يا ناس قناة الشروق: ماااا بالغتو مع فردوس عبد الحميد؟؟؟

غايتو يا بابكر حنين بااالغت مبالغة شديدة

الشى البحيير انو بابكر حنين دا بقى مقدم برامج كيف؟؟

يعنى ضيفة فى قامة فردوس عبد الحميد
عشان تخرج بحوار هادف معها يضيف للمشاهد
بدل الاسئلة البايخة حول حرمة الفن والتوبة والهداية والحجاب دى
كان تبخر ليك اسئلة فى ورقة..اسئلة تحترمالضيف اولاً..موش تحرجو
وتحترم المشاهد ثانياً.. انتو فاكرين الناس دى بتقعد قدام التلفزيون ساى

بعدين يا حنين: الحوار دا فن..تتم ادارته بأفق واسع موش بفكر انغلاقى - حرام وحلال
وهنالك اسماء لامعة فى هذا المجال..
مفيد فوزى، منى الشاذلى، عمرو اديب، زاهى وهبى، سامى كليب...الخ
ياخى انت لا سمعت ولا قريت؟؟

حسن سنوسى يا لماح ...رمضان كريم

وحاتك انا خجلت لما قربت ادسا وراء التلفزيون
ياخى منتهى الاسفاف والجهل اثبت بابكر حنين انه محاور ضعيف جدا..
بعدين عايز يعمل فيها مطلع:
ده انا قريت اليوم فى الناس والحياة
اسف اقصد القاهرة والحياة واحده رقاصه بتقول الرقص مهنة
شريفه زيها زى الطب فماهو رايك؟؟
ياخى ده اسخف برنامج انصرفت عليه قروش الدنيا والعالمين والمحصلة صفر كبير...
بعد دعوة ايمن زيدان وفردوس عبد الحميد قلنا الله حلانا من ضيوف
المؤتمر الوطنى الثقلاء ديل امين حسن عمر وكمال عبد اللطيف وسبدرات
والزهاوى وافتكرنا هم سبب رتابة البرنامج...
يطلع مقدم البرنامج بابكر حنين اثقل من ضيوفه انفى الذكر....
عشان كده كان بختار الضيوف من نفس شاكلته...
الحسنه سلمى ونسرين وندى القلعة...
غايتو امكانيات زى دى وبرنامج تافه زى ده انا ماشفت...
عشان كده المشكله ما امكانيات..المشكله كادر بشرى
مثقف،،،،،

بعد مشاهدة عارضة لاول حلقات البرمامج قررت الا اشاهد الشروق .. لقد ساعدني هذا البرنامج في اتخاذ قرار يريحني من هذا البؤس في كل النواحي حتي المذيعات الاتي ارتضين هذا الدور البائس ...

Quote: عشان كده المشكله ما امكانيات..المشكله كادر بشرى مثقف،،،،،

انا احييك علي الجمله دي ، لانها اصدق وصف لازمات كتيره في السودان

سؤال يؤرقني منذ ان رايته علس الشاشة الفضائية مقدما لبرامج ويوما رايته ممثلا في برنامج اطفال هو ما صلة هذا البابكر حنين بالاعلام عموما ؟؟ ليست لديه كاريزما اعلامي يواجه المشاهديين ولا طلاوة حديث ولا غزارة فكر ... شنو دة وجا من وين ؟؟ العشرين سنة الفاتن دييل او قولو من يوم ما الفضائيات ظهرن الواحد بقي يشوف ويسمع حاجات غرييييبة ...وبعد دة كلو تدبج المقالات وحملات الاستنكار لانو فكاهي خليجي او غيره قلد سوداني .. ما دة البشوفوه ؟؟

Quote: بعدين عايز يعمل فيها مطلع: ده انا قريت اليوم فى الناس والحياة اسف اقصد القاهرة والحياة واحده رقاصه بتقول الرقص مهنة شريفه زيها زى الطب فماهو رايك؟؟

