Post: #1
Title: يا سلام عليك يا حاج إبليس يا اخ
Author: Nasruddin Al Basheer
Date: 08-13-2009, 01:06 PM
أمبارح صليت العشاء في مسجد عبد الله بن عمر بالشارقة، وخرجت من المسجد متوجهاً
إلى مركز المبارك من أجل استخدام الصراف الآلي..
سمعت خطوات رجل يجري خلفي ويناديني: يا ود الجارعودو .. يا ود الجارعودو..
دقيقة بالله عليك..
لم أتبين ملامح الرجل في الأول وافتكرته القردابي أو الزنجي أو حتى ود البشرى..
لحق بي الرجل وسلم عليّ سلاماً حاراً.. وتذكرت أنه صلى معنا في المسجد وكان يصلي
في الصف الأمامي..
فقال لي: الظاهر ما عرفتني؟
فقلت ليهو: حقيقة ملامحك ما غريبة علي لكين ما بتذكر لاقيتك وين..
قال لي: يا اخي أنا إبليس..
بدت عليّ الدهشة والذهول فلم أدر ماذا أقول..
ثم سألني: مستغرب مش كده؟
قلت ليهو: بالتأكيد مستغرب وما مصدق وممكن تكون دي كاميرا خفية منك..
فأقسم لي بالله العظيم ثلاث مرات وحلف كذلك بالطلاق والخـــوة بأنه بالفعل إبليس..
وقال لي أنا طالبك في خدمة..
فقلت: خدمة مني أنا؟ إنت قايلني كوز ولا شنو؟
قال لي: أنا عارفك ما كوز وعشان كده اخترتك للموضوع ده..
يا مثبت العقول.. ثبت عقلي..
فقال: باختصار كده.. قبل يومين وأثناء ما قاعد أشاهد في الفضائية السودانية، عرفت إنو
هناك بعض المرضى بحتاجوا للمساعدة عشان يعملوا عمليات جراحية وأنا هسه عاوز أتبرع للناس
ديل.. وعاوز أرسل القروش عن طريقك..
فقلت له: معقولة دي لكين.. إبليس اللعين يتبرع لمرضى مسلمين؟
فقال لي: المانع شنو ياخ؟ الكبران حسنان وأنا حاسي إني كبرت وعاوز أعمل أعمال خير..
يا اخ الناس براها شايلة حالي وبتحاول تنسج قصص سيئة عني.. ثم أصر علي ودلفنا إلى
كافتيريا قريبة فشربنا شاي معاً.. وحكى لي عن المساعدات التي كان يرسلها للناس وعن الأسر
التي كان يعولها وعن الأعمال الجليلة التي قدمها لناس كثيرين في مختلف أركان الدنيا..
ثم بعد ذلك ناولني مائة ألف دولار وطلب مني أن أرسلها بطريقتي الخاصة لهؤلاء المرضى..
وبعد ذلك ودعني وأنا بين مصدق ومكذب.. بالله ده إبليس الكاشفين حالو الناس بالباطل؟
وصحي الما بعرفك يجهلك.. ويا سلام عليك يا حاج إبليس يا اخ..
|
Post: #2
Title: Re: يا سلام عليك يا حاج إبليس يا اخ
Author: ود الخليفه
Date: 08-13-2009, 01:36 PM
Parent: #1
عده تبريرات للفعل الابليسي
اولا داير يرجع السودان عشان يستفيد من الدروس المجانيه التي يقدمها الجماعه
تانياداير يقدم السبت لزوم الاقامه في السودان
ثالثا داير يزيد من سيئات الجماعه لمن يتولي علاج الناس المسؤله منهم الدوله
فالميه الف دولار دي شوف قصادها كم سيئه؟
رابعا حمدو في بطنو
خامسا داير يدودرك انت واداك ميه الف مزوره عشان تتصرف فيها وتكون خنت الامانه ويقبضوك
سادسا دي بستناها منك
|
Post: #3
Title: Re: يا سلام عليك يا حاج إبليس يا اخ
Author: حسن البشاري
Date: 08-13-2009, 02:24 PM
Parent: #2
يا نصر الدين
مصدقك في الحكاية دي ..
