الأخوة بورداب الخرطوم..مع التحية.

يا اخوانا المنبر ده عضويته حسب ما تردد تجاوزت الالفين و نص و معظم العضوية دي من ناس عايشين
برة السودان في شتى المنافي و المهاجر و هلمجرا..فدحين و باختصار اكان دايرين تقعدوا تباروا
حكاية فلان جا و فلان سافر و هاك يا صور و شامبيون فما حتخلصوا و حتأثروا على اعمالكم و اسركم
و صدقوني حتزهجوا في النهاية و تتلوموا..
غايتو عقلكم في راسكم تعرفوا خلاصكم..و كلامي ده كان ما عجبكم ارموهوا البحر.

سلام سيف النصر ..

المقترحات شنو ؟!!

Quote: باختصار اكان دايرين تقعدوا تباروا حكاية فلان جا و فلان سافر و هاك يا صور و شامبيون فما حتخلصوا و حتأثروا على اعمالكم و اسركم

لسع يامان ما شفت اي حاجة انت
بكرة زوجة فلان ولدت
فلان طهر ولدو
وفلان عندو غنماية
وفلان جاء من القاهرة

دكتور سيف النصر

طبعا النصيحة دي بتشبهك جدا وبتتطابق مع شخصيتك القريناها ليك هنا جدا, انت من الكائنات الغير اجتماعية , هذا علي مستوي ما رايناه من تجربتك المنبرية , فكما علمنا انك من الذين يقطنون مدينة جدة , ولم نري لك يوما تفاعلا مع اسرة بوردابها , لا تحضر اجتماعياتهم ولا تحفي باحتفالياتهم ولا تشغل بالك بمشاركتهم افراحهم واحتراحهم وهذا امر يخصك وحدك لا دخل لاحد فيه , لكن ان تسحب هذا التوحد علي الجميع وتخص بورداب الخرطوم فامر خرج عن نطاقك الشخصي , واخذ شكل التنظير للاخرين في ادارة شأن علائقهم الاجتماعية والانسانية , وهو امر غريب , جدة مثلها مثل الخرطوم تحفل بالزوار ممن يعمرون الاراضي المقدسة , نفرح بزيارتهم ونحتفي بملاقاتهم ويسعدنا الامر , فلو انك جربت يوما ان تعيش تلك اللحظات الانسانية لما خرج منك مثل هذا البوست , بورداب الخرطوم اعرفهم منذ العام 2002 التقيت منهم اجيال اختفي بعضهم او معظمهم وتغيرت العضوية وتبدلت ولكنهم مازالوا يحافظون علي ارث جميل في التواصل الانساني , لو تم الاحتفاء بك مثل الاخرين عند احد زياراتك لعرفت جمال هذا الامر الاجتماعي , ولكنك تفضل للاخرين ان يتصومعوا ويلتزموا اديارهم , لذا اقول لك ان فاقد الشئ لا يعطيه ,
بورداب الخرطوم لم نراهم يتزمرون من تلك اللقاءات او يتبرمون , ولكنهم يعاملونها بفرح عظيم لذا لا تطالبهم بان لا يفرحوا باشيائهم , من تلك اللقاءات والاجتماعيات تتفتح افاق للجميع فمنهم من يتعاون تجاريا مع من يهتم ومنهم من يبني بيته بواسطة احدهم ومنهم من يكمل نصف دينه او نصف دينها عبر تلك اللقاءات ومن تلك العلائق تخرج علائق اجتماعية واسرية تمتد , انت كتبت عن هذا الامر لان موسم اجازات المغتربين والمهاجرين تصادف هذه الايام , لذا كثرت اللقاءت الجميلة والتي يحيونها بكل الحب والفرح ولكنه موسم لا يتجاوز الشهران وتقل الزيارات , لذا حديثك عن تأثيرها علي اشغالهم نوع من الشطط , فبورداب الخطوم كثر وهم يغضبون اذا لم تتم دعوتهم الي اي تلاقي ومن يغضب لذلك لا اظن ان حديثك هذا يصادف منه هوي خاصة وان تلك اللقاءات تكون خارج اوقات دوامهم او اشغالهم الخاصة ومن يجد نفسه مشغولا لا اظنه بملزم بالحضور لذا اتمني ان يدوم المعروف بين العباد

