••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.••

••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.••


08-20-2009, 12:04 PM


  » http://sudaneseonline.com/cgi-bin/sdb/2bb.cgi?seq=msg&board=240&msg=1250766287&rn=0

Post: #1
Title: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.••
Author: lana mahdi
Date: 08-20-2009, 12:04 PM


رمضان كريم

البوست دة لكل العزابة البفطرو براهم الله ورقبتهم بدون أسرهم
وللمتزوجين العملو ليهم خيانات والمدام والوليدات مشو يصومو في السودان
ولكل محبي ومحبات الطهي بالله تعالوا ورونا خبراتكم
ودعوة لكل شيف
فك حيرة المحتارين والمحتارات الأكلة الفلانية بتتعمل كيف؟
وللمقاطعين والبتزرو في رمضان وبسمعهم دايماً يقولو (نار العرس ولا جنة مطبخ رمضان والطهي)

أنت تطلب وشيف البورد ينفذ أونلاين
في ناس عارفاهم فنانات في النعيمية
وناس في التقلية والعصيدة(توجد أسماء)
نتلقى الطلبات أونلاين
وعلى الهاتف المثبت أسفل الشاشة:
زيرو زيرو زيرو تلاتة أصفار زيرو
(إبتسامة للكاميرا)
(1)نبدأ بأهمممم شيء:
قلبك يكون مع البوتجاز ما مع البورد وإلا:


(2)معدات الطهي
اللازم تتوفر في كل مطبخ لتسهيل الأمر على الشيف
(أ)السكاكيييييييين:
سكاكين المطبخ
أنواع محتلفة لكل سكين مهمة
يجب أن يستخدم كل سكين للغرض منه كما هو موضح بالصورة:

-أواصل-
Post: #2
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: mayada kamal
Date: 08-20-2009, 12:34 PM
Parent: #1

انا بعرف اسوي سلطة الروووب
انفع








تصومي وتفطر علي خير يا استاذة لنا
Post: #3
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: زهير الزناتي
Date: 08-20-2009, 12:48 PM
Parent: #2

يا لنا رمضان كريم
البوست مهم للغاية ، عليك الله إهتمي بيهو شديد ، ونزلي تفاصيل الطبخات والأكلات السودانية والمشروبات
وكل ما يهم الناس في رمضان من أكلات سودانية شعبية ، لأنو الناس في الغربة أو في البلد (برضو عايشين غربة) في حاجات كتيرة عايزين يعرفوها ، ينوبك ثواب في هذا الشهر الكريم ، وممكن مداخلات من كل الناس كل حسب طريقته في الطبخ ولك الشكر مقدماً .
Post: #6
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-20-2009, 01:05 PM
Parent: #3

Quote: يا لنا رمضان كريم
البوست مهم للغاية ، عليك الله إهتمي بيهو شديد ، ونزلي تفاصيل الطبخات والأكلات السودانية والمشروبات
وكل ما يهم الناس في رمضان من أكلات سودانية شعبية ، لأنو الناس في الغربة أو في البلد (برضو عايشين غربة) في حاجات كتيرة عايزين يعرفوها ، ينوبك ثواب في هذا الشهر الكريم ، وممكن مداخلات من كل الناس كل حسب طريقته في الطبخ ولك الشكر مقدماً

الحبيب زهير رمضان كريم عليكم وعلينا
تصوم وتفطر على خير
حاضر يا حبيب حاهتم بالبوست وأورد فيه ما استطعت أكلاتنا الحلوة في رمضان
لنا
Post: #4
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-20-2009, 12:57 PM
Parent: #2

Quote: انا بعرف اسوي سلطة الروووب
انفع


ميادة الحبيبة
كيفن ما بتنفع؟؟
في صينية فطور بدون سلطة الروب؟؟
أنفضي الفي يدك وتعالي فوراً أكتبي الوصفة(:(:
Quote: تصومي وتفطر علي خير يا استاذة لنا

وأنت بألف خير حبيبة
لنا بدون أستاذة(:(:(:
Post: #5
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: محمد عبد الماجد الصايم
Date: 08-20-2009, 01:04 PM
Parent: #4

كل سنة وإنتي طيبة يا لنا
تصومي وتفطري على خير







Quote: وللمتزوجين العملو ليهم خيانات والمدام والوليدات مشو يصومو في السودان


أيييووووا
لكن احتمال يجو .. المرة قالت لو رمضان سخّن بتخارج
Post: #8
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-20-2009, 01:20 PM
Parent: #5

Quote: كل سنة وإنتي طيبة يا لنا
تصومي وتفطري على خير

تصوم وتفطر يا حبيب على ألف خير
كل سنة وأنت ومن تحب بخير وعافية
Quote:
Quote: Quote: وللمتزوجين العملو ليهم خيانات والمدام والوليدات مشو يصومو في السودان



أيييووووا
لكن احتمال يجو .. المرة قالت لو رمضان سخّن بتخارج

أأأأأأأأخ طرف السوط لحقك

عندي ليك أخبار ما مطمنة
شقيقتي ووالدتي حسة في السودان قالوا الجو روعة والنسيم عليل.. يا ود الصايم حقك راح
Post: #7
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: مريم بنت الحسين
Date: 08-20-2009, 01:16 PM
Parent: #1

لنا ازيك

والله انا بعرف اطبخ.. والله جد.. مافي زول يجي يقول مسكين زوجك.. والله بعرف

بس عندي عقده وااااااااااااااااااااحده... عقدة ملبّكة...

العصيدة!

انا عارفه انها ساهله.. لكن عامله لي عقدة
عايني.. نبدا من الخمّار.. عندي خمّار عجين..

وما تقولي لي حقت الزبادي... نادر ما بدورها!! انا زاتي ما مقتنعه بيها
Post: #9
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-20-2009, 01:24 PM
Parent: #7

Quote: لنا ازيك

والله انا بعرف اطبخ.. والله جد.. مافي زول يجي يقول مسكين زوجك.. والله بعرف

بس عندي عقده وااااااااااااااااااااحده... عقدة ملبّكة...

العصيدة!

انا عارفه انها ساهله.. لكن عامله لي عقدة
عايني.. نبدا من الخمّار.. عندي خمّار عجين..

وما تقولي لي حقت الزبادي... نادر ما بدورها!! انا زاتي ما مقتنعه بيها

مريوم الغالية كل سنة وإنتي طيبة
عارفاكي طباااااااااااااااخة
الخمار العندك ليّن ولا كلّوكاب؟؟
Post: #10
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: mayada kamal
Date: 08-20-2009, 01:30 PM
Parent: #9

Quote: ولا كلّوكاب؟؟

شرحه !!!!!!!!!!!!!!!!
Post: #12
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-20-2009, 01:41 PM
Parent: #10

Quote:
Quote: Quote: ولا كلّوكاب؟؟


شرحه !!!!!!!!!!!!!!!!

الحبيبة ميادة
الكلوكاب دة دقيق العيش (الذرة) بتعجن بموية ويخلوهو يتخمر بعدين بدردموهو كور كور سغار وبنشفوهو في الشمس
بيشيلوهو دايماً المغتربين ضمن حاجات رمضان البصلة الناشفة المدقوقة واللحمة المفرومة الناشفة..وبستعملوهو لعمل الكسرة والعصيدة(:(:
لنا
Post: #15
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: mayada kamal
Date: 08-20-2009, 02:03 PM
Parent: #12

Quote: الحبيبة ميادة
الكلوكاب دة دقيق العيش (الذرة) بتعجن بموية ويخلوهو يتخمر بعدين بدردموهو كور كور سغار وبنشفوهو في الشمس
بيشيلوهو دايماً المغتربين ضمن حاجات رمضان البصلة الناشفة المدقوقة واللحمة المفرومة الناشفة..وبستعملوهو لعمل الكسرة والعصيدة(:(:
لنا


ومنكم نستفييييييييييد
شكرا يا حبوبه
اختك طبعا اعجمية بالنسبة للغة العربية وكدا
ههههههههه
تصومي وتفطري على خير يا حبوبه
Post: #11
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: منال
Date: 08-20-2009, 01:40 PM
Parent: #9



لنا الحقينى بملاح النعيمية
عايزه وصغة دقيقة



كل سنة وانتى طيبة يالنا ....
Post: #13
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: مريم بنت الحسين
Date: 08-20-2009, 01:46 PM
Parent: #11

يا لنا...
الخمّار ليّن.. ما وصلنا المرحلة دي لسه احنا ههههههههه
Post: #14
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rosemen osman
Date: 08-20-2009, 01:55 PM
Parent: #13

بوست شكلو حيكون طاعم يا لنا..
عندي فكرة كل يوم على زول /ة يكون فى طبق رئيسي, وثاني جانبي سلطة أو شوربة. والثالث حلو والأخير هو الاهم
رمضان كريم وكل سنة والجميع بخير
Post: #16
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: احمد خليل
Date: 08-20-2009, 03:38 PM
Parent: #14

كل سنة وانت طيبه يا صديقتنا القديمة
بعرف انو السيدات جنهم وجن الراجل يكون بيعرف يطبخ زين !!اى دعم فى (الكوزينات) العالميه نحن جاهزين (ياستالباستا) (لازانيا) وكل انواع البشمل!!وحتى (الكابيده) البتشبه (قراصتكم ) دى برضو!!!!
كل سنه وشعبنا الكريم بخير والمليون ماتنقص (ملم),,,,
kofi
Post: #30
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-22-2009, 02:21 PM
Parent: #16

Quote: كل سنة وانت طيبه يا صديقتنا القديمة
بعرف انو السيدات جنهم وجن الراجل يكون بيعرف يطبخ زين !!اى دعم فى (الكوزينات) العالميه نحن جاهزين (ياستالباستا) (لازانيا) وكل انواع البشمل!!وحتى (الكابيده) البتشبه (قراصتكم ) دى برضو!!!!
كل سنه وشعبنا الكريم بخير والمليون ماتنقص (ملم),,,,
kofi

الحبيب كوفي قربتا اودرك لولا التوقيع
كيفك ياخي فاقدنك بالجد
كل عام وأنت بألف خير
ياخي طالما مهاراتك متعددة خش طوالي بالوصفات
وخت في بالك إنو لازم تختار ليك يوم يكون الفطور عليك..(:(:(:
لنا
Post: #23
Title: روزمين عليها فطور أول يوم في رمضان
Author: lana mahdi
Date: 08-21-2009, 03:27 PM
Parent: #14

Quote: بوست شكلو حيكون طاعم يا لنا..
عندي فكرة كل يوم على زول /ة يكون فى طبق رئيسي, وثاني جانبي سلطة أو شوربة. والثالث حلو والأخير هو الاهم
رمضان كريم وكل سنة والجميع بخير

روزمين الحبيبة
كل سنة وأنت بألف خير
خلاص بكرة الفطور عليكي(:(:(:(:
من صباح الرحمن تهزي كانونك
والليلة جيبي كافة المشتريات
لنا
Post: #17
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: انتصار محمد صالخ بشير
Date: 08-20-2009, 04:14 PM
Parent: #11

الاخت الحبيبة لنا

كل سنة وانت طيبة ورمضان كريم

فكرة البوست جميلة وساكون معاك اولاين اختك خبرة ربة منزل

الاخت منال

Quote: لنا الحقينى بملاح النعيمية
عايزه وصغة دقيقة


بعد اذن ست البوست وصفة سريعة جدا لملاح نعيمية يا منال

1* كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة

وبالهناء والشفاء وصيام مقبول

انتصار
Post: #18
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Rashid Elhag
Date: 08-20-2009, 08:09 PM
Parent: #17

كل عام وأنتم بخير....تقبل الله منكم ومنا الصيام والقيام....والركوع والسجود والدعاء...وصالح الأعمال وغفر لنا ما أذنبنا ورحمنا....إنه سميع قريب مجيب الدعاء...آمين ..

الحبيبة لنا...البوست بتاعك دا محتاجنو بالحيل في غربتنا دي...جزاك الله خيرآ...

راشد
Post: #19
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: smart_ana2001
Date: 08-20-2009, 09:14 PM
Parent: #18

سلامات يا لنا....كل سنة و انت طيبه....
و الله ده اجمل بوست لاقانى من زمن طوووويل!

صحبتى مريم....قلت لى العصيده غلبتك???عادى يا زوله....انا لسه بعافر معاها.
كل رمضان بيكون عندى مشروع او اتنين....السنة دى مشروعى انى اظبط الباسطه..ما باسطتنا فى السودان....باسطة للبنانيين و اليونانيين.

اها يا لنا...لو عندك اى وصية فى موضوع الباسطه ده
Post: #20
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: مريم بنت الحسين
Date: 08-21-2009, 00:43 AM
Parent: #19

يا لنا انا حأصوّم نادر ده اسبوع واحد وبعداك ماشه الامارات...

منتظراك انا نظبط الكم يوم ديل عليك الله... العصيدة.. انا ختيتها في الmenu بتاع اليوم الاول

...

سمارت.. هووووي باستا شنو يا زولة... اتذكري الجري بعدين، بتخلي الباستا... خليك في البروكلي والإسباريغوس.. اخير ليك.... دي فيها جري شديد....
Post: #21
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Safa Fagiri
Date: 08-21-2009, 07:20 AM
Parent: #20

لنا...

أنا عندي(2) فاستنق ريسبي ...
لما بعد ذلك كله وما قبله
out of the kitchen
ينفع..
?
Post: #75
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-26-2009, 08:41 PM
Parent: #21

Quote: لنا...

أنا عندي(2) فاستنق ريسبي ...
لما بعد ذلك كله وما قبله
out of the kitchen
ينفع..
?

صفاء الحبيبة
ينفع ونص يا غالية(:
منتظرنك
لنا
Post: #134
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Safa Fagiri
Date: 09-03-2009, 11:08 PM
Parent: #75

أوكي يا لنوية

لما قبل ذلك
(1)

Suprise:)


المكونات:
1/حبيبات من المكرونة الملونة.

2/خيط عصبي رفيع .
3/سجادة مصلاة
4/شمعدانة معطرة .
5/كبريت أو ولاعة

الزمن:
عشرة دقائق فقط كل يوم قبل الإفطار.

الطريقة:

-تفرش السجادة في ركن هادئ
-توضع الشمعدانة على طاولة قصيرة
-تضاء الشمعة بإستخدام الكبريت أو الولاعة
-تؤخذ حبيبات المكرونة الملونة ويمرر الخيط الرفيع برفق فيها.
أثناء القيام بذلك يقال سبحان الله وبحمده سبحان الله العظيم *
-عند تكملة ذلك خلال الشهر ,توضع أوتعلق في
الغرفة مكتوب بجانب منها رمضان والسنة الهجرية.


*"كلمتان خفيفتان على اللسان ثقيلتان في الميزان"


قللوا من الأكل وأكثروا
من الذكر لأن الأجر مضاعف.
:)


ما تعملو كلو
نعيمية و..و...و
:)




سأوافيك بما بعد ذلك لاحقا..


محبتي...
Post: #88
Title: باسطة كعك غريبة
Author: lana mahdi
Date: 08-27-2009, 09:50 PM
Parent: #19

Quote: سلامات يا لنا....كل سنة و انت طيبه....
و الله ده اجمل بوست لاقانى من زمن طوووويل!

صحبتى مريم....قلت لى العصيده غلبتك???عادى يا زوله....انا لسه بعافر معاها.
كل رمضان بيكون عندى مشروع او اتنين....السنة دى مشروعى انى اظبط الباسطه..ما باسطتنا فى السودان....باسطة للبنانيين و اليونانيين.

اها يا لنا...لو عندك اى وصية فى موضوع الباسطه ده

الحبيبة سمارت
كل عام وأنت بألف خير
الباسطة دي تخصص ندوية أختي
هم معانا بي جاي لكن عند ناس أبوي
بكرة بسألها ليكي وبجيكي بي سر المهنة
ندى تخصص بتيفور وكعك العيد (عجنة منجضة في النار قبل التقطيع) وكعك العيد (عجنة ني في ني) وغريبة إلخ
لمن أمي جات لتخريجي جابت لي خبايز ندوية البي الألوان زملائنا قايلنها جاهزة(:(:(:
Post: #76
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-26-2009, 08:48 PM
Parent: #18

Quote: كل عام وأنتم بخير....تقبل الله منكم ومنا الصيام والقيام....والركوع والسجود والدعاء...وصالح الأعمال وغفر لنا ما أذنبنا ورحمنا....إنه سميع قريب مجيب الدعاء...آمين ..

الحبيبة لنا...البوست بتاعك دا محتاجنو بالحيل في غربتنا دي...جزاك الله خيرآ...

