دايلمة نسائية.. نبحث عن وجهات نظر

واحدة عندها صديقتها العزيزة جدا كان عندها علاقة مع واحد حصلت مشاكل بينهم
والصديقة تركت الواحد دا..

الزول دا في عز الصدمة لجأ الى الصديقة فيما بعد تقدم لها للزواج..
وهي مترددة هل تتزوجه وهي ترى انه شخص ممتاز ولكن كان لديه علاقة حب هي متابعاها
من البداية الى النهاية..

هل سيتمدد شبح الصديقة بينهم؟



اها وجهات نظر بالله..ولا "حبذدا" لو زول بعرف وضع ذي دا يورينا الناتج شنو؟

بالايميل


[email protected]

ازيك يا نجاة..
غايتو انا بنتظر شوية لغاية الاسئله تتصاعد والموضوع يسخن..
نوع هل صداقتها بصديقتها مازالت قويه..ولياتو درجه..
وهل مازالت صديقتها تحبه ام تركته وحبه وسنين حبه..
هو ممتاز كيف يعني؟؟
واساسا سابوا بعض ليه..
او هو منو الساب التاني؟؟
ولا الاتنين سابو بعض بقناعة
عارفه نوع الاسئله الكتيره العجيبة ديك..
وبعداك نشوف الموضوع ماشي كيف علشان ننظر..

غير كده كل سنة وانتي طيبة وتصومي وتفطري علي خير من بدري كده..

سلامات يا منى


العلاقة بين الصديقتين مازالت قائمة

والصديقة تركته لاختلاف في الامزجة والرؤى


الصديقة جاتها سفرة للخارج صفت حساباتها معه ومشت لحال سبيلها

قصة حب دي ما معروفة لانه هي قالت لصاحبتها دي انه ما عندها مشاعر نحوه
والزولة دي خايفة هو يكون عنده مشاعر ليها..




وليك كل المحبة وتصومي وتفطري على خير..

سلام يا نساء وآنسات المنبر المحترمات ...

معليش على التداخل في موضوعكم الخاص دا ...

بس جيت أوصل الهدية دي لأختنا المحترمة دكتورة نجاة وأمشي :




دا شعار مؤقت لمنظمة دكتورة نجاة ممكن تستخدمه في البروفايل بتاعها أو في إعلانات الجمعية

إذا شافت إنو مناسب


سلام


ودا رابط الصورة

http://www.sudaneseonline.com/uploadpic/Jun09upload/54654654.jpg

عبر الايميل وصلت الرسالة دي

سلام يادكتورة

بالاشارة الي موضوعك بتاع الديلمة النسائية ... ممكن اشارك ؟؟؟

طبعا حسب رايي في حيثيات كتيرة مهمة شديد زي هل هي التركتو ولا هو التركها والاسباب الحقيقية لانفصالهم ومدي تقبل الصديقة التانية للاسباب دي وزي ما انت قلتي انو العلاقة مستمرة بين الصديقتين فبرضو راي الخطيبة السابقة المفروض يكون مهم للتانية وتفاصيل تانية صغيرة صغيرة ..

لاحظي انو ممكن يكون الزول ده عجبتو صاحبة خطيبتو وبقي يتماسخ لي خطيبتو عشان يتفرغ لي صاحبتها ودي بتحصل كتير جدا جدا .. في كتير من الشباب بيكون خاطب واحدة وبعد ما يتعرف علي صاحباتها يقوم يكتشف انو في واحدة مناسبة ليهو اكتر من خطيبتو دي ويبدا في التنصل من دي والتمسك بي ديك

