خفاف علينا (في افطار بودراب الخرطوم...صور عند الطلب)

Post: #1
Title: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-06-2009, 07:22 PM
Parent: #0

فطور فوق العادة رغم اني جيت متأخر , فالكعادة انا دايماً متأخر ....و لكن ان تأتي متأخر خير من ان لا تأتي....

المهم في اليوم دا الزول لاقي ناس لطيفين خفيفين ... و أي واحد داير يعرف حظوا يجي يرمي البياض ... و في ناس انا ما داير منهم

اي بياض (لله ساي بقدم ليهم الخدمة دي)..... يعني ناس الاوس و الخزرج و وليد الشفت ديل بدون بياض لكن البقية يرموا بياضهم...

فتكم بعافية و في انتظار البياض

Post: #2
Title: Re: خفاف علينا (في افطار بودراب الخرطوم...صور عند الطلب)
Author: عبدالوهاب علي الحاج
Date: 09-06-2009, 07:29 PM
Parent: #1

حافظ
ازيك ياخ
تبا للظروف القاهرة المنعتني الحضور
لكن كان عندي رغبة شديدة الاقيك
معليش ما عندناش بخت ونعوضها لقدام
كدي نزل صورتك انت بالاوال
تحياتي

Post: #3
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-06-2009, 07:38 PM
Parent: #2

Quote: ازيك ياخ
تبا للظروف القاهرة المنعتني الحضور
لكن كان عندي رغبة شديدة الاقيك
معليش ما عندناش بخت ونعوضها لقدام
كدي نزل صورتك انت بالاوال
تحياتي

وهبة يا وجيه ... دي اسمها الكيشة قدمو و الحقو ... يعني تزين لي الحق و أجي طاير الفطور ... و بكل قوة عين
تجيك ظروف تقهرك ... لكن يا منقة ما مشكلة الجايات أكتر من الرايحات ...

مين ينزل صورتو دا ... يا خي وقت مشيت الفطور حلقت صلعة عسي و لعلي ما أفتن نساء المدينة .... دايرني انزل صورتي هنا؟؟
يا خي انا ما بتاع فتن سو ما حانزل صورة يا وهبة ... علي العموم يا وهبة الفيك اتعرفت لكن نتقابل قريب انشاء الله

فتك بعافية .... عموماً انت ما جيت الافطار و رميت بياضك بس غايتو الله معاك ...فاتينك فاتينك

Post: #4
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-06-2009, 08:12 PM
Parent: #3

وليد الشفت...وليد الحقيقي والله ما بشبه صورته الخاتيها هنا الا في الفلجة (الحزة بين الاسنان)... يعني صورة وليد والله الفوتوشوب و ناس اورفليم اشتغلوا فيهو شغل صاح ... يعني اورفليم ما خلت زول شين من الأخر كدا ...وليد الشفت دا طبعاً نبهني ليهو صديق برضو عرفته في الفطور دا و صاحبتو للابد ,,, لكن ما يفرح ساي جاي فاتيهو هنا ....عامل شلوخو Sample دي.....المهم وليد الشفت دا طلع زول لطيف مع وقف التنفيذ , لطيف عكس صورته الراسما ليهو .... يعني انا كنت راسم لوليد دا صورة ممكن يلاقيك اول حاجة يعمل يديك كف و بعدين تجي المفهامة

في اي واحدداير يرمي بياض و لا نقبل علي بت الاوس و الخزرج

Post: #5
Title: Re: خفاف علينا (في افطار بودراب الخرطوم...صور عند الطلب)
Author: فادية اليمني
Date: 09-06-2009, 09:43 PM
Parent: #4

حافظ يا حفيظ

سلامات يا زول يا جميل

سعدت بلقائك ... كما بكتاباتك

وهبة يا وهبة

Quote: ازيك ياخ
تبا للظروف القاهرة المنعتني الحضور
لكن كان عندي رغبة شديدة الاقيك

ازيييك انت يااخ والله الافطار ما كان عنده طعم من غيرك انت
والعوض وسيد وانعام والبت امانى وشادية كمان وتبلدينا وهالة حسن وعلاء حيمورة افتقدتكم جدا
لكن الجايات اكتر وارحب

انا كمان لاقيت ناس خفاف الظل ولذيذين ولاول مرة رغم انه الزمن كان قصير مثلا

توما: زولة عسل عديل كده
بهاء: استاذ اللغات راجل راقى
صلاح: صاحب ام جنقر زول حبوب
وليد الشفت: شكله ما زى كتاباته قمة فى التهذيب
تيسير النورانى: تحسسك كانه انت في بيتها
نعيم علي: زول رائع
وديدى: هادى جدا
السنى دفع الله : زول قمة
طارق الامين: زول بشوش
نذير بيرو وزوجته: لطيفين جدا
انور التكينة: زول مرح جدا برضو ما زى صورته
د. الصادق: كانه بتعرفه قبل كم سنة كده
ناذر: زول باسم وبشوش

كان نفسي اقابل احمد حنين وامورته

اها الباقيين ديل ناسى واهلى واحبابى واصحابى هم:

(حمور وناجى ومنال وبنته ميريهان واسماعيل حميم والسمؤال و زهير الزناتى
وزوجته ومحاسن ابراهيم الحبوبة و مزمل خيرى و هشام امين وحسين ملاسى
محمد صباحى ابراهيم بقال بكرى الخير)

وناس شفتهم من بعيد بعيد

بالجد كان يوم جميل و مميز

يارب دايما ملمومين فى السمح

عذرا حافظ للاستلام وكده

انت عليك الصور بعد كده

Post: #6
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 10:13 AM
Parent: #5

Quote: عذرا حافظ للاستلام وكده

انت عليك الصور بعد كده

سلامات يا بت الاوس و الخزرج

يا خي استلمي ساي حرف ما يعتر ليك ... اي صورة يافادية حقت امس و لا يومداك؟

بمناسبة أمس دي انتي وين؟ أنا جيت متأخر شوية و بديت اعاين شفت واحدة بتشبهك, رفعت ليها يدي نظامة خفة كدا لكن ما أشتغلت بي بعدين عرفتها دي ما انتي

تسلمي يا سليلة الاوس

Post: #7
Title: Re: خفاف علينا (في افطار بودراب الخرطوم...صور عند الطلب)
Author: HAIDER ALZAIN
Date: 09-13-2009, 10:19 AM
Parent: #6

يا حبيب ..

