Post: #3
Title: Re: أمسية رمضانية سودانية في الدوحة
Author: عزام حسن فرح
Date: 08-27-2009, 10:19 AM
Parent: #2
هارون دِياب ...
كيفك يا حبيب يا غالي ...
عِندي تعليق على الأُمسِية وتعليقي ده ما قاصدك بيهو
إنت ... قاصِد كُل الأُمسيات القامت والحتقوم وكُل
الصُبحِيات والظُهرِيات والعصرِيات ... ما لازِم شقي مِتلي
يِقول المابَيين يِقولو الناس ... أها يا ناس البندر
إتحملو ... النقول ليكُم ....
في التبادي الإسم حقو يِكون كدي :
أمسية رمضانية سودانية - صفَوِية - في الدوحة
الدعَوة للأمسية دي كانت حسب شنو :
- القرب والبعد مِن فلان وفلان وفلان.
- قرب السكن وبُعدِهِ مِن مكان الأمسية.
- المُستوى التعليمي.
- الوجاهة البتليق بِالظهور على قناة الجزيرة.
- الماهية.
- الطول.
- العرض.
- الخِلقه.
- تعاطي التُنباك والمكروه عمدًا.
شنو ... شنو؟
العزايم البِتُقام في البِيوت ، عاد الزول مخَير فيها ، عِلا
وكتين تلصقو فوقا السودانِية تبقى الدعوة تاخُد شكل لايق ...
ما يِحِس الفقوس إنو فقوس على الأقل في شهر رمضان على سبيل
التغيير وكِده ياخ ... وأهو كُلو بِإحسانو ... يا يا ... يا خِيار
في الإنتِخابات الأخيرة بِتاعت الجالِية أكانت بِتصلنا رسائِل
بِالتجمع والإنفِضاض ... وفي مُناسبات سودانِية كتيرة بِتكون
الدعَوة بطريقة شخصِية ، علاقات عامة يعني ... عاد دي حالة
بِتاعت ناس دايرين عِلاقاتُم تمشي لِقِدام ...
زي ما قُلت ليك يا هارون دِياب الكلام الفوق ده ما معني بيك ...
ده كلام عام لشي بِيحصل كُل يوم كُل إسبوع كُل شهر ... وأنا ما بقبلو
علشان كِده ده طرفي مِن أي حاجة بِتعملا ما تُسمى بِالجالِية السودانِية
بِقطر أو ما عُرِف بِبورداب قطر ومُنبثقاتِها ... وقراري ده ما عِندو
عِلاقة بِالأشخاص وعِلاقاتي معاهُم ...
|
Post: #4
Title: Re: أمسية رمضانية سودانية في الدوحة
Author: haroon diyab
Date: 08-27-2009, 11:13 AM
Parent: #3
عزام ياحبيب
اشواق كتييييييييرة
والله العظيم ياعزام
اكنك كنت قاعد معاي في البيت
امبارح.....
نفس الرائ ونفس الكلام ونفس اللغة
من اخوي الصغير مدثر دياب.....
قال شنو.....؟
انتخابات المريخ ....تنادونا
انتخابات الجالية....تنادونا
كورة فريقكم .....تنادونا
اها امبارح ليه ماعزمتونا.....؟
ومامفروض تعملوها باسم الجالية السودانية
واهم حاجة قال : عاملين فيها صفوة.
المهم....
انا متأكد انك ماقاصدني بالكلام
ولو قاصدني ...وحاتك عندك الف حق .
انت ماالرقم الساهل البتجاوزوه.....
لكن اعتقد بان من قام بهذه الليلة
هو الاخ / معاوية الزبير ( الجزيرة نت)
وهو من استقدم العم سيف من الخرطوم هو وابنته
واسكنهم معه في بيته وتابع علاجه حتي النهاية
وعندما حانت لحظة السفر قرر اقامة افطار للرجل
وقدم الدعوة لمن يعرفه من البورداب والدوحاب .
عليه.....
فطورنا عندكـ متين ياعمكـ.....؟
|
Post: #5
Title: Re: أمسية رمضانية سودانية في الدوحة
Author: عبد الحكيم طه علي
Date: 08-27-2009, 01:00 PM
Parent: #4
Quote: لكن اعتقد بان من قام بهذه الليلة
هو الاخ / معاوية الزبير ( الجزيرة نت)
|
حتى أنت يا معاوية؟ نحن في مكتب واحد- شكرا أخي هارون على المعلومة وتحياتي لك.
|
|