Post: #1
Title: كارت سادومبا وصل - يوجد كوبي من الأصل
Author: عمر الفاروق عبد الله الشيخ
Date: 07-15-2009, 06:26 AM
Parent: #0
هذه الايام يتردد خبر كارت سادومبا كل يوم وصل ما وصل وصل ما وصل علي قول اخونا محمد عبد الماجد
واحد هلالابي اخونا كل يوم يمشي كشك الجرايد يطالع العناوين ويفتش لكارت سادومبا وصل ولا ماوصل
يفتح منتدي الهلال يلاقي صاحبنا Zemma فاتح بوست بعنوان "بوست كارت سادومبا" وسيد البلد ومواضيع كارت سادومبا جا ولا ما جا وماقال بجي مالو ما جا
يفتح الرياضية ف م 104 يلاقي عوض الجيد عامل مداخلة مع الارباب والسؤال عن كارت سادومبا حيصل متين
يمشي البيت يدق الباب يفتح ليه اخوه الصغير ويسأله كارت ثادومبا وصل؟
تقوليه امه ياولدي واحد صاحبك جا هنا بيسأل منك وقال ليك كارت سادومبا لو وصل اتصل فيه وطمنه
يجيب الموبايل ويخته في الشاحن يشوف تنبيه علي الموبايل
الموبايل و كارت سادومبا جاري الشحن يطلع من البيت في زيارة لبيت خطيبته يلاقيه المصري جارهم بتاع مياه النيل يسلم عليه ويسأله:
الواد سادومبا بتاع جنوب إفريكيا اللي قاي الهلال كارته قي ولا لسه؟
ولسه ما قطع الشارع يلاقي جوزيف زميله لما كان في جامعة جوبا وجوزيف دي عربي جوبا ما بعرفه سلم عليه وسأله
Please tell me what happend about Sadomba card?
يصل لبيت خطيبته اها بعد الضيافة والذي منه وإبتسامات هنا وإبتسامات هناك ونظرة مني والتانية منو تسأله خطيبته:كارت سادومبا وصل؟
يركب التاكسي طبعاً ناس التاكسي الليام دي مبسوطين لفوز زملائهم تكاسة رواندا اها بتاع التاكسي يفتح الرياضية ف م 104 علي كورةالهلال والمقاولون العرب والرشيد بدوي بصوته الجهور سادومبا سادومبا وهدف هلالي تاني .. الرشيد ياخد نفس ويتسائل الزول ده في الصناعي كده الطبيعي كيف؟ ويسأل متي يصل كارت سادومبا
يصل البيت تجيوه اخته بالشاي شايلة معاها كارت عازومة تديه ليه وتقوليه ده كارت عرس أميمة وصلاح جابو ود خالتها بسلم عليك وبقول ليك كارت سادومبا وصل ولا لسة؟
يشيل هدومه يوديها المكوجي المريخابي المتعصب يقوم يسأله ليك قالوا كارت سادومبا بتاعكم ماوصل يعني كورة المريخ ما لاعب
يمشي لدكان الحلاقة المقص الذهبي ولما جا دوره ويادوب قعد في الكرسي الحلاق بيسأله أها عاوزها كيف ... ياخد ليه جقمة موية من القلة أم رقبه ويندكل السفة ويشنقها ويقبل علي صاحبنا يسأله: كارت سادومبا وصل؟
اها من الحلاق وعلي بتاع الفول والخلق ملمومة وخصوصا بعد مطرة امبارح يا آدم بالله صلحي لي واحد فول واتوصي وما تنسي الطعمية والبصل والشمار
أدم لصاحبنا أها بمناسبة الشمار ده كارت سادومبا وصل ولا لسه؟
وقف بتاع الركشة وقال ليه لو سمحت ياخي وديني العرضة ونزلني جمب نادي الهلال
بتاع الركشة كويس يا حبيب عندك سفة
صاحبنا: ما بسف
ما مشكلة يافردة لكن حكاية عجيبة صاحبنا يسأل بتاع الركشة
في شنو؟
بتاع الركشة: كارت سادومبا قالوا ما وصل لي هسة
ينزل من الركشة وعلي بتاع كروت الموبايلات عدل
بياع كروت الشحن يساله: سوداني ولا زين ولا أريبا
صاحبنا: سادومبا
|
Post: #2
Title: Re: كارت سادومبا وصل - يوجد كوبي من الأصل
Author: حمزاوي
Date: 07-15-2009, 06:39 AM
Parent: #1
سادومبا الزول مالو ماجاء
كرت الزول مالو ماجاء
الأخضر رش مالو ماجاء
فتيل الرش مالو ماجاء
كابوندي وضع غلط مالو ماجاء
مسجل رنق مالو ماجاء
فضوا الخانة مالو ماجاء
بعقد وهم مالو ماجاء
قالوا فيما يروى الراوي
أن النيجيريين لم يطلبوا
الواد الفلته الاسمو
كواريزما دي ماسورة
أححححي أنا
|
Post: #3
Title: Re: كارت سادومبا وصل - يوجد كوبي من الأصل
Author: عمر الفاروق عبد الله الشيخ
Date: 07-15-2009, 07:01 AM
Parent: #2
اخوي حمزاوي صباح الخير
قلنا نخفف عليكم دقشة التاكسي ان شاء الله خفيفة
بعدين سادومبا لو ما جا حنلعب ضله
|
Post: #4
Title: Re: كارت سادومبا وصل - يوجد كوبي من الأصل
Author: عمر الفاروق عبد الله الشيخ
Date: 07-15-2009, 10:20 AM
Parent: #3
كارت ساولاك آسف سادماستيك أسف سادومبا وصل
وفي طريقه لمكاتب الإتحاد العام للتسجيل في كشوفات الهلال معاراً لمدة ستة اشهر وبعدها مساء اليوم يوقع اقرارإبداء الرغبة في هز الشباك المريخية
ابقوا معنا
|
Post: #5
Title: Re: كارت سادومبا وصل - يوجد كوبي من الأصل
Author: abdalla osman
Date: 07-15-2009, 04:28 PM
Parent: #4
تسلم ...
في انتظار التوقيع ..
|
Post: #6
Title: Re: كارت سادومبا وصل - يوجد كوبي من الأصل
Author: 7abib_alkul
Date: 07-15-2009, 05:36 PM
Parent: #5
ود الفاروق
خشمك فيه العسل
سفارى بعد كدا الإ اركب ليه موتر عشان حصل سادومبا وامبيلى
|
Post: #7
Title: Re: كارت سادومبا وصل - يوجد كوبي من الأصل
Author: مزاحم الضوي
Date: 07-15-2009, 06:08 PM
Parent: #6
فى اتصال تلفونى مع الباشمهنش التجانى ابوسن قبل دقيقة اى الساعة 7,59 مساء اليوم 15/7
افاد بانهم علموا بان الكرت ليس فى ج افريقيا وانما فى موزمبق
وسيصل SMS مساء اليوم ويسجل غدا الخميس
ادينى عقلك
|
Post: #8
Title: Re: كارت سادومبا وصل - يوجد كوبي من الأصل
Author: yasir Abdelgadir
Date: 07-15-2009, 07:07 PM
Parent: #7
حمزاوي:
خلاص طويتو برش سيكافا ...إنشاء الله لميتو في الكشف ربع ما صرفتوهو
إنتو وارقو دا مسجلنو بشهادة عمر مزورة
وعلاء الدين يوسف كنتو عايزين تسجلوهو بي بصمة مزورة
والتزوير إنتو أسيادو وأهلو
|
|