راشد

الحبيب راشد
يارب تكون قريب وشفيت ليك كم وصفة..
كم وصفة؟راني شايل حالنا قال من بداية رمضان نعيمية نعيمية(:(:
لكن الفاريتيز جاية ورا
محبتي
Post: #31
Title: النعيمية وصفة (1)
Author: lana mahdi
Date: 08-23-2009, 09:17 PM
Parent: #17

Quote:
Quote: Quote: لنا الحقينى بملاح النعيمية
عايزه وصغة دقيقة




بعد اذن ست البوست وصفة سريعة جدا لملاح نعيمية يا منال

1* كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة

وبالهناء والشفاء وصيام مقبول

انتصار

إنتصار الحبيبة
نعيميتك خطيييييييييرة
وسريعة
يازولة البوست بوستيك
تعالي إستلمي وأتحفينا بالوصفات الحلوة
كل سنة وأنت بألف خبر
لنا
Post: #37
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: nazar hussien
Date: 08-25-2009, 07:04 AM
Parent: #17

Quote: 1* كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة




دي نعيمية القطر قام...بتنفع مع العزابة...تجي مع المغرب
وتكشحها في الخلاطة...والنار...وتقطع ليك معاها كسرة هنود
للعايشين في الخليج...او تشربها ساكت للعايشين في امريكا
وما جاورها
Post: #89
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: lana mahdi
Date: 08-27-2009, 09:53 PM
Parent: #37

Quote:
Quote: Quote: 1* كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة






دي نعيمية القطر قام...بتنفع مع العزابة...تجي مع المغرب
وتكشحها في الخلاطة...والنار...وتقطع ليك معاها كسرة هنود
للعايشين في الخليج...او تشربها ساكت للعايشين في امريكا
وما جاورها

الحبيبنزار حسين
تحية ومحبةوتقدير
شقيقي/زوج شقيقتي "باسط" قال النعيمية مستعد ياكلهاويشربهاويشرب بيها الشاي(:(:(:وأنا شرحو
كل عام وأنت بألف خير يا حبيب
لنا
Post: #22
Title: النعيمية...وصفة رقم (2)
Author: lana mahdi
Date: 08-21-2009, 03:12 PM
Parent: #11

Quote: لنا الحقينى بملاح النعيمية
عايزه وصغة دقيقة



كل سنة وانتى طيبة يالنا ....

منال الحبيبة
إنتصار بشير نزلت ليكي وصفة نعيمية شكلها خطيرة
لكن بدون لحمة (قرديحي)(:(:(:
انا بخت ليكي طريقتي البي اللحمة المفرومة
المقادير
1-نص كيلو لحمة مفرومة
2-بصلتين مقطعات سغار(ممكن نستبدل البصلتين بي 5-6 معالق أكل بصلة ناشفة مسحونة)
3-شوية زيت لتحمير البصل
4تلاتة أكواب زبادي او روب
4-تلتين كوب ماء
5-تلاتة طماطم مفرومة مع حبيبة موية
6-تلاتة-أربعة ملاعق أكل دكوة
7-ملعقتين صلصة
8-ملح وفلفل حسب الرغبة
9-ويكة لملايقة النعيمية
الطريقة:
1-نحمس البصل في الزيت لمن لونو يبقى دهبي غامق
2-نضيف الطماطم المفرومة للبصل
3-تضاف اللحمة المفرومةو نخلي المقادير تجغجغ في النار لغاية اللحمة تنجض
4-نضيف الزبادي المخلوط مع تلتين كوب ماء وبعده الدكوة
5-نتبل النعيمية بالملح والفلفل
6-نخفف النار ونضيف الصلصة
7-نلايقها بالويكة
Post: #24
Title: Re: النعيمية...وصفة رقم (2)
Author: رأفت ميلاد
Date: 08-21-2009, 03:39 PM
Parent: #22

Quote: الخمار العندك ليّن ولا كلّوكاب؟؟


Quote: الخمّار ليّن
دى حالة دى ..

يعنى نضال ومقالات وبونية وكوراك .. وتقعدن فى الضحوية زى حبوباتى

رمضان كريم يا لنا

تصوموا وتفطروا على خير

تحيات ليعقوب والوليد
Post: #25
Title: Re: النعيمية...وصفة رقم (2)
Author: توما
Date: 08-21-2009, 07:37 PM
Parent: #24

لناكل سنه وانتي طيبه
Post: #26
Title: Re: النعيمية...وصفة رقم (2)
Author: Rawia
Date: 08-21-2009, 08:03 PM
Parent: #25

تبس:
ملاح النعيمية ضيفي ليهو معلقة حلبة مطحونة ناعم
وماتغطيهو تماما بالغطا ويستحسن تتركشي الحلة
ملاح التقلية عشان تديهو نكهة وطعم ملاحات الاعراس بعد ماتحمري البصلة شريها للهواء عشان تنشف وفي نفس الزيت حمري اللحمة لو فريش ولا ناشفة(شرموط) وضيفي ليها الصلصة وأفضلي قلبيها وضيف بعد كدا الويكة المهم تأكدي إن كل الانقريدينس دي إتحمرت كويس في النار قبل إضافة الماء
وفي النهاية لانه البصلة المحمرة بتمرر شوية حبة سكر تكشحيها في الملاح بتدي نتيجة مدهشة






__________________
دا كله وأنا مضربة في رمضان دا
Post: #28
Title: Re: النعيمية...وصفة رقم (2)
Author: مريم بنت الحسين
Date: 08-21-2009, 08:51 PM
Parent: #26

هيع يا رواية.. لقيتك خطره والله...

انا الtip بتاعت كشحت السكر دي، كنت بشوفها عند امي.. ونسيتها كله كله ..مرقت من بالي...

بعد بكره بسويها ;)

تشكرات

لنا.. الراجل طلع محسي بحب القراصة بس (قولي لي ما عارفاه من زمان محسي!؟).. وما بعترف بأي شي غيرها... اتخيلي اننا لينا اربعة سنين متزوجين... كل رمضان ما نكون سوا لسبب من الاسباب... اول مره اعرف انه العصيدة بالنسبة ليهم ما فطور!!! الله ريحني.. اصلا انا بعرف للقراصة تمام... وماااااااااااااااااا بطيقها...


اصلا انا ناوية اعمل ريجيم السنة دي في رمضان.. كان ينفع (وش روحو مرقت من الريجيمات)

بنت الحسين
Post: #29
Title: Re: النعيمية...وصفة رقم (2)
Author: rosemen osman
Date: 08-22-2009, 11:59 AM
Parent: #28

سلام يا مريم ورمضان كريم ..
فى tipsصغيرة ممكن تسهل موضوع العصيدة وهى الكورن فلور أو النشا أو دقيق الرز
زيدى العجين المخمر دقيق وموية حوالي ستة أضعافه مثلا وخليه فى الثلاجة
لعمل العصيدة ..ناخد جزء من عجين الثلاجة المخمر +دقيق (ممكن أبيض أو دقيق كسرة ) +كورن فلور أو دقيق أرز(ملعقة أو اثنين حسب الكمية)
خلطة العجين دي تكون تقريبا ربع كمية الماء المغلي الفيه رشة ملح ...تقللى حرارة النار وتبدي اضافته شوية شوية مع التحريك بمضرب سلك أو ملعقة خشب(المضرب أفضل)
لحدي ما تتجانس المكونات وتبدأ تتقل
اذا كانت خفيفة وما تقلت أعجنى شوية دقيق أو كورن فلور بالموية وضيفيه مع التحريك
اذا تقيلة أضيفي ماء ساخن مع التحريك
وتسيبيها تستوي


__________________-
طريقتك يا لنا حلوة قى التقلية , برضو ممكن : نخلط الزبادي +الفول المسحون +الدقيق ملعقتين ثلاثة (الدقيق بدل الويكة)
يا راوية عجيتنى حركة اضافة الحلبة
Post: #34
Title: Re: النعيمية...وصفة رقم (2)
Author: مريم بنت الحسين
Date: 08-23-2009, 10:37 PM
Parent: #29

روزمين ازيك..

والله لقيتك خطيرة... حأمشي اجرب طريقتك... لنا صاحبتي مشغولة مع حزب الأمة... :D
Post: #74
Title: عصيدة روزمين
Author: lana mahdi
Date: 08-26-2009, 08:32 PM
Parent: #29

Quote: سلام يا مريم ورمضان كريم ..
فى tipsصغيرة ممكن تسهل موضوع العصيدة وهى الكورن فلور أو النشا أو دقيق الرز
زيدى العجين المخمر دقيق وموية حوالي ستة أضعافه مثلا وخليه فى الثلاجة
لعمل العصيدة ..ناخد جزء من عجين الثلاجة المخمر +دقيق (ممكن أبيض أو دقيق كسرة ) +كورن فلور أو دقيق أرز(ملعقة أو اثنين حسب الكمية)
خلطة العجين دي تكون تقريبا ربع كمية الماء المغلي الفيه رشة ملح ...تقللى حرارة النار وتبدي اضافته شوية شوية مع التحريك بمضرب سلك أو ملعقة خشب(المضرب أفضل)
لحدي ما تتجانس المكونات وتبدأ تتقل
اذا كانت خفيفة وما تقلت أعجنى شوية دقيق أو كورن فلور بالموية وضيفيه مع التحريك
اذا تقيلة أضيفي ماء ساخن مع التحريك
وتسيبيها تستوي

روزمن عصيدتك خطيييييييييرة يا حبيبة وصحي شكلهاساهل
بكرة ناس ندو أختي فاطرين معانا
ياني العاملاها ليهم(:(:(:

__________________-
Quote:
Quote: طريقتك يا لنا حلوة قى التقلية , برضو ممكن : نخلط الزبادي +الفول المسحون +الدقيق ملعقتين ثلاثة (الدقيق بدل الويكة)
يا راوية عجيتنى حركة اضافة الحلبة

روزمين يا حبيبةالتقلية البدون زبادي وفول حجات لكن البالزبادي النعيمية...ملاح (بيج) عملات حناكيش الخليج(:(:(:
حأجرب كشحة الحلبة على طريقة راوية
Post: #44
Title: نعيمية Rawia
Author: lana mahdi
Date: 08-25-2009, 12:59 PM
Parent: #26

Quote: تبس:
ملاح النعيمية ضيفي ليهو معلقة حلبة مطحونة ناعم
وماتغطيهو تماما بالغطا ويستحسن تتركشي الحلة
ملاح التقلية عشان تديهو نكهة وطعم ملاحات الاعراس بعد ماتحمري البصلة شريها للهواء عشان تنشف وفي نفس الزيت حمري اللحمة لو فريش ولا ناشفة(شرموط) وضيفي ليها الصلصة وأفضلي قلبيها وضيف بعد كدا الويكة المهم تأكدي إن كل الانقريدينس دي إتحمرت كويس في النار قبل إضافة الماء
وفي النهاية لانه البصلة المحمرة بتمرر شوية حبة سكر تكشحيها في الملاح بتدي نتيجة مدهشة






__________________
دا كله وأنا مضربة في رمضان دا

أوووووووو رباية الحبوبات ظهرت(:(:
ياجماعة روو دي تربية حبوبات وأحلى ملحات بتعملها
كل رمضان وأنت بألف خير يا حبيبة
Post: #27
Title: Re: النعيمية...وصفة رقم (2)
Author: معتصم ود الجمام
Date: 08-21-2009, 08:04 PM
Parent: #25

العزيزة لنا
كل عام وانت بخير
رمضان التاني على التوالي وانا بدون اسرة
عذابي واكلي شلهته من الشوق الرجاء بوصفات سريعة التحضير
قطر قام وكده البال ما طويل لقصص تحتاج تفاصيل
ولك كامل المودة
Post: #33
Title: Re: النعيمية...وصفة رقم (2)
Author: كمال علي الزين
Date: 08-23-2009, 09:22 PM
Parent: #27

(*)

شكراً يا أم الوليد على البوست الهام جداً

):




_____________________________

حكاية (النعيمية) دي صدقت معانا غايتو
وطلعت محترمة ..جداً ..

):
Post: #91
Title: Re: النعيمية...وصفة رقم (2)
Author: lana mahdi
Date: 08-27-2009, 10:02 PM
Parent: #33

Quote: (*)

شكراً يا أم الوليد على البوست الهام جداً

):




_____________________________

حكاية (النعيمية) دي صدقت معانا غايتو
وطلعت محترمة ..جداً ..

):

الحبيب كمال
ممتاز والله
بالله طبق ووافينا بآخر التقارير(:(:(:
كل عام وأنت بألف خير يا حبيب
Post: #90
Title: Re: النعيمية...وصفة رقم (2)
Author: lana mahdi
Date: 08-27-2009, 09:59 PM
Parent: #27

Quote: العزيزة لنا
كل عام وانت بخير
رمضان التاني على التوالي وانا بدون اسرة
عذابي واكلي شلهته من الشوق الرجاء بوصفات سريعة التحضير
قطر قام وكده البال ما طويل لقصص تحتاج تفاصيل
ولك كامل المودة

الحبيب ود الجمام
ياحليلك، أريتك لو جنبنا ما كان فطرتا براك
المهم تابع بوستينا دة ممكن تطلع بي حاجات كويسة(:(:
Post: #42
Title: Re: النعيمية...وصفة رقم (2)
Author: lana mahdi
Date: 08-25-2009, 12:54 PM
Parent: #25

Quote: لناكل سنه وانتي طيبه

توما الحبيبة كل سنة وأنت بألف خير
ربنا يخلي لينا يوسف الصغير ونشوفو كبران قدامنا
محبتي
لنا
Post: #32
Title: Re: النعيمية...وصفة رقم (2)
Author: lana mahdi
Date: 08-23-2009, 09:21 PM
Parent: #24

Quote:
Quote: Quote: الخمار العندك ليّن ولا كلّوكاب؟؟




Quote: Quote: الخمّار ليّن

دى حالة دى ..

يعنى نضال ومقالات وبونية وكوراك .. وتقعدن فى الضحوية زى حبوباتى

رمضان كريم يا لنا

تصوموا وتفطروا على خير

تحيات ليعقوب والوليد

الحبيب رأفت
ياخي نحنا شعارنا (ح.ح)
حداثة
وحبوبية(من حبوبات)(:(:(:(:
كل سنة وأنت بألف خير أبوي
تحياتي
Post: #35
Title: Re: النعيمية...وصفة رقم (2)
Author: rani
Date: 08-25-2009, 06:08 AM
Parent: #32

اها دا كلو القدرتن عليهو يا حريم البورد؟
البوست ليهو تلاتة ايام ومشي الصفحة الرابعة وما اضفتن شي غير ملاح النعيمية..
قايتو الله يكون في عون المعرسنكم ولا الحيعرسو، بعد نهائة الشهر يبدو انو حيصابو بسؤ التغذية..
معقولة بس نعيمية الشهر كلوووووووو؟
وين مديدة الحلبة
وين القدوقدو ( مش اسمو كدا؟)
الشعيرية
سلطة الروب
ام تكشو
عواسة الرقاق... كفانا الله شر العواسة
الفسيخ المضروب.. قصدي البيتعمل من التونة
ملاح البصارة
ام شعيفة
الرجلة
ام دقوقة
الفطير
الدمعة
.
.
.
" يا رجال البورد اتحدوو"
Post: #36
Title: Re: النعيمية...وصفة رقم (2)
Author: nazar hussien
Date: 08-25-2009, 06:56 AM
Parent: #35

Quote: شقيقتي ووالدتي حسة في السودان قالوا الجو روعة والنسيم عليل


لنا ازيك...

عليل في ياتو حتة في السودان؟ انا جيت من شمال السودان
والجندرية جات من وسط السودان...والدتك وشقيقتك...
ما عايزنك تشفقي عليهم من الحر...والبعوض...والضبان..

الا يكون كلموك بعد ساعة من مطرة اول امس الفي الخرطوم

ساظل مرابض في هذا البوست...لاني بحب المطبخ جدا...

وتصومي وتفطري علي خير
Post: #101
Title: Re: النعيمية...وصفة رقم (2)
Author: lana mahdi
Date: 08-28-2009, 02:25 PM
Parent: #35

Quote: اها دا كلو القدرتن عليهو يا حريم البورد؟
البوست ليهو تلاتة ايام ومشي الصفحة الرابعة وما اضفتن شي غير ملاح النعيمية..
قايتو الله يكون في عون المعرسنكم ولا الحيعرسو، بعد نهائة الشهر يبدو انو حيصابو بسؤ التغذية..
معقولة بس نعيمية الشهر كلوووووووو؟
وين مديدة الحلبة
وين القدوقدو ( مش اسمو كدا؟)
الشعيرية
سلطة الروب
ام تكشو
عواسة الرقاق... كفانا الله شر العواسة
الفسيخ المضروب.. قصدي البيتعمل من التونة
ملاح البصارة
ام شعيفة
الرجلة
ام دقوقة
الفطير
الدمعة
.
.
.
" يا رجال البورد اتحدوو"

الحبيب راني شيل الحال عندك(:(:(:(:(:
أمانة في ذمتك في زول ياكل تونةولا فسيخ في رمضان ويصبح صايم؟حبوبةالله يرحمها كانت بتقول "تاكل سمك او فسيخ وتشرب موية تموت إنتا وتحيي السمك"...أها داير تصوم بيهو؟؟؟ حتموتو إنتوالإتنين يا حبيب(:(:(:
سلطةالروب ختينا الوصفة والتقلية في الطريق وأم شعيفة وأم دقوقة إلخ
أصبر البنات ما مقصرات
كل سنة وأنت بألف خير ورمضان كريم
Post: #38
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: SHIBKA
Date: 08-25-2009, 07:52 AM
Parent: #7

مريم بنت الحسين


Quote:


بس عندي عقده وااااااااااااااااااااحده... عقدة ملبّكة...

العصيدة!



