Post: #1
Title: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-09-2009, 01:34 PM
Parent: #0
مسدار سواكن
شعر : صديق صالح ضرار
[email protected]
قالوا عليكى منسية
وقالوا أميرة شرقية
بتطلعى زى صباح الفل
من الجزر المدارية
بتشرقى متل شمس البحر
لابسة غلالة وردية
مطرزة بالعقيق والدر
وبى أصداف محارية
خلاصة المسك والعنبر
مضمخة بيه مجلوة
حلاتك وانت ست الحسن
وانت مليكة محظية
* *
عشقتك والعشق كتال
إذا ما ليك الفؤاد قد مال
تهب الذكرى يصحو البال
أغنيك والغناوى طوال
سواكن فخر للأجيال
* *
طريتك فى الهوى والصيف
وقدلة عذاراك بين المشيل والقيف
طريت فى الشاطة كل ولوف
ملازم خدره حشمة وخوف
ذكرت اندارا حاضرة وريف
وسالت منى عبرة خفيف
حبست دموعى شان ما تقيف
معاها أقيف حسب أمرك
أطوق بالنجوم نحرك
أخُتَّ وسام على صدرك
أملِّى عيونى من سحرك
وابدأ فيكى بالتوصيف
وإنتى : ويا علو مجدك
مقدمة فى المدن وحدك
وشامخة قباب خرافية
* *
سواكن والهوى قتال
سواكن والليالى طوال
تهب الذكرى يصحو البال
سواكن مفخرة أجيال
* *
غناوى البحر تمتدَّ ،
ويمتدَّ صداها فى الساحل
على مدَّ المدى الماهل
على شط الجزيرة تنام
مع الأحلام
على سجف الضريح أعلام
موشية ، من حرير الشام
مزارالختم الحدانا إمام
على دقنة الأمير القام
يقبل جبهتك والهام
على ماضيكى ألف سلام
على البيفضل فيكى والراحل
على الأطلال
على الشوق البرانى هيام
على قطر الندى النازل
على الشرفات يحط حمام
وفيه الساجع الهادل
على دقنة الأمير القام
يقبل . . ما بين عينيك والهام
إليك وإليه ألف سلام
* *
محال الزمن يُنسيك
مغانى اللهو والتطريب
قصورك تحكى عن ماضيك
وعن سر الجمال الفيك
قصور مأهولة بالأسرار
تصور روعة المعمار
عليها من الحداثة سوار
وشيىء من مسحة صوفية
* *
قريتك فى الزمن مشوار
تحلق حولك الأقمار
صبية فتية فى شبابك
تصدى الغزو عن بابك
ولا هزاك قط شنار
ولا سهم الزمن صابك
وكنت الكوكب السيار
على المدن الحضارية
* *
بتطلعى يا سواكن نور
تفجى الغيهب المستور
وده المسطور فى علم الغيب
حنانك فينا ينزل سيب
يفيض من بحرك المسجور
ويشرق وجهك الشهباء
يشع من فوق علاه ضياء
يعود سرب الظباء الحور
تجاور نبعك المسحور
وتسبح فى عيون الماء
ودا الخالينى فيك بَسْتَنْ
مرابعك فى حماها انْجَمْ
لقاى يا الحلوة بيك لو تم
أبادلك بالسلام ألفاً
وأبحر بيكى عبر اليم
على صهوة شراعية
* *
سواكن ليس باقى دمن
سواكن خالدة جوَّ الدم
سواكن فينا روح وقيم
قبيلة من التراث والفن
وقمة نهضة شرقية
* *
تدلت من مراقى الشعر
وحلت فوق سقوف الدور
نبوءة من الزمان الفات
تبدت فى يقين وثبات
بأنك رغم هذا الجور
بتنهضى من سكون وبيات
ومتلك أصلو ما بنضار
و لا بتثنيه بعض أمور
وحولك يا سواكن سور
تحدى القاصديكى دهور
منيعة وفيكى كل صفات
حَرَانْ مُهر السباق الحر
فشدى خطاكى فى المضمار
بتلقى الدانى فيك محتار
وتلقى القاصى بيك مبهور
* *
|
Post: #2
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: نصار
Date: 08-09-2009, 01:36 PM
Parent: #1
يامراحب
و هدية جميل و مقبولة
|
Post: #3
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-10-2009, 08:08 AM
Parent: #2
يا أهلا نصار وشاكر ترحيبك
ومقدره
أخوك صديق
|
Post: #4
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: bushra suleiman
Date: 08-10-2009, 08:54 AM
Parent: #3
سلامات ياصديق يا فنان ياجميل الدواخل
مشتاقييييييين كتير ياخ
اتحفنا دايما بى ابداعاتك وكتاباتك المبدعة ،
وخليك هنا على طووول
|
Post: #6
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: كمال ادريس
Date: 08-10-2009, 09:21 AM
Parent: #4
ياسلالالالام ... احساس جميل بأيقونة الزمن الزمن الجميل.
