Post: #1
Title: قالو البلد مطرانة --- يا حليلنا
Author: أبوذر بابكر
Date: 07-14-2009, 03:38 PM
Parent: #0
يا عيونى اسكبى دمع الحنين
المطر حبر الله
الحبر البكتب بيهو يوميات هذا الكوكب الجميل/الكريه
الجميل بسماحة الناس والكائنات والمخلوقات الفيهو
والكريه برضه بقبح الناس والكائنات والمخلوقات الفيهو
وأكيد الفريق التانى ده ما بستاهل ولو قيراط منه
ولا اعتراض طبعا على المشيئة
ألف خريف جا ونحن بعاد
ألف فرح صب وهطل ونحن حاضنين الرماد
ريحة حيطان الجالوص بعد ما المطره تقيف
والله لو شماها يعقوب ما أظنها تقل من ريحة ذلك القميص اليوسفى الأنيق
وريحة النيم
ومرقة العصافير البتتنفض من الرذاذ
تشيل وتصنقع لى فوق
السما شايل والعفرت مالى الفجة
مطرة الضهرية الحميمة
والناس تنكرب شاته فى كل فجة
تغطغت الروسين بالجرايد
وشيل الشباشب فى الإيدين
وحس رعد بعيييييييييييييييييييييد
بعمل فواصل زى الموسيقى التصويرية فى لوحات فلم سينمائى سمح
والبرق مرات مرات يشلع، وبعده طوالى صوت رعدة متقطع كأنها بتقول ليك
إبتسم عشان الصورة تطلع أحلى
ألف خريف جا وفات ونحن حاضنين الأسى
مزيدا من الشوق يا إله
مزيدا من النشاف السكن فينا
والخبر الأكيد قالو البطانة اترشت
وسارية تبقبق لا عند النهار ما اتفشت
ونحن منو البفش الغبينة الفينا ؟
يا حليلنا
ويا حليلك يا "السياب" معانا
ما نحن برضه "مدينتنا بلا مطر"
قال شنو
ولكن مرّت الأعوام ، كثراً ما حسبناها ،
بلا مطرٍ .. ولو قطره
ولا زهرٍ .. ولو زهرة
بلا ثمرٍ – كأنّ نخيلنا الجرداءَ أنصابٌ أقمناها
لنذبلَ تحتَها ونموت
لكين أكيد جايينك صادين يا بلد
وموعدنا عِينة سخية
|
Post: #2
Title: Re: قالو البلد مطرانة --- يا حليلنا
Author: DKEEN
Date: 07-14-2009, 03:56 PM
Parent: #1
Quote: وريحة النيم
السما شايل والعفرت مالى الفجة
مطرة الضهرية الحميمة
وحس رعد بعيييييييييييييييييييييد |
يامطر
من وطاة الغربة افتقاد ريحة النيم..
النيم لاينبت في الخليج ..
لاينتمى الانسان الى ارض لانيم ينبت عليها..
النيم والجهنميات دليل حنان الارض..
دمتا ياجميل مطرا وحس ضهرية ورعد حميم..
|
Post: #3
Title: Re: قالو البلد مطرانة --- يا حليلنا
Author: mohmed khalail
Date: 07-14-2009, 04:21 PM
Parent: #2
اباذر الولد المطر
سلام يا صاحبي
وشوق متبل بدعاش مطر الرشاش الرشة
كيفنك يا المبروك
|
Post: #7
Title: Re: قالو البلد مطرانة --- يا حليلنا
Author: أبوذر بابكر
Date: 07-15-2009, 10:34 AM
Parent: #3
كيفك يا محمد خليل
شوق شديد ليك والله
كيف أخبارك وعساك طيب وشديد
وإن شاء الله ايامك كلها خريف وهمبريب
رفقة الناس الطيبين وجنب الحبيب
|
Post: #4
Title: Re: قالو البلد مطرانة --- يا حليلنا
Author: محمد المرتضى حامد
Date: 07-14-2009, 04:26 PM
Parent: #2
والله يا أباذر ياريت لو الواحد يقدر يقرا وهو مغمَِد..
