Post: #1
Title: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: عمر الفاروق
Date: 06-15-2009, 09:20 AM
اخيراً اكمل محمد عمر الفاروق ولدي هم دراسة المدارس وانتقل لي مرحلة جديدة في حياته التعليمية وواصل افراح أهله فبعد النتيجة الباهرة اللي حققها في امتحانات مرحة الاساس قبل شهر ونيف ها هو الان يثلج صدورنا بتفوق جديد اغر به عين والديه وافرحني وانا اتلقى خبر هذه النتيجة المفرحة التي كررت سيناريو نتيجة مرحلة الاساس ..
غطت الزغاريد المنزل وتوافد الاهل بي الحافلات وعمت الفرحة بنجاح ابني محمد الذي ما فتئ(والله غالبني اكتبا ما عارف بلادة عربي ولا دموع الفرح ولخبطتها المنعتني) يزرع فينا فرحا بعض فرح حتى خلته المزارع الصغير..
والان نفكر في الجامعة المناسبة لي محمد فارجو من الاخوة تقديم المقترحات وإن كنت عن نفسي اميل لي إنو محمد يدرس كلية الطب فهو ولد نابغة منذ طفولته وكل نتائجه تبرهن ذلك إلا إنو الولد حابي الهندسة وقال عايز يبقا مهندس معماري..
بعض الاصدقاء نصحوني بي انو اوديهو ماليزيا وقررربت اوافق بس بيني وبينكم اتزكرت حاجات كده فكانت سبب مقنع لي انو ما يمشي ماليزيا لعل من اقواها إنو ماليزيا مشاها مصعب صحبي ومن قبله حميدة غير أن السبب الأقوى من الغاء فكرة ماليزيا حاجات تانية حامياني..
فكرنا في جامعة الخرطوم حقيقة لكن وبكل صراحة المشاكل السياسية خلتنا نلغي الفكرة لنو عايزين الولد يتخرج سريع ونحن مالينا في السياسة والطب دربو طويييل ونقعد نباري اعتصامات واوكامبو والسد الرد ودارفور وما بضمن ليكم محمد ولدي ممكن عادي يتخفى في شكل إمرأة ويدخل البركس (ما لي اييي شي والله بس عشان يوزع منشورات لي الطالبات بخصوص دعم البوسنة والهيرسك) والولد يتخرج لينا في 2025 واولاد دفعتو البقا رئيس يكون بقا والبقا استشاري يكون بقا والعرس وولدو خش السوق برضو وارد..
الاغلبية اقترحت إنو نوديهو مأمون حميدة عشان يتخرج سريع خصوصا وإنو عمكم مأمون حميدة معجب بي نتيجة الولد وتفوقه وقال ممكن عادي يقريهو مجاااان !!
اعمام حمودي مصرين إنو يقرا علوم بحار في جامعة بورتسودان وما تسالوني ليي انا زاااتي ما عارف ..
خيلان حمودي مصرين على جامعة القران الكريم وتحديدا فرع فداسي وبرضو ما عارف ليي وإن كان الوالي من فداسي..
عن نفسي اعدت العدة لي سفر محمد لي قطر من اجل التسجيل في مدرسة اسباير لتعليم كرة القدم وحا اخليهو يتخصص طرف شمال وان كنت منزعج لي انو ما يركز في قرايتو ويعملا لي كلها رحل بورداب وتصوير ورحبو بي فلانة اسة في المطار والليلة يا بابا انا في ام صلال عشان احتفال البورداب بي مناسبة وصول بوست هناي داك لي 100 مداخلة ده غير إنو اميرة الشيخ تقوم تحنكو لينا مصاريفو البنحولا ليهو وتشبكو ليك تبرع تبرع تبرع لمن هو زااتو يفتش للبيتبرع ليهو ..
افيدوني بالله مستقبل الود محمد بين يدينكم ..
تخريمة :
محمد ولدي من امبرح قافل على نفسو الاوضة وبيبكي وقال لي يا بابا دي ما نسبتي والله انا اشتغلت احسن من كده ومفروض اقلللللللل شي اجيب 93% .
الإعادة غير واردة فماف زول يجي يشبكني خليهو يعييد السنة ..
|
Post: #2
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: عماد محمود علي
Date: 06-15-2009, 09:25 AM
Parent: #1
| Quote: الإعادة غير واردة فماف زول يجي يشبكني خليهو يعييد السنة .. |
خلاص يا الفاروق مافي داعي يعيد السنة خلي السنة هي التعيده !!! بعدين مسعول من الخير ، أنت ولدك ده ما بجيب غير في التمنيات ، هيي قصدي في الخمسينات ليه ؟ ما تقول لي برضو ما عارف !!!!
|
Post: #4
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: ismeil abbas
Date: 06-15-2009, 09:46 AM
Parent: #2
عمر الفاروق..السلام عليكم....
محمد ده فردتى.....قبل يومين قال لى يا عمو انا عايزك فى موضوع وكده..بس أبوى ما يعرف...الكلام ده كان قبل يوم النتيجة ياعمر...
أنا ومحمد جلسنا هو يشرب فى الحليب وانا أشرب القهوة من الحائط...وتونسنا..وقال لى أبوى ده بطريقتو دى حايضيع مستقبلى..وانا هسع مجهجه شديد وانا عارف نفسى ما بجيب أكتر من ستين..إنت عارف السبب شنو يا عمو؟؟؟
قال لى أهلى...كل زول عايزنى أكون حسب ماهو عايز فى راسو..واى زول ماحقق طموحاتوا فى حياتو عايزنى انا احققه ليهو..
