مواطنون يُعدِّلون أوضاعاً هندسية خاطئة بالطُرُق و لسان حالهم يقول (بالأزمة نفِك الأزمة)

* الأزمة بالدارجة السودانية أداة حفر من أنواع المحافير ذات طرفين حادين طويلين من الحديد الصلب
هكذا كان لسان حالهم يقول و هم قد ملُّوا و مللنا معهم أخطاء الطرق الهندسية اللانهائية المُسبِّبة لظاهرةالإحتباس الحراري (أقصد المائي) و الصورة المرفقة تحكي ، و كل خريف نعاني من أخطاء لا معدودة في طرق حديثة الرصف للأسف و تُكتب مئات المقالات بما فيها من التقريعات و كشف الحال ما يدعو غفير الشون الهندسية للاستقالة فما بالك بوزيرها!!!
و تتكرّر ذات المأساة كل عام ولكأن شعارهم المرفوع (لا تحلموا بعالم سعيد فخلف كل سفلتة جديدة حفرةً تميد) الخريف النعِمة لماذا تُصِرُّون على جعله نقمةً يا هؤلاء!!!!؟
هل يقتصر دور المهندسون و المخططون و المُنفِّذون فقط على تلوين الخرصانة باللون الأسود بعطنها في الزفت و كشحها على قارعة الطرق في شكل ردميات هندسية!!!؟
إذاً دعونا نساعدكم فكُلُّنا نتقن هذا العمل
أين المُتخصِّصون من خريجي هندسة المعمار و الطرق و المساحة وهل تقاضوا أجرتهم كاملة للتنفيذ!!؟ أولم يسمعوا بأن من أخذ الأجرة حاسبه الله بالعمل!!!!؟
فإن كان هذا هو حال العاصمة و شوارعها الرئيسية فما بال الأقاليم و شوارعنا الداخلية (شوارع الغلابة الغُبُش)

و في ظل كل هذه المأساة تذكر إنو تخلِّيك سوداني

تسابق محموم للإعلان في الطُرُق ووضع الإعلانات في شكل لوحات كبيرة تفرض وجودها فرضاً على المواطن الغلبان و ريعها يذهب للمحليات و شركات الإعلان و المواطن اللي من أجله تم وضع الإعلان إنشاء الله يحبى في الشارع دة المهم لوحاتنا الإعلانية تقيف و تظهر و تظل باسقة شامخة.
علماً بأن عدد كبير من اللوحات الإعلانية الضخمة أصبحت تُشكِّل خطراً على حياة المواطنين لتساقط بعضها كما الكرتون بسسب رياح الخريف و الصحف تحكي ذلك و بعدد الرأي العام صباح اليوم صورة للافتة كبيرة سقطت أرضاً كواحدة من مئات اللافتات (الساقطة).
إذاً الخلاصة:
1- طرق غير مدروسة هندسياً رُبمّا صُنعت بمواصفات تتناسب مع الصيف السوداني فقط بعد أن أسقطوا الخريف من حساباتهم تماماً.
2- لافتات إعلانية ضخمة بمواصفات لم تراعى فيها أدنى مُقوِّمات أمن من يمر من تحتها من بشر أو سيّارات.
فلك الله يا (سوداني)

الله عليك

ولسان حال الشؤون الهندسية ممدود نحونا باللا مبالاة

والله لو كان هناك مسؤول واحد عندو ضمير او حياء لتقدم باستقالته

ولو كانت هناك حكومة لا مجموعة سماسرة لتقدمت الان التشريعيات بطلب وتحقيق مستعجل

وتحميل كل مسؤول شارك في هذا الخلل للمحاكمة العاجلة الخرطوم تغرق ودون مصارف

او مسؤول يقول للناس كيف حالكم قاتل الله السماسرة .


أمطار في الخرطوم ... وين الصور يابورداب الخرطووووووم !!! ؟؟؟

...............................................................حجر.

صديقي علاء صباحك خير وبركه ,,

علاء ... هل كل سنة سيفاجئنا الخريف ؟

صباحك خير يا مُسلِّمي
والله يجازي اللي كان سبب تعاسة كثيرين في مثل هذه الصباحات الجميلة من فوق بس
تحت ما تعاين