البياض دفعناهم ليك يوم مباراة هلال مريخ ..

يبقي قدمنا السبت ( والا هو كان جمعة )

الصور دي ليها اسبوع هسع وانت بترهص بيها فاتحفنا بالله بصورة للشفاتي وليد الشفت ..
عشان نعرج كدة ونقول بعدها نزل صورتك ..
وندفع بياض تااني ونقول نزل لينا صورة منعم بيجو تكون حديثة ولابس فيها دمورية لو امكن

** لك التحية والراجل ان شاء الله وصل سلامة

Post: #8
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 10:46 AM
Parent: #7

Quote: البياض دفعناهم ليك يوم مباراة هلال مريخ ..

يبقي قدمنا السبت ( والا هو كان جمعة )

صديقي الجميل حيدر الزين
والله بياضك دا ما مقسم معانا لكن للضمان كدا سلامات والله الواحد واحشاهو لئامتك ... يا فرده حاولت دشلمية مره انزل صورة لكن بقول لي كلام الطير في الباقير يعني ما قادر انزل اي صورة ..... لكن يا زول انا أساساً برنامجي ....عندي صورة قديمة في رأسي و بقارنها بالصورة الاصلية ... انت أسال من أي زول بديك صورتو القديمة (صورة ما قبل الإفطار)

سين سؤال.... انت الضباع الاسفيرية دي شنو؟ يا خي من الصباح معلق في قصة الضباع الاسفيرية,,الضباع الاسفيرية جاتني من وين و حياة الله و الخوا ما عارف.

بمناسبة الزول والله وصل لكن عندو حساسية شديدة

Post: #9
Title: Re: خفاف علينا (في افطار بودراب الخرطوم...صور عند الطلب)
Author: HAIDER ALZAIN
Date: 09-13-2009, 10:59 AM
Parent: #8

حبيبنا حافظ ...

والله بيني وبينك نظامك انت احسن من كوداك وصور استدسو الرشيد ..ولمعرفتي بذهنيتك النضيفة
وقدرتك علي توصيل اي صورة لانسان كنما نشاهده فبثق فيها اكتر من كل تكنولوجيا اليابان الرقمية ( وانسانا من موقع تحميل بكري المخستك دا )

المهم عاوز اسألك بالله من زول لو قابلتو في الافطار - جنابو عمر عثمان - انطباعيتك قبل وبعد ..

بالنسبة للضباع الاسفيرية .. بقول ليك تسألوا من اشياء كدة ان تبدا لكم تتكتحوا وتجيكم اعاصير جليدية من ويلز ..

بالله تحياتنا للراجل وكفارة وعذرنا له مرة اخري ..

Post: #11
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 11:15 AM
Parent: #9

حيدر الزين سلام تاني
Quote: المهم عاوز اسألك بالله من زول لو قابلتو في الافطار - جنابو عمر عثمان - انطباعيتك قبل وبعد ..

والله عمر عثمان جنابو دا ما لاقيته لكن صورة ملاسي كيف تنفع؟

Post: #12
Title: Re: خفاف علينا (في افطار بودراب الخرطوم...صور عند الطلب)
Author: HAIDER ALZAIN
Date: 09-13-2009, 11:21 AM
Parent: #11

Quote: صورة ملاسي كيف تنفع؟

في رمضان والحر دا كمان ؟!! حرام عليك ..

اسمع يا عمك حمل الصور من ( تحميل الصور البتلقاهو في شريط بكري دا فوق )

منتظرنك ياخ طولت علينا ..

Post: #10
Title: Re: خفاف علينا (في افطار بودراب الخرطوم...صور عند الطلب)
Author: فادية اليمني
Date: 09-13-2009, 11:04 AM
Parent: #8

Quote: يا خي استلمي ساي حرف ما يعتر ليك ... اي صورة يافادية حقت امس و لا يوم داك؟

بمناسبة أمس دي انتي وين؟ أنا جيت متأخر شوية و بديت اعاين شفت واحدة بتشبهك, رفعت ليها يدي نظامة خفة كدا لكن ما أشتغلت بي بعدين عرفتها دي ما انتي

تسلمي يا سليلة الاوس

الله يخليك يا حافظ

انت قلت فى العنوان (صور عند الطلب) قصدى دى بس اى صور ما بنابها

وامبارح والله كان نفسي اجي عشان اقابل الناس الماقبلتهم قبل كده ومنهم داليا الكباشي

لكن قلت يابت كترة الطلة بتمسخ خلق الله وكده لووووووووووول

لكن بالجد ضيوف

لكن لقيتك خفيف جنس خفة زى بوستيك ده

بالله صورتى القديمة لو سمحت

Post: #13
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 11:24 AM
Parent: #10

فادية اليمني
Quote: بالله صورتى القديمة لو سمحت

صورتي صورتي قايلاها سمحه يلا هاكي

فادية اليمني .... أمراة من سلالة النساء الشايفين انو الاناقة في البدانة..يعني بتعبير مخالف إمراة موضوع الجمال بالنسبة ليها quantity .... حلبية ببقع حمرا في الوش بفعل شمس الاستواء ... شرسة بتحفظ , لها طفلان لم يتعودا شراسة امهم بعد و زوج ممكون و صابر ... يعني زوج من نوعية الازواج البتهرشو ديلك ..... دي كانت صورة فادية اليمني عندي قبل الفطور لكن طلعت عكس الصورة دي تماماً... لطيفة لا تجبرك ان تستجلب اعتقادات و افتكارات ما ليها لزوم ببساطة ممكن تكون اخت أي حد و علي اسوة الفروض الابنة الوحيده لاحب خالة اليك .... بس كل الحاصل طلعت أوسية خزرجية
سؤال اخير... انتو الاوس و الخزرج ديل من الانصار و لا اليهود يا فادية؟