بعدين يا صديق الزول المطلع دا واااضح
يا خى ديل لو هم بشاهدو برامج فى فضائيات اقليمية كان دا حالنا؟؟
بعدين الزول دا كل رصيدو الاعلامى برنامج (رمادى) اسمو -مسؤول وجمهور
وكان وقتها ايام التمكين يجيب ليهو مسؤول ويسألو اسئلة لا تقدم ولا تؤخر
عشان كدا لا اتطور الاعلام ولا اتطورت البلد

ودونك مسلسل (ما تخافوش) بطولة نور الشريف.. وهو قصة لنموذج برنامج ممكن يجيب الهواء
موش للفضائية المعنية ولكن للبلد ككل
برضو تقول لى ديل بشاهدو؟؟

Quote: : عشان كده المشكله ما امكانيات..المشكله كادر بشرى مثقف،،،،،

Quote: بعد مشاهدة عارضة لاول حلقات البرمامج قررت الا اشاهد الشروق

يا ابوبكر انت ما عااقل عشان كدا حليت روحك من بدرى
موش كاتلاك الوطنية زيينا.. لحدى ما تجيب لينا احدى هذه القنوات الوطنية اجلنا
انا متأكد انو الزول ممكن تكتلو المغسة على البيحصل فى فضائياتنا
الغريبة اى زول فى البلد دى تمسكو يحكى ليك قصص عن ان العالم اصبح قرية صغيرة..
والشاشة البلورية..وووو
طيب يا خى ما تتعلمو؟؟
ما تشوفو الناسى دى لابسه كيييف؟؟
وبتتكلم كيف؟؟
وبتفهم فى الاوتكييت كيف؟؟

Quote: سؤال يؤرقني منذ ان رايته علس الشاشة الفضائية مقدما لبرامج ويوما رايته ممثلا في برنامج اطفال هو ما صلة هذا البابكر حنين بالاعلام عموما ؟؟ ليست لديه كاريزما اعلامي يواجه المشاهديين ولا طلاوة حديث ولا غزارة فكر ... شنو دة وجا من وين ؟؟

انت عارف يا ابوبكر بلدنا دى اكتر حاجة جايبها ليها البلاوى دى
هى مسألة الاخنق فطس دى..

اى مهنة سهلة التعلم.. لكن قصة انوتبقى اعلامى دى ما لعب ساى
الاعلام يمكن استخدامه وتوظيفه كسلاح قد يدمر امم ويرفع اخرى..
قبل كدا واحد سألنى مستغرباً: المحيرنى يا ابو على بنات قناة الجزيرة ديلب بجيبوهم من وين؟؟
الواحدة بتحاور الضيف بطريقة تحترم عقول المشاهدين
وبمناسبة قناة الجزيرة دى
اذكر مساجلات بين لقمان همام(معد و محرر اخبار) بالجزيرة و عمر الجزلى كان ساحتها جريدة الصحافة
استضافت الصفحة الفنية بالجريدة لقمان همام فى احدى اجازاته
وبسؤاله عن التغيير والاضافات التى وجدوها بفضائية الجزيرة
اجاب ان المقارنة اصلاً معدومة.. اضافة الى ان الجزيرة مؤسسة
موش زى التلفزيون السودانى الذى يتحكم فى برامجه اناس بعينهم
وتخرج البرامج حسب افقهم الضيق..
رد عمر الجزلى بنفس الصحيفة مهاجماً همام بانهم مجرد كومبارس ويعملون خلف الكواليس
بينما هو يقدم برنامج عالمى..
رد لقمان على حديث الجزلى بان العمل المؤسسى علمهم الكثير
اما بخصوص البرنامج العالمى (اسماء فى حياتنا) قال همام للجزلى
انت بتستضيف ليك زول وبتسألو اسئلة محفوظة..الميلاد/النشأة..المراحل الدراسية..العمل.. الاولاد بقرو وين..الخ
واضاف همام بانه على سبيل المثال عندما استضاف احمد منصور جيهان السادات فى برنامجه (شاهد على العصر)
قرأ احمد منصور( 66 ) عن حياة السادات وحرب 67 وحرب اكتوبر قبل ان يجلس الى السيدة/جيهان
وقرأ اكثر من (30) كتاب عن ثورة الجزائر قبل ان يجلس الى احمد بن بيلا

تانى يا ابوبكر تقول لى غزارة فكر..
زولك دا جابوهو الناس ديل..تعويضأ للكوادر الوطنية التى تم تشريدها
يعنى اعلامى اخنق فططس..

