الله يستر هلالنا العظيم مع كانو النيجيرى و يبعد عنا الشراب!!!

....

والله الرجفة حاصلة والآمال معلقة على فتية الهلال بأن يجعلوا من الرجفة هزة فرح طاغية لاتنسى. نتمنى نتيجة طيبة لكى نرفع هاماتنا عالية خفاقة . النتيجة الإيجابية ستكون أبلغ رد على الحملة الصحفية المفتعلة لإختراق همم محبى الموج الأزرق وشغلهم بالشكاوى المفبركة دون الإلتفات لإعداد الفريق فى هذه المرحلة المهمة من تاريخ سيد أسياد البلد والبلاد المجاورة . نتنمى أن نرى الهلال بدراً فى يوم النزال. وكلنا ثقة وأمل فى إخوة البرنس والكابتن عمر بخيت بتقديم آداء ونتيجة تكون رد عملى على كل أعداء الهلال العظيم وهم كثر هذه الأيام.

اللهم يارب احفظ هلالنا من كيد الأعداء الحاقدين اينما كانوا واجعل تدميرهم وهلاكهم فيما يخططون ويدبرون يارب العالمين. اللهم انصر عبادك لاعبى الهلال في الميدان و في كل مكان اللهم كن لهم عونا و لهم سندا و لهم ملتجئا وكن لهم ولاتكن عليهم . اللهم آمين!!!

وللكلام بقية فى مقبل الأيام!!!!

الله- الوطن-الهلال

.....

اميييييييييييييييين يا اشرف

الله يكفينا شر الحساد.

Quote: اميييييييييييييييين

عشانك وعشان اسماعيل عباس وودالمدير بس يا أشرف طارق الكوتش May be

تسلم يا اشرف .. انت ماك زولا راقي وظريف ,, وربنا يكرم ان شاء الله



...............................................................


الفاضلابي ,,, يعني انا ما عندي خاطر عندك؟

رمضان كريم.

Quote: الفاضلابي ,,, يعني انا ما عندي خاطر عندك؟

كييييف ياكامل ماعندك خاطر ,, أها عشان خاطرك انت ان شاء الله تشيلوا الدورى المحلى فوق البيعة ,, قصرت معاك
ياخ رمضان كريم وربنا يتقبل منكم صالح الأعمال
ورجاء عاجل تلحقنى بتلفون ودالمدير

انشاء الله يدوكم على راسكم ..ياكريم يالله يامجيب الدعوات

Quote: والله الرجفة حاصلة والآمال معلقة على فتية الهلال بأن يجعلوا من الرجفة هزة فرح طاغية لاتنسى. نتمنى نتيجة طيبة لكى نرفع هاماتنا عالية خفاقة . النتيجة الإيجابية ستكون أبلغ رد على الحملة الصحفية المفتعلة لإختراق همم محبى الموج الأزرق وشغلهم بالشكاوى المفبركة دون الإلتفات لإعداد الفريق فى هذه المرحلة المهمة من تاريخ سيد أسياد البلد والبلاد المجاورة . نتنمى أن نرى الهلال بدراً فى يوم النزال. وكلنا ثقة وأمل فى إخوة البرنس والكابتن عمر بخيت بتقديم آداء ونتيجة تكون رد عملى على كل أعداء الهلال العظيم وهم كثر هذه الأيام. اللهم يارب احفظ هلالنا من كيد الأعداء الحاقدين اينما كانوا واجعل تدميرهم وهلاكهم فيما يخططون ويدبرون يارب العالمين. اللهم انصر عبادك لاعبى الهلال في الميدان و في كل مكان اللهم كن لهم عونا و لهم سندا و لهم ملتجئا وكن لهم ولاتكن عليهم . اللهم آمين!!! وللكلام بقية فى مقبل الأيام!!!!