بتبالغ..
مش لأنك جئت بمالم تقله الأوائل ، لكن لمجرد إخراجنا
ولو إلى حين .. من زجاج الحياة السخيف..
البايخ..
والمشبوه..
كلام من القلب يا (أبو) ذر يعيدني إلى أمكنة عبقرية.
( أنا الميت أدناه
"على طلتك ينكسر الرماد
وتنتشر النجوم في عروقي
كسرب حمام
وتزهر أعناق المطر")
قيصر قيصوب.
|
Post: #5
Title: Re: قالو البلد مطرانة --- يا حليلنا
Author: حبيب نورة
Date: 07-14-2009, 04:42 PM
Parent: #4
المطر
حبر الله
ياااااااااااااه
كمين شجون
وكتير غنا
وأنا!!!
ياااااااااااااه!!
|
Post: #10
Title: Re: قالو البلد مطرانة --- يا حليلنا
Author: أبوذر بابكر
Date: 07-15-2009, 03:52 PM
Parent: #5
حبيبها
شيل النوار وفرهدة الخدار
كمين ودار
وكتير بكا
إلا لكين قول لى
البكا للزول شن فرجو ؟
|
Post: #8
Title: Re: قالو البلد مطرانة --- يا حليلنا
Author: أبوذر بابكر
Date: 07-15-2009, 01:44 PM
Parent: #4
مرتضى
يا البيك نور اقليمك
والحسرة ما بتنفع زى ما قال بازرعة
زى ما غنى ابو عفان
نشوى شنو عاد يا محمد
إيدينا سوت وأجاويدنا غلبن تب
ولو كان الفراق رجلا
زمان كنا عملنا فيهو العمايل
الناس عادة بسكنو الأمكنة
لكين مصيبتنا نحن والزينا
إنه الأمكنة هى الساكنة فينا
والدم اتحول حنين
|
Post: #6
Title: Re: قالو البلد مطرانة --- يا حليلنا
Author: أبوذر بابكر
Date: 07-15-2009, 05:41 AM
Parent: #2
دكين
سلام يا خازن جنان الفرح
النيم ده كائن حميم بشكل ما عادى ابدا
وعنده علاقة عجيبة مع المطر
هو طبعا من أوائل البستقبلو المطر قبل ما يصل الواطا
النخيل بكون واقف فى باب السماء التحتانى
يقالد حبات المطرة ويقول ليها مرحب يا أحبة
بعد داك بسلمها للنيم
إنت قايل ريحة النيم البتطلع بعد المطر دى شنو يا دكين ؟
النيم بكون ببخر فى مكان الإحتفال
وبرضه كل مغربية نفس الريحة بتجى
لما تشوف كم نيمة مع بعض والريحة طالعة
أعرف طوالى إنهم بشربو فى قهوة وبتونسو
بكونو بقطعو فينا
نحن العورا ديل
سلمت يا زول يا دعاش
|
Post: #9
Title: Re: قالو البلد مطرانة --- يا حليلنا
Author: abuguta
Date: 07-15-2009, 02:34 PM
Parent: #6
طبعا يا بو امنة
اجمل شىء ما بعد وقوف المطرة
لو كانت ليلية
تصحى وتتفقد الجيران
فى حالة بيتك ما صب..
