|
|
 موية موية .... موية بارد...(أما لهذا البؤس من نهاية)؟؟؟!!!
|
مقدمة لا بد منها
----------------------------
ثلاثون عاماً ويزيد، ثلاثون عاماً وشارع بيتنا هو شارع بيتنا، بنفس التفاصيل لم يتغير فيه شئ سوى أن بعض الشجيرات المتناثرة هنا وهناك قد شاخت، وبان عليها التعب والإرهاق، وبت أشعر بالشفقة عليها، واتمنى لو استطيع إنهاء عذابها وصمودها أمام أسراب الأغنام والمزابل والبرك والمتبولون هنا وهناك.
على فكرة يا جماعة
هذا البوست ليس للأخذ والعطا والرد، فأعلم انا ان الحديث حول الأمر كثر، وأصبح ممل وبزهج
وأن كثير منا (ذي مثلاً) يرغب في الانفجار حديثاً ومع ذلك يصمت، أحياناً تناحة ، وكثيراً بلاهة، والأغلب، قلة حيلة، وكثيراً مع قرارنا أن لا نتحدث نقرر أيضاً أن لا نستمع، كمجروح يتألم، شايف الجرح، وخايف يهبشوا فيزيد عليه الوجع.
أنا هنا ببربر ، رسائل خاصة مع صديق عممتهاوجعلتها عامة، إذ من المنظور إن لم أفعل أن أنفجر..
---------------------------
مساء الخير يا صديق..
وددت أن أكتب لك رسالة في البريد الخاص، وغيرت رأي في آآآخر لحظة، وفكرت أن اكتب في العام، عسى أن أحدهم يشاركني بالفضفضة ويرتاح، عسانا نرتاح يا صديقي.
الجو جميل جداً، ولم أشعر حتى الآن ب(هلهلة العطش) التي تلازمني دائماً عند صيامي رمضان في الخرطوم.
أصبت هذه السنة بنوع آخر من الهلهلة، وسميتها (هلهلة المواطن السوداني)،
أجلس يومياً افكر في معادلة المعيشة الصعبة التي والله والله لا اعرف كيف يحلها المواطن السوداني العادي فيعيش.
وتوصلت لفكرة أن (المواطن السوداني) لا يعيش، إنه فقط (مستمر)
ودعني احكيك أول قصصي مع الكهرباء، واعذرني إن كانت مملة، فعادي، كل الشعب السوداني والمواطنين السودانيين يعيشون يومياً نفس المآسي ونفس التعب ونفس الإحباط، يتحدثون نفس الأحاديث ويشتكون نفس الشكوى، ومع ذلك يستمرون.
أحب برنامج (أغاني وأغاني) واتابعه من موسمه الأول كما تعلم، ورغم إن هذه السنة منيت نفسي بالاستمتاع التام بالبرنامج في البيت الكبير، في جو السودان الحميم، رغم ذلك (الشغلانة) ما ظبطت معاي، فأول أيام رمضان، وبعد محاولة إقناع الجميع بالتنازل عن وجوه نيرة كيسرا وإلهام شاهين وليلى علوي وغيرهن من الممثلات المكلمظات ذوات الوجنات الناعمة (مقارنة طبعاً مع ملامح السر قدور المتواضعة)، كلل كلامي الوطني بالنجاح (يعني ما تحبوا البرامج الوطنية ) (يعني ما تشجعوا التلفزيونات الوطنية وتتابعوا مسلسلات عبيطة مكرورة ونساوين عجايز يعملوا فيها مراهقين في الجامعة) و(تكبير الله أكبر، تهليل لا إله إلا الله)
المهم ،
بعد متابعة كافة إعلانات العصائر والعفش والمحاميد والما محاميد والفايزين والقرررربوا يفوزوا،
وما أن بدأ السيد السر بتمتمة (جلسة ما منظور مثيلها) إلا و(تك) قطعت الكهربا
اليوم الأول عدا بالسلامة مع الونسات والمويات والقفشات، أول يوم طبعاً والناس بتقول يا هادي
وتاني يوم
فطورات ومويات وحلويات وإقناعات من جديد واسطوانة (يا جماعة ما تشجعوا التلفزيون الوطني)
متابعة نفس الإعلانات المستفزة، ويبدأ السر (جلسة ما منظ) وتك،، تقطع الكهرباء
وياخي هناك علاقة غريبة بين الكهرباء والباعوض، فما أن تقطع الكهرباء من هنا حتى يشتغل سرب الباعوض من هنا، يعني كأن هناك زر إقفال الكهربا يقابله زر تشغيل الباعوض.
