( التعبانين بكل المقاييس كما ذكرتي من غربةبكل معانيها
اولا وتعليم واولاد واهل داخل السودان ينقصهم الكثير)
والذين من المفترض يكونوا اناس مريحين
ما تسمعي الكلام ده ساكت قال ما نحن عايشين قال
طيب مالك مكشر ؟؟؟؟؟؟؟؟؟؟؟
ده مقص خلي براه الكلام فيه ما بكمل وده في كل المعاملات
الزله والاهانة البلاقيها المغترب في وسط بلدة
في جهاز المغتربين ما بلاقيها في غربته وسط
الاغراب ده مقص من سنين ،،، فرحنا بعد ما عملوا حاجة
اسمها جهاز المغتربين ولكن كان هذا الجهاز ليذيد
الطين بله ونتازم اكثر ،،،
والمغترب يعامل في كل مكان بالاسلوب نفسه
وباستنزاف مبالغ فية كانه هو في بلاد الغربة
بخم في الفلوس خم ،،،
اورنيــك 3 / أ
( يقرأ أورنيك تلاته ألف )
استفذاني الخريف بجوه الرائع في السودان والخير الدافق وما لذ وطاب من الخضرة والفاكهة بأنواعها ، الخيار ، الجرجير ، الخس ، النعناع ، الطماطم الحمرة بنكهتها الشهية ، التفاح الاخضر ، التفاح الأحمر ، العنب ، الجوافة ، المانجو بأنواعه ، الكمثرى ، البرتقال بأنواعه ، الموز ، القريب فروت ، ... الخ . وجود هذا الخير في كل شبر من الشارع بالإضافة إلى توفر أماكن الوجبات في أي وقت وبشكل نظيف وراقي ومذاق طازج اللحوم ، الاسماك شيء في غاية الروعة .. أماكن الترفيه وقضاء الوقت في هدوء وفوق كل هذا حميمية الناس وطيبتهم وظرافتهم كل هذة الاشياء مجتمعة استفذتني وجعلتني أفكر في أن أكون متواجدة بصورة دائمة و لا افارق هذا الوطن الحبيب الجميل المعطاء وأعوض سنين الغربة العصيبة القاتله بكل ما تحمل من مآسي وحزن وآلم ونجدد خلايا اجسامنا بما النيل الحلوة التي شربنا منها حتى الثمالة وكذلك بهذة الخضر والفاكهة واللحوم والاسماك الطازجة بعد أن جفت احشائنا بالمجمدات والخضروات والفاكهة ذات الاسمدة الكيميائية والمياة المحلاة بالكلور نسيت شيءاً مهماً طعم الشاي ) شاي ماء النيل العذب ياله من شاي .. أشياء كثيرة لا استطيع حصرها كلها مجتمعة جعلتني أفكر في البقاء أو العودة للوطن والاستقرار فيه .. البيت .. تذكرت أن لنا بيت لم يكتمل فلا بد من الشروع الجاد في هذه الخطوة وبالفعل بدأت وكانت أول خطوة هي تجديد معلومات الأرض والبيت بعد هذة الفترة الطويلة خمسة سنوات خارج الوطن وكان اعتقادي اننا نمتلك أرض بوطننا ومن حقنا ولا يحق لأحد أخذها مهما كان لكن للأسف وجدت أنه لابد من أن أبدأ من الصفر في اثبات ملكية الأرض وبدأ مشوار المعاناة حولت من محكمة الاراضي إلى تخطيط القرى في اثبات الملكية وكل يوم تعالي اليوم الثاني للأعذار المعتادة :- - الموظفة ما جاءت اليوم . - المطر لذلك ما جاء الموظفين - شيخ الحلة الشاهد ما جاء في حين أنه اكدوا لي أمس اجي اليوم لأن الشيخ مؤكد موجود في مثل هذا الوقت واكدو على أن لا اتأخر وبالفعل جيت في الزمن المحدد ولكن لم أجد الشيخ وآخير اتضح أنه يجلس في محل اتصالات خارج المبنى ذهبت له في ذاك المكان وترجيتة للحضور وبعد حضورة وتوقيعه كان لابد من تسديد رسوم ، لكن الخزنة قفلت بسبب تأخيرهم لي .. طيب كان تقولو من الأول عشان نسدد قبل الخزنة ما تقفل وتأخرهم لي بالاعذار الكثيرة والموظف جاء متأخر وعلى بال ما سجل المعاملة ذهب الموظفين للفطور وعلى بال ما رجعوا واسترجعنا المعاملة من الموظف والتي حدد فيها القيمة المفترض تدفع .. الخزنة قفلت على أن تعاود في وقت آخر أي بعد يومين لان الخزنة تكون يوم الأحد ويوم الاربعاء فقط ولسوء الحظ نحن كنا في يوم الاثنين ولكن يوم السبت والاحد كنا متواجدين بالمبنى ولا يوجد ما