ولو صبت ضهرية,,,,,بنجهز التيوة
مع انو ما صقال ,,لكنى بعرف اسمرها,,
اخر عهدى بمطرة سودانية
كنا عذابة وشلة , ساكنين فى غرفة واحدة والحوش 800 متر فى شقلة الحاج يوسف,,تسكن قادامنا اسرة,من المحس,ابوهم مغترب
له 5 بنات صغار,,عندهم خالهم بجى ينوم معهم من ود دفيعة,,يوم داك تاخر,, البيت مبنى قشرة,,وجنبة الحوش المقابلانا توازى البرا بيت
المطرة كانت شديدة خالص واظنها مطرة 88 ,,انا كنت ممتحن شهادية سودانية,,وشايل احلام كتيرة فى دواخلى
اها الموية دخلت على تلك المراة وصغارها الزغب,,بين الجدرانين,,و(الطوب الجالوص,),فانكسر المرق واشتت الرصاص
فسمعنا المراة تكورك يابو مروة,,الحقونى ياهل اهل الحلة,,فطرنا كالصقور, بملابسنا الداخلية كان عددنا 10 وانا اصغرهم,,
فاخرجنا المراة وعيالها على الغرفة الكويسة وقدينا البيت من النص,,حتى لا يقع البناء ,,
منظر ما بنساه ابدا,,,تانى يوم اخوها جاء يتفقدها,,قامت طردتوه قالت ليه انا ما محاتجه ليك
انا ساكنين وراى رجال,,,,
اها اسى انا كايس لمنظر زى داك,,
والله يا ابو ذر تذكرت عما لينا اغترب على كبرو,,,قال مشتهى ليه صيوان بكاء والناس جاية شايلة العمدان,,
طبعا هو محاسب ,,قامو نقلوه الخبر,,ما بعرف يطبخ,,قام طلع يلف فى الشوارع عشان يحصل مطعم,,
قابلتو مخازن طويلة ,,واسم صاحب الشركة مكتوب على طول البنيان..رجع لوراء خالص عشان يقراء الاسم
لقى مكتوب ( مخازن الهويمــــــــــــــــــل)
بالله شوف دا قال الهويمل ,,,اسى الهويمل انت ولا انا؟؟؟؟؟؟
تسلم يا ريحة الدعاش
تحياتى لك
|
Post: #11
Title: Re: قالو البلد مطرانة --- يا حليلنا
Author: أبوذر بابكر
Date: 07-16-2009, 08:38 AM
Parent: #9
لوحات كتيرة
وصور سمحة جا يا ابوقوتة بسويها وبلونها المطر
خصوصا فى السوان
عالم كامل بقوم وبنهض قبل واثناء وبعد نزول المطر
خريف سنة 88 كان آخر شى جميل حصل لى
فى نفس اليوم ده حصلت لينا حاجات غريبة
والذكريات صادقة وجميلة
شكرا يا ابوقوتة على حضورك الأخضر
|
Post: #12
Title: Re: قالو البلد مطرانة --- يا حليلنا
Author: منى على الحسن
Date: 07-16-2009, 09:26 AM
Parent: #11
ابو ذر سلام
حليل زمن المطر وكت كان خير
لما الحبوبة تشيل عيش الفتريتا وتشتتو للعصافير الحنان
وتدعي مع رشة المطرة يا رب الولاد يفلحوا والبنوت يرعسن ...بي الدعوة
كم انجبت بلدنا طيب الابناء الفالحين والامهات
وهسي من المطر تنقط الناس تتأفف يا خ المطر كرهنا وحمانا النوم
بس نقط المطر الكهرباء تقطع ومع قطعتا ينقص البال عمر
زهجة وقمة لما المطرة تقيف .....كل شي في السودان بقى ما خير حتى المطر
قول معاي يا اباذر ربنا يرجع الخير والنعمة لي قلوب الناس
ويبقى المطر خيرنا ويغسل قلوبنا ويخضر نفوسنا ...يارب
|
Post: #13
Title: Re: قالو البلد مطرانة --- يا حليلنا
Author: معتصم دفع الله
Date: 07-16-2009, 10:29 AM
Parent: #12
والله يا مطر وما طالبني حليفه ..
قبل كم يوم صاحبك داك الإسمو شتات عرفتو موووش ..
رسل لي ملف فيديو غاية في الروعة مجموعة من الفنانين يقلدون صوت المطر بطريقة فنانة ..
أها قلت أنزل بوست بالكلام دا لكن قاتل الله أكواد بكري حرمتنا من متعة الأغاني والملفات الصوتية ..