هلا يا علاء
وفعلا مخجلة هي هذه الصورة والخلل الهندسي مهما تم تغطيته حتما سيظهر ويبان زيو زي دفاع اي فريق كورة مكعكع وبتخش فيهو قوون من اول مطرة كما يحصل في طرقنا..
الطريق بكل انواعها كبنية اساسسية مهمة لضبط الشغل فيها والجودة الهندسية ضروري تتشات الاشياء الاتية..
1- التصميم( وده في بطنو مفروض يكون مهتم بكل الجزئيات من طبيعة تربة ومسارات ومواد وارتفاعات
وتصريف( التصريف ده بالذات حنجي ليهو لقدام)
2- التنفيذ
ودي دايرة اولا شركة موهلة وقادرة ولها من الكفات الهندسية والفنية والمعدات والخبرة ما يتيح لها توضيب الطريق ده توضيب مية مية..
3- الاشراف..
ودي اهم جهة كونها مطالبة بصرامة هندسية وفنية من الاطمئنان علي تنفبذ الطريق ده بكل المواصفات ودون تساهل او تهاون (استشاري مركب وش كرتون)..
4-الصيانة... ودي وحدة مهم تواجدها في اي جهة حكومية مسئوليتها ادارة الطرق والاهتمام بها...
الاشياء الفووق دي اي خلل في اي واحدة منها ستظهر المشكلة مهما تمت من غتغتة ودسدسة للخطاء..
...................
شي تاني واساسي في السودان ويمكن لغياب الاستراتجية وقد تكون الامكانيات ايضا الطرق في الغالب
ما بكون مهتم بالتصريف الموازي وما بتعمل حساب للخدمة المرافقة للطريق (التصريف) والسسسوك اووي
والقيلي تراب والاشياء التي هي قادر ة علي امتصاص اي مطرة في دقائق ...
اذن طرقنا في تصميمها الواضح انها ما خات في حساباتها حكاية التصريف لمياه الامطار
قد تكون هندسيا وتصميما توجد ميلانان تقوم بدفر الموية الي اطراف الطريق ولكن تربتنا الطينينة
تربة مفضوحة وما بتسرب الماء باخوي واخوك.. لذا بتحصل ذي البلاوي دي
وتحياتي ورمضان كريم

مُصيبتنا يا كيكي إنو نوعك دة طلع برّة و قعّدوا لينا محلُّو طيش فصلو لأنو واسطتو قوِّيّة و الطريق دة إنشاء الله يلِفُّوا يودي بيتم
زول بسألوا ماف
عترات الطريق كترت يا عُمر فأين أنت من عُمر
قبل فترة يا كيكي نازل من كبري المنشية و لشهور عددا نهاية الكبري المحاذية لمقابر بري على يدك اليمين و إنت ماش تجاه الخرطوم كانت في حفرة عبارة عن هُوّة قدر لستك العربية في قطرها لكنها عميقة ، سبّبت كم حادث و أي عربية جات ماشة فوقة و صاحبها كان ما عارف الحفرة و لِستِكو إتلحس جُوّاها أُصيبت عربيتو بخلل كبير وهي حفرة تحتاج لنظارة تعمل بتقنية الأشعة فوق البنفسجية شان تشوفة بالليل لأنو الكبري ظلام دامس لا يُضاء إلا لمرور مسئول كبير و من يوم الإفتتاح الجماعة قالوا خلاص بعد كدة دة طرفنا منو نحن المسئولين سلّمناهو ليكم يا مواطنين إنتو أصحابو و ما نسوا يطفوا نورم وراهم و الطفية الياها عليك أمان الله.
جيت قبل فترة ماري يويمن وراء بعض ألقى بعد الحفرة بمسافة عربية واقفة و مشغِّل إشارات التنبيه و العربيتين كانت إصاباتم بليغة من ذات الحفرة
لذلك أوصيك و بية المغتربين لمن تجوا أول أيام ما تسوقوا في بلدنا دي سااااااااااي كدة لازم تستعينوا بخبير أم الحفر تخصص الخرطوم
نفس الكبري من ناحية الجريف أصبح مهتريء تماماً و شبه زالت سفلتته في المنطقة القصاد كماين الطوب لدرجة إنك تتمنى لو كان ردمية ما ظلط ، ما عارف الشركات البيتعاقدو معاها دي من وين و مهندسوها قارين شنو.
الحفرة عندنا في الشارع لو ما تعتّقت و عملت لنفسها تأريخ و توثيق و تسبّبت في تغتيس حجر كم عربية و يمكن رقبة ما بلتفتو ليهو
شفتة عزة الحفرة هنا عندنا كيف يا كيكي!!!؟
تقول لي حفر برّة !!!؟
و حُفرتنا ولا آباركم

حجر
بل قاتل الله الواسطة و الحِسبة و تعيين الفواخير الفاضية لأنها تخص أو تهم أسماء رنّانة
ياخ عايز تعيِّن بالواسطة عيّن لكن الزول البشتغل للمواطن ما يكون طيش الفصل
أعملوا زي أخوانا في بعض دول الخليج حيث من يفكر و ينفِّذ غير من يُوقِّع
شيلو القَشْرة و أدونا القِشْرة

علاء كيفنك .. ياخي يكون جميل لو كل يوم جبت ليك صورة ومصحوبة بموضوع مثل هذا البوست الهادف ..
وده هو الشغل الصحفي النضيف .. "للهواة طبعآ"

غايتو يا علاء لو كنت ساكن هنا
تبقى معتر فعلا .. فى مروى بيتكم برضو
كان الزول دخل تانى ما بقدر يمرق منو
انتو بتجيبوا المحلات دى من وين تسكنوا فيها













ــــــــــــــــ
مش قالوا المعتر بيلاقى العضم فى الفشفاش

Quote: بل قاتل الله الواسطة و الحِسبة و تعيين الفواخير الفاضية لأنها تخص أو تهم أسماء رنّانة ياخ عايز تعيِّن بالواسطة عيّن لكن الزول البشتغل للمواطن ما يكون طيش الفصل

علاء الدين

دا الكلام الكنا بنحارب فيهو من زمان !