دايرا ليك اي صورة تانية

Post: #14
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 11:56 AM
Parent: #13

ما في حد داير صورته أو صورة حد بعزه؟

Post: #15
Title: Re: خفاف علينا (في افطار بودراب الخرطوم...صور عند الطلب)
Author: Nadia Elsir
Date: 09-13-2009, 12:02 PM
Parent: #14

Quote: ما في حد داير صورته أو صورة حد بعزه؟

انا و ليك البياض يا شيخنا

كل سنة و انت و من تحب بالف هنا و سعادة

Post: #16
Title: Re: خفاف علينا (في افطار بودراب الخرطوم...صور عند الطلب)
Author: فادية اليمني
Date: 09-13-2009, 12:03 PM
Parent: #13

Quote: فادية اليمني .... أمراة من سلالة النساء الشايفين انو الاناقة في البدانة..يعني بتعبير مخالف إمراة موضوع الجمال بالنسبة ليها quantity .... حلبية ببقع حمرا في الوش بفعل شمس الاستواء ... شرسة بتحفظ , لها طفلان لم يتعودا شراسة امهم بعد و زوج ممكون و صابر ... يعني زوج من نوعية الازواج البتهرشو ديلك

غايتو الصورة دى اناعجبتنى شديد

تعال يا ود الموج شوف تقول لى رابطة فلانة البرتكانة (وش عاجبه روحه)

و برضو من الناس القابلتهم:

ريهان الشاذلى زى النسمة

ياسر بيناوى الزول الوردة

تااااانى عايزة صورة ملاسي قبل و بعد الفطور

و بعده جيب صور كل الناس واحد واحد ماقبل وبعد التلاقى

اما بالنسبة لسؤالك الاخير انا حولته للاخ بهاء الدين الهادى

لانه قال متخصص فى الموضوع ده

لكن قيل انهم يهود

Post: #17
Title: Re: خفاف علينا (في افطار بودراب الخرطوم...صور عند الطلب)
Author: حاتم شناب
Date: 09-13-2009, 12:07 PM
Parent: #16

هاك البياض دة

Post: #18
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 12:20 PM
Parent: #16

Quote: انا و ليك البياض يا شيخنا

يا نادية السر بياضك بياض نيتك يا مبروكة .... والله يا نادية بنفس الكيفية خاتيك ست كبيرة يعني فوق الخمسين ... بعدين عينة المديرات لابسات نظارات و كل مشاكل المرأة التاريخية بختوها في الرجال ... مديرة بتهرش ليك الموظفين تخليهم يترقطوا.... وقت تقول لموظف أعمل كدا و الموظف يستفسر تعاين ليهو بس و ما تقول أي حاجة لكن بتقول كل شئ من خلال النظرة الشرسة تقول ... يا اهبل افتكر كلامي واضح... بعدين الموظف المسكين يمشي لأصحابوا و يبدو يفكوا في الفزورة الجديدة الاطلقتها المديرة احكي ليكي طرفة صغيرة ( امي طبعاً كانت معجبة بكونليزا رايس حد الجنون وقت تشوفها ليك في اي مناسبة في التلفزيون تقول عافيت منك يا السمحة ,,, عليكم النبي شوفوا الرجال ديل ماشين وراها زي الكلاب كيف)... يعني انا كنت خاتيك زولة بتهرش اي حد من طرف و لا كلامي صح؟

لكن لاقيت ليكم نادية السر امس ... شافعة صغيرة و يا حلاة الدنيا فوقها ... تستقبل في الضيوف بدون أي هرش ... تبتسم دون كلفة او تصنع

Post: #19
Title: Re: خفاف علينا (في افطار بودراب الخرطوم...صور عند الطلب)
Author: Nadia Elsir
Date: 09-13-2009, 12:40 PM
Parent: #18

شكرا على الصورة البهية عارف لما ما عرفت روحى

بس خجلتنى لما عفيتنى من البياض و زى ما قلت نخليها بالنيةو يا رب دايما بيضا

تحباتى و احترامى للوالدة العزيزة

Post: #20
Title: Re: خفاف علينا (في افطار بودراب الخرطوم...صور عند الطلب)
Author: معتصم دفع الله
Date: 09-13-2009, 12:40 PM
Parent: #18

سلام يا حافظ ..
ياخي صورك جميلة تخلي الزول منتشي وفرحان ..
نحن طبعاً قاعدين نشوف بي قلوبنا ومن كلامك السمح دا ..

يا فادية ..
أي زول ما جانا في السماية ما صاحبنا

Post: #21
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 12:46 PM
Parent: #20

فادية اليمني بجيك لكلامك الفوق دا لكن قبيلهو نشوف الشليق الرمي بياضهو دا
Quote: هاك البياض دة

عموماً هو بياض غير مشرف علي الإطلاق لكن نحن معشر الشيوخ امرنا ان لا نحدد بياض أحد ... حاتم شناب والله كنت متخيلو العينة المتجهمة علي طول يصرصر لاي زول , يعني لو إبتسم التحول الديمقراطي بيكون في خبر كان ,,, اضافة الي التجهم ينهر كل من مر بطريقه ,,,,له شنب مثل شنب خالد المحرب و ربما أكثر كثافة . في بداية الأربعينات مؤجل الزواج الي حين التحول الديمقراطي ,,,, لكن الصورة كانت غير كدا لكن ما شديد بس الاختلافات في الاتي
1. ما متجهم و الامانة لله لكن ما عارف هل هو مهموم بالتحول الديمقراطي و لا لا
2. غير متزوج و لكن علي ما أعتقد ما في واحدة قبلت بيهو
3. في نهاية الاربعينات يعني اكبر مني ب 20 سنة , لكن فارق السن لم يمنع صداقة قامت بيني و هذا الشناب
حاتم وديع و مسالم يحب الرقص و الغناء و أشياء أخري منع من ظهورها كرم رمضان

نادية السر تسلمي و تشكر يا معتصم علي المرور
و تعال هنا يا معتصم انت السماية دي عامله في السر؟

Post: #22
Title: Re: خفاف علينا (في افطار بودراب الخرطوم...صور عند الطلب)
Author: شول اشوانق دينق
Date: 09-13-2009, 01:16 PM
Parent: #21