قمت كتبت كلام كان موضوع لهذا البوست ..
زمان ونحن صغار دائماً ما كنا نترقب وصول الخريف ونزول المطر ..
كنا نجد متعة حقيقة في ذلك ..
كما يحلو لنا اللعب أثناء وبعد نزوله وأجمل المناظر كنا نراها في ( سوط المطر ) قوس قزح ..
كل الأطفال في سننا وقتها كنا نراهم في الشارع يلعبون ويمرحون والويل لواحد منا حين يقع في ( موية المطرة ) كنا نسيّره لغاية باب منزله قائلين له ( فلّس مشا بيته ملص ) في منظر يدعو للشفقة لصاحبه ..
أيام الخريف كنا نبني بيوت الطين وكنا مهرة في ذلك ونتنافس عليها والحريف من يكون لديه عربية مصنوعة من الحديد يقودها وخصوصاً لو كانت ( قندراني ) شاحنة مع مقطورة دا بيكون يوم متعته ..
زمن ما عاد يتكرر ولا عاد الأطفال يتجمعون للعب ..
للأسف الكلام لم يكتمل ..
والبوست راح في خبر كان ..
لكن كلامك دا خلاني أجيب ما كتبته لعل وعسى أن أتوفق في إنزال الفيديو وما تبقى من كلام ..
ياخي أنا تاني ما داير معاك ..
من هسي محاربك ..
|
Post: #14
Title: Re: قالو البلد مطرانة --- يا حليلنا
Author: فادية اليمني
Date: 07-16-2009, 01:07 PM
Parent: #13
Quote: لكين أكيد جايينك صادين يا بلد
|
والبلد راجياااك يامطر
دعاشك واصلنا
كن بخير يا ود بلدى
|
Post: #17
Title: Re: قالو البلد مطرانة --- يا حليلنا
Author: أبوذر بابكر
Date: 07-18-2009, 05:51 AM
كيف الحال يا فادية
وكيف الأهل والناس هناك
الواحد بقى عنده أمنية واحدة بس فى الدنيا المسيخة دى
إنه يقضى باقى أيامه الفضلت دى فى البلد
يتلخبط مع الطين والتراب والموية والأشجار والناس العزاز
يبقى زول ليهو قيمة زى ما قال العميرى
عليك الله سلمى على أى زول تلاقيهو، لامن الله يسهل ونلاقيهم
وحنقعد نغنى مع فيروز
سنرجع يوما إلى حينا
|
Post: #16
Title: Re: قالو البلد مطرانة --- يا حليلنا
Author: أبوذر بابكر
Date: 07-18-2009, 05:46 AM
Parent: #13
أكواد بكرى يا معتصم
ولا اكواد البتاع الإسمه العرس ؟
إنت شكلك خلاص مرقت من الجنة و"صقتا" وحرها كمان
إسم شتات ده سمعت بيه كتير طبعا
هو لكين ما عايز تقليد صوت المطر
شتات محتاج للمطر عديييييييييييييييل
عايز ليهو "ضهرى" كم ساعة كده عشان ينبل وينعطن
وما ينشف تانى ابدا
بالله بلغ روحك إشتياقى
ولكل الحاجات طرفكم
|
Post: #15
Title: Re: قالو البلد مطرانة --- يا حليلنا
Author: أبوذر بابكر
Date: 07-17-2009, 09:54 AM
Parent: #12
إزيك يا منى
كيف حالك
طولنا ما آنسنا نور حضورك
المطر كله خير
والسحاب الطيب ما ليه ذنب لو حال الناس ملخبط
لو الشوارع محفرة ومافى تصريف والناس ما مهتمين بى حالهم
وشبكات الكهرباء ما سليمة وضعيفة
قطع شك ما ذنب المطر المسكين البجى ناوى ليهم على كل الخير
بإذن خالق المطر كل شى يبقى سمح وحال البل والناس ينصلح
شكرا يا منى على حيتك الغيمة
|
|