أنا تعبت باعمو..وانا عايز أبقى بتاع موسيقى..وابوى قال لى ناس الموسيقى ديل ما تمشى ليهم أنا مشاكلهم...
والكورة بحبها لكن ما عايز ألعب مع الهلال..إلا صلاح إدريس يبعد عن ألأدارة.برضو ابوى
مشاكلو....
أنا محتار يا عمو......وتنهد حمودى تنهيدة كبيرة ووضع صباعه فى فمه..ونام..عسى أن يمنى نفسه بأحلام سعيدة.....
تحياتى يا عمر .............إسماعيل محمد احمد عباس...
|
Post: #5
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: Abdlaziz Eisa
Date: 06-15-2009, 09:47 AM
Parent: #2
سلام
مليون مبروووووووك النجاح..
وعقبال مستقبل مشرق وباهر..
| Quote: أن السبب الأقوى من الغاء فكرة ماليزيا حاجات تانية حامياني.. |
معاك حق في دي..
|
Post: #6
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: عبد الدائم سيد أحمد
Date: 06-15-2009, 09:49 AM
Parent: #2
الف مبروك النجاح
خسارة والله كان فضل ليهو 43 % بس ويقفل المجموع
ليهو الحق يبكى
سجلو فى الفــرع
ولا الجامعات اليمنية
|
Post: #3
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: HAIDER ALZAIN
Date: 06-15-2009, 09:43 AM
Parent: #1
Quote: اخيراً اكمل محمد عمر الفاروق ولدي هم دراسة المدارس وانتقل لي مرحلة جديدة في حياته التعليمية وواصل افراح أهله فبعد النتيجة الباهرة اللي حققها في امتحانات مرحة الاساس قبل شهر ونيف ها هو الان يثلج صدورنا بتفوق جديد اغر به عين والديه وافرحني وانا اتلقى خبر هذه النتيجة المفرحة التي كررت سيناريو نتيجة مرحلة الاساس ..
|
ما شاء الله عليهو ولدك دا .. باين عليهو عبقري ونابغة .. ضراعو اخضر بعدين يطلع رزق السنة في يوم..
|
Post: #7
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: نصار
Date: 06-15-2009, 09:55 AM
Parent: #3
مالك مقرطها ما الراجل كدا عمر
يا ان شاء الله يجيب 100%
و ما تبقي عليهو حكاية واحد قريبنا
حبوبته كانت بتلوليهو تقول ليهو
يسكر ما بدس عيبه
شايل كاسو في جيبه
وقد كان
بعيد عن السامعين
|
Post: #8
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: Hassan Makkawi
Date: 06-15-2009, 09:59 AM
Parent: #3
| Quote: قال لى أهلى...كل زول عايزنى أكون حسب ماهو عايز فى راسو..واى زول ماحقق طموحاتوا فى حياتو عايزنى انا احققه ليهو. |
عليك بمصنع الرجال...الفى المرخيات هنااااك داااك
كم سنة كدة ويشوت التربيزة
وتبقى أبو الريس مرة واحدة!!!
|
Post: #9
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: محمد عبدالرحمن
Date: 06-15-2009, 10:37 AM
Parent: #8
| Quote: عن نفسي اعدت العدة لي سفر محمد لي قطر من اجل التسجيل في مدرسة اسباير لتعليم كرة القدم |
NO Way
|
Post: #10
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: عمران حسن صالح
Date: 06-15-2009, 10:59 AM
Parent: #9
عمر الفاروق غيِر الصنف ياخي ...!!!!
كورتكـ فكت شديد ........
.
.
.
.
.
.
.
حا أأرشف ( مسخرتكـ ) البتسوي فيها دي لي محمد .. وكان الله مدَ في العمر ياهو البيكبر بيناتنا .. أها اليوم داكـ بجيبوا وأقريهو (مِحنكـ دي ) ..
والضحكـ شرطكـ ..
ما تقول لي لحدي الوقت داكـ نكون مشينا البلاد والحنكـ الفاكي داكـ ..
إنت عارف نحن حاجزين ( ود الأحد ) القريب من بيتكـ ...
|
Post: #11
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: Nader Abu Kadouk
Date: 06-15-2009, 11:28 AM
Parent: #10
| Quote: الإعادة غير واردة فماف زول يجي يشبكني خليهو يعييد السنة |
الإعاده هي الحل المناسب
مستواهو الحالي ضعيف
احسن يعيد سنه واحده بدل ما يضيع باقي العمر في جامعه اي كلام
|
Post: #12
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: محمد عبد الماجد الصايم
Date: 06-15-2009, 11:41 AM
Parent: #10
غايتو محمد دا ما فاضل ليهو إلا يبقى سواق ليموزين!
مش كفاية أبوهو عمر الفاروق ياخ!
|
Post: #13
Title: Re: باركوا لي ..محمد إبني يحرز 57% في الشهادة السودانية ويدكم معانا بالدولارات..
Author: Abdel Aati
Date: 06-15-2009, 11:47 AM
Parent: #1
الف مبروك وعقبال الدكتوراة
واهم شي ما يعيد لا يمكن الاعادة بعد النجاح والباقي كلو هين ...
|
|