Post: #1
Title: انوثة البوردابيات فى خطر
Author: قرشى محمد عبدون
Date: 08-12-2009, 04:48 PM
* هيييييييييييييييييييييع
*يااااااع
*اركز
* كعع
*قوم لف
* هوى يا ياللخو
*حررررررم
* املا يمينك وامش
*يلا اتخارج
*محل الرهيفة تنقد
هذة العبارات غالبا يتحدث بها العوام فى الاسواق وامام محلات البنشر :) ولهم التحية ..لاكين انتو مالكم ؟؟
و قائمة الكلمات تطول
التأثر اصبح واضح جدا فى المنبر..هل تحتاج المراة اللسودانية بصفة عامة الى هذه العبارات لكى تكون كتفها بكتف الرجل و تجارى الرجال اثناء الحوار والكلام ام ان رجولة الانسان السودانى و فحولته لا فكاك منهما..ام كل هذا بسبب بيئتنا القاسية ..وثقافة اولاد الحلة ..واولاد البلد والتربية وووو...
دراجيتنا السودانية مليئة بالعجيب والغريب..ولكننى بصراحة الوم الذين يخاطبون البوردابيات بمثل هذه العبارات..
عن نفسى فخور جدا بنخوتى وبتربيتى ورجولتى..
يلا جندروا الموضوع..ومحل الرهيفة التنقد :) يا البورداب اتنازلوا عن مخاطبتكن بهذه الكلمات او البوردابيات اتنازلوا عن رقتم وانوثتم عشان الحوار ما ينقطع.. ولا كيف ؟؟
وشكرا جميلا
|
Post: #2
Title: Re: انوثة البوردابيات فى خطر
Author: حيدر حسن ميرغني
Date: 08-12-2009, 04:54 PM
Parent: #1
قرشي
لو كان الخطر جاي من الاكسسورات دي
ماعندهن عوجة تب
على الاقل ده كلام واضح ومتداول مثل الريال
الكلام الجد هو التعامل بوضوح دون همز ولمز
|
Post: #6
Title: Re: انوثة البوردابيات فى خطر
Author: قرشى محمد عبدون
Date: 08-12-2009, 05:25 PM
Parent: #2
حيدر مسكاقمى
ربنا يهدى الجميع
شكرا على مرورك الكريم
|
Post: #3
Title: Re: انوثة البوردابيات فى خطر
Author: ود الباوقة
Date: 08-12-2009, 04:54 PM
Parent: #1
هيييييييييييييع ...
كع ..
تمام والله ..
|
Post: #4
Title: Re: انوثة البوردابيات فى خطر
Author: قرشى محمد عبدون
Date: 08-12-2009, 05:06 PM
Parent: #3
الجماعة الفرنجة اول ما افتح فيديو زى دا يشبكونى ليك
??where is the girls
بقول ليهم انتو مالكم بيعوسن فى الكسرة ههههههههه
http://www.youtube.com/watch?v=pVr2w6Ehd00
|
Post: #5
Title: Re: انوثة البوردابيات فى خطر
Author: قرشى محمد عبدون
Date: 08-12-2009, 05:19 PM
Parent: #3
ود الباوقة ..الفيديو دا عشانك ..
يلا صقرية صقريتين كدا بالله من صقرياتك :)
|
Post: #7
Title: Re: انوثة البوردابيات فى خطر
Author: SHIBKA
Date: 08-12-2009, 07:19 PM
Parent: #5
صراحة انا لا ارى اي داعي لاستخدام الاناث لهذه العبارات
على الاقل عشان يكون في فرق في الحوار بين انثى ورجل
|
Post: #8
Title: Re: انوثة البوردابيات فى خطر
Author: د.نجاة محمود
Date: 08-12-2009, 07:24 PM
Parent: #7
نعلن موت المرأة توسكا لمسة حنان
|
Post: #16
Title: Re: انوثة البوردابيات فى خطر
Author: قرشى محمد عبدون
Date: 08-13-2009, 01:22 PM
Parent: #8
د. نجاة شكرا على المرور
بس انا بقول كان احسن تقولى انزار بالموت بدل الاعلان
وتحياتى
|
Post: #9
Title: Re: انوثة البوردابيات فى خطر
Author: قرشى محمد عبدون
Date: 08-13-2009, 12:13 PM
Parent: #7
Quote: صراحة انا لا ارى اي داعي لاستخدام الاناث لهذه العبارات
على الاقل عشان يكون في فرق في الحوار بين انثى ورجل |
