مـــــــ21ــــــــارس كــل يــوم وأمــهــاتــنـا بـخــيــر

الزملاء الأحباب هذا هو يوم امهاتنا والذي نحتفل به كل لحظة مع تلك الحبيبة الحنينة..
كثير منا كانت أمه هي الأم والأب.. وبعضنا فقدها وما زال يفتقدها..

فلهن الحب والرحمة اينما حلن.. في دنيانا وفي تلكم السموات..

كل عيد وهن منبع الحب والرجا..

العزيزة رجاء
لك تقديري و لأمي شوق لا ينتهي
عندنا في الريف يعتبر الإحتفال بهكذا عيد مدعاة للسخرية و أذكر أن جارتنا عشة بت حماد الله يطراها بالخير عزمناها لي عيد الأم و كنا عاملينو معتبر كدة و فيهو بهرجة و هدية للوالدة ووشاح و دموع و الناس كلهامبسوطة.
خالتي عشة بت حماد مطت شفتيها مصدرة صوتآ ليس من حروف اللغات فيشيء لكنك تستطيع تمييز أثر اللعاب في إصداره أكثر من الصفير المكون للحروف بالعادة ففهمنا أنها مستاءة و بادرتها بالسؤال شلاقة من عند نفسي:
يا خالة مالك؟ ما مبسوطة؟
*مبسوطة كيفن؟ هسة جنس البزار دة و الهيلمانة السويتا دي كان صريتا في خيت واديتا لي أمك ما كان دخلت في الختة بي إسمين و صندوقنا تمة يا مسخوت؟

خيرك عليّ بالجد كتير ..
يا مرضعاني الطيبة بالصبر الجميل..
يا سعد ايامي وهناي..
لو درتي قلبي أسلم..
أمي الله يسلمك..
الله يديهن العافية.. ويقدرنا على سعادتهن..

الاخت رجاء:
التحيةوالشوق والحب لكل الامهات بهذا اليوم..
وحقيقة لهن كل ايامنا وحياتنا نبذلها رخيصة من اجلهن.
الاخ الطيب:
لك التحية والصندوق لسه ماشي ولا وقفتوه??
المداخلة جميلة..
وللجميع التحايا بعيد الام...

الأحباب الطيب منى وايهاب

وهل بنقدر على جزاهن.. ما اظن..

ربنا يسعد أمهاتكم دنيا وآخرة..

لأمهاتنا جميعا يا أختنا الطيبة رجاء
ولزوجاتنا نيابة عن أبنائنا الصغار وأنا بالذات بدلا عن رباب ومصعب
وللجميع

شد ما اشتاق لامي

اسال الله ان يهبها الصحة والعافية

ولجميع الامهات عيد سعيد مع كل الامنيات الطيبة لهن بكل ما هو جميل

والشكر موصول للاخت رجاء دوما سباقة لتذكرينا بالمناسبات السعيدة

والله الموفق

الأحباب صديق وأسعد..

وكل يوم وامهاتكم بخير..

شكرا صديق وربنا يحفظ عيالك..

أسعد الله يحقق ليك امنية شوفها قريب..
بي دربك ده اتصل كلمها هسع..

تسلمي يارجوية وكل سنة وامهاتنا واخواتنا وكلكن بخير

وربنا يرحم امهاتنا المتوفيات ويجعل الجنة مثواهن

وعلي فكرة يارجاء عندك ابتسامة تمسح هموم الدنيا من

راس الواحد وتسلمي يااميرة .

الحبيبة سارة..
عذرا لم ألحظ مشاركتك من قبل..

كل يوم وكل أم بخير وربنا يحفظ ليك عيالك..
قولي آمييين..

شكرا لكلامك عن ابتسامتي التي لا تفارقني ابدا..
تسلمي..

وكل يوم وامهاتنا جميعهن بخير

استاذه رجاء ..


كل سنه وكلكم بخير ..

وشكرا على الموضوع الجميل .

بس طلب ..طلبتو في بوست الاخت ساره عن نفس الموضوع وبكررو هنا ..

ياخوانا ..اغنية (يايمة رسلي لي عفوك) .. نزلوها لينا ..

قراءة او استماع .