يشير لذلك من اعلان على شباك الخزنة ولا برشور أو مطوية أو نشرة ولا حتى أحد الموظفين ونحن نجري المعاملة ذكر شيء من هذا القبيل . المهم بعدها إلى الشئون الهندسية مع ملاحظة ان هذه المسميات جميعها بعيدة عن بعضها : - محكمة الأراضي - تخطيط القرى - الشئون الهندسية وكل واحدة مبنى كبير يحوي مجموعة من المكاتب وبالتالي مجموعة من الموظفين الجالسين من غير عمل فقط يستفذوا في الناس وبالتالي الرواتب المصروفة من مال الدولة وهو المال العام .. يعني لو في مبنى محكمة الاراضي وضعو مكتب يحوي موظفين أو ثلاثة للقيام بمهام مبنى تخطيط القرى وكذلك مكتب آخر بنفس المواصفات للقيام بمهام الشئون الهندسية كانو وفروا على الدولة ووفرو على المواطنين كل هذا التعب والوقت والمواصلات لانه غير الرسوم ذات المسميات المختلفة كذلك تدفع مواصلات للتواصل بين هذه الجهات التي تتطلب منك التعامل اللحظي معها. نرجع لاورنيك 3/أ بعض المواطنين لا يعرفون حتى هذا المسمى في الآخر بعد ما وجدنا من يدلنا قال بس اليوم يوم إداري الموظف المعاه ما موجود سالت ما معنى يوم إداري قالوا اليوم الخميس والدوام بنتهي الساعة 10 صباحاً يعني تجي يوم السبت طبعاً في خضم التأجيلات أجلت أنا كمان سفري واتصلت على مكان عملي كذلك واعتذرت ودي ما في صالحي لكن لازم كمان اضمن حقي في وطني والباقي ملحوق طالما الوضع مخيف لهذة الدرجة المهم جيت السبت لأخذ ارونيك 3/أ بكل بساطة استلمت الاورنيك من موظف وكمان جاءت موظفة جايبة واحد يعني قدم لي من اثنين في وقت واحد استغربت أنا من يوم الخميس في انتظار اورنيك 3/أ سالت بس كدة قالو بس كدة ترجعي محكمة الاراضي ... سألت مرة أخرى مافي رسوم مافي ختم مافي أي شيء ؟؟ قالوا لا طيب دة مجرد اورنيك مصور كمان وليس أصل يعني فيها شنو لو وضعت منه كمية في محكمة الأراضي عشان يكون في المتناول .. المهم بعدها اردف الموظف وقال يملاء الاورنيك محامي وبعدها تذهبي إلى محكمة الأراضي .. سألته بيانات الاورنيك عادية لازم يملاها محامي ؟؟ قال لا ده إذا عاوزين !!! المهم ذهبنا وملأنا الاورنيك بنفسنا واكمله قاضي محكمة الاراضي الاستاذ عباس ذاك الرجل المرابط المكافح الذي يحمل في دواخله أصالة البلد ونقاء وصفاء بلا حدود وقف بجانبي كثيراً وساعدني كثيراً ختم الاورنيك ووقع وصادق على صحته وقال لي ارجعي الشئون الهندسية وكان الزمن يتناقص وبالفعل رجعت الشئون الهندسية وكان يوم الاحد وبعد مقابلة المدير حسب توجيهاتهم مجرد كتب على الاورنيك ( الموظفة مهــا ) ذهبت إلى مها وفكرت أن مها خلاص نهاية المطاف ولكن كانت بداية حلقة جديدة حيث طلبت احضار افادة من تخطيط القرى وكذلك جلب الملف من غرفة الملفات وبعد الانتظار الطويل بالملفات قالوا الملف ما وصل من تخطيط القرى تأخذوا ورقة طلب ملف من مها وتذهبوا إلى تخطيط القرى لجلب الملف ، المجبور يركب الصعب ، يعني إذا عمل اليوم باليوم بينفـذ كان الملف يكون موجود خاصة وأن المباني بعيدة عن بعض كما ذكرت ، ذهبت سريعاً إلى مها وأخذت ورقة طلب الملف والتحرك السريع إلى تخطيط القرى بعد الحاح كثير وترجي طلع الملف ولكن الافادة لاستلامها لابد من تسديد رسوم ولكن الخزنة قفلت وتفتح يوم الاربعاء لان الأحد خلاص قفلت يعني حالة لا يعلم بها إلا الله .. بعد حيرة شديدة والحل يا جماعة قلت لهم اخذو الفلوس العاوزنها بس تأخر يوم ما من صالحنا ولكن لا حياة لمن تنادي بس فصاحة الموظفات ( المغتربين ديل دائماً عاملين لينا ازعاج ونحن عندنا نظام ماشين عليه ) تسمع كلمة نظام دي