لا ضير اذا جاءت هذه العبارات فى سبيل المداعبة الحميدة وخاصة فى بوستات تكسير الثلج وكما نرى توجد علاقات حميمة جدا تكونت بين الاعضاء /وات فى هذا المنبر وهذا امر طيب ( الكلمات دى مجرد اكسسوارات زى ما قال حيدر) لتلطيف الحديث واجواء الونسة ولكن المشكلة تمكن فى استخدام هذه العبارات ومن كلا الجنسين لنسف البوستات او لتقزيم الناس . مثلا .تجد شخص يطرح قضية حيوية ويتداخل و يتحاور بأدب جم وشخص اخر تجده نسف كل جهده ومحاولاته وادبه بكلمة مثل قوم لف وشيل هبابك وامش. او يحاول اغتيال شخصية المحاور .واحيانا هذه الكلمات تقال للهروب من الحوار او عندما يعجز الشخص عن المقارعة و المنازلة النظيفة..هناك فرق كبير بين المحافظة على الكبرياء ومعرفة الشخص قدر نفسه وامكانياته المعرفية..ورحم الله من عرف قدر نفسه
ولك شكرى
|
Post: #10
Title: Re: انوثة البوردابيات فى خطر
Author: SHIBKA
Date: 08-13-2009, 12:18 PM
Parent: #9
Quote:
لا ضير اذا جاءت هذه العبارات فى سبيل المداعبة الحميدة وخاصة فى بوستات تكسير الثلج وكما نرى توجد علاقات حميمة جدا تكونت بين الاعضاء /وات فى هذا المنبر وهذا امر طيب ( الكلمات دى مجرد اكسسوارات زى ما قال حيدر) لتلطيف الحديث واجواء الونسة ولكن المشكلة تمكن فى استخدام هذه العبارات ومن كلا الجنسين لنسف البوستات او لتقزيم الناس . مثلا .تجد شخص يطرح قضية حيوية ويتداخل و يتحاور بأدب جم وشخص اخر تجده نسف كل جهده ومحاولاته وادبه بكلمة مثل قوم لف وشيل هبابك وامش. او يحاول اغتيال شخصية المحاور .واحيانا هذه الكلمات تقال للهروب من الحوار او عندما يعجز الشخص عن المقارعة و المنازلة النظيفة..هناك فرق كبير بين المحافظة على الكبرياء ومعرفة الشخص قدر نفسه وامكانياته المعرفية..ورحم الله من عرف قدر نفسه
|
قرشي
يعني لما اجي انا بت اتكلم معاك بلفظ يافردة والحنك دا، والدلقش دا، ياخي قوم لف
دي عبارات مافي اي نوعية بتاعة انوثة
اكيد انت لما تقرا لبت كاتبة كدا بتخت في راسك صورة معينة للبت
لانو الكلام دا ممكن في حوار بينك وبين صاحبك
بينك وبين اي راجل
لكن ما حوار انثوي اطلاقا
واذا اتقالت مرة بعد شوية بتبقي عادية في اللسان وتكون اللغة دي هي اللغة السائدة
لازم يكون في فرق بين كلامك مع صاحبك وكلامك مع اختك تو زوجتك او بتك او امك
والا الحكاية بتجوط
|
Post: #11
Title: Re: انوثة البوردابيات فى خطر
Author: انعام حيمورة
Date: 08-13-2009, 12:33 PM
Parent: #10
Quote: * هيييييييييييييييييييييع
*يااااااع
*اركز
* كعع
*قوم لف
* هوى يا ياللخو
*حررررررم
* املا يمينك وامش
*يلا اتخارج
*محل الرهيفة تنقد |
ياخ انا كلهن قاعدة اقولن وكمان بحلف ( طلاق ) هههههههههه
|
Post: #12
Title: Re: انوثة البوردابيات فى خطر
Author: فيصل نوبي
Date: 08-13-2009, 12:38 PM
Parent: #11
الخطر الاكبر في البصل ..
خاصة البصل الاخدر ..
|
Post: #13
Title: Re: انوثة البوردابيات فى خطر
Author: فايزودالقاضي
Date: 08-13-2009, 12:41 PM
Parent: #12
Quote: الخطر الاكبر في البصل ..
خاصة البصل الاخدر .. |
ههههههههههههههه
الزول ده والله مابعرفو لكن شكلوا زول بتاع شبك ..
|
Post: #17
Title: Re: انوثة البوردابيات فى خطر
Author: قرشى محمد عبدون
Date: 08-13-2009, 03:08 PM
Parent: #12
ليس هناك نقاء مطلق ...
|
Post: #18
Title: Re: انوثة البوردابيات فى خطر
Author: منال
Date: 08-13-2009, 03:38 PM
Parent: #12
الخطر الاكبر في البصل ..
