إحترامي اليك من صميم قلبي غير ما أشعر اتفاني عليك والدليل حبي تسمح تنظر شوف دموع عيني سايلة فى خدي من اللهيب الشوق..برضو مافي خلاص هكذا يا ظالم جزا الاخلاص
دبتَّ في حبك و الفؤاد مجروح ما فضل مني شئ خلاف الروح هكذا الأشواق تسمو بالعشاق من ثري الأشباح لسما الأرواح حيث تروي هناك للنجوم معناك سامية في علياك طاهرة كالاملاك
إنت ابهج نور من بدور الكمال ساطعة فيك آيات من معاني الجمال تجعل الفنان عبقري الخيال لو نظم أشعار او عزف أوتار تندهش افكار والعقول تحتار ياجميل ياما في الجمال أسحار
أنا في شخصك بحترم أشخاص و طبعا عندي إحترامك خاص
Post: #2 Title: Re: الفؤاد مجروووح .. ما فضل مني شئ خلاف الرووو Author: Munir Date: 09-06-2015, 06:58 AM
Post: #3 Title: Re: الفؤاد مجروووح .. ما فضل مني شئ خلاف الرووو Author: عبدالحفيظ ابوسن Date: 09-06-2015, 07:16 AM Parent: #2
تحياتي منير تصدق رغم اهتمامي بالغناء والقديم بالذات سمعتها قبل كم شهر بس .. رسلوها لي بالواتس .. اداء بت وولد .. واسرتني جدا الكلمات البسيطة المنسابة واللحن العذب والاداء الرايق تشكر والله
Post: #4 Title: Re: الفؤاد مجروووح .. ما فضل مني شئ خلاف الرووو Author: Munir Date: 09-06-2015, 07:27 AM Parent: #3
Quote: و بالرغم من إنو انا الأغنية دي سمعتها من عدد كبير من المغنين لكين أداء شكر الله دا من أجمل الأداءات السمعتها
ههه يا حافظ .. تصدق بقت علي قصة أشعب الكضب علي الجماعة قال ليهم في الشارع التاني في وليمة .. ولمن الجماعة جروا علي الشارع، قام الفار لعب في عِبه وصدق كذبته وجري وراهم - قال يمكن فعلاً في وليمة .. أها أنا قمت مشيت تاني استمع لشكرالله عزالدين قلت حافظ ده ما مضمون، كدي الأمشي أسمع يمكن فاتتني نغمة طايرة .. طبعاً كلامك عن الحداثة ينطبق علي تطور تكنولوجيا الصوت والتسجيل والآلات .. وذلك يظهر بوضوح في الفرق بين أغاني القدامي والغناء الجديد ..
الأخ عمرعثمان .. مشكور علي تنويرك للبوست .. أخو إبراهيم إدريس جارنا عديل؟؟ ماقادر أستحضر الشخصية - طوّلنا من البلد - .. ياربي الحاج حمد ممكن يكون مُلِم بالجيرة دي ؟
الأخ Hamad Hamad .. أحسنت ياخي بهذا التسجيل الأصلي.. الروائع الغنائية القديمة لم تحظ بالتقنيات الحديثة في الصوت والصورة .. لكين علي الأقل الcore موجود لتتلقفه الأجيال ..
الشاب ده يا حافظ أدي الأغنية بإحساس عالي .. بس أنا افتقدت في أدائه نغمة :غير مااا آآشعر .. و تسمح تانظررر .. هذه النغمة في آخر المقطع هي ما تعطي الأغنية حنيتها .. وهي البتخليني أنهار .. كلما أروق شوية، أمشي أسمع الجابري وأنهار تاني .. قصتي بايظة ..
ترباس أوركسترا ... و لدي تسجيل آخر بالعود غير موجود على اليوتيوب
أيضا يُنصح بسماعها بصوت ( السلطانة ) ...
Post: #26 Title: Re: الفؤاد مجروووح .. ما فضل مني شئ خلاف الرووو Author: يحي قباني Date: 09-07-2015, 00:33 AM Parent: #25
ودي علي الريق يا منير ... تسمعها على ذهن صافي ...