الفساد بكل أنواعه ! الفساد الفساد الفساد !


لكن آي واحد يقول حاربو الفساد طوالي يعملوا ليك تجمع والا شيوعي !

يعني وطني غيور على وطنو دي أصلو ما في !

والطرق المرصوفه في الشوارع دي كلها إتعملت في العهد دا ! في الولايه دي بواسطة الشركات دي !

المجاري والمصارف المائية لها ميزانية من قبل الولية وحكومتها فأين تمشي وتسرح !

إنه الفساد الفساد الفساد !

لا مسؤول ولا حساب ولا يحزنون !

حســبنا الله ونعم الوكيل -

الله بيننا وعمر )


الناس الصباح دا فرحانه بي الجو لكن عليك الله يا علاء تعال بعد يومين جيب صور تانيه لنفس المواقع !

والحمد لله الصور ما فيها ريحه ! والا كان مافي واحد نزل صوره هنا من البلد ديك !


ولمن يتردم ليكم الضبان بالنهار والبعوض بالليل والقعونج !

والملاريا البتفتك ديك تجي راجعه الخرطوم والكينين والراجمات تشتغل !



كفاك


بالمناسبة ( كفاك ) دي تنفع حملة لوقف الفساد كفاكـ




هشام

( التعديل عشان لاحق لي بوست قدام تاني ) !!

هِشام
سلامات و رمضانك كريم
كُلللللللنا ضد الفساد و المُفسدين
و كل ما تقع عليه عينا أو تسمعو أضانا و نكون متأكِّدين منو بنتلكم بوضوح و ما بندس حاجة
ومافي زول ممكن يجي يقول ليك إنت تصنيفك كذا أو كذا لمجرد إدانة حادثة فساد أو خطأ دولة أو مسئول حكومي يكون حقيقي وواقعي إلا ويكون دة زول سبهلل ساي
نحن مع الصاح و بنقول دة صاح
و ضد الخطأ و بنقول دة خطأ
لا نبخس الناس أشياءهم و إن أحسنوا نقول لهم أحسنتم
ولسنا بشياطين خُرس نتعامى عن الباطل أو ننحني لعاصفة و إن كانت ريحاً صرصر

رمضان كريم يا علاء ..
تصوم وتفطر على خير ..

حسب معرفتنا أن التخطيط والتصريف دا كان في الخرطوم زمان وفي قلبها فقط ..
لكن مع التوسع الحاصل وزيادة الرقعة السكانية لم يوازيها أي نوع من الخدمات وخصوصاً الصرف الصحي والمصارف لمياه الأمطار ..
كل سنة بيحفروا ليهم خيران كده وبعد فتره يرجع ما أخرجوه منها ..
إذا كنا نتحدث عن الخرطوم فقط فدي محتاجة لعشرات السنين حتى ينصلح حالها ..
أما باقي ( دول ) السودان فدي ليها الله بس

يا صاحب بالميت كده أستمتعوا بالمطر دا طالما إنو الدنيا صيام ونهارنا نار وكذلك الأسعار ..

Quote: يا صاحب بالميت كده أستمتعوا بالمطر دا طالما إنو الدنيا صيام ونهارنا نار وكذلك الأسعار ..

هِشام
معتصم سلامات يا جميل
واللهِ كلامك صاح
عارِف قبل أيام مشيت القلقالة و ما بتتخيل وجدتها عاملة كيف
بكون حكو ليك
عبارة عن ملطم كبير و لك أن تتخيل
العربية إلا وقّفناها جمب الجزارة و خواضة للركب

دُنّانتي

Quote: مش قالوا المعتر بيلاقى العضم فى الفشفاش

لا و إنتي الصادقة
المعتّر التطلعي ليهو إنتي في بوستيهو

عارفة يا دُنّانة
دة حالتو منطقة درجة أولى تخيّلي!!!!
يا ربي حال الدرجة تالتة شنو!!!؟
ليهم الله

Quote: فى مروى بيتكم برضو كان الزول دخل تانى ما بقدر يمرق منو انتو بتجيبوا المحلات دى من وين تسكنوا فيها

والله يا دينا غايتو.. اصلو الواحد ما بيطلع من مداخلاتك ساي .. لازم يحصد ليهو ابتسامة ويمرق ..

ياعلاء إنت غايتو دقست وجيت شنفت بيتكم في مروي وجبتها مقنطرة لناس دينا ديل ..

طبعآ يا علاء هناك المطرة تصب والواطـ ـة تشرب وما تفضل نقطة موية ..