خاصة البصل الاخدر ..
*********************
ورغم البصل ما بعرف غير الكلام الرومانسى
ومصطلحاتكم دى ولا عمرى سمعت بيها ...
مودتى يانوبى ....
|
Post: #15
Title: Re: انوثة البوردابيات فى خطر
Author: قرشى محمد عبدون
Date: 08-13-2009, 01:15 PM
Parent: #11
| Quote: ياخ انا كلهن قاعدة اقولن وكمان بحلف ( طلاق ) هههههههههه |
والله مع الناس اللصيقين بيك واصدقاءك وفى ونساتك الخاصة عوجة تب مافى بس فى المنبر دا حتلقى ظن السوء من ناس بايرين ..
والبوست دا فتحتوا اشفاق ورفق منى ..
وربنا يصلح الاحوال
شكرا
|
Post: #14
Title: Re: انوثة البوردابيات فى خطر
Author: قرشى محمد عبدون
Date: 08-13-2009, 01:05 PM
Parent: #10
SHIBKA
سلام
اسلوب الناس فى الكلام نحنا ما عندنا بيها دخل وزيما عارفة المنبر يضم اهل واهل الاهل و اصدقاء واصحاب ..وبيرسلوا مرات كلام مشفر فى بوستات كسير التلج ..بس الكلام لامن يكون فى الهواء الطلق الناس بتكون عندها رأى
السؤال كالاتى هل المنبر يصلح ارسال كلام مشفر وبرقيات لبعض ام هذا يعتبر سوء استخدام للمنبر ؟؟
Quote: لازم يكون في فرق بين كلامك مع صاحبك وكلامك مع اختك تو زوجتك او بتك او امك
والا الحكاية بتجوط
|
ايوة ممكن تلفتى انتباه الناس بس كمان
ما بنقدر نتعدى حدودنا ونتدخل فى مسألة السلوك والتربيه ودى مشكلة كبيرة
وشكرا على الاضافة القيمة
|
Post: #19
Title: Re: انوثة البوردابيات فى خطر
Author: حبيب نورة
Date: 08-13-2009, 08:32 PM
Parent: #14
|
Post: #20
Title: Re: انوثة البوردابيات فى خطر
Author: بت قضيم
Date: 08-13-2009, 09:45 PM
Parent: #19
كلام جميل
اتفق مع التالي
Quote: لا ضير اذا جاءت هذه العبارات فى سبيل المداعبة الحميدة وخاصة فى بوستات تكسير الثلج وكما نرى توجد علاقات حميمة جدا تكونت بين الاعضاء /وات فى هذا المنبر وهذا امر طيب ( الكلمات دى مجرد اكسسوارات زى ما قال حيدر) لتلطيف الحديث واجواء الونسة ولكن المشكلة تمكن فى استخدام هذه العبارات ومن كلا الجنسين لنسف البوستات او لتقزيم الناس . مثلا .تجد شخص يطرح قضية حيوية ويتداخل و يتحاور بأدب جم وشخص اخر تجده نسف كل جهده ومحاولاته وادبه بكلمة مثل قوم لف وشيل هبابك وامش. او يحاول اغتيال شخصية المحاور .واحيانا هذه الكلمات تقال للهروب من الحوار او عندما يعجز الشخص عن المقارعة و المنازلة النظيفة..هناك فرق كبير بين المحافظة على الكبرياء ومعرفة الشخص قدر نفسه وامكانياته المعرفية..ورحم الله من عرف قدر نفسه
|
تمام خالص
وعندي ملاحظة، أن الوضع (التقليدي) بالنسبة لحديث ونوعية حديث وطريقة حديث المرآة السودانية أبداً ما فيه كياسة أو رقة
يعني الكلام ده يمكن يظبط مع الجكس
بس عند النسوان السودانيات، لما الواحدة تدلع ولدها وتقول ليه (اممممح اديني قدوم) أو تغضب عليه فتقول (الله يقصك شكيتك على الا بنام لا بياكل الطعام)
تكون جملة مثل (قوم دردق كده) بمثابة صابون الدوف مع فونا
وبالمقابل
هل كلمات مثل
ووووووووووب عليا
وسجمي
وكر علي
فيها أي نغم موسيقي أنثوي؟؟
رقة كده وحنكشة و(دقلشة)
ما عارفة
تحياتي للجميع
|
Post: #21
Title: Re: انوثة البوردابيات فى خطر
Author: Amira Elsheikh
Date: 08-13-2009, 11:19 PM
Parent: #20
قرشى ..... سلااااااااااام
والله انا تعريف الانوثة شنو ماعارفة
اديناتعريف الانوثة اولا وبعدين نشوف ؟؟
بما انى واحدة من البوردابيات...
|
Post: #22
Title: Re: انوثة البوردابيات فى خطر
Author: مريم بنت الحسين
Date: 08-13-2009, 11:41 PM
Parent: #21
I agree with you....