قل بسم الله واضع الرحمن في قلبك لاداعى للرجفة باذن الله منتصرين وانتصار باهر واخوان البرنس تعاهدوا علي اهداء الكاس باذن الله للشعب السودانى
ولا تخف للهلال رب يحمية من الحاقدين والمتزمتين
الله الوطن
الهلال

انت الكورة متين ياشباب


الهلال سيفاجأكم

.....

الأخ وليد دواش
ربنا يسمع منك وينصر حبيب الكل ويصرف عننا الشراب.

الأخ Mohamed Foto7li
ربنا يسمع منك وكتروا لينا من الصور الزى دى. أصلها بتخلع الجماعة وتبوظ اعصاب كل الشربيتات.


.....

......

أستاذنا العزيز عبد العزيز الفاضلابى:

نشكرك جداً على المرور والكتابة. ومرحباً بك وبكل مريخاب الزمن الجميل الذين يقدمون إسم السودان وممثليه أولاً قبل الإنتماء للأندية. وربنا يوفق مريخ السودان فى مِشواره الصعب.


.....

...

الأخ رقم صفر

ربنا يسمع منك إنشاء الله. والكورة يوم الأحد القادم عصراً.
...

......

الأخ الشيخ محمد أبوإدريس

ربنا يسمع منك. إنشاءالله سنثبت مع الهلال الى أبد الآبدين. والله يدينا الفى مرادنا.

.....

....

QUOTE:انشاء الله يدوكم على راسكم ..ياكريم يالله يامجيب الدعوات


الأخ الدكتور الصادق عبدالله

شكراً على المرور والكتابة شكلك هلالابى زعلان كمعظم مشجعى نجمة المسالمة هلالاب زعلانين ولكن.....

هلال السودان وعاصمته أمدرمان لم ولن يضرب على رأسه مهما ألمت به الملمات فهو صاحب مقامٍ رفيع وعزة. إنه الهلال صاحب الشعبية الأوسع إنتشاراً على وجه الأرض. هلال الحركة الوطنية هلال سرور ,وكرومة, وطلعت فريد, وصديق منزول, والطيب عبدالله, وحديثاً البرنس هيثم لن يضام أبداً. ربنا مايديك الفى مرادك تجاه سيد أسياد البلد

والكلام كمل!!!



.....

.....

المربى الفاضل شيخ العرب سيف الدولة كامل:

رمضان كريم وتصوموا وتفطروا على خير.

تسلم ياحبيب على الإطراء ودة بعض مما عندكم. ربنا ينصر الهلال ويفرح كل شعب السودان وأهل عاصمته أمدرمان بصفة خاصة ببركة هذا الشهر الفضيل.


.....

الأخ/أشرف..رمضان كريم....

فعلآ ألله يسترعلى الهلال..وودعنا نتفاءل بأذن الله..الهلال لدورى ألأربعه بأذن الله كان ما عبر هولاء عبر غيرنا...

Quote: عشانك وعشان اسماعيل عباس وودالمدير بس يا أشرف طارق الكوتش May be

الحبيب الفاضلابى..كل عام وانت بخير ياعزيزى ....وتسلم يارائع..وعشان كل السودان يارب..نفرح ونمرح بالصعود لدورى ألأربعه...

مودتى...إسماعيل محمد احمد عباس....

....

الأخ إسماعيل عباس:

الله أكرم وتصوموا وتفطروا على خير. وربنا يسمع منك إنشاء الله. وانشاء الله نحن وا لجماعة الطيبين نتأهل لدور الاربعة عشان خاطر الوالد وأستاذنا العزيز الفاضلابى...
......

سلامات ورمضان كريم
الأحلام حق مشروع لكل البشر ..والحلم بكاس خارجي حق كل البشر ..لكن احراز كاس خارجي من حق الزعيم ..تيم الصفوه .....والزعيم فقط في السودان ....عشان كده حقو تفيقو من الحلم ده ...
الكوره لصالح كانو

......


الأخ الدكتور الصادق عبدالله

لقد جزمت بمشروعية الحلم لكل البشر والسعى على تحقيقه ولكنك ناقضت نفسك بأن نجمة المسالمة القادر الوحيد على تحقيق الإنجاز الخارجى!! تجى كيف دى!!