نجى نشوف بابكر حنين قال شنو..

حسن السنوسي
تحيّة ليك ياخ

أنا طبعاً جيت في نهايات برنامج "خيمة الشروق" وما حضرتَ حوار بابكر حنين مع الفنانة فردوس عبد الحميد، لكن قادر أتخيّل طبعاً الحصل، لأنو الجزئية الأنا حضرتها كانت كفيلة بإشعاري بالخجل المُستدام، وخصوصاً "صعلكة" ندى القلعة على فنانة بقامة فردوس عبد الحميد، وحركات الشمّاسة الكانت بتعملها معاها، ياخ حاجة بتخجّل بالجد. والغريب إني كنتَ بسأل نفسي: "يا ترى ناس زي ديل ممكن يكونوا حاوروا واحدة زي فردوس عبد الحميد دي كيف؟" غايتو خجلتَ وغيّرتَ القناة. رغم إنو التلفزيون السوداني والفضائيات السودانية مليانة برامج حوارية لدرجة الغثيان لكن ما عندنا حِرفية في إدارة الحوار ولا في نوعية الأسئلة المطروحة، ولا حتى كيفية طرحها

بالفعل: المُشكلة مُشكلة كادر مؤهل ومثقف في المقام الأول




++

Quote: ياخ حاجة بتخجّل بالجد. والغريب إني كنتَ بسأل نفسي: "يا ترى ناس زي ديل ممكن يكونوا حاوروا واحدة زي فردوس عبد الحميد دي كيف؟

"

حنظلة: تحياتى

ياخى ديل ما حاوروها..
يا خى زولك منطلق من فكرو الانغلاقى .. قام مهاجم ليك الضيفة هجوم لاذع
لبس الممثلات للحجاب هل يعبر عن توبة؟؟
والذى لا يعلمه صاحبنا عن فردوس انها تنتمى للجيل المستنير فى السينما المصرية
وكان ردها قمة فى اللطف ودرساً بليغاً فى الاخلاق
قالت له من الذى قال ان الفن خطيئة تجب التوبة عنها؟؟
زولك مصر على الهجوم.. لكن هنالك ممثلات تابو ولبسو الحجاب؟؟
قالت ليهو: تابو من شنو؟؟ ماهى الخطيئة التى تابو عنها؟؟
يا اخى ان الحجاب ليس شكلاً.. الحجاب هو حجاب الدواخل..هو العفة.. هو ان تصون المرأة كرامتها.. هو ان تحفظ المرأة نفسها وبيتها وعائلتها..
و حكت له تجربتها الشخصية.. عندما دخلت معهد الفنون وعندما تحرجت لتلج دروب التمثيل رفض والدها رفضاً قاطعاًبحكم المفاسد بحسب وجهة نظره
فتدخل احد اقربائها وقال لوالدها: ألست واثقاً من تربيتك لها؟؟
فعندما اجاب بنعم قال له اتركها وشأنها..
فتركها والدها لتصبح فردوس التى تعلقنا بها منذ عصفور النار..وحتى الان
اضافت فردوس لصاحبنا المحاور
ودا كان الدرس الثالث له..من الذى قال ان المفاسد وحدها فى الفنون؟؟
فالمرأة تعمل فى الحسابات.. وتعمل فى الطب.. فهل هذه مهن يمكن ان تتوب عنها المرأة؟؟

بابكر حنين ارجع شوف الحلقه مرة ثانية
لتكتشف مدى سذاجتك ....
لك الله يا سودان،،،،

وزولك مصر على اسئلته، اقصد هجومه اللاذع
قال ليها باستهجان: يعنى كيف المرأة يمكن ان تشتغل رقاصة فى كباريه مثلاً؟؟
ردت باستغراب: يا أخى: من الذى اعطانا الحق فى محاكمة الآخرين؟؟
بأى معيار انت تحكم على الرقاصة لتنبذ مهنتها؟؟
الحكم فى الاخير لرب العالمين وهو اعلم بالنيات
والله موتنا ليك من الخجل.....

