Post: #1
Title: احب هاجر كباشي
Author: خدر
Date: 06-13-2009, 00:20 AM
البت الغناية جداَ البتعرف كويس كيف تَعرض بضاعتها (غُناها) إختلفنا او إتفقنا معاهو
صوتها تطريبو عالي , تغني و ترقص كما يَجب , لا تعتنق (في تقديري) اي أفكار علي شاكلة
تأريخ و حاضر و مستقبل الاغنية السودانية.
عن نفسي , هي من يشد إنتباهي و اطرب لصوتها كثيراَ و أراها (فنان) حقيقي مُمتلكـ لأدواتو و
انا هنا لا اتحدث عن هاجر نتاج راهن السودان السياسي , اتحدث عن هاجر الفنان شاء
هذا الراهن ام لم يشاء , بين قوسين - صوت و آداء هاجر-
تطربني هذه البنت كثيراَ , وفق مزاجي اتمني ان تُعيد لنا كل تاريخ الغناء النسائي السوداني
بصوتها و في نفس المزاج , لا رغبة لي في إعتراض إختياراتها لنفسها , انا استمتع بها كيفما هي
اها , كيف الشورة يا مواطنين ؟؟؟؟
هاجِر كباشي
___
حركة اصلو ما لذيذه منكـ يا بكري , تسحب كودات الاغاني ليه ياخي ؟
|
Post: #2
Title: Re: احب هاجر كباشي
Author: خدر
Date: 06-13-2009, 00:20 AM
Parent: #1
معظمنا تحدث عن مأزق الاغنية السودانية الحالي و (مأزق) دي ذاتها حٌكم مسبق بوضع اليد
فـ مِن أين لدارسي الموسيقي و اهلها وضع معايير من و كيف يجب ان تُغني الاغنية السودانية؟
و من قال بأن مؤسسات التخصص هي (الوحيدة) المٌناط بها تحديد جَدراة فلان او عِلان ؟
اسئله كثيرة في البال و رغبة حقيقية في سبر أغوار مُصطلح إنحطاط الاغنية السودانية
الرائج منذ 89
|
Post: #3
Title: Re: احب هاجر كباشي
Author: إبراهيم عبد الحليم
Date: 06-13-2009, 07:21 AM
Parent: #2
الودود طارق
الأغنية جارى تحميلها
كلامك يحمل كمية من التسأولات والقضايا التى هى ايضا تثيرنى كما آخرين
تخيل واحد كتب مقال عنوانه الأتى:
| Quote: دايرين غنا هاكم غنا بالطريقة الصاح |
لأ أدى كيف هى الطريقة الصاح!!
تخريمة: صورة البروفايل بديعة والوليد وقفته جميلة
إبراهيم
|
Post: #5
Title: Re: احب هاجر كباشي
Author: سلمى الشيخ سلامة
Date: 06-13-2009, 07:56 AM
Parent: #3
Quote: اسئله كثيرة في البال و رغبة حقيقية في سبر أغوار مُصطلح إنحطاط الاغنية السودانية
الرائج منذ 89 |
هذا المصطلح رائج منذ ظهور الغناء الى باحة الحياة السودانية
دائما هناك من "يبخس" الناس اشياءها
وحين "حرد " الفنان عوض الجاك "حردته الشهيرة "بدعوى ان الكاشف بات يتغنى بغناء ليس ما عرفه الفنان عوض الجاك
اذن الامر قديم جديد
والاغنية الخاصة بالبنات تتارجح بين مساند
ومعارض
من يسميها "بالاغنية الهابطة " وما الى ذلك من تسميات
لكنها محفورة فى الوجدان
لانها تحفر فى بواطن البنية الاجتماعية
بادواتها الخاصة
تجعل المستحيل ممكنا
وتجعل المسكوت عنه مفضوحا اجتماعيا
ولم تخالف هاجر كباشى كل هذه المقولات
هى وبنات جيلها ومن سبقهن
نحمد لهن صمودهن ووقوفهن مدافعات عن غناء احببنه
فمنذ ما قبل عائشة الفلاتية وغناء البنات مجابه بالحرب معلنها وخافيها
ففى اضابير كتاب الحياة نقرا ان