Post: #27 Title: Re: الفؤاد مجروووح .. ما فضل مني شئ خلاف الرووو Author: الباقر ابوبكر ابراهيم Date: 09-07-2015, 01:00 AM Parent: #26
تحياتي منير وضيوفه يا سلا م شكر الله ابدع في الاغنيه دي
شكرا ليك يا منير
Post: #28 Title: Re: الفؤاد مجروووح .. ما فضل مني شئ خلاف الرووو Author: الحاج حمد الحاج Date: 09-07-2015, 09:36 AM Parent: #27
يا منير كيف حالك..غايتو في الويك يند لما يكون مزاجك رايق بتنكت لينا حاجة حلوة و على الاقل نبعد شوية من ساس يسوس دا لو ما جا واحد من اصحابك و حكاها هنا برضو...
ابراهيم ادريس وو الجابري ديل كوم برااهم. جضموها شديد جدا
سميرة دنيا و ترباس يمتازو بي راحة في الصوت و هدوء ديل جضموها شديد
الولد شكر الله ما قصر تب..
Quote: الأخ عمرعثمان .. مشكور علي تنويرك للبوست .. أخو إبراهيم إدريس جارنا عديل؟؟ ماقادر أستحضر الشخصية - طوّلنا من البلد - .. ياربي الحاج حمد ممكن يكون مُلِم بالجيرة دي ؟
تصدق انا زاتي ما كنت عارف انو ابراهيم ادريس دا عندو اخو في الشعبية الا من كلام الباشمهندس عمر دا... لكن عملت اتصالات و افادني الاخ الاستاذ امين محمد عثمان انو اخو المرحوم عبد الكريم ادريس ساكن في شارع ناس عمك الدكتور محمد عثمان بيتو شرق ناس اشرف محمد عثمان فضل و غرب ناس مختار عبد الصمد و مواجه بيت ناس مامون الباقر. واصل الابداع دا و شوف لينا 7 اغاني و 7 شعراء و خلينا شوية من آلية 7 + 7
آهلاً ياالحاج .. كيفك؟ بركة الجيت مقلِّع .. الأغنية زاتها سمحة ياخ .. أنا بالذات ملحونة : غير ما آآآشعرر .. و تاسمح تانظرر دي طوالي بتجر القوس فوق أوتار الحس عندي .. وبها أقارن الأداء والذي لغاية الآن أفضِّل فيه الجابري - رغم أنه أدي الأغنية علي السريع - في الأغنية : ياما في الجمال أسحار .. ونقول كذلك ياما في الأسحار جمال .. طبعاً زي ماشايف مرات الواحد يشبك ليهو في أغنية واحدة ويعصرها لامن تجيب الزيت وزيتنا زاتو يطلع فيها .. في الآخر الواحد يحب يشارك الآخرين المرهفين أحاسيسه .. السياسة كلامها كتير وبيعمل ضغط ساي .. ثمّ إنو بلدنا دي حكمها صعب لأنها مملوءة بالحمقي .. تحاول تسايس الزول توصف ليهو قدام تلقاهو وراك ههه..
شكراً لنقلك لي في ذاك الشارع - شارع ناس أمين وعادل ومحمد سعد ونادر ومامون .. (خايف أقعد أعدد الأصدقاء لمن ألقي نفسي في المؤسسة ..:))
Post: #30 Title: Re: الفؤاد مجروووح .. ما فضل مني شئ خلاف الرووو Author: Munir Date: 09-07-2015, 11:42 AM Parent: #27
Post: #29 Title: Re: الفؤاد مجروووح .. ما فضل مني شئ خلاف الرووو Author: Munir Date: 09-07-2015, 11:35 AM Parent: #26
سلامات ياهندسة .. تصدق بعد ليلة حافلة بالإنهيارات قمت جيت شفت مشاركاتك دي فعلاً علي الريق .. تبل الريق وتروي عديل :) .. ترباس كالعادة جوَّد الأغنية تجويد الخدرة.. بس كلِّمه يطلق لصوته العنان .. أنا عارف العنان لو إنطلق ما بيتحاش ، لكين علي أقل نصف قوة زمان لأنه شايفو بقي يدس صوته شوية شوية كلما تقدمت السنين - البطاريات ضعفت -
سميرة دنيا برضو أدت الأغنية إحساس بناتي - والأغنية تنفع يدندنن بيها البنات وهن في المطبخ منفردات وسارحات بعيد يقطعن في البصل يجهزن في ملاح الغدا ودموعن جارية .. بينما أولاد البيت عديمين الشغلة واقفين تحت الشجر في الشارع عاملين دوشة بالضحك والقرقراب - منتظرين الغدا -..
