سيناريو ود الريس ( الرجل الذي خطب بي دبلة واحدة خمستاشر)

مهداء ألي الأخ طارق المكي

والوالدة ناجية
و الأخت أميرة
يعني بأختصار كدة ناس البيت!!

يا ود الريس أها العرس متين؟
يا زول عرس شنو ؟ عليك امان الله لو جهزت المهر والشيلة حق الكوفير
والفنانة يشيلك هم !!
لكن أنت يا ود الريس بي دبلة واحدة خطبت خمستاشر وما دخلت علي واحدة منهم!
يا زول القسمة ما طلقت !!
والله أنا خايف دبلت دي تخش موسوعة (عرس) للأرقام القياسية !!!
هاهاهاهااااااي لا يا أخوي قول موسوعة فسخ للشواكيش القياسية !!!
والله يا ود الريس أنت مشكلتك بقت زي مشكلة نفيسة مقشاشة!!!
آآآآآء !! تشبهني انا بي نفيسة مقشاشة يا خايب الرجا !!
تشبهني انا بي المرة البايرة القاطعة دي ؟؟؟
عليك الله ما تتضايق أنا بوقع ليك الكلام !
يا زول تقع في هوية و رقبتك ملوية !! ما داير معاك أيي كلام!!

آآزول الله لا جاب ضيق أنا دايرك فوق شورة المسعلة ما مسعلة بورة !!!
شوف آزول انا الكلام المغتغت دة ما بنفع معاي !
يا ود الريس كدي أنعل أبليس أنا دايرك فوق راي!
يازول أنت خليت فوقا راي ( يدردم سفة كاربة ) وحاة السفة دي تبقي لي
بي آخر زاد أنا بي الدبلة دي ختبت خمسطاشر واحدة وكلهن هسة ندمانات وسافات التراب!
(توجد محاولة لضحكة خبيثة )
يا زول علي اليمين ديل نسوان غبيانات ساهي .. هسة عندك سعاد بت الناظر خلتك
أقصد خليتا مالك ؟
آزول ها ... دي مطرطشة و مقلقصة ومتفلسفة في الفاضي .. ساقتني ليك مرطبات فوق
سوق بحري انا قلت داير عرديب قالت لا أشرب ببسي علي كمان الله الداهي دة من
ما شربتوا و قعدت أترّع ساهي!!
عليك الله ؟؟؟؟
أية والله الساعة الصرّت لي قديديما تحلف تقول سمبرية في حوض برسيم!!!
أهااااا ( يوجد حبة شمار!!!!
يازول طوالي قامت رمت لي ... لا قلعت منها الدبلة وبقيت مارق!!!
يا زول مافي قسمة ما عندها في الطيب نصيب !!!
(كسير تلج طبعاً)
أها الرضية بت سعد الله عليك الله دي شافعة نصاح ؟؟؟
الرضية أنا كنت دايرا رسمي لكن قالت ألا أكتب ليها حبلين من طين الجرف!!
يا زول ؟؟ يعني كانت طمعانة فيك ؟؟؟؟
أية والله وما كنت بلاقيك و أحدثك يا زول وكيلك الله حتي السعية قالت يقسموها
سخلة سخلة ودحشة دحشة !!!!!
ها زول ربنا كفاك شرها لكن آود الريس بت محمد ود لحم الجمل دي أتلومت عديل فوقا!!
عليك النبي دي زرافة بتنفات !؟؟
هيع .. أفووووو الزراف الزراف ركوب الجن !!! لكن علي اليمين عندها حبوبة
نقناقة ومسينيحة تحلف تقول قولدا مير ( غولدا مائير) يا زول الله وكيلك
في اليوم بتسف صعوط بي خمسة جنيه وتقعد تردح ... الجني دة داخل ومارق فينا ساكت كدي
شغلة ما عندوا بقضاها كرهتني الحياة !!
كاااااااااااك ( توجد شمشرة)
قلت لي
كلو من حبوبة
القاعدة في الراكوبة
أنشاء الله تجيك غيبوبة
يا الفشلتي الخطوبة
ــــ
بعد سنة و دقداقة !!!
قلت أزور ود الريس في البيت بعد ما سمعت أنو خطب نفيسة مقشاشة !!!

سلام عليك .... وين مختفي كدي يا ود الريس !؟؟
والله السنة دي أنا نويت أتأهل !!!
تتأهل وين أنشاء الله ؟؟؟ كاس العالم ؟؟؟
لا كاس سيكافا!! ( مساخة شديدة )
ودي منو سعيدة الحظ دي ؟؟؟
والله آزول انا داير نفيسة بت حاج عثمان !!!
نفيسة مقشاشة!!!!!!
يقشك بطــاح يفرتقك حتة حتة !!! يا زول ها أنا بعوقك !!!
لكن يا ود الريس دي عندها محافظة ؟؟؟؟ واللا خطوبة من أجل الشهرة ؟؟؟
لا عندها ولاية !!!!
أقولك يا أخوي نفيسة زولتك دي ألفاها سريع أنا خايف تصوم معانا رمضان الجايي راجل!


قووووم يرجرج عضامك الكلب النجس !!!


ـــ بعد ستة شهور !!

قررت زيارة ود الريس في البيت
سمعت تحت تحت أنو عمل عمر بن الخطاب لي سهير
بعد وفاة مكي سنادة مباشرةً !!!

Quote: سيناريو ود الريس ( الرجل الذي خطب بي دبلة واحدة خمستاشر)

ود الريس ده مع شوية تعديلات كده بعرفو طب
يقال أنه كان يتنقل خاطباً بالولايات المتاخمة والبعيدة
ويقال أن البعض أطلق عليه لقب ( أخطب و أهرب )
يقال أنه البعض أطلق على أباه لقب بطوطة وصار ه9و إبن بطوطة نسبة
لأسفارهما الكثيرة في سبيل إمرأة يصيبونها لإبن بطوطة


لكنني أقسمت على قسم السرية لذا تجدني لا أستطيع إيراد تفاصيل أكثر


ود أمي وحبيب نورة
كيف حال يا زول ؟
أنا لو قعدت رغيت هنا كتير بجيني شبشب طاير
عشان كده حا أشتغل معاك بي إسم مستعار للتمويه


أخوك Mission Impossible

طارق المكي


يا زول أنا عملت جنس ملاوزات في النص دة
خايف عليك يا ود أمي
لكن المشكلة بقت في الاسم المستعار
لو غيرتوا
بجيني هوا


المهم لسة ياما في الجراب يا حاوي
عندي جنس بلاوي

أسكت ساهي