"عائشة الفلاتية حين بدات الغناء وكذا حوا الطقطاقة "تم منعهن اجتماعيا من لدن اهلهن
بل ان حواء تم"حلاقة شعرها " لانها"فجرت " وغنت
قالت
"جيت من الرهد لعطبرة كان عمرى اتناشر سنه مع ناس اهلى ولمن نقلوهم الخرطوم شردت ومشيت للكاشف
لقيت عنده عائشة اختى و"تقصد عائشة الفلاتية "
كان الكاشف بلحن لينا مرات ومرات بعدل لينا فى الاغنيات "دى ما تغنوها لانه كلاما ما سمح ودى غنوها "
اذن وجدن من يرعاهن لكنى ازعم ان اسماعيل عبد المعين من جانبه لم يالو جهدا فى مرحلة لاحقة
المهم
نخلص الى ان الاغنية ومسميات الهبوط هذه صفة ملازمة
سواء كانت باتجاه الحديثات او القديمات
لا يهم
فالانسان السودانى الذى يرى ان الغناء "هابط " هو اول المحتفين به
فى تناقض مثير للشفقة
فهو يطرب بلا حدود ويرقص بلا توقف حين المغنية تصدح
واول ما"خلا الى شياطينه"بات حكما
"دا غناهابط "
وطيب بترقص ليه فى الغنا الهابط ؟
|
Post: #4
Title: Re: احب هاجر كباشي
Author: طارق عبد اللطيف نقد
Date: 06-13-2009, 07:52 AM
Parent: #2
العزيز طارق سلامات
مشتاقين كميات
صدق ده نفس راي في هاجر كباشي
وانا اطرب لها كثيرا
واعتبرها اجمل صوت نسائي في الساحة الغنائية السودانية الان
مع امكانيات تطريب عالية جدا 000
بغض النظر عن نوعية الاغاني التي تؤديها000
وانا كنت ناوي اعمل ليها بوست واتحدى بيها كل الاصوات النسائية 000
لكن الحمد لله الراي ده جاء من انسان فنان حقيقي صاحب تخصص
دمت والاسرة بألف خير
تحياتي
|
Post: #6
Title: Re: احب هاجر كباشي
Author: هيثم درار
Date: 06-13-2009, 09:31 AM
Parent: #4
طارق سلام
انت حصل سمعتها وهى بتغنى الاغنية البتقول
فارق على تلفون *واحشانى والله عيونك
انا يا حبيب مجنونك * بس كيف اعيش من دونك
ياخ البت دى عندها صوت حنين ياخ
وبرضو من المعجبين بى صوتها
|
Post: #7
Title: Re: احب هاجر كباشي
Author: سفيان بشير نابرى
Date: 06-13-2009, 10:06 AM
Parent: #6
| Quote: اها , كيف الشورة يا مواطنين ؟؟؟؟ |
اها يا حبه انا كمواطن
الزولة دي فنانه جداً وبتعرف تغني تمام التمام
وشعوري الخاص تجاهه انو عندها رؤية للبتعمل فيهو ده
الزولة دى اول ما ظهرت (زمااااان) انا سمعتها وشفتها
مع تغريد جبرة في مجموعة غنائية واحده وبعد مدة لقيته
بتغنى لوحدها ومن الزمن داك ولي هسي معلق معها .
الفوق ده الشق الاول الشق التانى هو :-
الاغنية السودانية و (المأزق) وببساطة شديدة وجهت نظرى
طالما لسه مايسمى بالدولة السودانية قاعده تحاول تتخلق
فالاغنية السودانية برضو نفس الحال .
والله بنات حواء عجيبات
يافنان .
ــــــــــ
يابكرى ياخ رجع الكود ياخ
أو وريني سبب منطقي ومقنع .
|
Post: #8
Title: Re: احب هاجر كباشي
Author: سيف النصر محي الدين محمد أحمد
Date: 06-13-2009, 03:07 PM
Parent: #7
| Quote: الزولة دي فنانه جداً وبتعرف تغني تمام التمام |
يا سفيان الظاهر عليك زيي مبسوط من اغنية ام العروس قولي مالك كم..عروسة تمام ما فيها كلام
ست البنااااات..هههههه.
