Post: #1
Title: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-12-2009, 09:04 AM
وصلتني أخبارية من السودان تفيد بان صديقي العزيز أمير احمد كباشي ( فاكهة مجالس جدة ) ... حفيد الأمير ( أم بدة ) .. و ابن حي العرب بآم درمان .. و السيدة الفضلة حرمه ( أم زاهر ) و هي أيضا حفيدة الأمير أم بدة . بعد غيبة امتدت لاكثر من أربعة عشر عاما عن السودان قررا زيارة الآهل و حضور ماسية زواج شقيقه الأصغر ( صلاح ) على إحدى حسان أم در – العروس وكيل نيابة - وما أحلى أعراس أم در و خاصة ذا كان العرس بحي العرب .
أمير للاستمتاع بإجازته وعشان لزوم البهرجة و الذي منه و خاصة ( زفة ) العريس يوم الدخلة ... قرر شراء سيارة ( سنينة ) تلبق بإجازته وما فيها من مناسبات عديدة . . وقع اختيار أخونا أمير على جيب لاندكروزر – FJ – اختار له لونين – الأزرق و الأبيض – بالرغم من ( مريخيته ) الصارخة ... اختيار اللون حسب قوله بأنه يريد الذهاب بها ( ترب تك ) للسودان و بعد استمتاعه بها أثناء الإجارة .. بيعها و استثمار قيمتها في مشروع استثماري استعداد للرجوع النهائي . و أن اختياره اللون االازرق و الأبيض سيغرى أخوانا ( الرشاشات ) بشرائها كلمح البصر .. ولكن .. يا فرحة ما تمتش – كما يقول صديقي فتحي المأمون - و كانت النصبة التاريخية - أمير كان قد تعرض لنصبة بجدة من صومالين فقد فيها جواله - في عز النهار .. يعنى يظهر أن أخونا أمير بقى ( صيد سمين ) .
أبو زاهر – أمير – اصدر أوامره لاحد غسالى العربات بغسل الـ ( FJ ) صباحا و مساءا .. مع المرور كل راس ساعة لإزالة الغبار منها و خاصة منطقة حي العرب معروفة بغبرة عينة . ذات صباح طرق باب منزل عمنا احمد كباشي – له الرحمة - طارق يسأل عن صاحب العربة الوجيهة المبركنة أمام هذا المنزل وإذا كانت للبيع . تم استدعاء أخونا أمير : يا أبو زاهر أسرع هناك مشترى !!
نفض أمير يده من صينية الفطور وفى اقل من ثانية كان قد وصل إلى الباب .. أهلا مرحب تفضلوا و معها ابتسامة عريضة – خاصة بعد أن رأى سيارة برادو ناصعة البياض مظللة بالكامل – يخرج منها ثلاثة أفراد .. في اقل من ثانية قيم أمير الحضور خاصة بعد ترجلهم من البرادو و رأى الجلابيب آلما خمج و العمم و الملاحف المزركشة بألوان زاهية و المراكيب النمر ( الممنوعة ) إلا للصفوة .. قال امبر في نفسه – أكيد مناديب من صلاح إدريس - و عايزين يشتروا العربية دى لرئيس الهلال !!! ... و دار الحوار التالي :
- السلام علبكم و حمد لله على السلامة
- الله يسلمكم .. اتفضلوا الفطور في الصينية ؟
- شكرا .. الأخ أمير مش كده ؟
- نعم معاكم. أخوكم أمير احمد كباشي
- كيف حالك يا أمير و كيف السعودية ؟ زمن ما شفناك......... !!
- تمام التمام .. ما عندنا أي عوجا ... يا أخونا خشوا لي جوه ؟
- شكرا .. والله مستعجلين .. لاحقين لينا فاتحه
- خير يا أخوانا
- و الله قلنا نشوف لو عربتك دى معروضة للبيع ؟
- بالحييييييل !!
- ترب تك مش كده ؟
- نعم ... ماشه عشرة ألف بس !
- المطلوب كم ؟
- ما عايزين اكتر من سعر السوق !
- تخونا امير أنت عارف طبعا الأيام دى ما في سيولة في السوق .. و الأزمة المالية خلت الناس كلها تخاف و تكنكش في قروشها .. السوق نائم نومة حبيبك ! يعنى حكاية كاش دى تنساها خالص .. عارف با أخ أمير الشراء بقى كله مقايضة .. الواحد يديك جزء و الباقي يتمو0 ليك .. عربية مستعملة ، قطعة واطه ، غرفة نوم ، تلاجه ، سراير ، بنابر .. حاجة زي دى كده !
- كان كدي يا أخونا نكمل إجازتنا و نرجح بيها جدة !!
- شوف يا أخونا أمير إحنا عندنا ليك عرض ممتاز .. ولو ما أنت زول معروف و ود قبائل ما كنا قلنا ليك العرض دا !!
- نسمع منكم !
