|
|
 كدا ... كدا فنتاستك ...كونك تجي بي ردا
|
في صباح شتوي منتصف ثمانينات القرن الفائت , ونحن في امتداد البراري الوادعة التي ترقد شرق مطار الخرطوم الذي كان دولي وغرب - غرب معرض الخرطوم الدولي , ونحن صبية لم نتجاوز العاشرة قيد يوم الهب حماسنا صوت مكرفونات معرض الخرطوم الدولي شريط كاسيت غربي , اتتنا الرياح علي بعد ثلاثة كيلو مترات بانغام لم نكترث كثيرا ان نفرزها فنحن كنا نؤجل تعلم الانجليزية تلك الايام الي المرحلة المتوسطة , ولكن والي الان اذكر جيدا تلك الكلمات وايقاعها الموسيقي كانت تتهادي الي اذاننا , ففكنا شفرات تلك الاغنية التي كانت تعاد تكرارا ومرارا وببساطة شديدة اصبحنا نرددها حسب ما نريد علي انها _ كدا ... كدا فنتاستك ..كونك تجي بي ردا _ وكان هذا اول عهدنا بأسطورة البوب مايكل جاكسون والذي كنا علي موعد مع تقليده في مراهقتنا الاولي .
في نفس الزمان كان لنا موعدا مختلفا مع مايكل جاكسون عندما ضربت المجاعة مجاهل افريقيا وكان للسودان منها نصيب الاسد زارنا فيه نائب الرئيس الامريكي جورج بوش الاب ويومها لم يكن بحاجة الي فرزه بالاب فالابن كان وقتها طاشم طشمة السنين وما فارز البيت الابيض من بيت السِنة , ما علينا , ايامئذ ظهر في وجداننا الفتي الاسمر الذي احدث ضجة عالمية جديدة باغنية ( وي ار زا ولد ) والمجموعة الضخمة من الفنانين الذين اذكر منهم صاحب الصوت الاجش والاعميان الاسودان احدهم بضفيرة ويعزف علي الاورغ والاخرة بنضارة لحام .
عرفنا وقتها الاسطورة مايكل جاكسون فاتبعناه كاحسن ما تكون الموضة , صففنا رؤسنا بطريقة تسريحته الشهيرة , ولبسنا بناطلين ( البوغي) وبدأنا في تعلم اولي خطوات رقص ( البريك دانس) وتهافتنا بعدها الي محاولة مشاهدة فلمه الاول ( بتاع المقابر) وبدانا في التفاني لامتلاك اي شريط كاست له , اصبح من العادي جدا ان تري مجموعة من الصبية في اي حفل وان كان المغني اللحو او حمد الريح او زيدان ابراهيم يتمايلون علي انغامهم برقصات البريك دانس ويتفننون في ايجادتها , بدأ طموحنا يخرج عن سيطرة مدينة البراري الوادعة فاتجه غربا متجاوزا مطار الخرطوم الدولي وعابرا لاسواره واصبحنا نرسل مبعوثنا مستفسرا الي احياء العمارات والديم حيث يقبع ( اسياد الشي زاتا ) الذين يحترفون الجنصصة علي طريقة مايكل جاكسون , ويمتلكون من المقدرة للبس اخر تقليعات بناطلين البوغي والجزم اديداس التي انتشرت في تلك الفترة , وكان ان اضهبنا في اوفر نايتات دكاكينة واخري متاحة لا علاقة لنا بها ولا علاقة لاصحابها بنا سوي ضهبنا وحبهم لمايكل جاكسون . والان نعي الناعي الينا رحيل احد المبدعين الذين ساهموا نوعا ما في تشكيل وجداننا باغانيه وطريقته في ادارة الموضة التي تعلقنا بها زمانا , لذا يحق لنا ان نفتقده .
ـــــــــــــــــــ
لم استمع الي الاغنية في العنوان منذ ذلك التاريخ والتي لم استطع فك شفراتها والي اليوم , بالله المتذكر الاغنية دي ينورنا
|
|
 
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: Salahaldeen Nadir)
|
دينا خالد
Ignore
ــــــــــــــ
صديقنا / محمود مصطفي محمود
قدس الله سره وطفا سجارته
لقيتك بتاع كلمات رادكالية معقدة قلت لي جدلية !!
دي ما الساهمت في تشكيل وجدانكم واغاني السبعينات
حقت : الجدلية تش تش حلاوة لبن
اوعك تقول لي الزينبية
ــــــــــــ
تسلم يا صلاح الدين علي اعادة وجداننا المشكل الي جادة الصواب
لقيتك دفعة يا صحبي
الاغنية مكتوبة ما بتشبها ليك ملحنة
في الرابط دا لقيتا ليك غنيتي الما بتغباني
http://www.6rb.com/songs/17915.html
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: اساسي)
|
في كوسشنير لي شريحة من السودانيين في البي بي سي (اذاعة) امس في خبر وفاة مايكل قالو الاتي:
واحد قال:
مايكل جاكسون بتاع شنو..
