حصريا على سودانيزاون لاين ؛؛حقيقة تاخر دخول الكهرباء لريف ولاية النيل الازرق

فقط تابعونا

بداية المشروع صيف 1993م برعاية كريمة من
الاخ ابراهيم عبدالحفيظ محمد حسان محافظ الدمازين حينما
كانت تتبع للاقليم الاوسط
بولاية العميد ركن مظلى العوض محمد الحسن
تعديل كلمة ركن

وضمن المرسوم الدستوري العاشر لسنة 1994 باعادة تقسيم الولايات

تم تقسيم الاقليم الاوسط لخمس ولايات

ترتيبها كالاتى
ولاية الجزيره عاصمتها ودمدنى
ولايه سنار عاصمتها سنجه
ولاية النيل الابيض عاصمتها ربك
ولايه النيل الازرق عاصمتها الدمازين

ولاية النيل الازرق



وعند ذكر النيل الازرق تتبادر للذهن دولة الفونج التي شهدت اول دولة اسلامية

بعد السرد اعلاه

نرجع ونتابع قصة تاخر دخول الكهرباء فى قرى وريف الدمازين والروصيرص
لانو حتى ذلك الزمان لا تعرف منطقة باو الكهرباء
وحتى منطقة الكرمك الحدوديه ورغم كمية التجاره الحدوديه النشطه الا انو الكهرباء كانت عبر التوليد الحلى الوابورات
وبزمن محدد من الساعه 6 مساء
وحتى الساعه 11 مساء

وعد الاخ ابراهيم عبدالحفيظ
جموع المواطنين فى اطار برنامج الدعوة الشامله
وعدهم بدخول الكهرباء لقراهم

بداء بادخال الوابورات والتى تعمل بوقود الجاز
وادخل الطواحين التى تطحن الذره
ودخلت الكهرباء المساجد

الا انه
كانت هنالك صعوبه فى توفير الجاز

ففكر فى شراء سلك باحجام كبيره لنقل وتوزيع الكهرباء من مصدرها خزان الروصيرص ومحطات التوزيع

فاتصل بالمهندس مكاوى

ونتابع غدا

الاخ /سامى عتبانى

لدى المثير والخطير من الحقائق فى هذا الموضوع بس انت واصل السرد وترقبونى !!!!

دوما من اجل المهمشين

ياسر

خليك قريب ومتابع

ياخوي خلو الدمازين دي وامشو الوادي الاخضر

مش قلت لي اشتريت لك واطة هناك

الوادي الاخضر county

كل سنة وانت طيب والعروسة بالف خير

Quote: خلو الدمازين دي وامشو الوادي الاخضر

وادى اخضر مين

الدمازين دى جمبها الروصيرص
والروصيرص دى فيها مصنع الكهرباء
والكهرباء عشان تولع ليكم الوادى الاخضر
الوادى الاخضر ده القدمت فيهو انت يا نزار

استلم المحافظ ابراهيم
كميه من اطنان السلك
وتم شحنها بواسطه جرار شخصى خاص بالمحافظ
وتم ترحيل السلك الى مخازن بمدينه الروصيرص والتى كان مسؤولا عنها
المرحوم محمود القبرصلى

وبدات الاجراءات الفنيه برعايه
كريمه من المهندس بشرى نبق
مدير كهرباء خزان الروصيرص

