Post: #1 Title: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 07:47 AM Parent: #0
أولا هابي ويك أند لناس الدول العربية والإسلامية ويوم سعيد زاخر بالإنجازات يا ناس دول العالم
لا قرش لاتعريفة وتلقاها دايمة كاشخة ونضيفة ويا سلام !!!
Post: #2 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: elameen Date: 02-22-2007, 08:07 AM Parent: #1
تحية اليك يا عواطف على هذا البوسط....
يا عزاب المنبر لا تعرسوا الرمرامة ولا النضامة..... وصيتك الى المتزوجين شنو؟
الحوامة دي دايمة حايمة ولافحة توبها يا عند أهلها يا عند الجيران
طيب ما كتبتي عن الحوامات الفى النت ده.... تقينة الى الحوامة؟
Post: #15 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 02:56 PM Parent: #2
أخي العزيز أمين
مودتي يا سريع النهمة ... وصيتي للمتزوجين أبقو عشرة على الوصية ..
شكرا على عبورك الجميل .
Post: #3 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Nader Abu Kadouk Date: 02-22-2007, 08:07 AM Parent: #1
والله ياست عواطف لو كنت عزابي بعد قرايتي للبوست ده اكان اضربت من الزواج مدي الحياة
الي الامام يا مبدعه
ودابكدوك
Post: #4 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: bob Date: 02-22-2007, 08:09 AM Parent: #3
Quote: يا أخوانا يا المقبلين على الزواج أنصحكم نصحيحة خالصة لوجهه تعالى عشان الواحد فيكم بعدين ما
يندم ويقول سامحني يارب العباد فقد دقست دقسة السواد والرماد ... ماتجروا ورا الجمال المهم
الرقة والأخلاق والكلام الناعم و ديمة دقاق وأبعدو بعيد من الأستايل الديمة حالن مايل ...
Post: #8 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: ود الباوقة Date: 02-22-2007, 08:25 AM Parent: #4
كان كدا ياعواطف زول بعرس تاني تب مافي ..
نسوانا يا كافي البلاء خليط . من النضم والرجم والرمرمة وعدم العجرمة . وفوق هذا وذاك . كاشتات . تركن الحنة والدخان والكبرتة وخلننا مشلهتين جنس شلهتة ..
لك الود .
ود الباوقة
Post: #18 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:05 PM Parent: #8
ود الباوقة ؟؟؟؟
مساء الخير
الليلة يا ود أمي شوف ليك غرفة أرقد فيها ما تعمل لي فيها جعلي ... السودانيات اتاثرن بجاراتن
المصريات ساطور وكيس كبير ... شيل شيلتك ... عاد وفي الشايفاه دة يا ود الباوقة أخير يخلو العرس .
Post: #17 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:02 PM Parent: #4
وينك يا بوب ياخي ؟؟؟
نورت ... البوست عشان الحكاية عرس وما عرس حنولع ليك أنوار الزينة .. شكرا على الطلة البهية ...
Post: #16 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 02:58 PM Parent: #3
نادر النادر
تحياتي
الحمد لله إني كتبت البوست دة بعد ما عرست كان هسة حرمنا حرمكم المصون من عريس لقطة ... معزتي .
Post: #5 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: مجاهد عبد الرحمن Date: 02-22-2007, 08:16 AM Parent: #1
أم مجاهد تحياتي لابد من التجربة حتى نحكم على كل واحدة لأنه بالتأكيد كل واحدة فيها جوانب مشرقة فالرمرامة يعني البيت ما حيكون فيه بلدية ... والنضامة ما فيش صمت ... والحوامة طبعاً للشمارات وعشان تهويك شوية أثناء الحوامة ... أما السجمانة واللوامة والهجامة ديل ربنا لا يبلينا بيهم . لكن ( زي ود إبليس دي ) كناية عن صفة : هل هو وسيم هل هو قبيح هل هو تفتيحه هل هو ......... نرجو التوضيح ؟؟؟
Post: #19 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:12 PM Parent: #5
الأبن العزيز مجاهد
معزتي
أخير تهويها إنت من ما تهويك عشان بعد شوية تكوس للزول اللي يسوي ليك كباية شاي ما تلقاه وكان
داير الشمارات تلقاها بالكوم في سودانيز أون لاين الله يخلي لينا بكري سيد الحوش والرمرامة دي بعد
شوية تخليك تكتب شيكات بدون رصيد أما العريس البشبه ودابليس دة البكون شين وقبيح ....
Post: #6 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: معروف حمدين Date: 02-22-2007, 08:19 AM Parent: #1
وشهد شاهد من أهلها !!!!
عواطف بت أدريس .. ( تعجبني كتاباتكـ حد الترف )
Post: #20 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:16 PM Parent: #6
معروف !!!
يا إبني أعمل معروف وخلي أخوانك في البورد ما يركبوا رساهم ويجروا ورا السحات ديلة تب ما ناقشات
ولا لحقوق الزوج عارفات ... فاكرات السماحة كله شي .. وهي بينك وبينك لابتودي لا بتجيب ...