ثالث يوم، وبعد تكرار العملية الهباب دي، أولاً، اتشائمت من جلسة السر، وثانياً فاض بي الحال وكان لا بد أن افش غلي في أي مكان ، وبعد الاستفسار اخبروني أنه لا داعي أن تذهبي بنفسك للهيئة(ما هيئة الأمر بالمعروف طبعاً)
هناك تليفون طوارئ لل(هيئة القومية لإدارة الكهرباء) و (وااااااااااااااو) يا ولد،،،، يا ارض احفظي ما عليك
اتصلت بموظف حباه الله بصوت ناعم كسول ناعس (يا جماعة احنا ساكنين في المكان الفلاني، الشارع حوالينا كلو منور إلا إحنا، كل يوم الكهرباء تقطع في نفس الوكت، يا جماعة الباعوضة هرتنا والحر هربدنا وبعدين أساساً انتو بتقطعوا الكهربا دي بالضهر، لزوموا شنو بالليل كمان، يعني انتوا بتكرهونا كده ليه)
رد عليا الصوت الناعس الحزين (كأن الصوت ده له علاقة بمحمد عبد الوهاب والله أعلم نفس البرود والثقالة والهدوء المستفز الله يرحمه)
(معليش، بس في سلك اتقطع بسبب المطرة)
(المطرة جات الليلة؟؟!! تصدق يا هناي ما عارفة!!)
(المطرة صبت في الكلاكلة)
(بس احنا في بحري شارع السيد علي الميرغني)
(آىىىىىىىىىىى عارف، لكن المطرة لما تصب السلك بتقطع)
!!!!
صدقني لا رغبة لدي في أن اصبح مملة، لكن لابد أن تعيش الدور معي كله.
أقفلت الخط وأنا اضحك وأردد (الزول ده راكب فيل يا جماعة)
في اليوم التالي، هطلت الأمطار فعلاً، وقطعت الكهربا (معلوم) ، فاتصلت بحالة من الإحباط والتسلية (الصراحة يعني)
رد عليا صوت رزين ( يا جماعة احنا ساكنين في الحي الفلاني، الشارع كيت كيت كيت، نفس القصة)
فرد وقال (معليش، بس في سلك مقطوع)
لولا اختلاف اللكنة والصوت وتأكدي أن الكلام حي مباشر، لقلت أن ده تسجيل.
وصدق
أن الموضوع استمر برررررضو اليوم الذي يليه...
امس، قطعوا الكهرباء من الساعة الثانية عشرة ليلاً حتى الثانية عشرة ظهراً، ومع صوت الباعوض، وعدم التمكن من النوم في الحر، اتصلت عليهم يجي ثلاثة أربع مرات، وكل صوت يخبرني بأن (في سلك مقطوع) وأخيراً، رد عليا أحدهم بنرفزة شديدة وصوت شخص كرهوه الحياة فعلاً (ياخي السلك مقطوع، يعني يرضيك يطلع واحد في المطرة دي ويصلح سلك كهربا يضربوا ماس يموت)
(لا طبعاً، يرضيني أن يموت كل الشعب السوداني الموت البطئ بالقهر والضيق وقلة الحيلة)
(خلاص،،، لما المطرة تقيف حنصلح السلك)
(طيب لو اراد الله المطرة تستمر خمسة أيام متتالية مثلاً، نهاجر احنا يعني)
(باركيها وقولي خير، بعد شوية تتصلح)
وفعلاً، بعد مرور 12 ساعة تامة، أي والله 12 ساعة، رجعت الكهرباء فاعتقدت (بعبطي) أنهم صلحوا السلك فعلاً، ودعيت ليهم كمان.
تصدق.. أن اليوم نزلت شووووية أمطار الساعة الثامنة مساء، يعني بعد 8 ساعات من إعادة الكهرباء من يوم أمس، فاتصلت (باقي انا رزلة وعكليتة وبعدين ما عندي موضوع)، فرد عليا صوت ناعس زهجان إذ يبدو والله اعلم اني صحيته من النوم (معليش في سلك مقطوع، لما تقيف المطرة حنصلحه)
رددت وكنت خلاص وصلت الأبنص فعلاً (السلك الصلحتوه الليلة الساعة 12 الضهر اتقطع في نفس اليوم الساعة 8 بالمساء؟؟!! يعني ياخي احترم ذكائنا شوية، قول كلام معقول، خمسة أيام كل يوم تصلحوا السلك يقوم سبحان الله السلك ينقطع براه تاني، الشي شيطان؟؟ الشي مسكون مثلاً؟؟؟ راكبو عفريت؟؟)
(ياخي ما تتكلمي ساكت، لسة لم تقيف المطرة إن شاء الله بنشوف الحاصل شنو)
(ما وقفت المطرة الليلة الصباح وشفتوا الحاصل وصلحتوه تاني شنو يعني)
(اسمعي ما تتكلمي كتير ، ما يمكن الأنقطع المرة دي سلك تاني)
!!!
(الله يقطع راسك – دي قلتها في سري- وفي العلن قلت
( شوف ياخي يا احنا حمير؟؟ واللا انت حمار؟؟؟ أنا حاشتكيكم، بس وريني المشكلة وين بالظبط عشان اعرف هل هو إهمال منكم واللا ما عندكم قروش تصلحوا؟؟ واللا بالجد المشكلة شنو بالضبط؟؟ يعني لما نمشي المحكمة نشتكيكم أنتوا واللا نشتكي عمر البشير؟؟)
(بتتكلمي في السياسة!!؟؟) واعتقد أنه صر وشو مع هذه الجملة.