Post: #31 Title: Re: الفؤاد مجروووح .. ما فضل مني شئ خلاف الرووو Author: طلحة عبدالله Date: 09-07-2015, 11:47 AM Parent: #29
Quote: سارحات بعيد يقطعن في البصل
بس ما تبقي عليهن البقت على صويحبات إمراة العزيز يا دكتور .. ههههههه
هوي يا طلحة أول شئ الدموع الجارية جارية من البصل .. وتاني شئ أنا قلت منفردات في المطبخ يعني لو الأب أو الأم أو أي زول خش المطبخ سكوت طوالي .. العذاب الغير منظور في المطابخ شديد ياخي .. - ما سمعت بقلبي المكتول كمد؟؟ - :) ..
يا دكتور يا هو كل هوى كان منفردات واللا راقدات هن والنجم أما قرأت عن الأخفش الحداد الذي قال : مطارق الشوق منها في الحشى أثر ... يطرقن سندان قلب حشوه الفكر ونار كور الهوى في الجسم موقدة ... ومبرد الحب لا يبقى ولا يذر هههههههه
يا سلام يا طلحة .. االريد في السودان كتامي يتفرّج فيهو القمر والننجوم بس .. إنت ماعارف إنو الحب حرام؟ لبوست بالراحة ممكن ينقلب للحديث عن الهوي والأشواق والحنين ووو التي أبدع فيها العرب شعراً في غاية الرقة والعذوبة .. طبعاً العرب ديل ماتركوا شاردة أو واردة في هذه الدنيا إلاّّ وأبدعوا فيها شعراً أو نثراً .. في الغزل في الهوي في الفكاهة في التصوف في وفي وفي .. لطالما أردت أن أفتح بوست كشكول عن لشعر ونثر االعرب في كل هذه الأشياء ، لكين أسوي شنو مع زمني الخائن .. طبعاً أنا ما ضليع في الموضوع لكني متأكد أننو حيكون في فطاحلة في البورد ده ..
مرحبتين ضرغام العامل فيها أبوعرَّام .. ياخي في أحدي مراحل البوست ده كنت عاوز أقتبس عبارة العامل فيها هناي - وأقول كما قال ضرغام - لكين المناسبة راحت مني .. ههه
للقراء الأعزاء الما متابعين ضرغام عنده بوست بعنوان: وقفة مع ( العامل فيها هناى )
Post: #40 Title: Re: الفؤاد مجروووح .. ما فضل مني شئ خلاف الرووو Author: ضرغام عباس Date: 09-07-2015, 04:47 PM Parent: #39
منير اقتبئس ما شئت ... وهبتك حبى وحرفى
Post: #41 Title: Re: الفؤاد مجروووح .. ما فضل مني شئ خلاف الرووو Author: محمد الكامل عبد الحليم Date: 09-07-2015, 08:15 PM Parent: #40
تحية الي صديقي المتامل منير...
من لهيب الشوق برضو مافي خلاص....هكذا يا ظالم جزاء الاخلاص....لست ادري البون الواسع الشاسع بين الخلاص والأخلاص وازعم ان في المسافة بينهما يسكن اللهيب ....لكنه لهيب اخر يغزله الشوق. لذلك وعنه يسكب المغني الحانه لنعدو مع ريح الخلاص تارة أو تاخذنا الهويني توسلا لأخلاص مفقود...
وطبعا يا منير وبذوقك العالي قدمت لنا اطباق من اسحار الجمال لكنا نميل الي ود المقرن صاحب ( العازومة ) الأصلي رغم حبي للجابري وبسببه انشات جوقة من معجبيه كانت تتحرك اليه في هدأة الليل من السجانة الي امدر لنسكن الي اغنياته بالغليظ تارة وبصوته المموج تارات اخري لننتهي ب..عطشان يا صبايا .....فتامل...
مرحب سلام االصديق الفاضل محمدالكامل وليك التحايا أضعاف ... ويا سلام علي المزاوجة بين الخلاص والإخلاص وبينهما لهيب الشوق ...
بالإضافة لأداء هذه الباقة من المبدعين .. كنت أتمني أن يكون المرحوم خوجلي عثمان تغني بها ومسجلة في مكان ما .. فهو لا يجاري في غناء الآخرين ..
شكراً ياخي علي المشاركة الأنيقة ..
