في أمر شيل الإبريق ... (طواقي و غيرها )

في أمر الإبريق و شيله...


الإبريقً هو الإناء ذو القدوم وله أضان يحمل بها يُصب منه الماء للوضوء أو الإغتسال و اشتهر بحيازته النُساك و الصالحين و اولياء الله
ولشيل الإبريق طقوس و أخبار..
فشيل الإبريق لغةً هو حمله .. ويُشال الإبريق للكبار سنا و مقاما و علية القوم و أهل الله العارفين
أما اصطلاحا فشيل الإبريق تفيد التبعية و الإنقياد و عند بعض أهل اللغة تفيد ما يشبه كسير التلج - وما هو بذلك
و ينسب الفضل في استخدامه على النحو الإصطلاحي لشيخنا خليل المقيم نواحي أمارة قطر

قال الزلعلعي في تفسيره يُحمل إبريق المرء لثلاث : غرض أو مرض أو تقِيّة
و عارضه عليها تلميذه ابن مسموع فقال بل هن نكاية أو هواية أو بلِيّة
وجاء في شرح الرضاض لتصانيف الزلعلعي
أن شيل الإبريق لغرض عندما يكون صاحب الإبريق في حال خلاف او تضاد مع أحدهم و يكون لحامل الإبريق قديم خلاف أو موجدة على هذا الأحدهم
فيجد حينها فرصته و يأتي مسرعا حاملا إبريق صاحبه مُناصرا إياه و مُطاعنا الآخر من وراء حجاب مُتجنبا المواجهة الصريحة مفضلا الإنزواء خلف إبريق صاحبه

وأما حمله لمرض فهذا يكون عند بعض ضِعاف القلوب خِفاف العقول بهم شيئ من عجز عن التعبير أو اتخاذ موقف ولا يحسنون العيش مستقلين
لا يجدون راحتهم وسلواهم إلاّ في حمل إبريق أحد او جماعة و ينتظمون في ركابه إن احسن احسنوا وإن اساء اساؤوا يعادون أعداءه و ينادمون ندماءه

أما التقية فعادة تكون عند اشتهار صاحب الإبريق بالسلاطة و الشر و الأذى , فيتسابق الشيالة لحمل إبريقه اتقاءً لشرّه
و هؤلاء يكلِفون صاحب الإبريق ما لايطيقه إذ يداومون على حمل إبريقه و مدحه و الإشادة به و باخلاقه و ذكائه بمناسبة أو بدون
مما يضطره إلى لعب الدور و ارتداء الجلباب مما يؤدي لتهبيله في العادة

و يُشال إبريق المرأة كما الرجل و يقال مشيول إبريقها و مشيول إبريقه
و المرأة تشيل الإبريق أيضا كما الرجل و يقال شايلة إبريق و شايل إبريق
وتُجمع على شيالين أو شيّالة وسمتهم العرب قديما بالطمبارة

و يختلف شيل الإبريق عن كسير التلج في معناه و مبناه رغم التباس الأمر على جل المحدثين


هذا ما كان من أمر الإبريق وحمله ..
و الله أعلم ...

إنت صايم السنة دي ولا شنو؟

هل تريد أمثلة يا صاحب الغار؟ نحمل فيها إبريقك ونقيك فيها شر " شيل وش القباحّة"؟
__
خيرُ حملةِ الأباريقِ خيرُهم لنفسه، فلا خير في حاملِ إبريقٍ ليس له ضغينة، أو تارٍ بايِتْ..

Quote: خيرُ حملةِ الأباريقِ خيرُهم لنفسه،

اللهم لا تجعلنا من حملة الاباريق لود الصايم
ح يقدنا ويسيح ركبنا في مشاويره بتاعة البولندا (او كما قال متوكل توم)

يا كيكي!
لو حملت إبريقٍ لود الصائم، عليك بحمل "جركانة" سِعة أربعة جالون ويستحسّن حمل "جوزٍ"، لأنه كثير التجوالِ، كثير التبوال ويُمحِق الماء عند الإغتسال..
___
اللهم لا تحملنا إبريق من لا يخافك ولا يرحمنا..

ودالبشرى
هذا ما كان من أمر شيل الإبريق، فمابال (طواقي وغيرها)؟
ــــــ
تصوم وتفطر على خير

Quote: ودالبشرى هذا ما كان من أمر شيل الإبريق، فمابال (طواقي وغيرها)؟

جابت ليها اباريق !!!