(أيوه بتكلم في السياسة، انا من المواطنين وعندي سؤال، مشكلة الكهرباء البنشتريها كل يومين بعشرة ألف جنيه، وبتقطع في نص النهار وسكتنا، وبالليل تنقطع برضو والباعوضة تهري مصارينا، أنا عايزة أعرف المشكلة وين من حقي اعرف)
يا صديقي
تحدث معي كبيرهم، مديرهم الله اعلم أن التليفون تحول من يد الموظف الصحيناه من النوم لشخص مسؤول، وما استطعت إلا أن اقول (شوف ياخي، كلمة واحدة بقولها ليك، اتقوا الله فينا، يا جماعة،حسبي الله ونعم الوكيل)
فرد الآخر بانكسار مفاجئ (والله صحي يا بتي، حسبي الله ونعم الوكيل)
توقفت الأمطار ( حتى الآن) ورجعت الكهربا الحمد لله (صلحوا السلك يعني)، فقلت استغلها فرصة واكتب، حيث لا اعلم ما سيحدث الدقيقة القادمة.
وما بين تصليح السلك، ونزول الأمطار، أفكر، أما لهذا البؤس من نهاية؟؟؟
بالله يا صديقي بالجد، أما لبؤس الشعب السوداني من نهاية؟؟؟
-----
|
|
 
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: DKEEN)
|
| Quote: ( شوف ياخي يا احنا حمير؟؟ واللا انت حمار؟؟؟ أنا حاشتكيكم، بس وريني المشكلة وين بالظبط عشان اعرف هل هو إهمال منكم واللا ما عندكم قروش تصلحوا؟؟ واللا بالجد المشكلة شنو بالضبط؟؟ يعني لما نمشي المحكمة نشتكيكم أنتوا واللا نشتكي عمر البشير؟؟) |
حمير دي كتيرة شوية عليك.. لكن زول في السودان الكهرباء تقطهع ليهو يقوم يتصل متوسما ان تسمع دعواه ده تسميهو شنو؟؟
انا مولود في 1974
منديك وعايش في السودان لحدي 2002
يوم واحد ماحصل الكهرباء دي قطعت وحسينا بي شي غريب..
الجيران بمرقو في الحوش واولاد الحلة في الحلة..
وبنات الحلة طرف الباب..
ونسوان الحلة بتموها تحضير عشا وونسة ليل..
الحجاج بشغلو الروادي بالبطاطير..
وخلاص ..ولا واحد فينا جرى عمل كواريك وجوضة لي ناس الكهرباء..
كهرباء وقطعت..
يابتي حاول يافهمي انو دي منحة من ناحية ومن ناحية تانية انو الناس دي ماقاصدة تضركم..يعني هم لقو كهرباء وابو ليك؟؟
يعني عايزة واحد مسكين من ناس الكهرباء ديل يجيك والمطرة ممكن تصب في اي وكت ويطلع ليك عمود مبلبل عشان يربط ليك سلك وقع ولا عايزاهو يمشي لي ناس النيل الارق ويقوزل ليهم ..النبي الغو البرنامج اليوم لانو بت قضيم سلك حلتهم جنب ابوجابرة وقع)
موش دي تبقى انانية وتفكير في متع ذاتية بحتة في بلد اصلا حد المتعة والترف فيهو مفروض تكون يا معقولة يا اما رهن الحال العام..
ولا انتي فكرتك شنو بالضبط؟؟
بعدين ياخي في اولويات في البلد الفقرانة دي..
في حتت اولى بالكهرباء غير بيتكم ده وغير متابعة اغاني واغاني و قصص السر قدور وتسريحة ريماز..
فلو جاتك تحمدي الله عليها ولو ماجاتك فذلك امر من ما اعتاد عله سواد السودان الاعظم..
انتي جاية من السيييرا؟؟
لو ماعاجبك اشترو جنيريتر..او اعملي كهربتك براك..او اعملو حوش وامسحو بتاع البعوض داك..
بيتكم ده فيهو كوبس مركب في باب الحوش..بابكم مابفتح إلا بي فولتات؟؟
ماهو ده العالمين في السودان عايشين من بدايات القارة الاولى في هذا الحال..
بيتكم ده مستوصف؟؟
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: DKEEN)
|
له الرحمة .... هذا الانسان النبيل الجميل
والله قد فجعت برحيله كما حدث مع رحيل والدي
كنت في الطريق اليه .... و اخبرني بالخبر
كم افتقدك يا دكتور
اللهم اجعل مثواه مع الصديقين والشهداء ببركة هذا الشهر ياكريم
عذرا بت قضيم واسف جدا للحديث في غير الموضوع ... الصورة اثارت اشجاني
رمضانك كريم .