تقولوا حا يتقطعو نظام وناسية انها جاية متأخرة وأول أمس غائبة عديل طبعاً أنا على اعصابي عشان لو قلت حاجة ممكن حاجاتي دي ما تتعمل خالص ويضيع الحلم والعودة للوطن مافي غير اتحمل واصعب حاجة تتحمل وانت في قعر دارك أما في الغربة اهو بنقول البلد ما بلدنا ودي بلدهم من حقهم يشرطو لكن انت في بلدك ويسمونك مغترب وتجلب المشاكل كمان ناسين نحن بنجلب العمله الصعبة على حساب حاجات كثيرة تمسنا وتمس اولادنا وعلى حساب ابسط شيء بعيدين عن وطنا .. الله المستعان .. المهم آخر شيء كان الحل الذهاب إلى تخطيط الاسكان لتكتمل دائرة المسميات لتزداد اماكن الجبايات بمسميات غير مبررة وهذا موقعه جوار الاستاد وجامعة السودان وعشان نصل هذا الموقع من الكلاكلة اللفة عاوز زمن وممكن تكون الخزنة كمان قفلت حسبناها كدة قلنا الصباح افضل وبالفعل تم السداد بذاك المكان والعودة بالسند لتخطيط القرى والموظفة الكانت بتتكلم ما جاءت وتأخرت وبعد تعب ملاء فورم الافادة المهندس المساح يعني دي ما شغلته لكن لتأخرها اشتغل شغلها .. المهم بعدها ذهبت الشئون الهندسية وعشان نجري بقية الاجراءات لابد من جلب الملف من الملفات وفي تقديريرنا دي ما حا تأخذ زمن لان الملف من امس نحن جبناه بنفسنا .. ولكن مثل كل مرة بدأ الموال من جديد حيث انهم لم يعترفو بإعتماد اورنيك 3/أ من الاستاذ عباس قاضي محكمة الاراضي اوقفت المعاملة ما كان مني الا الرجوع إلى الاستاذ عباس بمحكمة الاراضي وذكر الاستاذ عباس أن هذة الاوراق صحيحة وقانونية والا ما كنت اعتمدتها ووقعتها وختمتها وعلى مسؤليتي لماذ لا يقبلونها وأصر على أنه لا توجد أي اضافات وقال إذا في شيء يوجهون خطاب رسمي .. وبالفعل رجعت للشئون الهندسية وطلبت منهم كتابة خطاب رسمي لقاضي محكمة الاراضي حتى يتمكن من الرد لان هذة الاوراق قانونية ولا يرى أي نقص بها .. كتب الخطاب وطبع ووقع واخذت الخطاب ورجعت محكمة الاراضي وطبعوا الرد على الخطاب وقفلوا الشباك للفطور وفتحوا الشباك واخذت الخطاب ورجعت الشئون الهندسية وإذا بالموظفة بكل برود تقول يادوب فهمنا شغلكم دة ) هي إذا قالت من الأول كنا فهمناها ليهو نحن الما شغلنا فهمناه وبعدين في الاخر اتضح أن الشغل من أمس وهم مطلعين عليه .. المهم كانت سيرة عشان يعتمد اورنيك 3 / أ وفي الآخر دفع فلوس كثيرة وتفاصيلها شيء غريب طبعاً يسلمون سند صغير فية اجمالي المبلغ والتفاصيل يقولو للملف.. من التفاصيل ما لمحته بند صندوق دعم الطلاب سكت وضحكت في نفسي اقول شنو عليكم الله .. رقم حلاوة الوطن الناس قرفانه حياته لانه عرفت بعدين في اورنيك 14 و 15 وغيرها من الارقام حمد الله انا كان اورنيكي رقم 3 لاني اتوقع كل ما كبر الرقم كثرة مشاكلة وتعقيداته .. بقدر حبي للوطن قلت يا ربي خارجني عشان ما اكرهة ..
12-11-2006, 09:21 AM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
الاخت عواطف شكرا لك البوست بتاعك دا وقع لي فوق جرح.. اصلي (مضروبة) من غير عمل.. شاء حظي العاثر ان ادخل ضريبة المغتربين وانا العاطلة عن العمل (المدر للدخل).. ذنبي انني احتفظت بالمهنة في الجواز ولم اغيرها الى ربة منزل.. ثم اضطرتني الضرائب التي دخلتها من اوسع ابوابها الى تغيير المهنة الى ربة منزل بعد خمسة سنوات وبعد ان تراكمت ضرائب مبلغ الثلاثمائة ريال التي اعترفت بانني قبضتها لزوم تدريس بنت الجيران الى ، 667 ريال .. تصوروا 300 اكرامية تحولت ضريبتها بقدرة قادر الى 667 والمغالطني الورق بحوزتي.. الرابط التالي يحكي قصة مقلبي مع جهاز المغتربين.