زمن الإداريين واللاعبين الممكن يجيبوا الكاس لنجمة المسالمة ولى وماظنيت المعلم وارقو وأمير دامروكرومى جاهزين لى كدة. وبرضوا أنحنا قلبنا معاكم يوم الأحد عشان إسم السودان وكدة وبرضوا عشان أمدرمان الحبيبة وحق الجيرة. والأربعة ناقص أربعة زايد إثنين ستكون المحصلة المرتقبة لمباراة سيد أسياد البلد!!

تخريمة: كيف تكونوا صفوة وكل واحد فيكم داخل ليه كورة شايل حجر فى جيبه لزوم التشجيع وكدة? قال صفوة قال!!!

ياللعجب!!!!

......

Quote: لقد جزمت بمشروعية الحلم لكل البشر والسعى على تحقيقه ولكنك ناقضت نفسك بأن نجمة المسالمة القادر الوحيد على تحقيق الإنجاز الخارجى!! تجى كيف دى!!

سلامات مره أخري ..
طبعا الزعيم هو من له الحق بتحقيق الأنجاز الخارجي لعلو كعبه في هذا الشأن ....وطبعا أنت عارف لستة أنجازاتنا في هذا المجال ...
أنت من عشاق الأزرق الذين يكتبون بشكل جيد ...وأحييك علي تمنييك للمريخ بالفوز ...بس خلي أخونا جمال السنوسي الله يطراه بالخير يبعد من بوستيك ده وكل الامور حا تكون تمام ..
أما موضوع الصفوه والشغب والكلام الذي يروج له الكثيرين ..نعم هنالك بعض العناصر المنفلته (كما يقول ناس السياسه )..لكن اذا قارنا ذلك بحالكم ..فالوضع لن يكون في صالحكم ...
رمضان كريم وأنا ماشي السودان بكره وحا أكون هناك ..وانشاء الله أجد طريقه للانترنت عشان أشوفكم حا تشردوا ولا حا تركزوا ..
خساره ،الانهار الحايمه في شوارع الخرطوم ماحا تخلينا نحتفل بفوز الزعيم

......


الأخ الدكتورالصادق عبدالله:

شكراً جزيلاً على المجاملة اللطيفة. نتمنى لك إجازة سعيدة مع الأهل والأحباب وإنشاء الله كراعك تكون خضراء على نجمة المسالمة وماتحرجونا مع العالم الكروى الخارجى كعادتكم المألوفة فى العشر سنوات الأخيرة. يعنى زى أحبابنا فى الوحدات الأردنى والصفاقسى وكانو بيلارز وأخيراً وليس آخراً زيسسسسكو.

والنصيحة تشوف ليك حجر كبير تخش بى الكورة الجاية وكلما كبر حجرك كلما زادت حظوظك بإيجاد مقعد مريح فى مدرجات مشجعى نجمة المسالمة فى معركة الخبت والفليق القادمة. قال بعض العناصر المنفلتة قال!!! يعنى لو كلكم فلقتوا ممكن تبنوا جبل براحة ولا تحرروا بلد!!! قال صفوة قال!!

والله يدينا الفى مرادنا وينصر الهلال العظيم ويرجعم سالمين وغانمين.

ولنا عودة قريباً.....


....

.....

غادر فريق هلال السودان إلى نيجريا لملاقاة كانوبيلارز عبر طائرة خاصة فى ملحمة الأحد ... صحى سمحة المقدرة..

أظلمت كل أحياء أمدرمان حزناً على فراق الموج الأزرق وسيعودُ الألق والإبتهاج للمدينة عند عودة فتية الهلال منتصرين بإذن الله.

اللهم يارب هون علي لاعبى الهلال واسترهم بسترك وأنصرهم نصراً مؤزراً من عندك ببركة هذا الشهر الفضيل.

الله يدينا الفى مرادنا!!!

آمين...



.....