طريقة الكلام دي، بتفقد النساء انوثتهن..
وفي نفس الوقت لما يجي اخ يكتب "وب علي سجمي"... او على شاكلتها،بفقد هيبته ووقاره
خليك fair
|
Post: #23
Title: Re: انوثة البوردابيات فى خطر
Author: Abdlaziz Eisa
Date: 08-14-2009, 05:37 AM
Parent: #22
سلام
أعتقد ان من دخل أو دخلت هذا المنبر ماتيورد للتعامل مع الآخرين
بعض الناس لها علاقات ولها مدلولات خاصة للمفردات التي يستخدموها فيما بينهم..
فمثلا: لم يحدث أن خاطبني شخص أو تتداخل في بوستاتي بتعابير لا أعرفها..
في هذا الربع هنا بوستات لبعض البوردابيات وردت فيها هذه العبارات وقمن بالرد بنفس الطريقة وبدون أي حساسية, مما يوحي بعاديتها على الأقل معهن..
القبول والرفض شئ يرجع لنوع العلاقة بين الأفراد..
تحياتي
|
Post: #27
Title: Re: انوثة البوردابيات فى خطر
Author: قرشى محمد عبدون
Date: 08-15-2009, 01:12 PM
Parent: #23
سلام عبد العزيز
Quote: في هذا الربع هنا بوستات لبعض البوردابيات وردت فيها هذه العبارات وقمن بالرد بنفس الطريقة وبدون أي حساسية, مما يوحي بعاديتها على الأقل معهن..
القبول والرفض شئ يرجع لنوع العلاقة بين الأفراد.. |
ما يؤلم ليس ما تراضى عليه بعض الاعضاء ولكن المؤلم حقا الا ستخدام الثانى لهذه المفردات لتثبيط همم المبد عيين والكتاب العظام فى هذا المنبر..واتذكر فى بوست من البوستات الزول السمح محسن ود البتولا ربنا يطيل فى عمرك وعمره شرح الفكرة دى بعناية وتفصيل..ولكن ؟؟؟
تحياتى
|
Post: #26
Title: Re: انوثة البوردابيات فى خطر
Author: قرشى محمد عبدون
Date: 08-15-2009, 10:56 AM
Parent: #22
Quote: [
I agree with you....
طريقة الكلام دي، بتفقد النساء انوثتهن..
وفي نفس الوقت لما يجي اخ يكتب "وب علي سجمي"... او على شاكلتها،بفقد هيبته ووقاره |
اكيد يا مريم ودا المقصود
شكرا على المرور والاضافة
|
Post: #25
Title: Re: انوثة البوردابيات فى خطر
Author: قرشى محمد عبدون
Date: 08-15-2009, 10:51 AM
Parent: #21
سلام يا اميرة
وجهة نظرى كرجل الانوثة تعنى عندى كل ما يميز المراة عن الرجل بيولوجيا وسايكلوجيا وشكليا و لغويا ...
تحياتى
|
Post: #24
Title: Re: انوثة البوردابيات فى خطر
Author: قرشى محمد عبدون
Date: 08-15-2009, 10:45 AM
Parent: #20
Quote: هل كلمات مثل
ووووووووووب عليا
وسجمي
وكر علي
فيها أي نغم موسيقي أنثوي؟؟
رقة كده وحنكشة و(دقلشة)
ما عارفة |
ايوة يا بت قضيم فيها تطريب عالى كمان مقارنة بنفسية الرجل السودانى الما بيتكلم غير الدراجية السودانية
ولاحظى انوفى السودان فى لغات تانية كتيرة غير العربى فيها مفردات مقابلة و بلحن وموسيقى بيختلف عن ووووب وسجمى
شاكرين على المرور و الاضافة
|
Post: #28
Title: Re: انوثة البوردابيات فى خطر
Author: قرشى محمد عبدون
Date: 08-20-2009, 01:41 AM
Parent: #24
*****
|
Post: #29
Title: Re: انوثة البوردابيات فى خطر
Author: د.نجاة محمود
Date: 08-20-2009, 06:28 AM
Parent: #28
سلامات يا شباب
استخدام كلمات خشنة من جانب النساء في هذا البورد سببها الرجال هنا
حيث يستخدمون عبارات محرجة للنساء
عشان كدا لازم تقرقشهم بلا موية وتديهم من بضاعتهم..