رمضان كريم حبيبنا ود البشري ,,

ود البشرى ...والله حد الدهشة ..
تعرف هناك انواع للاباريق ..
فاكتر واحد في ذاكرتي ..بتاع الفخار ..بني اللون وشكلوا كيف كدا ما عارفة ..
وفي واحد بتاع حديد وعندوا (قدوم مسنن )قدوم دي كويسة ؟..
في تاني بتاعات ابلاستيك والوانها جاهرة ..
بالمناسبة كل ابريق عندو فئة محددة باوصاف محددة بتستعملوا ..
لكم محبتي ..

ودالبشرى ،

من تقصد بكلامك هذا ؟ أبِن أفصِح ..
إن لم تفعل فإنك من حملة الأباريق ..
وسيرتد عليك سحرك
وتُصنّف من حملة الاباريق - وهذا ما لا نريده لك -








(لامؤاخذة) الابريق بيشيلوه عند قطع الجُمار وكده ...

يا شخينا ..


رمضان كريم ..

Quote: الزلعلعي في تفسيره يُحمل إبريق المرء لثلاث : غرض أو مرض أو تقِيّة

واني اري اني شيخك الزلعلعي لم ياحالف الصواب تفسير حمل الابريق ..
(( بدليل حمل العيال للاباريق في المناسبات كالسميات والطهور والعزائم الدكاكينيه - لاهو بمرض ولا غرض ولاتقيه ))

لكن اصاب واجاد تلميذه ابن مسموع في تفسير حمل الابريق

Quote: و عارضه عليها تلميذه ابن مسموع فقال بل هن نكاية أو هواية أو بلِيّة

اححححححححح
تصوم تفطر علي خير ..





زي الموضوع ينفع في السودان .. بعد صلاة الضحي ..

Quote: و عارضه عليها تلميذه ابن مسموع فقال بل هن نكاية أو هواية أو بلِيّة

وماكان من أمر التلميذ ؟

فقد عرفنا مقصد الشيخ بتأويلاته تلك

ما أكثر حملة الأباريق في هذا الزمان!

وما أكثرهم من يحتاجونه

شيل الإبريق عادة سودانية لها جذورها العميقة بما يجعل أمر
الإحتفاء بها متداولا جيلا بعد جيل رغم انف مبشري الزمن الاغبر
الذين يستميتون لدحر ودثر تراثنا العريق وتصوير عاداتناو تقاليدنا
العريقة علي انها أمنا الغول تماما كما يصوره المدعو ود البشري اعلاه
شيلوا أباريقكم وعلى مسؤوليتي .

طلحة .. دا أبريقكـ مع البوالين؟

وقد افرد الرضاض باباً لمعارضة ابن مسموع في شرح التصانيف جاء فيه ذكر النكاية و الهواية و التقية
قال في النكاية هي اشبه بشيلة الغرض إلاّ أنها اخف حدة و أقل مغسة فحامل الإبريق في هذه الحال لا يحمل موجدة أو حقدا كصاحب الغرض
بل قد يكون في الأمر مزاح أو مداعبة ثقلت او خفت لا ضير – لكنها تخلو من الغرض
أما عن الهواية فهي أقرب لحال الشايل عن مرض إلاّ أنها ليست مرضا ولا تنطبق صفات الضعف و الخفة و العجز على الشيالة
اما البلية فلها وجه آخر لا يستحب ذكره في الشهر الكريم

شيل الإبريق في عمومه غير محمود وكانت العرب تراه من النقائص ولا يفعله الرجل منهم إلاّ مضطراً و يتجنب الجهر به ما أمكن
فهو مذمة و منقصة و إن بدا خلاف ذلك
ولهم فيه نظم و حكم منها قولهم إياك و شيل إبريق الشايل
أي ان تكون ضنبا لضنب
و نسبت للماطري أبيات قال فيها:
تجنب الإبريق ما أمكنا **** مشيولا لك أو شايلا
فأي عار لو تدر يا فتى **** حال أنّك للإبريق حاملا

وذكر عن ابن روان قاضي الشام انه ما صعد منبرا او عقد قرانا او أتم بيعةً إلاّ وختم دعاؤه بسؤال المولى عز وجل أن يجعله ممن تُحمل اباريقهم لا من يحملون
وكانت المراة إذا دعت لولدها تسال الله ان يبعد عنه رفاق السوء و حملة الأباريق
وقيل أن الخليفة ما استعمل عاملا أو ولّى واليا إلا و بعث له بكتاب يقول في آخره إيّاك إيّاك و الشيّالة وما حمل إبريقك مثل زندك

هذا ما ورد من خبر الإبريق و الشيّالة جنبنا الله و إياكم شرّهم
اللهم لا تجعلنا ممن يشيلون أباريق غيرهم

