وحده جاذبه بالقانون دي تكون كيف ! أ بقانون الغابه ?

غايتو البشير ده الله يكون في عونو ...

في زول يا أخوان/ت سمع بي وحده جاذبه بالقانون ?

كان سمعته بالله عليك كده أشرحها ينوبك ثواب .

بدريه سليمان مستشار رئاسي وقانونيه ضليعه ما في ذلك شك ، بس وحده جاذبه بالقانون دي !!! غريبه .

يعني مثلا يصدر قانون أو يعدل قانون أو تضاف مواد لقانون لتجد ماده قانونيه تنص بأن الوحده جاذبه ، وبما أن القانون يفترض علم الكافه به بعد نشره في الجريده الرسميه يكون كل الأربعين مليون ديل قدعلموا أن الوحده جاذبه ! وعلى نتيجه الإستفتاء ن تحترم القانون وتتقيد به وإلا نالت العقاب المنصوص عليه قانونا.

أنا ما عارف أولاد سليمان ديل اللزاهم على القانون شنو ، لكن برضو أحسن لأنه لو لزاهم على الطب مثلا أكيد أكيد فى ناس واطاطهم أصبحت .

وكان الريس المسكين قافل على كلام مستشارته القانونيه ده يكون فعلا يستاهل ما يجري له من مرمطه بين رؤساء الأرض .

ياخي ده كلام ده ... التقول رئيس عندو غضب والدين .

كده شوف زميلك حسني ده كيف ، رئيس مرطب لا عندو ناس دايرين منو وحده جاذبه ولا دياولو .

تقول لي رئيس


قال وحده جاذبه بالقانون ، أوع يكون بقانون الغابه الذي مارسته الدوله السودانيه سابقا .

أكان بدريه بتحاحي على مستشاريتها بكلام من هذا القبيل فهل من يستشيرها غبي بعيد عنكم ?

إنت ناس ورثت حربهم وحاربتهم حتى بقيت اللأول من حيث عدد سنوات الحرب .

وجيت وقعت معاهم إتفاق أصبح الأن مشروعيه حكمك ، و لم تقدم للوحده سوى كلمات فى صياغه قانونيه يقترحها مستشار بياكل عيش !!! .

والله يا ريس كان دي قفلتك تكون قافل على كرت ميت ، وزول بيقفل على كرت ميت ده زول بليد .

هسي أكيد الطيب مصطفى يكون شامي ليك بدريه سليمان دي شمه ، ده كان ما طالب بإقالتها لمخالفه قواعده الشرعيه ، كيف توري ودختي ده درب الوحده الجاذبه ده كلام ده ، لازم تطلع من القصر ده فورا وتاني ما تشوف عمر ده إلا في التلفزيون .

قال وحده قال


الوحده دي إنتهك عرضها النظام الرسمي من لدن الإستقلال ، ومع أنه ليحزنني ذلك ولكن الجنوب سيذهب ... وسيبني دولته لو سلم من التآمر .

ومع أن ذهابه محزن لى ولغالبيه البسطاء مثلي إلا انني أعلنها صراحه لو كنت جنوبيا لصوت للإنفصال ، فليس هناك أبدا يا يدعونى لغير ذلك ، فليس من العقل أن أصوت للوحده فى ظل نظام يتقدمه أمثال خال الرئيس . ومجتمع يسيطر عليه سياسيون إنتهازيون حتى أنه لا يكاد المرء يستطيع تمييز الخبيث من الطيب

أعلم أنني بذلك قد أكون مخالفا لقانون الوحده الجاذبه بتاع بدريه ، و أعلم أن القانون قد ينص على سريانه على الماضي ولكنى لن أغير رأيي .

أهه الجنوب الذي ذهب أو سيذهب ده خلوهو في حاله وشوفو حالكم ، كده حلحلوا البينكم أنتوا الشماليين .

شماليين ... تاني !!

ياتو شماليين تعني !

قالوا البيفرط مره حيفرط ألف مره وهنا نتسائل هل سيعمل الريس على توحيد الشمال أو ما سيتبقى من السودان بعد ذهاب الجنوب حقا أم سيعتمد على فتاوي مستشاريه المهببه دي و سيريدها قانونيه أيضا حتى يجد نفسه يحكم (حوش بانقا) !?


الله يكون فى عونك يا ريس


مجدى محمد مصطفى