Post: #7 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: abas Date: 02-22-2007, 08:20 AM Parent: #1
عواطف خيتي
اها ده طرفنا من العرس ده
بطلناه
وما عاوزين
لو دي مواصفات الحريم
Post: #9 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: خالد المحرب Date: 02-22-2007, 08:37 AM Parent: #7
والله يا عواطف دى نصيحه تنفع بعد الزواج ملطى سستم دى نصايح مش نصيحه لكن بينى وبينك لوفى واحد من الجماعه الاستايل قراها كويس صدقينى حا يغير رايو الله يستر
Post: #10 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: ابو جهينة Date: 02-22-2007, 10:05 AM Parent: #9
الأخت العزيزة عواطف
تحياتي
موضوع مهم بالحيل ... و أسمحي لي بالإدلاء ببعض الصفات التي قد تساعد العزابة في حسن الإختيار :
***
قال ة خالد بن صفوان عندما وجد إمرأة خارج مسجد في البصرة تعمل كخاطبة ، فأتاها و قال لها :
أريد أن أتزوج من إمرأة فأنظري لي كما أصف لك ........................... فقالت : صفها لي ............................. فقال : أريدها بكرا كثيب أو ثيبا كبكر ، مليحة من قريب و فخمة من بعيد ، حصانة عند جارها ، و ماجنة عند زوجها ، كانت في نعمة فأصابتها فاقة فيها أدب النعمة و ذل الحاجة ، لها عقل وافر و خلق طاهر و جمال ظاهر ، صلتة الجبين سهلة العرنين سوداء المقلتين نبيلة المعتقد كريمة المحتد رخيمة المنطق لم يداخلها صلف و لم يشن وجهها كلف ، ريقها اريج و وجهها بهيج تنثني تثني الخيزران و تميل ميل السكران ، إذا اجتمعنا كنا اهل دنيا و إذا إفترقنا كنا أهل دين و آخرة فقالت له الخاطبة : لقد وجدتها لك فقال أين ؟ قالت له : في الرفيق الأعلى من الجنة ، فإن مثل ما طلبت لا توجد في الدنيا
بيئة العرب الجافة ، و قساوة الجو المحيط بهم ، جعلتهم يركزون على المرأة كرمز جميل يمشي على قدمين. فلا خضرة و لا ماء يذكر ، إلا هذه الوجوه الحسنة ، التي كانت تحلق بشعراءهم و أدباءهم في سماء الوصف و التغزل فأطلق العرب على المرأة صفاتا غريبة و جميلة مثال :
ربحلة : و هي الضخمة على إعتدال
سبحلة : إذا زادت ضخامتها دون أن تصير قبيحة
فشاعر مثل شاعرنا ود العطا كان سيتغني و يقول ، يا جميل إنت يا ربحلة ، حياتي دونك بهدلة ، عيوني سهرانة مصهللة ، حمرا و شرارة مفنجلة ، يا جميل يا سبحلة ما بصح ليك تعمل كدة.
جارية : إذا كانت طويلة سبطة الوضيئة : إذا كانت بها مسحة من جمال العيطبول : إذا كانت طويلة العنق في إعتدال و حسن و يطلق العرب على طويلة العنق ، إمرأة بعيدة مهوى القرط ، و قال شاعرنا السوداني ، الرقيبة قزازة عصير ، حيث كانت أيامها قزازة العصير أطول و أنعم شيء في متناول اليد و مرمى البصر، أما الآن ، فيقولون الرقبة رقبة مانيكان أو زى رقبة نعومي الغانية : إذا إستغنت بجمالها عن الزينة المعطال : إذا كانت لا تبالي أن تلبس ثوبا حسنا أو تتقلد مجوهراتا و ذهبا الوسيمة : إذا كان حسنها ثابتا كأنها وسمت به الرعبوبة : إذا كانت بيضاء اللون رطبة الزهراء : المرأة التي يضرب بياضها إلى صفرة كلون القمر و البدر الزجَاء : إذا كانت دقيقة الحاجبين الممتدة حتى كأنهما خطا بقلم ، الدعجاء : التي تكون عينيها شديدة السواد مع سعة المقلة الشنباء : رقيقة الأسنان المستوية الحسنة
الخود : المرأة الشابة حسنة الخلق
المملودة : إذا كانت دقيقة المحاسن
الهيفاء : إذا كانت خفيفة البطن
البرمادة : إذا كانت سمينة ترتج من سمنها ، و نطلق عليها في السودان الدفار. نسوان زمان كانوا بيشربن الموص ، و هو منقوع الكسرة في الماء مع كثير من السكر ، و كانت لها جلسة خاصة و طقوس وقت عواسة الكسرة كطقوس القهوة و الجبنة ، لذا فقد كانت أغلب نساءنا من قبيلة البرمادة : مرجرجات من الشحوم المتراكمة
الرقراقة : كأن الماء يجري في وجهها
البضة : و هي رقيقة الجلد ناعمة البشرة
العرهرة : عظيمة الخلق مع الجمال يعني لو أردت أن توصف واحدة زى دي لواحد تقول ليهو : البنية عرهرة و أمها عرهرة و البيت كلو من سلاسلة عرهرات فأظفر بها يا إبن العرهرة.
الغيداء : التي تتثنى في دلال و لين متعمد
الفرعاء : إذا كانت تامة الشعر أى ، بدون إضافات قديمة كالجورسيه ، أو جديدة كالباروكة ، أو ليست كاللائي أدخلن في ميزانية البيت كريمات الفرد و التنعيم
الرخيمة : إذا كانت منخفضة الصوت تبارك الله ، عندنا نسوان ، أصواتهن تصحي الكانوا نايمين .