- شوف يا أمير نحنا الثلاثة شركاء و عندنا مشروع استثماري " لقطه " .. راح يكون حدث و عايرنك تكون شريك معانا !!
- نسمع منكم !!
- شوف يا أخ أمير انا حسي ماشين لينا لى فاتحه عندنا أخونا فى أراضى ام درمان أمه ماتت .. لكن الساعة خمسة العصر بنجيك عشان تمشى معانا نوريك المشروع على الطبيعة و نمشى على المكتب عشان نوريك المشروع كامل بكل مستنداته !
- عديلة تب إنشاء الله في انتظاركم !!
- بحوله ... سلام عليكم
نواصل
|
Post: #2
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-12-2009, 09:09 AM
Parent: #1
تحرك البرادو مخلفا ورائه عجاجة حمراء من تراب حى العرب .. واسرع امير الى ( ام زاهر ) يزف الخبر السعيد لقد طرق الاستثمار الباب .. فاهلا به !!
خمسة الا خمسة كان امير فى جلبابه البيج الذى ابدع عمنا احمد ( خياط الكرنتينه ) المشهور فى تفصيله .. و العمة و الملفحة الطقم 0 سويسرى ) من ( الدالى ) باب شريف .. و العطر الباريسى الفواح ( tester – من محلات السويدى الكورنيش ) . ما هى الا لحظات حتى ظهر البرادو و هو يتهادى فى اول الزقاق .. يحاور الركشات و عربات الكارو الصغيرة ( تكسى الغرام ) و ما أكثرها فى منطقة حى العرب لقربها من السوق . و قف البرادو امام اخونا امير .. وفى خفة و رشاقة تفوق رساقة ( الحرس الرئيس ) نزل الشخص الراكب بجانب مقعد السائق و امسك بيد امير :
- يمين تركب قدام ... يمين .. يمين بالله .. باركه يا شيخنا .
كب امير فى المقعد الامامى و تحرك البرادو فى اتجاه شاطىء النيل .. و بدأت الونسة و الضحكات العالية و الكلمات المعسولة ... وراح اخونا امير فى الونسة و تحدث راويا كل الحياة فى السعودية ... التجارة .. الإقامة و مشاكلها و السودانيين فى جدة .. و طبعا أسهب فى الرياضة و خاصة كرة القدم و قريفه ( القلعة ) و الصراع الدائر في اللجنة الرياضة .. و ما خلى كمان الصراع الدائر فى الجالية و جناح ( حاتم ) و جناح ( قرشوم / السمانى ) و القنصلية و تكوين الجالية الجديدة ... و الثالوث الخطير يقاطعونه مرة .. مرة بالاستحسان و مرة بالإشادة لمواقف ( أبو راهر ) الخطيرة و تجاربه فى الحياة بالسعودية ..
توقف البرادو .. و قطع سائقه حديث امير الممتد منذ التحرك .. :
- وصلنا يا جماعة !!
نزل اخونا امير كباشى من البرادو ... فاذا هم بجانب ( بوابة عبد القيوم ) شارع النيل .. بالضبط فى الأرض الفسحة ما بين ( بوابة عبد القيوم ) و ( الطابية ) ... :
- هنا ؟؟... تسأل امير
- ايوه ... يا ابو الشباب
- بوابة عبد القيوم ... ده مشروع شنو ؟؟
- شوف يا ابو زاهر ... انت عارف ان ولاية الخرطوم و خاصة ( معتمدية ام درمان ) لديهم مشروع متكامل لتطوير شاطىء النيل من مجلس الشعب لغاية ابو روف ... شاليهات و كفتريات و مطاعم و ملاعب اطفال الجماعة ديل عايزين يخلو شاطىء النيل فى ام در زى شاطىء ( ميامى ) .
- بس الحته دى حسب علمى تابعة لناس الاثار و ما بخلو اى نفر يقرب عليها .
- آثار .. آثار شنو ؟؟ أنت قايل دى ( مروى ) .. يا شيخنا تطوير ام در ممكن يشيلوا ليه قبة ( المهدى ) ذاتا و ميدان الخليفة ذاتو راح يعملوا فيه أبراج ... تقول لى آثار ... يمين ناس ( الا ... ) ديل يبيعوا ليك النيل دى ذاتو لو ديرين .
- طيب كدي ورونا المشروع شنو ؟؟
- طيب ... شوف يا امير احنا اشترينا ( ثلاثة الف متر) فى الحته دى .. و لدينا كل التصاديق و الخرط المطلوبة مع إذن البناء ... مدينة ملاهي و كافتيريا ..ر أيك شنو ؟؟
- و الله ده مشروع جميل .. و ام در محتاجة لحاجة زى دى !!
- طيب نمشى المكتب و نوريك الأوراق الرسمية و الخرط و تكلفة المشروع !!
- ما بطال .. نمشى !!