امـــي الله يسلمك

رجاء

اجمل التهانىء بمناسبة العيد لك الامهات
عيد سعيد

العزيزة رجاء
كل سنة وجميع الامهات بخير

امد الله فى اعمارالاحياء منهن

ورحم من غادرن هذه الدنيا


لما كنت فى السودان كان فى البيت دائماً اهم حاجة ان احتفال عيد الام يكون مفاجأة (يعنى طول اليوم نعمل نفسنا ناسيين انه عيد الام)، و اعتقد ان هذا التقليد مازال متبعاً.اطال الله عمر والدتى الحبيبة.

ندى

الأحباب سوما والحبوب وندوية..

كل يوم واماتنا بخير..

سوما.. انا تكنولوجيا قدر ده ما بعرفا.. الا نكلم الناس الحلوة ينزلو الغنية..

ندوية.. انحنا أمي بتعد الأيام للمناسبة دي.. عشان عارفة العزومة البرة في المطعم الخمسة نجوم..
شفتي "الراجيني" بعد بكرة ..

الله يخليهم لينا..

رسالة الى مريم محمود



ياوالدة يا مريم ... يا عامرة حنية

أنا عندي زيك كم ... يا طيبة النية

بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق

والعسكري الفراق ... بين قلبك الساساق

وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني

دايماً تقيليني وفى العين تشيليني

ألقاه عز الليل قلبك يدفيني

ضلك عليَّ مشرور قيلت فى سنيني

أنا لو تعرفيني لو تعرفي الفيني

أنا كم بحبك كم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

طول النهار والليل فى عيني شايلك شيل

لكني شادّي الحيل لا خوف عليَّ لا هم

هاك قلبي ليك منديل الدمعة لما تسيل

قشيها يا مريم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

ما بركب السرجين وما ني زولاً شين

يا والدة دينك كم دين الوطن كمين

ما شفتي ود الزين الكان وحيد أمه

ماليلا كان العين قالولو ناسك كم

ورينا ناسك وين .. ورينا شان تسلم

العودو خاتي الشق ما قال وحاتك طق

تب ما وقف بين بين لى موتو اتقدم

قال أنا ما بجيب الشين أنا ما بجيب الشين

أنا لو سقوني الدم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

كم من حبيباً ليَّ كان مالي بينا دروب

ما ودع الحبان ما وسدوه الطوب

حي قولي ما حي ووب

حي قولي ما حي ووب

ما خلى ساعة الموت يمه السرج مقلوب

اتشتت الرصاص فى جسمو واتقسم

لاقاهو يتبسم والحولو حيله وكان

ريحة صباه تتشم

زي التقول يومداك يوم العرس يادوب

قال أنا ما بجيب الشين أنا لو سقوني الدم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

يمه السجن مليان رجالة ما بتنداس

الختو قبلي الساس والشالو هم الناس

والفات وليدن ليهو ما مسكو الكراس

ما سمعو يتكلم ما نحن عود الفاس

فرسان حمى وحراس فى الحارة نتحزم

عشم القدر ما كاس ما لاقى بيت يتلم

عشم الطواه الجوع المتعب المعدم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

ما تقولي شن سويت ما تبكي شن سويت

غير البطمن ناس بى همهم ساويت

فارس مع الفرسان حارس بلدنا البيت

أخواني علو السور أنا طوبة ما ختيت

ديل من زمن تاتيت لامن كتبتَّ قريت

عرقنا ياما يدر يمه اللبن والزيت

الكسرة والكراس لى قشة الكبريت

تقولي جيداً جيت راجع مع الفرسان

فايت الحدود واسيت

وتغني يا مريم لينا وتجري النم

والعسكري الفراق بين قلبك الساساق

وبيني هو البندم ... والدايرو ما بنتم

يا والدة يا مريم

الامهات اجمل القصائد
الي امي وكل الامهات


الى امي



أحنُّ إلى خبزِ أمّي

وقهوةِ أمّي

ولمسةِ أمّي

وتكبرُ فيَّ الطفولةُ

يوماً على صدرِ يومِ

وأعشقُ عمري لأنّي

إذا متُّ

أخجلُ من دمعِ أمّي



خذيني، إذا عدتُ يوماً

وشاحاً لهُدبكْ

وغطّي عظامي بعشبِ

تعمّد من طُهرِ كعبكْ

وشدّي وثاقي..