الممسودة : و هي الممشوقة القوام العيطموس : و هي الحسناء الذكية الفطنة
الهنانة : و هي الضاحكة المتهللة
للأسف أن بعض الرجال يندفعون نحو الهنانات و هم يعتقدون أن كل هنانة هي فتاة سهلة المنال ، و لكن ما أن يصطدمون بحواجزها المنيعة و سهلها الممتنع ، و ما أن تقول لهم مش كل الطير اللي يتاكل لحمو ، حتى يتراجعون و هم يطلقون آلاف الإشاعات عنها زورا و بهتانا، يعني الما بتلحقو جدعو ، و بالطبع لا بد للمرأة أن تكون حريصة بحيث لا يطمع الرجال فيها
ثم قال العرب ، إن على راغب الزواج أن يبتعد عن ستة أنواع من النساء و هن ، الأنانة و الحنانة و المنانة و الحداقة و البراقة و الشداقة:
أما الأنانة فهي التي تكثر من الأنين و الشكوى في كل ساعة و كل وقت بسبب و بلا سبب ، و هي عندنا النقاقة.
و الحنانة هي التي تحن إلى زوجها الأول أو التي تقارن بين زوجها و الرجال الآخرين.
و المنانة هي التي تمن على زوجها فتقول له فعلت من أجلك كذا و كذا.
و الحداقة هي التي تشتهي كل شيء تراه ، فتطلبه من زوجها دون مراعاة لظروفه.
و ما أكثر الحداقات المغتربات اللائي يقصمن ظهور أزواجهن.
البراقة هي التي تظل طوال النهار تتبرج و تتزين و المراية لا تفارق يديها ، فتحترق حلة الملاح ، و الشافع في الحمام يبلل ملابسه ، و البنت تتفرج على فيلم مش ولا بد.
الشداقة هي كثيرة الكلام الذي بدون فائدة ، فتصير كتلك النعجة كثيرة الصياح قليلة الصوف و لنا عودة في سيرة أخرى لينة و طرية و اللهم أجعل كلامنا خفيف.
أنا غايتو عجبتني ( الهنانة ).
عفوا للإطالة
دمت
Post: #11 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: هاشم أحمد خلف الله Date: 02-22-2007, 12:17 PM Parent: #10
وبعدين معاك يا عواطف , مواضيعك دي بتخلينا تاني ما نكتب حاجة .
الحمد لله نحنا إتزوجنا من زمان والصفات
الحلوة والجميلة كلها ولله الحمد والمنة متوفرة عند السمحة ام ولدي0
لك مني كل المني والتحايا يا ( أقحوانة ).
Post: #12 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-22-2007, 12:25 PM Parent: #11
Quote: ماتجروا ورا الجمال المهم
الرقة والأخلاق والكلام الناعم و ديمة دقاق وأبعدو بعيد من الأستايل الديمة حالن مايل ...
هلا هلا عواطف وصفك ده كلو في السمحة ام ولدى يا بختيييييييييي
يديك العافية انتى بوستات دائما حلوة زى الغضيم .
Post: #13 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عفاف أبو حريرة Date: 02-22-2007, 12:58 PM Parent: #12
بيئة العرب الجافة ، و قساوة الجو المحيط بهم ، جعلتهم يركزون على المرأة كرمز جميل يمشي على قدمين. فلا خضرة و لا ماء يذكر ، إلا هذه الوجوه الحسنة ، التي كانت تحلق بشعراءهم و أدباءهم في سماء الوصف و التغزل فأطلق العرب على المرأة صفاتا غريبة و جميلة مثال :
ربحلة : و هي الضخمة على إعتدال
سبحلة : إذا زادت ضخامتها دون أن تصير قبيحة
فشاعر مثل شاعرنا ود العطا كان سيتغني و يقول ، يا جميل إنت يا ربحلة ، حياتي دونك بهدلة ، عيوني سهرانة مصهللة ، حمرا و شرارة مفنجلة ، يا جميل يا سبحلة ما بصح ليك تعمل كدة.
جارية : إذا كانت طويلة سبطة الوضيئة : إذا كانت بها مسحة من جمال العيطبول : إذا كانت طويلة العنق في إعتدال و حسن و يطلق العرب على طويلة العنق ، إمرأة بعيدة مهوى القرط ، و قال شاعرنا السوداني ، الرقيبة قزازة عصير ، حيث كانت أيامها قزازة العصير أطول و أنعم شيء في متناول اليد و مرمى البصر، أما الآن ، فيقولون الرقبة رقبة مانيكان أو زى رقبة نعومي الغانية : إذا إستغنت بجمالها عن الزينة المعطال : إذا كانت لا تبالي أن تلبس ثوبا حسنا أو تتقلد مجوهراتا و ذهبا الوسيمة : إذا كان حسنها ثابتا كأنها وسمت به الرعبوبة : إذا كانت بيضاء اللون رطبة الزهراء : المرأة التي يضرب بياضها إلى صفرة كلون القمر و البدر الزجَاء : إذا كانت دقيقة الحاجبين الممتدة حتى كأنهما خطا بقلم ، الدعجاء : التي تكون عينيها شديدة السواد مع سعة المقلة الشنباء : رقيقة الأسنان المستوية الحسنة
الخود : المرأة الشابة حسنة الخلق
المملودة : إذا كانت دقيقة المحاسن
الهيفاء : إذا كانت خفيفة البطن
البرمادة : إذا كانت سمينة ترتج من سمنها ، و نطلق عليها في السودان الدفار. نسوان زمان كانوا بيشربن الموص ، و هو منقوع الكسرة في الماء مع كثير من السكر ، و كانت لها جلسة خاصة و طقوس وقت عواسة الكسرة كطقوس القهوة و الجبنة ، لذا فقد كانت أغلب نساءنا من قبيلة البرمادة : مرجرجات من الشحوم المتراكمة
الرقراقة : كأن الماء يجري في وجهها
البضة : و هي رقيقة الجلد ناعمة البشرة
العرهرة : عظيمة الخلق مع الجمال يعني لو أردت أن توصف واحدة زى دي لواحد تقول ليهو : البنية عرهرة و أمها عرهرة و البيت كلو من سلاسلة عرهرات فأظفر بها يا إبن العرهرة.
