Post: #1
Title: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 05:59 AM
Parent: #0
من قبل رمضان باسبوع شغالين
يوصفوا في حاجات رمضان
ومنفعلين بالاكل زي حركات ناس دول العالم التالت
بعد شوية يجيك ناجي يصور ليك صحن العصيدة بملاح النعيمية الحار ابو بصله سالمه
وبقال مغمس يده فيها
عاوزين تغيزونا يعني
بعدين انتو من القال ليكم انه نحن زاتو دايرين لينا عصيدة بملاح نعيمية
ومنو زاتو القال ليكم نحن دايرين لينا حلو مر ساااقط
ومنو القال ليكم نحن دايرين لينا بليلية لوبا وعدسية
نحمد سيدنا عندنا green peas, french beans
وشوفوا الصور دي عشان تعرفوا عينا مليانه وشبعانييين
________
|
Post: #2
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 06:03 AM
Parent: #1
طبق صيني ...
قال قراصة بملاح الشرموط قال...
عالم منكفئة على قراصتها وغير منفتحة على الثقافات الاخرى
|
Post: #3
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 06:05 AM
Parent: #2
اها .. غطيس اليدين وبنغطس
قال عصيدة قال
شوف الهندي التحت ده
|
Post: #4
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 06:09 AM
Parent: #3
اها دي وجبة لاطفالنا
ما عندنا شفع بكابسوا
|
Post: #5
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 06:14 AM
Parent: #4
شوفوا تحليتنا كيف
مش زي اللقيمات الحممممرة وشاي اللبن البصورم عصام عبد الحفيظ دييييك
|
Post: #6
Title: Re: يابورداب الخرطوم ___نحن زاااتنا عندنا
Author: سلمى الشيخ سلامة
Date: 08-23-2009, 06:31 AM
Parent: #5
هسى بينى بينك يا منال ما عملتى ملاح نعيمية حاااااااااار وعصيدة ؟
عارفة كان عندى
وما يزال هوس
اسال الناس "عن شوارعا فيها تاتيت ومشيت"
دا خارج النص
اسال الناس عن فطورهم وغداهم
اتعلمت كتير من الاسئلة دى
وكمان بكتابة الاكلات
يعنى الان بعرف اكلات مكسيكية وهندية ومصرية ويونانية واثيوبية وافغانية
وسعودية وقطرية
لقيت ليك اكلاتنا براها
مافى ناس بعملو الكسرة زينا
الحبش كسرتهم متعة طبعا وزغنيهم اكبر المتعات
مع ذلك نتشابه مع الاتراك والهنود والافغان فى بعض الملامح
سوى ان اليونانين يفرمون ام فتفت
وهم من ساق الينا ومعيتهم الاتراك والمصريين اكلات كثيرة
الى مائدتنا
المحشى ، البامية المطبوخة كمثال،
الارز وفى هذا وجدت تشابها بين الشعوب حد التطابق
لكن لم تستهوينى الاكلات الافريقية رغم التشابه بينها والبرازيلية لحد كبير
خاصة الموز المطبوخ
اما السادة الصينين
حبيت عندهم الاكل المضاف ليهو السكر
تتصورى امهاتنا كانوا بضعوا "كشحة سكر فى الطبيخ"
سرحت مش؟
تصومى وتفطرى على خير
|
Post: #7
Title: Re: يابورداب الخرطوم ___نحن زاااتنا عندنا
Author: Mohamed Yassin Khalifa
Date: 08-23-2009, 06:32 AM
Parent: #5
الأخت العزيزة منال
رمضان كريم...
صحي في حلومر جاييك من DC ؟
غايتو كان مكتفية ببيرغر أهلنا ديل الرسول كان تحولي الطرد ده لبوسطن
وينوبك ثواب وأجر إفطار الصايم...
|
Post: #8
Title: Re: يابورداب الخرطوم ___نحن زاااتنا عندنا
Author: Sayed Bekab
Date: 08-23-2009, 07:52 AM
Parent: #7
الاخت منال و الاخ محمد ياسين كل عام و انتم طيبين رمضانكم مبارك و سعيد إن شاء الله .