الأخت عواطف بالنسبة للموظفين بالجهاز المهنة وسيلة ابتزاز واسترزاق رخيص الكل يسعى بكل الوسائل للعودة لمنزله بما كسب رزق اليوم باليوم ، وليتك عرفتي كيف يتم إنتداب موظفي الجهاز من مختلف الإدارات الحكومية (الشرطة الضرائب الزكاة الجيش ألخ) بالنسبة للحكومة الرشيدة جهاز المغتربين ورئيسه (رضى الله عنه) الأداء العام محل رضى وقبول وتقدير كمان ، فلوس تأتي بالعملة الصعبة بوسائل قذرة من شريحة هي أحوج للدعم المادي والمعنوي ، وفلوس وتصرف بطرق شيطانية لا يعرفها أحد ، الحكومة (مطنشة) والمغتربين منقسمين فئة مستسلمة ترغب في مواصلة مشوار الغربة رغم مرارته بالخارج والداخل ، وفئة قليلة يعترضون ويمتعضون من تصرفات منسوبي الجهاز أولا ، ومن النهب المصلح ثانيا ، لا بد من توحيد الصف ودعم مشروع إقامة الدعوى الدستورية ضد هذه القوانين الظالمة التي وضعها الموتمر الوطني منفردا ،،، ولكم تقديرينا أخوكم الشفيع إبراهيم
هذا الجهاز لافائدة ترجى منه وقد طالبنا في هذا الموقع بحله . ماذا قدم هذا الجهاز للمغتربين منذ تأسيسه فدوره المناط به هو حماية المغترب وتقديم كافة التسهيلات له في الاجازات وفي الخروج النهائي الا انه وللاسف الشديد تحول الى غول يقضى على الاخضر واليابس ان كان هناك اخضر في حياة المغتربين وحول اجازاتهم السنوية الا جحيم ونكد وجعل نوم بعضهم خزاز وهم يهمون للتوجه لعمـــل التاشيرة ..
ساعة الفطور يجب الغاؤها والاكتفاء بسندوتشات يتناولونها اثناء العمل خاصة وان الفلوس منهمرة عليهم كالمطر ..
صادف ان تناولت افطاري بمطعم المغتربين فقد اكتفيت بطلب فول سادة مع بارد وبالقرب من تربيزتي تجلس موظفتين وما شاء الله تبارك الله اللحوم والعصائر وما لذ وطاب من المأكولات .وحينها فكــــرت بترك الاغتراب والتوظف في جهاز المغتربين ...
ود الباوقة
12-12-2006, 01:48 AM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
ذهبت الى الوطن في شهر يونيو 2006 وعندما عدت دفعتني المرارة التي شعرت بها الى كتابة مذكراتي وكانت بعنوان حكايات من الوطن... حكاياتي طالت كل شئ .. لكن ساكتفي بمشاركتك ما كتبته عن ديوان شئون السودانيين العالمين بالخارج ...
البعبع ... الغول ... العاو ... انها مترادفات ديوان الضرائب
كل مقيم خارج السودان ما ان تطا قدماه ارض الوطن حتى يبدا التفكير في المواجهة الحتمية بينه وبين قاطني ذلك المبنى الكريه الواقع في امتداد الدرجة الثالثة .. ( الديوان ) حسب الاصطلاح المتعارف عليه بين موظفيه مكان تسلب فيه اموالك بدعوى دفع ضريبة الانتماء للسودان ... في اي دولة في العالم عندما يدفع المواطن اي ضريبة يتوقع ان يجد مقابلها خدمة توازي قيمة ما دفعه ... الا نحن ... ندفع ضريبة بلا مقابل ... ما هي الخدمات التي تقدم لنا ؟؟؟ القناة الفضائية ؟؟ يا لها من قناة !!! ... انا اقيم في بلد بها سفارة وقنصلية ... تقتصر علاقتي بالقنصلية او رؤية مبناها كل سنتين لتجديد جواز السفر .. وهذه ايضا مسالة اخرى ... لماذا يجدد الجواز كل عامين ؟؟؟ لماذا لا تكون خمس او عشر سنوات شاننا شان بقية خلق الله ؟؟؟ معظم الدول تطبق نظام الخمس او عشر سنوات ... وبعض الدول يتم التجديد بعد عشرون عاماً ... ( يعني احنا لازم نكون شتر في كل شئ ؟؟)... ام هي وسيلة تم ابتداعها لضمان تسديد الضرائب ( لا تجديد بلا تسديد ) شعار جميل يجب ان يكتب على لافتة ضخمة توضع امام مبنى القنصلية بدبي او السفارة في ابوظبي ..حتى يقضى على آمال الطامحين الطامعين في التهرب من الدفع الاجباري ... اعذروني على تداخل الامور .. برغم الغاء الضريبة منذ العام 2005م .. الا ان موظفي الديوان لم يعدموا الوسيلة لممارسة كل انواع التعذيب على هذا المخلوق الذي تمرد على رغد العيش في وطنه وخرج منها بمحض ارادته تاركاً خلفه عبّ الجهاد ... رافضاً الاستشهاد من اجل القضية المقدسة ( الوحدة الوهمية في وطن تفنن اهله في ابتداع اسباب الانفصال ) ...