العصيدة دي عملت لي عقدة
لانو اي زول اسالو يديني طريقة مختلفة

لغاية ما واحدة صحبتي قبل يومين شرحتها لي واحدة واحدة

وعملتها في نفس اليوم
رهييييييييبة طلعت وظابطة وما قوية وما مرة
يعني الخمار برضو كان مظبوط


لو دايرة الشرح المفصل حاضرين
Post: #39
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: SHIBKA
Date: 08-25-2009, 08:18 AM
Parent: #38

لنا
الليلة ولي بكرة (لانو الليلة عايزة اعمل دمعة جداد مع قراصة) بجرب النعيمية بتاعتك دي
اذا ظبطت بجيك جارية جري بعدين
Post: #40
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: جعفر محي الدين
Date: 08-25-2009, 08:31 AM
Parent: #38

الأميرة لنا كل سنة وإنت والأسرة بألف خير ورمضان كريم على جميع البورداب وتصوموا وتفطروا بخيرين
Quote: وللمتزوجين العملو ليهم خيانات والمدام والوليدات مشو يصومو في السودان
نحن من ديل السنة دي يا لنا أهم حاجة عندي التمر والبليلة (أموت في البليلة) وحاقر ليك بشربة العدس وللعشاء القطر قام وهاك يا رشوشة ووصفة القطر قام (السليقة) لشخص واحد كالتالي 1- 250 جرام لحم ضاني 2- 1 بصلة كبيرة الحجم 3- 1 حبة طماطم حمراء 4- 3 فصوص توم 5- تشكيلة من البهارات (قرفة + هيل + شمار + كسبرة + ليمون مجفف + فلفل أخضر) 6- قطعة واحدة من الجزر 7- قطعة واحدة بطاطس افتقد بشدة سلطة الروب والجبنة الهدندوية بطقوسها الرهيبة ويوم الواحد يكسل يرجع للفول والطعمية
Post: #41
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: مريم بنت الحسين
Date: 08-25-2009, 11:33 AM
Parent: #38

Shibka
ألحقيني النبي ...
والله صحي راجلي محسي... لكن انا من رفاعة... نموت في العصيدة... وناوية اجر معاي ولدي... القراصة دي بتخلي البطن تتحجر بعد الصيام...

وريني عقدتك فكّت كيف

الوصفة بتاعت روزمين تديك احساس professional كده... لكن انت شكلك كنت مورطه زيي كده

محبتي وكل سنة وانت طيبين
Post: #43
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Elsanosi Badr
Date: 08-25-2009, 12:59 PM
Parent: #41

Quote: انا بخت ليكي طريقتي البي اللحمة المفرومة
المقادير
1-نص كيلو لحمة مفرومة
2-بصلتين مقطعات سغار(ممكن نستبدل البصلتين بي 5-6 معالق أكل بصلة ناشفة مسحونة)
3-شوية زيت لتحمير البصل
4تلاتة أكواب زبادي او روب
4-تلتين كوب ماء
5-تلاتة طماطم مفرومة مع حبيبة موية
6-تلاتة-أربعة ملاعق أكل دكوة
7-ملعقتين صلصة
8-ملح وفلفل حسب الرغبة
9-ويكة لملايقة النعيمية
الطريقة:
1-نحمس البصل في الزيت لمن لونو يبقى دهبي غامق
2-نضيف الطماطم المفرومة للبصل
3-تضاف اللحمة المفرومةو نخلي المقادير تجغجغ في النار لغاية اللحمة تنجض
4-نضيف الزبادي المخلوط مع تلتين كوب ماء وبعده الدكوة
5-نتبل النعيمية بالملح والفلفل6-نخفف النار ونضيف الصلصة
7-نلايقها بالويكة


يا لنا الله يخليك لاهلك واولادك قولي امين ...

عجبتني وصفتك واشيل واترجم ...لكن بس عايز اسألك (عليك الله ما تضحكي فيني)

السؤال هو : النعيميه يعني شنو وبلقوها وين!!!!!!!!!!

وبعدي جادي والله ...وبعدين (البتاعه) دي الاسمها النعيميه دي بشربوها شراب ...صاح!!!! ولا بغمسوها في الكسره

يعني ممكن (تجقمها) عادي وما يودوك المستشفي!!!!!!


______________________________________
*رمضانكم كريم كلكم ...
Post: #45
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rani
Date: 08-25-2009, 06:07 PM
Parent: #43

مريم كدي خليك من ناس عجين مخمر وختي في التلاجة والحاجات دي
خد دي اسهل واسرع طريقة لعمل العصيده
1- سخني موية في النار مع شوية ملح وخليها تغلي
2- كبي الدقيق بتاعك في طاسة ولخبطيهو بي موية باردة الي ان يبقي كتلة واحدة.
3- اضيفي العجينة للموية السخنة وافضلي صوتيها الي ان تخلص.
.
.
ملحوظة: بتلخبطي العجين بموية باردة، كي تتجنبي عملية كرضمة الدقيق في الموية السخنة

ودي صورة بالوصفة اياها
Post: #46
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-25-2009, 06:27 PM
Parent: #45

Quote: السؤال هو : النعيميه يعني شنو وبلقوها وين!!!!!!!!!!


السنوسى ياود ابوى بالغت عديل انت بجدك؟؟

النعيمية ملاح الروب الاحمر ...

فى نوعين من الروب
1/الروب الابيض
2/الروب الاحمر (النعيمية)

الروب الابيض دا لافيهو شرموط ولافيهو طماطم ولا صلصة ...

بالرغم من مكوناتو البسيطةوالساهلة لكن ماكل النسوان بعرفن
يسون ياقول خالتى زهرة .....


لنا .. سلااااام ياخ جيت داخلة لفت ..السنوسى دا هجمنى عديل

والله ياجماعة انا حاجات المطبخ السودانى دى بعرفها من طق طق للسلام عليكم
لكن حركات اجى اكتب واجيب مقادير دى مابتنفع معاى ...

بحس بيها مابتظبط على الواقع لانو اكلنا دا والله معقد حبيتين ..

التقلية دى تخصصى وفى فنيات كدا بتاعة ناس حرفين
وحركات تكب المقادير كلها والقطر قام دى حركات ناس مدينة وناس حناكيش نحن ماادونا ليها


والله يالنا اعتمدينى معاك
Post: #47
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rani
Date: 08-25-2009, 06:29 PM
Parent: #45

لنا ازيكـ
النعيمية بتاعتك لكن ما طلعت مبالغة... عملتها باللحمة المفرومة ودقيقة بدل الويكة زي ما قالت روز امين.

دي صورة لباقي امس




مع فائق شكري
راني السماني
Post: #48
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rani
Date: 08-25-2009, 06:37 PM
Parent: #47

Quote: النعيمية ملاح الروب الاحمر ...

فى نوعين من الروب
1/الروب الابيض
2/الروب الاحمر (النعيمية)


اميرة
اها بتاعتنا دي ما نعيمية ولا شنو؟
لانو لا لونها احمر ولا ابيض......... اصفر عديل
Post: #49
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: رأفت ميلاد
Date: 08-25-2009, 07:41 PM
Parent: #48

Quote: يا لنا الله يخليك لاهلك واولادك قولي امين ...

عجبتني وصفتك واشيل واترجم ...لكن بس عايز اسألك (عليك الله ما تضحكي فيني)

السؤال هو : النعيميه يعني شنو وبلقوها وين!!!!!!!!!!

وبعدي جادي والله ...وبعدين (البتاعه) دي الاسمها النعيميه دي بشربوها شراب ...صاح!!!! ولا بغمسوها في الكسره

يعني ممكن (تجقمها) عادي وما يودوك المستشفي!!!!!!
هسة السنوسى ده كان قالوا ليه "ملاح المرس" يقع من طوله ولا شنو

غايتو طلب لكن شكلو قاسى مع الأفنديات الشايفن ديل..

ياهو ملاح المرس .. فى الخرتوم كنا بنهاجر ليه فى الحاج يوسف ..

مافى واحدة تتجلى لينا
Post: #50
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Elsanosi Badr
Date: 08-25-2009, 07:49 PM
Parent: #49

اميره بت ابوي الشيخ العزيزه ...
Quote: السنوسى ياود ابوى بالغت عديل انت بجدك؟؟
تعرفي والله لامن كتبت السؤال الفوق ده كنت متذكرك وطاريك ...وقلت هسي بت ابوي تجي داخله ...

طبعا سؤال النعيميه ده من زمان في راسي علا مختشي منو ساي ...
تصدقي يابت ابوي الاكل (هيلنا) ده لي منه مده طويله خلاص ومعرفتي بيهو زي علاقتي باللغه الصينيه ...تصدقي يا بت ابوي (الابري ) نسيت طعمه كيف زاتو

باقيلك يا بت ابوي تاني الواحد فيهو عمار ...امي بتقول هي مستعوضه فيني العوض ... وراسمه علي ناس عمرو وغزلان ...اخر مره كانت في زياره لينا ...قالت لي في الدنيا دي لو في زول حيموت من الجوع والمشغوليات تبقي انت ....طبعا اخوك كان بيشرب موية الحفير والبرك ...
عندي صاحبي اسمه دكتور علاء كلما يضرب لي يقول لي وينك يالمرحوم (كنايه عن اي زول متزوج اجنبيه) ...ويشيل ويفطس فيني بالوصفات الطعاميه ...



___________________________________________________________________
* معليش يالنا بس عندي تداعيات مع بت ابوي الشيخ قلت بوست الوصفات ده احسن مكان ليها كيفك مع رمضان الخليج المفرط في السخانه ده ...
Post: #53
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Rawia
Date: 08-25-2009, 08:06 PM
Parent: #50

تيبس
المرة دي موجهة لراني السماني ..عشان مواظبته وهمته في البوست
*الجرجير والبقدونس والكسبرة الخضراء لو لقيتهم دبلانات وشكلهم مافريش
تختهم في ماعون وتفتح فيهم الحنفية الباردة ونقطة من الصابون السائل بتاع غسيل المواعين
وتخليهم فترة ربع ساعة بعد كدا تشطفهم من الصابون حيبقوا مفرهدين ولونهم حيرجع أخضر جميل
* العصيدة بتاعتك البايتة دي أعمل ليها حمام مائي قبل الاكل بربع ساعة (أحسن كتير من المايكرويف)
Post: #56
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-25-2009, 08:20 PM
Parent: #50

Quote: طبعا سؤال النعيميه ده من زمان في راسي علا مختشي منو ساي ...
تصدقي يابت ابوي الاكل (هيلنا) ده لي منه مده طويله خلاص ومعرفتي بيهو زي علاقتي باللغه الصينيه ...تصدقي يا بت ابوي (الابري ) نسيت طعمه كيف زاتو


السنوسى ...سلااااام
لا حياء فى العلم وخسوسا علوم الطبخ ياالسنوسى
لانو مافى زول ببقى غيرو
اها تعال البوست واسال ونحن نجيب ..

قصرنا معاك ؟؟

والله ليك على خطوة بخطوة انشاءالله كل يوم خمسة نخلص حلة ما عندك مشكلة
بس خلى يكون عندك استعداد وهمة ..


مشتاقين والله
Post: #51
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Elsanosi Badr
Date: 08-25-2009, 07:57 PM
Parent: #49

العزيز رأفت ...تحياتي رمضانا ورمضانك كريم
Quote: هسة السنوسى ده كان قالوا ليه "ملاح المرس" يقع من طوله ولا شنو
ملاح المرس بعرفو لكن متذكرو رهاب رهاب ... ياخ ده مش الملاح العندو زي سبعتاشر طعم داك ..في الصحن ريحتو براها ..وجوه الخشم ريحتو كيف كيف ...وتحت قعر اللسان عندو طعم تاني ...

رأفت والله اخوك كده حينفضح ....
Post: #52
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Raja
Date: 08-25-2009, 08:01 PM
Parent: #49

أححححححم..
بعد السلام والتحايا الخريفية الغائمة رمضانكم كريم..

حأجيك يا لنا وضيوفك بروااااقة لأحكي وأوصف الأكل اليمني الغرقانة فيهو اليومين دي..
فما بين اللحوح، والشفوت والسلتة (ما السلطة).. إتجهجهتا وريقي جري.

وما حأنسى حلوى (زنود الست) من السنة الفاتت وعدت بيها محمد نور. حأجيبها بالصور هذه المرة. ولقيتها قااااعدة محكًرة عند الحلواني..
زنود الست حلوى عراقية. تاكل ما تدي الجنبك. وشكلها عسل ومبغبغ.. هههههههه

اليمنيين بيفطروا كالتالي:
بعد الآذان ويحللوا صيامهم بالتمر والعصير والقهوة اللونها فاتح (إكتشفت إنها ليست البن وإنما قشر البن!!). يأكلوا حاجات خفيفة زي السمبوسك والشفوت. وهو قراصة زي (الأنجيرا) الحبشية. يقوموا يطعموها بالزبادي والخضرة (البقدونس والجرجير والحاجات الماقاعدة أقربها في السلطة).
وبعد كده يهدًوا اللعب.. والحكاية دي إسمها الفطور..

أها بعد داك يمشوا يصلًوا. ويرجعوا تاني للجولة التانية والأسمها العشاء.. وفيها بياكلوا كل الأطاييب من كبسة ودجاج ومرق وحاجة غريبة للغاية أكلتها الليلة إسمها (فتوت) أنا يا مؤمن يا مصدق قايلاها فتة.. لقيتها بيض بالعسل والمفتوت عيش مخبوز مخصوص.. كانت مفاجأة حلوة غايتو..

طبعا يا لنا أي أكلة أسال إسمها شنو ويقولو لي.. أتذكر محمد صبحي في رحلة المليون مع سماح أنور و(الزغلاج)..

ما بين المطرة الليها 4 يوم ما إنقطعت والجو الخرافة.. وبين كرم اليمانيين أنا غرقت واللي كان كان..

ورمـــضـــان كـــريـــم على الكل..
Post: #54
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-25-2009, 08:07 PM
Parent: #52

Quote: اميرة
اها بتاعتنا دي ما نعيمية ولا شنو؟
لانو لا لونها احمر ولا ابيض......... اصفر عديل


رانى والله وماطالبنى حليفة كان سالتنى بقول ليك دا ملاح عدس راسو عدييييل

بس الصورة ابت تنزل شان الناس تربط وكدا
لادى نعيمية امريكا ما بعرف

حاول حاول ...
Post: #55
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-25-2009, 08:14 PM
Parent: #54

Quote: غايتو طلب لكن شكلو قاسى مع الأفنديات الشايفن ديل..

ياهو ملاح المرس .. فى الخرتوم كنا بنهاجر ليه فى الحاج يوسف ..

مافى واحدة تتجلى لينا


اتحداك يارأفت... ماقاسى ...

بس فى البداية ورينى علاقة الحلب بالمرس شنو؟؟؟

وليك على اتجلى ....

اها انت حتطبق ولا حتعبنى ساى ؟


كل سنة وانت طيب وبالف خير يارأفت
Post: #57
Title: شوربة العدس
Author: lana mahdi
Date: 08-25-2009, 09:36 PM
Parent: #55

شوربة العدس
المشكلة أنا ما بعرف أطبخ بالمقادير لكن بحاول أقرب المنظر
2 كوب عدس أصفر مغسول
5 أكواب ماء(ممكن تزيدوا الماء بعدين لو حسيت قوام العدس تقيل)
ملح-فلفل أسود مسحون-كسبرة مسحونة-*توم مفروم-دكوة-2 بصلة مقطعة لأرباع-8فصوص ثوم سالم
الطريقة:
يغلى الماء
يضاف العدس و البصل المقطع أرباع و التوم السالم والملح و الفلفل و الكسبرة
يترك الخليط على النار حتى يتهرد العدس(لو استخدمتوا حلة الضغط البريستو قفلتين كفاية)
بعد تمام النجاض يصفى العدس
تضاف له الدكوة (حوالي 4-5 ملاعق أكل) والمزيد من الفلفل الأسود و الكسبرة المسحونة
يتم التأكد من أن الملح مظبوط
على ناء هادئة يتم عمل قدحة التوم بإضافة التوم المفروم للزيت المقدوح..
ننتبه حتى لا يتحرق التوم (و الأفضل استخدام عوازل البوتجاز التي تهديء النار و في حالة العدم يستخدم غطاء علبة لبن فاضية و هي مهمة عند طهي الأرز)عندما يصبح لون التوم ذهبي فاتح يضاف للعدس و تغلق الحلة مباشرة حتى يتم الاستفادة من رائحة القدحة بأكملها..(المصريين بيشهقوا لمن يطسوا القدحة في شوربة أو في ملوخية"(:(:
في هذه الأثناء نكون مجهزين عيش طوسطة (كايزر- سمون) مقطع لشرائح عريضة مدهونة بالزبد أو الزيت و مقمرة في الفرن..يقدم العدس مع شرائح الخبز و شطة خاصة عبارة عن طماطم مفرومة ناعماً و معها شطة خضراء مفرومة دراش دراش و ملح..
*التوم المفروم في المطبخ مهم جداً لأنه مستخدم تقريباً في كل الوصفات .. تحضر منه كمية كبيرة بتقشير التوم و التخلص من الطرف القاسي وفرم التوم مع الزيت (مش كتير الزيت) في خلاطة حتى يصير ناعماً جداً جداً..يوزع الخليط على أكياس تحفظ في فريزر التلاجة......
Post: #58
Title: شوربة الدجاج أو اللحم بلسان العصفور
Author: lana mahdi
Date: 08-25-2009, 09:40 PM
Parent: #57

شوربة الدجاج أو اللحم بلسان العصفور

أولاً لتحضير شوربة الدجاج (يمكن استبدال الدجاج باللحم)

دجاجة متوسطة (يمكن استبدالها بنصف كيلو لحم)
5أكواب ماء
ملح
3 بصلات مقطعة لأرباع
3 أعواد قرفة
7 حبات حبهان سالمة
7 حبات توم
ملعقة صغيرة قلقل أسود سالم
تغلي المقادير حتى تمام نضج الدجاجة و تصفي الشوربة
لعمل دجاج محمر:
يمكن أن تحمر الدجاجة كاملة في زيت غزير أو توضع في الفرن كاملة لتشوى
يمكن أن تقطع الدجاج ل6 قطع و تغطى كل قطعة بخليط مكون من دقيق أبيض نمرة 1 و القليل من الفلفل الأسود المسحون و الكسبرة مسحونة و ملح و القليل من البيكنج باودر ثم يتم تحميرها..البيكنج باودر يجعل الدجاج لا يمتص الزيت و تجعله مقرمشاً..
لعمل شوربة لسان العصفور:
يؤخذ مقدار من الشوربة ويوضع على النار و يضاف له لسان العصفور(مكرونة صغيرة تشبع لسان العصفور) و في حال عدم وجود لسان العصفور تستخدم المكرونة العادية المقصوصة البتشبه خراطيش الموية المقطعة(:(:(أصغر حجم) أو مكرونة الحروف أو مكرونة الأرقام إلخ)
عند تمام نضج المكرونة يضاف القليل من الدكوة حسب الرغبة و نقفل النار....
Post: #59
Title: شوربة الدجاج بالكريمة
Author: lana mahdi
Date: 08-25-2009, 09:44 PM
Parent: #58