Post: #23
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 01:17 PM
Parent: #21

Quote: بهاء: استاذ اللغات راجل راقى

فادية اليمني سلام تاني , طبعاً لازم يكون راغي ... كيف ما يكون راقي ما زرزرك في اوسك و خزرجتك دي (الاوس و الخزرج)... شوفوا يا ناس المنبر مش فادية دي قالت من الخزرج انا من الليله من يهود بني النضير و تاني ما في حد ينادي حافظ ممكن تنادوني النضير كدي اشوف واحد يقلبها يسميها العضير انا عارف المنبر دا غير قليب الكلام ما عندهم حاجة او ممكن تنادوني حافظ النضير بدل حافظ مريسة مفهوم .... يلا نجي لبهاء الراقي دا ... والله يا فادية للأسف كلامك صح هو راغي و جداً كمان ... بعدين بها دا أخر زول خاتي ممكن الاقيهو ... طوكيو يا خي ما ممكن؟
جيت ليك الفطور زي الأهبل و انا ما بعرف الا زول واحد .... بس قعدت اقهي في الزول الشلوخ الرمد في وشو لسا ظاهرا دا مين؟ قدر ما نحت رأسي الملخبت دا ما عرفتو ابداً... المهم وقت الشمار كتلني خلاص سألت ناذر الخليفة ... ناذر دا عندي معاهو عرفة قبل الفطور لكن ما في حد يسألني وين و لا كيف... المهم سألت ناذر , قال يا حافظ دا بهاء الدين طوكيو ...بس هنا الصبر ابي لي و مشيت داهمتو طاخ ... حق الله بق الله ... قلت ليهو انا حافظ ... قبل ما يرفع حواجبينو دهشة و إستدراك اسعفوا ناذر ...
قال ليهو يا بهاء دا حافظ مريسة يا خي... و بدأت حملة السلام مجدداً....
والله بهاء الدين دا انا خاتيهو بصورة لطيفة لكن ما للدرجة دي كمان, بس ما تصدق شديد يا بهاء

Post: #24
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 01:26 PM
Parent: #23

شول سلام و شكراً كتير علي bsb
تعال انت عرفت من وين انا مكسر في الفرقة دي ... لكن يا فرده رشوتك دي ما بتحلك ما بتحلك فاتيك فاتيك و الله خلي تجيبي لي ليهم كليب هنا و الله تحضرني ليهم حفلة لايف ما بخليك يا فرده

بل راسك يا شول و الدور جاي يا حنين

تشكر كتير علي المرور و أكتر علي الكليب

Post: #25
Title: Re: خفاف علينا (في افطار بودراب الخرطوم...صور عند الطلب)
Author: شول اشوانق دينق
Date: 09-13-2009, 01:55 PM
Parent: #24

Quote: بل راسك يا شول و الدور جاي يا حنين

إنا لله

Post: #26
Title: Re: خفاف علينا (في افطار بودراب الخرطوم...صور عند الطلب)
Author: فادية اليمني
Date: 09-13-2009, 02:18 PM
Parent: #25

*

Post: #27
Title: Re: خفاف علينا (في افطار بودراب الخرطوم...صور عند الطلب)
Author: خضر حسين خليل
Date: 09-13-2009, 02:33 PM

بياضك يا بياض النية والزول الوسيم

Post: #28
Title: Re: خفاف علينا (في افطار بودراب الخرطوم...صور عند الطلب)
Author: حبيب نورة
Date: 09-13-2009, 02:43 PM
Parent: #27

حافظ يا حفيظ

الشيرنغ شنو يا عمك

Post: #29
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 06:38 PM
Parent: #28

حبيبي نورا و حبيب الكل كيف و كيف التتر معاك

Quote: شيرنغ شنو يا عمك

يا فرده شرينغ شنو؟ انا جيت بعد الفطور والله فتشت محل الشيرنغ سماء ارض ما لقيتو... بعدين اوعي تكون فاكرني واحد من ناس الشيرنغ ديل ... انا يداب في بداية العشرينات الاولي ديييييييييك و ديل اعمامي الفي صورة ديل , لدرجة اني لو داير أدخن سجارة بطلع بره بعيد نظمات إحترامات و مقامات

خضر و شول و فادية جاييكم راجع لكن قلت نرد علي إتهام حبيبنا دا اول

Post: #30
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 07:04 PM
Parent: #29

يا خضر حسين سلامات ... والله انا زمان كنت بعرفك طشاش طشاش كدا... لكن بعد تعديلات السعودية و الحياة الزوجية أول مره أشوفك أمس ... كل المتذكروا منك زمان انك و الشهادة لله كنت شين بخشم الباب ... حتي مسمنك خضر الشين ,,,, بالله صححوني لو انا غلطان .... لكن غايتو ربنا يخلي السعودية جابت ليها نتؤات و ليس لها لزوم لكن أجمل مافي الامر اختفي القدوم للابد..... والله يا خضر الزول يقرأ ليك بس لكن ابداً ما يشوف خلقتك يا خي انت زول محبط شكلياً لكن عشان اطمنك الجمال جمال الروح يا حنين.... والله وقت الواحد يقرأ ليك كان متخيلك انسان نحيف يحب الزهور و العصافير و ما عارف النيل و العصاري و نضمي كتير كدا ,,, لكن وقت يشوفك جزار بس ناقص المريله ... غايتو يا خضر ربنا يستر من كوجان بس انا شفت اصبعو المربوط بالشاش داك لكن ما مبشر ( ولو داير تشوف كوجان شوفو اصبعو المربوط) اللهم لا نسألك رد القضاء و لكن نسألك اللطف فيه ,,, القضاء جاي في العيد و علي الخرطوم ان تحتمل كوجان و خضر في زمن واحد .... أأأأأأأأأأأأأأأأأأأأخ من نارك يا خرطوم

Post: #31
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 07:07 PM
Parent: #30

شول يا فرده يا صاقعة انت عارف انا ما داير افتك هنا لسبب واحد لاني طمعان في عزومتك الوعدتني بيها امس ... وهسي قدام ناس البورد ديل ... لو عزومتي قايمة و ما بتتأثر بالفت هنا حأفت ميتينك شفت في رجاله اكتر من كدا.... عفوا قصدي في نزالة اكتر من كدا....