طبعا الموقف الاحرج هنا موقف الصديقة الحبوها جديد دي ( ياخ كان تشوفي ليهم اسامي عشان تسهلي التوصيف ) لانو بالنسبة للقديمة هي تركت زول ومابتتوقع من صديقتها تاخدو فلازم يكون عندها اسباب قوية ومقنعة والا بتكون بتخاطر بي صداقتها معاها .. وبالنسبة للراجل طبعا مافي شي هاميهو واصلا الرجال جلدهم تخين مافي شي بيهمهم ... وهي برضو عليها تتاكد من مشاعر الراجل ده تجاها وانها مامشاعر مؤقتة بي سبب فقدانو لي حبيبة ومحاولة تعويض من الاقرب .. وبرضو في رجال بيتقربو من صاحبة خطيباتهم السابقات عشان يثيرو فيهم الغيرة ويغيظوهم بس ما اكتر .. فهي لازم تنتبه شديييد للحاجات دي كلها...

في حالة كانت الامور كلها تمام واسباب الانفصال منطقية وفي تفاهم كبير بين الصديقتين اظن انو ممكن تقعد معاها وتشرح ليها الوضع واظن انو ممكن يحصل اتفاق بينهم كويس جدا وتنجح العلاقة الجديدة وتستمر الصداقة بين الجميع ..

او كمان لو كانت مقتنعة بي الزول شديد وصاحبتها ابت تتفهم الوضع وده شي متوقع تقوم تقنع من صاحبتها دي وتتمسك برجلها وقالو في الاثر ( رجل في اليد ولا عشرة صديقات في الشجرة )

وباي حال الصداقة عندها التزامات ومتطلبات تضحية وشرف وواضح انو الزولة دي ما التزمت بيها لمجرد تفكيرها بس في خطيب او حبيب سابق لي صاحبتها


واخيرا بعرف نموزج قريب من ده وهو انو واحد كان خاطب واحدة واتعرف علي صديقتها المقربة واتضح ليهو انو صديقتها دي احسن ليهو من خطيبتو وانسب وحصل حب حقيقي بينهم فترك خطيبتو وتركت هي صديقتها وهربو بحبهم وعاشو حتي الان في سعادة وهناء لكن بعد ماحطمو قلب البت المسكينة شر تحطيم ..


تحياتي يادكتورة ومتابعنك ومعجبين بكتابتك في المنبر وان كان يدهشني حقا موقفك تجاه لبني الصحفية او خلينا نقول لبني الفتاة التي تدافع باستماتة في سبيل تبرئة شرفها من التلطيخ بدون مبرر

تسلمي يارب

خالد غالي

عبر الايميل

بسم الله الحمن الرحيم
اختى نجاة
السلام عليكم و رحمة الله
بخصوص موضوعك المطروح فى منبر سودانيز اون لاين و لانى لست عضوا فيه و اود المشاركة فى هذا الحوار بحكم تجربة شخصية
اختى الكريمة
الموضوع المطروح لا بد من النظر اليه من عدة جوانب
فاذا نظرنا اليه بالعقل و المنطق فهو كالآتى
1. العلاقة التى كانت بين الشاب و الفتاة قبل ان تحصل بينهما بعض المشاكل يمكن ان نسميها فترة تعارف اكتشفا خلالها اختلاف فى وجهات النظر مما استدعى حدوث هذه المشاكل
2.علاقته بفتاته الاولى قد انتهت و هو لا محالة متزوج من غيرها ان كانت صديقتها او قريبتها او حتى اختها
3.هذا الشاب لن يظل وقفا لفتاته الاولى وهى كذلك
4. انا اقول لك هذا الكلام عن تجربة فقد كنت مرتبطا بفتااة( خطبتها و شبكتها و ما خليت ليها فرضا ناقص) و اختلفنا و ذهب كل فى طريق و تزوجها صديقى و صدقينى يا دكتورة لم اشعر باى غبن تجاهه لانها ان لم تتزوجه ستتزوج غيره
5.النقطة الاهم يا اختى الكريمة هى ان تتأكد الفتاة الثانية من صدق مشاعر الشاب تجاهها حتى لا يكون اقدامه عليها رد فعل لفشل علاقته بالاولى و دى جزئية خطيرة جدا لانو (حتروح السكرة و تجى الفكرة)
6. انا ارى ان لا غضاضة فى ان تتزوجه و ربنا يبارك لهما.
( يا نجاة شايفك رديتى للاخت منى بانو سبب الخلاف هو اختلاف فى الامزجة و الرؤى طيب يا اختى ديل متفقين فى شنو)
اما اذا نظرنا للموضوع من ناحية الاعراف الاجتماعية السودانية
المجتمع حيقول انها خطفت زول صديقتها و انه لم يتركها الا بعد ان اوحت اليه الصديقة الشريرة و طبعا صديقتها حتقطع علاقتها معاها و حتكون موضوع اسألينى منو انا (تعرفى يا دكتورة عندنا واحدة فى حلتنا بتها متزوجة الا ان ذاكرة المجتمع لم تنسى انها خطفت خطيب صديقتها) و المجتمع بالمناسبة حيسمعها كلام زى الزفت و حتكون محور الونسة و القطيعة و جلسات القهوة و شغلة للما عندو شغلة و لكنى ارى ان تتأكد من صدقه نحوها و تتزوجه.
يا دكتورة كتر خيرك و اتمنى ان تكون وجهة نظرى ذات فائدة
مع اكيد شكرى و احترامى
امجد الجميعابى