شوربة الدجاج بالكريمة

1-مقدار من شوربة الدجاج
2-مقدار مساو له من اللبن الحليب
3-دقيق أبيض نمرة 1
أو كورن فلور
4-ملح
5-فلفل مسحون
الطريقة
توضع الشوربة على النار و يضاف لها اللبن الحليب وتترك حتى الغليان
يضاف مقدار قليل من الدقيق الأبيض نمرة 1 أو الكورن فلور
ممممممممم يعني مثلاً لو الشوربة مع الحليب عملو لتر نضيف ليهم 4 ملاعق أكل دقيق أبيض أو 3 ملاعق أكل كورن فلور
الموضوع محتاج خفة يد شديدة حتى لا يتدردم الدقيق جوة الشوربة ، يعد ضرب الدقيق أو الكورن فلور جيداً بمضرب بيض يدوي أو بمضرب كهربائي يضاف الفلفل الأسود والملح ويترك الخليط على نار هادئة حتى يغلظ القوام (يبقى زي قوام النشا) ثم تغلق النار و تبعد الحلة بعيداً عن البوتجاز لأن وضعها على عين البوتجاز الساخنة حتى بعد إغلاقه سيجعل قوام الشوربة يغلظ كثيراً و هو غير مستحب..
Post: #60
Title: شوربة الكوارع
Author: lana mahdi
Date: 08-25-2009, 09:47 PM
Parent: #59

شوربة الكوارع
لكل كيلو كوارع بقر
2 لتر ماء تقريباً
ملعقة و نصف أكل هبهان
6 أعواد قرفة
4 بصلات مقطعات أرباع
راس توم كامل مقشر
1 ملعقة طعام فلفل أسود سالم
ربطة كسبرة خضراء
ملح
4 ورقة غار (لاورا)(إن وجدت)
الطريقة
يغلي الماء
توضع الكوارع مع الماء المغلي بعد غسلها جيداً بالعجين
تترك على النار وعندما تظهر الريمة تكشط بالكمشة
تضاف لها كل المكونات التي بالمقادير
تترك حتى تمام النضج و تصفى الشوربة للتخلص من البهارات
تقدم الكوارع مع عيش مقطع مسقى بالشوربة حقتها
Post: #61
Title: Re: شوربة الكوارع
Author: رأفت ميلاد
Date: 08-25-2009, 10:34 PM
Parent: #60

Quote: اتحداك يارأفت... ماقاسى ...

بس فى البداية ورينى علاقة الحلب بالمرس شنو؟؟؟

وليك على اتجلى ....

اها انت حتطبق ولا حتعبنى ساى ؟


كل سنة وانت طيب وبالف خير يارأفت
أميرة الشيخ أموت ليك وتدفنينى كان ما كتبتى الوصفة
حلب شنو ياخ .. نحن الحلب زاتم ما معترفين بينا ..

إنتى ما عارفة المدفون .. حبوبتى كانت بتهشكنى .. حاج أقود كده جقجقنا .. وبالكربشن كده كربشنا ..

ختى لى الوصفة .. بشرحا ليك .. الغرابة يمتنعوا

مستنيك

بطبقا ليك على

تصومى وتفطرى على خير
Post: #63
Title: Re: شوربة الكوارع
Author: مريم بنت الحسين
Date: 08-25-2009, 10:59 PM
Parent: #61

والله يا rani.. بالغته عديل كده..

لا خلاص... دي لازم اجربها.. .. وبجي بوريك النتيجة.. :)

اوضعتم تخاجلنا..
Post: #62
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rosemen osman
Date: 08-25-2009, 10:56 PM
Parent: #48

يا حليلك والله يا راني...ما قصرت تب ,بس شكلك نسيت الصلصة ولا الطماطم المخلوطة ..
وصفة العصيدة الفوق للناس العندها خمار أما المساكين فبعملوها بالزبادي والكورن فلور علشان تدي حموضة شوية
ما صعبة ..تقلي الموية, وتعجن شوية الدقيق أو الكورن فلور+الزبادي كويس ,,قوامهم ما يكون جامد يعنى تقدر تكبه
وتضيفه شوية شوية مع التحريك بمضرب سلك لحدي ما يتقل شوية وتتجانس تخليها تنضج (يعنى ما لازم تفضل تحركها لحدي ما تنضج)
وتحت الخدمة يا أخي أنت وكل الناس البعيدة , بس قولو عاوزين وصفة شنو وأخواتى وأنا جاهزين ..
_____________________________




سلام سنوسي ورأفت ورمضان كريم
Post: #64
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: ماجدة عوض خوجلى
Date: 08-25-2009, 11:51 PM
Parent: #62

اتاريكم غطسات بجاى وانا اقول سيدات وانسات المنبر ديل وينم .. كويس انا بمشى كمان اجيب كراسى واجيكم ..
لنا حبيبه .. كل عام وانتى بخير .. اذا سمحتى انا بس عايزه اعرف طريقة طيخ ملاح الارقام والعلامات الفى عنوانك ده ...
تسلمى يارب من كل شر...
Post: #65
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Rawia
Date: 08-26-2009, 00:30 AM
Parent: #64

ماجدة ياحبيبة
كل سنة وإنت طيبة وسمير بخير وعافية

العزيز السنوسي
ربنا يهنيك ويسعد أيامك ببركة الشهر الكريم








________________
ياراني أول ما القى لي فرقة صغيرة بجيب ليك وصفة العصيدة بتاعة أهلنا في الجنوب
ســــــــاهلة وماعاوزة ولا خمار ولا زبادي ولا غيرو لكن عاوزة إمكانات بدنية وقوة شوية كدا
ظريفة جدا وممكن تتاكل باي نوع طبيخ ولا ملاح
كمان نفسي لروزمين كعربون محبة أوصف ليها طريقة عمل الارز الافغاني
Post: #66
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Elsanosi Badr
Date: 08-26-2009, 01:04 PM
Parent: #65

امـــــــــــــــــــــيره بت ابوي...
Quote: اها تعال البوست واسال ونحن نجيب ..

قصرنا معاك ؟؟
عارفك ما بتقصري والله ...

ياني الحارس البوست ده وشايل قلمي ..بس المشكله في الزمن يا اميره ...

والشكر موصول لي كل الاخوات الساهمو هنا ...

عارفه يا اميره اخوك امبارح فاطر بتلاته بلحات (بقيت صحابي بس) فتشت البرازيل (حته قريبه من ساوباولو )عشان القي حاجه تتاكل ما لقيت ... باقي اخوك عوووواف وجني وجن اللغاويس ..




__________________________________________________________
*روز وراوايه كل سنه وانتو طيبين وتصومو وتفطروا علي خير
Post: #67
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-26-2009, 02:45 PM
Parent: #66

Quote: أميرة الشيخ أموت ليك وتدفنينى كان ما كتبتى الوصفة
حلب شنو ياخ .. نحن الحلب زاتم ما معترفين بينا ..

إنتى ما عارفة المدفون .. حبوبتى كانت بتهشكنى .. حاج أقود كده جقجقنا .. وبالكربشن كده كربشنا ..



غايتو يارافت من اموت ليك وتدفنينى دى وحاةالله فيك عرق عرب* النيل الابيض
كان ماخايفة الكضب

ياابوى تبرى وتستبرى ...

وملاح المرس دا مخصوص لرافت لانو متاكدة باقى الناس ديل بكونو ما مصدقين
انو فى ملاح اسمو مرس من اصلو... مواليد التسعينات والشهادة العربية والامريكية
وشهادة لندن يمتنعون ....

__________________________________
عرب دى ماعتدها علاقة بعروبة الدم واللسان واليد
Post: #68
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-26-2009, 03:19 PM
Parent: #67

Quote: ختى لى الوصفة .. بشرحا ليك .. الغرابة يمتنعوا

مستنيك

بطبقا ليك على

تصومى وتفطرى على خير


1/لوبا(لوبيا)منضفة ومغسولة كويس(نص كيلو)
2/مرس... المرس زاتو نوعين ..شحم ا ومصران(الاتنين بكونو مخمرين... وبالسودانى معفننهم )
3/ ملعقةشاى ويكاب او عطرون او كربونات(يعنى ملعقةواحدة حسب الرغبة)
ديل وظيفتهم بكتلو اللوبا وباقى الحاجات وبخلوها ناعمة
4/بصلة كبيرة .. حبة طماطم.. قطعة فلفلية خضراء... (مفرومين او مقطعين قطعة صغيرة )
5/ويكة
6/ معلقتين دكوة
7/بهارات حسب الرغبة ويفضل التوم والشمار وشطة خضراء (3/4 قرون)...ملح

الطريقة:[/RED

1/نضع اللوبا المغسولة فى حلة ونضيف ليها موية...(الموية غايتو تقديرية )
2/لماتاخد ليها فورة واحدة طوالى نضيف المرس ونضيف عليهو البصل والطماطم والفلفلية مع التحريك المستمر
3/نضيف الويكاب او العطرون اوالكربونات وهنا لازم الواحد/ة يكون حريف/ة .. لانو المحتويات دى بتفور بسرعة لازم
نلحقها بالتحريك المستمر ...
تقريبا نص ساعة الحاجات دى كلها بتكون نجضت واستوت نقوم نضيف ليها الويكة
بالسودانى نلايقة ...اذا عايز/ة الملاح خفيف ما تكتر الويكة..
4/ندوب الدكوة بشوية موية ونضيفها
5/نضيف الملح والتوم والشطة القرون ونخلى زى خمسة دقائق ونطفى النار

غايتو دا الحاصل و والله دى الطريقة الوحيدة ومجربة حتى اسالو امى حليمة بت محمود(امى بتفتكر البت تعرف اول
حاجة حاجات المطبخ السودانى وناس بيتزا وباشيميل ملحوقات

Post: #69
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: رأفت ميلاد
Date: 08-26-2009, 05:04 PM
Parent: #68

أميرة بت الشيخ
تب ما قصرتى معاى ..
Quote: غايتو يارافت من اموت ليك وتدفنينى دى وحاةالله فيك عرق عرب* النيل الابيض
كان ماخايفة الكضب
أقول ليك الكربشن تقولى لى هبانى ؟ .. لكن ما خاتين النيل الأبيض طالما الجزيرة أبا بهنوك .. وما ختيتى أهلنا الغرابة .. ياهو النفاج الجابنا الخرتوم فى طوفان سيدى المهدى

ضحكتنى دى
Quote: وملاح المرس دا مخصوص لرافت لانو متاكدة باقى الناس ديل بكونو ما مصدقين
انو فى ملاح اسمو مرس من اصلو... مواليد التسعينات والشهادة العربية والامريكية
وشهادة لندن يمتنعون ....
لكن أنا زاتى طلعت أفندى أكل ساى .. المرس المصران المخمر (المعفن) !! .. قايلو شحم ساكت ..

دى يحلوها كيف .. كلو بتلقى .. يعفنوا كيف ..

لكن ليك على أجربه ليك .. لكن يانى المبدل الشحم والمصران بزبده معفنة حقت الخواجات هنا .. واللوبيا خشم بيوت فى دكان التاميل ..

أكان طمعت كدة ونطيت للشرق .. وسألتك من صيادية .. ألقاك كيف .. ممكن تستعينى بالحجة مافى مشكلة ..

تعرفى السودان خرب طبعنا .. الدايرو الزول يمشى ليه فى محله ياكله .. وعرست حلبية من نوع شوربة الدجاج بالكريمة بتاعة لنا مهدى الباقى كله ما تلقى غير (برى يطرشنى) ..

شكراً جزيلاً يا أميرة
Post: #70
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: وجن
Date: 08-26-2009, 06:09 PM
Parent: #69

كل سنة وانت طيبة يا لنا
وكل زوار البوست الكرام
ورمضان كريم
تصومي وتفطري على خير
ومشكورة على البوست الجميل دا
Post: #71
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-26-2009, 06:09 PM
Parent: #69

Quote: لكن أنا زاتى طلعت أفندى أكل ساى .. المرس المصران المخمر (المعفن) !! .. قايلو شحم ساكت ..


رأفت....

وكمان كان بقن الاتين فى واحد تبقى تمام التمام يعنى مصران شحمان ومعفن
مش فى مصارين بتكون ملبكة بالشحم ؟.. اها دى احلى حاجة


عليك الله اسى الوصف دا وقع ليك ولا ساى فوتنى؟؟

ياخ نحن ناس بث مباشر من المطبخ وللداير المشورة

ندى الزول الليلة يقطع البصل وبكرة ينضف اللوبا وبعدو يدق التوم وهكذا.. زى ماامى كان بتعمل لينا

اتوماتيكلى بتلقى روحك بقيت شيف كبير ..من غير ورقة وقلم ...

تدفنى .. اموت ليك يا رافت

كنت قايل المرس شنو ....؟
Post: #72
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: تيسير عووضة
Date: 08-26-2009, 07:31 PM
Parent: #71

بوست بتاع عضة
يا للسعادة





أنا هسي شبعانة بجيكم بكرة لمن أجوع
قالوا بوست العضة بيجيب زولو لي حولو ..
Post: #73
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-26-2009, 08:03 PM
Parent: #72

Quote: بوست بتاع عضة
يا للسعادة


اووووو ناس الكمونية وصلو ....


مراحب ياتيسير والله فقدتك
Post: #77
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Amira Elsheikh
Date: 08-26-2009, 08:50 PM
Parent: #73

Quote: شوربة الدجاج أو اللحم بلسان العصفور


نح ننقول مرس لنا تقول لسان عصفور ...


الله يستر
Post: #78
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: رأفت ميلاد
Date: 08-26-2009, 09:11 PM
Parent: #77

الصيادية يا أميرة ينوبك ثواب
Post: #79
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Rawia
Date: 08-26-2009, 09:43 PM
Parent: #78

Quote: الصيادية يا أميرة ينوبك ثواب

رأفت كل سنة وإنت طيب
ممكن أديك وصفة الصيادية بتاعتي
المقادير
سمك بحري ويفضل رؤس السمك
بصلة كبيرة
أرز
وبهار حسب الطلب
تحمر البصلة في زيت لغاية مايبقى لونها غامق(يستحسن تقطيع البصلة ناعمة)
تغسل رؤس السمك وتوضع في البصلة مع قليل من الماء لتغلي (مدة عشرة دقائق)
يغسل الارز ويوضع في المقادير السابقة بعد تبهيرها
توطى النار الى أن ينضج الارز
Post: #80
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: رأفت ميلاد
Date: 08-27-2009, 12:49 PM
Parent: #79

شكراً كتير يا راوية
ورمضان كريم
Quote: تغسل رؤس السمك وتوضع في البصلة مع قليل من الماء لتغلي (مدة عشرة دقائق)
يغسل الارز ويوضع في المقادير السابقة بعد تبهيرها
توطى النار الى أن ينضج الارز
زى ما قلت لبت الشيخ نحن ناس أكل بس على الجاهز بس جار علينا الزمن .. أها طبعاً الرز أضيفه بعد سحب عضام الراس ..وما شايفك جبتى سيرة توم ؟ ..

الله يرحمه سليمان أخوى بخترع فى الطبيخ لكن دايماً تصدق .. هو العلمنى المرس وبلاوى تانى متلتلة ..

مستنيكى

وكل سنة وأنتى طيبة
Post: #81
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: معاوية المدير
Date: 08-27-2009, 01:20 PM
Parent: #80

يا جماعة أجدعونا بطعمية, نحن ناس
سندوتشات ساااااااكت...



رمضان كــــريمــ ...
Post: #82
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: rosemen osman
Date: 08-27-2009, 01:46 PM
Parent: #81

شوربة سهلة وجميلة للمشروم
نحمر بصلة لحدي ما تصفر ونضيف مشروم بعد تقطيعه وازالة الجزء الصلب ..لما يدبل المشروم مع التقليب نضيف شوربة أو ماء ومكعب مرقة ونطعم بشوية ملح وجوزة طيب
أو قرفة
بعد ما يغلي نخلطه ونصفيه بمصقي سلك ( فى ناس ما بصفوه لكني حبيت المصفي) ونضيف نص كوب كريمة ..( بعد اضافة الكريمة ما نرجعها النار تقدم طوالي)
نفس الطريقة يمكن عمل شوربة القرنبيط والبروكلي وومكن نضيف توم مع البصلة فى الأول اذا حبينا

الأخ معاوية
الطعمية..
تشتري كبكبي وتبله لحدي تانى يوم
تقرمه فى ( food processer) أو أي خلاط طعام أو مفرمة مع بصل وشمار أخضر وتوزعه فى أكياس وتدخله الفريزر للأيام الجاية
علشان تعمل منه
تاخد مقدار يناسبك تضيف له شوية ملح , نص ملعقة باكنج باودر وبيضة وشوية توم وسمسم ,,تقلى الزيت وترمي الطعمية



________________________
(tips>>لخليط الطعمية نضيف شوية خل وكركم ) ودا ما مهم
يا راوية وين الرز ...
ليك وكل البنات لنك لمنال العالم شوفوا قسم المجلات فيه وصفات رهيبة للمندي وحلويات بالتفاح http://www.manalonline1.com/index.php
ودا كمان لنك لأسامة وكتابه الأخير الملف على ثلاثة أجزاء..عملت منه حاجات وطلعت لذيذةhttp://www.hotshare.net/en/file/86293-7017767a70.html

سلام وكل سنة وانتو طيبين
Post: #83
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: Hadeer Alzain
Date: 08-27-2009, 02:05 PM
Parent: #82



يا شيف البورد لنا وضيوفها الكرام رمضانكم كريم

ليه مافي بسبوسة في مطبخكم العامر بالضيوف والمآكولات دا؟


دقيقة عندي وصفة بسبوسة لاطشة وصفتها من أحد القرى المجاورة ..
شكلها كدا بسبوسة رهيبة .. لسه ما جربتها سأفعل اليوم ..