يا شباب ما في حد داير يشوف خيرتو عفوا قصدي صورتو....

Post: #32
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-13-2009, 08:48 PM
Parent: #31

*

Post: #33
Title: Re: خفاف علينا (في افطار بودراب الخرطوم...صور عند الطلب)
Author: شول اشوانق دينق
Date: 09-14-2009, 08:27 AM
Parent: #32

Quote: شول يا فرده يا صاقعة انت عارف انا ما داير افتك هنا لسبب واحد لاني طمعان في عزومتك الوعدتني بيها امس ... وهسي قدام ناس البورد ديل ... لو عزومتي قايمة و ما بتتأثر بالفت هنا حأفت ميتينك شفت في رجاله اكتر من كدا.... عفوا قصدي في نزالة اكتر من كدا....

جنس جرسة

قول يا عم ولا يهمك العيزومة قايمة قايمة

Post: #34
Title: Re: خفاف علينا (في افطار بودراب الخرطوم...صور عند الطلب)
Author: صديق الموج
Date: 09-14-2009, 09:33 AM
Parent: #33

يا حافظ من حافظ.....سلام شوف يازول نحن متابعنك من افترعت هذا الخيط
حكاية انت صوار او رسام انا مقتنع بيها جدا...
لكن شكلك فى ناس صورتهم من بعيد..
او رسمتهم باستعجال...
قديما قيل:
بنتان ثقيلتان فى الميزان خفيفتان على الانسان..
فادية اليمنى دى واحده منهم..
طبعا التانيه الله لاجاب يوم شكرها..ماعلينا...
ظللت اتابع تصاويرك عن كثب فاستخلصت الاتى:
انت انسان مرتشى وما محاولاتك العيزومية مع شول الا دليل
لهذا الارتشاء او الانتشاء...ولكن شول ده انا ببدأ ليك رسمه
وانت اكمل اللوحة..شفت يشبهه القول بالبدرى او بالزهر هم ما
انصفوك يا شول الاوصفوك ...هذا ماكان من امر هذا الشول...

كسار تلج بدرجة فارس..ودى الدليل بتاعها انك شكرت خضر
وان السعودية كان لها الاثر الفاضح فى سماحة خضر..
اول شى خضر ما بنشاف من برة كلو كلو..لاطعم لا لون لا رائحة..
كماء الوضوء طهرا ونبلا ومقصدا..وهو اشنا خلق الله انسانا,,
كتاب بيد انه من الناطقين بغيرها...
تبدو على وجهة ملامح الصلاح ومخائل الذكاء...
انسان زى ده ينبص ليه من انى حته على راى عادل امام...

نادية السر والله يعلم السر وما يخفى...
لكن خلينا نتكلم فى الجهر..
زولة حبوبة بشوشة راقية استقبالها لى نوع ناس تبلدينا ووليد الشفت
وناذر الخليفة وود قاسم وحنين وشول اشوانق وابو كشوة واشراقة حيمورة
هذا فى حد زاته سر كبير ...
هذه دماء لو مزجت وسيطت قبل هذا لما مس فيها دما دما..
بفضلها كان هدا الخليط الجمال..ساطتهم ثم روقتهم واراقتهم فى كاسات
الود الدهاقة وتطاقشت الكاسات فى مودة كسنابل الفتريته عندما يشوبها
الغنج حتى تشتت دمع مصطفى السنى وغلب اللقاط وتشتت معه عواطف الناس
ما لملمتها الا زغوردات عفاف ابوكشوة الصادقة فى كبسولة الفرح
التى تخلقت يومئذ..وترى القوم سكارى وماهم بسكارى
وهل راى رمضان سكارى غيرهم؟؟

حافظ ترباية المريسه الما خمج انا بتكيفك واتقريفك واتكرفك كلما طللت هنا
ولو لقيتك كان فطرتك بى (دقة) وغديتك بى (دقة)...مهما تربص بنا اهل
المشروع الحضارى مع انهم مصرين يدقوا ومانعننا الدقة..
مش كانوا دايرين يدقوا لبنى؟؟والا انا غلطان..
واصل تصاويرك ولك منا الف بياض فى هذا الزمن الرمادى سريع الاستدارة..
ناس الخرطوم رعاكم الله من نسمات لطيفات،،،

Post: #36
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-14-2009, 10:02 AM
Parent: #34

Quote: حافظ ترباية المريسه الما خمج انا بتكيفك واتقريفك واتكرفك كلما طللت هنا
ولو لقيتك كان فطرتك بى (دقة) وغديتك بى (دقة)...مهما تربص بنا اهل
المشروع الحضارى مع انهم مصرين يدقوا ومانعننا الدقة..
مش كانوا دايرين يدقوا لبنى؟؟والا انا غلطان..
واصل تصاويرك ولك منا الف بياض فى هذا الزمن الرمادى سريع الاستدارة..
ناس الخرطوم رعاكم الله من نسمات لطيفات،،،

خليني ابداك من حيث المنتهي يا صاحب الموج العالي ... و الشهادة لله تربية مريسة لكن لزوم فلهمة من الليله انا اسمي حافظ النضير لو سمحت ... وكمان معزومين السماية ( دقة للنساء و قزازة للرجال) , و بمناسبة الدقة دي ,,, طلعت دقة جديدة في الخرطوم اسمها دقة لبني أسالوا منها معتصم الصايغ المعانا في المنبر دا .... لكن دقة لبني لو جبتها لزوجتك بتجدعها ليك في وشك و تقبقبك ... يعني هي دقة من الدهب الفالسو (أي المغشوش), لكن الجميلة دقة كندا...دا كندا انشاء الله دقة البنات لحدهن ,,,, والله لو الحالة انسترت معاي السنة دي ادق لام العيال دقة كندا الما خمج مش بتاعت البابور دقة لبني دي.....
و بعدين انتو عارفين لبني دا ما اخدت دقة ليه .... ما في زول يجي يقول لي لانو ( جمعية لا قهر النساء اشتغلت قرف , و لا لبني عارفها حقوقها او عندها حصانة لانها شغالة مع ناس اليونميد, أو الضغوط العالمية و قصة ناس ساركوزي الما جايبا حقها دي) دا كلو حنك بيش , لبني ما إدقت ببساطة لانها ما موقعة علي المحكمة دي .....