هذا الغبي الذي عاد بجيوب محملة بالمال يجب ان يخضع لنظام ( البدل ) يدفع بدلا عن ان يحارب ... عليك ان تقضي نصف اليوم وانت تتجول بين الشبابيك الصغيرة ( ضرائب ) لتسوية ما تبقى عليك قبل القرار الكريم بالالغاء ... ( زكاة ) حيث يطالبك الموظف المختص بان تؤدي القسم على صحة قيمة الراتب الذي ذكرته ( الامر الذي جعل العديد يقسمون على المصحف كذباً )... ثم ( المساهمة ) وقد اجتهدت كثيراً حتى اصل الى معنى كلمة المساهمة ... فيما اساهم ؟؟؟ وظل السؤال الحائر بلا اجابة ... انقطعت الكهرباء ... توقفت الكمبيوترات عن العمل ... دقائق قليلة وتم تشغيل المولد ... عادت الضجة التي تصاحب استلاب الاموال من نفوس غير راغبة باعطائها ... انتهى اليوم ... الساعة الثانية ظهراً ... خرجت ظافرة وانا احمل جوازي ملحق به ورقة صغيرة ( تاشيرة الخروج ) بعد ان دفعت ثمنها غالياً ... وما زلت اهمس بافكاري لنفسي خوفاً من يسمعها احدهم فيكون مصيري اسود من لون شعري ...
آهـ يا وطن باع ابتسامته بالرخيص ... اهله جاعوا ... شردوا .. ضاعوا ... في كل مرفأ وكل زاوية تلقى انسان كان زمان اصلو سوداني ... محتاج يبيع حلمه وجوازه عشان يعيش ... ما هم سدوا عليه الدروب ... اكلوا حقه .. وقالوا يكفيه النفس طالع ونازل .. خلوه يختار ذلة البلد البعيدة ولا المهانة في ارض قبيل كانت وطن ...
آهـ يا وطن الهوايل والمحن ... قتلوا الوليدات العودهم اخضر وقالوا الجهاد .. ووهمونا بانوا الملائكة اتنزلت شان تحش بصل الجهاد ... وبعد شوية افتوا قالوا دة ما جهاد ... يا الله بس كيف الحساب ؟؟ هو كان جهاد ولا ما جهاد ؟؟
آهـ يا وطن تاريخه شاهد على غباوته ... حكامه نهبوا كل حلاوته .. وخلوا لينا بس مرارته ... مش كفاية ولا كيف ؟؟
آهـ يا وطن اصبح فضيحة .. وريحته فايحة بالحكاوي القاتمة واشباه البشر ...
آهـ يا وطن مليان وجع وناقص شبع ... الله يكشف غمتك ... ويزيل بلاك ... ويصبرك على ما ابتلاك...
وآآآآآهـ يا وطن ...
12-12-2006, 02:24 AM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
يا أختي والله إنتي بتنفخي في قربة مقدودة .. الجهاز ده متعارف علي تسميته بين المغتربين ( جهاز تشليح العاملين بالخارج).. وإنت في دي، أنا كانت عودتي الثانية بعد عشرين سنة غربة ولما دفعت كل الجبايات مشيت للجوازات عشان التأشيرة أنقري ما لقوني مطلوب وهارب من قضية قتل وإني كتلت واحد السنة الفاتت في كوستي!!!.. أنا زيك قررت أنو سفراتي وبقائي لا يزيد عن (10) أيام بس عشان أقابل أهلي وأصحابي ودي مديها (3) أيام والإسبوع الباقي طبعاً عشان الإجراءآت !!.. والله يا عواطف الجاتك في مالك سامحتك .. هو إنتي ما قالوليك إنهم لغوا التأشيرة والضرائب والجبايات؟ أوعى يكون إلتفوا عليها دهاقنة الإبداع؟ .. وبعدين في سؤال آخر: ماهو المبرر لأن تكون صلاحية الجواز سنتين؟ هل نحن لاجئين تصرف لهم وثيقة من الأمم المتحدة أم دولة ذات سيادة وليها دستور يكفل حق المواطن في التنقل بحرية!!!! بعدين شنو السودانيين الكلهم مولودين في واحد يناير.. يا أخوانا حتى الذين تمّ تسنينهم حقوا يخلو تاريخ التسنين ده يكون هو يوم الميلاد .. والله بقينا مادة للتندر في مطارات الدنيا مرة في مطار هوشي منه في هانوي ضحك علي ضابط الجوازات وقال ما معناه أن من عجائب الدنياأن معظم السودانيين اتولدوا في يوم 1 /1 وكلهم ذكور وياريت لو نقدر نوريهم السر عشان يحسبوها ليتوافق تناسلهم بحسب الأبراج الصينية حتى يرزقوا بالذكور.. حمدالله على السلامة .. وبختك رجعتي سليمة ودي براها سلامة تستحق كرامة والحمدلله ما قالوا إنتي آمنة مرت الدكتور الكسرت راسو بالساطور سنة كم وستين في مدني !! يعني كمان دفعتِِ ثمن أغلى تأشيرة لخروج لمواطن من بلده ( 351000 ) ثلثمائة واحد وخمسين ألف جنيه .. والله حقو كيتن فينا حقوا يعملوا لينا كمان تأشيرة دخول للوطن زينا زي الأجانب طالما نحن نحمل وثيقة لمدة سنتين ( آسف جواز سفر) مساهمة في تحسين خدمات إنهاء إجراءآت المغتربين!!. وبعدين سمعنا من خمسة سنين قالوا حيغيروا جوازات السفر وكان ناقص التمويل وسمعنا إنهم وجدوا شركة تقنية إماراتية .. يعني حيخصخصوا طباعة الجوازات كمان والله دي ما سبقتم عليها دولة.. ديل فاتوا الكبار والقدرهم!! ابوبكر
الاخت / عواطف اي منا له حكايات مع جهاز المغتربين تبدأ من اول اجازة .... وتندمك على الاجازة انا قولت الناس ديل اتحاشاهم المرة ده (
Quote: جهاز تشليح المغتربين
) وبحكم اني تركت الخليج وجيت امريكا( لوترابي ) فقدرت استخرج وثيقة سفر وقولت في نفسي ده هي المخرج من الشباب ديل . وفعلا دخلت وفي المطار وقفت ليك مع الاجانب زي الما فيها حاجة والله مش وثيقة سفر بس لكن كنت خجلان من نفسي وشايف المطار ده كلو بعاين لي ... المهم لحسن الحظ وبامانة الموظف القابلني كان محترم جدا معاي وقال لي مرحب بيك في بلدك الثاني السودان . .... المهم دخلت البلد ونسيت ليك قصة الاجانب واني انا داخل البلد بوثيقة سفر واعتبر مع الاجانب وقضيت اجازة سعيدة جدا بالسودان وكلما اتذكر اني ما حا امشي لـ
Quote: جهاز تشليح المغتربين
اتكيف زيادة . وانتهت الشهرين وذهبت السكرة واتت الفكرة وجاء موعد السفر ومجموعة من الاهل والصحاب معاي الى المطار للوداع كعادة الناس كلها هناك وبعد وداع الناس كلهم وعمل ما يلزم للسفر من دفع رسوم المغادرة 55000 ج س طبعا هنا ذكروني اني اجنبي ولذلك دفعت مبلغ الخمسة وخمسين الف جنيه وقولت خيرين الجاتك في المغادرة سامحتك ..... الفيلم الهندي هنا.... مريت من الامن بكل سلام ومتوجه على موظف الجوازات وهنا كانت المفاجاة ... وسالتني الملازم اول شرطة انت ما سجلت عند الاجانب ؟؟؟؟ رديت عليها بسوال وده وين كمان ؟؟؟ قالت لي ارجع وامشي قابل سعادة العقيد فلان قولت ليها لكن الطيارة حا تفوتني قالت امشي سريع عشان ما تفوتك واكسب زمنك وهنا كان لا بد من الذي لا بد منه وهو الامتثال لاوامر تلك الملازماية ( ان صح تأنيث الرتبة ) ورجعت للصالة التي اتيت منها ابحث عن العقيد ووجدت واحد من جنود الصف ولكنه تحدث معي حديث العارف ببواطن الامور واحسست من خلال حديثه معي انه من اسن تلك القوانين والخلاصة من حديثه قال لي يا ابن العم اتوكل وامشي سجل وادفع الغرامة وتعال لينا هنا تاني بعد داك لانو مافي طريقة للقصة ده تتم اليوم . لكن انا اصريت اقابل سعادتو والمهم مع لخمة كده دخلت المكتب المكندش ولاقيت سعادتو وبديت اشرح ليهو قصتي من الالف للياء واثناء انا بتكلم معاهو اتصل عليهو واحد وطالت المكالمة وانا اعصابي تتوتر اكتر واكتر لكن فكرت في الموضوع بنظرة تفاؤليه وبديت استمع للمكالمة وقدرت اطلع منها بي معلومان كتيرة عن سعادتو واول ما انتهى من المكالمة سالتو انت من اولاد الجزيرة قال لي ااااي وطوالي اديتو السوال التاني من ناس مدني وجاوب بي نعم وهنا وقع معاي في الفخ وبديت اسالو من ناس مدني الانا بعرفهم البقول بعرفو بقول ليهو ود عمي او ود خالي او ود خالتي واثناء هذه الدردشة السودانية العادية عفاني من الغرامة وبس قال لي ادفع رسوم التسجيل وكانت 83000 ج س وحصل طيارتك وبحمدلله حصلت الطيارة ولسه ما عارفين المرة الجاية نمشي السودان كيف
بتتدبر انشالله
12-12-2006, 06:06 AM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
هؤلاء الوسخين يربطون للمغتربين عند قدومهم للبلاد و لايعطونهم تأشيرة الخروج حتي يدفعو الاتاوة المفروضة من السفلة.كذلك يربطون لهم في السفارات السودانية عند تجديد الجواز.