ـــــــــــــــــــــــ
لدينا اليوم بورداب جدة احتفاء بمقدم الاخ الطيب عثمان واسرته في فندق المحمل علي تقاطع الاربعين وفلسطين بعد صلاة العشاء ليتك تحضر فتشهد التلاقي , وبعدها نسمع منك في امر هذا البوست هذا اذا كنت ما تزال بجدة

اخي سيف النصر سلام ولا اقول شكرا للنصيحه لانها في غير وقتها ولا اوانها ,, كما لم يشكوا احد من بورداب الخرطوم لك هذه الاعباء
التي تتحدث عنها ,,
واريد ان اقول لك بان حديث الاخ اساسي اتفق معه في كل شئ بلا تحفظ ,,,فنحن في بورداب الخرطوم نتواصل تواصل اجيال اخوة واخوات
لم نشكوا لاحد ولم نتزمر ولم نكلف انفسنا فوق طاقاتها ,,بل هي قدرة اعطانا الله اليها بان نفرح بالقادمين الينا ونسعد بان نتلم عليهم وان نراهم وان نخفف عليهم بعض من رهق الغربه والبعد عن الاهل ,,,
بل نجد متعة لاتضاهيها متعة بهذا التواصل والاجتماع بكل قادم ,, الا اذا لم يتحدث القادم عن وصوله فلا نعلم الغيب ,,,
وما يقوم به بورداب الخرطوم هو عمل جماعي مشترك يعتمد علي الشير ,, ةولا تكلف نفسا الا وسعها ,, بل نضع الاعذار لبعضنا ,
ويسعدني جدا ويشرفني باننا في بورداب الخرطوم صرنا اسره واحده ’’ واظن كلمة اسره تكفي ,, اوليس كذلك ؟؟؟

Quote: بورداب الخرطوم صرنا اسره واحده

شكرا يا العوض .. والبركة فيك .!!

Quote: بل نجد متعة لاتضاهيها متعة بهذا التواصل والاجتماع بكل قادم ,, الا اذا لم يتحدث القادم عن وصوله فلا نعلم الغيب ,,,

Quote: ويسعدني جدا ويشرفني باننا في بورداب الخرطوم صرنا اسره واحده ’’ واظن كلمة اسره تكفي ,, اوليس كذلك ؟؟؟

والمسألة بتتم كالاتي:

بوردابي جاي يقوم يرسل ليك رسالة مسنجر داخلي والله انا جاي قريب وعايز الاقيكم ادوني تلفونكم .. ودا تلفوني هناك .. (مثلا)

يقوم يجي ... تقوم ما تحتفل بيهو بتبقى (عيب) كبير في حقك ..

وبرضو نحن .. ماشين مكان بنقول يا جماعة نحن جاينكم (هالة حسن) مثال مشت لندن ..

يعني القصة متبدالة يوم علينا ويوم عليكم ..

وكدي النجي عمرة ما ترحب بينا والله نشيل حسك ..

Quote: وما يقوم به بورداب الخرطوم هو عمل جماعي مشترك يعتمد علي الشير ,, ولا تكلف نفسا الا وسعها ,, بل نضع الاعذار لبعضنا ,

قبل كدة في كم بوردابي من الخارج اقترحوا نعمل صندوق عشان ما نتكلف والله زعلنا لانو القروش البسيطة البتجيب الفرح والسعادة للناس انت ما بتندم على مرقتها نهائي ..

ولا شنو يا شيخ العرب ..





________

عليكم الله يا(بعض) ناس المنبر ما تقبلوا علينا وتدونا عين برانا ما ناقصين ..