ذهبنت انا وزميلى محمد عبدالمنعم الجزلى
لتصوير كميات السلك بكاميرا الفيديو

يعنى شوف عينى شفت السلك

وفجأة وقف المشروع




كما وقف مشروع حفر



ترعتى كنانه والرهد

*

هذا هو الظلم الحقيقى فليشهد التاريخ والناس
من محاسن الصدف العجيبة وفي منتصف شهر رمضان الماضى التقيت فى مطار القاهرة بمحافظ النيل الازرق السابق ابراهيم عبد الحفيظ ودار بينى وبينه هذا الحوار بعد ان تم التعارف .
اولا رمضان كريم اخ ابراهيم وبالمناسبة انت سبب كل المشاكل الحاصلة الان فى النيل الازرق وبعدين زرعت مشكلة قبلية كبيرة بين القبائل هناك وهناك اتهام فى انك حاولت تاليب بعض القبائل على بعضها البعض ؟
ابراهيم : اولا اشكرك على الاتهامات دى وبعدين انا الان معارض للنظام دا
المك :معارض تابع لشنوا يعنى
ابراهيم :مؤتمر شعبى
المك :طيب اتمنى ان لايكون اتهامى دا صحيح
ابراهيم :انا عاوز اقول ليك ناس النيل الازق ديل من احسن الناس فى السودان واطيب خلق الله واجمل ايامى عشتها فى النيل الازرق وبصراحة لقد تم اقالتى من منصبى بسبب سلك كهرباء النيل الازرق عندما ذهبت الى الخرطوم التقيت بالمهندس مكاوى ووجدت كمية من السلك فى مخازن الهيئة وتم لى بالتصديق لى بكمية كبيرة لانارة قرى وريفى الروصيرص والدمازين وباو وقد فرحت كثيرا وذهبت الى السوق الشعبى واحضرت كمية من الجرارات لنقل السلك الى الدمازين وقد تم ذلك والحمد لله وبلغت المحليات بالخبر السار الذى يمثل كل حلم ناس النيل الازرق.
ولكن فى اليوم الثانى استدعانى صلاح كرار فى مكتبه بخصوص سلك الكهرباء ودار الحوار التالى :
اسمع ياابراهيم انت شلت سلك الكهرباء من الهيئة عشان توديه النيل الازق لشنو ومين الذى اداك الحق فى ذلك .
قلت ليه السلك دا اخذتو بتصديق رسمى من مكاوى لانارة قرى ومدن النيل الازرق .
وقال لى صلاح كرار اسمع دى تعليمات واضحة السلك دا لازم يرجع من الدمازين اليوم حالا.
وقلت ليه انا السلك دا ماوديتو بيتنا حتى تتحدث معى بهذه الطريقة .وبعدين السلك ما حيرجع !!وخرجت من مكتبه زعلان شديد
وبعدها بيوم استدعانى الزبير محمد صالح فى مكتبه وتم الحوار التالى:

Quote: وذهبت الى السوق الشعبى واحضرت كمية من الجرارات لنقل السلك الى الدمازين

بل ذهب (عمــر ) وعمر هذا كان يعمل مع شيخ
ابراهيم كما كان يحلو لنا ان نقولها

واحضر جرارين من ضمنهم جرار خاص بابراهيم عبدالحفيظ

يا ياسر
الجرارات شحنت السلك
بوجود ممثلين من شركه مام

ياسر بحكم عملى فى الوقت ده بمكتب المتابعه الاعلاميه للمحافظ
كانت هناك سفريات اسبوعيه يقوم بها المحافظ
ونسبه لسريه العمل قامو بتركيب جهاز راديو(جهاز لاسلكى) بمكتب سكرتاريه المحافظ
( قبل دخول خطوط التلفونات)

Quote: ولكن فى اليوم الثانى استدعانى صلاح كرار فى مكتبه بخصوص سلك الكهرباء

بل بعد اسبوع من وصول كميات السلك

وقال لى ابراهيم عبدالحفيظ فى حواره مع اللواء الزبير محمد صالح
اسمع ياابراهيم جاء الى صلاح كرار زعلان شديد وقال لى انت شلت سلك الكهرباء ووديتوا الدمازين ولا الروصيرص ماعارف ؟ والحاصل شنوا
فقلت له انا فعلا وديتوا لاهلوا البستحقوه لان كل القرى والمدن فى ظلام دامس

فقال لى الزبير ! قصرنا للكلام رجع السلك حالا ياابراهيم عشان زعل صلاح كرار ما برضاه ابدا ابدا.
فقلت للزبير ياسعاتك انتوا وديتونى محافظ للنيل الازرق عشان شنوا مش عشان تنمية وتطوير المنطقة ولا شنوا الحاصل يا سعاتك ،وبعدين امشى اقول لناس الروصيرص شنوا بعد ان كونت لجان لتوزيع السلك للقرى الاكثر ضررا وكل الناس فرحانة شديد وبعدين ياسعاتك الكهرباء دى جاية من وين مش من خزان الروصيرص ومش حرام الكهرباء هناواصلة والاحياء تحت الخزان فى ظلام دامس ومافى كهرباء خالص خالص.فالكلام دا حرام ياسعاتك .
فقال لى اسمع ياابراهيم دى تعليمات رجع سلك الكهرباء حالا وماعاوز اى كلام فى الموضوع دا.وانتهت الزيارة

وبعد خروجى من المكتب اتصلت بالمحليات وطلبت منهم توزيع كل كميات السلك لكل القرى فورا وقلت لهم انا عندى مشاكل بسبب السلك ولازم تنقلوا السلك من المخازن ودعوة كل اللجان الشعبية للتوزيع الفورى .
ولكن وللاسف فى نفس الوقت ارسل صلاح كرار جرارات الى الروصيرص وتم نقل السلك الى الخرطوم مرة اخرى.