ينصر دينك ياابو جهينه كده انت رجحت الميزان000000 عواطف يا رايعه براحه علينا مالك ترفعي لينا في الطوب جد ابدعتي عديل الله يستر المتزوجين مايطلقو نساهم بعدكلامك الصادق ده كل الحب ياملكه عفاف ابوحريره
Post: #27 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:35 PM Parent: #13
بت ابو حريرة !!!
ياصافية النية والسريرة ... مرورك زي النسمة ... الله يخليك ومن الحساد يحميك ...
Post: #26 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:33 PM Parent: #12
أخوي الطيب !!!
أنا فيشان عارفاها كدي قمت اتشجعت وكتبت البوست دة عايزة النسوان كلهن يكونن زيها ولا شنو رايك ؟؟
Post: #25 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:31 PM Parent: #11
هاشم ؟؟؟
والله إنت محظوظ طالما عروسك بالمواصفات دي بس خليك مع الشعر أكتب ساي كان في عيد الحب ولا عيد
الضحية أصلو عندك الخضرة والماء والوجه الحسن ... معزتي ..
Post: #24 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:28 PM Parent: #10
أبوجهينة ؟؟؟؟
صدق من قال عند جهينة الخبر اليقين عاد ما قصرت تب يعني الداير ليه عروس يقعد يذاكر في الكلام
الكتبته دة أو يسجلو في ورقة ويحوم في الشوارع وكان دقس ونسى حاجة واطاته صبحت ... سلمت يا الأخو.
Post: #22 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:23 PM Parent: #9
يا خالد يا الحبيب الدنيا كلها بقت ملتي سيستم حتى العروس بتكون متعددة الأغراض ... زوجة .. نشرة
أخبار ... سلاح دمار شامل .. سلاح صديق ... كاسحة جيوب ... هوفر للمواد الغذائية ... طنجرة ضغط
قهوة مرة ... شاي بدون حليب... وسلمت يا سيد الكل ..
Post: #21 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:18 PM Parent: #7
عباس ؟؟؟؟
وينك يا سيد الناس !!!
إت كت دار تعرس تاني والتلاتة ديل ولاد منو؟؟؟ الليلة يا ويلك وسواد ليلك شيل الكلام دة وأجري بيه
الخور إن بقوا ديل ولادك .
Post: #14 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: محمد فرح Date: 02-22-2007, 02:53 PM Parent: #1
أخت عواطف مع الإعتذار لكل الجنس اللطيف وليك ياغاليه لكن مافي إمرأه أو فتاه في العالم تخلو من إحدى الصفات الذكرتيها دي ....
وأزيد العزابه من الشعر بيت .. إضافه للأنواع الذكرتهم أستاذه عواطف ديل أوعاكم من الحنانه الأستاذه الفنانه
وأخطر نوعيه المره البتحب الفشخره والتياب السمحه والجديده واخر موضه دي ببتجيب أجل الراجل وبتكتلو قبال يومو .....
وفي الختام التحيه والقيام لحواء السودان
Post: #28 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:37 PM Parent: #14
محمد فرح ؟؟؟
مالك عايز تطير الجنيات من العرس ؟؟؟ نحنا عايزنهم يفهموا الدرس ...
Post: #30 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Abdlaziz Eisa Date: 02-22-2007, 03:40 PM Parent: #14
سلام يا رائعة يا أستاذة عواطف
رغم أن الواحد متزوج بأجنبية ودائما بحلم بي بنت بلدي لكن بعد البوست ده.. خلاص يبدو إنك أوقفتي الجرجرة وكراعي سليمة من ألاهات التي ذكرتيها دي.. مافي زمن علشان نبحث عن واحدة خالية منها.. وبقول: الله يخليك أكثر وأكثر عبدالعزيز
Post: #31 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:48 PM Parent: #30
عزو !!!
تحياتي يا سمح يازين ...
بت البلد مهما تكون لخباتة وجنها قوالة وسواطة برضها مننا وفينا وأخير من الأجنبية المابتعرف
ملاح الروب من الكمونية ...
Post: #32 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: حسن الجيلى سعيد Date: 02-22-2007, 03:54 PM Parent: #30
والله عبد العزيز اخوى, الحال من بعضو لكن ( لالوب بلدنا و لا تمر الناس ) دى فوق لنصايح اختكم عواطف... مودة
Post: #23 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: حسن الجيلى سعيد Date: 02-22-2007, 03:26 PM Parent: #1
الاخت/عواطف كالعادة اتحفتينا,عارفه عاوز اعمل خطين تحت وصيتك دى بالذات
Quote: وأبعدو بعيد من الأستايل الديمة حالن مايل
تسلمى يازوق
Post: #29 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 03:40 PM Parent: #23
حسن الجيلي !!!
إنت يا الحبيب دايما رزين وعاقل ... لا بتتخفخف لا بتشاكل ... عروسك جاهزة لا استايل لا حالها مايل ..