Post: #43 Title: Re: الفؤاد مجروووح .. ما فضل مني شئ خلاف الرووو Author: محمد الكامل عبد الحليم Date: 09-08-2015, 03:34 PM Parent: #42
تحية
عبقرية عبد الرحمن الريح لم تكتشف بعد....اجنحتها الحانه التي تغازل الاقمار ...اما كلماته فهي الوان من السحر يضفيها علي روابي امدرمان...تنعش كبريائها...تصون ماجداتها...تصوغ قصص حبها...تغازل اشواق عشاقها..تداعب ليالي سهدها..تضيف الي انجمها نجيمات سعدها...تنثر في تربتها مواويل خصوبتها...تلملم اطراف غزلها الفاتن ولا تكتفي بدررها من المفاتن...يصحو البوح علي نيلها...يحلو عناق التواصل تحت شجيراتها ... يلتقي السمار علي حبها ولا ينام اليل الا عند غناوي تذكارها..
كل ذلك صاغه عبد الرحمن الريح صياغة الحاذق الماهر العاشق المسحور بالجمال و بالعطر والانوار..
إسم الشاعر عبدالرحمن الريح ظل مألوفاً جداً في كل فواصل الإذاعة الغنائية .. لكن التوثيق له لم يتعدي ذكر إسمه كشاعر وملحِّن للأغنية في التقديم متبوعاَ بإسم الفنان .. أو هذا مبلغ علمي ..
كلمات هذه الأغنية في غاية الرقي ، حيث أنها مملوءة بمشاعر معنوية بحتة وليس بها وصف حسي لشئ دنيوي ملموس أو غريزي .. تأمل عبارات: حب ،، لهيب الشوق،، الخلاص،، الإخلاص،، الفؤاد - ما قال القلب - فالقلب محسوس والفؤاد معنوي - في زول يقدر يتخيل ماهو الفؤاد؟؟ .. ثم عبارات: مافضل مني شئ خلاف الروح - يسألونك عن الروح - .. ثري الأشباح ،، سماء الأرواح،، العشاق والأشوق ،، سامية في علياك،، طاهرة كالأملاك ،، ثم عبارات: أبهج نور - معني غير محسوس- ..،، بدور الكمال - معني غير محسوس- ،، من معاني الجمال - تعبر عن نفسها - ،، عبقري الخيال - معاني غير محسوسة - إلخ .. كل كلمات القصيدة تحلِّق في دنيا المعاني السامية الجميلة والنبيلة .. وواضح عدم التكلُّف في صياغة القصيدة لكي تكون هكذا سامقة في سماء المعاني البحتة ، بل تحسها منسابة بعفوية وتلقائية .. وهنا تكمن الشاعرية ..
Post: #45 Title: Re: الفؤاد مجروووح .. ما فضل مني شئ خلاف الرووو Author: ضرغام عباس Date: 09-10-2015, 00:31 AM Parent: #43
Quote: تحية
عبقرية عبد الرحمن الريح لم تكتشف بعد....اجنحتها الحانه التي تغازل الاقمار ...اما كلماته فهي الوان من السحر يضفيها علي روابي امدرمان...تنعش كبريائها...تصون ماجداتها...تصوغ قصص حبها...تغازل اشواق عشاقها..تداعب ليالي سهدها..تضيف الي انجمها نجيمات سعدها...تنثر في تربتها مواويل خصوبتها...تلملم اطراف غزلها الفاتن ولا تكتفي بدررها من المفاتن...يصحو البوح علي نيلها...يحلو عناق التواصل تحت شجيراتها ... يلتقي السمار علي حبها ولا ينام اليل الا عند غناوي تذكارها..
كل ذلك صاغه عبد الرحمن الريح صياغة الحاذق الماهر العاشق المسحور بالجمال و بالعطر والانوار..
رؤيه جمالية لا هى جافت الحقيقة و لا انفصلت عن سحر البيان و عبقرية المعنى فى القصيدة ( شاهدنا ) بل سارت مع الالق و الادهاش فاسكرتنا روعة يا اخى محمد الكامل
Post: #46 Title: Re: الفؤاد مجروووح .. ما فضل مني شئ خلاف الرووو Author: Munir Date: 09-13-2015, 08:19 AM Parent: #45
وجدت هذا البرنامج الجميل عن الشاعر عبدالرحمن الريح ...