سلامات يا طارق و زي هاجر كباشي دي لو اتبنيتوها و اديتوها اغاني و الحان بتساعدوها و تساعدونا.
|
Post: #9
Title: Re: احب هاجر كباشي
Author: وليد محمد المبارك
Date: 06-13-2009, 03:21 PM
Parent: #8
زمان وكت مشكلة شروق ابو الناس اقترحنا الكلام ده
وقلت شروق ما عندنا فيها كلام
لكن هاجر كباشي هي الاحق بالرعاية من جميع الفتيات الفي الساحر
لانها افضلهن صوتا
اصالة نصري فنانة مغرورة ومعجبة بصوتها شديد ( زي وردي )
ما قريت ليها شكرت صوت زول غير هاجر كباشي
|
Post: #10
Title: Re: احب هاجر كباشي
Author: الملك
Date: 06-14-2009, 00:38 AM
Parent: #9
هاجر صوتا جميل يا خدر
..
والرأى دا بإعتبارو راي أضان ساى علماً باننا لم ندرس اى شئ فى الغناء او الموسيقى
عارف بعد مرات بتحس ,,فلانة ديك ما بتعرف تغنى ,, لكن فى نص ناس بتجبر تسمع غناها,,,وتسكت
...
فاهمنى مش ;)
...
أما زى هاجر دى ممكن براحة تفتش اغانيها وتسمعهم وتحكم بى راحة اذنكــ
هل يحوي صوتها نوعاً من التطريب والحنين ...عن نفسى الإجابة قطع شكــ
نعم
ـــــــــ
تخريمة :- يوجد بوست فى إنتظار رجوع كود تشغيل الاغانى
موضوعه "غنا خدر " ,,,إحتمال يكون بدأ من زمن طويل
من امانى الجندرية هنا,,,, ووليد المبارك وانا فى موقع تانى
...
فارجا الراجيك
تنظير اضنين ساى
بالمناسبة :- لو طلبتا منك "شقى ومجنون" يوم حتخزلنى؟
|
Post: #11
Title: Re: احب هاجر كباشي
Author: خدر
Date: 06-14-2009, 01:56 AM
Parent: #10
يا فنانيين
هاجر دي غير انها صوت مُطرب لاذني , بتعجبني فيها حاجات تانية كتيرة جدا مثلا
- إحترام جمهورها و تبعا لذاكـ تجويدها لي شغلها
- ماعندها مشاكل ساوندسستم و جو الحفل و الجمهور عاوز شنو .. الخ
- عارفة منطقتها الصوتية و بتلعب فيها زي الترتيب
- بتغني مايُسمي هابط و هو لا هابط ولا يحزنون مقارنة بما يقصف اسماعنا يومياَ
بي إحساس عالي و مزاج منسجم و عن قناعة بديل إنفهالها و رقصها التلقائي المتناسب و آدآها
و نواصل القطيعة في هاجر كباشي يا شباب/ات
__
لا يوجد ثمة علاقة معرفة او صحوبية بيني و هاجر كباشي و لم نلتق قبلا .
|
Post: #12
Title: Re: احب هاجر كباشي
Author: سيف النصر محي الدين محمد أحمد
Date: 06-14-2009, 01:59 AM
Parent: #11
| Quote: لا يوجد ثمة علاقة معرفة او صحوبية بيني و هاجر كباشي و لم نلتق قبلا . |
شكلك متحسس شوية يا طارق..ما تتحسس ياخ LOL
|
Post: #13
Title: Re: احب هاجر كباشي
Author: خدر
Date: 06-14-2009, 02:07 AM
Parent: #12
LOOOL يا سيف
مافي حسس ياخي و الكلام ده ماليكـ انت يا وغد 
انت عارف البير و غطاها و ما محتاج لي شرح
في ذمتكـ انا غير وضوحي مع روحي , الجايب لي المهالكـ شنو ؟
خليني من هاجر كيفكـ و كيف أخباركـ يا دكتور
بقرأ ليكـ كتير و مبسوط منكـ , رافع راسي والله
اجدع لي تلفونكـ في مسنجر او علي جناح سايبر
خلينا نتم الحكي و الكيف
__
تلفوني في البروفايل يا سيف
|
Post: #14
Title: Re: احب هاجر كباشي
Author: سيف اليزل الماحي
Date: 06-14-2009, 03:03 PM
Parent: #13
العزيز خدر
تحياتي
نفس موضوع الحب بتاعك ده طرح على بوست لأخونا "تمبس" على ما اعتقد،
وكانت تلك اول مرة اتداخل في بوست للأخ تمبس .. فرصة سعيدة ياشاب.