المقادير:

كل القياس حيكون بي علبه القشطه

2 علبه قشطه
علبه زيت
علبتين سكر
علبتين لبن بودره
3 علب سمولينا
ملعقه صغيره باكنج بودر

الطريقه:
تفتح علبتين القشطه وتكبهم في الحاجه العايز تعمل فيها خلطتك. ومع القشطه تكب الزيت وتضرب الزيت مع القشطه بي المضرب ضرباً مبرحاً.

اها يلا كب بعد كده السكر ولبن البدره والباكنج بودر ويضرب مع بعض. وبعد كده تكب السمولينا لمن العجينه تبقا شبه تقيله يعني تقدر تكبها في الصينيه وتدخلها الفرن.

بعد كده تجي لي الشيره.
ياتريح روحك وتجيب حليب مركز. يا تجيب كبايتين كبيره لبن بودره .. وكبايه سكر .. وكبايه مويه وتختهم في النار وتخليهم يغلو.
وبعد كده ياتكبهم والبسبوسه بارده وهم حارين .. يا العكس.




Post: #85
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: رأفت ميلاد
Date: 08-27-2009, 02:32 PM
Parent: #83

Quote: بعد كده نجي لي الشيره. ياتريحي روحك وتجيبي حليب مركز يا تجيبي كبايتين كبيره لبن بودره وكبايه سكر وكبايه مويه وتختيهم في النار وتخليهم يغلو. وبعد كده ياتكبيهم والبسبوسه بارده وهم حارين .. يا العكس وبعد كده والله حتاكلي وماحتدي الجنبك
هدير شغل نضيف ياخ .. بس مالك مإنثاها كلها .. ختى أعجنى ولتى .. ده كله عمل خير فى الرجال .. ما ناقشة البوست ؟ .. ختى وصفتك وفرتقى بلاش هكر معاك
.
Post: #145
Title: Re: ••.•´¯`•.••₪₪¶ مائدة رمضان:(شيف البورد) ومطبخ أونلاين ¶₪₪••.•´¯`•.
Author: انتصار محمد صالخ بشير
Date: 09-06-2009, 04:08 PM
Parent: #83

الحبيبة لنا مهدى وزوار البوست

اه وصلتو وين ؟

حتى الان ما شايفة حلويات غير وصفة الاخت هدير للبسبوسة

دى برضو وصفة سريعة ومضمونة للبسبوسه مع ملاحظة دى شغل سريع يعنى تنفع مع العزابة

المقادير

4 كباية شاى سامولينا
2 كباية سكر
1كباية جوز هند (مبشور )
1 كباية سمن او ذبدة
1 كباية ذبادى ابيض
1كباية حليب
2معلقة باكنج باودر
2معلقة فانيليا
شوية طحينة

الطريقة

قبل البدا سخن الفرن اولا لدرجة حرارة 160

يخلط السكر والسامولينا يضاف اليها بقية المكونات وتعجن برفق الى ان تتكون عجينة لينة
وتدهن الصينية بالطحينة جيدا بالقاع والاطراف وتصب فيها العجينة وتدخل الفرن

اما طريفة عمل الشيره وهى

2كباية سكر
1 كباية ماء وتغلى جديا الى يصبح الخليط متجانسا

وبعد ان تخرج البسبوسة من الفرن تصب فيها الشيرة

وبالهناء

وبجيكم راجعة

انتصار
Post: #84
Title: الطـعمية /لفطورمعاوية المدير
Author: lana mahdi
Date: 08-27-2009, 02:21 PM
Parent: #81

Quote: يا جماعة أجدعونا بطعمية, نحن ناس
سندوتشات ساااااااكت...



رمضان كــــريمــ ...

حااااااااضر يا حبيب
المقادير
1-كيس كبكبي (حمص) متوسط
2- 2حزمةبقدونس يتم فرمها
3- 2 حزمة شمار أخضر يتم فرمه
4- 2 حزمة كسبرة خضراء يتم فرمها
5-2راس توم مفروم
6- 3 بصلات متوسطات مفرومات
7-بيكنج باودر
8-بيضة
9-ملح
الطريقة
1-يبل الكبكبي في ماء إلى أن يصير ليناً وقابل للفرم
2-يفرم بماكينة مرتين ليصير ناعماً
3-يضاف للكبكبيك المفروم البصل والشمار الأخضر والبقدونس والتوم المفروم والكسبرة الخضراء المفرومة
4-يوزع لأكياس ويفرزن في الفريزر
عند الرغبة في عمل طعمية:
1-نخرج كيس طعميةمن الفريزر
2-نتركه ل(يتحل)
3يضاف له الملح
4-والبيضة
5-ونص ملعقة صغيرة بيكنج بورد
6-تعجن جيداً وتقطع لدوائر صغيرة او أصابع
7-تقلى بالزيت على نار هادئة
وبالهنا والشفا يا حبيب
لنا مهدي
Post: #86
Title: Re: الطـعمية /لفطورمعاوية المدير
Author: معاوية المدير
Date: 08-27-2009, 02:44 PM
Parent: #84

Quote: 7-تقلى بالزيت على نار هادئة
وبالهنا والشفا يا حبيب
لنا مهدي



أمانةالطعمية ما وقعت معاي بعد ده...

تســـلمي يا بت مهدي...
Post: #87
Title: Re: الطـعمية /لفطورمعاوية المدير
Author: رأفت ميلاد
Date: 08-27-2009, 02:50 PM
Parent: #84

Quote: 4-والبيضة
البيضة دى جديدة لنج .. طلعت لى كيس من الفريزر على حسها .. نجرب ونديك النتيجة
Post: #92
Title: Re: الطـعمية /لفطورمعاوية المدير
Author: SHIBKA
Date: 08-27-2009, 10:13 PM
Parent: #87

لنا وبناتنا الباقيات

جيت احكي ليكم الليلة عملت ملاح النعيمية بتاعك
لكن بصراحة ما عملت مقاديرك
جبت المكونات والطريقة من عندي

وفي حاجة مهمة ما قلتبها الخلاطة البخلط فيها الحاجات كلللللللها دي مع بعض

المهم ياستي
كنت مكلمة واحدة صحبتي انو حاجيب ليها الفطور
وشجاعة مني
قلت اعمل النعيمية ديل ورغم انها اول مرة
اذا ما ظبط الا اشوف ليها مطعم يرسل ليها الفطور


المهم ياستي

عملت العصيدة (المرة التانية بعد تاني يوم رمضان) والملاح الما خمج ورسلتو
ولاني ما بعرف اضوق الاكل وهو في النار
توكلت على الله


بعد الفطور ضربت لي تلفون
قالت لي عليك الله اديني الوصفة حقتك
وقالت هي عملتها امس لكن ما ظبطت

ما اكضب عليك خلفت كراع فوق كراع وقعدت اوصف


وبيني وبين نفسي بضحك في روحي
في انها سارقة الطريقة منك وبقيت ستها



ما قصرتي معاي كلو كلو
وانستر الحمد لله لانو قالت راجلها ما النوع العواف والما بياكل اي شي
اها لما شكر الملاح الصراحة انبسطت شديد


انشا الله ما اعدمك

بس ناقصني الملاح الابيض كان عرفتو
بعد داك الكسرة هينة
Post: #93
Title: Re: الطـعمية /لفطورمعاوية المدير
Author: SHIBKA
Date: 08-27-2009, 10:19 PM
Parent: #92

مريم بنت الحسين


اعتذر عن التاخير
لكن جيتك بوصفتي بتاعة العصيدة

في حلة تختي موية مقدار اربعة فناجين شاي موية في النار ومعاها رشة ملح وتخليها لما تغلي


في الزمن دا


تجيبي جزو من الخمار مقدار فنجان شاي تقريبا
وتكبيهو مع دقيق العصيدة ومعاهم موية
على ان تكون العجينة ما قوية وما سائلة


بعد الموية ما تغلي في النار

تكبي العجين العملتيهو بس براحة براحة ويدك التانية شغالة بمضرب البيض اليدوي عشان ما تكلكع

وتكبي في العجين شوية شوية
لغاية ما يخلص

وانتي اصلا بتكوني بتضربي
بعد مسافة من التقليب ببدا القوام يتكون وتقيفي زي ما انت عايزاها سواء قوية او لينة



وبعد داك طوالي تمشي على الكواري اللي انتي مجهزاهم للعصيدة وتكبي العصيدة

ممكن الكلام دا يكون قبل الفطور بنص ساعة او اكتر
عشان تكون دافية



ملحوظة: عشان تعرفيها انها نجضت وهي في النار ولي لا
تبلي يدك بالموية وتدخلي اصبعك في العجين(بس طرف اصبعك)
اذا طلع شي في اصبعك معناها لسة ما نجضت واذا طلع اصبعك نضيف معناها خلاص نجضت



وفي حال اي شي ما فهمتهو
قولي لي وانا اجيبا ليك بالصور


وبالهنا والشفا
Post: #94
Title: Re: الطـعمية /لفطورمعاوية المدير
Author: Hadeer Alzain
Date: 08-28-2009, 11:46 AM
Parent: #93

Quote: هدير شغل نضيف ياخ .. بس مالك مإنثاها كلها .. ختى أعجنى ولتى .. ده كله عمل خير فى الرجال ..
ما ناقشة البوست ؟ .. ختى وصفتك وفرتقى بلاش هكر معاك

أستاذ رأفت ميلاد سلام وتحايا وإعتذار!
قمنا بتذكير البسبوسة
ولا تزعل أخوي
ولك العتبى حتى ترضى ياخ!

وفي إنتظار رايك فيها ..
Post: #96
Title: يا "شبكة" العصيدة لامن تنجض بتصُر وشها
Author: lana mahdi
Date: 08-28-2009, 01:58 PM
Parent: #93

Quote: ملحوظة: عشان تعرفيها انها نجضت وهي في النار ولي لا
تبلي يدك بالموية وتدخلي اصبعك في العجين(بس طرف اصبعك)
اذا طلع شي في اصبعك معناها لسة ما نجضت واذا طلع اصبعك نضيف معناها خلاص نجضت

الحبيبة شبكة
كل سنة وأنت بألف خير
العصيدة لامن تنجض بتصُرْ وشها
بتنفصل من جدران الحلة لمن بتصوطي فيها
وبتتجمع في النص بتدي شكل (صَرّة الوش)(:(:(:(:(:
Post: #97
Title: الرزالمفلفل
Author: lana mahdi
Date: 08-28-2009, 02:07 PM
Parent: #96

المقادير
1-مقابل كل كوب رز كوبين ماء
يعني لو عملتو كوبين رز تحتو معاهم 4 أكواب ماء
3 أكواب رز 6 أكواب ماء
2-ملح
3-شوية سمن أو زيت أو زبدة
4-فلفل أسود حب
5-هبهان حب
الطريقة:
1-نحمص الأرز في الزيت أو السمن على عين البوتجاز الصغيرة ونهدي ليه النار برضو(تحميص سريع ما لحدي ما يبقى أصفر )
2-نضع الهبهان ونديهو تحميصة ثانيتين مع الرز
3-أول ما الرز لونو يتغير حبة نضيف الماء ونعلي النار
4-نضيف الملح
5-وحبات الفلفل الأسود
6-اول ما يغلي نغطيهو ونوطي النار ونخت عازل البوتجازات ولو ما متوفر نخت غطا علبة لبن
7-يترك على النار الهادئة حتى ينضج
بالهنا والشفا
Post: #99
Title: سلطة الروب
Author: lana mahdi
Date: 08-28-2009, 02:17 PM
Parent: #97

المقادير
1-عدد 6 خيار صغير الحجم مبشور
2-نص لتر زبادي أو روب
2-ممكن جزرة مبشورة وممكن ناس يحبوها بدون الجزر لكن بالجزر روعة
4-ملح
5-ثوم مفروم
6-فلفل أسود مسحون
7-قطرات عصير ليمون
الطريقة-
يضاف الزبادي للخيار والجزر
2-يضاف الفلفل المسحون
3-يضاف التوم المفروم
4-يؤجل الملح وقطرات عصير الليمون لغاية قبيل التقديم مباشرة(عشان السلطة ما تنز موية)...
أنا عادة ما بعملهابالمقادير-لكن المهم أن الزبادي يكون الخيار المحشوش غاطس معظمو فيهو ..كأنوا أرض مكسوة بالثلج باين حبة عشب أخضر كل كم متر(الصورة ظبطت)؟؟؟(:(:(:
Post: #95
Title: Re: الطـعمية /لفطورمعاوية المدير
Author: SHIBKA
Date: 08-28-2009, 01:06 PM
Parent: #87

رافت

Quote: Quote: 4-والبيضة

البيضة دى جديدة لنج .. طلعت لى كيس من الفريزر على حسها .. نجرب ونديك النتيجة





البيضة دي عشان العجينة تكون متماسكة وعشان لما تختها في النار ما تتفرتق لقطع صغار في الزيت وتحرقو ليك سريع

وقابلة للزيادة
يعني اذا الكمية كبير ممكن تزيد البيضة الى اتنين وحجمها برضو
يعني لو البيضة صغيرة عااااااااااادي تجيب معاها اختها
Post: #98
Title: Re: الطـعمية /لفطورمعاوية المدير
Author: Amira Elsheikh
Date: 08-28-2009, 02:13 PM
Parent: #95

Quote: الصيادية يا أميرة ينوبك ثواب


رافت سلام ...

معليش انشغلت شوية فى اليومين الفاتو ..

راوية ماقصرتى..

فى كم طريقة لعمل الصيادية ....


اها انوريك حقت العرب يا رافت وساهلة وحاجتاها افيلبل النبى فيك كان مت مشيت طبققها
Post: #100
Title: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: lana mahdi
Date: 08-28-2009, 02:19 PM
Parent: #98

حقو نخت عنوان الوصفة كعنوان في الرد للتسهيل على العزابة والعملو ليهم خيانات أنهم يلقو الوصفات بسرعة
Post: #102
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: Amira Elsheikh
Date: 08-28-2009, 02:42 PM
Parent: #100

الصياديـــــــــــــــــة


المكونات....
1/ كيلو سمك(حسب المزاج..(هامور... بلطى..)
2/ربع كيلو رز مغسول ومبلول(منقوع) فى موية لمدة ساعة
3/زيت للتحمير
4/3بصلات كبيرة(مقطعة قطعلة صغيرة)/قطعتين فلفلية(مقطعةقطع)/شطة خضراء/
5/3قطع طماطم( (مقطعةقطع )
6/البهارات ...ملح .. فلفل ... شمار ....توم ...ليمون...كزبرة خضراء
7/ 4اكواب ماء

الخطوات ......

1/السمك بعد التنظيف نضيف ليهو شوية ليمون وملح وشمار وفلفل وتوم (نطعمو يعنى) ونغطى
وبرضو نخليو شوية يتشرب البهارات ..
2/ نضع حلة فى النار وعليها زيت
3/نضيف قطع البصل للزيت ونقلبها حتى تتحمر (مش تتحرق)
4/نضيف ليها الطماطم والفلفلية والشطة الخضراء والملح وشوية توم وفلفل ونقلب المقادير دى فى
الزيت من 3-4 دقائق ونضيف ليها الموية ...
5/نجى نرص االسمك فى الخلطة الفوق دى ونشتت الكزبرة الخضراء...تقريبا بعد خمسة دقائق نضيف عليهو
الرز المنقوع ونغطى الحلة ونخليها لحدى ماتشرب كل الموية وتبقى جافة
ننزلها من على النار ونقلبها بصمتها فى صحن التقديم

الرز بكون فى اسفل الصحن والسمك فى الاعلى

اها بالهناء والشفاء
Post: #103
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: rosemen osman
Date: 08-28-2009, 03:53 PM
Parent: #102

المندي

سلام شباب
المندي طلع رهيب أمس ,وجربت قالب التفاح لما نذوقه بعدين كان نجح نديكم الوصفة
طريقة المندي لمنال العالم


المقادير :

2كوب رز - 2ملعقة كبيرزيت - 1حبة متوسطة بصل مفروم ناعم - نصف عودددراسين( قرفة يعنى )- 6-8حبة قرنفل - 6-8حبة هيل(هبهان)- 1ونصف ملعقه صغيرة ملح - 2
حبة متوسطه طماطم مفرومه ناعم - قرن فلفل اخضر حار - 3ونصف كوب مرق

تتبيلة الدجاج :

1كيلو دجاج - 1ملعقه صغيرة ملح - نصف ملعقه صغيره هبهان( مطحون - 1ملعقه صغيره بهار مشكل - نصف ملعقه صغيره قرفه مطحونه - 1
ملعقه صغيره كركم - ربع ملعقه صغيره فلفل اسود - نصف ملعقه صغيره لومي مطحون ( الليمون الناشف )- 2-3 ملعقه كبيره عصير ليمون - 2 ملعقه كبيره زيت

الطريقه :

اغسلي الأرز جيدا وانقعيه في الماء الدافئ حوالي 15 دقيقة
سخني الفرن لدرجة حرارة 375 وحضري طبق الفرن وورق الألمونيوم
في قدر متوسط الحجم سخني الزيت واضيفي البصل وقلبي على نار متوسطه الى ان يصبح ذهبي اللون
ابعدي القدر عن النار واضيقي اعواد القرفة والقرنفل والهيل والملح والطماطم وقلبي لتتوزع المحتويات مع بعضها
صفي الأرز من الماء واضيفيه الى القدر وقلبي بحذر الى ان تتوزع المكونات جيدا
ضعي الأرز في طبق الفرن وقطعي قرون الفلفل طوليا وانزعي البذور وضعي القرون على سطح الأرز ثم صبي المرق فوق الأرز
غطي الطبق بطبقة الألمونيوم وباستعمال طرف السكين اعملي 5-6 شقوق في ورق الألمونيوم
ضعي قطع الدجاج في طبق واضيقي الملح والهيل والبهارات والقرفه والكركم والفلفل واللومي وعصير الليمون والزيت ووزعيها على الدجاج
رصي قطع الدجاج المبهره فوق طبقة الألمونيوم التي عملت فيهاالشقوق سابقا
خذي طبقتين من الألمونيوم ثم غطي الدجاج مع احكام التغطيه على الجوانبوادخلي الطبق في الفرن لمدة 60 - 70 دقيقه

وبالهناء والشفاء
Post: #104
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: احمد محمد بشير
Date: 08-29-2009, 00:20 AM
Parent: #103

دا موش ملاح الروب...؟؟
Quote: * كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة


اموت انا يا لنا في ملاح الرووب و استحمي فيهو لو لقيتوا
الله ينهي العزوبية دي... كدي نجرب الطريقة دي ونديكم خبر.