بخصلةِ شَعر..

بخيطٍ يلوّحُ في ذيلِ ثوبكْ

عساني أصيرُ إلهاً

إلهاً أصير..

إذا ما لمستُ قرارةَ قلبكْ!



ضعيني، إذا ما رجعتُ

وقوداً بتنّورِ ناركْ

وحبلِ الغسيلِ على سطحِ دارِكْ

لأني فقدتُ الوقوفَ

بدونِ صلاةِ نهارِكْ

هرِمتُ، فرُدّي نجومَ الطفولة

حتّى أُشارِكْ

صغارَ العصافيرِ

دربَ الرجوع..

لعشِّ انتظارك




أمّي

الشاعر الفلسطيني فاروق مواسي


غزلتْ أمي عُمري

بشذا الدمعِ سَنا

هي مسرى النبعِ الى البحرِ

وصوتُ مُنى

في عينيها أقرأُ حرفي

أقمارًا جناتٍ وجنى

وهداياها :

كنزُ دعاءْ

وسجاياها :

بُستانُ وفاءْ

فيجولُ سؤالي في لهفٍ :

أين أنا ؟؟!

الحبيبان متولي وعماد..

حفظ الله أميكما ورزقهن بقدر الوفاء الذي تحملان..

وكل يوم وكل أم بخير..

كل سنه وكل الامهات بخير
والف رحمه على الفقدناهم من امهاتنا

علويه الشيخ ,فاطمه عبد العزيز, وفديه قوته, وزينب على
زينب ابراهيم, فاطمه, علويه همرور, امنه همرور, امى امنه لطفى ,نوره عبدالله ادريس ,زينب كباشى, حياه سنهوري ,ســــــــــــــــــلمى( أم سلمه)

مبروك ياتماضر
علويه انشاء الله اسمها شايل
وانشاء الله رشا تكون بخير
عاوزين التفاصيل وزنها كم وطولها ولون العيون........... والصور

الهم احفظهم لنا...ما اجمل الدنيا بالام... وما احلى الحياة حين تدعو لك امك بالتوفيق... اهديك يا امى كتاب الجنان كله... ولن انسى تعبك وسهرك من اجلى ...

كل سنة وانت بخير وكل الامهات فى الدنيا بخير..

شكرا رجاء لتزكيرنا بهذا اليوم العظيم

فالنحي كل أم سودانية ربت وعلمت وسهرت لاجل راحة اسرتها...

الحبيبة راوية والحبيب عبدالله (سنتي)

جميل ونحن نحتفل بأمهاتنا وامهات لنا لم يلدنا..

لهن كل الحب ولنا القدرة على الوفاء بالقليل مما وهبننا اياه..

كل لحظة وكل ام بخير

الحبيبة رجاء
لك الحب 0000
والتحايا والحب والاكبار والاجلال والقيام 000000000
لامى الحبيبة ، لها الرحمة والمغفرة ويسكنها الله جنات عدن ويلزمنا
الصبر اكتر واكتر 0
ولامهاتى امد الله فى اعمارهن
نورة ام عادل عبد العاطى
واسيا ام اسامة الخواض
وعلوية ام بنات العباسى
كم اعجبت بعظمتهن وتضحيتهن فى تربية اجيال واجيال 000000
التحايا لهن ولجميع الامهات فى عيد الام وان شاء الله يجعل ايامهن كلهااعياد وخير وبركة 0
رجاء الحبيبة 00
كم حمدت الله كثيرا وانا اقف بجوار امى ومعى شقيقاتى واشقائى وهى فى لحظتها الاخيرة وقتحت عينيها وقالت هذا ما تمنيته ان اراكم فى هذه اللحظة محيطين بالسرير ولكم الان آخر دعواتى 0
ربنا يسهل خطواتكم ، ويبعد عنكم اولاد الحرام ، ويجعل البركة فى ذريتكم ، وراضية عنكم دنيا وآخرة ، وودعتكم لله الذى لا تضيع ودائعة، وخافوا الله فى كل خطوة تخطونها ، وارحموا الكبير والصغير ، وكلام كتير كتير ، وبعدها قالت يلا اقروا ياسين لقد حانت اللحظة واعتدلت فى رقدتها واغمضت عينيها وبدأت بالشهادة عندها صرخت صرخة شديدة ففتحت عينيها ونظرت لى بعتاب وبدأت أقرا ياسين مع اخوانى فابتسمت واغمضت عينيها للابد فى يوم الجمعة 12/ 7 / 2002 فى تمام الساعة الخامسة الا ربع صباحا 0
اخواتى واخوانى
اتمنى من الله ان يطيل من اعمار امهاتكم من الاحياء ويجعل فيهن البركة
وان يرحم امهاتكم من الاموات ويجعل الجنة مثواهم 0
اخواتى واخوانى
اتمنى من الله عز وجل ان تكونوا بجوار امهاتكم اذا حان الاجل والله انها لاجمل لحظة 0
امال
ام وضاح