و رغم ان ضرائب المغتربين مفروضة من قبل استيلاء الكيزان المشؤومين علي السلطة الا انهم ادخلوا عليها من التعديلات ما جعلها جزء هام من الةالنهب الكيزانية الجهنمية. و الادهي و الاَمر انهم استخدموا فيها المتاجرة بالدين و الوطنية ابتداء من تسميتها بالمساهمة الوطنية و الزكاة الموجهة في غير مصارفها و انتهاءاً بحليفة المصحف. اضف الي ما تقدم اذلال المغترب و قهره مستخدمين في ذلك عدد من شذَاذ الافاق و المشوهين نفسياٍ و اجتماعياً.
و ليت الامر يقف علي المغتربين فهؤلاء الكيزان المخانيس تفننوا في الاجرام بدأً من مطاردة ستات الشاي و بتاعين الاورنيش وا قتناص اللقمة من افواههم الي غسيل الاموال و غيره.
هؤلاء هم الطفيلية و البلطجة في ابشع صورها لا يفوقهم في ذلك لا فيروس الايدز و لا طاعون القرون الوسطي.
12-12-2006, 05:12 AM
فاروق حامد محمد فاروق حامد محمد
تاريخ التسجيل: 08-07-2006
مجموع المشاركات: 4648
يبدو ان موضوع جهاز المغتربين وجد هوى في نفسي، لذا عدت مرة اخرى.. متابعة لقصتي مع الجهاز..إليكم تداعيات الموقف... وقفت العام الماضي، أمام تأشيرة المغتربين هذه المرة وقد عقدت العزم علي عدم دفع مليم واحد في ضريبة الـ300 ريال التي فرضت علي قسراً وكانت فاتحة خير في معرفتي بكم.. وجدت لدهشتي الشديدة ان الـ 300 ريال قد ولدت لها "إخيَّة" جديدة. إذ صار المبلغ المطلوب دفعه 675 ريال بالتمام والكمال.. والمغالطني.. الورق بحوزتي.. ذهبت الي نفس الموظف الذي وضعني في المقلب خاصة وان الموظفة لم تعيرني انتباهاً..لحسن الحظ الرجل عمل لي إعفاء مؤقت.. وفي صف التأشيرة شفت العجب..
الموظفة أوصدت الشباك أمام ناظري ووضعت يافطتها الكرتونية المتهالكة والمتسخة والمكتوب عليها عبارة " مغلق".. ثم انتهرتني..!! نعم انتهرت الخالة حليمة قائلة: ما بتشوفي...ما بتعرفي تقري..مقفول خلاص ..وضربت كفيها اليمني مع اليسري بمعني: خلاص..باباح..باباح .. مافيش..!!
أغاظني السلوك وشعرت بان "النار ولعت فيَّ" ..بس أسوي شنو؟ بلعت غيظي وجعلت اكرر كالبلهاء: (يا أخوانا أنا مسافرة بكرة اضطراري.. ودي تذاكري ..كان لقيتوني بكضب ما تساعدوني..) (تعالي بكرة الصباح).. كان الرد. (اجي كيف بكرة الصباح للتاشيرة وانا مسافرة بكرة الصباح ؟ وانا احبا من الصباح في صف النصاح دا..) (يا أخوانا أنا وساكنة بعيد في الريف الجنوبي وأولادي هناك وشنطي ذاتها هناك والدنيا ليل وخريف...و..و..و..) لم تشفع توسلاتي امام بنت الناس التي سدت"دي بطينة ودي بعجينة" طاخ!! ..أغلقت الشباك في وجهي وأعطتني قفاها.. قبل واحد ود حلال مساعدتي بعد أن اخبرني بأنني لم ادفع المساهمة.. وما بين المساهمة والمساهمة تمت المفاهمة وساعدني الرجل بكل طيبة خاطر..! خلاصة الموضوع.. الواحدة فجأة يتملكها إحساس رجالي وتقرب تقول والله حقو النسوان ديل يرجعوهن البيت تاني..! الله يقطعن..!! الله يحلني من شَبَكْ شُباك الضرائب "الزِنْدية، والزكاة" الجبرية والعيشة الفقرية.