رمضان كريم.ظ
***
Post: #105
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: معتز مقبول
Date: 08-29-2009, 02:30 AM
Parent: #104


يا جماعه خلونا من ده كلو؟


خشوا لينا في الفطائر والمعجنات.

سمبكسه......بيتزا..وذي كده يعني...........

ادونا وصفه عجينه سريعه للحشو مع اللحمه المفرومه واللاذي منو؟

.وحنو علينا شويه بي وصفات دسمه شويتين.
Post: #106
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: الطيب العامرى
Date: 08-29-2009, 07:58 AM
Parent: #105

دى الحاجات السودانية والبتهمنا

وين باقى الحاجات السودانية بدون فرز

مشكورين على المجهود والله البوست دا فيهو فايده كبيرة

نرجو من الأخوات مدنا بالمزيد من الأكلات السودانية

المحشى والضلع والتقلية والبطاطس بانواها

وطرق للدجاج مشوى ومحمر وإذا فى طرق تانية
Post: #107
Title: Re: حقو نخت عنوان الوصفة كعنوان في الرد للتسهيل على العزابة والعملو ليهم خيانات
Author: Amira Elsheikh
Date: 08-29-2009, 12:51 PM
Parent: #106

Quote: المحشى والضلع والتقلية والبطاطس بانواها

وطرق للدجاج مشوى ومحمر وإذا فى طرق تانية


الطيب العامرى سلااام..

انت جادى ؟؟؟

والله لو جادى ليك على ....

انا متخصصة مطبخ سودانى وماعندك اى مشكلة بس اقنعنى انك قاعد تطبق
Post: #108
Title: Re: الطـعمية /لفطورمعاوية المدير
Author: رأفت ميلاد
Date: 08-29-2009, 01:45 PM
Parent: #98

تعرفى يا شبكة أكلت لكيك نيم

طلعت كيس الطعمية أديتو ليك الباكنق بودر وملح والبيضة .. وحمرتها ليك بمزاج .. طبعاً برميها ببتاع السوريين داك .. ما بعرف دردمتكم وعفيصكم داك .. طلعت مهندسة ومزهزة وهشة .. قعدت ليها بمزاج .. فرد كضمة وما زدتها .. أتاريه الحجة مملحاه .. بقى صبر

غايتو يا بت الشيخ بكرة جاينى ضيوف .. جبت السمك القشرى "الهامور" من التاميلى .. بقيت على وصفتك بعد ما قلتى لى حقة "العرب" .. غايتو العرب ديل كان ما طلعوا الهدندوة .. وطلعوا جنجويد ناس بريمة لا هبانيتك شربنا ما روينا ..

والحلو بسبوسة هدير بس " مؤنثة" .. معقور الزول ياكل ليها بسبوسة ضكر ياخ

غايتو بعد الدسم كان غبت .. بكون فى المستشفى .. أوع تجونى بعامود كمان

أديكم وصفة للسمك أكلتها فى إيظاليا ..
أخت زوجتى هناك عايشة على البحر .. أكلتنى بلاوى عجيبة .. بس خليكم فى السمك

طبعآ أنا مابعرف المقادير ولا غيرا ..

القصة سمك والأفضل القشرى "الهامور" زى ما بسموه فى الخليج من سمك البحر .. ما جربتها بسمك المياه الحلوة .. لكن بتخيل لى بتظبط مع البياض و العجل ..

القصة ما دايرة درس عصر .. الطعام (ملح + توم مفروم(كتر منو)+ شمار (شوية)+ فلفل + "ياحبزا" شوية بدرة فلفل حلو أحمر .. الشكله زى الشطة داك) .. يُعجن بعصير العرديب التخين (غايتونحن بنجيبوا جاهز من دكان الصينى) ده العرديب ..
يتم تشليخ السمك قدر الإمكان .. يتم مسحة بالخليط .. وداخل الشلوخ الخياشيم .. والبطن من جوة تُوضع قطع ليمون بى قشرها وكزبرة خدراء (ما حشى .. شوية كدى) ..

يكون الفرن سخن .. يوضع السمك فى صينية فرن على قليل جداً من الزيت تحته وفوقه "والأجمل يكون زيت زيتون) .. ويتم شوائه من الأفضل فقط بمروحة الفرن ..

بعد عشر دقائق يتم قلب السمك على الجهة الثانية ولكن فى صينية أخرى .. حتى يكون جاف لأنه بكون نقع فى الأولى .. لمدة عشرة دقائق أخرى .. وماتعتمدوا على العشرة دقايق دى .. أفضل راقبوه ما يحصل أمات طه .. (ملاحظة يتم نقل السمك بحرص وبرفق عشان بكون إستوى وما ينبهل فى القلبة)

غايتو كدة حللت المرس والصيادية .. وبرجع ليكم أتشهى بعين قوية

تحياتى
Post: #109
Title: Re: الطـعمية /لفطورمعاوية المدير
Author: SHIBKA
Date: 08-29-2009, 03:50 PM
Parent: #108

رأفت
Quote:
تعرفى يا شبكة أكلت لكيك نيم

طلعت كيس الطعمية أديتو ليك الباكنق بودر وملح والبيضة .. وحمرتها ليك بمزاج .. طبعاً برميها ببتاع السوريين داك .. ما بعرف دردمتكم وعفيصكم داك .. طلعت مهندسة ومزهزة وهشة .. قعدت ليها بمزاج .. فرد كضمة وما زدتها .. أتاريه الحجة مملحاه .. بقى صبر



البقت عليك تبقى على العدو انشا الله

ولمزيد من الهندسة والزهوية للطعمية
الملح والشمار والبيض بتعملوا مع بعض
ولما تبقى على الرمي تخت الباكنج بودر
تعجنوا كويس ومن هناك للنار ببتاع السوريين ولي المصريين ولي العفيص حقنا ما بفرق

وادينا الراي النهائي


بس ضوق العجين تاني قبل ما تتصرف اي تصرف حتى لا يلدغ المؤمن
Post: #110
Title: Re: الطـعمية /لفطورمعاوية المدير
Author: Amira Elsheikh
Date: 08-29-2009, 04:37 PM
Parent: #109

Quote: غايتو يا بت الشيخ بكرة جاينى ضيوف .. جبت السمك القشرى "الهامور" من التاميلى .. بقيت على وصفتك بعد ما قلتى لى حقة "العرب" .. غايتو العرب ديل كان ما طلعوا الهدندوة .. وطلعوا جنجويد ناس بريمة لا هبانيتك شربنا ما روينا



والله يارافت طلعت الاول فى الكلاس بتاع الطبيخ

من الليلة ليك على الوصف الهنا كمانفع بس شد سلك تلفون
وحاة ابوى خطوة بخطوة معاك ....


وفكرتك فى تبهير السمك عجبتنى شكلها فكرة زول ناااااقش
ممكن نفس البهارات تستخدمها فى تبهير سمك الصيادية ..

انا الصيادية ماعندى معاها شغلة كبيرة احتمال لانو نحن الرز ما من الوجبات
المهمة عندنا ...
وفى طريقة تاينة وتالتة لعمل الصيادية ... لو دى مالفقت بوريك الباقيات

انا بموت فى صينينة السمك ...

ممكن اعمل ليكم صينية سمك اذا بتريدو
Post: #111
Title: Re: الطـعمية /لفطورمعاوية المدير
Author: رأفت ميلاد
Date: 08-29-2009, 06:12 PM
Parent: #110

Quote: ممكن اعمل ليكم صينية سمك اذا بتريدو
الله يرحمك يا سارة يا أمى .. صينيتابتاعة السمك دمعتا تقطعيها بالسكينة ..

أها راجيك ..

أشكرك على الشهادات .. والله يسترك معاى بكرة مع الصيادية
Post: #112
Title: Re: الطـعمية /لفطورمعاوية المدير
Author: Omar Bob
Date: 08-29-2009, 08:47 PM
Parent: #111

قصة والله ....

عمر يفتح بوست بتاع كورة باسمى
وانا اعمل مداخلة طبيخ باسمو

جندرة ومقدرة ..

اميرة الشيخ ...
Post: #113
Title: Re: الطـعمية /لفطورمعاوية المدير
Author: Amira Elsheikh
Date: 08-29-2009, 08:50 PM
Parent: #112

صينية السمك ....

بسيطة وسهلة ومافيها طرق كتيرة
باستثناء خيار انك تختها على ناراو تدخلها الفرن
انا شخصيا بفضل على نار هادئة(نار فرناو فحم مافرقت)...

المكونات...
1/سمك (النوع المفضل عندك )نظيف ومغسول
2/خضار( 2فلفلية .. 2بصل .... 2جزر...2طماطم...4قرون شطة خضراء ..قطعةليمون
3/زيت
4/ملح.... توم.. عودقرفة كاملة..كزيرة خضراء(مقطعة)...صلصلة
3/شوية عصير عرديب ..ان وجد..


الطريقة ....

1/السمك نضع عليهو البهارات وشوية عصير ليمون وعصير العرديب ونغطى مسافة
قبل الطبخ ممكن من ساعتين ليوم كامل فى التلاجة (اذا مامستعجلين)
2/نقطع البصل والفلفل والطماطم والجزروالليمون قطع متوسطة ونضيف عليهم الكزبرة والقرفة
وشيوية ملح وتوم وقرون الشطة الخضراء كاملة...
3/نضيف الخضار دا كلو للسمك ونقلبو كويس مع بعض ونضيف ليهو الصلصة والمويةونضع
الخليط كلو على صينية فرن(اذا حابين نستخدم فرن)او فى حلة (اذا حابين نستخدم النار)
ونضيف عليهو الزيت ونرفع الاناء على النار او الفرن ...(ارتفاع الموية يكون اعلى بشوية من الخليط
او على مستوى الخليط ...
مدة الطهى .. تعتمد على تشرب الماء وبس تكون فى زى دمعة شوية مسبوكة ..
اذا الموية ماشربت كلها مابكون عندو منظر ولا طعم....
وبعديها تجهز شطتك باليمون والدكوة ..

بالهناء والشفاء
Post: #114
Title: Re: الطـعمية /لفطورمعاوية المدير
Author: BAKTASH
Date: 08-29-2009, 09:46 PM
Parent: #98

سلام يا شباب
يا لنا عملتا الطعمية بي وصفتك دي لكن المشكلة بتكون قوية شوية....
Post: #115
Title: Re: الطـعمية /لفطورمعاوية المدير
Author: رأفت ميلاد
Date: 08-30-2009, 08:37 PM
Parent: #114

رهيب يا بت الشيخ .. تسلم روحك ..
Post: #116
Title: Re: الطـعمية /لفطورمعاوية المدير
Author: SHIBKA
Date: 08-30-2009, 09:39 PM
Parent: #114

BAKTASH


عفوا حارد ليك على ما لنا تجي

زيد الباكنج باودر شوية وانشا الله بتظبط
Post: #117
Title: Re: الطـعمية /لفطورمعاوية المدير
Author: جعفر محي الدين
Date: 08-30-2009, 10:46 PM
Parent: #116

البوست محروس وستو تكوس
والله ما قصرتن تب يا بنات حواء
والله يديكن العافية
بس عجبي سمك حبيبنا رأفت ميلاد
وحنجربه كيه للنسوان

والله يا لنا وما طالباني حليفة
أكلت فتة عدس يوم 9/10/1984 لليوم دا بتذكر طعمها ولليوم دا بسببها بحب العدس
شطتها ياها ذاتها الوصفتيها دي
Post: #118
Title: Re: الطـعمية /لفطورمعاوية المدير
Author: رأفت ميلاد
Date: 08-31-2009, 11:18 AM
Parent: #117

Quote: بس عجبي سمك حبيبنا رأفت ميلاد
وحنجربه كيه للنسوان
كان ما رمضان كنت ختيت ليك المشهيات
Post: #119
Title: Re: الطـعمية /لفطورمعاوية المدير
Author: Amira Elsheikh
Date: 08-31-2009, 06:59 PM
Parent: #118

Quote: رهيب يا بت الشيخ .. تسلم روحك ..


رافت ...سلاام

ياتو الرهيب صينية السمك ولا الصيادية .....؟؟


كلو ظابط ؟؟

اها بما انك جادى بعد المرس والصيادية والسمك..

عندك اوفر مفتوح بتاع مطبخ سودانى لحدى العيد

قصرت معاك ؟؟
Post: #120
Title: Re: الطـعمية /لفطورمعاوية المدير
Author: رأفت ميلاد
Date: 08-31-2009, 07:19 PM
Parent: #119

مسائك خير يا أميرة
Quote: ياتو الرهيب صينية السمك ولا الصيادية .....؟؟
ضربنا الصيادية .. الغلطة الوحيدة ختيت السمك فوق الطعام بعدين كبيت لموية .. التسبيكة بقت أغلبا فوق .. لكن وزعناها أثناء العضة .. كانت خطيرة ..

صينة السمك أكوس ليها لمة .. فى البيت باكلا براى .. شكلها خطير .. نزلت مع أخواتا كوبى بيست وليها يوم
Quote: اها بما انك جادى بعد المرس والصيادية والسمك..

عندك اوفر مفتوح بتاع مطبخ سودانى لحدى العيد
خشى لى ملاحات بدون لحمة .. أنا زول سمك ساكت .. لحمة الأتراك كرهتنى
Quote: قصرت معاك ؟؟
يقصر الملح
تب ما قصرتى
Post: #121
Title: Re: الطـعمية /لفطورمعاوية المدير
Author: Amira Elsheikh
Date: 08-31-2009, 07:35 PM
Parent: #120

Quote: خشى لى ملاحات بدون لحمة .. أنا زول سمك ساكت .. لحمة الأتراك كرهتنى


رأفت ياودالسارة عصرت على شديد بالملاحات البدون لحم دى....كم مرة نكلمك
ونقول ليك العرب ديل غير العصيدة بالويكة واللحمة تانى يخربنا
برضو السمك والفسيخ اصحابنا نسيت

اللحمة بتمهلك وممكن تتدخل فى اى شئ

والسمك برضو مابمهلك كتير ياهو يا محمر ياصينية يادمعة ياشوربة ياصيادية

كدى زكرنى شنو من غير لحمة...؟

صينية البطاطس والاسود اوالمكرونة بالخضار ..اختار سريع


ديل خيارين متوفرين اسى .... وبحاول اتذكر
Post: #122
Title: Re: الطـعمية /لفطورمعاوية المدير
Author: رأفت ميلاد
Date: 08-31-2009, 07:48 PM
Parent: #121

Quote: صينية البطاطس والاسود اوالمكرونة بالخضار ..اختار سريع
بختار صينية البطاطس والاسود .. المكرونة قدونا بيها قد ..

بمناسبة الأسود .. سلطات كيف ؟

كان دكوة كان طحينة هنا متوفر ..
Post: #123
Title: Re: الطـعمية /لفطورمعاوية المدير
Author: رأفت ميلاد
Date: 08-31-2009, 07:53 PM
Parent: #122

بمناسبة الفسيخ بنعلو بالصلصة والدكوة بس .. أكلتو عند ناس شوقى بدرى مظبط بالبصل خطيييير .. بس المصيبة عشة نسيبته قالو ما بتدى سرها .. تاكل وأنت ساكت ..

كدى كان عندك خلطة سرية
Post: #124
Title: Re: الطـعمية /لفطورمعاوية المدير
Author: Amira Elsheikh
Date: 08-31-2009, 08:10 PM
Parent: #122

Quote: بمناسبة الأسود .. سلطات كيف ؟

كان دكوة كان طحينة هنا متوفر ..


كان زبادى .... دى ماادوكم ليها ؟؟

مية مية والله جاهزة ....


Quote: بختار صينية البطاطس والاسود


طيب نبدا بيها لانها ساهلة وخفيفة ...
1/بطاطس
2/اسود
3/طماطم(مقطعة حلقات)
4/فلفلية(مقطعة حلقات )
5/جزر
6/توم وملح واعواد قرفة (كاملة)
7/زيت للتحمير..
8/ شوربة اى حاجة ... انشاءالله شوربة ماجى ..

