تجربة أعتقد أنها مفيدة أرجوا أن تجربوها!

تجربة أعتقد أنها مفيدة أرجوا أن تجربوها!



قبل نحو عامين من الآن خطرت لي فكرة تدريب أطفالي على التوفير ومحاولة جعلهم أفضل مني في ناحية حسن التصرف في القروش وعدم التبذير وتوجيه المال لما هو أفيد وفوق ذلك الاعتماد على النفس!



قمت بعدها بشراء حصالتين ودفعت لكل واحد من أطفالي بواحدة وطلبت منهم توفير ما أمكن من مصاريف المدرسة(علماً بأنهم في البدايات الأولي في سلم التعليم) طلبت توفير أي مبلغ على أن نذهب في نهاية العام الدراسي لشراء أي شي يودون شراؤه بما جمعوا من نقود!

مع ضرورة وضع رؤية واضحة للشي العاوزين يشتروه!

وقد كان في نهاية العام كانوا متلهفين جدا لفتح الحصالات والحقيقة اجتهدوا في التوفير يعني تقريبا نص مصروف المدرسة مع شوية جربعة من بواقي البيت!

مشينا محل العاب كنت مشيت ليه قبل أن أوديهم واتفقت مع صاحب المحل أن يعطيهم الشي الحا يختاروه ويقبل المبلغ منهم مهما كان بسيط وأنا بعيد عن أعينهم حا أتم ليه الباقي



فعلاً فتحوا حصالاتهم وكانت كلها عبارة عن فكه خمسميات واختاروا العاب في السنة الأولى ما متناسبة مع قروشهم وشالوها وتميت أكثر من نص الشي الدفعوه



السنة ألبعدها نفس الشي لكن الوضع كان أفضل كيف؟؟

اوريكم!



بعد العام الأول وقبل العام التاني سألتهم لو قروشكم نقصت وتميت ليكم رايكم يكون شنو!



رفضوا وقالوا عاوزين يدفعوا براهم!



قلت ليهم خلاص اسألوا من الأسعار قبلها عشان يكون عنكم هدف معروف!



بعدها طلبوا يمشوا قبل بداية السنة ألبعدها يحددوا عاوزين شنو!!



ومع نهاية العام كانوا جمعوا تقريبا معظم المبلغ المطلوب والمرة دي تميت ليهم القروش قدامهم لعلمي لرفضهم مبدأ أن يشاركهم أي شخص في الشراء!



نحن الآن في تجربة العام الثالث ولي ملاحظات!




هذه الطريقة تعلم قيمة التوفير وعدم التبذير وهي آفة عند معظمنا!


أيضا تعلمهم كيفية التخطيط السليم و تحديد الأهداف والسعي لتحقيقها!


تعلمهم الحساب الدقيق مما يشمل الجمع والطرح وخلافه!والاهم إعطائهم شعور بالرضا العجيب عند النهاية!


ارجوا أن تجربوها مع من هم في سن مبكرة وستروا لها نتائج مذهلة!


الأطرف انهم قدوني قد اي زول يدي يحكوا ليه القصة ويشهدوني!

حفظهم الله يا سامي ..
فعلاً تجربة جميلة ما بتشبه المريخاب ..
غايتو حاول تعلم باقي المريخاب ..
علي الاقل تريحو عمكم الوالي ده شنو من الملايين المبعزقة يمين و شمال دي

وديتو شمال يمين غلبني الم علاقة الكلام الكتبتو بي جمال الوالي!