و جاييك يا ود البحر للباقين اقعد عافية و راكز

Post: #35
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-14-2009, 09:38 AM
Parent: #33

Quote: قول يا عم ولا يهمك العيزومة قايمة قايمة

يا عمك حاقول حاقول لكن بعد العزومة

Post: #37
Title: Re: خفاف علينا (في افطار بودراب الخرطوم...صور عند الطلب)
Author: شول اشوانق دينق
Date: 09-14-2009, 11:24 AM
Parent: #35

Quote: عمك حاقول حاقول لكن بعد العزومة

العزومة مشترطة بالقول ... اها شن قولك

Post: #38
Title: Re: خفاف علينا (في افطار بودراب الخرطوم...صور عند الطلب)
Author: azhary awad elkareem
Date: 09-14-2009, 11:56 AM
Parent: #37

Quote: انا يداب في بداية العشرينات الاولي ديييييييييك و ديل اعمامي الفي صورة ديل

يا حافظ عمى يلايسك على قول عمنا صديق الموج..
هسة أمانتاً فى زمتك أنا عمك..

Post: #39
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-14-2009, 12:20 PM
Parent: #38

عمي ازهري سلامات

Quote: [يا حافظ عمى يلايسك على قول عمنا صديق الموج..
هسة أمانتاً فى زمتك أنا عمك..

والله يا اخوانا الزول الداير يقول الحقيقة في المنبر دا أول يطرق لسانو كويس ... و يا عمي ازهري انت ختيت لي الموضوع في الزمة انت عمي بالحيل , و بعدين تعال انت أهلك الاتحاديين سموك ازهري بمناسبة انضمام السيد اسماعيل الازهري للحزب الاتحادي الديمقراطي في الاربعينات ... ما تجي تقول وقت ازهري رفع العلم سنة56 ...

و انت يا عمي جابت كراعك يلا تعال شوف الفت و الله ما داير منك اي بياض ... لله و الرسول , كرامة , حسنة و أجر .

Post: #40
Title: Re: خفاف علينا (في افطار بودراب الخرطوم...صور عند الطلب)
Author: حاتم شناب
Date: 09-14-2009, 02:47 PM
Parent: #39

Quote: عموماً هو بياض غير مشرف علي الإطلاق لكن نحن معشر الشيوخ امرنا ان لا نحدد بياض أحد ... حاتم شناب والله كنت متخيلو العينة المتجهمة علي طول يصرصر لاي زول , يعني لو إبتسم التحول الديمقراطي بيكون في خبر كان ,,, اضافة الي التجهم ينهر كل من مر بطريقه ,,,,له شنب مثل شنب خالد المحرب و ربما أكثر كثافة . في بداية الأربعينات مؤجل الزواج الي حين التحول الديمقراطي ,,,, لكن الصورة كانت غير كدا لكن ما شديد بس الاختلافات في الاتي
1. ما متجهم و الامانة لله لكن ما عارف هل هو مهموم بالتحول الديمقراطي و لا لا
2. غير متزوج و لكن علي ما أعتقد ما في واحدة قبلت بيهو
3. في نهاية الاربعينات يعني اكبر مني ب 20 سنة , لكن فارق السن لم يمنع صداقة قامت بيني و هذا الشناب
حاتم وديع و مسالم يحب الرقص و الغناء و أشياء أخري منع من ظهورها كرم رمضان

والله ياحافظ بالغتة عديل كدة
ياخ انا مواليد90 تطلعني قدرك واكبر شوية
عموما مامشكلة بلم فيك
ورجعلي بياضي

في لب الموضوع
عزومة شول عايزنها في رمضان دة
الا اذا كان عندك مشكلة

Post: #41
Title: Re: خفاف علينا (في افطار بودراب الخرطوم...صور عند الطلب)
Author: HAIDER ALZAIN
Date: 09-14-2009, 02:48 PM
Parent: #39

Post: #42
Title: Re: خفاف علينا (في افطار بودراب الخرطوم...صور عند الطلب)
Author: شول اشوانق دينق
Date: 09-14-2009, 03:53 PM
Parent: #41

Quote: في لب الموضوع
عزومة شول عايزنها في رمضان دة
الا اذا كان عندك مشكلة

العزومة بعد الأرشفة يا فرد

بعدين تعالوا هنا... إتو انا عازمكم شنو؟

السؤال ده منعاً للإلتباس وسوء الفهم والفهم المغلوط يا جماعة

Post: #43
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-14-2009, 08:41 PM
Parent: #42

حاتم شناب سلام
Quote: ورجعلي بياضي

ارجع ليك شنو يا شناب ؟ ما سمعتك كويس لكن لو ما خايف من الكضب قلت بياضي صح؟
هسي عليك النبي يا زولاً اكل تركية و مهدية في زمتك يوم كدا شفت ليك فكي رجع بياض ,,,
و تعال انت ممكن تمشي للدكتور بكرعينك يا شناب و تأخد العلاج و ما ينفع معاك , اها يوم كدا رجعت للدكتور قلت ليهو رجع لي قروش التذكرة لانو علاجك دا ما نفع معاي ؟
عليه عندك واحد من خيارين , أما تدفع بياض جديد و نغير ليك العلاج , أو تنطم و تاني ما اسمعك تجيب سيرة بياض دي مفهوم؟
و بعدين تعال عندك انا اصلاً فصلاً ما جبتا حاجة من رأسي الضارب دا ... انا بس وصفت خلقة ربنا فيك يا شناب

Post: #44
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-14-2009, 08:50 PM
Parent: #42

شول سلام و كيفك
Quote: بعدين تعالوا هنا... إتو انا عازمكم شنو؟

هسي يا شول في زول جاب سيرة العزومة شنو؟ انشاء الله تكون عزومة مراكبية برضو جايين بس اوعي تنط من هسي