1/نقطع البطاطس والاسودالجزر حلقات او قطع طويلة ونحمرمهم فى الزيت
من غير مايستو شديد (يعنى تحمير على خفييييف)
2/ نحضر صينية الفرن ونبدا نرص البطاطس وبعديها الجزر وبعديها الاسود
وبعديها الطماطم ثم الفلفلية...
3/نرش عليها الملح والتوم واعواد القرفة ونضيف ليها الشوربة وشوية
من زيت التحمير ... ونغطيها بورق فويل وندخلها الفرن ...

بالهناء والشفاء

__________________________________
ملحوظة ... الصلصة حسب المزاج....
Post: #125
Title: Re: حنحتفظ بالبوست الطاعم دا
Author: جعفر محي الدين
Date: 08-31-2009, 08:19 PM
Parent: #124

غايتو حاحتفظ بهذا البوست لحين عودة أم غسان
وبيني بينكم الأكل في الفطر بيكون أحلى رمضان ليله عندي أنا قصير جدا وما بلحق أهضم الفطور حتى
Post: #129
Title: Re: حنحتفظ بالبوست الطاعم دا
Author: Amira Elsheikh
Date: 09-01-2009, 04:46 PM
Parent: #125

Quote: غايتو حاحتفظ بهذا البوست لحين عودة أم غسان


جعفر ربنا يجيب ليك ام غسان بالسلامة

انت كدى حاول واتعلم فى غيابها حاجة
Post: #126
Title: Re: الطـعمية /لفطورمعاوية المدير
Author: filan
Date: 08-31-2009, 08:32 PM
Parent: #124


سلام يا ناس البوست ( المسبــّـكْ )

ماشاء الله ، على الوصفات القابلة للتعديل ، والتبديل بالحاضر والموجود ... و اتاري الشغلة فيها ( تبس ) و أنا الكنت مقتنع بقولهم " الزول/ة يدو/ها طاعمة "

نساعد بالموقع دا :
http://recipes.wikia.com/wiki/Category:Sudanese_Recipes

وغسيل العدة ، دا لو ما كان غسيل العدة عندو طقوس كمان !
يديكم العافية .
Post: #153
Title: Re: الطـعمية /لفطورمعاوية المدير
Author: Amira Elsheikh
Date: 09-07-2009, 02:21 PM
Parent: #126

Quote: وغسيل العدة ، دا لو ما كان غسيل العدة عندو طقوس كمان !
يديكم العافية .


تعرف يافلان والله غسيل العدة دا اصعب حاجة
النسوان كلهن بتهربن منو
واحد من اسباب انو الخدمة تتقسم بين البنات فى البيت هو غسيل العدة
اى زول بتكلها على التانى

والله شكرا لللموقع ولغسيل العدة.....
Post: #127
Title: Re: الطـعمية /لفطورمعاوية المدير
Author: رأفت ميلاد
Date: 09-01-2009, 09:36 AM
Parent: #124

Quote: بالهناء والشفاء
ماشى سوق التلات أجيب المواد وراجع ..

وبجيب معاى الزبادى ..

الله يسامحك يا بت الشيخ .. وجع الضهر قالو لى من الوزن ..
Post: #128
Title: Re: الطـعمية /لفطورمعاوية المدير
Author: Amira Elsheikh
Date: 09-01-2009, 01:23 PM
Parent: #127

Quote: الله يسامحك يا بت الشيخ .. وجع الضهر قالو لى من الوزن ..


Post: #130
Title: Re: الطـعمية /لفطورمعاوية المدير
Author: رأفت ميلاد
Date: 09-02-2009, 10:32 AM
Parent: #128

Quote:
بطلى النطيط وختى السلطات ..

أمبارح نط على واحد طاشى .. مصمص الصينية وقال لى سلم على بت الشيخ .. زى قصة ولا جميلتك .. والمرة بعد ما لحستا كلها قالت لى رهيبة بس كترت القرفة .. هى قرفتا زى لحا النيم .. عرييضة ما سمعت بيها ..

الشمار الجد لنامهدى قاعاااااعدة تتفرج .. وتقطع مع الغاشى والماشى فينى .. ولا كلمتنى لنا جعفر

أرحكاكى نشوف لينا بوست تانى
Post: #131
Title: Re: الطـعمية /لفطورمعاوية المدير
Author: Amira Elsheikh
Date: 09-03-2009, 03:06 PM
Parent: #130

Quote: أرحكاكى نشوف لينا بوست تانى


بعد ما نسوى السلطة ولا قبليها

Quote: الشمار الجد لنامهدى قاعاااااعدة تتفرج .. وتقطع مع الغاشى والماشى فينى .. ولا كلمتنى لنا جعفر


خت القطيعة هنا النبى .. مسنجر نهىىىىىى
كان الامن مستتب زى زمان كان بقول ليك رسل القطيعة مسنجر

قرقرقرقرقر
Post: #132
Title: Re: الطـعمية /لفطورمعاوية المدير
Author: قاسم المهداوى
Date: 09-03-2009, 03:48 PM
Parent: #98

Quote: البوست دة لكل العزابة البفطرو براهم الله ورقبتهم بدون أسرهم


سلام لنا مهدى ورمضانيات
انا عايز اعمل ( كسرة فى النص وملاح بالطرفات ) عصيدة بى روب .. اعمل شنو وكيف ؟؟؟










قاسم المهداوى
Post: #133
Title: Re: الطـعمية /لفطورمعاوية المدير
Author: رأفت ميلاد
Date: 09-03-2009, 06:16 PM
Parent: #132

Quote: بعد ما نسوى السلطة ولا قبليها
سيبك من الشمارات .. وختى السلطات .. وركزى على الأسود وكترى الشطط .. بس أختينا من البطاطس .. هنابعملوا سلطة بطاطس حاجة عجيبة ..

وكوسى لى حاجة زى صينية البطاطس برضو .. كانت لزيزة .. صورتها ليك قبل الفرن وبنزلها ليك ..

بالمناسبة عندى سكسكانية ماعارف أعملا كيف ..

ما تغيبى ياخ .. رمضان دخل العضم ولا شنو ..
Post: #135
Title: Re: الطـعمية /لفطورمعاوية المدير
Author: SHIBKA
Date: 09-04-2009, 08:09 AM
Parent: #133

يارأفت
انت قبل البوست دا كنت جعان ياحليلك وزول جايب خبرك مافي


اها داير شنو قلت ؟؟؟؟
Post: #136
Title: Re: الطـعمية /لفطورمعاوية المدير
Author: رأفت ميلاد
Date: 09-04-2009, 08:56 AM
Parent: #135

Quote: انت قبل البوست دا كنت جعان ياحليلك وزول جايب خبرك مافي
يا شبكة الحجة بتاعة أخدر وملاحات وكسرة حبش ولحوم .. المكرونة والشوربات قدتنا .. أنا زول سمك ودمعات بيضة وخضار .. أها بعد البوست ده جعت .. سمعتى بالشمه الويكة وقال تمليكة وقلب الهوبة فى الراكوبة
Quote: اها داير شنو قلت ؟؟؟؟
أى شيئ بالخضار .. الخضار دى "ثمر" ناس بطاطس وكوسة وأسود .. مش حشائش زى ناس ملوخية وورق .. نحنا بقر ؟؟؟
والسلطات المجهبزة البتتغمز ديك ..

وبرضو زى شغل إنتصار ده عز الطلب


Quote: بعد اذن ست البوست وصفة سريعة جدا لملاح نعيمية يا منال

1* كوب ذبادى
2* حبتين بصل محمرات تحمير وسط
3 * مقدار معلقة شوربة كبيرة دكوة
4* حبتين طماطم مستوى جدا
5* معلقة معجون طماطم
6* اربع فصوص ثوم متوسطات
7* معلقة من التوابل ممزوجة ببعض من فلفل اسود كسبرة وفلفل
8* مكعب مرقة (اى نوع )
تضعى كل المكونات فى الخلاط حتى تمزج تماما
وتضعيها فى النار الى ان تغلى قليلا وتضيفى عليها معلقة ويكة وكان عندك سمن بلدى يمكنه اضافته بعد سكبه فى العصيدة

وبالهناء والشفاء وصيام مقبول

انتصار


زمان كان فى مسرحية إسمها فى إنتظار عمر


شكراً انتصار محمد صالخ بشير
وروزمين على العصيدة
Post: #137
Title: Re: الطـعمية /لفطورمعاوية المدير
Author: Amira Elsheikh
Date: 09-05-2009, 04:58 PM
Parent: #133

Quote: بالمناسبة عندى سكسكانية ماعارف أعملا كيف


سلااام يارافت ...

الغيبة سببها الدوام المن دقش الرحمن زايدا العوازيم والذى منو
الواحد لما يرجع البيت بجى راجع مهدد وعلى السرير وهاك يانوم وهكذا



نرجع للسكسكانية .... بت عم الشعيرية صح؟؟


طيب اذا قاصد السكسكانية بت عم الشعيرية فى طريقتين

واحدة محمرة عادى والتانية بالبن
1/تخت زيت او سمنة على النار وتسيبها تسخن و تكب عليها السكسكانية وتقلبها
كويس لما تحس بيها بدات تحمر (مش تحرق) تكون عندك موية سخنة جاهزة
تضيفها عليها وكمان شوووووية ملح...تخليها تتشرب الموية وتضيف ليها السكر
وبعد خمسة دقائق تنزلها ...
انتهت ..

فى حالة عاوزة باللبن تضيف اللبن السخن بدل الموية ولما تنزلها ترش عليها
شوية جوز هند...

مش بسيطة ؟؟
قال سكسكانية قال
Post: #138
Title: Re: الطـعمية /لفطورمعاوية المدير
Author: Amira Elsheikh
Date: 09-05-2009, 05:12 PM
Parent: #137

نرجع لموضوع السلطات ...

نبدا بالاسود..
الاسود ممكن يكون1/ مسلوق 2/ مشوى 3/ محمر

سلطة اسود سامبل ون/محمر
/اسود
1/فلفلية
3/طماطم
3/دكوة
4/شطة خضرا
5/توم وليمون(اهم زولين )
6/ملح وفلفل
7/زيت للحمير

الطريقة....
1/تقطع الاسود حلقات صقيرة وتحمرو فى الزيت(دائما فى السلطة ماتخلى الاسود يحمر شديييد)
2/خلطة السلطة..
تقطع الطماطم والفلفلية والشطة الخضراء(قطع صغيرة شديد)وتضيف عليهم الدكوةوالتوم والملح والفلفل
وتضيف الخلطة للاسود وتقلبها كويس لحدى ما تحس بانها الخلطة اتشربت فى الاسود وتعصر الليمون عليها
وتديها قليبها تانية..

ممكن تزينها بشرائح فلفليةاو طماطم وترش عليها شووووية شمار

ملحوظة.. الاسود مامهروس مقطع قطع صغيرةو فى طريقة تانية ممكن يتهرس ويتوضع تانى على النارمع الخلطة
من 5الى 10 دقائق....نفس المقاير السابقة
Post: #139
Title: Re: الطـعمية /لفطورمعاوية المدير
Author: Amira Elsheikh
Date: 09-05-2009, 05:25 PM
Parent: #138

اسود سامبل تو/محمر بس بالزبادى

نفس الطريقة السابقة بس الاختلاف :
1/نقطع الاسود حلقات كبيرة شوية ومن غير من قشر الاسود
2/نضيف الزبادى للخلطة السابقة
3/نشيل قطة من الاسود المحمر ونعطنها فى الخلطة ونرصها فى الصحن
ونشيل قطعها تانية وكذلك الى ان يخلص الاسود المحمر
واذا فضلت باقى خلطها برضو ممكن نضيفها من فوق الاسود ونرش عليها شوية شمار اخضر

بسسسسسسسس
Post: #140
Title: Re: الطـعمية /لفطورمعاوية المدير
Author: Amira Elsheikh
Date: 09-05-2009, 05:37 PM
Parent: #139

سلطة اسود سامبل 3/مشوى ..../سلطة اسود بيضاء

برضو نفس المكونات السابقة بس من غير زبادى
زايدا البصل الابيض او بصل اخضر (مقطع دقاااااق)....
1/نشوى الاسود ونزيل منو القشرة ونغسلو نضيف ..
2/نهرس الاسود هرس شديد()
3/ نخت زيت على النار ....الزيت يسخن نضيف عليهو الاسود المهروس ونقلبو شوية
4/ نضيف عليهو الخلطة السابقة من غير البصل والليمون
5/اخر مرحلة نضيف البصلز.... و بعد ما ننزل السلطة من على النار نضيف الليمون ..
السلطة لازم تكوم متماسكة وجامدة ..
6/ننزلها ونزينها بالطريقة العايزنها..
__________________________________________
السلطة مابتحتاج اكتر من 5-10 على النار لانو الاسود جاهز




رافت ... غايتو يا انت شاطر وحريف فى مسالة الطبيخ دى شديييد ياانا بوصف كويس
لكن انا برجح الاولى .(لانو طوالى الحاجات بتزبط عندك من غير الرجوع)
Post: #141
Title: رمضان خشا العضم...راسي مووجعني
Author: lana mahdi
Date: 09-05-2009, 07:28 PM
Parent: #140

يا حليلكم
والله فرقتو معاي جنس فرق في الأيام الكنتا فيها مورودة
وغايبة
ووجع العيون ما خلاني
كدي أنمشي على ناس أمي أشرب جبنة وأجيكم راجعة
راسي مووجعني
كاشحة فوقو زيت سمسم ساقط ورابطاهو بي دلقانة ومفتاح وبرضي حاسة(:(:(:(:
Post: #142
Title: Re: رمضان خشا العضم...راسي مووجعني
Author: Amira Elsheikh
Date: 09-05-2009, 07:44 PM
Parent: #141

Quote: يا حليلكم
والله فرقتو معاي جنس فرق في الأيام الكنتا فيها مورودة
وغايبة
ووجع العيون ما خلاني
كدي أنمشي على ناس أمي أشرب جبنة وأجيكم راجعة
راسي مووجعني
كاشحة فوقو زيت سمسم ساقط ورابطاهو بي دلقانة ومفتاح وبرضي حاسة


غايتو يا لنا انا ورأفت عندنا شوية سلطات دايرين نخلصها وماشين
وعلى ذمة رأفت قال لى راسك واجعك من القطيعة فيهو(فى رافت)

اها نحن زاتنا قطعنا قلنا لنا ولا بتعرف تتطبخ عشان كدا فتحت البوست دا وفرتقت ..
وجع الراس عرفنا سببو بس وجع العيون بتاع الشفع دا من شنو؟؟



حمدالله على السلامة ......
راجياك العواسة ...الطبيخ خلص
Post: #143
Title: Re: رمضان خشا العضم...راسي مووجعني
Author: رأفت ميلاد
Date: 09-06-2009, 08:12 AM
Parent: #142

بت الشيخ يقصر الملح
أها زى ما قالت الحاجة ست الكسرة فى جده من كترت السؤال "عملتوا تخين وأخرش"
Quote: برضو السمك والفسيخ اصحابنا نسيت
وكان نسيتنا أنا ما نسيت .. زى ما قال الغناى ..
ختى لى الخلطة السرية للفسيخ .. وأوع تقول لى ده حق الحلب .. ديل سحاحير بياكلوه نى .. بطفش ليهم من البيت ..
كان زيدتيها بتنويعات سمك محمر .. تانى ما بجى بتحاوم بى جاى .. ياخى المقلى بالزيت ده ما بظبط معاى .. أدينى تيب ..

وست البيت ربطت راسا وعملت عيانة .. يا ربى زوغة مننا ولا من رمضان ..
Post: #144
Title: Re: رمضان خشا العضم...راسي مووجعني
Author: Amira Elsheikh
Date: 09-06-2009, 12:57 PM
Parent: #143

Quote: وأوع تقول لى ده حق الحلب .. ديل سحاحير بياكلوه نى .. بطفش ليهم من البيت


والله وماطالبنى حليفة ياقول حبوبتى ختفتها من كيبوردينى
من لحظة كتبت دايرين خلطة الفسيخ قلت ياربى رأفت دا قاصد
فسيخم النئئئئ داك وملون بالشطة ولاقاصد حقنا ...

لقيتك فى راسك ريشة يارافت ...

المرة دى الوشوش ما لميت فيها ..

طيب السمك المحمر ... و بعد نشرب الموية اجى اسوى ليك الفسيخ..

1/سمك مغسول نضيف ومقطع
2/ليمون معصور ونضبف عليهو توم وشمار وملح وشوية شطة حمرا
3/دقيق
4/زيت
الطريقة...
تتبل السمك بخلطة الليمون دى قلبها وعدلها(لمدة ساعة)
الخطوة التانية تشيل السمكة تختها فى الدقيق وبرضو تخلى
السمك مغطى بطبقة من الدقيق بكل الجنبات ..