محمد ياسين ياحبيب وحاه الله تمانيه سنيين قعدتهم فى بوسطن كل سنة حلو مر و ابريه و كركديه و عصير قلنقليز زاتو يازول الحبه ما بتجيك فى بوسطن خليك قريب من الفطورات الجماعية الكمية فى الويك اند و كانك صائم فى البلد.
تحياتي لكل الشباب عندك فى بوسطن و كل عام و انتم بخير.
|
Post: #9
Title: Re: يابورداب الخرطوم ___نحن زاااتنا عندنا
Author: Mohamed Yassin Khalifa
Date: 08-23-2009, 08:10 AM
Parent: #8
بيكاب يا عظيم
سلامات يا أخوي ورمضان كريم
وكيف الخليج عامل معاك... ويعلم الله أنا أمبارح في DC في سيرتك مع تماضر
طبعا قلتا ليها إنتي وسيد بيكاب تعزمو الناس فطور مفتحوح في رمضان
يعني يا زول كان ما لقيت ليك فرصة السنة دي تفطر معانا... تعال السنة الجاية
وإنت عارف إنو أنا في بوسطن Part-time
سلامي للمعاك...
|
Post: #10
Title: Re: يابورداب الخرطوم ___نحن زاااتنا عندنا
Author: آدم صيام
Date: 08-23-2009, 08:33 AM
Parent: #9
Quote: بعدين انتو من القال ليكم انه نحن زاتو دايرين لينا عصيدة بملاح نعيمية
ومنو زاتو القال ليكم نحن دايرين لينا حلو مر ساااقط
ومنو القال ليكم نحن دايرين لينا بليلية لوبا وعدسية
نحمد سيدنا عندنا green peas, french beans
وشوفوا الصور دي عشان تعرفوا عينا مليانه وشبعانييين |
العزيزة منـــــــــال رمضانك كريم
أديهم بالله
عليك النبي شوف العالمين ديل
ما قروا حديث قتار قدرك ولا شنوَ
الغريبة في أخت عزيزة متبرعة بالحلو مر كمان!
خدوا أها
:زوجتي قالت السنة دي فاقدة الببسي السوادني( الآبري)
|
Post: #11
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 05:20 PM
Parent: #10
سلمى .. شكرا ليك يا ستي
كويس انك حكيتي عن الاكلات العالمية دي
عشان الجماعة ديل باقي من زمن حفروا البحر
شغالين عصيدة ملاح نعيمية وبليلة
طبعاً ده عدم انفتاح على الثقافات التانية وانغلاق مؤدلج منهم
والمشكلة انهم بعد الصينية المليانة ديك ... يجيبو ليك الشاي بالكبابيه مبخرة بالمستكة
هو عليك الله لسع في ناس بتشرب شاي احمر و صااافي
نحمد سيدما
استاربوك ودينكن دونت دي ماليه عينا
|
Post: #12
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 05:25 PM
Parent: #11
يا محمد يسن ... منتظرة لسه
وكل ما شوف البوستجي شايل ليه كرتونة ..اجري على الباب
( المفروض اسافر لكن اجلت سفري لحدي ما استلم هدية ناس دي سي
|
Post: #13
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 05:32 PM
Parent: #12
الاخ بيكاب
شكرا على المرور
وكل سنة وانت طيب
|
Post: #14
Title: Re: يابورداب الخرطوم ___نحن زاااتنا عندنا
Author: Manal Mohamed Ali
Date: 08-23-2009, 05:35 PM
Parent: #13
العزيز ادم صيام.. كل سنة وانت والاسرة بخير
وقول للمدام
الصودا دي ما
فيها مليون نوع.. الابري من ربنا خلقوا واحد
بعدين الصودا بتهضم ليها
|
Post: #15
Title: Re: يابورداب الخرطوم ___نحن زاااتنا عندنا
Author: أيزابيلا
Date: 08-23-2009, 06:02 PM
| Quote: يابورداب الخرطوم ___نحن زاااتنا عندنا |
منول
قريت العنوان قلت يا بت...دربك على ال (ام تراك) عديل
منال شكلها عندها فطور فى نيويورك...
تطلع القصة مكاواة ساى؟
ــــــــــ
دة انا حتى اقرب واولى من محمد ياسين بالحلو مر بتاع دى سي
اول رمضان برة بيت الحاجة بت الشريف
زتنقصنى المؤازرة والله
ربك يهون القواسي
|
|