دكتورة نجاة ..

تحيااتى و تقديرى



بعيداً عن وجهات النظر و الإحتمالات و التجارب التى تختلف ظروفها و نتائجها و بالتالى لا تصلح للتعميم

و قريباً من نتائج دراسات الإجتماع و الشخصية

الثابت أن بعد كل تجربة غير ناجحة فى أى مجال يكون هناك إندفاع للتعويض

و ذلك رد فعل طبيعى .. فى فترة تكون فيها الموازين حساسة تتأرجح و ترجح أى كفة لأتفه الأسباب

و أكيد هى فترة ليست الأنسب لأى إختيار أو قرار

ذلك بالنسبة له .. أعنى الشاب


أما عن الشابة .. فالحياة كما يرى الكل ليست سوى خيارات و أختيارات

هى على سابق معرفة بجوانب شخصيته و لها علم بطريقته فى الحياة

و لها أيضاً حق الخيار ..


لاا نعلم نحن عن أسباب ترددها حتى ندلى بدلونا

و لو كانت هناك إشارات و لو صغيرة جداً قد صدرت منه تستدعى أى تردد منها


فذلك يعيد النظرية الأولى لأرض التطبيق

و هى أنه مازال فى طور عدم التوازن

و هى فى مرحلة تردد


إذن فالنتيجة المحتملة لا تبدو صحيحة .. على الأقل فى هذه المرحلة

فوق لمزيد من التعليقات


مع مودتي لكم جميعا

فوق لمن يهمهم الامر

د. نجاة
ازيك ..
صاحبتك حاسمة الموضوع جواها
ونحن نقول مبروك من اسع دي
بس هي ضميرها صاحي وحاسة بالذنب شوية ..


___________

حريش

قولي ليها منال قالت ليكي تكون متوقعة انه نفر الراجل الزي ده غالباً ما تكون عينه طايره

وزي ما بتقول حبوبتي ما بعجبه الصاريهو

وللأ سف العين الطايرة ما بتكتشف الا بعد رقشة العرس تروح ..


___________
تخريمة:
يادكتورة ..عاجباني قوتك في طرح قضايا المرأة

ولك احترامي ومحبتي
ومبروك للعروسة

د/ نجاة / سلام

طبعاً لو شاورتني حاقول ليها ماتتزوجيهو نهائي

حتظل صاحبتا بينهم للابد رغم انه حتبعد وتنسي لكن هم الاتنين ماحيقدرو يتجاوزوها


مالا ومال الجهجهة يعني الدنيا دي ضاقت الا عن خطيب صاحبتها السابق