قابلت هاجر كباشي في إحدى زياراتها لمدينة جدة، وسعدت حقا بالتحدث
اليها .. والحمد لله أنني لم أنصب نفسي الموجه والحريص على مستقبلها
الفني!! ولكني لم أخفيها أعجابي بقدراتها الصوتيه الكبيرة والهائلة
وأمنياتي أن نسمع عنها كل خير ..
لزمان طويل كنت مهتما بالاستماع لصوتها النادر ومؤمنا بشيء واحد وحاسم
وهو ان هذه البنت تعرف الغناء، و"المعرفة بالغناء" هي الشرط الضروي واللازم
للتعبير بالصوت .. والصوت الجميل بلا شك..
وكنت على قناعة أنني نايم على هذا الكنز وحدي، والناس مشغولون بالاستماع
لبعض "حبرتجية" الغناْء في السودان وغيره .. حتى خرجتم علينا بهذا الحب
فقلت : خلاص قبلتو عليها ..!!
بالأمس على قناة سودانية استضافو واحدة من المغنيات ومعها ملحن ما أنفك
يحدثنا عن أمكانيات الشابة الصوتية الجبارة، وأنها على شفاء " لحن" أو "عمل"
ينقلها للعالمية، وأنه كان يتابع مسيرتها منذ نعومة أظافرها/أظافره لا أدري
وقد تنبأ لها بكذا .. وكذا، لكني إستمعت لها ولم أجد شيئا مما أمطرنا به الملحن
الهمام طوال نصف زمن البرنامج ..
ولذلك أسال الله أنو هاجر كباشي دي ما يلم فيها أصلو واحد من "عنقالة" التلحين
ديل، وأن يمتعها الله بالعافية لتغني هكذا عفو الغنا ..
لكن نعمل شنو في جنس بوستات "أحب هاجر كباشي" .. تقول مغالطنو!!
-------------------
ياخي بمناسبة مغالطنو دي : كفارة عليك .. وسوري لي أنا.
لكن قطع شك بجيك في البوست المعني .. عسانا نطلع من اللوم!
مودتي
سيف اليزل
.
|
Post: #15
Title: Re: احب هاجر كباشي
Author: Salah Abdulla
Date: 06-15-2009, 08:34 AM
Parent: #14
يا خدر
أقر هنا وللمرة التلتاشر إنحيازي التام ( لغنا البنات ) أياً كان
بحبو والله من جوه ، وأطرب له أيما طرب
بشرط إنو يغنوا لينا ( غنا بنات ) عديل بدون فلسفة
وأشهد أنني قدر الغنا الهابط السمعتو ، سمعتو بأصوات ( رجالية ) !!!
وحتى لو في واحدة منهن غنّت هابط ، فما بحس إنو هابط ( ليه ؟؟ ما عارف ) !!