Post: #33 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: احمد العمار Date: 02-22-2007, 03:54 PM Parent: #23
تحياتى يا ام مجاهد
والله بصراحة ما قصرتى مع العزابة وطبعا انا لو كنت ما متزوج
كان بقيت ليك فى رقبتك لحدى ما تعزلى لى واحدة ( لكن الحصل حصل )
طيب ما وريتنا كل حالة علاج شنو ؟؟؟ والحالات الميؤس منها ياتا ؟؟؟
والله صدق من سماكى حبوبة عواطف ( وجوه كثيرة ضاحكة )
دمتمى بخير
أحمد العمار
Post: #34 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-22-2007, 04:07 PM
أحمد العمار !!!
إنشاء بيتك دايما عامر والبركة العرستة عشان بنات زمان ما زي هسة وبصراحة الحاجات دي ما ليها علاج
ولا بي صوت ولا كرباج خلاص فات الأوان والإنكتب علي جبينهن بان ... شكرا على المرور ...
Post: #35 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Abdlaziz Eisa Date: 02-22-2007, 04:30 PM Parent: #34
سلام
يا عزيزتي عواطف
أنت لسع في ملاح الروب من الكمونية؟ أنا ما عايز أقول دقه قديمة.. لكن صدقيني.. كل الجيل الجديد ده لم يسمع بهذه.. جيل الشغالات.. جيل لا يعرف شيئا عن المطبخ.. الأجنبية دي علمناها أشياء تجيدها الآن أكتر من من جيل الفضائيات ده.. عزيزي حسن الجيلي لك مودتي وتقديري.. أنت وينك ووين تمر بلدنا.. نحن في عصر العولمة.. ولولا سماحة هذا العصر لما سعدت بالحديث إليك.. اللالوبة صارت عندنا زي حكاوي الحبوبات.. لأحتى الحبوبات الآن يتابعن الفضائيات.. مع خالص الشكر عبدالعزيز
Post: #36 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: حسن الجيلى سعيد Date: 02-22-2007, 04:53 PM Parent: #35
عبد العزيز اخوى, كلامك على العين ,بالامس كنت فى زيارة احد الاخوة العرب لتقديم واجب العزاء فى وفاة والده رحمه الله ,هذا الشخص متزوج من اجنبية ,انحنى الى والمجلس مكتظ بالمعزيين وهمس فى اذنى: ( عارف يا ابوعلى مراتى زوجة مش عاطلة,بس فى المواقف المتل هيك,مابتعرف تعبر عن مشاعرها ولا انا قادر اوصل اللها احساسى ,ياريت لو معاى بنت بلادى ).... عارف يا ابو العز الناس مابتشتكى من زواجاهم ,الناس بتشتكى من عدم التكافؤ البيئى والنشاءه وبرود العواطف نتيجة طبيعية... وربنا اديمها عليك حياة اسرية مستقرة.
Post: #37 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: ismeil abbas Date: 02-22-2007, 05:46 PM Parent: #1
حفيدتى عواطف .
حديثك ذو شجون ومواضيعك هادفه وأجتماعيه.
ياروعة المنبر بأطلالتك.
ممكمن لوسمحتى أضيف نصيحه ,هادفه وحيويه.
الصاره وجهها وديمه زهجانه:
دى مابتعرفى وشها من قفاها,والله يستر من لحظات صفاها. كالهدوء الذى يسبق الريح وأى واحد منها فى الحله والبيت مابستريح. حياتها نكد وكلها نكد فى نكد,وكل من شافها كشر وسكت.
قلت مواصفات الزوجه المثاليه هذه ألأيام.إلا من رحم ربى. والحمدلله ربنا أكرمنا بحسنة الدنيا. الله أديها العافيه مثاليه مثلك. اسماعيل محمد أحمد عباس.
Post: #38 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Mustafa Mahmoud Date: 02-22-2007, 05:50 PM Parent: #37
Post: #39 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-22-2007, 07:59 PM Parent: #38
Quote: أخوي الطيب !!!
أنا فيشان عارفاها كدي قمت اتشجعت وكتبت البوست دة عايزة النسوان كلهن يكونن زيها ولا شنو رايك ؟؟
عواطف اختى !! والله اناما ظنيتك بتنسي في واحدات كاتبات بخرات ومشربات محايات وكاتبات حجبات انتى عارفه انا حبي لام عبد الله حاسي ما عادي زى الفي حاجة بتخليني ما اشوف في الدنيا غيرها وما قدرت اعرفها . ايش رايك امشى يفتحوا لي الكتاب ولا شنو؟.
Post: #40 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: بكرى ابوبكر Date: 02-22-2007, 11:18 PM Parent: #39
الغالية والحبيبة عواطف يسلم قلمك الهادف من كل عين....... يا اختى نحنا اتزوجنا و البقت بقت و اولادنا كبروا فى المهجر ......كدى عليك الله اعملى لينا بوست بتاع نصائح تساعدنا فى تربية اولانا الاتربوا فى الشتات .....بلدان لا لعبوا فى كورة شراب ولا ركبوا فيها كاروا ولا اكلوا فيها تبش بالشطة و...و...و...
Post: #41 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: يسرى معتصم Date: 02-22-2007, 11:23 PM Parent: #40
بكرى أخوى كلنا مابين العرس خايفين من زى دا تسلمو
Post: #50 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-23-2007, 11:16 AM Parent: #40
بكري !!!
سيد الحوش والبوش ... إنشاءالله ما نضوق نارك ...وربي يجعل من الجنة دارك ..
