Post: #1
Title: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: عمر الفاروق
Date: 07-26-2009, 07:53 AM
امبارح كانت مباراة المريخ والأمل عطبرة ..
ما حضرت الشوط الأول ..تابعت المباراة من بداية الشوط الثاني وحتى النهاية ..
بحسابات الشوط التاني الكورة اكانت 2- صفر للأمل ..ي الشوط التاني ده سمعت سم ريتشارد امكن في الدقيقة 25 واتخلعت والله قلت ريتشارد لاعب؟؟
لاعبو الأمل وصلو مرمى المريخ اكتر من مرة في الشوط ده وسجلوا مرتين ولحدي اخر دقيقة ضيعو هدف مضمون ..
في اثناء سير المباراة وقبل نهايتها بي ربع ساعة سمعت المعلق بيقول تم اختيار ريتشاردنجماص للمباراة !!!
للحقيقة ما استغربت فريتشارد مدافع جسور ما فيها كلام بيلعب بي عقله ..ما ترددت للحظة وانا اشاهد مستوى الأمل فقلت اكيد اكيد ريتشارد كان نجم الشوط الأول بلا منازع لأنه بصراحة في الشوط التاني ما لمس غير كورتين وشق هجوم الامل طريقه لاكرم عبر بوابة ريتشارد ..
لحدي هنا والامور تمام وانا مقتنع بنجومية ريتشارد..
بدأ تحليل المباراة واوول كلمة قالا مازدا إنو الأمل العطبراوي اختلف تمااما عن الشوط الأول ..الأمل في الشوط الأول لم يتعدى وسط ميدانه وما شات ولا كورة وما عمل ولااا هجمة وكانت كل كراته منتهية في النصف الاول من ملعبه بواسطة مهاجمين المريخ او لاعبي الوسط ..
استقبلت شباكه 3 اهداف قابلة للزيادة وكان الدافي نجم الشوط !!
طيب يا جماعة فريق الشوط الأول ما وصل نص المريخ ..فريق في الشوط الأول ما شات ولا كورة ..فريق استقبلت شباكه تلاتة اهداف ..طيب كيف يكون ريتشارد نجم المباراة ؟؟؟
لو قالوا كيلاتشي كان بلعناها لانه جاب قونين ..
لو قالوا وراغو كان تكون مقبولة الراجل جاب قونو التاني في الممتاز وبينافس على هداف الدوري بهدفين ..
لو قالوا الدافي حلوة فالراجل صنع الاهداف..
لكن ريتشارد ؟؟؟
ليي يعني ريتشارد ؟؟
وصلنا للدرجة دي من التلاعب بعقول الجماهير ؟
وصلنا للدرجة دي من الخصومة لاقناع الهلالاب انكم فقدتو ريتشارد وكسبنا ريتشارد ؟؟
ريتشارد ما محتاج للمجاملة وانا عن نفسي اتمنى ان يكرم الهلال ريتشارد تكريما يليق بما قدم ..
بس اللجنة الاختارت نجم المباراة دي حددت على ياتو اساس؟؟
كدي تعالوا وروني يا مريخاب المعادلة دي وزنتها كيف؟؟
|
Post: #2
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: Omar Bob
Date: 07-26-2009, 08:23 AM
Parent: #1
سلامات يا عمر:
ريتشارد كان نجم الشوط الاول حقيقة لانو قرايتو لهجمات الامل كانت صحيحه وتمركز في المكان السليم وقطع كل الكرات التي كان يمكن ان تشكل خطوره علي المريخ. الكلام ده براهو ما بديهو نجوميه الشوط الاول لانو هجمات الامل لم تكن بتلك الخطوره, الاداهو نجوميه الشوط الاول انو هو الكان بيبدا هجمات المريخ من الخلف بتمريراته المتقنه للاعبي الوسط امامه او تمريراته الطويله لمهاجمي المريخ خلف مدافعي الامل. في الشوط الاول ريتشارد مرر اربعه باصات تقريبا من هذا النوع كلها كانت بالمسطره وكلها شكلت خطوره بالغه علي دفاع الامل.