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: ناصر احمد الامين)
|
ناصر ولا يهمك
البيت بيتك عادي خالص
--------------
فهمك ده يا دكين أنا بسميه (ثقافة الخضوع)
تخضع لكل شئ دون محاولة للاحتجاج والوقوف بحجة أن (الناس كلها كده)
يا دكين أنا لا أطالب برفاهية أنا أطالب بحقي كإنسان يؤدي ما عليه من واجبات، وطالما أني ادفع حق الكهرباء القاص لي ضهري، طالما أني أؤدي ما عليا من واجبات، فبالتالي من حقي أن أطالب بمقابل
متهيأ لي لو كل ناس الحلة اتفقوا وهاجوا واعترضوا وأخدوا موقف، كان الناس دي اهتمت فعلاً بإنسانيتنا وحلت مشكلة (سلك)
البغيظ أن المشكلة يا دكين كانت إهمال وتسيب، المفروض قبل الخريف، وقبل موسم الأمطار اللي هو معروف زمنه، كانوا أساساً عملوا شك أب كامل وشافوا الأعطال وأصلحوها، ده طبعاً في بلادي مجرد حلم بعيد المنال
المشكلة هم الآن عارفين وين الإشكال، وبينتظروا المطرة تنزل لكي يصلحوا المشكلة، يتعبوا ليه؟؟ مش يمكن المطرة ما تنزل يكونوا تعبوا على الفاضي!!!
أنا ما فاهمة هم شغالين وبياخدوا رواتبهم من عرقنا على أيه؟؟
ثم أن خدمة الطوارئ خلقت لأجل هذه الاتصالات والشكاوي
ثم مين قال أن في أماكن أولى من أماكن في العيش السليم؟؟؟
يعني انا بيتنا لازم يكون مستوصف لينعم بأبسط أبسط مقومات الحياة الإنسانية؟؟؟
تفتكر بيت الوالي مثلاً بيعاني من قطوعات الكهرباء أو هو أولى لأنه والي؟؟
بعدين أولياتك التي تشير إليها، هل لها صلة قرابة بتصنيع الطائرات السودانية يا دكين؟؟
أنا ما عايزة الكهرباء لأجل بدلة السر قدور فقط، أنا أطالب بالكهرباء لأتميز، ليكون هناك فرق بيني وبين الفأر.
لكي أنام قريرة العين وما يكون نومي خزاز حزاز خوقاً من الشمعة تسيح وتحرق الدنيا.
إني ذي كل العالمين أقوم اتسحر ذي الناس دون تخبط وكسير ووقيع
ده لو مطبخنا جوا البيت، تخيل بقى ناس مطبخهم مطرف مع المطرة والطين والضلام حالهم حيكون كيف؟؟؟
على نفس مستوى فهمك ده، المفروض أن لا احتج لبركة المياه في الشارع والباعوض المتنامي فيها، لأن البركة دي، بسبب الأمطار اللي كل سنة من قبل ما يولدوني بتعمل كده
وأن لا احتج لأن سيد اللحمة والخضار رفع الأسعار للضعف (فجأة) استغلالاً لرمضان، وأنه ليس هناك من رقيب، فالرقيب واقف يعاين لفساتين البنات، هل هي مع أو ضد المنظر العام
أن لا أحتج لما ناس النفايات يجوا بكل قوة عين أول الشهر ياخدوا المعلوم وبعدها وشك والضيف
يجب أن لا احتج لما أضطر أشرب طين من الماسورة، واحتج ليه؟؟؟ ما في موية صحة!!!!
وأن لا أحتج لما تعطل العربية وادفع فيها دم قلبي بسبب موية الأمطار، المطلعني اساساً من البيت شنو؟؟
كل الناس تعاني مما أعانيه، حاتفلسف ليه؟؟ اطلع الحوش ذي كل الناس، ليأكلني الباعوض، وليصيبني صوت الضفادع بالهستريا، ولا أشتكي بل لا أجرؤ على التعليق حتى، كي لا اوسم بال(متفلهمة) وال(متحنكشة) وال(جاية تعمل فيها مقدداها )ما من زمان الحال ياهو نفس الحال ما هو الجديد؟؟!!
بس على فكرة ،، ما (كل الناس) تعاني مما نعانيه،، في ناس،، وفي ناس
ومش مشكلتي مين أولى من مين؟؟ كما هي ليست مشكلتنا كشعب أن يكون أولى تصنيع طائرة أو القضاء على باعوضة، مشكلتي أنني طالما أؤدي ما عليا من واجبات، فلا بد أن أجد المقابل.
يا دكين..
اتفاق الناس على خطأ ، لا يعني صحة هذا الخطأ
وبالمناسبة
شارع السيد علي الميرغني لو فرضنا بيبدأ من (أبو جابرة) فحينتهي في الصبابي، خلااااااااااااااااص يا مهندس الطرق والمباني، قددتها يعني!!!
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: بت قضيم)
|
Quote: فهمك ده يا دكين أنا بسميه (ثقافة الخضوع)
تخضع لكل شئ دون محاولة للاحتجاج والوقوف بحجة أن (الناس كلها كده) |
دي اسمها ثقافة الواقع وعدم تبديد المال فيما لاطائل من ورائه.. تبديد فواتير تلفونكم في سماع اصوات ناس هي ذاتا الكهربا قاطعة في بيوتم..
الانسان حين يحتج يحتج لان هناك ثمة مايحتج راغبا في الوصول اليه..
انتي بتحتجي ترغبين في ماليس متاحا..
الشي الساكاهو ده ندرة..ماف..صعب يلقوهو ليكي ...
هنا الاحتجاج بتاعك ببقى مجرد تمنى على الله.. احتجاج على انك متخمة في بلد فقرانة..