اما علوية بت الحاج عثمان همرور فقد اضحت ..قصيده..


يوم 29 مارس تقفل تلاته سنين من عمر الرحيل...


يا ملاك الموت حين حللت ضيفا عند أٌمى ذات صبح

بالله هل كانت كعادتها ظريفة؟

هل أجلستك على بنابرها القطيفة؟



هل قلت بنا.. وفاح الهبهان من الشرغرغ بينما كانت تدبر للضبيحة؟

هل أتت صينية الشربات تلمع وحولها الأشياء تلك؟

موز برتكان عجوة لالوب ؟ ما تيسر؟

اشياء فى قاموسها كانت تسميها عروض؟



هل خسّمتْك.. لكى تضوق؟

, اكل الرسول...اكل الرسول’؟

ياسلام

تعطيكا جوًا رائقاً

ولك الامان ... وقلبها ... وفتيل ريحة ؟

يا سلام...



هل أضحتْك وونستْك..

بالله هل فرشت بساطاٍ أحمدياٍ وهى تحكى قصة عن إبنها الممسوخ أو

تروى حكاية بنت إبنتها الفصيحة؟

ياسلام...

وتجر مقنعها قليلاٍ للأمام

أدباً..وستراً

مقنعها قليلاً للأمام

كى تدارى عنك ملكتها...سحر مهجتها...ونبوغها البادى ...وينبوع القريحة

كى تدارى عنك حكمتها ...سماحتها الصريحة

تجر مقنعها

شلخها يضوى..

سنها برقٌ

مقنعها

تدارى

رياض

مجلسها

الفسيحة

يا سلام

لما أتيت نزلت ضيفا ياملاك الموت

هل كانت ...ظريفة؟

_______

رحمها الله..بقدر ما حنت..وادت..


وحفظ الله امهاتكم..لكم..ووهبهن الصحة والعافية..

الحبيبة تماضر..
رحم الله أمي علوية بت الحاج عثمان همرور وأنعم عليها في آخرتها كما أنعمت عليكم في حياتها.. وحتما لم تمت تلك السيدة التي أنجبتك واخوتك.. أليس روحها وخلقها هي التي تحيون وتتعاملون..

لها الرحمة.. ولكي أم نسرين والخاتم ويسري وسرين كل التحايا بهذا العيد..

الحبيبة آمال..
رحم الله أمنا الكريمة وأسكنها مع الملائكة نفس السكن.. وهي الملاك الذي ارسله للأرض ليزرع ذرية صالحة كنتي منها ايتها الحبيبة..

Quote: ربنا يسهل خطواتكم ، ويبعد عنكم اولاد الحرام ، ويجعل البركة فى ذريتكم ، وراضية عنكم دنيا وآخرة ، وودعتكم لله الذى لا تضيع ودائعة، وخافوا الله فى كل خطوة تخطونها ، وارحموا الكبير والصغير.....

وصيتها لم تكن لكم انتم فقط..

رحمها الله وكرم روحها الطاهرة بنجاحاتكم واحترامكم للغير ولأنفسكم..

وكل سنة وانتي بخير يا أم وضاح.. وربنا يحفظو ليكم وتشوفو قدر الدنيا..
آآآميييين..

ملحوظة: قرأت الفاتحة لروح الوالدة الكريمة..

