مطرب حقيقى -- عاصم ختام -- نوبى تمام

أول مرة أسمعه وأشوفه

لكن للمرة المليون بازداد قناعة ويقين إنه الوطن مليان ناس سمحين ومبدعين
وفى كل مرة تخرج الأرض أزهارها وثمارها

زى ما قبل كده طلعت لينا محمد البدرى، الطلع من محل بتطلع الشمس
ومحمد الجمرى الجا من مكان بجى النيل الأزرق

وما كان فى زول مديهم "أضان" لكين لأنهم ناس مبدعين جد جد
كل البلد عرفهم بعد داك

عاصم ختام

شفته أمس فى قناة هارمونى

فرقة حلفا

وأعتقد إنها تأسست على أيدى الأخوين "صالح ولولى و وهبة ولولى" رحبانية السودان
أو على الأقل الإتنين ليهم باع طويل ونصيب وافر فى الإبداعات النوبية

صديقنا الزول المليان فن وإبداع وهبة ولولى، بعرفه بحكم علاقة قديمة، مطرب وغناى وعازف عود تمام
كان بغنى لينا أغنيات كرومة وعثمان حسين وأغنياته الخاصة

من نفس الطين الجاب لينا خليل فرح، نفس الموية ونفس السماء ونفس النهر

المهم

شفت الفرقة وكانو حيغنو الملحمة النوبية الأسطورية "أسمر اللونا" وأعتقد إنها تراث أو أغنية نوبية شعبية، وما متأكد هل عندها شاعر محدد ولا ما عندها، ويا ريت الأعزاء النوبيين يطلعونا وينورونا عن الأغنية العجيبة دى

سمعناها كتير طبعا من وردى سيد المبدعين

عمنا وهبة غنى المقطع الأولانى

وبعد داك بدا شاب نحيل وجميل، شكله زى أمراء النوبة زمان

بدا يغنى

والله نادر جدا فى زمنا ده الزول يسمع صوت ساحر زى صوت عاصم ده
أداء متمكن بشكل لا يصدق وسلاسة فى الإنسياب

المدات والجرات وترنيم الصوت

بالجد كده حاجة ما عادية أبدا

اندهشت والله العظيم غاية الدهشة

الزول ده جا من وين ؟
وليه ما بغنى ويبدع ويمتع العالمين بالصوت والأداء ده ؟

ليه ما معروف وما منتشر فى الإعلام

القنوات مليانة ومزحومة بعدد خرافى من الناس البقولو إنهم قاعدين يغنو
لكين هم ما قاعدين يعملو فى أى شى

ربما يكون معروف ومسموع ومشهور عاصم ختام ده، وأنا المقصر الما شفته ولا سمعته

لكين وفى كل الأحوال

الزول ده ما هين تب

ومطرب حقيقى ومبدع فوق العادة

أى زول "أضانه" نضيفة زى ما بقول ناس المزيكا، أكيد لو سمعه حيوافقنى

ويا أعزائنا النوبيين

أدونا ولو لمحة عليكم الله عن الزول الجميل ده

عاصم ختام من الشباب النوبيين المبدعين وهو من ابناء حلفا الجديدة كانت بدايته فى القرية 22 التى تقع بالقرب من مصنع سكر حلفا وقد شهدت له العديد من الحفلات وهو يجيد الغناء بالرطانة والعربى ويجيد العزف على آلة الأورغ وله الحان خاصة لبعض الأغانى النوبية
اما ظهوروه فى هذا الكليب يرجع للمبدع النوبى المخرج الرائع سيف الدين حسن صاحب قناة نبتة النوبية فقد كانت رؤيته لإخراج هذا العمل هو الإنتقال من الغناء القديم الى الحديث وهو ظهور المبدع وهبة فى بداية الأغنية ثم الإنتقال الى الموسيقى من غناء عاصم
تم تصوير هذه المشاهد بمدينة وادى حلفا ومنطقة آثار البجرواية على يد المصور النوبى محمد بوشة
اما بالنسبة للعمل فهو من الاغانى التراثية القديمة

شكرا يا مصطفى على تعريفنا بالزول المبدع ده

أنا كنت متأكد إنه زول بالتمكن والإجادة والصوت والأداء ده لازم يكون معروف على الأقل للنوبيين

لكين عايزينه يتعرف وينتشر وكل الناس يعرفوه

الساحة الفنية، والغنائية بالتحديد مليانه حاليا بى ناس ما عندهم أى صلة والله لا بالغناء ولا بالطرب

عاصم ده وبطريقة غناه وصوته الفريد ده مفروض يكون على رأس قائمة المطربين

ويا ريت كمان ينوع ويشكل ويختار نصوص نوبية وعربية برضه عشان تتواصل سلسلة إبداع الخليل ووردى والبلابل وغيرهم