالله، الدنيا رمضان، ومافي داعي للكلام دا!!.

-يازول في مليون داعي، أنحنا الزينا منو كمان في الـ(ويست) دي، أنحنا أصحاب الـ(سيكات) المحمولة جواً، المافي تيم زينا عاوز تتكلم معانا، انحنا النظمنا سيكافا عشان البطولة دي ناخد سيك في قبولنا!!.

=هي لكن ما انتو في سيكافا دي اخدتو سيك في قبولكم، والسيّكم قاعد يتفرج على فضايحكم دي!!.

-يازول أنحنا بس عاوزنك الليلة تقوم عشان تلعب معنا، أنحنا حالفين ما (نتسيك برانا)!!.

=يا اخوانا الكلام دا عيب عليكم.. انحنا أولاد (عرضة واحدة)!!.

-نهائي مافي كلام ز يدا.. انحنا الليلة حالفين ما نتسيك برانا!!.

=يا أخوانا ما يغشكم ورقكم الانتو شايفنو سمح دا!!.

-انت كمان عاوز تتكلم في ورقنا!!.

=كدي انتو اسمعوا كلامي دافي الـ(ديناري) دا ما بعمل ليكم حاجة، ولا استيفن الـ(هارت) دا، كدي انتو امشو و(دكو) ورقكم دا في الواطة وشكوها ووزعوها تاني وتعالوا لينا!!.

-يازول انت عاوز تورينا ورقنا؟!.

=يا اخوانا أنا خايف عليكم، وعلى سمعتكم، زمان لعبتوا بي ورقكم دا في عقر داركم اخدتو سيك في قبولكم، قاعدين (تسموا) سااااي من غير ورق، هسا السيك الاخدتوه في قبولكم المرة الفاتت دا ما ياهو كان عندكم نفس الورق، كنتو فرحانين بي (شايب) العجب، ودافي الـ(ديناري)، وايداهور (الاسود)، لكن نسيتو ساكواها كان شايل (خمسة وخمسة) ويشيل ويجلد فيكم، قعدتو تسمعو في الناس القاعدين (بعد القيم)، قعدوا يشكروا ليكم في ورقكم، وقالوا ليكم العبوا بي بوهيتين، (شايب العجب)، وشكوة (الهارت)، لحدي ما اخدتو السيك، هسا جايين عشان تغلطوا نفس الغلطة، وشايلين نفس الورق، ونفس حووصة الديناري؟!.

=يازول الورق ورقنا ونحنا حرين فيه، لكن ليك علي إننا ما (نتسيك) برانا!!.

=خلاص يا اخوانا تعالوا نجرب حاجة تاني، رايكم شنو نلعب (هارت)!!.

الجماعة عجبتهم (مساكاتهم) ودافي ديناريهم، وقعدوا، قالوا مع توزيع الورق طوالي، بنخلي الهلال ياكلها كلها، يا اخوانا كدي استهدوا بالله.. الموضوع ما محتاج!!.

أول الدقائق ديمبا باري اكلهم (داما الاسود)، يا ديمبا ياخي بالراحة على الناس ديل، الجماعة ديل ما حملك، الجماعة بعد ما (داما) ديمبا صبت فيهم المطرة، حاولوا يدكوها، لكن وين، يلقوها عن (القافل) على تريس شيريا!!.

واصلوا في اللعب، لحدي ما الايد الأولى انتهت، طلعوا ماكلين الـ(داما)، والداما براها بي (سبعة)، ما قلنا ليكم.. وزعوا الايد التانية، الجماعة عندهم (دو) عاجبهم كدا اكلوه للهلال، قالوا الليلة بس خلاص نأكلها ليهم كلها، يا اخوانا لحدي هنا وكفاكم، القصة دي ما بتقدروا عليها!!

-يازول العب لعبك.. انحنا الليلة حالفين تاكلوها كلها، ونفورهم فوقكم!!.

الجماعة مشغولين بي جاي وعمر بخيت وهيثم مصطفى بي هناك طلع عندهم (البوهية) كلها، جلد نضيف، رموا (شايب العجب) قايلنوا بياكلهم (جلدوه ليهم)، جدعوا (دو وارغو)، معقولة لكن هو (شايب العجب) ما عمل ليكم حاجة، عاوزين يعملها ليكم (دو وارغو)، لكن النصيحة ما جلدوه اكلها منهم ايفوسا بي (شوتا ديناري)، لحدي ما العشرة انتهت، دخلوا الجماعة الكانوا حاجزين بعد القيم، الهلال أول ما رفع الورق جدع (كرت) وهو بقول: ol

طيش ديناري!=الناس نطوا.. يا اخوانا انتو لاعبين هارت؟!

-ايوا هارت.. عاوزين ويست انتو؟!

=لا.. انحنا (ناس) حريق سااااااكت!!

-ومالوا نلعب حريق.. دكوها.. جيبوا الـ(فردة) التانية.. طلعوا الجواكر.. هاك دا واحد (النجم الساحلي).. وهاك دا التاني.. (مونا موتابو).. اها العشرة دورت.. هارت لاند قبل ما يشوف ورقوا نزل، الجماعة رفعوه ليه، قالوا ليه لسا نزولك ما تامي، يا أخوانا كيف ما تامي.. ديل تلاتة نقاط، وعندك..

=قلنا ليك نزولك ما تامي.. ارفع ورقك دا ساي.. قبل ما يلملم ورقوا.. زيسكو عمل (هطل المطر)، و(عرّج)!!.

=ما كنت محتاج للكلام دا؟!

-أنا لو قبضوني (هبابة) بحرق.. ما انت كدا كدا حارق، حلك الوحيد إنك (تفتح).. ارح ادينا (بايظك)!!.

=يا اخوانا كدي اصبروا النرتب الورق دا؟!

-يلا مشينا في ناس قاعدين راجين قيمهم!!.

=مني غايتو ما بتفتح.. إلا من (الصندوق)!!.

-انت بس اديني البايظ بتاعك.. وأنا عارف بفتح من وين!!.

=كويس.. هاك (طيش الديناري) دا.. أكان يعمل ليك حاجة!!

قبل ما يتم كلامو سيد البلد كورك (خمسين)، ونزل ليك الورق الفي يدو كلو، وقال ليهم:

والوصيف (بايظ)!!.

!