من اكلت الكسرة ما قريب في حاجة عارفاها كويييييييس
الرجل السوداني مافي حاجة بتخوفو الا المرأة طويلة اللسان الفضائحية
الخوف والفزع من النساء اللاتي اخترنا طريق اخر في المجتمع..
لكن ممكن يلقى واحدة محترمة جدا وبت نا س طوالي يتعدى عليها لفظيا..
لكن ديلاك امات لبانة وصوت عالي ما بجي بجنبهن..
لانه بخاف مما سيلحقه من ردود..
الرجل المحترم يتم التعامل معه باحترام والرجل غير المحترم بس ياهو رد البضاعة بسرعة..
وانتهى عهد المرأة توسكا لمسة حنان.. وبقت المرأة الشرى تهبشها شديد يتعلق في اصبعك.
عندي فكرة في عمل ومعسكر تدريب للفتيات
عشان ترفع معنويات المرأة وتحسسها بكينونتها عشان تقدر تدافع عن نفسها
من هجمات الذكور قليلين الادب..
حيث البكاء ما بجيب حاجة غير يحسس صاحب العقلية الذكورية بالعلو والتميز,,
|
Post: #30
Title: Re: انوثة البوردابيات فى خطر
Author: داليا الكباشى
Date: 08-20-2009, 07:44 AM
Parent: #29
عمو قرشي والمتداخلون ...
والله لي كم يوم كده بعاين للبوست دا بيحدر لي وبحدر ليهو ...
واقول في نفسي يا بت يا دلوشه الموضوع دا ما تخشي فيهو تجيبي لورحك الكلام والشبك .. لكن غايتو الله غالب ...
والله انا جيت البورد دا جديده عشان كده حكمي على المور ماااااااا خالص خاصه وان البوردابيات جميعا اكبر مني (على الاقل خبره)
احترمهن جدا واختهن فوق راسي ... ويا عمو قرشي احر حاجه انك ما تحسس الانثى بانوثتها .. الحاجه دي صعبه شديد .. شويه شويه
حاتلقى قدر الكان في من احساس انوثتها راح ادراج الرياح ...
تصوموا وتفطروا عافيه .. وبورداب وبوردابيات الخرطوم معزومين معاي فطور في رمضان ... يديكم الف عافيه
|
Post: #32
Title: Re: انوثة البوردابيات فى خطر
Author: قرشى محمد عبدون
Date: 08-20-2009, 06:24 PM
Parent: #30
الاخت داليا الكباشى .سلام
اولا انا ود صغير جدا واحتمال اكون اصغر منك..:) وبتخيل لى انا من اصغر الاعضاء هنا فى المنبر ..وليه ناديتنى بعمو ما عارف ...؟؟!!!..:) هههه
على كل حال مرحب بيكى فى كل بوستاتى وبدون ..احم ودستور
ومبروك العضوية ونتمنى ان تكونى اضافة للمنبر
| Quote: احر حاجه انك ما تحسس الانثى بانوثتها .. الحاجه دي صعبه شديد |
واحر شى للذكر انو ما يلقى الانوثة فى الانثى..ويلقى الانوثة شائهة
تحياتى
|
Post: #31
Title: Re: انوثة البوردابيات فى خطر
Author: قرشى محمد عبدون
Date: 08-20-2009, 03:46 PM
Parent: #29
د.نجاة بالرغم من ان حديثى على مستوى البورد اتفق معك فيما ذهبت اليه..
وفعلا معظم المداخلات الخشنة بمثل هذة العبارات عبارة اظهار للعين الحمرا للبورداب من قبل البوردابيات وعبارة عن ..اياك ان تتعدى حدودك وكدا..
ولكن الا تتفقى معى ان المداخلات بمثل هذه العبارات فى مداخلات لنسف الحقيقة وونفث الاحباط فى همم الناس ينسف فكرة المنبر والحوار فى حد ذاته..وبخاصة عندما يكون صاحب البوست من الكتاب المعروفين
او تداخل بأدب واحترام او طرح رأيو بدون مجاملة ..كما لاحظت اكثر شى يغيظ البورداب والبودابيات انك تقول ليهو انت ما عارف حاجة ..او راسك فاضى :) وهو يكون مغتر وعاجباها او عجباهونفسو انو عضو فى المنبر يناقش ويحاور وليه اسم ..
تحياتى لك
|
|