تحرك البرادو فى اتجاه حى الملازمين ووقف امام عمارة ثلاث طوابق .. دخلوا الى الطابق الارضى – شقة رقم (1) عليها لافتة مذهبة ( شركة الصفوة للاستثمار المحدودة ) ... دس احدهم على الجرس .. فتح الباب على ايدى حسناء
- اتقضلوا !!
- سناء .. السكرتيرة .. امير كباشى !
- اهلا سيد امير .. تفضلو !
بعد البارد و الشاى و القهوجه ... انتقلوا الى قاعة الاجتماعات حيث و ضعت الخرط بعناية مع كتيبات المشروع و مجسم على الطاولة للمشروع ... و بدا التعريف بالمشروع بشرح من السكرتيرة و احد المهندسين .. و اخونا امير بستمع مبهورا بهذا المشروع الكبير ... و بعد الانتهاء من العرض .. بدا الرسم على اخونا امير .
- راس المال يا اخونا امير لهذا المشروع ثلاثة مليار ( بالقديم ) .. حصلنا منها على مليارين تمويل من بنك ( ...الاسلامى ) قرض حسن ( بدون فوائد ) .. المليار المتبفى عايزين نوفره من مصادرنا الخاصة مع بعض الشركاء ( عدد محدود ) .. فلو عندك رغبة .. نخن على استعداد نضمك معانا ؟
- و الله انا ما عندى كاش فى الوقت الحالى .. لكن بعد ما ارجع السعودية باتصل عليكم !
- يا اخ امير نحن عندنا لديك عرض كالتالى لو موافق على المشروع .. وحكاية الكاش دى نحن عندنا ليك عرض مناسب
- ( بتعزز شديد ) ما فى اعتراض على المشروع لكن العين بصيرة و اليد قصيرة !!
- نحن ما عندنا مانع نقيم عربتك اللاندكروزر دى و قيمتها تكون مساهمتك فى المشروع .. المشروع عايز الناس المتحركة فيه تكون راكبة صاح يعنى ( برستيج ) لان دى يساعدا كثير فى تسيير امور المشروع اصلوا الحكاية فى البلد دى بقت مظاهر !!
- طيب كدى قيمو العربية و نشوف !!
- ( احدهم ) لحظة انا اتصل على الكرين و اجيب ليك السعر الحقيقى !
- الو .. الو .. محمد صالح كيف حالك ... ياخوى لاندكروزر ( FJ ) جديدة حقها كم ؟؟
- قلت كم ؟ .. 170 مليون .. ما بتجيب اكتر من كده !! طيب شكرا ليك
- اها يا ابو زاهر شن قولك ؟
- طيب كدى ادنونى فرصة لبكرة و ارد عليكم !
- يا زول خد وقتك و ادينا رأيك .. بمهلتك
- طيب ياخونا استأذن لان لديى ارتباط مهم
- يا زول ارتباط شنو انحنا حاجزين العشا فى فندق السلام روتانا .. مافى اى طريقة ليك .. ارحكم يا جماعة
نواصل بعد الجمعة
|
Post: #3
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: ناهد بشير الطيب
Date: 06-12-2009, 09:25 AM
Parent: #2
فى انتظارك سعادة العميد ......
جمعة مباركة
|
Post: #4
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: حامد محمد حامد
Date: 06-12-2009, 09:54 AM
Parent: #3
متابعين مع ابداء التعاطف المبدئى لامير كباشى
جمعتك مباركة
|
Post: #5
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: باسط المكي
Date: 06-12-2009, 10:02 AM
Parent: #4
متابعين
شديدنتا
|
Post: #6
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: عاطف عمر
Date: 06-12-2009, 10:52 AM
Parent: #1
تعاطف حقيقي صادق مع الأخ أمير كباشي
إشادة واعجاب بالأسلوب السلس الممتع للأخ يوسف
متابعة لصيقة بأنفاس مبهورة
|
Post: #7
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-12-2009, 11:48 AM
Parent: #6
اخوتى المتداخلين
اسف لعدم الرد على كل منكم الان .. انشاء الله خلال هذا اليوم
ساعود لاحقا فانا ( جعان ) و معزوم على الغدا .. و طبعا انتم عارقين طبيعة
السودانيين يوم الجمعة ، الغدا كان جى الساعة خمسة كويس !
فى جدة عزومة الغدا اخير منها طابور (9) .. ما تمشو بعيد !
طابور (9) : اصعب طابور جزاء فى العسكرية !!
تحياتى لكم جميعا .. الى لقاء خلال هذا اليوم بحوله وقوته .. لو مافى ( حيرقان ) !!