رجاء العزيزه التهانى لكل الامهات الموجودات... والرحمه قناطير مقنطرةو التى ينو العصبة ذوى القوة باحمالها تغشى من فقدنا منهن.

وتهانى كثيرة تصل لامى عشه بت البشير، وبمناسبة عيد الام وفى احدى اجازاتى للسودان اخوانى واخواتى فى البيت قالوا عايزين يعملوا مفاجأة لامى ويحتفلوا بها وانا بين نائم وصاحى سامعهم بتشاورو عن الحفلة والشيرنق .قامت اختى قالت ليهم لازم كلنا نشارك فى العيد ده حتى ولو كل واحد بى جنيه (ده ايام الجنيه كان لو نظر) قام اخوى قال ليهاياخى خلو المغترب ده يصحى ويدفع وانا عامل نائم.المهم عملو التقديرات من كيك وبيبسى والذى منو وقالو كل واجد يدفع كم ماعارف وصديق يتم الباقى. قام اخوى الصغير قال التقديرات دى كتيره وبعدين مافى داعى لى بالونات وزينة وشمع وبالمناسبة اختى عيد ميلادها بوافق 21مارس وهى عايز تستقل المناسبة وتضرب عصفورين بحجر.قام اخوى الصغيرقال ليها خلاص لما دايرين تجيبوا جاتوه ما فى داعى للطورطة،قامت اختى قالت ليه طيب الشمع ده نقزقزو فى الجاتو والا كيف قال ليها هسع فى الحنه بجيبو طورطه ما الشمع لما يسوح براهو يقيف،كل هذا وانا اسمع هذا النقاش الشفيف وعامل نائم. قالت ليهو يعنى نسوحو فى الصينيه والا شنو(طبعا هو ما داير يدفع زياده وهى مصره الحفله لازم شيرنق-مشاركة) المهم عاين ليها وقال ليها اصلوا كان الطورطة عشان تختوا فيها الشمع،كلموا امى تسوى ليها عصيده والا لقمة وختوا فيها شمعكم ده فانفجرت ضاحكا من النوم وهم بين مذهول ومندهش قامت اخلاص احتى قالت لى الولد ده جبار جبر. المهم تمت الحفله ديك.لكن بينى وبينكم عصيدة اماتنا ديك ما اطعم من اى طورطة عامله الشيف مجدى السيد.

ياحليل اماتنا الطاعمات ديك وكل عيد ام وامهاتنا بخير.

العزيزة رجاء
عبرك اهنئ كل امهاتنا و اتمنى ليهم مزيدا من التقدم و الصحة و العافية

الأحباب صديق ويمنى..
ربنا يخللي ليكم اماتكم ويقرب شوفتكم بيهن..
ياارب..

صديق.. طبعا انا متذكراك ومتذكرة أحلى صفحة في الخرطوم..
مرحب بيك تاني.. وحظو البورد والبورداب..

بوست قديم ذو صلة

أمي ..بكل لغات العالم


وربنا يحفظ كل امهات السودان
ويمتعهن بالصحة والعافية

رحـــم الــلــه امــي نعمه بت غندور اشتاق اليها كثيرا كانت حنينه واكرم ام في الدنيا معلمه جليله تؤمــن بالمثل البقول الجود ما بالموجود
ولكنه قطعا من الجلود .
الله يرحمك يا امي ويعطي الصحه والعافيه
لكل الامهات. شكرا عزيزتي رجاء وكل عام
وامك بخير انا عرفت انها فازت بجائزه الام
المثاله مره ربنا اديها العافيه.
هــــــــاديه.....

الحبيبة هادية..
رحم الله أمي نعمه بت غندور التي لم تمت وهي التي أنجبت أنبل الأبناء.. هادية، أسامة، هاشم.....

وكل عام وأنتي بألف خير يا أم داليا واخوانها.. وانا اعرف كم انتي ام رائعة بقدر ما انتي انسانة أروع..

وكل عام وكل أم بخير..

رجاء
كل سنه ووالدتك بألف خير
ربنا يحفظها ويخليها ليك ويخليك ليها.
وكل عام وكل أمهاتنا بصحه وعافيه
ويسعدهم ربنا دنيا وآخره.

الأحباء معتز والمرأة المبتسمة..