عارف أولادنا ما بسرو البال و خليهم على الله ...ديل عايزين بوست طويل وعريض .. مرة قلت لولدالصغير
لو شاكلت أخوانك بوديك الخور .. قال لي مش خور عمو بكري ؟؟؟ أحسن حاجة عشان حألاقي أصحابي كلهم
هناك !! عجبي !!!
Post: #49 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-23-2007, 11:09 AM Parent: #39
العزيز الطيب ستات البخرات ديل جاياهن بلحيل بس أصبر شوية لكن أم عبدالله حاشاها ست الكل المابتشبه
إلا الياسمين والفل ...
Post: #59 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 07:34 AM Parent: #38
د. مصطفى !!!!
أيها الإنسان النبيل ... ليس لدي ما أقوله سوى .... شكرا
Post: #47 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-23-2007, 10:54 AM Parent: #37
ود عباس !!
الفي القهوة ما جلاس
صبرك علي في البوست التاني أو نصيحة 2 فيه الزنانة والونانة المجنونة والشعنونة وحاجات كتيرة
Post: #42 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: mamkouna Date: 02-23-2007, 00:11 AM Parent: #1
العرهرة..العيطموس....أم مجاهد (( حاسة إني قاعدة أشاكل فيك )) .. عندي سؤال بريء و الله..
هل تشمِل الحُوامَة.. الحُوامَة بين صفحات النت...نصاصي الليالي ؟؟!!!
Post: #43 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Nader Abu Kadouk Date: 02-23-2007, 06:43 AM Parent: #42
اها ياختي بعد د لازم توري العزابه من اين تؤكل الكتف
Post: #44 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-23-2007, 07:02 AM Parent: #43
Quote: اها ياختي بعد د لازم توري العزابه من اين تؤكل الكتف
اها الاهم من ذلك اخونا بكري ابو بكر الرجل الاسطورة الذي هيأ لنا اسباب التواصل لا بد من اكرامه وتلبية طلبه سريع ولدينا الكثير من المداخلات بشان تربية الاولاد في الغربة .
Post: #45 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Nader Abu Kadouk Date: 02-23-2007, 07:21 AM Parent: #44
اها يالطيب انا رسلتهم البلد لمدة سنه شان إتعلمو شوية عربي و دين واخوك ضارب الجرسه مع الوحده القاتله
Post: #46 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-23-2007, 07:29 AM Parent: #45
Quote: واخوك ضارب الجرسه مع الوحده القاتله
رسالتك وصلت وسوف اقوم
Quote: او نقوم
بدراستها والرد عليك في غضون هذا الاسبوع إن لم يعل صبرك
Post: #51 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-23-2007, 11:19 AM Parent: #43
نادر النادر
صبرك شوية ..
Post: #64 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:19 AM Parent: #43
نادر !!!
باقي لي ناوي ليك على نية إنت شن شغلتك بالعزابة ؟؟؟
Post: #48 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-23-2007, 11:00 AM Parent: #42
الحبيبة ممكونة
الأميرة يا أجمل زول وأحلى سيرة ...
شكرا يا ذوق ..
نسوان النت ديل يحق لهم ما لايحق لغيرهم ... حالة خاصة ...
Post: #52 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: salma subhi Date: 02-23-2007, 01:12 PM Parent: #48
عواطف اذيك....لكن ما طفشتي الرجال من العرس وخليتي فيها خط رجعة
والله انا لاقتني واحدة لامة كل الحاجات القلتيها دي من أول مرة قفلت بابي وقلت يا بت الباب البجيب الريح سده واستريح....
وعارفة يا عواطف حكاية الهجامة والرجامة واللوامة دي أكتر حاجة شفتها في السودانيات دوناً عن الجنسيات الأخرى ما عارفة ليه وبالذات نسوان الخليج؟؟
طوالي ذي ديل تعملي روحك ما بتعرفيهن أحسن.
Post: #53 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-23-2007, 06:06 PM Parent: #52
Quote: صبرك شوية ..
دى نادر اخوى ما عنده فتشيها من غيرو عواطف اختي
Post: #54 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: رأفت ميلاد Date: 02-23-2007, 08:20 PM Parent: #53
عواطف العزيزة
هسة إنتى ما طفشت الأولاد بس إنتى بورتى بناتنا
حليها لينا ببوست وسط
إنا بديت أصدق عشان أم أولاد بتدربى على شغل النسيبة
تحياتى
Post: #55 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: khaleel Date: 02-23-2007, 09:31 PM Parent: #54
عواطف
في وصفة تانية
المرة ام ساقن رهيف كان جابك ليها الزيف
في خشم بابها ما تقيف
Post: #56 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-23-2007, 10:59 PM Parent: #55
Quote: هسة إنتى ما طفشت الأولاد بس إنتى بورتى بناتنا
حليها لينا ببوست وسط
عواطف اختي انا نصبت نفسي مديرا لاعمالك المنبرية لا سيماوانك اصبحت نجمة المنبر العام بلا منافس . ومن هذا المنطلق فانني اوصي بعدم التراجع عن الثوابت ومن ثم رفض الطلب المقدم من الاخ الظريف رأفت حنا .
Post: #57 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: حبيب نورة Date: 02-23-2007, 11:37 PM Parent: #56
توفي
If you talk, she wants you to listen لو أتكلمت دايرك تسمع بس!!!
Post: #67 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:27 AM Parent: #57
حبيب نورة !!!!
وينك يا الحبيب ؟؟؟
أها نورة دي موقعها وين من الإعراب ؟ إنشاء الله لا رمرامة لا نضامة ...