كل ودى
|
Post: #8
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: فرح
Date: 06-12-2009, 01:33 PM
Parent: #7
Quote: اخوتى المتداخلين
اسف لعدم الرد على كل منكم الان .. انشاء الله خلال هذا اليوم
ساعود لاحقا فانا ( جعان ) و معزوم على الغدا .. و طبعا انتم عارقين طبيعة
السودانيين يوم الجمعة ، الغدا كان جى الساعة خمسة كويس !
|
يا زول تتغدى كيف وصاحبك فى المحنه
احتياطيا
تضامنى التام مع امير
احتياطيا اعمل حسابك انت
|
Post: #9
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: السيد المسلمي
Date: 06-12-2009, 02:41 PM
Parent: #8
| Quote: يا زول تتغدى كيف وصاحبك فى المحنه |
نفس السؤال دا كنت داير أسالك ليهو،،،
طيب منتظرين ،،،
|
Post: #11
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: كمال ادريس
Date: 06-12-2009, 03:30 PM
Parent: #9
سعادة العميد ... اعتمدك جمهور من القراء كاتبا.... فالتسلسل السلس للاحداث أحال الملف مباشرة الى لجنة التقييم وادوك شريييييييط ...اقصد دبورة وتاج كمان.
مع كامل تضامني مع صديقي امير كباشي لكن مؤكد انه لن يحكيها كما فعلت ... واصل الى العقدة تربت يداك.
|
Post: #10
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-12-2009, 03:16 PM
Parent: #8
( قال احدهم ) يا جماعة حقو نكلم اخونا خضر يلحقنا و معاه كل
الاوراق القانونية عشان لو أخونا أمير اقتنع بالفكرة منكم نوقع معاه و ننتهى من الموضوع عشان انحنا بكره لازم نوقع العقد مع المقاول حسب الاتفاق ولازم ندفع ليه المقدم ( 30% ) . فكان الرد من كل الشباب الأخريين : كلامك صاح .
هذا الإصرار من جانب الشركاء ادخل في أخونا أمير ( الشك ) .. و أمير راجل ( فتيحه ) و صاحب تجارب .. كرر اعتذاره بشدة و أصر على الحضور غدا إلى مبنى الشركة و معه مستشار قانوني و ابن خاله عشان يكون وكيلا له فى هذا المشروع الكبير لانه سيعود سريعا الى السعودية . و أصر على الذهاب على ان يتم اللقاء فى صبيحة اليوم الثانى الثانية عشر ظهرا . ولم تجدي كل محاولات اصحاب المشروع الاستثماري من إقناع أمير للذهاب معهم و بعد إصراره الشديد تركوه ( يبدو انهم اقتنعوا ) بان صاحبنا أمير ما الزول ( البتكده ) كده بسهولة !!
عاد أمير إلى حي العرب مقتنعا بان هذا المشروع وهم لكن لازم يشوف اخر الجماعة ديل شنو .. المهم صباحة الله بخيرها . فى اليوم التالى عمل اخونا امير التقل اللازم و غير اللبسة الى ( لبسة افريفية ) استعدادا لكل الاحتمالات و التى تحتاج لحرية الحركة و تحرك من منزله بعد صلاة الظهر . دور اخونا امير اللاندكروزر بعد النظافة و التتمير الكامل و انطلق صوب حى الملازمين .
اوقف امير السيارة على بعد من العمارة و تقدم اليها راجلا . الشقة رقم واحد وقف امام الباب و اخذ يضغط على الجرس مرة فاخرى فثالثة دون اى رد من الداخل . استعاض امير بيده عوضا عن الجرس مرة ثم مرة اخرى فثالثة ثم رابعة و لاحياة لمن تنادى . اوقف امير محاولاته بعد سماع صوت من خلفة :
- نعم يا اخونا ؟
- السلام عليكم
- و عليكم السلام
- ناس الشركة دى وين يا الاخو
- شركة شنو يازول
- شركة استثمار
- ياخوى هنا مافى اى شركة
- الشقة دى شنو؟
- الشقة دى و كل باقى الشقق بتتأجر مفروشة .. لو عايز ليك شقة مفروشة خليني اتصل على المسئول يجيك .
- و انت شنو با الاخو ؟
- انا حارس العمارة !!!
- و الله حكاية !
- فى شنو يالاخو ؟
- لا مافى حاجة شكرا ليك .
عاد امير الى سيارته و جلس خلف المقعد و ادار المحرك ثم ضغط على زر الـ ( سى دى ) ... جاء الصوت من مكبراته : طرب .. طرب ... في حي العرب
و اشتغلت الجوالات من كل أرجاء جدة : حمد لله على السلامة يا ابو زاهر .. الله شافك يا ابو زاهر .. اعمل حسابك يا ابو زاهر ... العربية دى كرم ليها و مسحها بدم الخروف ... ما تنسى تخت ليك ( كمون اسود ) مصرور و تعلفه على المرايا الامامية .
اما صديقنا محمد خير فشغال تطمين لكل الاخوة الذين اتصلوا عليه للاستفسار و كانت كل ردوده :
قلنا ليه يا امير ما تشيل ليك عربية ( كحلى بابيض ) ... ما بخلوك .. انت مريخابى معروف !!