احتجاج زول شايف انو مكانو ليس في هذا المكان (البؤس) زي ماقتي ... احتجاج منك على انك جيتي السودان في هذا الشهر الذكر..
احتجاج على انك هبط بكي ارض الحيوان هذه..
احتجاج ظاهره طلب اصلاح الحال وباطنة انا ليه بقيت سودانية ..
قد يكون كلامك ده صاح لو مثلا تناولتي جانب الموية وخدمات التشجير
دي فعلا مسالة فيها تقصير ومفروض تتقصا فيها رقاب..
| Quote: يا دكين أنا لا أطالب برفاهية أنا أطالب بحقي كإنسان يؤدي ما عليه من واجبات، وطالما أني ادفع حق الكهرباء القاص لي ضهري، طالما أني أؤدي ما عليا من واجبات، فبالتالي من حقي أن أطالب بمقابل |
واجبات شنو يا اخت؟؟
انتي متزوجة من الكهرباء؟؟
انتو بتدفعوا 100 الف عداد جمرة..
بتكونو شغالين في امان الله ..تقوم تقطع الكهرباء في تلتين الف جنيه مثلا لاسباب الظواهر الطبيعية (مطر-هبوب- برمجة)
يكون باقي ليكم 70 الف..اها لامن تجي الكهرباء بتبتدي من ال70 الباقية..
دفعتي مية الف بتصلك كهرباء بي مية الف يا ستي قضيم..
الليلة.. بكرة.. بعدو ..بعد بعدو ..المهم بتجيك بتجيك انشالله لي ورثتك..
لو كان الكلام ده زمان ايام الايجار الشهري كان ممكن نقول نحنا بندفع ايجار عن شي لاوجود له في فترة الايجار..
بس هسي انتي بتدفعي لي كمية وبتجيك الكمية..
تاني واجبات شنو وشنو القاصي ضهرك ده ..انتي حتتبلي على عداد ديقتال؟؟
| Quote: متهيأ لي لو كل ناس الحلة اتفقوا وهاجوا واعترضوا وأخدوا موقف، كان الناس دي اهتمت فعلاً بإنسانيتنا وحلت مشكلة (سلك) |
موقف شنو وحلة منو؟؟
والله لو اتفق جميع ناس الحلة على ان ينفعوك بشي قد كتبه حال السودان عليك ما نفعوك ..
الحلة لايمكن ان تتفق على انو تستمر الكهرباء بصورة منتظمة لان الامر اصلا ليس بيد الحلة، ولا بيد ادارة الكهرباء ولا بيد الريس ذاتو..
دي ظروف بلد ..
ماعندنا انتاج كهرباء..
كهرباء ماف..
"نو اليكترستي" ..الحنها ليك؟؟
ناس الحلة يتفقوا على شنو مثلا في حتة زي دي..
لايمكن الاتفاق على العدم يا بت الحلال..
يعني بالترجماني كده ..
بلد فيها مثلا انتاج بي ميتين كيلو واط..وفيها ميتين مليون حلة
كل حلة عايزة ُتمن كيلوواط..
نجيب من وين ميتين مليون تُمن كليو واط؟؟
ندق الواضة نمرق كهرباء..
كهرباء ماف؟؟ حاولي اتصالحي مع الحتة دي عشان مايقوم ليك فيوز في راسك ده..
ان من رحمة الله على العباد انهم لايتفقون
ولولا دفع الله الناس بعضهم ببعض لهدمت صوامع وبيع وصلوات..
Quote: البغيظ أن المشكلة يا دكين كانت إهمال وتسيب، المفروض قبل الخريف، وقبل موسم الأمطار اللي هو معروف زمنه، كانوا أساساً عملوا شك أب كامل وشافوا الأعطال وأصلحوها، ده طبعاً في بلادي مجرد حلم بعيد المنال
المشكلة هم الآن عارفين وين الإشكال، وبينتظروا المطرة تنزل لكي يصلحوا المشكلة، يتعبوا ليه؟؟ مش يمكن المطرة ما تنزل يكونوا تعبوا على الفاضي!!! |
بالمنسابة الكهرباء بقطعوها وكت المطرة عشان العمدان مبلبلة والاضة مبلبلة وممكن فلان داك يكون زاحف يجيب عيش تقوم كهربة العمود تنشف ريقو وريق اهلو بعديها..
وتجي فصيحة زيك تكورك في الجرلايد كتلتو الزول ..ماكان تقطعو الكهرباء انتو موش عارفين انو الواضة مبلبلة..