Post: #47 Title: Re: الفؤاد مجروووح .. ما فضل مني شئ خلاف الرووو Author: الحاج حمد الحاج Date: 09-20-2015, 09:45 AM Parent: #46
Quote: كل كلمات القصيدة تحلِّق في دنيا المعاني السامية الجميلة والنبيلة .. وواضح عدم التكلُّف في صياغة القصيدة لكي تكون هكذا سامقة في سماء المعاني البحتة ، بل تحسها منسابة بعفوية وتلقائية .. وهنا تكمن الشاعرية ..
شاعر مبدع و متابع (منير) يتابع و يعبر بأبداع فووق ..متابعين يا منير..الله ينور عليك
Post: #48 Title: Re: الفؤاد مجروووح .. ما فضل مني شئ خلاف الرووو Author: محمد على طه الملك Date: 09-20-2015, 11:28 AM Parent: #47
يا المنير بعد مقاربتك التانية دي أنا برشحك لعضوية مجموعة أغاني وأغاني النقدية في البورد .. حقيقة ما عايز أفسد المشاعر المنداحة مع سطوة تعابير عبد الرحمن الشعرية .. لكين ماظنيت الرومانسية المبجلة دي موجوده بين أعطاف شعرائنا الشباب اليومين ديل.. وين مع هيييع وكع البقت علينا دي .. في الحقيقة الحي الاسمو حي العرب ده .. من عبيد عبد الرحمن وسيد عبد العزيز مرورا بعبد الرحمن الريح وصولا لسيف الدسوقي .. حي عامر وزهوره صاحية عابقة و مسكون بالأحاسيس الشعرية المرهفة .. رحم الله شاعر الأحاسيس النيلة عبد الرحمن الريح.. مشكووور.
.. سلامات أستاذنا محمد على طه الملك أسعد دائماً بمرورك ومشاركتك .. قلت لي ناقد فني عديل في أغاني وأغاني؟ ههه ..ده انا غلبان .. أخوك أجهل الجهاليل بعلوم الموسيقي والغناء وتفاصيله .. كلامي ده كله جربندي ساي - مع إنو قالوا ضابط الجربندية أخير من ضابط الكلية :) - بس الحمدلله أوتار الحس موزونة وتلتقط النغمة الشجية .. سواءً كانت سودانية، عربية، غربية، شرقية، إلخ .. لمن المزاج يكون رايق .. الرومانسية وإعتصار الأحاسيس دي نتاج المعاناة وحرمة الريد والغرام .. لكين طبعاً مع الإنبهال والليبرالية، الماسورة إتكسرت والمشاعر هبطت من سما الأفلاك لحضيض دقيت ليهو ما ردَّ .. الغناء الذي كان يعتبر دون مستوي الكبار ذاته زمان كان مشحون بالمعاناة والحرمان زي: يا ناسي وأنا العذاب علي قاسي وييين أنا ود أمي .. ومتل: سيد العظمة سافر خلاني.. وزي العجب حبيبي .. ووو .. هسه وين مع العالم المفتوح ده؟.. وطبعاً لسه ما وصلنا لمرحلة ناس 50سنت وجنيفرلوبيز وباقي جماعة أمريكا ديلاك حيث كل شئ مباح للطيش .. - أو ربما ياربي نكون أوليردي وصلنا وأنا ماجايب خبر؟ :) -
.. سلامات أخي الصديق الحاج .. الويكإند ده الواحد راقد مرخِّم ساي زي الcrocodile زي ما بيقول صديق الجامعة العزيز-ودالقولد- سيف محمدسعيد .. الأسبوع كان زحمة، خاصة إنو الواحد قرر يتعلم اللغة - ماممكن الزول قاعد هنا عشرة سنة صم بكم !! .. كمان لو ربنا مدّ في الأيام السنة الجاية إلاّ أقدم للزواج - أقصد الجواز - هههه ..