هاجر صوتها مريح جداً ، وعارفة هي بتسوي في شنو
بتجود غناها ، ولما تسمعها بتستلم وتسلّم بتعرف إنو البت دي مُجيهّة شغلها تمام
بالبروفات ، والحفظ ، والإنسجام مع الفرقة الموسيقية
وأختلف معك يا خدر ، إن سمحت لي في أزمة الأغنية السودانية
(ما عايز أقول إنحطاطها ) لأنها كلمة شينة
هي بالفعل اسطوانة ممجوجة ومكررة ، ولكني اراها رؤي العين
دونك تسجيلات جزء من سنوات السبعينات ، ومعظم التمنينات
وكل (اللهم الا من رحم ربي) تسجيلات التسعينات وما تلاها
فهي تنبئ عن أزمة حقيقية
هناك بعض الاشراقات ، ولا ننكرها ، لكن بإعمال قانون النسبة والتناسب
ووضع سنوات الستينات وما قبلها في كفة ، مع ما تلاها ، سترجح كفة ( زمان )
وتتفوق أغنيتهم بكل مكوناتها على ما يطلق عليه الآن ( مجازاً ) غنا
الى جانب أن المستمع في ذلك الوقت كان يختلف ( 360 درجة ) عن زولنا المسكين الهسع ده
ويعود ذلك الى نوعية الغنا الذي كان يتعاطاه مستمع ذلك الزمان
الغنا بيهذب الناس عديل ، ويخلق جواهم إنسانيتهم الجميلة ، البتحمل كل المواصفات المطلوبة في البني آدم السوي ..
ياخ الفنانين والفنانات القدام ديل تعبوا تعب شديد جداً لغاية ما وصلوا الغنا ده للناس الهسع ديل
طيب ، ناس هسع ديل عملوا شنو ؟؟؟
يا خ دي قصة طويييييلة ..
المهم نؤكد معكم على أن البت هاجر كباشي كاسحة وما هاميها شئ
وبالطريقة دي ح تخت الباقيات في أمراً ضيق
وأظنها قد فعلت ..
|
Post: #16
Title: Re: احب هاجر كباشي
Author: خدر
Date: 06-15-2009, 11:50 AM
Parent: #15
ابراهيم - سلمي - طارق - هيثم - سفيان - وِلي - الملكـ - النصر - اليزل - صلاحو
عذرا للغياب القسري العيال عيانيين شوية
سأعود , و اصلوا رجاء
|
Post: #17
Title: Re: احب هاجر كباشي
Author: سفيان بشير نابرى
Date: 06-15-2009, 12:07 PM
Parent: #16
Quote: عارفة منطقتها الصوتية و بتلعب فيها زي الترتيب
|
ده الكلام الصاح والكتير من ما نسميهم في السودان فنان كبير
ما بعرف القصة والامثلة بالكوم والردوم وطبعا يا طارق زى ما
انت عارف المنطقة الصوتية والعب فيها بمقدرة عالية بيحتاج
لمعرفة مقدار الصوت بتاع الفنان او الفنانة والتحكم فيه من
حلال المعرفة دى بذكاء العقل والتحكم بمنطقة الصوت من خلال هذه
المعرفة يعنى المسألةلا صريخ ولا قوة صوت لكن في كتيرين المقدرة
عندهم قوة عين الدبوس ما تشكها والمرحومين انحنا ديل ياخ
ببساطة الموهبة الفطرية وجمال الصوت بدون طايوق يعرف مقدرة
وموهبة صوتو ده ويوظفو صاح الا بس ربك يستره ساي !
| Quote: عذرا للغياب القسري العيال عيانيين شوية |
سلامتكم ياخ وكفارة
طمنا عليكم .
|
Post: #18
Title: Re: احب هاجر كباشي
Author: عماد محمود علي
Date: 06-15-2009, 12:15 PM
Parent: #16
| Quote: عذرا للغياب القسري العيال عيانيين شوية |
لا حولااااااااا ,,,
سلامات .. لا بأس طهور إنشاءالله ، مايشوفوا شـــر ...
أنت اقعد سمعهم لي غناء هاجر دي لامن تغطس حجرهم ... خليهم يذاكروا ياخي خليهم ... هاجر ملحوقه ياخ
|
Post: #19
Title: Re: احب هاجر كباشي
Author: Abd-Elrhman sorkati
Date: 06-15-2009, 12:56 PM
Parent: #18
أنا كمواطن بتفق معاك يا خدر
هاجر كباشي صوتها جميل ودافيء
|
Post: #20
Title: Re: احب هاجر كباشي
Author: الوليد محمد الامين
Date: 06-15-2009, 06:58 PM
Parent: #19
مية مية يا خدر ....
|
|