الخبر ده مابهمنا كتير ..ده بهم الاوربيين بس..
فنان ومات
خلاص..
الثاني قال:
مايكل جاكسون مات ..الناس ماتعمل ضجة من القصة دي..
بعدين هو ذاتو حرامي سارق نص اغاني بوب مارلي
ولو في زول يترحمو عليهو هو بوب مارلي
ونقول ربما يرحم بوب مارلي ويتولاهو بي رحمة مع الصديقين والشهداء..
واحد تالت قال:
نحنا والله ما بهمنا كتير..زول ومات..
عندنا الفن بتاعنا مكفينا تب..
وفي استبيلن في شريحة مصرية الاول قال
مايكل جاكسون ايه ياعم..
الناس مش لاقية تاكل..
وتؤلي مايكل..نحنا بنقلع اللقمة من ضرس الاسد ..
انتو عالم فاضية ولا إيه؟؟
وفي بت قال:
انا حزينة اوي لاني وعيت على اغاني مايكل جكسون..
لبنانية قالت:
بالنسبة لي إلي ولا شي
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: اساسي)
|
من غير الدخول في غياهب تواريخ الميلاد فالعمر لا يُحسب بالسنوات وإن تعاقبت ..
بل بكثافة التجارب و إن قلت ...
...
مايكل جاكسون كان مرحلة براها، كان عندي جاكيت جلد اسود ببطانة اكتاف
و جونتيات فيها حديد ...
ايوة ... ايوة ... كنت مشكلجية منذ نعومة اظافري ...
وجلبطت شعري بالجل بالجنبات، شناة مرة الله بس يعوضني
عن طفولة قضيت نصفها بلا اسنان و المتبقى مجلبطة بالجل و قورتي تلمع من الفازلين ...
في عصاري عطلة الصيف الطويلة كنا بنظم مسابقة قدام دكان اليماني،
الدكان ما زال قائم ولكن منازلنا تلك وسيت بالأرض و حملت معها كل الجدران
التي رسمنا عليها صورة مايكل جاكسون مباعدا بين قدمية و ملتفتا لليسار
و انجليزية ركيكية تحت الصورة brik dans
امام دكان اليماني كنا نتنافس في تقليد رقصات مايكل جاكسون،
و فزت مرتين في مسابقة (Moon Walk) و الهدية كانت دفتر سنتوب ستيكرز
و قسيمة هدايا من ألعاب الحسين، , و عزمت النية اشتري بقسيمتي باربي لابسة بنطلون ابيض
و بكيت و اتنخجت لمن امي دفعت الفرق و ذلتني عميق المذلة دهرا على تبديد 50 ريال
من مصاريف البيت على (القشة ام روح) ...بنت لعاب الخواجات كما اسمتها جارتنا فتحية
ام 14 غويشة دهب لم تفارق ذراعها حتى الآن ...
ولكني نمت قريرة العين، فقد بت مرجعا في رقصة القمر
و حركة الموجات من الكف اليمين للكف الشمال ..
بت خطيرة و العجب الجاكت في عز الحر ...
آخر مرة رقصت رقصة مشية القمر كانت من سنيتين لأني اتهزمت
في لعبة الكمبيوتر مع اخو صاحبتي ود 12 سنة
ولاني عجوزة ، عاقبي برقصة very old and very funny .. ...
غبيان ... ما عارف انو نقلني في آلة الزمن
رقصت و رقصت حتى قال ليتها تتكسر و تقعد هذه المجنونة
التقول عارفة انو مايكل حيفارق ... لي مدة طارياهو ومن محاسن الصدف ...
غنيت ثريللر في كاريوكي قبل اسبوعين و شترتها شترة عدوك
وضحك كل من كانت له كبد رطبة في المقهي
وغمضت عيوني و اندحت
and though you fight to stay alive
your body starts to shiver
for no mere mortal can resist
the evil of the thriller
و امعانا مني في ازعاج الكائنات الحية
غنيت لشير ... Strong Enough
الله يستر مااقوم الحقها مايكل و افقد ركيزة أخرى من ركائز مراهقة عدت بسراع
ايييييه ...
صنّاع الذكريات ماتو ...
مات ميكي ماوس ... و طلال مداح ... عثمان حسين
الطيب صالح .. بافورتي ... علاء ولي الدين
اسعاد يونس ... صلاح جاهين ... احمد زكي
فرح فاوست ...
كتار ... ماتو .. كده بس
صبحنا لقيناهم ماتو !!