لانو سمعت انو حاج ابليس اعتزل الشغلانة وخلاها للجماعة ديل ..
صاحبك ابليس ذاتو اتحير من افعالهم ..
تسلم يا حبيب ..
|
Post: #6
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-15-2009, 08:58 AM
Parent: #3
Quote: مصدقك في الحكاية دي ..
|
صديقي (سابقاً) حسن البشاري
تحياتي وسلامي الحار خالص
قال المتنبيء:
ابن جني أعلم بشعري مني
أظنك إنت الوحيد الفهم مغزى البوست
فكل إنسان عاجبو الصارّو زي ما بقولوا..
بس مفعول المية ألف دولار كان سريع جداً..
بركاتك يا شيخ إبليس
|
Post: #4
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-13-2009, 06:22 PM
Parent: #2
| Quote: خامسا داير يدودرك انت واداك ميه الف مزوره عشان تتصرف فيها وتكون خنت الامانه ويقبضوك |
تحياتي يا ود الخليفة
أنا بتفق معاك في بعض الاحتمالات، لكن مسألة القروش مزورة دي ما صاح، لأني استأذنت إبليس ومشيت لصرافة
مجاورة عشان أتأكد من سلامة العملة.. احتمال تكون مزورة ده كان بساورني برضو..
لكن حاسس بيك ما مصدقني أو بالأصح ما مصدق إبليس.. وليك حق.. إبليس ما بتصدق ودي النقطة المهمة..
|
Post: #5
Title: Re: يا سلام عليك يا حاج إبليس يا اخ
Author: ايهاب اسماعيل
Date: 08-13-2009, 07:21 PM
Parent: #4
Quote: سمعت انو حاج ابليس اعتزل الشغلانة وخلاها للجماعة ديل ..
صاحبك ابليس ذاتو اتحير من افعالهم ..
|
ههههههههههه
قلت لي إبليس إتبرع بمائة ألف دولار...
يا نصرالدين عليك الله لو لاقيت إبليس دا قول ليهو إنشاء الله في ميزان حسناتك...
ولو في طريقة بالمرة كدة نزل لينا صورتو نشوفا ساااي كدة في الدنيا الزايلة دي......
|
Post: #7
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-15-2009, 09:30 AM
Parent: #5
Quote: يا نصرالدين عليك الله لو لاقيت إبليس دا قول ليهو إنشاء الله في ميزان حسناتك...
|
يا إيهاب الراجل قرا البوست وبقول ليك ربنا يقدرنا على فعل الخيرات..
أما بخصوص الصور فبعتذر ليك بشدة لكين قال ما عندو مانع يقابلك
|
Post: #8
Title: Re: يا سلام عليك يا حاج إبليس يا اخ
Author: فايزودالقاضي
Date: 08-15-2009, 09:59 AM
Parent: #7
| Quote: ثم بعد ذلك ناولني مائة ألف دولار وطلب مني أن أرسلها بطريقتي الخاصة لهؤلاء المرضى.. |
والله تبقي مشكلة لو ظهر ليك واحد او اتنين واحتمال اكتر من الجماعة اياهم واثبت ليك انو هو ابليس وداير حقه او كمان يجيبو ليك بعض المرضي دايرين حق العلاج الاترسل ليهم وتبقي في جرجرة مايحلك منها ابليس النبطشي ...
انا عارف نيتك ونية ابليس طيبة لكن قانون اللوبي الابليسي لا يرحم .
تخريمه :
ايهاب ..سلامات ياخي .. ومبروك لولدنا خالد(ابليس كسلا) ..
|
Post: #9
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-15-2009, 02:36 PM
Parent: #8
Quote: والله تبقي مشكلة لو ظهر ليك واحد او اتنين واحتمال اكتر من الجماعة اياهم واثبت ليك انو هو ابليس وداير حقه او كمان يجيبو ليك بعض المرضي دايرين حق العلاج الاترسل ليهم وتبقي في جرجرة مايحلك منها ابليس النبطشي ...
انا عارف نيتك ونية ابليس طيبة لكن قانون اللوبي الابليسي لا يرحم .
|
الناس ديل يا فايز أنضف من إنو يطمعوا في قروش إبليس لأنهم لا يأكلون المال الحرام..