Quote: طبعا النصيحة دي بتشبهك جدا وبتتطابق مع شخصيتك القريناها ليك هنا جدا, انت من الكائنات الغير اجتماعية , هذا علي مستوي ما رايناه من تجربتك المنبرية , فكما علمنا انك من الذين يقطنون مدينة جدة , ولم نري لك يوما تفاعلا مع اسرة بوردابها , لا تحضر اجتماعياتهم ولا تحفي باحتفالياتهم ولا تشغل بالك بمشاركتهم افراحهم واحتراحهم وهذا امر يخصك وحدك لا دخل لاحد فيه

قرقرقرقر والله يا اساسي لكن لقيتك قلبك باليمين .. ياخ انا قعدت اضحك لمن قسم الاسعافات الاولية بالشركة جابو لي انبوبة اوكسوجين ..
بعدين ياخ انا اجيك لحدت البوادي تسردب مني ؟؟ ما ياهو طلب البيك والعليك دا .. وكباية شاي والمسالة تخلص ..
حسع فرقك شنو بلاي من الفاتح البوست دا ؟؟
بتلموها كدا وبتموتو تخلوها ..

..
.
توقيت بوست غير مناسب
فى خلاف وازمه تدور الان ..
انا ما عارف ليه بتختاروا المووضوعات
حسب تيار المنبر ..

__________

اها الكلام دا بنطبق على بورداب الزقازيق بالمنبر برضو !!؟

اساسي سلام
يا خوي و الله انا ما من الكائنات القلت عليها دي و لا حاجة و ممكن الايام تثبت كده ..
غاية الأمر أنو ناس الخرطوم ديل وضعهم مختلف و معظم الالفين و خمسمائة ديل وجهتهم في الغالب
بتكون نحو الخرطوم و عشان ما يكون في انقسامات و لوم و قصص زي دي انا شايف انو الناس
ما تحملهم فوق طاقتهم , و كلامي ده نابع من محبة و ليس له اي غرض أخر.

ناذر ، العوض ، مزمل ، انعام و صالح تبلدينا
يا جماعة و الله انا متضامن معاكم لا اكتر و لا اقل و ما في داعي للحساسية و التعامل معاي
كأني عدو.البتعملوا و العملتوه قبل كده جميل و انساني بدون شك بس اذا ممكن يكون سبب
مشاكل فلا حرج عليكم .

شكرا ليكم بورداب الخرطوم..
والله لو بقينا نعرفكم كويس كنا اتحسسنا من ترحيباتكم بينا لما نجي الخرطوم..

سلام الاخ سيف النصر..

.
.

الإخوة الأفاضل أساسي والريس العوض المسلمي

تحية وتقدير

أعتقد أن الأخ الكريم سيف النصر كتب هذا البوست بداعي المحبة والشفقة على بورداب الخرطوم من التعب والجهد والمشقة .

سيف النصر إنسان جميل وكذلك أنتم .

خالص المودة والإحترام

.
.

لك التحية أخى الدكتور سيف النصر
والتحية أيضا للاخ الحبوب ( أساسى)

ماكتبه الدكتور ليس لشئ أو لغبينة
فى دواخله .. معاذ الله من ذلك فهو
إنسان جميل وراقى .. ولايقصد شئياوالدليل
كلماته والتى سطرها بعد مقاله ..

أيضا الاخ ( أساسى) أنا أعلم كلماته
كتبها لحرصه الشديد ولمحبته الغاليه لكل
الاخوة دون تمييز وأيضا كتاباته محمده ويشكر
عليها .. فله التحيه .. وللجميع التحية
والتشكرات ..

تاج

سلام شباب ..

الأخ سيف النصر شخصية لطيفة جدا يا أساسي ، قابلته مرة في الخرطوم واستلطفته جدا وسعدت بمقابلته ربما هو مشغول في جدة ولا يجد الوقت الكافي للتواصل مع البورداب ، ولكني متأكد جدا من نيته السليمة عندما فتح هذا البوست وأنا عندما سألته عن المقترحات كنت أريد لهذا البوست أن يتمدد بالمداخلات الهادفة ..

والأخ سيف النصر يشفق علينا من كثرة الضبوف القادمين للخرطوم على مدار العام والشهر والإسبوع وإحتفاءنا المتواصل بهم ..

صنفرة :

خلاص يا سيف النصر اخوي رسل لينا شهريا 2 ألف ريال عبارة عن مساهمة ضيافة وتاني ما تشيل هم تب