حركو حجر اللعبة مربع لقدام
لغاية ما تحين الحركة الأخيرة
ونعلن الـ Endgame خاصتنا
_______
شكرا يا عمو* اساسي
*مراعاة لفارق العمر و كده
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: عزاز شامي)
|
فرح فاوست ذات الشعر الذهبي كانت "ام ضراعات" زمانها في السبعينات والثمانينات
في دورها البوليسي في حلقات «ملائكة تشارلي»
عشقناها كما عشقنا مايكل جاكسون وغيرهم من النجوم المضيئة في ذلك الزمان
المسكينة ماتت بسرطان في المستقيم عانت بسببه طويلا
شكرا اساسي
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: اساسي)
|
| Quote: إسعاد يونس كاتلاها مالك يا عوزاز |
حوسين ... الذاكرة بقت مقدودة و طشاش طشاش
الكانت في غبيوبة لمدة سنة بعد عملية شفط دهون
و زوجة عبدالوارث اسمها منو؟
الشعرها اسود و مثلت المسلسل داك الكان بيجي في رمضان
مع الممثل اللي مثل مسرحية الجوكر ... عرفتو؟
لو عرفتو اكيد حتعرف ياتو واحدة انا قاصدة
هي كان اسمها منو؟
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: Hussein Mallasi)
|
| Quote: و زوجة عبدالوارث اسمها منو؟ |
يعني تعرفي إسم راجلا وما تعرفي إسمها؟؟
شكييتكن لي الله يا نسوان صحي بتريدو راجل المرا:) :) :)
بعدين عزاز ال شامي اسهل وصف مفروض توصفيهو بيها تقولي الكانت مع محمد صبحي في يوميات ونيس:)
الله يرحم سعاد نصر ممثلة لطيفة ..
إسعاد يونس ديك لو ما اخاف الكضب العاملة شعرا محمد ولد وجنها تمثل مع ناس سمير غانم..:)
تخريمة :
راجل ياسمين عبد العزيز اسمو عليك الله :)
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: حامد محمد حامد)
|
Quote: إسعاد يونس ديك لو ما اخاف الكضب العاملة شعرا محمد ولد وجنها تمثل مع ناس سمير غانم..:)
|
بعد اذن صاحب البوست
عمر الفاروق لك تحياتى ..اسعاد يونس الان واحدة مليانة فلوس وتمتلك كذا دور سينماوشركة توزيع فى مصر طبعا هى والممثلة شيريهان متزوجات من رجل واحد اظنه اردنى الجنسية وشبعان بالحيل.
عارف اسمه الثانى اللى انت تقصده بس سؤالك وراه ان فاعفينى من الاجابة ....بس هو ثقيل ثقالة وايام شكلته مع احمد برادة شهير الاسكواتش الذى انقلب الى مطرب فاشل تمنيت ليه علقة سخنة بس هو الاخر شبعان خلقة وفلوس.
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: عزاز شامي)
|
حبيبي الاساسي
تصدق كتبت الاغنية دي في بوست حمور جيت لقيتك فاتح ليها بوست
دي طبعا كنا في ايام المتوسطة وكده فنتاستك كونك تمشي وتجي بي رداء كانت مالية الساحة
ياخي زمان في نهاية السبعينات كنا بنسمع البوني ام وتينا شارلس ومادونا في الرادي مايكون مسحو الشرايط بس لووول طبعا الاسامي عرفتها بعد بقينا كبار ماعدا البوني ام سمعتو في شريط مسجل وانا صغيروني .
لكن يامعلم قصة رقيص البريك دانس كنت مابجيدها خصوصا وانو كان في حلتنا ملك الدانس ده من النوع البيدور بي راسو في الطربيزه لوووول عشان كده كنا محترمين نفسنا .
عندنا واحد من العائلة عامل نفسو بقلد مايكل جاكسون مشينا اجازة وعمل لينا بروفة عشان نجيز ليه رقصو لووول واُطلق عليه في الحال لقب مايكل سمبر ( من سمبيرية وهو طائر ابيض ذو منقار اصفر ) .
تحياتي
زاتوووو
| |
|
|
|
|
|
|
|
|
 Re: كدا ... كدا فنتاستك ...كونك تجي بي ردا (Re: اساسي)
|
دقيقة يا اساسي .. الطشاش كتر علي و استميحك عذرا بأن ارد على الحبّان بيغادي
انا عادة مطششة ... طشاش مأسس مبني على ركايز عميقة مرة لاقيت صاحبتي
من ايام المدرسة في بكا ابو صاحبتنا و شبكتها ليك (فرصة طيبة ... فرصة سعيدة ..
يا ريت لو اتلاقينا من زمان )
صاحبتي الابوها مات قبلت علي و قالت: من زمان كيف يعني؟
كان نفسك ابوي يموت بدري علشان تتلاقو يعني ؟
اعتقد دي كانت حساسية منها ما اكتر ...