وبعدها بايام سمعت نباء احالتى من الولاية .
وقال لى : هذه هى حكاية السلك
وكانت الصدمة عنيفة جدا فى داخلى وتاكد لى نظرة ناس الحكومة لاهلنا فى النيل الازرق
وطلبت منه ذكر تفاصيل القصة كاملة ونشرها للامانة والتاريخ وعشان الملح والملاح الاكلتوا مع اهلنا هناك
ووعدنى بذلك وطلب منى زيارته فى منزله لمزيدا من التعارف والتفاكر وبعد وصولنا مطار الخرطوم افترقنا على امل اللقاء وشكرته على امانته فى سرد الحقائق كاملة ووعدته بنقل كلامه لكل الناس فوافق وقال لديه المزيد من الاسرار والخبايا التى تؤكد ظلم ناس المؤتمر الوطنى .

ودمتم

كلامك ميه فى الميه يا ياس

وتصديقا لكلامك
ابراهيم رجعوهو ديوان الحكم الاتحادى فعلا
وبعدها تم فصل ولايه النيل الازرق من ولايه الجزيره
وصارت ولايه لوحدها

وترضية لابراهيم وقبل اعلان الولايه تم التصديق بعمل اذاعة النيل الازرق
التى افتتحها الزبير محمد صالح
وتم تعيين عبدالرحمن ابومدين من منطقة الكرمك واليا
وابراهيم عبدالحفيظ وزير للتربيه نائب للوالى
وموسى طه الشايب وزيرا للصحه من منطقة الروصيرص
والمقدم معاش ابو العلا جمعه وزيرا للشؤون الهندسيه
واحمد تاجر وزير للشؤون الاجتماعيه
لا استحضر اسم وزير الماليه
وكده غطو على مساله السلك يا ياسر

الاخ /سامى
الموضوع دا يؤكد تماما ان ثورة الانقاذ جاءت بمخططات واهداف واضحة فى هدم وتهميش وتركيع مناطق محددة من السودان لاغراض سياسية تمثلت فى الاتى :
القضاء على رموز الادارة الاهلية كما حدث للمنصور العجب فى الدندر فتم اقامة المحافظة هنالك بالرغم من عدم ترحيب السكان بها وقد كان المنصور فى ذلك يدير شئون البلد فى احسن حال وكانت الدندر من احسن المناطق تجاريا.


نقل الولاية الى سنجة بدلا من سنار التى كانت مؤهلة بحجة ناس سنجة ديل شويعية ولا يدينون للانقاذ بالولاء.وكذلك القضاء على رموز الادارة الاهلية من ابناء الفونج فى سنجة وقد تم لهم ما ارادوا.

وكذلك نفس الشئ حصل لناس كوستى فتم نقل الولاية الى ربك وتم تدمير مدنى تماما لعدم الولاء.


عشان كدا لازم تفهم ياسامى ان ناس الانقاذ كانوا قصدهم ان يظل النيل الازرق فى ظلام دامس وجهل ومرض وعدم تعليم ماشين فى نفس فكر كل الاحزاب السابقة التى كانت تسعى لعدم تعليم ابناء المنطقة حتى يجدوا العمال وكان( على الميرغنى ) هو الذى كان مستشار للحاكم الانجليزى الذى اوصاه بعدم فتح المدارس فى مناطق اقليم الفونج بدعوة ان اهل الفونج هم اهل سلطان وملك فاذا تعلموا (لانحن العرب ولاانتم ياسيادة الباشا)كما جاء على لسان الميرغنى .

استهداف اقليم الفونج وتهميشة تاريخى ومخطط له منذ زمن بعيد ولكن نقول لهم

هيهات هيهات وحتما قادمون

الماانجل ياسر

مؤكد قادمون

المناضل /سامى

لم يجد مواطنى النيل الازرق اى اهتمام من كل الانظمة والحكومات فتم قفل المنطقة (سياسة المناطق المقفولة ) ردحا من الزمن ثم تم تهميش المنطقة (سياسة التهميش ) واخيرا قدموا المنطقة للحركة الشعبية هدية ليظلوا فى السلطة (سياسة الفصل )

ورفع الامريكان الحظر الان !!

رايكم شنوا فى الكلام دا

نسمع راى المهتمين بوحدة السودان والوطن

ابناء النيل الأزرق المسؤولون سواء في طرف المؤتمر الوطني او الحركة الشعبية هم الاشد ضررا وتضييعا لهذا الاقليم من افاعيل الحكومة المركزية مهما بلغت
معظمهم انتهازيون ومتواطئون مع مراكز القوى في المركز ولسان حالهم نفسي نفسي
ولو كان هنالك رجال نذروا انفسهم للحق مثل حال دارفور والشرق
لكانت الحال كما هي الحال في الشرق ودارفور الآن
تنمية تسير على قدم وساق
وميزانيات مقدرة مرصودة ومعلومة لبرامج التنمية المرسومة ومتفق عليها سلفا
هذه هي المشكلة الاساسية التي يجب بحثها وحلها
شكرا سامي
شكر ياسر
كل عام وانتم بخير
والى الامام
_______________
رب اشرح لي صدري

Quote: ولو كان هنالك رجال نذروا انفسهم للحق مثل حال دارفور والشرق لكانت الحال كما هي الحال في الشرق ودارفور الآن تنمية تسير على قدم وساق وميزانيات مقدرة مرصودة ومعلومة لبرامج التنمية المرسومة ومتفق عليها سلفا

العزيز \سبيل

سلامات واتمنى ان لا تكون جادا فيما ذهبت اليه... ونظرية المرحوم غلطان دى عفى عليها الدهر يعنى اى منظقة تشتكى او تتظلم يقال ليهم اولادكم هم السبب .

