Post: #1
Title: مرقت عادي ...
Author: عروة علي موسى
Date: 07-12-2009, 09:25 AM
مرقتْ ذات التَرَف البادي
من بينات رقراق الشوق الصادي
ومن دقات الوجع الشايفو قُصَادي
مرقتْ بي الليل
مرقتْ عادي
جَن جُنون البحر الشادي
إطَّقش مُوجو وطفح الوادي
إرتعشتْ ومضات البرق الهادي
غَمَّض جُفن القمر الهَجَّد نورو
وصحّى سُهادي
حنَّتْ سواقي الليل بتنادي
بي شوق التَرَف الفجَّ فؤادي
مرقتْ ست الخطو الحادي
مرقتْ عادي
عُيونا بَريق نِجيم الهجعة الضوا بوادي
لي ضيف الليل والساري منادي
خُطواتا ترتب خاطر القلب العادي
سِكَّاتا تشكِّل أبعاد المرسى الفيهو وسادي
ضمِيرا مَدار الحِجل اللّف عقولنا
في وهَج الساق السادي
صِديرها تَساب النيل الطافح غادي
الشايل غيظ دفقات الغيم
والوعد الباكر شادي
لِهيجها حنين وآهة شوق
ورويحها ترد الروح لي نسمة مطر الفجر النادي
مرقتْ عادي
مرقتْ .. وسكنّا الشوق لي خلَجات التَرَف البادي
وأنسلَّ دِريب لهيب الوجعة لي قيف الذكرى الأصبح زادي
مرقتْ عادي
|
Post: #2
Title: Re: مرقت عادي ...
Author: عصام دهب
Date: 07-12-2009, 11:09 AM
Parent: #1
Quote: من بينات رقراق الشوق الصادي
ومن دقات الوجع الشايفو قُصَادي
مرقتْ بي الليل
مرقتْ عادي |
و شكلك انتا ذاتك ( مرقت ) وراها بي ( غادي ) ..
من ديك و عيك .. يا ررراجل ..
دي خوة شنو ياخي ..
ياخي أنسى أي حاجة !!
بس خليك على اتصال ..
|
Post: #3
Title: Re: مرقت عادي ...
Author: عروة علي موسى
Date: 07-13-2009, 07:56 AM
Parent: #2
شقيقي عصام دهب
سلام ومحبة وشوق
تشكر يا غالي على روعة الحضور الجميل
ليك الحق .. ولكن تبقى مشاغل الحياة وعجلتها السريعة دوماً تضعنا في محل لوم للأحباب والأعزاء ..
والعزاء أنكم دوماً ملء القلب والخاطر والبال ..
والشوق مطر لامِن طافح بي غادي ..
وبنجيكم ،،،
|
Post: #4
Title: Re: مرقت عادي ...
Author: عروة علي موسى
Date: 07-13-2009, 07:56 AM
Parent: #2
شقيقي عصام دهب
سلام ومحبة وشوق
تشكر يا غالي على روعة الحضور الجميل
ليك الحق .. ولكن تبقى مشاغل الحياة وعجلتها السريعة دوماً تضعنا في محل لوم للأحباب والأعزاء ..
والعزاء أنكم دوماً ملء القلب والخاطر والبال ..
والشوق مطر لامِن طافح بي غادي ..
وبنجيكم ،،،
|
|