ديل غنيانين وشبعانين من اختلاسات البنوك والمؤسسات الحكومية والتهرب من الضرائب
وأكل أموال الزكاة والجمارك والسرقات وغسيل الأموال (يا اخ شدة ما حريصين على المال
النضيف، قاعدين يغسلوهوا)..
تانياً التسليم التم بيني وبين إبليس كان اتفاق جنتل شيطان وهو لا يملك أي مستند يثبت
أنه سلمني مائة ألف دولار..
أقدر خوفك عليْ يا ولد شيطان يا مفتح..
|
Post: #10
Title: Re: يا سلام عليك يا حاج إبليس يا اخ
Author: ايهاب اسماعيل
Date: 08-21-2009, 05:30 PM
Parent: #8
حبيبنا الغالي ود القاضي ليك وحشة ورمضان كريم
قلت لي إبليس كسلا بالغت عديل كداااااا
مبروك لصحابك خالد عبدالماجد الزواج وأنشاء الله بيت مال وعيال...
و بالمرة كدة يانصرالدين نقول لابليس رمضان كريم......
|
Post: #11
Title: Re: يا سلام عليك يا حاج إبليس يا اخ
Author: عبدالرحمن الحلاوي
Date: 08-21-2009, 06:10 PM
Parent: #10
نصر الدين سلام قابلت أمس بت ابليس في الشهداء امدرمان وانا نازل شارع الوادي ونسة مجانية وافترقنا في شرفي ، هل تصدق مايدور في حمد النيل العركي ات نايت اشبه ملاهي القمار على ذمة الرواة الثقات ..تحيات ودعوات رمضانية لكل المليون ميل هناك ونحنا هنا في المليون مليون مايل .
|
Post: #13
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-22-2009, 11:11 AM
Parent: #11
| Quote: نصر الدين سلام قابلت أمس بت ابليس في الشهداء امدرمان وانا نازل شارع الوادي ونسة مجانية وافترقنا في شرفي ، هل تصدق مايدور في حمد النيل العركي ات نايت اشبه ملاهي القمار على ذمة الرواة الثقات ..تحيات ودعوات رمضانية لكل المليون ميل هناك ونحنا هنا في المليون مليون مايل . |
الحبيب عبد الرحمن الحلاوي
سلام وشوق شديد ورمضان كريم وكل سنة وإنت بخير
تقبل تحيات وسلام ناس منتدى المليون ميل وبالجد فاقدنكم إنت وحمودة في هذا الشهر
نتمنى لكم قضاء إجازة سعيدة بين الأهل في أرض المليون ميل..
ما يحدث في السودان من فساد هو نتيجة طبيعية لما تكسبه أيدي الناس..
الناس كترت في أكل أموال الناس بالباطل، شيء سرقة وشيء اختلاس وشيء غش
وشيء غسيل أموال وكانت هذه هي النتيجة..
بعض الناس اغتنت مادياً لكنها افتقرت روحياً وأخلاقيا للأسف الشديد..
ربنا ينجينا ويسلم أهلنا في السودان جميعاً..
تابع خم الرماد بتاع الشارقة..
|
Post: #12
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-22-2009, 11:04 AM
Parent: #10
| Quote: و بالمرة كدة يانصرالدين نقول لابليس رمضان كريم...... |
رمضان كريم وبخيت عليكم جميعاً يا إيهاب وود القاضي وود الخليفة وود البشاري
وربنا يجعلنا من عتقاء هذا الشهر الكريم..
|
Post: #14
Title: Re: يا سلام عليك يا حاج إبليس يا اخ
Author: طارق الكوتش
Date: 08-22-2009, 12:15 PM
Parent: #12
حابس حابس
|
Post: #15
Title: Re: يا سلام عليك يا حاج إبليس يا اخ
Author: معاوية الأرباب
Date: 08-22-2009, 12:48 PM
Parent: #14
عزيزي نصر الدين , رمضان كريم
زولك ده لو متعشم في العودة للسودان واستعادة أمجاده
أسهل له يتعشم في الجنة فإن تلاميذه - ناكري الجميل -الذين
أحالوه للصالح العام قد تمكنوا , و بلغوا شأوا بعيدا في الصنعة مما يجعل من
عودته كمن يحاول بيع الماء في حارة السقايين.