ولسه ما كملنا كلامنا عن استضافة فردوس
قامو امبارح استضافو خديجة بن قنة
والله يا ناس الشروق انتو بتسوو البدع

الأخ سنوسى والأخوة المتداخلون ..
بعد مشاهدتى للمهزلة اياها ماعرفت هل الطم ولاأمعط شعرى ولا أقطع هدومى من الغيظ .
الغريبة انو بابكر حنين بيفتكر انو هو كفاءة اعلامية نادرة وماعارف انو حتى اطفال مرحلة الأساس بيضحكو عليه.
اللهم لانسألك رد القضاء ولكننا نسألك اللطف فيه .

Quote: سؤال يؤرقني منذ ان رايته علس الشاشة الفضائية مقدما لبرامج ويوما رايته ممثلا في برنامج اطفال هو ما صلة هذا البابكر حنين بالاعلام عموما ؟؟ ليست لديه كاريزما اعلامي يواجه المشاهديين ولا طلاوة حديث ولا غزارة فكر ... شنو دة وجا من وين ؟؟

طولو بالكم يا شباب. لا اشك في أن الرجل مؤهل وقد تمرس على العمل الاعلامي منذ ايام الجامعة وأعتقد أنه كان يشارك في تحرير مجلة (الاقتصاد) التابعة لقسم الاقتصاد بجامعة الخرطوم في بداية السبعينات حتى منتصفها

الاستاذ حسن

لك التحية و رمضان كريم


بابكر حنين ده لم أري فيه يوما فى حياتى غير انه إنسان عديم الذوق و لا يعدو ان يكون مطلع

على رؤوس موضوعات فقط و لكنه يحاول ان يبرز نفسه المطلع العارف ببواطن الامور و خبايا الدهور

و الكثيرون من خريجى مدرسة الترابى بهذه الصفات .

كرر ليلة البارحة نفس البياخة و ثقالة الدم و عدم الذوق من مذيعة الجزيرة الاستاذة المثقفة

خديجة بن قنة و لكن بوعيها و شطارتها استطاعت ان تتغلب و تتجاوز عدم لباقته و أسئلته

المحرجة , انه رجل بايخ و عبيط .

Quote: كرر ليلة البارحة نفس البياخة و ثقالة الدم و عدم الذوق من مذيعة الجزيرة الاستاذة المثقفة خديجة بن قنة و لكن بوعيها و شطارتها استطاعت ان تتغلب و تتجاوز عدم لباقته و أسئلته المحرجة

ابو الطب

ياخى دا شدة ما محرج قال لضيفته عندما رددت عبارة المجتمع الذكورى
وصاحبك داير يعمل فيها ليق وشاطر
و كأنو داير يستنكر اطلاق العبارة
قال ليها حتى كلمة ذكورى يعنى (جنسى)
البت خجلت لحدى ما وشها بقى احمر

ألاستاذ الفاضل حسن

صباح الخيرات

البارحة حاول احراج السيد الصادق المهدى إلا انه فشل فى ذلك بسبب نباهة الاخير .

لا أرى اى داعى لفقرة حنين فى هذا البرنامج لان كل الكثيرين لم يرضوا عنه

ووصفوه بثقيل الدم و المحرج للضيف .