التعديل بسبب الافراط فى الكسره
|
Post: #12
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: علاء الدين صلاح محمد
Date: 06-12-2009, 03:31 PM
Parent: #10
الحـمــــــــــــــــــد الله
سعادتو
جمعة مباركة
مشكلة امير صحبي عامل فيها تفتيحية
اهو دي النصبة التانية
بس دي طلع منها ببركات اهلنا في الوطن
الاولى كانت للصوماليين في جدة
|
Post: #13
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: BAKTASH
Date: 06-12-2009, 04:45 PM
Parent: #12
ربك ستر والله البلد دي بقى فيها احتيال بصورة مبالغة .... معقولة بس يا اخوانا...
خارج النص...
امير دا شقيق عبد المنعم ؟؟؟
|
Post: #14
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-12-2009, 05:02 PM
Parent: #12
العزيزة .. ناهد .. حمدلله على السلامة .. لتا لقاء باذنه !!
اخوتى الافاضل :
حامد محمد حامد
باسط المك
عاطف عمر
فرح
السيد المسلمى ( انت اخو الحج /العوض المسلمى ؟ )
كمال ادريس
علاء الدين
اعلم جيدا مدى محبتكم و معزتكم لاخى الفاضل صاحب الصدر الرحب امير ( ابو زاهر ) و لا نقبل جميع
ان تمس شعرة ( مصبوغة ) من ابو زاهر .. بس نعمل ليه شنو ابى يسمع كلام محمد خير !!
ابو كمال .. شكرا على الترقية ( بعد المعاش ) .. المهم فيها علاوة ؟؟ عايزين لينا لاندكروزر- FJ !!
نحنا فى انتظار حضور ابو زاهر ... القصة موثقة عند اخونا محمد خير !!
الحبوب علاء الدين .. انت قايل امير كان حيتصرف فى العربية كده براااااهو .. اهلا
ابو زاهر عندو ( حكومة ) مقرررررررررررررمة !!
شكرا لكم احبتى جميع على المرور
|
Post: #15
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: ناذر محمد الخليفة
Date: 06-12-2009, 08:11 PM
Parent: #14
سلام شيخنا يوسف ..
الحمد لله العملية فشلت ..!
هسي البيهمني في الموضوع ..
العربية ال إف جي حصل عليها شنو ؟!!
باعا في السودان ولا رجعا معاو ؟!!
عشان داير إشتري ...
بدون مشاريع إستثمارية ....!!
وأنا زول مضمون بي ضمانتك ؟؟؟!!!
|
Post: #16
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: بشير أحمد
Date: 06-12-2009, 08:45 PM
Parent: #15
حمدلله علي السلامة اخي أمير كباشي .
اهو اخدنا فكرة قبل الاجازة (بعد يومين)
وتشكر سعادة العميد.
|
Post: #17
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-13-2009, 08:28 AM
Parent: #15
الاخ ناذر
تحياتى الحارة لك
ولكل الخرطوم (3)
اتصلت بالاخ امير صباح اليوم .. لدى اخبار كويسة لك.. بس اسرع
ارجو الاتصال على فى :
00966540325353
على ضمانتى و بس ؟؟ يا راجل رقبتى سدادة .. يكفى انك ناذر محمد خليفة !
وما بينى و بين امير كباشى عشرة سنين طويلة و ما احلاها !!
ما عايز اضع رقم تلفون امير هنا خوفا من " الهمباته "
فى انتظارك
و تحياتى للاخ ناجى
يوسف
|
Post: #18
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: Yousif A Abusinina
Date: 06-13-2009, 09:20 AM
Parent: #17
جنابو يوسف
انتو شنو حكايتكم يا اهل الشرطة نحن ما صدقنا اتحلينا من اخونا الطيب عثمان يوسف يطلع لينا جنابو جديد والشى المميز فيكم وصفكم الدقيق لا تكون شغلة الوصف بتدرسوها فى كليه الشرطة ونحن ما عارفين
تحياتى ومودتى واخونا ابوزاهر الله طلعوا بكرامه البليه والله ربك ستر عليه عشان قروش اغتراب ومال حلال وعرقها تشهد عليه سخانه جدة المابتنزل من الخمسين الحمد لله وربنا يكفينا شر البرادو واللاندكروزر وعلى قول ابن اختى لانكرورر ر
لك التحيه سعادتو يوسف
سميك يوسف ابوسنينه
|
Post: #19
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-13-2009, 09:39 AM
Parent: #18
اخى يوسف
تحياتى لك
بالمناسبة انت عارف انو اسم " يوسف " اسم خطير و لا ؟
دى سر حافظ عليه !
شكرا على الاشادة . بس مع حبى الشديد لضباط الشرطة (الوطنيين) الا اخوك
من ( ق.م.ش ) يعنى ناس حرابه ساكت !
حكايةالوصف دى لان اخوك من اولاد الخرطوم ( بنعرف نصور جد ) .. كان ما
مصدقنى اسأل قريبك ( احمد ابوسنبنه ) عندو واحد صاحبه اسمو ( حمزه الصادق )
من اولاد الخرطوم (3) .. اجاثا كريستى بالنسبة ليه هاوية !!
