Post: #1
Title: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 12:14 PM
Parent: #0
الظاهرة دي موجودة بكثرة في السودان .
ما ان تتصل بشخص حتى يرد عليك شخص آخر لا يعرفك ولا تعرفه ..
|
Post: #2
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: omer osman
Date: 08-20-2009, 12:16 PM
| Quote: ما ان تتصل بشخص حتى يرد عليك شخص آخر لا يعرفك ولا تعرفه .. |
واحد قال الموبايل زي فرشة الاسنان ...... استعمال شخصي 
|
Post: #3
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 12:31 PM
Parent: #2
واحد قال الموبايل زي فرشة الاسنان ...... استعمال شخصي
حبيبنا عمر ..
تصدق بالامس اتصلت على احد الاصدقاء
ليرد على واحد تاني.
الو ..
السلام عليكم
مرحب .
ثم قام بعدها بسؤالي ..
معاي منو ؟
معاك عمر ؟
عمر منو؟
يا اخي فلان وين ؟
والله الزول دا في البقالة .
اضرب ليهو بعد ربع ساعة .
طيب شكرا جزيلا ..
بعد ربع ساعة عاودت الاتصال لياتيني شخص ثاني..
الو مرحبا.
السلام عليكم.
يا مراحب ..
يا اخي اكلم .....
اي دقيقة بس ...
فلان .. فلان في زول دايرك من السعودية...
نواصل ..
|
Post: #4
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: د.محمد حسن
Date: 08-20-2009, 12:42 PM
Parent: #3
خلينا من لفحي الموبايلات
انا صايم عزابي
حتعزمني متين
|
Post: #7
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 05:23 PM
Parent: #4
خلينا من لفحي الموبايلات
انا صايم عزابي
حتعزمني متين
دكتورنا ..
يا اخي انت تشرف من اول يوم من رمضان
الدعوة موجهة لك .. ياسلام دا شرف لا بعده ولا قبله ..
كل عام وانت بالف خير..
|
Post: #5
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: علاء الدين صالح
Date: 08-20-2009, 03:09 PM
Parent: #3
Quote: تصدق بالامس اتصلت على احد الاصدقاء
ليرد على واحد تاني.
..........
بعد ربع ساعة عاودت الاتصال لياتيني شخص ثاني..
|
الأخ ود الباوقة
احتراماتي
أنا لو في مكان صاحبك دة كنت كتبتَ عليهو بالبوهية..
"موبايل سبيل"
|
Post: #8
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 05:30 PM
Parent: #5
أنا لو في مكان صاحبك دة كنت كتبتَ عليهو بالبوهية..
"موبايل سبيل"
اخونا علاء ..
اسمع دي الاجازة الفاتت في السودان معزوم فطور
مع مجموعة من الشباب.
جوالى كان موضوع على التربيزة فجأه ( لفحه )
احد الحاضرين وقام يقلب في الرسائل واحدة بعد الاخرى
وفي النهاية قام قطع الميدالية المعلقة في الجوال
وبراحة رجعو مكانو ..
شفت كيف ..
|
Post: #6
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: احمد العمار
Date: 08-20-2009, 03:17 PM
Parent: #3
ود الباوقة كيفك
بصراحة الغلطان صاحبك جادع تلفونو للناس مالو
مفترض جوالك دا يا فى جيبك يا فى يدك يا فى الشاحن
غير كدا نهى
أحمد العمار
|
Post: #9
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ismeil abbas
Date: 08-20-2009, 05:41 PM
Parent: #6
ودالباوقه......السلام عليكم وكل عام وانتم بخير.....
Quote: خلينا من لفحي الموبايلات
انا صايم عزابي
حتعزمني متين |
أها جاك الفحى الجد جد..شوف د/محمد حسن..خلا الموبايل ولفح فطور رمضان..لذيذ والله يا محمد حسن....
كل عام وإنت طيب يادكتور محمد حسن.....
نحن فى السودان نفتقد الخصوصية فى كثير من ألأمور وألأمور الهامة...ودى تربيه الناس لو ما إتربت عليها لايمكن ان تتعلمه وهى كبيره...
أنا عندى مشكلة بالعكس فى بيتى لو رنيت لزول فى البيت من اولادى أقرب زول يشيل التلفون ويجرى لسيدو لحدى ما يقطع أو يقرب يقطع إلا يوصلو ليهو ورد براهو...قلت ليهم مافى مشكلة ردوا لكن عرف نفسك بسرعة مثلآ انا أحمد والله دقيقة النشوف ليك فلان ده وين لحدى ماتصلو...
الرد على التلفون أسلوب يدرس..ياود الباوقه.......الراجل خسرك لحدى ما رفع كثافتك ورفعت بيهو بوست......................كل عام وانت والمتداخلين طيبين إن شاء الله...