اها اسلم ليهم كوراك زولة ارملة
ولا كوراك زولة افتقدت ونسة السر قدور وقمصان ود البناء العجيبة وقصة ريماز؟؟
ـــــــــــــــ
باقي التفكيك بعد الفطور
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: عبدالوهاب علي الحاج)
|
| Quote: انتي متزوجة من الكهرباء؟؟ |
الغريبة منذ اكتشاف الكهرباء في اخريات القرن القبل الماضي
مافي كائن حي قال انو الكهرباء غير مهمة حتى الدواجن تحتاج الي الكهرباء
اللهم الا الخراف والاغنام وعينات من البقر الغبي ودكين بس القالوا ما مهمة
ومنو القاليك السلعة ما متوفرة والزولة دي بتطالب بالمافيش ؟
انا نفسي ساكن في نفس الـ Area الساكنة فيها كاتبة البوست مشينا واحتجينا وجبناهم صلحوا الاعطال وتاني ليوم الليلة ما قطعت هسه انا بكتب بكهربة الحكومة ومستمتع بيها جدا كمان ... | Quote: "نو اليكترستي" ..الحنها ليك؟؟ |
وبعدين انا ما حذرتك من التحدث بلغة الفرنجة قبل كدا في المنبر هنا
كدا غلط غلط يا مسكين مش كان تكتبها بالحروف العربية برضو ما بحلك مني .... قلت لي الحنها ليك اها كدا لحنتها يا تنقا هاهاهاهاهاها والله قسس
شوف مافي حاجة في لغة الفرنجة دي اسمها نو اليكترستي كدا حاااااف فاهم ولا لا النوريك بلحنوها كيف ...
تقول (نو اليكترستي كيرنت) كدا واتخيل الموسيقى شغالة لاغراض التلحين وكدا ... كيرنت دي يابطة معناتها تيار وبالحروف الافرنجية بكتبوها كدا NO Electricity Current فهمت يا وهم ؟
لكن برضو خليني احيي فيك اجتهادك ومحاولتك اللذيذة دي الانجليزي دا يا دكين بحر وارجوك لقدام حاول جلي حكاية الانجليزي دي بتاتا انا شايف احسن ليك !!!
لانو كدا بتفضح نفسك ومرة في البوست بتاع الالوان المائية شايفك كتبت ليك كلام غريب جاي تخم بيهو الناس دا شنو هسه دا حقن ولا كبسولات بتاخد بالعضل ولا بتمسحو بيهو 
عزيزي دكين انت لم تعد بأمان في هذا السايبر لذا ارعى بقيدك
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: عبدالوهاب علي الحاج)
|
مساء الخير للجميع
ونخص بالتحية الأخ عبد الوهاب
يا أخي
دكين فاهم كويس أهمية الكهرباء بالنسبة للإنسان الحديث
اعتقد انه فقط يعاني من حالة إحباط كالسواد الأعظم من شعب السودان، محبط لدرجة عدم الرغبة في الحديث أو التعليق حتى.
وبعدين ما يقدر، ما يقدر الغدة بتقوم عليه لو ما كاوه ليه زول هنا واللا شاكس ليه زول هناك
هذا لو صح الأمر أن اعلق بدل السيد دكين اللي من المنظور والمتوقع أنه حيجي يقلب البوست عاليه واطيه ، ويرد عليا رد لا في السما ولا في الأرض، ويرد عليك رد مستفز (كمشاركتك السابقة) وتجوطوا لي رسايلي اللي بجبر نفسي اكتبها عساني لا انفجر من الحزن على بلادي ، والضيق و(اليأس) من أن ينصلح الحال
أخي عبد الوهاب
تابعت فيما مضى بعض المشاكل بينك ودكين، ولو عايز نصيحتي يا أخي، دكين ده أفتح ليه كبري، وبدون الدخول في تفاصيل المشكل السابق بينك وبينه، قد يكفيك ويريح بالك أن تعرف، أنه ليست صداقتك فقط من رفضها الوغد دكين، أنا واحدة من الناس اللي مارس عليهم دكين الدغالة وتصدق، رفض صداقتي رفضاً باتاً
طبعاً هو حيدخل ويجوط الدنيا والله اعلم حيرفع ضغطي لأي درجة، أنا بس حبيت اريحك أن دكين ده ما قاصدك انت شخصياً، دكين ده زول مشوطن، مرة يحب الناس ،وكتير يتماسخ جنس مساخته معاك ومعاي.
ما في واحدة (عاقلة) تعترف أن فلان (ولو كان دكين) رفض صداقتها (يعني ام البرستيج اتبعتر) ، لكني لا اهتم حقيقة، وحبيت اريحك من متابعته وحرق دمك، الله يحرق دم الشيطان إن شاء الله.
الدنيا رمضان أخي، هون عليك، إنه مجرد مكان لفش الغبينة، تقوم تجيب ليك غبينة فوق الغبينة؟؟!!
Quote: Quote: Aclryic on cavas
دا شنو هسه دا حقن ولا كبسولات بتاخد بالعضل ولا بتمسحو بيهو
عزيزي دكين انت لم تعد بأمان في هذا السايبر لذا ارعى بقيدك |
أنا اعرف أن (الأكريلك) نوع من الدهان أو البوهيه أو الألوان حاجة كده يستعملوها ناس الفنون
وغير ذلك ما ادري عنه شيء
يا أخي
رمضانك كريم إن شاء الله
ووق المنقة
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: بت قضيم)
|
Quote: صباح الخير ياصديقتي ...