كل الود سمى يوسف
|
Post: #20
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-13-2009, 09:56 AM
Parent: #19
فى اتصال هاتفى اكد لى الاخوين و صديقا امير اللدودين :
عماد ميرغنى - القطب الرياضى الكبير
محمد خير - الحكم الكروى المعروف
بانهما اجريا اتصلات مكثفة باقاربهما و معارفهما بالخرطوم لتقديم المساعدة
و المشورة المطلوبة للاخ امير حتى لا يقع فى مثل هذه المطبات .
و ايضا مساعدته فى التحركات داخل الخرطوم خاصة بان الاخ امير ( فاقد اتجاه )
فى تحركاته لانه طول من العاصمة و كثير من الطرق شقت و كبارى جديدة انشئت
و احياء جديدة قامت م وتغير كثير من الاتجاهات فى الطرق الرئيسية ، لتفادى الوقوع
فى شراك بوليس الحركة خاصة و ان الغرامات بقت جامدة و فورية و ابو زاهر نفسه قصير
و ما راح يتحمل ( منصرفات اخرى ) .
نشكر الاخوين عماد و محمد خير على هذه اللفتة البارعة !!
تحياتى
|
Post: #21
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: يوسف محمد يوسف
Date: 06-13-2009, 11:54 AM
Parent: #20
الى كل اصدقاء و محبى صديقى العزيز امير كباشى
نطمئنكم كل الاخوة الذين هاتفونا منزعجين و مستفسرين ... بان الاخ امير بخير و مرت صدمة الاحتيال بسلام !!
الان يقضى اجازته بصحبة رفيقة دربه ( ام زاهر ) وسط ترحيب و احتفال كل
الاحباب بهما ( أخر عزائم)
امير على هاتفه الجوال :
00249909452566
( لزوم الكفارت ..و حمد لله بالسلامة.. و كده )
افادنى الاخ / محمد خير بانه و الاخ / عماد ميرغنى سيقيما سرداق ( كفارة )
بالمطار القديم عند عودة الاخ امير من الاجازة !! و الزمونى بالبارد و العشاء
يعنى امير قاعد ما مريحنا .. مسافر مقلقنا .. غايتو نعمل شنو .. .. اخونا امير
( اخو اخوان .. و .. حريف كونكان )
مودتى له من على البعد
|
Post: #22
Title: Re: بعد غيبة 14 عام ... امير كباشى ضحية لعملية نصب كبرى بام درمان !!
Author: البحيراوي
Date: 06-13-2009, 04:58 PM
Parent: #21
العميد يوسف تحياتي
حمداً لله علي سلامة الأخ أمير كباشي . وماذا لو لم يكن الأخ أمير من أم درمان وفي أم درمان من حي العرب. مكمن التفتيحات علي مدار السنين في شتي المجالات.
أللهم لا نسألك رد القضاء ولكن نسألك الطف.
وبالقدر الذي ندعي تطورات في جبهات نصدع بها شكلاً ليل نهار فإن هناك أيضاً تطورات تفرض نفسها دون أن نفرد لها مساحة إعلانية كتلك التي ندعي تطورها في المجالات الأخري. ومن بين تلك التطورات تلك التي تتمثل في تطور الجريمة وأدواتها ووسائلها وإنعكاساتها علي مجمل حياة أهل السودان داخلياً وخارجياً.
وهذه قصة حدثت في السعودية لفرد سوداني ذو أخلاق وحسب ونسب حيث ربطتة صداقة قوية مع أحد أبناء السودان وتطورت العلاقة للدرجة التي جعلت هذا الصديق يتصل في نهاية الأسبوع علي منزل العائلة ويطلب نوعية معينة من الملاح وصنف الوجبة السودانية الفلانية. !!!!!!!!!!!!!! وإستمر الحال سنوات عدة حتى جاء اليوم الذي قصد صديقة في خدمة تخصه ففاتحه في أن لدية مشاكل مع الكفيل وطلب الكفيل أن يعطية حقوقه في شكل شيكات ويرد من صديقة أن يتولي أمر الشيكات ليكتبها له بإسمة بدلاً من أن تكون بإسمه شخصياً وبالفعل فقد جاء له بأربعة شيكات موقعه بإسم كفيلة بمبلغ وقدرة ثلاثين ألف ريال لشيك الواحد علي فترات متباعده وبالفعل ظل الصديق يصرف الشيكات في مواعيدها تماماً ويسلمها لصديق العائلة بإنتظام وإستمر الحال حتى الشيك الثالث وقبل الرابع إتصل السعودي بأخونا قائلاً له كيف لك أن تصرف من حسابي هذه المبالغ وسوف أتخذ ضدك الإجراءات القانونية وإنزعج السوداني من الموقف وشرح للسعودي الموقف كاملاً وبالفعل تحول الأمر للمباحث الجنائية وتم عمل خطة وكمين محكم لقبض الصديق دون علمة وجاء يوم صر فالشيك الرابع وواعدة صاحبة في البنك لإستلام المبلغ وهنا داهمة رجال المباحث وقبض علية وأودعوا الإثنين السجن. وجرت محاولات عدة للسوداني المغرور ليخرج بالضمان علي أن يتصدي صاحب القضية الأصلي والمزور لقضيتة ويتحمل كامل المسئولية عما حدث !!!!!!!!