كل لحظة وامهتكم بألف عافية..

شكرا يا معتز للأغنية الحنينة الجميلة..
وللبوست المرفق الجميل..

وكل عام وامهاتنا بخير..

حنينة جدا
اتجنبها كثيرا فى الافراح لانها تبكينى امامى الناس تقبلنى كالطفل حتى اليوم فابكى
صدقونى اى واحد يقرب ليها من اولاد الحلة فى لمة تبوسو
الغريبة شايفانا لحدى هسى صغار
تعذبنى كثيرا بهذا القلب الاخضر ودائما اشعر اننى مقصر تجاهها
حينما كنت طفلا علمتنى احمد المصطفى وابوداؤود وعثمان حسين
وعلمتنى النعام ادم وادريس ابراهيم ومحمد احمد عوض
وكنت اسالها عن الفنانين الذين كنت لا اعرفهم فكانت تقول هذا صالح الضى وهذا محمد مسكين
ولما كنت القاها بتترنم بى غنية واقعد اشاغلها اقوليها تانى ما بترجعى البلد يمة. ترد على يا ولد انا كنت ساكنة فى قلب امدرمان بى جاى لى عبد الله خليل وبى هنا بيت الازهرى واحمد المصطفى كل يوم يجى يزور اختو جارتنا. انت كمان العرفك شنو بالغنا

اتعلم القراية براها بدون زول ما يعلمها وبقت تقرا مانشتات الجرائد
قبل ايام هى وابوى اتلموا على وسمعونى محاضرة عن قلبى الميت ولامونى على عدم زيارتى لفلان وعدم جيتى لعقد علان وفى النهاية قالوا انه دغالتى دى عمرى ما ح اخليها . وفى لومهم لى نسوا انى زول كبير وعندى اولاد وما فضل ليهم الا يقرصونى من اضانى الكبيرة دى

لو عاوزين تشوفوا صورتها اضغطوا هنا . وهى شايلة احمد . يا ربى حاقدر اربيهو زى ما ربتنى ؟
وياريت خالد ولا تمبس يصغرها شوية . يصغر الصورة مش يصغر امى
http://www.bayanit.com/upload/protected/100-0051_IMG_2.JPG

امى الله يسلمك .... يديك لى طول العمر ... فى الدنيا يوم ما يأالمك

نحى فى هذا اليوم امهاتنا ونسال الله ان يديم عليهم الصحه والعافيه

وان يتغمد بواسع رحمته اؤلئك الطاهرات ويجزل لهم الثواب


والعزيزه رجـــــــــــاء دوما خالص الود

الأحباء ود العجمي ومحمد موسى..

نعم هي الشخص الوحيد الذي نستطيع ان نبكي امامه وبصوت عالي دون ان نحس بحرج..
وهي الشخص الوحيد الذي يمكن ان تكون متأكد من حبه لك مدى الحياة..
وهي الشخص الوحيد الذي يرانا أطفالا مهما كبرنا..

التحية لأمهاتكم في عيدهن.. وأمل اللقاء القريب بهن..

وكل يوم وكل أم بخير..

الحبيبة الغالية رجوية
كلمات الهادى آدم
امى و يا لفؤادها من جنة كم ذا نعمت بها و كم ذا انعم
هى شمعة ولهى تذوب لكى ارى خطوى و فى رقصاتها اتقدم
الى كل امهاتنا الحنان اللاتى علمننا المنعة و الثبات امهاتنا ام رجاء و راوية و تماضر و جندرية بشلوخها الحنان وهالة و يمنى وسارة والندتان و لكل ام راعت الله فى تربيتها الف زهرة فى هذا اليوم حية كانت او غائبة

DEAR RAJA,

THGANKS AGAIN FOR THIS POST…

DEAR LANA,

THANKS FOR MOTHERS WHO GROW UP TO BE REAL MALE AND FEMALE..

الأخت رجاء الغالية
تحية و تقدير و معزة

و دائما و أبدا كل الأمهات بألف خير.
نتمنى لكل أم دوام العافية و الصحة لتربية أبناءهن و بناتهن.