إسماعيل محمد احمد عباس..
|
Post: #12
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 05:53 PM
Parent: #9
أها جاك الفحى الجد جد..شوف د/محمد حسن..خلا الموبايل ولفح فطور رمضان..لذيذ والله يا محمد حسن....
كل عام وإنت طيب يادكتور محمد حسن.....
حبيبنا سمعة ..
يعني زي الدكتور دا لو لما ليهو في جوال
اول شيء ( يبحبت ) الاستديو بتاع الصور
ومن هناك على الرسائل . ويختمها بالنغمات
Quote: يمر عليها واحدة واحدة ..
أنا عندى مشكلة بالعكس فى بيتى لو رنيت لزول فى البيت من اولادى أقرب زول يشيل التلفون ويجرى لسيدو لحدى ما يقطع أو يقرب يقطع إلا يوصلو ليهو ورد براهو...قلت ليهم مافى مشكلة ردوا لكن عرف نفسك بسرعة مثلآ انا أحمد والله دقيقة النشوف ليك فلان ده وين لحدى ماتصلو...
الرد على التلفون أسلوب يدرس..ياود الباوقه.......الراجل خسرك لحدى ما رفع كثافتك ورفعت بيهو بوست......................كل عام وانت والمتداخلين طيبين إن شاء الله... |
الاولاد ربنا يحفظهم ويخليهم ليكم ..
عندنا هناك المسالة مقالعا ساي .. يعني من ديك يا سمعة الجوال بقى
في الجيب 24 ساعة ..
|
Post: #10
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 05:42 PM
Parent: #6
Quote: بصراحة الغلطان صاحبك جادع تلفونو للناس مالو
مفترض جوالك دا يا فى جيبك يا فى يدك يا فى الشاحن
غير كدا نهى |
اخونا العمار ..
ما كان جادعو ولا حاجة .. زي ما قلت ليك دقت الجوال اقرب
واحد ليهو بيتناولو ويرد ..
|
Post: #13
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: احمد العمار
Date: 08-20-2009, 06:00 PM
Parent: #10
Quote: ما كان جادعو ولا حاجة .. زي ما قلت ليك دقت الجوال اقرب
واحد ليهو بيتناولو ويرد .. |
منعاها كان مجدوع لانو ما ممكن يتناولو من يدو او جيبو ولا شنو
عموما رمضان كريم وكل سنة وانت طيب
أحمد العمار
|
Post: #11
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: خالد عبد الله محمود
Date: 08-20-2009, 05:42 PM
Parent: #6
| Quote: وقام يقلب في الرسائل |
أهه دي ياها البتزعل يا ود الباوقة
و المؤسف إنو غير السودانين زول بعمل الحركة دي مافي ؟؟
عادي ممكن الواحد يشيل جوالك و يقرأ رسايلك و كأنو مافي حاجة !!!!
عملية سخيفة شديد
رمضان كريم ياخ و كل سنة و أنت طيب
|
Post: #14
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-20-2009, 06:01 PM
Parent: #11
Quote: أهه دي ياها البتزعل يا ود الباوقة
و المؤسف إنو غير السودانين زول بعمل الحركة دي مافي ؟؟
عادي ممكن الواحد يشيل جوالك و يقرأ رسايلك و كأنو مافي حاجة !!!!
عملية سخيفة شديد |
الاخ الكريم خالد ..
والاسخف اكثر مناقشة الامور الخاصة في الاماكن
العامة .
كنا راكبين حافلة فجأة ضرب جوال واحد يجلس
في المقعد الذي امامي..
كيف ..
تمام
صوتو كان في السماء ..
البارح يا زول والله الجماعة دخلنا فيهم جنس خازوووق
حرم المرة طلقناه ليهم في خمسة دقائق
عمها قام يلف ويدور وعايز يعمل فيها طرزان
خلاص بشحن رصيد واكلمك بعدين ...
|
Post: #15
Title: Re: يا جماعة قصة الواحد يلفح الجوال ويرد.. دي مسالة ما حضارية ...
Author: ود الباوقة
Date: 08-21-2009, 00:55 AM
Parent: #14
دا طبعا غير وضع نغمات الاغاني الهابطة..
مرة قاعدين نصلي المغرب وفي الركعة الثانية
فاذا بالجوال ( يكورك ) هيي يا آشة ..
آشة كبريت هييييييييي يكا ..
الجوال كان في جيب واحد من الاخوان
المهم حصلت دربكة في الصلاة . واحراج
شديد لصاحب الجوال لكنه تمكن في اغلاقه بصعوبة
ووقتها كان يردد هيي يا هفسة .. لا ما هفسة ...
|
|