ايام قديمة ... كان ليها قيمة .. يا حليل الزمن

بتذكر فى تلك الأيام القديمة كان فى حلاوة كرملة وبسكويت كرم وحلاوة نعناع وحلاوة مصاص كانت بنكهة الفراولة وبسكويت كوكو فى واحد محشى كاكاو والتانى محشى بكريمة بيضاو حلاوة بلى وكان فى لبان شكله زى الريال
سيد الدكان كان عنده صندوقين من الخشب واحد بيخت فيهو صفيحة الزيت والجبنة والطحنية والتانى بيكون فيه العيش جزء للعيش البلدى المدور والجزء التانى للعيش الطوستة ده بالإضافة الى قدرة الفول قدام الدكان ، كان فى عجلة العيش عجلة فيها صندوق حديدى من الأمام بيشيل فيها طاول الرغيف

بتاع الداندرمة عنده عجلة ام تلاتة عجلات فيها صندوق به ثلاجة صغيرة وطبعا شايل ليهو صفارة طويلة عشان يلم الزباين بصراحة كان عنده ايس كريم لذيذ جدا بيختو ليك فى قالب البسكويت وعنده معلقة زى المسطرين بيشيل بيها الآيس كريم

قدام المدرسة ستات الفطور وحجات التسالى طبعا ست الفطور كان عنده سندوتشات خطيرة بالإضافة الى الآيسكريم ابو كيس فى نوع ايس كريم فى كيس صغير والتانى فى كيس طويل ده غير دقة القنقوليز والعرديب بالسكر وطبعا الطعمية وساندوتش سلطة الأسود وسلطة الطماطم بالدكوة

اما حجات التسالى عندهم الفول المسلوق وفول ( المررو ) وحلاوة عكاز وحلاوة شعيرية وقراصة النبق والدوم طبعا بتاع حلاوة قطن واقف بالجنبة برضه شايل كمية منها معلقة فى عصاية طويلة وهناك عمك بتاع الترمس والكبكبى خاتى الجرادل بتاعته ومغطيها بالقماش

ونواصل ......

وكان بتاع الترمس يجوب الشوارع هنا وهناك بصافرته الشهيره
تووووت تووووت ثم يردفها ب .. تمرس تمرس .. كب كب .. كب كب






والسذج منا يظنوه رجل امن متنكر

كانت لنا ايام.


حنواصل حين ميسرة

فى الحلة يجى سيد القزاز يصيح ( المعاه قزاز .. المعاه صفايح ) طبعا الزمن داك فى بيوت فيها نوع من القزاز المميز ثم يأتى بتاع البصل ويصيح ( بصل بصل بصل ) مرة واحد قريبى سمع بتاع البصل يصيح قام قال ليه ( ولو ما وصلت تعمل شنو ) عمك طبعا ما فهم النكتة
بعد شوية تسمع الحجة بتاعت المقاشيش برضه تجى حايمة فى الحلة ( مقشاشة مقشاشة مقشاشة )
طبعا فى بتاع صليح العناقريب والحلى بتاع صليح السراير برضه بيجوا يؤدى دروهم فى الشارع الإقتصادى بتاع الحلة

كنا بنشوف بتاع انابيب الغاز يجى سايق الموتر الفسيبا ابو صندوق مودى طلبية الغاز لبيت فى الحلة وطبعا لازم نتشعلق بورا ولا نلز الموتر اثناء المشى ولو فى كارو جا ماشى بالشارع نتشعلق فيه وينزل سيد الكارو يجرى ورانا بالصوت

طبعا اللعب كان ( بالترتار ) لستك العربية نلف الحلة دى كلها وهناك من يقود عجل الحديد بتاع العجلة العادية بعصاية خاصة طبعا فى العاب تانية زى لعبة البلى ولعبة أم الحفر بالجلة بتاعت الحديد ولعبة سكج بكج وكنا بنعمل بملعب كرة قدم بحجارة بطارية ايفريدى فريق احمر وفريق ازرق والكرة تكون بتاعت بنق بونق
اما كرة الشراب كنا بنصنعها بعدة طرق طبعا بنشبل شراب قديم من ابو اى واحد فينا فى كرة بتتحشى بالدلاقين وفى كرة بتتحشى بجزء من الدلاقين وجزء من القطن وفى واحدة بتتحشى من جزء من الدلاقين والباقى من الورق
طبعا فى لعبة كمبلت المعروفة

ونواصل

باصات الموصلات كان لكل منطقة لون بص مميز طبعا البصات كانت البدفورد المصنع فى السودان وبصات مديرية الخرطوم الفيات
بص امتداد الدرجة التالتة وعشش فلاتة كان لون ازرق بابيض اما بص الديم او الدويم الشرقية كان لون ازرق باصفر بص الحلة الجديدة والقوز كان لونه احمر باخضر وبص الجريف لون ازرق باحمر بص برى لونه ازرق بابيض اما بص الحكومة الفيان كان لون ازرق بابيض وفيه خطوط بيضاء بالجنب طبعا بعد كده ظهرت بصات اورجيلة المارسيدس الصفراء الشهيرة وفى باب البص الأمامى مكتوب كلمة نزول وفى الباب الخلفى كلمة صعود طبعا كان فى نظام المفتش البيجى يفتش التذاكر بعد القطع وقدام جنب السواق مكتوب ممنوع التحدث مع السائق اجمل حاجة لمن تركب ابورجيلة تلقى الراديو شغال تسمع بمزاج رضه من البصات بص السجانة بالنص وبص اركويت وبص الصحافة شرق طبعا الحافلات لسة ما كانت موجودة