حليمة
12-12-2006, 07:06 AM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
عليك الله يا عواطف ما تقلبي علينا المواجع .. خلينا في غيبوبة الغربة ومعاناتها أما الوطن فتلك ديار ألفناها.. وأصبحنا كالغرباء فيها.. والذين جاروا على هذا الوطن كتيرين وبعد كل إنقلاب يطيرم من سدة الحكم يظهروا علينا تانية بإسم الديمقراطية وحقوق الإنسان .. وأصبحت شعارات مستهلكة تصوري أن حقوق القردة تحسنت تصوري أيام الحرب الأهلية في رواندا الإتحاد الأوروبي دفع 12 مليون يورو عشان إنقاذ (40) شمبانزي!! وما زال الإنسان كما هو مهان ومستضعف وأرخص منو مافي.. نحن أيتها العزيزة في حاجة لي سودان جديد وفهم جديد لمعنى الوطنية .. تحياتي القلبية ابوبكر
Quote: ليست هناك دولة واحدة في العالم تطالب مواطنيها بعمل تأشيرة خروج حسب علمي سوى السودان
والسبب معروف وإلا فلماذا تتم التأشيرة لمواطني الداخل من المطار وللمغتربين من الج
الاخت الكريمة عواطف ..
هذه امور واشكاليات لا بد من معالجتها وهي ...
تمديد فترة صلاحية الجواز لتكون مدته عشرة سنوات ( تخيلي معى ) البنغالة والباكستانيين مـــدة صلاحية جوازاتهم عشرة سنوات وبرسوم تجديد 50 ريالا فقط ولفترة اخري مماثلة وكذلك المصريين وكل خلق الله اذن لماذا نحن نخالف العباد في كل شيء.
الغاء تأشيرة الخروج والاكتفاء بتأشيرة خروج المطار وبرسوم رمزية والغاء رسوم المغادرة التي الهدف منها ابتزاز المسافر بصورة مذلة .
الشيء الموسف هو ان تأشيرة الخروج بالمغتربين تدفع على مرحلتين اورنيك فاضي بها دمغات لا تسمن ولا تغني من جوع . تدفع بايصال مالى ولا نعلم الا ايه جهة تذهب . ومن ثم تدفع مرة اخرى عنـــد شباك التأشيرة ..
خلاصة القول ان هذا الجهاز انشأ لاكل اموال الغلابة والمساكين بالباطل ومسؤول الجهاز سيكـــــون مسئولا امام المولى عز وجل حين يقف بين يديه عن هذا الاستنكاح البائن بينونة كبرى ...
ونحن بعد ان عجزنا عن مقاضاتكم عن اكل اموالنا في الدنيا فاننا نرفع امرنا لله فاما ان يعجـــل برد مظالمنا منكم في الدنيا او يؤخرهاالى اجل مسمى ... وحينها لا ينفع الندم..
ود الباوقة
12-13-2006, 01:07 AM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
العزيزه عواطف تحياتى........ أول حاجه عملتها بعد عودتى السودان وعن قناعة تامه .. اول حاجه عملتها لغيت اقامتى فى الامارات رغم انو( كان بدرى عليها) عشان الملطشه والذله البتقولى عليها دى... لكننا مضطرين من وكت لآخر مكابرة الاخوان المغتربين وعكننة انفسنا فى ذلك المكان( القمىء) ... وعفوا للتعبير.... لم اجد تعبير مناسب اكثر من ذلك .
الاعزاءز في مداخلة غير هذه ذكرت عذاباتي وبهدلتي مع هذا الجهاز الطفيلي الذي يقتات علي دماء كل المغتربيين ...كان ذلك منذ 11 عاما ولم اعود رغم انني مواظب تماما منذ فرض سحب دمائنا في نهاية السبعينات وحتي الان .. لم اعود رغم ضرورات كانت تستوجب سفر لاوقات قصيرة علي الاقل ...ماذا هو ضمان ان اجد من يعتقلني او حتي ينفيني عن الدنيا باسم جهاز المغتربيين...؟ هذا الطفيلي الذي صار وسيلة منع السوداني المغترب من العودة الي بلده او الخروج منها سواء من ساءت ظروف اغترابهم في العقد الماضي او الذين يواظبون دفع كل ما ياتي به هذا الجهاز العجيب ولكن هناك في غواتيمالا المغتربيين لا احد يسمع وانت مدان مجرم لا وطنية لك كذاب منافق ملعون ... هؤلاء الجلاديين في هذا الجهاز الطفيلي لولا المغتربيين لما وجدو عملا ولا معاشا ... يعيشون بما يسحبونه عنوة من دماءنا ويهينوننا ...
12-14-2006, 01:23 AM
فاروق حامد محمد فاروق حامد محمد
تاريخ التسجيل: 08-07-2006
مجموع المشاركات: 4648
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عواطف ادريس اسماعيل
مهيرة
خالدة البدوي
حليمة محمد عبد الرحمن
فاروق حامد محمد
welyab
أحمد طه
abubakr
خالد
فيس بوك
تويتر
انستقرام
يوتيوب
بنتيريست