مرحب بعودتك بهيا ... صبت دمعت قسرا عندما وقفت امام جزيرة مدينة مصوع في اريتريا حيث كان وجه الشبه باديا بينها وسواكن... الفارق ان مصوع لاتزال مدينة حية تستند على رائحة الماضي... فيما جزيرة سواكن تهاوت عمائرها دون ان تجد من يسندها.
بوست جميل
|
Post: #9
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-12-2009, 11:32 AM
Parent: #6
ياسلالالالام ... احساس جميل بأيقونة الزمن الزمن الجميل.
مرحب بعودتك بهيا ... صبت دمعت قسرا عندما وقفت امام جزيرة مدينة مصوع في اريتريا حيث كان وجه الشبه باديا بينها وسواكن... الفارق ان مصوع لاتزال مدينة حية تستند على رائحة الماضي... فيما جزيرة سواكن تهاوت عمائرها دون ان تجد من يسندها.
بوست جميل
عزيزنا الأستاذ كمال إدريس
كيف حالك وكويس الذكرناك سواكن - معناها يعنى قصيدتنا شوية كويسة
ودا من حسن جمال تصورك
تشكر إدريس
|
Post: #7
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-11-2009, 07:10 AM
Parent: #4
أخوى بشرى
تحياتى لك - بعدين إنت فين هنا واللا هناك
سلام شديد
سليمان ضرار الآن أقام فى لندن - يمكن تتقابله - إسأله عنه وإنت تلقاه
وشكرا على ترحيبك يا بشرى
سلام تانى
صديق ضرار
|
Post: #8
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-12-2009, 11:29 AM
Parent: #4
حبيبنا بشرى
وينك يا رجل
وكيف عامل
واالله لى مدة طويلة ما دخلت البوست وبرضه ما قادر ألقى الدفعة القديمة
وغايته أهو مستفيدين من كتابات الشباب الجيدين فى البورد
سلامى وإن شاء الله أنت أيضا تنشط فى الكتابة لأنه شايفك زى طولت
صديق ضرار
|
Post: #5
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: محمد عبد الماجد الصايم
Date: 08-10-2009, 09:10 AM
Parent: #3
حبابكـ يا عمكـ
|
Post: #10
Title: Re: تحياتى لكم جميعا بعد غيبة - وتقبلوا قصيدة ( مسدار سواكن ) هدية لكم
Author: صديق_ضرار
Date: 08-12-2009, 11:36 AM
Parent: #5
10-08-2009, 09:10 ص
محمد عبد الماجد الصايم
.
حبابكـ يا عمكـ
إزيك يا رجل يا عسل حمودى
أول مرة أعرف إنه أنا عم نفسى
وقدر ما حاولت أعرف مين أخوى الجابنى ما قدرت
يامحمد تخت لينا غلوتية بدل ما ترحب عادى
سلامات محمد وشكرا على ترحيبك
أخوك صديق ضرار يا خالك
|
|