المهم تميت باقي الشاي وقعدت اقول في سري (البركة فيكم ... البركة فيكم )
علشان ما اتم الناقصة و اسالم الناس و اقول ليهم
(الف مبروك) صيوانات العزاء ما اتعملت لنوع ده ... التعارف و ما إلى ذلك
و كترت السكانين الحنينة علي
ملاسي ... خلاص انا و انت اتصافينا موش؟ اديتك الباقي؟
و رجعنا اسعاد يونس للحياة و طلعت ضرة شريهان
البوست ده شكلو حيحيد عن مسارو زي الترتيب
و يلحق المترو بتاع الخط الاحمر الي في دي سي ...
ان شاء الله بس ما في دول اتضرر و ال يفي السمتشفى مرقو سالمين تامين ...
الأخ سيف اليزل جعفر عبد الرحمن، السجاعة دي خليها ساي ...
ممكن عادي اتبرع اني اكون مثال في عملية خدعة سحرية
و ادخل صندوق و يشقوني بالسكين ... هييييع هلا هلا
عمر الفاروق ... اصرف ليك واحد اقنورد ولا نتشاكل في بيت البكا؟
أحيلك لمفتي الديار الفنية حامد محمد حامد ...
ولكم في القصاص ... اوووول انت بقه
سعادة المفتى حامد محمد حامد .. لا تفوت لا تموت ...
بس ما توري عمر الفاروق أي معلومات خارج سياق البوست قيد النظر ...
هو البوست كان عن شنو؟
صابر الحواتي ... انتو كلكم عليا و لا ايه! لووووووووووووووووول
منذ قبيل كلمتكم انو انا طاشة و خصوصا في الفن العربي
ولو بحاول اقول ليك اسم فيلم حتتعب معاي لاني بوصف الافلام كالآتي:
الفيلم داك الفيهو هناية الشعرها ملولو وكانت في فيلم بتاع اكشن مقاولات
مع فريد الفيشاوي ... ياخي ديك الكانت بتمثل انها محامية في فيلم
بتاع صابر المليجي ... الناس تخلي الفيلم و تبقى في تصحيح الاسامي
و تقويم اعوجاج ذاكرتي الماشة بكراع واحدة ...
عموما انحنا عرفنا المرحومة خلاص و عبدالواث ما حيزعل لانها
مرات ابنو برضو وهو في مقام ابوها ...
................
بامكان البوست الآن مواصلة حمل النعش لمثواه الاخير
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: عزاز شامي)
|
قال الود اساسى
| Quote: في صباح شتوي منتصف ثمانينات القرن الفائت , ونحن في امتداد البراري الوادعة التي ترقد شرق مطار الخرطوم الذي كان دولي وغرب - غرب معرض الخرطوم الدولي , ونحن صبية لم نتجاوز العاشرة |
وزيلت عزاز مداخلتها ب
Quote: شكرا يا عمو* اساسي
*مراعاة لفارق العمر و كده
|
اكان كدى النقول ليكم عاد اى مداخلة تحت اسمى بعد اليوم
لست بمسئول عنها لانى متنازل عن الباسوورد لمهند ولدى
____________________________
اساسى
محمد ان شاء الله بلغ العافية
| |
|
|
|
|
|
|
|
|
|
Re: كدا ... كدا فنتاستك ...كونك تجي بي ردا (Re: احمد التجانى احمد)
|
يا أساسي ....
| Quote: في صباح شتوي منتصف ثمانينات القرن الفائت , ونحن في امتداد البراري الوادعة التي ترقد شرق مطار الخرطوم الذي كان دولي وغرب - غرب معرض الخرطوم الدولي , ونحن صبية لم نتجاوز العاشرة قيد يوم الهب حماسنا صوت مكرفونات معرض الخرطوم الدولي شريط كاسيت غربي |
خامي الناس دي سااااااااااااااااااااااااااااااااااااااااااااي
الغرب المعرض دي قاردن سيتي ..
بعد داك الكليه و بيوت اساتذة الجامعة حتن بعد داك المقابر ....
و ديل كلهم ناس بري ما بسموهم ما بسمهم بري ..
برا الرصه : في التمانينيات ديك ...قريت في بري المحس؟
| |
|
|
|
|
|
|
| |
اساسي
دينا خالد
Mahmoud Mustafa Mahmoud
Salahaldeen Nadir
سيف اليزل جعفر عبد الرحمن
حيدر حسن ميرغني
ناصر احمد الامين
خدر
الملك
Hussein Mallasi
تيسير عووضة
7abib_alkul
عمر الفاروق
saber alhawatti
ALZOLZATOO
احمد التجانى احمد
حمور زيادة
الصادق عوض
فيس بوك
تويتر
انستقرام
يوتيوب
بنتيريست