Post: #1
Title: ود اب تشة لطهور العطا ود عشة
Author: عبدالله ود البوش
Date: 09-10-2009, 01:07 PM
ود اب تشة للناس المابعرفو حفرة يسوها الشفع يوم طهور احدهم قدام بيت الطهور ويغطوها بالقش وادفونها بالتراب والبقع فيها يدفع حق الطهور فورا ولايبارح مكانه اطلاقا ولابضمانة لازم يدفع ومشكلتو بتكون اكبر اذا كان اصلا جا كايس حاجة سارقنها منو اولاد الطهور ادفع دي وديك
ادونا العادة
طهروا ليكن منو
طهروا العطا ود عشة
العطا دا اصلو ولد يتيم ابوه مات وهو في بطن امو
امو دي كلو كلو مابتفرط فيهو تباريهو ورا وقدام
اها الليلة يوم طهورو عشة فرحانة وواقفة مع صحبانو
تساعدن في حفر ود اب تشة
وتلم ليهم عيش العادة
والعطا يتشوبح علي العتبة وامو تكورك فيهو
بعد تبرا بعد تبرا يا العطا ولدي
والما بدينا حق الشرافة بالعقرب النتافة المرة تطلق والراجل اتعلق والجنا اجي من السما مفلق
ديل الجنيات المماسيخ الخبتلو حق العادة مع حق الشرافة بس دايرين املو قفتن وخلاس وذاتن ما بدوها بيت الطهور طوالي دكان اليماني وطحنية وعيش برا عطا ودعشة برا كلام فارغ هو زمان في طهور هجام اخوي شحد لينا
وياريت الفانا واحد بصورة ود اب تشة
ونواصل
|
Post: #2
Title: Re: ود اب تشة لطهور العطا ود عشة
Author: ابو جهينة
Date: 09-10-2009, 02:40 PM
Parent: #1
متابعة يا ود البوش
تحياتي
|
Post: #3
Title: Re: ود اب تشة لطهور العطا ود عشة
Author: عبدالله ود البوش
Date: 09-10-2009, 08:31 PM
Parent: #2
شكرا ياريسنا للمتابعة
وكنت دايرك تساعدني بالجكة
نواصل
يجوب الاطفال الفريق بيت بيت
امحمد ود اللخدر وجيك ودالباع جملو
ديل ضاربين طرف الفريق البعيد ومابخافو من البيوت الفيها الكلاب
حتى كلبة ود توركنيزة الاسمها جابنو ما بخافو منها
ولذلك يصعب منافستهم والبيوت الفيها الكلاب معروفة بكترة الرزق
واهلها كريمين
ادونا العادة
طهروا ليكن منو
طهروا العطا ود عشة
افتح خرتايتك دي سمح والعيش شووووو
ويبتسم جيك ود الباع جملو في وجه رفيقه ود اللخدر
انا ما قلت ليك ناس ود تور كنيزة دي شبعانين آ جنا تقول لي نمشي لناس
حبيب الله الفقر ديل تتلقاك بت الكزو صارة وشها كان عوضنا نهرة
اقول ليك آ جيك ارح علي بربندي ود الكريل قبل اربط فيهو حمارو الللبيض
نقلعوا ونجر والبربندي عادتو ماكنةوعلى الطائر كدا آ ود اللخدر
نخم معاهو مركوب ود عبكون النائم داك
ورجع الاطفال مظفرين بعيش العادة وبربندي ود الكريل ومركوب ود عبكون
انها ثروة جعلتهم يلقفون ريقهم لقفا وتلقفتهم عشة ام العطا بزقرودة قطعتها فجأة
عندما تذكرت موت بيت اللحيمر التي لم يمر عليها اكثر من شهرين
ناولتهم كوز موية بارد فقد اخذ التعب شحمة وشهم وجاي عليهم ليل القاشيت الذي يحتاج
لتعب مضاعف وحليب البهائم في قزازة العادة موهو ساهل
وتحذرهم عشة ام المطهر ما تحلبو العنز الدارة سمح ؟
وماتحلبو بالقزازة الخشمو مكسور عشان ما تعيق العنز سمح ؟
وبدأ الاطفال لتجهيز عدة سرقة لبن القاشيت وعشة جابت الدقيق للقاشيت
ونواصل
|
Post: #4
Title: Re: ود اب تشة لطهور العطا ود عشة
Author: خالد سند
Date: 09-10-2009, 09:14 PM
Parent: #3
في بعض الجهات تسمي بـ( الشعقيبة )
وفي حالات المشاط بين النساء
|
Post: #5
Title: Re: ود اب تشة لطهور العطا ود عشة
Author: فيصل أحمد سحنون
Date: 09-11-2009, 04:06 PM
Parent: #4
منتهى الروعة
واصل بدون فاصل
تحياتي
|
|