يا تو تنميةهى البتسير على قدم و ساق فى الشرق ودارفور .... مشاريع الخرطوم الكبيرة طلعت ( مواسير) ... السد السد طلعت اكبر مأسورة ... نفق عفراء وتصريف العاصمة و,,,,,ووووووووو
الشرق استوطن فيها السل والجوع ,,, ودارفور الموت فيها يمشى على قدمين...

امنيتى اشوف سودان سليم ومعافى ..
امنيتى اشوف سودان سليم ومعافى ..

Quote: ابناء النيل الأزرق المسؤولون سواء في طرف المؤتمر الوطني او الحركة الشعبية هم الاشد ضررا وتضييعا لهذا الاقليم من افاعيل الحكومة المركزية مهما بلغت معظمهم انتهازيون ومتواطئون مع مراكز القوى في المركز ولسان حالهم نفسي نفسي ولو كان هنالك رجال نذروا انفسهم للحق مثل حال دارفور والشرق لكانت الحال كما هي الحال في الشرق ودارفور الآن تنمية تسير على قدم وساق وميزانيات مقدرة مرصودة ومعلومة لبرامج التنمية المرسومة ومتفق عليها سلفا هذه هي المشكلة الاساسية التي يجب بحثها وحلها

شكرا استاذى محمد سبيل
وكلامك عين الصاح بجى راجع ليهو برواقه

الاخ الكريم /محمد سبيل

استغلت كل الانظمة والحكومات والاحزاب السابقة والحالية ابناء النيل الازرق الذين لم يكن لهم مستوى تعليمى اوفهم سياسى لتنفيذ كل اجندتهم الخفية فى تدمير النيل الازرق ويتم الاختيار بالاتى :

اختيار التجار واصحاب الملايين لتمثيلهم فى الحكم، وخداع المواطن بتقديم الخدمات الوهمية .

اختيار قيادات الاحزاب والتابعين من الفاقد التربوى من ابناء النيل الازرق ولاننسى عندم اخبر السيد عمر نور الدائم القيادى فى حزب الامة والدولة انذاك بنباء سقوط الكرمك على يد الحركة الشعبية فكان رده (حرقت برلين شنوا ماتحرق الكرمك ).ونفس هذه القيادات تلونت كالاخطبوط فى شكل قيادات المؤتمر الوطنى الحالى هم نفس الناس ونفس الاحزاب ونفس فاقدى التعليم والفهم السياسى تم خداعهم باسم الدين .ليشاركوا فى شئون الحكم (تخيل ان يتم تعيين رئيس المؤتمرات للمحليات والمجالس من ناس لا يعرفون حتى الكتابة او القراءة)فحتما مثل هؤلاء يغردون خارج السرب ولا يفهمون مايدور من حولهم ويتم بيعهم وشرائهم بابخس الاثمان وقد تفننت فى ذلك حكومة المؤتمر الوطنى وحتى اخواننا فى الحركة الشعبية ابعدوا المتعلمين والكفاءات العالية من ابناء النيل الازرق حتى يخلى لهم الجو تماماكماالحاصل الان.

وانشاء الله قادمون

هل تعلمون ان منطقة اقدى
بها اكبر المشاريع الزراعيه وتبعد حوالى 35 كيلو
عن خزان الروصيرص لم تصلها الكهرباء حتى الان

لابد من قيادات جديد
مؤهلة فنيا واخلاقيا للقيادة وفرض اجندة تنمية حقيقية وممنهجة تشمل كل اقليم الفونج من ود الحداد الى يابوس
قادمون
والمناصب آخر مطالبنا
________________
اللهم ارنا مراشد الهدى

لابد من قيادات جديد

الاخوان /سامى وسبيل

نشكرلكم نضالكم واهتمامكم بقضايا السودان المصيرية وقضايا كل المهمشين فى السودان خاصة النيل الازرق وعبركم ندعوا كل ابناء النيل الازرق فى العالم فى الاهتمام والوقوف معنا ضد المخططات الخطيرة الساعية الى فصل المنطقة ،وتاجيج نار القبلية.

ومن هنا ندق ناقوس الخطر

اللهم انى قد بلغت فاشهد

وحتما قادمون