في واحد قال لمن الواحد يكون خاطب ليه واحدة هو يتكلم وهي تسمع لمن يعرسها يتكلمو الإتنين ويسمعو
الجيران ... شنو رايك ؟؟؟
Post: #68 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:32 AM Parent: #56
الطيب ياالطيب !!!!
عليك الله رأفت دة بي بسمته الصادقة دي بيرفضو ليه طلب ؟؟؟ راجع موقفك دة بسراع !!!
Post: #66 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:24 AM Parent: #55
خليل !!!
وينك يا ود أمي أمانة ما فاقداك ...
ناس أمي كانو بقولو المرة أم عرقوب بتنشف البيت وتخلي الراجل إيد ورا وإيد قدام !!!
Post: #65 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:22 AM Parent: #54
رأفت !!!
معقول ياود الأصول يا الخاتي القول بناتك يبورن ؟؟؟ فشر!!! ... ديل أمهن لا نضامة لا حوامة ...
الحل الوسط جاييك في الطريق لكن يا ابو النسب أريت كل النسايب زيكم !!!
Post: #61 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 07:41 AM Parent: #53
بن شيقوق!!!!
نادر كمل الصبرذاتو... ّّّّ
Post: #60 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 07:39 AM Parent: #52
سلمى !!!
ياحبيبة القسا ...
مودتي ..
وااله نحنا السودانيات عيوبنا كتيرة وما بتتحسب ولا بتتعد لكنا لو اتكلمنا عشان المصلحة العامة
قالن مالكن كاشفات حالنا لكن ما عليك اللي بدو يصير زي ما قال الفنان يصير فالقافلة لابد أن تسير
وأحسن حاجة عملتيها إنك إحترمت نفسك وقفلت باب بيتك عشان إنت ما قدر الكلام البسوهو ... تسلمي
يا ست الكل ..
Post: #58 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: celecon Date: 02-24-2007, 00:12 AM Parent: #1
الرائعة عواطف .. لكن ماخليتى جنبه الناس ترقد عليها هسه العندو بنات الا يشوف ليه طريقة يعدل التركيبة تعرفى الاصناف الذكرتيها دى لازم ينزلوها فى قسيمة الزواج والبت تبصم بالعشرين انها ما بتشبه ولا واحد ، واذا قدر الله والراجل كشف الحقيقة تشيل شنطتها وتدوس بنزين وبيت ابوها عدل ، النصيحة صعب الزول يتحمل الشغل ووجع الراس ويرجع البيت يلقى واحده من الاصناف الفوق دى يحصل طش طش طش
شكرا ليك كتير ونطلب المزيد من التوعية ....
Post: #62 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-24-2007, 08:01 AM Parent: #58
Quote: بن شيقوق!!!!
نادر كمل الصبرذاتو...
ّّّّ
عواطف ندوري ده ظرييييييييييف والله وبحب الكلمة الطيبة وحياتك تكرميهو بحلو الكلم عشان يولف ساى وما محتاج لتعب شدييييييييييييد اى كلمة بالنسبة ليهو احلى غنوة .
وووووووووووووب
الفاروق وابو بكر متابعون؟ المحل ما ليهو طعم دونهما
Post: #70 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:38 AM Parent: #62
بن شيقوق ّّ!!!
ندوري باين ناويلو على نية !!! بت الناس ذنبها شنو نديه وصفات يقوم يجري يطبقها في العروس
التانية ؟؟؟
Post: #69 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:36 AM Parent: #58
سليكون !!!
وينك يا الحبيب ؟؟؟
والله مداخلتك رهيبة... والعندو بنات لازم يوديهن الورشة يعمل ليهن تعديل وبعدين المفروض ما يتم
الزواج إلا بعد ما تثبت البت إنها خالية من العيوب سالفة الذكر ولسة البقية في الطريق ...شكرا
يا رايع !!!
Post: #63 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: محمد أبوالعزائم أبوالريش Date: 02-24-2007, 08:11 AM Parent: #1
عواطف يا رايعة ...
Quote: السودانيات اتاثرن بجاراتن
يعني بس يتأثرن ببتاعين السواطير والأكياس؟
ليه ما يتأثروا ببتاعين تأبر ألبي ... ويا بعد عيني ... والكلام البيجنن بوبي ده ليه ما يتعلمو؟ تربية النشاف العاطفي دي نعمل معاها شنو؟
سلمتي
Post: #71 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 08:42 AM Parent: #63
ودابو الريش !!!
والله إنت ظريف ودمك خفيف !!! مشكلتنا نحنا السودانيات ولدونا في الصحراء الكبرى يعني جفاف وتصحر
لا تئبر ألبي لا يا بعد عمري الواحدة لو قالت كلمة حلوة بتفتكر الراجل حيطلع ليها فوق راسها وطبعا
الراس فاضي يعني ما بشجع إي راجل على الطلوع ... تئبر ألبي ...
Post: #72 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-24-2007, 08:50 AM Parent: #63
Quote: بت الناس ذنبها شنو نديه وصفات يقوم يجري يطبقها في العروس
التانية ؟؟؟
ندوري ده مدرسة يا العواطف وفنان متجدد بس عايز شعراء معاصرين
Post: #73 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 09:09 AM Parent: #72
بن شيقوق !!!
المدارس في المنبر دة بقت كتيرة وخطيرة زي مدارس السودان ... المدرسة النموذجية ... مدرسة الأذكياء
الخاصة ... مدرسة الموهوبين ... مدرسة المتفوقين ... مدرسة المنتصرين ... مدرسة المهزومين ...