Quote: السؤال ده منعاً للإلتباس وسوء الفهم والفهم المغلوط يا جماعة

يا شناب شكلو شول دا بدأ ينط , لكن يا شناب و شول و حياة ديني و أيماني عازمكم انا و لو دايرين العزومة هسي بعملها ... اي نحن ما جعليين لكن مرة جيرانا جعلية ... و اقول ليكم عازم معاكم ياسر بيناوي , و حيدر الزين و حبيب نورا و أي زول انشاء الله سيد الحوش ذاتو ... لكن يا شول العزومة ما بنابهم كان للحول ما بنخليك (عزومتنا وين؟؟)

شناب و شول انتو دايرين تحرفو البوست دا و هو اساسا منحرف

Post: #45
Title: Re: خفاف علينا (في افطار بودراب الخرطوم...صور عند الطلب)
Author: عبدالوهاب علي الحاج
Date: 09-14-2009, 08:54 PM
Parent: #44

Quote: ياخ انا مواليد90
كرولا

Post: #46
Title: Re: خفاف علينا (في افطار بودراب الخرطوم...صور عند الطلب)
Author: حاتم شناب
Date: 09-14-2009, 11:40 PM
Parent: #45

حافظ هااااااايات

Quote: , أما تدفع بياض جديد و نغير ليك العلاج

جدا موافق
بياضي الجديد يافردة
عازمك غدة ها غدة ركز في فترت الوجبة
في المطعم التختارو

Post: #47
Title: Re: خفاف علينا (في افطار بودراب الخرطوم...صور عند الطلب)
Author: JAD
Date: 09-15-2009, 12:26 PM
Parent: #46

الأخ أزهري عوض الكريم ..

سلام يا رجل يا طيب ..

يا أخي أنا مشبهك للأخ أزهري الطريفي عوض الكريم .. هل أنت هو؟؟

سلام يا بورداب الخرطوم ..

الدنيا أيام تحرى ليلة القدر .. وقبايل عيد ..

كل عام وأنتم بخير ..

Post: #48
Title: Re: خفاف علينا (في افطار بودراب الخرطوم...صور عند الطلب)
Author: حاتم شناب
Date: 09-15-2009, 12:48 PM
Parent: #47

Quote: كرولا

وهبة

ماتزعل خلاص87

Post: #49
Title: Re: خفاف علينا (في افطار بودراب الخرطوم...صور عند الطلب)
Author: ياسر بيناوي
Date: 09-15-2009, 01:09 PM
Parent: #48

Quote: بعدين تعالوا هنا... إتو انا عازمكم شنو؟

ميرندا يا شول ميرندا

ماتلاوز

غايتو يا شناب اصلك ما بتخلي حاجة كتامي
هسة نازر يجي ويقول داير معانا
وخدر خسين ...... وعيييييييييييييييك

Post: #50
Title: Re: خفاف علينا (في افطار بودراب الخرطوم...صور عند الطلب)
Author: بكري الخير
Date: 09-15-2009, 01:40 PM
Parent: #49

Quote: نادية السر والله يعلم السر وما يخفى...
لكن خلينا نتكلم فى الجهر..
زولة حبوبة بشوشة راقية استقبالها لى نوع ناس تبلدينا ووليد الشفت
وناذر الخليفة وود قاسم وحنين وشول اشوانق وابو كشوة واشراقة حيمورة
هذا فى حد زاته سر كبير ...
هذه دماء لو مزجت وسيطت قبل هذا لما مس فيها دما دما..
بفضلها كان هدا الخليط الجمال..ساطتهم ثم روقتهم واراقتهم فى كاسات
الود الدهاقة وتطاقشت الكاسات فى مودة كسنابل الفتريته عندما يشوبها
الغنج حتى تشتت دمع مصطفى السنى وغلب اللقاط وتشتت معه عواطف الناس
ما لملمتها الا زغوردات عفاف ابوكشوة الصادقة فى كبسولة الفرح
التى تخلقت يومئذ..وترى القوم سكارى وماهم بسكارى
وهل راى رمضان سكارى غيرهم؟؟

الموج حبيبي

كل مرة أقري ليك أحس بأنك زول سمح عديييييل كدي (والله ما كسير تلج لكنها الحقيقة)

بس الله يكفيك شر طارق جبرين ، وبمناسبة ودجبرين دا عندنا زمان الناظر بتاع المدرسة الله يرحمو العم ابوالعباس الطاهر (معروف بمنطقة بربر وعطبرة والدامر) راجل ماشا الله من ماجميعو، اها قام شاف ليهو ولد مسكين ووديع وما بتاع مشاكل مباري ليهو واحد شرامي بتاع شبك (اتخيل الاول صديق الموج والتاني طارق جبرين) قام قال للاول اقعد انت باري لي في ود حادو دا لحدي مايكلك الخنفسان
دحين يا ود الموج ودجبرين دا أطلق دربو احسن ليك

ببركة هذا الشهر المبارك وليلة القدر أسأل الله من قلبي لكم الاثنين التوفيق والسداد وان يبلغكم المقاصد لطالما أضفيتم علينا نفحات من النجيهة السمحة التي تكسر حاجز الروتين الممل الذي يعتري هذا المنبر بين الفينة والاخري

دمتم
مراسلكم من امدرمان: بكري الخير / من أمام نادي المريخ - جامعة الاحفاد للبنات (شفت يا ود الموج البخت والسنتراللامي فيهو انا؟ تقول لي قنصلية الرياض؟ ياخ مالك علينا ؟؟)

Post: #51
Title: Re: خفاف علينا (في افطار بودراب الخرطوم...صور عند الطلب)
Author: طارق جبريل
Date: 09-15-2009, 02:29 PM
Parent: #50

Quote: بس الله يكفيك شر طارق جبرين

ود الخير
انا يا يابا شاحد الله ناس بيتكم ما يلقوا سمن لي كعك العيد
ولو لقيتو الكعك يطلع ناشف زي الاسمنت
ويا ربي البسكويت بتاعكم يطلع مِنِين

