ديوان نحن شنو؟

ديوان نحن شنو؟
للشاعر د. محمد بدوي مصطفى الشيخ

زقلونا (١)
خلاص ما قلتْ، كفاك يا زول!
نحن شنو؟
ونحن منو؟
أنحن الطين
ونحن عجين
نحن أم درّ بيوت ساكنين
وفي الخرطوم شقق عاملين
وفي بربر وليه شندي في زقلونا في الكاملين
في أم ضبان وفي خماس قطاطي الطين
هداكَ وحيد، نشوف زلط الجزيرة يبين
بالأمجاد وبالباصات وبالبنزين
بالكداري، بالسداري بالجازولين
وبالكارو، قصاد العرسة ديك ماشين
جنب السكي، في بركات قعدنا سنين
ولي مدني ولي كسلا الجمال حابين
وجنب الكوشة في الراكبوبة محبوسين
وعند السوق وجنب السور معو لافين
بيوتنا الفي الصقيعة تبين
وجنبها لا تشجير، ولا ياسمين
وغنيمات الله قرضو التين
وورق الكوشة ليو لايكين
وصفق المنقة ليو أكلين
وفيهو يشربو موية الطين
مبالغة، نحن ناس حلوين
=================================

قطع رحط (٢)

أعزمو الناس، شعوب كاملين
وما تنسو الأهل يا مين!
وكروت الدخلة لي ياسين
وناس فطومة ما عازمين
عشان في مأتم الوالدين،
ما واسونا، قول لايمين
ولا ناس حوا، ديل كعبين
يشنفو في الخلق حاسدين
وحَتْ ستونة بت مومنين
ما تعتب على البابين!
وما تطلق وشيشها تبين
خشيمها قطيعة، شين في شين
وقطع رحطنا فات يومين
دخلة وللصبح حافلين
ولي جيرنا كل لامين
ولي أعمامنا، موسي وأمين
لا زارونا لا جايين
لا أدونا لا جايبين
مغتربين وغنيانين ومسرورين
لكن ما بسلوه، لو ملين


السيرة (٣)

خلاص ما قلت، كفاك القول!
نحن شنو؟
ونحن منو؟
بخور العيد وعرس الزين
دلكة وخمرة للعايزين
وفركة وعصفر الحرمين
طلح دخان وحفرة يمين!
وحوّه تطقطق الباركين،
لا ستونة، لاقدورة، لا لا، قمسة يمين!
عروسنا تسوح شمال ويمين
وربزة تسوي للقاعدين
تلاتة قدوره مليانين
مع الشيخ الكبير سايرين
وشيخ الحلة وينو حسنين؟
بالباصات نكون سايرين
وناس كداري ناس ماشين
ناس مرضانة، من غدرفها معسومين
وناس في المشية ليها أنين
تتكل صفحة بالايدين
تحلف ما بمش والدين
لا ياسرين، ولا يامنين
أقيف! حبوبه يا ناسين
ضلوعها من الهجير عاسرين
توبها تلموه حين لي حين
تعال أرفع معاي يا حسين
نشيل حبوبة في الصندوق و بالكريعين
وين الحافلة ديك الزين؟
قطعت في الزلط بنزين
لا زيت فرملة وجازولين
تعالَ وشد وقول يا مهين
نقل حبوبة بت حسنين
لانو عضامها مورودين
وركابها عضامها ما بتلين
أريتها شقاوة ما بتهين
دحين اتحفزوا الجايين
وصلنا الحلة للسمحين
ادخلوا البيت افرقو بكين!
جنب الكرونة فوق الطين
مكان حبوبة بت حسنين
نخت طربيزة، وبنبرين اتنين
إتوهّطت هسي الحين؟
حبابكم عشرة يا طيبين
أريتكم إنتو عندي بنين
تصلي تقول، كلامها حنين
بركة الله ورسول الدين
أشوفك تمشي للحرمين
سالم من شقا وتامين
غانم يا إلهي تعين

نحن شنو؟زقلونا ١