الشوط التاني لم اشاهده كله ولكن هدف الامل التاني جاء نتيجه خطأ واضح لتمركز ريتشاد اسهم في الهدف ايضا بالاضافه لسوء التمركز عيب ريشارد الاساسي حتي وهو في قمه عطاءه الا وهو بطْء الحركه
|
Post: #3
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: Omar Bob
Date: 07-26-2009, 08:31 AM
Parent: #2
كلامك ده كلو كوم يا عمر والطرف اليمين بتاع الامل عطبره (النيجيري القصيير) كوم تاني
ياخي الزول ده فلته خاصة فيما يتعلق بطلعاته الهجوميه. الزول ده عمل سافوته لموسي الزومه في الشوط الاول
مشكلتو انو تغطيتو الدفاعيه ( او من ينوب عنه من لاعبي الارتكاز في حالة تقدمو للهجوم) ضعيفه شويه لانو الهدف الاول والتالت للمريخ جاء نتيجه غياب التغطيه من ناحيتو
غايتو الهلال مفروض يسجل الزول ده اليوم قبل بكره
|
Post: #8
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: Maawya Hussein
Date: 07-26-2009, 10:18 AM
Parent: #2
| Quote: ريتشارد كان نجم الشوط الاول حقيقة |
بخالفك الراي يا بوب
نجم الشوط الاول والمباراه كلها عبد الكريم الدافي المحترف المغربي لاعب سريع ومزعج وصنع الـ3 اهداف للمريخ وبعد خروجه في الشوط التاني المريخ انتكس ..المريخاب بدوا يدخلوا اساليب غريبه حتي في التحكيم الفني للمباراة دخلوا نظام المجامله والكيد للهلال ..ريتشارد تسبب في الهدفين وجلا ليهو كم كوره كانت كفيله بتعادل وفوز الامل في الشوط التاني ..المريخ اثبت انو فريق علاقات شخصيه وواسطات ..والكلام دا حا يتكشف من خلال البطوله الافريقيه ..الحاليه ..
|
Post: #9
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: Omar Bob
Date: 07-26-2009, 11:11 AM
Parent: #8
| Quote: نجم الشوط الاول والمباراه كلها عبد الكريم الدافي المحترف المغربي لاعب سريع ومزعج |
سلام يا معاويه
ما بختلف معاك ان الدافي قدم برضو مباره كبيره في الشوط الاول وصنع هدف واحد صناعه مباشره وهو هدف وارغو وهدف تاني صناعه غير مباشره وهو الهدف الاول
الهدف التاني لم يكن له فيه اي دور اكثر من زملاءه والصناعه جاءت من راجي وبله بمساعده حارس الامل الضعيف جدا في الكور المعكوسه.
ولو ذهبت له نجوميه االشوط الاول ما كان حيكون لي اعتراض لكن برضو ريشارد قدم مباره كبيره في الشوط التاني وكان له دور واضح في بناء هجمات المريخ من الخلف
كلامي ده كلو عن الشوط الاول. الشوط التاني شاهدته متقطعا ومن ضمن ما شاهدت هدف الامل التاني وهو خطأ ريتشارد بما لايدع مجال للشك - يشاركه بصوره اقل سفاري
نجم المباره في رايي هو الطرف اليمين للامل عطبره
|
Post: #4
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: حمزاوي
Date: 07-26-2009, 08:36 AM
Parent: #1
الاخ عمر الفاروق
مسكاقمي
أنا استغرب معك في اختيار ريتشارد كنجم للمباراة
أنا شاهدت الشوطين فكان ريتشارد الثغرة الواضحة في دفاع المريخ
والهدفين الذين ولجا مرمى اكرم الهادي من عدم التغطية السليمة لريتشارد
وبالذات الهدف الثاني الذي احرزه البدوي
وأنا بستغرب كيف مدرب يزج بلاعب جديد اساسي من اول مباراة
وكان واضح عدم انسجامه مع زملاءه
إلى أين يقود هذا المدرب رادان المريخ
هذا المدرب يفتقد توظيف نجومية لاعبيه
| Quote: أم خستكة مازدا وميرفت؟ |
يا عمر ابعد من ميرفت
وخليك في مازدا
وبث
|
Post: #5
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: عمر الفاروق
Date: 07-26-2009, 09:17 AM
Parent: #4
عمر يا بوب:
كيفنك يا جميل..