و الرحمة للأمهات العظيمات اللائي قامن بأداء الرسالة و ذهبن للجنة التي هي تحت أقدامهن.
و الرحمة للأمهات اللائي ذهبن قبل أن يكتحلن مليا بفلذات أكبادهن ، يرفلن في الجنة ، تهيم أرواحهن بأجنحة كأجنحة الملائكة ترفرف على دروب فلذاتهن.

و التحية و القومة ليك يا رجاء.

امي الحبيبة
كل سنة وانتي بالف عافية
وايدكي الصحة
ويدوم لي في عمرك
واشوفك دائما ضاحكه بشوشه
ودعواتك لي ولاحباي واصدقاي
وربنا يدوم المحبه وازيل الغمة
وكل سنة وكل امهاتنا بالسودان بالف خير وسعادة
وشكرا ليك يارجاء يابت العباس للتذكير والله هموم الدنيا نستني كل جميل

الحبيبان أبو جهينة والنقابي الما عجوز..

كل لحظة وامهاتنا بألف عافية وصحة.. ورحم أولئك اللائي رحلن عنا وتركننا في هذه الدنيا بدون ذلك الحضن الدافي الذي لا يختلف عليه اثنان انه أجمل وأحن حضن..

وكل سنة وجميع الأمهات بألف خير

الحبيبة لنا والحبيب عبدالله (سنتي)

وكل لحظة وامهاتكم بخير وعافية..

شكرا عبدالله على التهاني الجميلة.. ربنا يخلي ليك امك.. وأم لنا، وكمان - Your Mother In law- المستقبلية ان شاء الله..

وكل عام وكل أم بخير

كل سنة و امهاتنا بالف خير


ما زلت اشتاق الى صدرك يا امي
مهماابعد يظل قلبك هو الاقرب

تسلمي يا رجاء و ربنا يخلي كل الامهات

اختى رجاء ...
كل سنة والام بخير وعافية

الحبيبة سلام والحبيب شريف..

كل لحظة وامهاتكم بخير.. وربنا يجمعكم بهن قريبا وترووا شوقكم هذا..

شريف.. لازم تعمل اتصال مدنكل هسسسع للوالدة.. نسيت هي عملت شنو في عيد ميلادك..؟

وكل سنة وامهاتنا جميعا بخير

..
.
يديك لى طول العمر
فى الدنيا يوم ما يألمك
امى الله يسلمك ...

كل عام وامى فاطمة و( دومه ) وامك وامهاتهم بالف خير
وليرحم الموتي منهن ويسكنهم فسيح رضوانه ..

دمت يا رجاء
مع صادق المودة والشكر ،،

رجاء ..
كل سنة وشوقي بخير لي امي الحبيبة ..
وكل لحظة وامهاتنا بخير .. وربنا يخلي ليك ست الحبايب

الأحباء تبلدينا وتمبو

كل لحظة وامهاتكما بألف عافية..

وكل سنة وامهاتنا جميعا بخير

احى كل الامهات
و اخص الام الجميلة سكينة الكارب
و ادعو لها بالصحة و العافية
و الاشواق ما ليها حدود
التحية لكى يا امى فى عيدك و لكى كل الياسمين و ما تشتهين

العزيزة رجـــــــــاء

كل سنة وأنتي طيبة وجميع أمهاتنا بألف خير ..

أمي .. يا يمه ..
رسلي لي عفوك ..
ينجيني من جور الزمان ..

عبرك ..
إلى .. أمـــــــــي

أمي .. أمي
أمي .. يا اجمل كلمة بقولها .. يا احلى نشيد .. يا نغمة جديدة
لا زلنا نرددها كالاطفال ..
بمثلما نحن حتي الآن اطفالا في عيون امهاتنا ..
..
في بؤبؤ الرؤيا وانسان العين ..
في سويداء القلب ..
في العقدة ومجامع الروح ..
امهاتنا ..

والتحية ليك يا رجاء

صلاح / شتات

الأحباء أسامة ومعتصم..

كل يوم وامهاتنا العظيمات بخير..

يا اسامة.. التحية لكل امهاتي واخواتي بنات الكارب..
وأم خلودي كمان..