لك ودى

بعدين ياخى نحن سودانيين ومعتزين باصالتنا ولغتنا وعاميتنا
حقو لما نسأل الضيف نسألو بلهجتنا موش نحاول تقليد لهجاتهم
لانو الحكاية دى بتقلل احترام الناس لينا

(أأول لك.. أأولهالك..قد أيش)
يا راجل؟؟
طلعت ع الشبكة العنكبوتية
ما تقول نت وتريح روحك

الذى أسيت له
انو الضيفة كانت مندهشة لتواضع الذين حاوروها
واظن ان قلبها كان يحدثها فى ذلك الوقت وتتخيل نفسها تحاور ضيفاً
وهى المتمكنة فى فن الحوار (سياسى، اجتماعى، دينى...الخ

Quote: مفيد فوزى، منى الشاذلى، عمرو اديب، زاهى وهبى، سامى كليب...الخ ياخى انت لا سمعت ولا قريت؟؟

وديل في قناة ام تي في ولا شنو

عموما مقدمي الحوارات بتاعيننا ما عندهم فهم اطلاقا

وزولك طبعامسيطرة عليهو عقدة الحجاب
وبالرغم من انو زميلتو سألت ضيفة الخيمة اكثر من سؤال
ليه اتحجبتى؟؟
وقالو عنك شنو؟؟
ووو

برضو زولك ما اكتفى بالحكاية دى
الحجاب
هل هو دلالة على التدين؟؟
هل هو تغطية للرأس؟؟
يا راجل: غطاااااااااااء
تغطية دى لزول اعلامى زيك عندها معنى مختلف خاااااااالص
واضاف زولنا
فى مصر يغطون الرأس وباقى الجسم لباس ضييق شديد

يا راجل
الاعلامى مفروض يكون دبلوماسى
انت مالك ومال التحديد..
ما تقول فى بعض الدول العربية مثلاً
بدل مصر
ودى الحاجات زااااتا البتجيب الهوا..

حسن معليش ياخ





انت البقعدك قدام الشروق شنو ؟

بالمناسبة انت عارف مديرها منو ؟

صدق الحكيم الفنان صديق الموج:

كادر مؤهل ....ومثقف

ومع الثقافة يكون مليان بروح الفن والجمال .

المحاور المشار إليه كان جاهل تماماً بتاريخ النضال السياسي الإجتماعي الثقافي في المسرح والسينما وفي مسلسلات التلفزيون والمكانة الفريدة للأستاذة فردوس عبد الحميد في هذا التاريخ وهي التي دخلت الآن في سن النضوج (الستين) بتاريخ مجيد في هذا النضال إذ قدمت في ينوعها شخصية "فاطمة"المجسدة للوطنية والدين وقدمت شخصيات المرأة المكافحة ضد الأغوات والباشوات والبرجواز و الخواجات وأصحاب الإعاقات الدينية في أذهانهم، وهو جملة تاريخ نقيض لمسرح وفن السح الدح أمبو ( فن اللهو والكباريه)

المسألة عند هذا المذيع مجرد جليط كلام بمزيج غير عشوائي من عبارات الدين والصفاقة دون مكان للنظر في المعلومات المؤسسة والتأمل في المحاولات والتمحيص في النتائج والإنفتاح على ثراء الأذهان وفن المواشجة والتواصل بين الرأي الخاص والرأي العام والقواعد العلمية للتاريخ وعلم الجمال.

برنامج الشروق أخجلني أمام تركه أسس الذوق والفن الرفيع وقيامه على الجهل والتجني واللؤم والقضامة والرضاء المقيت والبشع عن النفسنوتصوير الضيف كشخص نكرة لا قيمة له
فقد فارق البرنامج أصول العلم وأصول الحوار وأصول الضيافة وأصول الدين .

لابد من إذاعة إعتذار من القناة إلى المشاهدين وإلى حضرة الفنانة العظيمة الأستاذ فردوس عبد الحميد مشفوع بتعويض معنوي مناسب كبث فيلم من أعمالها 
وهذا الإعتذار مفيد في الإرتقاء بمستوى مقدمي البرامج الحوارية ومستوى الممثلين ومستوى القناة .


للفائدة يمكن الإضطلاع على:

http://www.cct.umb.edu/guidelinesdia.htm


http://www.soapboxorations.com/ddigest/guidelines.htm

و
http://www.redblueus.org/page/dialogue_structure



ولك التقدير