لكن بكل أسف فقد أنكر تماماً بأنة قد سلم الشيكات لصديقة ليصرفها له وأن قد تسلم المبالغ المصروفة. وعندما واجهه الأخوان بضرورة ذلك رفض وقال لهم لو إعترفت فإن ذلك يعني ترحيلي وتغريمي للمبلغ وسجني كذلك . ناسياً بأن وسائل التحري قد تطورت والقرائن كلها تدل علي براءة السوداني الآخر. ولا زال الإنتظار سيد الموقف.
بحيراوي
|
Post: #23
Title: Re: بعد غيبة 14 عام ... امير كباشى ضحية لعملية نصب كبرى بام درمان- 2 !!
Author: يوسف محمد يوسف
Date: 06-14-2009, 11:31 AM
Parent: #22
الجزء الثانى من حكاية اخونا امير كباشى :
ضياع جواز المدام ( ام زاهر )
قصص و نوادر صديقي الحبيب أمير كباشي لا تعد و لا تحصى . أما نوادره مع صديقنا العزيز محمد خير فهي شبه يومية . أمير شابك محمد خير انو ( دنقلاوى ) ما عارف أي حاجة و انو مصاحبه عشان يستفيد من علاقته معه و يتعرف على المشاهير من السودانيين و المواطنين السعوديين . أما محمد خير فعايز يدخل أمير في ( مقارز ) عشان يتندر عليه و ينشرها على الملا ( محمد موظف فى شركة دعاية و إعلان ) .. هاكم دى :
أمير يستعد للسفر إلى السودان في أجازته السنوية .. طبعا المطلوب من الإجراءات الكثير ... بدا بتجديد الجوازات و اوراق السيارة اللاندكروزر ( ترب تك ) للجرى للاسواق مع المدام و شراء الهدايا و الشنط و مستلزمات زواج شقيقه الخ... طبعا مافى زول ممكن يساعده فى المواضيع دى الا صديقه اللدود محمد خير :
( محادثة تلفونية ) :
- محمد خير كيف حالك
- مرحب ابو زاهر كيفك ؟
- شوف يا بنى دنقل انت عارف انا ماشى اجازة السودان .. تفرغ نقسك .. انا عندى مشاوير كتيره و مسيخه ! و انت عارف
الود زاهر ما فاضى .. وانا ما بقدر على الجرى دا براى .
- ابشر ..يا ابو زاهر ما عندك اى عوجة !! معاك لى سواكن
- شكرا ياخوى سواكن بصلا براى .. تعمل حسابك كل يوم الصباح الساعة عشرة تكون معاى .. اسمع تعمل حسابك تجى
فاطر و شارب قهوتك .. سامع
- كده بقى .. ما قلتو من حى العرب .. الزول يخلى شغله و يجيك من الصباح و تقول ليه تعال فاطر .. انت مقطع كده مالك ؟
- ياخوى انت بتفطر ( قراصة و تركين ) .. انحنا جنس ( اللقويس ) بتاعتكم دى ما عندنا .. انحنا بنفطر زبده ومربا و معها
كباية حليب .. اجيب ليك قراصة من وين ؟
- ها .. بطل الفلسفة بتاعتك دى .. كل يوم قاعدين يكرشوك .. وقاعد تفطر فى الكافتريا فى الاسكان .. انت قايل انا ما عارف! - هوى يا دنقلاوى انت.. بطل الهرجه .. و بكرة الصباح عايزين نمشى نعمل الخروج و العودة لـ ( ام زاهر )
- طيب .. بس عشان ام زاهر ما عشانك ... انت ما بتستاهل ... تقول لى تعال فاطر ! !
- ها الفقر دا .. ايوا تجى فاطر .. يلا مع السلامة .. صحبتك اخير عدما !!
- (............................. ) انتهت المكالمة
- يا حجة ( ام زاهر ) جهزى الجواز و الصورة عشان الخروج و العودة
- يا راجل الجواز و الصورة جنبك فى التربيزة
- لا خلاص لقيتم
( صباح اليوم التانى ... جرس الباب يضرب الساعة عشرة ) :
- منو ؟
- محمد خير ياخ .. افتح !
- محمد معانا ما تغشانا .. اصبحنا و اصبح الملك لله !
- تفتح و لا امشى ؟
- دقيقة خلينا نشوف المفتاح .. قل امشى قال ... اتفضل !