وبالمناسبة أليكم برضو الحلقة التانية من البرنامج عن الشاعر الراحل عبدالرحمن الريح تقديم معتصم محمدالحسن واستضاف فيها الفنان جمال النحاس والفنانة سميرة دنيا بالإضافة للخبير الأمدرماني الأستاذ بشري النور الذي أثري الحلقات وجعلها مشوِّقة بأسلوبه السلس الجميل ومعلوماته الفريدة .. كما أري أن المقدِْم معتصم أصبح متميز وبارع في إدارة الحوار بتطعيم بدايات ونهايات الحديث بكلمات الإستمرارية المواصلة فيجعل الكلام مسترسل بدون تعتعة وتوقيف .. يعني تلاحظه يخش في نص جُمل الأستاذ بشري بكلمة هنا وكلمة هناك فتحس بأنه منتبه بتركيز رائع لمحاوره .. أذكر بداياته في القناة الفضائية ولم يكن بهذه الخبرة في إدارة الحديث .. لكنه في الحلقة الأولي خمج البداية بأن ظل يخاطب الأستاذ بشري ب - العم بشري - ثم عدَّلها في الآخر ل - الأستاذ بشري - ..وهذه ملاحظة أنا ملاحظها في مذيعي التلفزيون، وهي مخاطبة الضيوف ب- العم، الخال، الخالة ، العمة إلخ .. وذلك لا يليق مع جهاز جاد .. يجب الإلتزام بمخاطبة ضيوف التلفزيون بالأستاذ، الأستاذة، السيد، السيدة حتي يحافظوا لكل ضيف علي مقامه وشخصيته .. مش تجي بجلابية طوالي يشبكوك ب العم .. والضيف لي رقبته يكون أصغر من المذيع .. أو ضيفة تكون لابسة توب أو تكون مرأة عاملة طوالي يلطخوها ليك بالخالة فلانة ...
Post: #51 Title: Re: الفؤاد مجروووح .. ما فضل مني شئ خلاف الرووو Author: محمد على طه الملك Date: 09-20-2015, 11:23 PM Parent: #49
Quote: بالإضافة للخبير الأمدرماني الأستاذ بشري النور الذي أثري الحلقات وجعلها مشوِّقة بأسلوبه السلس الجميل ومعلوماته الفريدة .. كما أري أن المقدِْم معتصم أصبح متميز وبارع في إدارة الحوار بتطعيم بدايات ونهايات الحديث بكلمات الإستمرارية المواصلة فيجعل الكلام مسترسل بدون تعتعة وتوقيف .. يعني تلاحظه يخش في نص جُمل الأستاذ بشري بكلمة هنا وكلمة هناك فتحس بأنه منتبه بتركيز رائع لمحاوره .. أذكر بداياته في القناة الفضائية ولم يكن بهذه الخبرة في إدارة الحديث .. لكنه في الحلقة الأولي خمج البداية بأن ظل يخاطب الأستاذ بشري ب - العم بشري - ثم عدَّلها في الآخر ل - الأستاذ بشري - ..وهذه ملاحظة أنا ملاحظها في مذيعي التلفزيون، وهي مخاطبة الضيوف ب- العم، الخال، الخالة ، العمة إلخ .. وذلك لا يليق مع جهاز جاد .. يجب الإلتزام بمخاطبة ضيوف التلفزيون بالأستاذ، الأستاذة، السيد، السيدة حتي يحافظوا لكل ضيف علي مقامه وشخصيته .. مش تجي بجلابية طوالي يشبكوك ب العم .. والضيف لي رقبته يكون أصغر من المذيع .. أو ضيفة تكون لابسة توب أو تكون مرأة عاملة طوالي يلطخوها ليك بالخالة فلانة ...
هههه هو النقد دا بعد سلخك الفوق دا تاني كيفنو؟ حقيقة أستاذ بشرى ممسك بنواصي موضوع الحلقة .. ويمتعك كما قلت بسياحة حول ثقافة المجتمع وأخلاقياته .. بمالا يقل عن موسيقى اللحن وعمق تعابير الشاعر وارتباطه ببيئته.
Post: #52 Title: Re: الفؤاد مجروووح .. ما فضل مني شئ خلاف الرووو Author: Osman Musa Date: 09-21-2015, 03:14 PM
سلامات عزيزنا أستاذ منير والقومة لي الفنان الشامخ ود المقرن الفنان البار بالمستمعين والمعجبين . ياخ لمان الواحد يسمعو يحلق في مقطع ( مافضل مني ) صوتو يدخلك في حالة لا تعرف نفسك مجنون ولا نصيح .
Post: #53 Title: Re: الفؤاد مجروووح .. ما فضل مني شئ خلاف الرووو Author: بله محمد الفاضل Date: 09-21-2015, 03:31 PM Parent: #52
يا الله يا الله..................
مأدبة دسمة ولابد من توخي الحذر السديد حتى لا ينبهل المرء فلا يجدن من يلملمه