و السلام

ود العم
خلينا من قصتك الما فيها نكهة دي
الناس في الامطار وانتا لافي لي بي ابريقك ؟؟
ياخ عليك الله عليك الله رجع لينا اسابيع البورد
ياخ انا بقو علي اتنين..الصيام و(بعض) الاعضاء الجدد..
والاسابيع دي متنفسنا الووووحيد..
لو ما رجعتو حتلقاني في اي بوست منتشرة زي ود الصائم وبعدين يغلبكم الحجيز..ولا عذر لمن انذر..
مسئول من الخير.. بكري الايامات دي مالو؟؟مافي زول شغال بيه؟؟
يا ربي الهكر صائم؟؟
ولا اتفقوا من ورانا؟؟

ــــــــــــــــــــــــــــــــــــــــــ
بالمناسبة رحبتا بالعضو الجديد المن آل الطائي؟؟


والي لقاء

ود البشرى ...
هناك اتكلمت اولا عن انواع الاباريق ...
هنا ...
انواع الايدي ...البتشيل الابريق
في اليمين وفي اليسار ...ود معاها الشيطان وكدا ..
وفي الضعيفة وفي السمينة
وفي السوداء وفي البيضاء ..انعكاسات البشرة وكدا ..وعلى حسب لون نية وقلب الزول الشايل الابريق ..
وبعدين اخيرا ..والاهم
دوافع شيل الابريق :
في المقلوب على امره ودا عبد المامور ...وماليك حق تقيف عندو ...
وفي المرائئن تقربا ..(للصالحين )طبعا ..
وفي الرامين لقدام (دعوات وكدا ..)
وفي المنافقين وعاملين ..فيها ..حواريون ..
وفي التابعين ناس قريعتي راحت ..ماشين ساكت في الزفة ...امعة
وفي اصحاب المنافع ..والاهداف الخفية ..وديل خطرين
وفي
وفي المزنوقين ...شديد ...في (لدعوات طبعا )..
ود البشرى انا ماقريت المداخلات ...كتبت كدا حسب العنوان دا ...



ارفع راسك ..وتميز (انشاء الله تشيل ابريق ..بس ايدك ماتكون فاضية )

وهبة يا عمك ..
إن شا الله دايما مبسوط و ضاحك ياخ

حمودي ..
صايم والله ... تصور

هلا بأبو اليا..
مشكور يا عمك لكن أخوك لا يعجزه شيل وش القباحة , هو الناس الإبريق شالو لمن وش القباحة

دكتور نزار...
رمضان كريم ربنا يتقبل منكم ومنا

Quote: هذا ما كان من أمر شيل الإبريق، فمابال (طواقي وغيرها)؟

الطواقي دي لابد من ذكرها لرفع الحرج عن بعض الاخوة المتحسسين
اما بالنسبة لدي

Quote: فمابال

فالسؤال محول لحموودي للإختصاص

يحبو كل كريم يا مسلمي يا عمك
جابت ليها اباريق تخيل

نعمات يا مدهشة ..
الكلام سمح وومنمق كعادتك لكنو - كعادتك برضو - خارم بارم

أب شنب يا عمك

Quote: من تقصد بكلامك هذا ؟ أبِن أفصِح ..

قصدي خلّو , إنت فهمت شنو؟

Quote: إن لم تفعل فإنك من حملة الأباريق .. وسيرتد عليك سحرك وتُصنّف من حملة الاباريق - وهذا ما لا نريده لك -

هأ هأ هأ
يا بوي حنكك دا في محمد عادل ما بمشي
العب غيرها ابوي

Quote: (لامؤاخذة) الابريق بيشيلوه عند قطع الجُمار وكده ...

يا خوي انا قاصد ابريق الشاي

كع يا عمك ...

Quote: يا شخينا ..

يا النبي يا الرسول ...كلكم سوا
اها وانا اعمليكم شنو طيب؟

أبارو يا إنتا ما مشتاقين ياخ وكدا

Quote: وماكان من أمر التلميذ ؟

أفرد له الرضاض بابا و تناولناه بإختصار غير مخل

يا خوانا زول يدي طلحة تنظير دا باقيه ويوريه باصات الدروشاب بي وين

سرور ..
حاضرين بس ساعدينا الصبر شغالين بروفات تقيلة

نعمات يا دهشة ..
كلام اسمح عديل كدا لكن خارم بارم برضك

عشم الكلب في موية الابريق
شوف لينا طاقية قدر الكلب دا بالله
لو عندك يا ود البشرى

Quote: عشم الكلب في موية الابريق

مافي طاقية مناسبة ياعمك

كدي حاول لينا انت