ود الحافظ
يا يابا لقيت التلج بي هني عندك هامل
يمين الكسير الهني دة يكفي السودان خمسة سنين جاية

Post: #52
Title: Re: خفاف علينا (في افطار بودراب الخرطوم...صور عند الطلب)
Author: فادية اليمني
Date: 09-15-2009, 02:49 PM
Parent: #51

بقى مولد

كده لم اجيييكم برواقة

Post: #53
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-15-2009, 03:39 PM
Parent: #52

طارق جبريل والله بالجد الجابك هنا ما ساهل يا خي ما كان تقول لينا جاي كنا ملينا السكة تلوج (تلوج دي جمع تلج)... وقلتا كسير تلج؟ ... لكن النصيحة لرب العالمين مكسرين تلج مكسرين ... والله انت كان شفت جمال البنيات ديل,,, خلقة , اخلاق, ذوق , ادب ,,, والله تشوف الجمال دا كلوا خلي تكسر تلج يا طارق والله تكسر رقبتك....

و جاي للباقي واحد واحد بس عندي حلة في النار و الموية قاطعة

Post: #54
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-15-2009, 04:09 PM
Parent: #53

Quote: ياسر بيناوى الزول الوردة

يا فادية اليمني يا خي براحة علينا نحنا ناس كبرنا و عندنا الرطوبة ... وردة مين يا فادية يا خي قولي حقنة , ابره و لو جاملتيهو شديد كدا قولي شوكة ..قال ورة قال ... يا خي دا نوع كسير التلج البفقدك البوست الما عندو محتوي قدر محتواهو الفي ... يجونا ناس طايرين من فاس الما وراها ناس يشتمونا ... عليك النبي ما شايفة طارق ود جبرين سمعني شنو ..فرج فينا اليسوي و الما يسوي ... لكن شكلو قاصدك انتي في قصة وردة بيناوي دي عشان كدا انا معافي ليك يا طارق لله و الرسول...والله كسير التلج ما بناباهو لكن ما قدر دا كمان

والله انا ما خايظني الا ورودية (دي من وردة يورد الماء) ياسر بيناوي دي

Post: #55
Title: Re: خفاف علينا (في افطار بودراب الخرطوم...صور عند الطلب)
Author: doma
Date: 09-15-2009, 04:10 PM
Parent: #53

امنيتي في الحياه اشوف صورتك
يا حافظ قبل اموت
والعمر فضل منه شئ قليل

Post: #56
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-15-2009, 04:18 PM
Parent: #55

Quote: امنيتي في الحياه اشوف صورتك
يا حافظ قبل اموت
والعمر فضل منه شئ قليل

تشوفي النبي يا دوما ... مالك داير تهلوسي باقي الليل ...

لكن بعد خرف والله ما عندي مشكلة اخت صورتي لكن والله قدر ما حاولت الداهي بتاع بكري بجيب لي كلام خارم مره يقول لي الصورة دي تقيلة و مره يقول اللنك ما عارف شنو المه قصص كدا...

لكن بيني و بينك يا دوما صورتي تقيلة والله انا متصور في تايلاند راكب فيل ... و فيل حقيقي لا غش لا كذب...

يا دوما انا شفت اسمك في البوست دا قلت اجي طاير اكسر تلج القطب الجنوبي و طارق جبرين الضران يشرب من السموم

تسلمي يا دوما ... و جاي و معاي الصورة و الفيل

Post: #57
Title: Re: خفاف علينا (في افطار بودراب الخرطوم...صور عند الطلب)
Author: doma
Date: 09-15-2009, 04:25 PM
Parent: #56

Quote: تشوفي النبي يا دوما ... مالك داير تهلوسي باقي الليل ..

حد يهلوس من زول عسل متلك ؟؟!!
روحك جميله جمال غير عادي انا فرحانه بيك كثير بس ما قلت ليك من زمان
ما كنت عارفه المدخل كيف
اليوم قلت لروحي يا زوله اتشجعي وقو لي كلامك
والكاتل الله والحاي الله

Post: #58
Title: Re: خفاف علينا (في افطار بودراب الخرطوم...صور عند الطلب)
Author: ياسر بيناوي
Date: 09-16-2009, 11:09 AM
Parent: #57

Quote: وردة مين يا فادية يا خي قولي حقنة , ابره و لو جاملتيهو شديد كدا قولي شوكة ..قال ورة قال

ياخوي انت مالك من الصباح ..... الدنيا رمضان ياخ
قلنا ليكم خففوا خففوا

ياخ ايي شاعر بوصف حسب بيئتو
هي شايفاني وردة
وانت عادي ممكن تشوفني ام فتفت عادي ياعمك

خالص الود

Post: #59
Title: Re: خفاف علينا (في افطار بودراب الخرطوم...صور عند الطلب)
Author: حافظ حسن ابراهيم
Date: 09-16-2009, 12:51 PM
Parent: #58

Quote: ياخ ايي شاعر بوصف حسب بيئتو
هي شايفاني وردة
وانت عادي ممكن تشوفني ام فتفت عادي ياعمك

هي زاتا ما شايفاك وردة لكن بس هن النساء , فالنساء هن الجنس الراقي صعب جدا يجرحوا مشاعر إنسان مهما كان شوكة ... وردة يا بناوي.... عليك النبي و الله بيسألك الكريمة أمك الولدتك شايفاك وردة؟

كيف يعني اشوفك ام فتفت انت قايل أم فتت دي هينة انشاء الله يلمي فيك رأفت ميلاد ... في المنبر دا فاتح بوست كامل عن باسم (أم فتفت بتفكها),,,, شفت ام فتت بقت عندها فايدة قدر كيف ...اللهم اني صائم

يلا قوم بلا وردة معاك

دوما الجميلة أشواقي تسبق سلامي (عليك الله يا دوما شنو ليكي الغزل دا).... والله تاني حاولت انزل صورتي الكريهة دي و استعنت بخبير أجنبي عزمته فطور بس خسارة فطوري ساي ... برضو البوست قال ليهو لا الصورة أم فيل دي ما لازمنا هنا ... أها غايتو منتظرين نشوف لينا صورة وزاوت فيل