الزيت تكون كميتو كبيرة وما يكون سخن شديدلانو السمك بتحمر سريع شان كدا النار هادئة والزيت ماسخن

مرات كتيرة طريقة الطبخ او التحمير هى البتبوظ القصة مش المقادير بس
دائما التحمير يكون على نار هادئة وكمية الزيت مناسبة
Post: #146
Title: دجاج بالفرن، وصفة سريعة، ورهييييييييييبه
Author: مريم بنت الحسين
Date: 09-06-2009, 04:54 PM
Parent: #144

ازيكم يا ستات... والله قلت الواحد يجي يدكم وصفة سريعة كده.. وانا طبعا اموت في الاختصارات...
دجاج بالفرن
ستة افخاذ دجاج او thighs.. (تتنظف، وتتغسل كويس)
كوب زبادي
ملعقتين صلصة
ملعقتين كركم
ملعقتين شمار
ملعقتين جنزبيل بودره
ملعقتين توم بودره
ملعقتين قرفه مطحونه
ملعقتين هبهان مطحون (او صاحي، بس بعدين تشيلوه)
ليمونه
ملعقتين خل
ملعقتين كزبرة مطحونه
ملعقتين بابريكا (دي طبعا الفلفل الاحمر، منشف ومطحون، زي الشطه، بس ما حار)
وملح طبعا

الحاجات دي كلللللللللها في كيس، مع الدجاج.. وتربطوه كوييييس... وبعداك تبدوا توزعوا الخلطة مع الدجاج.. يعني تقعد تعفصوا في الكيس بيديكم.. لحدي ما تتأكدوا انه الدجاج اختلط مع التتبيله كويس.. وتخليوهو يبت في التلاجه.. قبل ساعة من الاكل.. يترص في صينية ويدخل الفرن.. يفضل في الفرن لمدة نص ساعة.. بعد شويه.. غطوه بfoil ألومنيوم.. ورجعوا الفرن تاني ربع ساعة.. بعداك فكوا الفويل.. ورجعوه الفرن.. ربع ساعة.. يعني بقعد في الفرن زي ساعة كده...

اكلوا وادعوا لي

هو طبعا من تشموا الريحه حتدعوا لي.. فيه ريحة.. تخلي الزول يجن

بنت الحسين
Post: #147
Title: Re: دجاج بالفرن، وصفة سريعة، ورهييييييييييبه
Author: SHIBKA
Date: 09-06-2009, 04:59 PM
Parent: #146

مريم
يوم التلاتاء انشا الله بنديك الرد على الوصفة دي
Post: #148
Title: Re: دجاج بالفرن، وصفة سريعة، ورهييييييييييبه
Author: Amira Elsheikh
Date: 09-06-2009, 07:37 PM
Parent: #147

Quote: يعني تقعد تعفصوا في الكيس بيديكم


عفصك عفصك عفصك....

والله جنس عفيص هو يابت الحسين

والله عجبتنى فكرة العفيص دى شديد

ممكن بنفس الطريقة نحمرو؟ ..نجرب

غايتو انا فى حالة الجداد*(الدجاج) بفضل التحمير







______________________________
كلمة عفيص دى طوالى مقابلها جداد مش دجاج يابت الحسين (وش ميت من الضحك)
Post: #149
Title: Re: دجاج بالفرن، وصفة سريعة، ورهييييييييييبه
Author: مريم بنت الحسين
Date: 09-06-2009, 07:58 PM
Parent: #148

ههههههههههههه يا اميره..

قلتي لي طلعت شهادة عربية زي صاحباتي "..... ...... ...... ....."
اكملي الفراغ، خلي الطابق مستور

يا ستي انا ما حصل حمّرتها.. وما بفضل التحمير، نظام ما صحي وكده.. لكن انا اساساً الأكله اخدتها من طبخة مغربية (طاجين).. الدجاج بي تدبيلته دي، بختوه في حلّه مع حببببة زيت.. لما يتحمر بي برّه.. بعداك يطلعوه.. وفي الزيت داك، (تجدعي) بصل مقطع.. وممكن كوسه.. وطماطم.. وتقلبيهم سوا.. وترجعي (الجداد) للنار تاني.. وتقلبيه شويه مع الخضار.. وتغمريهم بي شوربة (جداد) او لحمة.. وبعداك تخليه في النار مده طويلة.. ما اقل من ساعتين slow cooking.. ويقدّم مع الكوسكوس... بس انا اختصرته الفلم الهندي، ودخلته الفرن...

المرجع
The Gormet next door
في قناة فتافيت....

اشبعي ضحك الليله
Post: #150
Title: Re: دجاج بالفرن، وصفة سريعة، ورهييييييييييبه
Author: Amira Elsheikh
Date: 09-06-2009, 11:52 PM
Parent: #149

Quote: قلتي لي طلعت شهادة عربية زي صاحباتي "..... ...... ...... ....."
اكملي الفراغ، خلي الطابق مستور



بت الحسين ..

شهادة عربية دى شهادة شنو كدا ماعارفة اريد بها باطل
او العكس صحيح ... بس نفسى اعرف الكلام دا بتقال متين

ياخ والله انا الشهادة العربية بسمع بيها سمع وكان رجعتى للتى وعجنى الفوق
دا تفهمى حاجة .....
كنت قايلاك انت شهادة عربية ومابتعرفى العفيص ولا سمعت بيهو

غايتو عندى عفيص كتير بجيك راجعة
Post: #151
Title: Re: ملاح روب ابيض
Author: فادية اليمني
Date: 09-07-2009, 00:33 AM
Parent: #150

سلام ورمضان كريم

لست البوست لنا المهدى

و ستات المطبخ اميرة وشبكة و مريم والضيف رأفت وضيوف الحلقات السابقة

والله متابعاكم من اول يوم بس ما قادرة ادخل عليهم فى المطبخ ده من السخانة الشديدة

طوالى بعطش وبجوع عشان كده ما بقدر ارد اقول اجيكم بالليل شبعانة ورويانة انعس انوم

لكن الليلة اصرت انه اكتب معاكم شوية كده لانه عندى كم وصفة خفيفة وسريعة، احسن ادخل تووش

ومنها:

ملاح الروب الابيض:

المقادير:
- كاس زبادى
- 2 ملعقة كبيرة ارز مسحون او دقيق ( بس يفضل الارز)
- بصلة متوسطة
- فلفية خضراء
- شطة خضراء
- بهارات ( ملح توم فلفل)
- شوية سكر يعنى بطرف اصابعينك (طبعا دى امى بتعملها بالسرقة)

الوصفة:

تكبى الزبادى والارز المسحون مع باقى المقادير كلها (البصل والفلفية بطولهم)
و يرفعيه على نار هادئة (بعد التسخين اذ حسيت انه خفيف ممكن تزويد كمية الارز)
لحد ما يجخجخ على قول لنا



و ان شاء الله يارب يعجبكم





شبكة لازم تجربيه وتورينى رايك
Post: #152
Title: Re: ملاح روب ابيض
Author: Amira Elsheikh
Date: 09-07-2009, 00:57 AM
Parent: #151

Quote: لحد ما يجخجخ على قول لنا



غايتو جنس جخجخة هى بت اليمنى....
البوست دا بعد كدا داير مترجمين عديل
مع الجخجخة والعفيص دا...

الله يستر من الشهادة العربية والامريكية

وينك يارافت فاتك العفيص والجخجخة
Post: #154
Title: Re: ملاح روب ابيض
Author: Amira Elsheikh
Date: 09-07-2009, 08:01 PM
Parent: #152

غايتو دخلت المندى الفرن ومنتظرة

الكلاس دا فاضى كدا مالو ..؟؟

لا المديرة ..لا الطلبة ... لاالمتعاونيين ولا البارتايمر

الحصل شنو؟؟؟
Post: #155
Title: Re: ملاح روب ابيض
Author: رأفت ميلاد
Date: 09-10-2009, 02:30 PM
Parent: #154

Quote: لا الطلبة
Post: #156
Title: Re: ملاح روب ابيض
Author: SHIBKA
Date: 09-10-2009, 05:35 PM
Parent: #151

فادية
وحاة الله ما شفت ملاحك دا

كدي بعملوا يوم السبت انشا الله
لانو البورداب قالوا فطور الجمعة عليهم
ياقتلونا بالجوع ياقتلونا بالتخمة

اها نشوفهم ونجي يوم السبت لملاحك دا ونشوف بيطلع كيف
واكيد رائي بجي قدامي
Post: #157
Title: Re: ملاح روب ابيض
Author: lana mahdi
Date: 09-10-2009, 10:09 PM
Parent: #156

غايتو يا رأفت لو كلام على شاكلة (الزول دةبنريدو زي كأنو"أبيه" على قولةالمصريين)فحلات القطيعة(:(:(:
Post: #158
Title: صينينة السمك بالقمرالدين والزبيب
Author: lana mahdi
Date: 09-11-2009, 05:30 AM
Parent: #157

المقادير
--------
سمك بعظم
حلقات بصل مقطعة مدورة
حلقات طماطم مقطعة مدورة
مقدارمن الزبيب(ما كتير)
مقدار من قمرالدين المقطع قطع مربعة صغيرة(ما لفة يعني لكن شريط نقطعو قطع صغيرة)
توم مفروم
حبيبة زيت
فول سوداني مدروش(ما مسحون ناعم)
شمار
كسبرة
ملح
شوية موية(ماتغرق السمك)
الطريقة
---------
في صينية فرن
ندهن قعرها ونرص البصل
وبعدين السمك
نغزغز الطماطم بين السمك
نوزع الزبيب بين السمك
نوزع القمردين
الموية نخلطها بالتوم والملح والبهارات والفول السوداني ونضيفها لصينية السمك
ندخلهاالفرن لمن تشرب الموية وينجض السمك
Post: #159
Title: السركيمة
Author: lana mahdi
Date: 09-11-2009, 05:40 AM
Parent: #158

دي من أحب الأكلات لبيتنا وأصحابناوللا شنو ياولي الدين؟؟(:(:
المقادير
--------
باذنجان مقطع لدوائر ومقلي في زيت
لحمة مفرومة
بهارات(ملح-كسبرة مطحونة-فلفل أسودمطحون-توم مفروم)
صلصة
طماطم مخلوطة بحبةموية
فول سوداني مسحون
شوية طحينة
شوية زبادي
الطرييييييييييييقة
--------------------
في صينية فرن نرص الباذنجان المقلي
نجهز القيمة(اللحمةالمفرومة)بوضع شويةزيت في حلةعلى النار
نضيف اللحمةالمفرومة
وشوية موية
نضيف الملح والفلفل والكسبرة
والصلصة
وآخر شي نضيف التوم ونهدي النار نخلي القيمة تشرب مويتهاتمام
بعدما رصينا الباذنجان نوزع فوقوالقيمة
نخلط الزبادي والطحينة والفول السوداني بحبييييبةموية
نغطي بيهو صينيةالباذنجان واللحمةالمفرومة
ندخلها الفرن ونراقبها لغاية ما الوش يتحمر(مابتاخد وقت لان الحاجات كلها نجيضة)
لنا
Post: #160
Title: Re: صينينة السمك بالقمرالدين والزبيب
Author: ماجدة عوض خوجلى
Date: 09-11-2009, 05:43 AM
Parent: #158

انا غايتو سحورى هنا ... تاريهو الصيام بيخليك تشوف حاجات وتجلى حاجات
حكمة الله اصلو مابيجليك من حاجات الشكل ....
ازيك ياناس الكيتشن والصوانى بالقمردين ساكت بدون ال ...
تسلمو يارب ....
Post: #161
Title: Re: صينينة السمك بالقمرالدين والزبيب
Author: lana mahdi
Date: 09-11-2009, 06:39 AM
Parent: #160

Quote: انا غايتو سحورى هنا ... تاريهو الصيام بيخليك تشوف حاجات وتجلى حاجات
حكمة الله اصلو مابيجليك من حاجات الشكل ....
ازيك ياناس الكيتشن والصوانى بالقمردين ساكت بدون ال ...
تسلمو يارب ....

مجودة كلها تمنية يوم أجلي الشكل(:(:
تعالي قعمزي بي هناوللا بوست الصوالين...طبعاً قريب العيد سوقه حيكون حار)))
Post: #162
Title: تايسسسسسسسسسسسسا
Author: lana mahdi
Date: 09-11-2009, 08:28 AM
Parent: #161

Quote: بوست بتاع عضة
يا للسعادة





أنا هسي شبعانة بجيكم بكرة لمن أجوع
قالوا بوست العضة بيجيب زولو لي حولو ..

تايسسسسسسسسا
الغتسك يمرقك(:(:(:
Post: #163
Title: رجججججججججوية
Author: lana mahdi
Date: 09-11-2009, 08:32 AM
Parent: #162

رجوية الحبيبة
مشتاقوووووووون كميات
ياخي راجينك ببقية الوصفات
تخيلي طول رمضان عملتا اسلوب اليمنيين القلتي عليهو في الإفطار
يا سلام الزول بيكون (مركز)فيما بعد(:(:
سلامات حبيبة
لنا
Quote: أححححححم..
بعد السلام والتحايا الخريفية الغائمة رمضانكم كريم..

حأجيك يا لنا وضيوفك بروااااقة لأحكي وأوصف الأكل اليمني الغرقانة فيهو اليومين دي..
فما بين اللحوح، والشفوت والسلتة (ما السلطة).. إتجهجهتا وريقي جري.

وما حأنسى حلوى (زنود الست) من السنة الفاتت وعدت بيها محمد نور. حأجيبها بالصور هذه المرة. ولقيتها قااااعدة محكًرة عند الحلواني..
زنود الست حلوى عراقية. تاكل ما تدي الجنبك. وشكلها عسل ومبغبغ.. هههههههه

اليمنيين بيفطروا كالتالي:
بعد الآذان ويحللوا صيامهم بالتمر والعصير والقهوة اللونها فاتح (إكتشفت إنها ليست البن وإنما قشر البن!!). يأكلوا حاجات خفيفة زي السمبوسك والشفوت. وهو قراصة زي (الأنجيرا) الحبشية. يقوموا يطعموها بالزبادي والخضرة (البقدونس والجرجير والحاجات الماقاعدة أقربها في السلطة).
وبعد كده يهدًوا اللعب.. والحكاية دي إسمها الفطور..

أها بعد داك يمشوا يصلًوا. ويرجعوا تاني للجولة التانية والأسمها العشاء.. وفيها بياكلوا كل الأطاييب من كبسة ودجاج ومرق وحاجة غريبة للغاية أكلتها الليلة إسمها (فتوت) أنا يا مؤمن يا مصدق قايلاها فتة.. لقيتها بيض بالعسل والمفتوت عيش مخبوز مخصوص.. كانت مفاجأة حلوة غايتو..

طبعا يا لنا أي أكلة أسال إسمها شنو ويقولو لي.. أتذكر محمد صبحي في رحلة المليون مع سماح أنور و(الزغلاج)..

ما بين المطرة الليها 4 يوم ما إنقطعت والجو الخرافة.. وبين كرم اليمانيين أنا غرقت واللي كان كان..

ورمـــضـــان كـــريـــم على الكل..
Post: #164
Title: رشوشة الحياة يا جعفر
Author: lana mahdi
Date: 09-11-2009, 08:39 AM
Parent: #163

Quote: الأميرة لنا كل سنة وإنت والأسرة بألف خير ورمضان كريم على جميع البورداب وتصوموا وتفطروا بخيرين
Quote: Quote: وللمتزوجين العملو ليهم خيانات والمدام والوليدات مشو يصومو في السودان

نحن من ديل السنة دي يا لنا أهم حاجة عندي التمر والبليلة (أموت في البليلة) وحاقر ليك بشربة العدس وللعشاء القطر قام وهاك يا رشوشة ووصفة القطر قام (السليقة) لشخص واحد كالتالي 1- 250 جرام لحم ضاني 2- 1 بصلة كبيرة الحجم 3- 1 حبة طماطم حمراء 4- 3 فصوص توم 5- تشكيلة من البهارات (قرفة + هيل + شمار + كسبرة + ليمون مجفف + فلفل أخضر) 6- قطعة واحدة من الجزر 7- قطعة واحدة بطاطس افتقد بشدة سلطة الروب والجبنة الهدندوية بطقوسها الرهيبة ويوم الواحد يكسل يرجع للفول والطعمية

غايتو رشوشتك دي رشوشة الحياة عملات حبوبة
ماشاء الله المواهب المدفونة ظهرت(:
Post: #165
Title: ملاح الروب الأبيض العينو زي البصلة في الروب
Author: lana mahdi
Date: 09-11-2009, 08:54 AM
Parent: #164

المفادير
روب أو زبادي
بصلة متوسطة سالمة
حبييييبةدقيق
شويةموية
حبةملح
حبة فلفل
حببببة ويكة
سمنة
الطريقة
-------
نخلط الروب مع الموية وحبةالملح وحبيييييبة دقيق ونضربهم كويس .
نضيف البصلةالسالمة للخليط السابق ونختو شوية على نار هادية لغايةالبصلةتتسلق وريحتهاتمرق في الملاح.
ننشل البصلة ونشوف لوالملاح محتاج قوامو لي حبة دقيق ليغلظ.
نضيف ذرات فلفل مسحون
نرفع الملاح من النار وبسرعة نلايقو بي حبة ويكة
عند التقديم تضاف سمنة على وش الملاح
لنا
Post: #166
Title: البيض الاسكتلندي
Author: lana mahdi
Date: 09-11-2009, 09:06 AM
Parent: #165

دي حاجةمشهورة بيها أمي
المقادير
--------
بيض مسلوق سالم ومقشر
لحمة مفرومة
بصلة صغيرة مفرومة نااااعم
شوية توم مفروم نااااعم
ملح
فلفل اسود مسحون
بيض مضروب مع حبةملح وفلفل
حبةدقيق
بقسماط مطحون او عيش منشف ومدقوق
زيت للتحمير
الطريقة
--------
1-تفرم اللحمة المفرومة لتنعم زيادة
2-يضاف لها البصلة والتوم الناعم ويفرمو مع بعض
يضاف الملح والفلفل معاهم
نقسم اللحمةالمفرومة لي اجزاء وكل بيضة مسلوقة نغطيها كويس بي جزء
نشيل البيضة المغطاة باللحمة ونطمسها في الدقيق لغاية تتغطا كويس بالدقيق
نشيلها ونختها في البيض المخفوق المتبل بالملح والفلفل
نغطيها بالبقسماط المطحون
وتحمر في زيت غزير
لنا