بؤس شعب السودان ماله من نهاية ... حقيقي يعني .. البؤس ده ياصديقتي هو في جيناتنا .. هو اكثر شي متاصل فينا .. حاجة كده وراثية او قولي خلقة الله زي لونا لا ابيض لا اسود لون الطين ... زي شعرنا المقاوم للجاذبية الارضية ومتجه دائما نحو الحي الذي لايموت .. زي لهجتنا وطريقة كلامنا المزعجة الخالية من اللطافة ... زي جونا وزي موقعنا الجغرافي ... ولكن للحق ياصديقة لو نظرنا للامر بنظرة اكثر تفاؤل واكثر عطف حانلقا بؤسنا ده سبب لي تميز كتير بيميزنا ... مثلا لو ماكنا بائسين كده كنا حانتميز بالطيبة والصبر الشديييييييد ده ؟؟؟ قبل فترة في واحدة من اجازاتي مشيت لي عزاء في قرية علي اطراف مدينة مدني ... تصوري ياصديقة ان احد الركاب وقف دفار المواصلات في السوق ونزل اشتري رغيف وسلطة ونحن كلنا منتظرنو ؟؟ ولما السواق قال ليهو مازحا مالك اتاخرت كده رد قال كنت بناغم في ود البشري ... انتو لاحقين شنو ؟؟ بعد فكرت في جملتو دي شوية اكتشفت فعلا انو مافي شي لاحقنو ... فالبيوت في القرية هي البيوت والناس ياهم الناس حتي الونسة ياها نفسها ومافي شي يستحق العجلة مافي شي بيتغير زي شارع بيتكم كده ...
وفي زيارة لي في قرية اخري سجنت ثلاث ايام لان الترعة فاضت وغرقت طريق العربات الوحيد وفي النهاية بعد مامسكتني حالة هيستيرية مرقوني بي تركتر وهم مستغربين في الجنا ده لاحق شنو ...
ثم ان لاصوات الضفادع والباعوض لنغم جميل ... حصل اتمعنتي سمفونية الضفادع ؟؟ صدقيني تحتوي علي موسيقي داخلية جميلة انت بس كدي ابعدي الوساوس والغضب الماسكك ده وصفي روحك شوفي كان ماعجبتك ... اما البعوض فحك لدغته جميل ولذيذ خاصة لما تكون في الرقبة تحت الاضان .. وبعدين الكهربا ما اصلا بتقطع مع الامطار ... يعني معقول تصب مطرة وما يقع عمود عمودين ؟؟ الغريبة انت لييه ما احتجيتي علي كونهم ينقلو الكهربا بالعمدان زي غدا الفراش ؟؟؟ مالها واطات الله دي ؟؟ ماكل شعوب الناس بتنقل الكهربا بالارض اشمعني نحن يعني ؟؟
ثم اني اعتب عليك ياصديقتي ... اسي كان سمعتي كلامي ونزلتي اجازتك في عيد الضحية مالو ؟؟؟ تستمتعي بي جو الشتاء الحميم ورائحة الشية والشربوت وكنا كمان ممكن نتلاقي ... عليك الله في ذمتك في زول بيتكوي بي نار الغربة السنة كلها ويقوم يمشي يتكوي بي نار رمضان في السودان ؟؟؟ ماعايز اقول ليك تستاهلي لكن السودان الله خلقو كده مابيتقعد في الصيف واطراف الخريف
ياصديقتي انا حذين من اجلك .. وحذين من اجل سلك الكهرباء خاصتكم .. ماذنبه حتي يتحمل جريرة قطوعات الكهرباء ولعناتك ... ماذنبه حتي يكون عزر موظف هيئة الكهرباء عديم الحيلة ؟؟
وطبعا كلامي القتو ليك فوق ده كلو مابيمنعني استمتع ايما استمتاع بي برنامج اغاني واغاني وانا قاعد في الغرفة المجهزة بكل شيء انعم بالاير كوندشن ولا اخشي قطوعات مفاجئة ولا امطار ولا هم يحزنون ... واتخير من السهرات امتعها سهرة حمد الريح او البلابل ... عباطة المزيع ضياء الدين وسماحة رشا ولطافة هادية طلسم ... كلام السر قدور الكتير .. وقميص عاصم البنا المشع ... وسماحة افراح وحواجب افراح وفستان افراح ... استمتع بكل ذلك بضمير مستريح وهم بااااااااااااااارد
لك الله ياصديقتي ثبت الله ايمانكم في قلوبكم ... وكهربتكم في اسلاكها وقصر الله اجازتكم وعوضكم خيرا منها اللهم آمين اللهم آمين
|
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: بت قضيم)
|
اليك اجابات اسئلتك غريبة الطرح..
| Quote: لماذا أساساً يكون انتاج الكهرباء في بلادي بالناقص؟؟ما عندنا قروش؟؟ |
ماعندنا.
| Quote: بلدنا فقر لهذه الدرجة؟؟ |
فقرانة.
| Quote: هذه البلد التي بعون الله (صنعت طاااااااااااائرة) ليس لديها إمكانية توفير كهرباء؟؟ |
انتي عارفة انو قصة الطيارة دي خمة ساي فما تحتجي بيها..
| Quote: إذن لماذا التوسع في مدينة الخرطوم والاستمرار في بيع أراضيها بنهب مستمر؟؟؟ |
لماذا؟
مابقدرو لانو ده ما منطق..
| Quote: بعدين يا دكين، لو كان الأمر كما تقول، كلللللللل الناس تعاني من مشكلة الكهرباء، كان أوكي، نستحمل طالما أن مقياس الإنسانية عندنا واحد، لكن المشكل يا عزيزي، أننا لا نتساوى في مقياس الإنسانية الذي يتعاملون وفقه.. |
لامن تبقى تبع الجماعة بتتساوي في الانسانية..