تعرف الكلام القلتو ده ما اظن كافي لي تتويج زول بي نجومية مباراة زمنها 90 دقيقة تحسب ليهو اربعة طلعات وقطعتين لي كورة ..
نجومية المباراة لا تحسب لشوط واحد وخصوووصا الأول ..تعرف لو الكلام ده كان في التاني كان قلنا ممكن بافتراض اخر انطباع في الكورة هو البيكون سايد ..
اسة عليك الله لو كان دي كورة افريقية او هلال مريخ مش اكييد كان اختارو كيلاتشي ؟؟ والسبب الهدفين..
بالمناسبة حقو والله يضمونا لي فرقة فنيي تسجيلات الهلال ..الزول القصيير ده زول مباااااالغة طرف يمين بمعنى الكلمة لو جا الهلال مع شيلة مساوي وعمر بخيت حا نضمن الجهة اليمين تكون بي خير..
الهلال استكان للجهة الشمال ومطالبها ونسى الجهة اليمين الل ياصبحت شاااغرة ..
الزول ده امبارح اي كورة مع موسى الزومة مشى منو ..
الغريبة الناس تجوط في رادان وغياراتو مع انو كان واعي جدا باخراج موسى الزومة وارجاع مصعب ونزول لاسانا لانو موسى الزومة كان كالعادة ثغرة ..
بالمناسبة قائد الامل الاسمو الفكي ده برضو ما ساهل..
|
Post: #6
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: عمر الفاروق
Date: 07-26-2009, 09:21 AM
Parent: #5
عمنا حمزاوي:
ميرفت متعصبة للمريخ للدرجة اللي خلتها يوم هلال مريخ بتررررررجف ونفسها مخموووم قبل المباراة وما قادرة تتمالك اعصابها ..
ميرفت عيبها الوحيد انها بتعملا ظاااهرة لو الهلال غالب وشها بيتقل..
لو المريخ غالب بتتكلم بي فرح واااضح ..
لسة ملخبطة الكيمان ..
حافظة المريخ حفظ وممكن تدربو عااادي لكن ما بتعرف تقرا الهلال صاح ..
|
Post: #7
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: كمال مبارك
Date: 07-26-2009, 09:41 AM
Parent: #6
Quote: حافظة المريخ حفظ وممكن تدربو عااادي لكن ما بتعرف تقرا الهلال صاح .. [/
QUOTE]
يا ود الفاروق ،، ميرفت خريجه تربيه رياضيه ،، وهى بالفعل أحسن
من ابراهومه مليون مرة ،، بس عيبها زى ما قلت ما قادرة تتسيطر
على مريخيتها
|
Post: #10
Title: Re: دي كيف يا مريخاب نجومية ريتشارد وتواضع الأمل أم خستكة مازدا وميرفت؟
Author: عماد محمود علي
Date: 07-26-2009, 12:44 PM
Parent: #6
انتو المريخ ده كان لاعب مع الهلال ولا شنو ؟ أنت هسه الغايظك شنو ياخ .. يدوها ريتشارد يدوها كتشنر يدوها ميرفت انت الحارق رزك شنو ؟ غايتو يا الفاروق يوم المريخ ده بوديك لي ود الصائم بي هنااااك !!!! بقوة القانون سجلنا ريتشارد أها النشوف شداد ح يشد شنو ؟
|
|
|