وكل سنة وامهاتنا جميعا بخير

أمي
يا أجمل بقوله يا أحلى نشيد
يا نغمة جميلة

كل فجر يولد هو عيدك أمي

يديك لي طووول العمر في الدنيا يوم ما يألمك ...الله يسلمك أمي

رجاء الجميلة
لك التحية وانت تذكرينا بمثل هذه المناسبات
أم كبسيبة بتسلم عليك

رجاء كل سنة وانت طيب وكل ام وهى طيبة
شكرا ليك لتذكيرنا بامهاتنا
وتسلمى ياغالية

اماه الا تسمعين صوت القاطرة
وزغاريد نساء بعودة حبيب
من زمان غابرة
اماه كل الناس سافرت
والبقية منتظرة
حتى الطيور قد عانقت
فى اعلى النخيل الثمرة
والماء فى جدول نمير
سقى شجيرات مزهرة
والليل قد اسدل ستورة
مع وداع شمس فاترة


ولقد مللت من وداع
ذاك مسافر وتلك مغادرة
تركونى وحدى بلا انيس
بين الوحوش الكاسرة
بين الهنود اصل الجمود
وهذه الجموع المتكاسرة
كرهت الشوارع والسنمات
حتى المقاهى فى الليالى العامرة
واكل الدوسة والسمبوسة
ولبس الخوذة وصوت الموترا
اماه ما كنت يوماكافرة
وما كنت لحقك ناكرة
ياصالة بابكارة
ياقصيدة محيرة
بس العنده وصيةلامه
خليك سريع ما تاخرة
انا خلاص زهجت ومسافرة لامى
بالطائرة
بس فى حاجة واحدة مؤخرانى
انى راجى التذكرة

الصديق الغالي أحمد صديق..
كل يوم والوالدة بألف خير..

وكل عام وامهاتنا جميعا بعافية وسعادة..

الأحباء صلاح شتات وكبسيبة الوسيم..
وكل لحظة وامهاتكم بخير.. وربنا يقرب شوفتكم بيهن..

كبسيبة.. تحياتي لأم كبسيبة وأخت كبسيبة وكل نون النسوة في حياة كبسيبة..

وكل سنة وامهاتنا جميعا بخير

الغالية رجاء
لوالدتك الكريمة الصحة والعافية وطول العمر
ولكل أمهات السودان -اللاتى كن فى معظم الأوقات أمهات وآباء -لهن المجد والألق ومن المحبة الكثير .
أمهاتنا عانين من أجلنا وحملن همناالى أن كبرنا ثم حملن هم أبناءنا من بعدنافأى تجرد هذا وأى صبر هذا وأى عطاء هذا؟
كل عام وكل يوم وأمهات السودان جبال صبر وقمم جمال, كل عام وهن لنا فخار ووقار وفوتتن والله مابتندار.

hello sister raja

happy eid to our great mothers in sudan

that was very nice from you



ali

عيد الام!
وهل كل الايام ليست اعياد للام؟
نعم انها اعياد للامومه.في الدول الغربيه ونسبه لبعد الرابط الاسري بين الناس وكثره المشغوليات من دوامه العمل الرتيبه, تجد الفرد لايلتقي بوالدته لمده تطول وتقصر( في عطلات الاسبوع او عطلات راس السنه) فلذا افتعلوا هذه المناسبه لكي تجبرهم علي التفكر بامهاتهم. اما نحن كسودانين بمختلف معتقداتنا فلايهون علينا سدل الستار عن يوم واحد, من دون ان نتذكر امهاتنا هذا اذا كنا بعيدين عنهن اما اذا كنا بالقرب فنحن معيدبن وبكل لحظاتنا معهن.

الأحباب sinco وعلي ومحمد آدم..
كل يوم وأمهاتكن بأالف عافية..

محمد آدم.. مالك تكره الأعياد يا رجل..

وكل سنة وامهاتنا جميعا بخير

الاخت راجا
اطيب التحايا...
لا والله, بالعكس احب الاعياد اوي.
ولكن حبي للام زايد كثير.
رجاءا يااختنا رجاء ان لاتفهميني خطا وانما قصدت ان افرق بين عيدنا بيوم الام عن النمط الغربي لاغير.
دا نحن كل مايطل علينا فجر يوم جديد يكون عيد للامومه.
مع وافر الموده لامهاتنا في كل مكان.
ولكي عزيزتي اطيب الامنيات.