Quote: وبعدين أنا قلت ليك
المشكلة كانت (تسيب واهمال) لأجل سلك مقطوع، وهم قالوا كده واقروا بالخلل، انت ايش مشكلتك في فهم هذه النقطة؟؟ |
انا ماعندي مشكلة في فهم النقطة ..انتي العندك مشكلة في فهم النقطة وبرهان ذلك انتي الكتبتي البوست .
| Quote: أنت عارف المشكلة وين؟؟!! |
اعتقد حسب كلامك وكلام الكهربجي في السلك المقطوع.
| Quote: المشكلة ليست كهرباء الدولة فقط، المشكلة كهربة راسك زاتها. |
لوكنتا عارف دي اجابتك وانتي بتتريقي كنتا شطبتا الاجابة الفوق مباشرة
Quote: طيب قبل أن (تفاجأهم الأمطار) و(يضحوا بالأرواح) اليس من الأولى يعني، أن يظبطوا حال اسلاكهم؟؟
يعني ما في حل؟؟؟ |
طيب لو ظبتو السلك العمود المبلبل ينشفوهو كيف؟؟
| Quote: يعني مدن الله والعالمين التي تنزل الأمطار فيها على مدار السنة، بقفلوا الفيش برضو يا مخ؟؟ |
ماعدا اليمن والجزائر وبعض المدن الحضرية التعبانة ومدن عينيك فان كيبلات الكهرباء ارضية..
| |
|
|
|
|
|
|
|
|
|
Re: موية موية .... موية بارد...(أما لهذا البؤس من نهاية)؟؟؟!!! (Re: بت قضيم)
|
| Quote: ونخص بالتحية الأخ عبد الوهاب |
الله يحيي اصلك وشكرا ليك من قبل ومن بعد
وأعتذر ليك عن الخرمجة الحصلت دي | Quote: دكين فاهم كويس أهمية الكهرباء بالنسبة للإنسان الحديث |
يعني ياست انا اقرا الكاتبو دكين والمفهوم لي ولا اقعد عشان اعرف ما وراء السطور الا اجيب لي وداعية اسفيرية توضح مقاصدو ... افتكر الكلام دا داير منك مراجعة !!! | Quote: اللي من المنظور والمتوقع أنه حيجي يقلب البوست عاليه واطيه |
| Quote: ولو عايز نصيحتي يا أخي، دكين ده أفتح ليه كبري، |
لا اعتقد ... الكلام دا كان زمان قبل ان اتولاهو بعنايتي ودكين سأظل الاحقو حتى يثبت لي حسن سيرو وصلاحية سلوكو وانو يصلح للتعاطي مع البني ادمين ... ويكون مسئول عن كل كلمة يكتبها ... | Quote: ليست صداقتك فقط من رفضها الوغد دكين، |
للاسف يا ست انا لم اطلب صداقته وعموما انا لا اطلب صداقة اي انسان غير متأكد من اخلاقو وحسن تعاملو مع الاخرين ... وهو للأسف حاول يصور للناس بتفاهته المعتادة باني فعلت ... بل بالعكس انا الرفضت التعامل معه ... ولم اكن حتى اعلم من هو ؟ باسمه الحقيقي ولم يلفت نظري باسمه المعروف هنا في المنبر يعني كان بالنسبة لي مجرد نكرة وما زال .... اما قصة الاكريليك لو لا حظتي هو كاتب كلمتين انجليزيات فقط والاتنين فيهم اسبلينق ميستيك انا نبهتو قبل كدا ما يحاول يكتب بالانجليزي تاني وهو مصر داير يخم الناس ويعمل فيها مثقف وناقش ... انا حتى بعد ما لفت نظري ببوستاتو المهببة دي رجعت لكتابتو بالعربي لقيتها غاية في الهباب .. هسه شوفي هنا كاتب شنو افتكر منتهى الهباب ولا انت رأيك شنو ؟
الجملة في الاقتباس اعلاه تكتب كالتالي :
Acrylic on Canvas
وانا اتدخلت في البوست دا بعد ما قريت الجملة دي ووجعتني جدا | Quote: باقي التفكيك بعد الفطور |
حقيقة خفت يقوم يعتقد بانو بالطريقة هو بيفكك وتطلع في راسو ويشيل مفكاتو ويقوم يفك ليهو حاجة في البيت يضر الناس .. بس للسبب دا
وشكرا لصبرك على
وآسف للخرمجة مرة تانية
| |
|
|
|
|
|
|
| |
بت قضيم
ناصر احمد الامين
عبدالوهاب علي الحاج
وجن
فيس بوك
تويتر
انستقرام
يوتيوب
بنتيريست