Post: #74 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: altahir_2 Date: 02-24-2007, 09:23 AM Parent: #1
الاخت عواطف عميق التحايا لهذا الطرح الدسم لكن حسع لو قلنا الكلام دا بلسان ذكر كان سووووووووه عنف ضد المراة التحية ليك مجددا ضياء الدين ميرغنى الطاهر
Post: #75 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 10:09 AM Parent: #74
ضياء !!!!!
مودتي ...
تسلم يا الحبيب على المداخلة الحلوة وفعلا لو طرح الموضوع راجل كان عينك ما تشوف الا النور .. معزتي
Post: #76 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-24-2007, 11:35 AM Parent: #75
Quote: مدرسة المهزومين
انا زى عندي احساس كده ابو بكر والفاروق من هذه الشريحة
ود المحرب من المنتصرين
انا من وزن ال ......... ( ارجوك عواطف ما تتميها) خليها للفاروق
Post: #77 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 02-24-2007, 12:16 PM Parent: #76
بن شيقوق
حاشاك يايابا
إنت ميزان الدهب الغالي وزنه تقيل أبصدرا ركيزة تب ما بغلبو الشيل ... يا جبار الكسور ..
فراوق وأبوبكر ديل مالك معاهم ؟؟؟
Post: #78 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-24-2007, 12:41 PM Parent: #77
Quote: إنت ميزان الدهب الغالي وزنه تقيل أبصدرا ركيزة تب ما بغلبو الشيل ... يا جبار الكسور ..
هلا هلا اتاريك مننا زولة بطانة طاااااااااااب يا العواطف
بموجب هذه الوثيقة اقر انا .......... عضو المنبر العام بانني قد وهبت الكلام الكوتيد فوق ده والصادر عن ........... لاخي وصديقي الاسفيري نادر ابو كدوك .
فاقدنك يا جبار الكسور
عواطف لا تدقي عطر منشم بيني وبين حمائم هذا المنبر ابوبكر والفاروق .
Post: #79 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-26-2007, 05:57 AM Parent: #78
هلا هلا ناظرة البوست وصلت يا نادر اخوى ارحل معاى بهنا مرة واحدة .
Post: #80 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: على احمد النعيم Date: 02-26-2007, 08:12 AM Parent: #79
Quote: ماتجروا ورا الجمال المهم
الرقة والأخلاق والكلام الناعم و ديمة دقاق وأبعدو بعيد من الأستايل الديمة حالن مايل ...
هذه هى التى قال فيها الشاعر: انا شوقى عليكى يا الذوقك معاى متفنجر ما بترجينى وشك منطوى ومتخنجر انا كان ما بريدك ابقى يهودى من ناس سنجر الما بريدها من ارض الشفاعة يجنقر
(اذا استعصت عليك بعض الكلمات اسعلى ود شيقوق)
شكرا عواطف على هذه النصائح الغالية .
Post: #81 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Tabaldina Date: 02-26-2007, 08:22 AM Parent: #1
.. .
Quote: أريد أن أتزوج من إمرأة فأنظري لي كما أصف لك ....... فقالت : صفها لي ...... فقال : أريدها بكرا كثيب أو ثيبا كبكر ، مليحة من قريب و فخمة من بعيد ، حصانة عند جارها ، و ماجنة عند زوجها ، كانت في نعمة فأصابتها فاقة فيها أدب النعمة و ذل الحاجة ، لها عقل وافر و خلق طاهر و جمال ظاهر ، صلتة الجبين سهلة العرنين سوداء المقلتين نبيلة المعتقد كريمة المحتد رخيمة المنطق لم يداخلها صلف و لم يشن وجهها كلف ، ريقها اريج و وجهها بهيج تنثني تثني الخيزران و تميل ميل السكران، إذا اجتمعنا كنا اهل دنيا و إذا إفترقنا كنا أهل دين و آخرة فقالت له الخاطبة : لقد وجدتها لك فقال أين ؟ قالت له : في الرفيق الأعلى من الجنة ، فإن مثل ما طلبت لا توجد في الدنيا
اوفى وكفي فى الوصف وصدقت الخاطبة ولكن يا أباجهينة ماذا يعنى بصلته الجبين وسهلة العرنين
__________________
أين الحالمة والواهمة اللاواقعية من هؤلاء يا عواطف!!؟
Post: #82 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: الطيب شيقوق Date: 02-26-2007, 10:16 AM Parent: #81
Quote: (اذا استعصت عليك بعض الكلمات اسعلى ود شيقوق)
Post: #83 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: Gaafar Ismail Date: 03-01-2007, 01:10 PM Parent: #1
الأخت العزيزة عواطف ســلامات
بوست ظريف فاتني أن أقرأه في حينه .
قالو واحد ساخر وزهجان جدا من زوجته سألوه: كيف حال المدام ؟ أجاب بسـرعة : هي حية تسعى
تحياتي وفائق احترامي.
Post: #84 Title: Re: نصيحة لوجه الله ... يا عزاب المنبر لا تعرسوا الرمرامة ولا النضامة وللحديث بقية ... Author: عواطف ادريس اسماعيل Date: 03-02-2007, 07:56 AM Parent: #83
أخي العزيز أبو الجعافر1!!!
معزتي
كيفك يا ابن جدي ؟؟؟ مرورك أسعدني كثيرا خاصة لما شفت الولد الحلو المعاك دة كان عندي بت كنت خطبتها ليه ,, والله حكاية هي حية تسعى دي بس ما قل ودل والله يكضب الشينة ,,, تسلم يالحبيب ..