|
Post: #17
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-24-2009, 06:52 PM
Parent: #15
Quote: زولك ده لو متعشم في العودة للسودان واستعادة أمجاده
أسهل له يتعشم في الجنة فإن تلاميذه - ناكري الجميل -الذين
أحالوه للصالح العام قد تمكنوا , و بلغوا شأوا بعيدا في الصنعة مما يجعل من
عودته كمن يحاول بيع الماء في حارة السقايين. |
تحياتي يا ود الأرباب ورمضان مبارك عليك
على حسب كلامو معاي، هو خلاص بطل الشغلانة، لأنو لقى ناس قعدوهو كنب وهو مقتنع
بالمسألة دي، عشان كده قال عاوز يغير النشاط بتاعو، يعني يكون رجل البر والتقوى
لأنو في نقص شديد في هذا المجال، وقد كان العربون مية ألف دولار تم تحويلها لأصحاب
الحاجات، وافتكر دي بداية بتشفع للراجل وبنتوقع منو الكتير لو أولاد الحرام خلوهو..
|
Post: #16
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-24-2009, 06:44 PM
Parent: #14
سلام يا الكوتش أبو بدلة
على ذكر الحبس، وينك ما ظاهر؟
حباسينك جوا ولا شنو؟
|
Post: #18
Title: Re: يا سلام عليك يا حاج إبليس يا اخ
Author: معاذ منصور
Date: 08-26-2009, 01:39 PM
Parent: #16
كل سنة وانتو طيبين ورمضان كريم
لانه شهر تصفد فيه الشياطين والباسووورد رجع لي في الشهر الكريم
قررت اتداحل في اول مداخلة لي في بوست ابليس مش امكن هو سبب ضياع باسووردي
دي انا متاكد منها
عموما اخ نصر الدين ابليس ملأ البلد وما اظن سورة البقرة وحدها كافية لاخراجه
بس الناس ما تقنع امكن دعوات القنوت والتراويح الصادقة مع شوية جكة تجيب مفعولها
يلا كلهم ادعو الهلاك لابليس الهلاك لابليس
وقول ليه هوي ابليس ارع بقيدك وفلوسك طايرة عليك
|
Post: #19
Title: Re: يا سلام عليك يا حاج إبليس يا اخ
Author: Nasruddin Al Basheer
Date: 08-27-2009, 11:57 AM
Parent: #18
Quote: كل سنة وانتو طيبين ورمضان كريم
لانه شهر تصفد فيه الشياطين والباسووورد رجع لي في الشهر الكريم
قررت اتداحل في اول مداخلة لي في بوست ابليس مش امكن هو سبب ضياع باسووردي
دي انا متاكد منها
عموما اخ نصر الدين ابليس ملأ البلد وما اظن سورة البقرة وحدها كافية لاخراجه
بس الناس ما تقنع امكن دعوات القنوت والتراويح الصادقة مع شوية جكة تجيب مفعولها
يلا كلهم ادعو الهلاك لابليس الهلاك لابليس
وقول ليه هوي ابليس ارع بقيدك وفلوسك طايرة عليك |
رمضان كريم يا معاذ وإن شاء الله السنة دي تكون صمت..
ونبارك ليك كمان عودة الباسوورد ولا هكركم الله في المستقبل..
أرجو ألا تطلق التهم جزافاً وتتهم إبليس بسحب باسووردك..
الباسوورد بتاعك تلاعب به الهكر وما خلى لهناية صفحة ترقد عليها
وإنت يا المغبي ما جايب خبر لما لقيت الرماد كال حماد..
الشي البحصل في السودان يا شيخ معاذ ما حصل بالمرة من إبليس
والناس ديل خترين خلاس وما قارين لإبليس المسكين المغلوب على أمره..
ولو أبليس بطير بسورة البقرة، طيب الناس الشعارهم سورة البقرة ديل
نعمل ليهم شنو؟
عموماً مبروك العودة وخلى بالك من باسووردك..
|
|