- جاهز ؟
- اى
- امرق .. مرق جلدك
- اخر زمن كمان .. بنى دنقل بقو يتامروا علينا ... قصة !
( ينهيا الاجراءات من الجوازات ثم البدء فى اجراءات الترب تك للسيارة ... و يعودان الى المنزل بعد الثالثة .. و امام عمائر
الاسكان ) :
- اها يا ابو زاهر سلام !
- كدى انزل اتغدى !
- ابو زاهر .. بس انزل خلينى ادور .. قال غدا قال !
- ( نازل من السيارة ) .. احسن حاجه فيك عربتك و سواقتك ما بطاله ... مع السلامة
- غايتو ... انا ذاتى ما عارف اللمانى عليك شنو .. اولاد ام درمان .. اولاد ام درمان .. تطير عيشتكم !!
- ( بعد الخروج من السيارة متحسسا جيوبه ) الجواز و ينو ؟
- جواز شنو ؟
- جواز ام زاهر
- جواز ام زاهر ما عندك .. الجابو لى شنو ؟
- بطل العربية دى !
- اها وقفتها تعال فتشها !
- ( امير يفتش فى السيارة .. الطبلون .. المقاعد .. تحت المقاعد .. يرمى الدواسات فى الواطا .. ) افتح الدرج دا ؟
- حاضر .. بس الدخلو فى الدرج شنو .. الجواز دا انت كنت شايلو فى ايدك ... فتش جيوبك ؟
- ياخ قتشتا جيوبى كلها ما لقيته ... كدى فتش جيوبك انت ؟
- ( محمد خير يفتش فى جيوبه ) ياخى الجابو لى فى جيبى شنو .. اصلها دى مرتى و لا مرتك انت ؟
- بطل الهظار و فتش .. الليلة الجوز دا كان ما اتلقى عربتك دى بشخت ليك كبريتة فيها !!
- ياخوى عربتى دخلها شنو .. دا كلوا من الهضربة بتاعتك .. كل ما تلقى ليك زول تهضرب ... الكورة و ام درمان
و الجالية ... انت اصلو لسانك دا جايب ليك المشاكل .. اها حسى ام زاهر دى نعمل معها شنو .. ح تبهدلنا ؟
- بالله كدى فتش .. ما عندى اخلاق ليك ! .. تعال افتح شنطة العربية ؟
- شنطة العربية ؟؟ الوداهو شنطة العربية شنو ؟ عندو كرعين ؟؟؟
- افتح الشنطة خلينى افتشها !
- حاضر .. ( محمد خير يفتح ضهرية العربية ) ... هنا فى جواز حسى ؟
- طلع الاستك الاسبير دا بره
- يا امير ....
- طلعو قلت ليك !
- حاضر ( يسحب الكفر الاسبير خارج السيارة ) .. اها حسى فى جواز هنا ؟؟
- ( امير يطلع العفريته .. ويفتش فى شنطة المفاتيح .. يدخل ادينو خلف المقعد الخلفى ) .. ما فى !! يكون راح وين
جواز المرة (.... ) دى ؟
- حسى بالله المره ذنبها شنو ... اذا كان راجلها مطرطش تعمل شن ؟؟
- اطرطش صليبك ياخ ... ورينى نعمل شنو حسى ؟ ؟ المره دى كان خشيت جوه و قلت ليها جوازك راح ح تعمل لى
فلم هندى !!
- ياخ كدى براحه اذكر ؟ انت دخلتا و لا قعدتا وين ؟؟
- شنو الدخلتا و ين و قعتا وين .. انتا ما معاى زى ضلى ؟ اها و رينى انت يا الشاطر قعدنا وين ؟؟
- طيب سكتا انا .. عايز تعمل شنو حسى ؟؟
- ما عارف ... ورينى انتا يا ابو الفهم ؟
- خلاص ارحكا نبلغ فى الاول .. عندك حل غير كده ؟
- بلاغ .. و انشروه فى الجرائد .. وبعد خمسطاشر يوم.. و امشى و تعال حتى نطلع واحد جديد .. تكون الاجازة انتهت !!
- اسمع نعمل البلاغ .. و نتصل على عماد ميرغى يطلع لينا واحد جديد من السفارة !
- عماد ميرغنى ... مش كدا عشان الخبر ينتشر .. ما كفاية جوالى الخمشوه الصومالين .. انت و هو نشرتوها فى جدة !!
- عندك حل تانى ؟؟
- خلينى افكر ... بس حكاية عماد ميرغنى دى خلينى منها !!
- ارحكا القسم !
( بعد استلام البلاغ من قسم الشرطة ) :
- يا ابو زاهر اسمع كلامى خلينا نكلم عماد ميرغنى ؟
- يا زول هوى ... الحلبى عماد دا اوعك تجيب لى سيرتو !!
- يا امير ياخ عماد اخونا .. ما بكلم اى زول !
- و الله انتو الاتنين اخطر من رويتر و الـ CNN ..
- ( ضاحكا ) يا ابو زاهر ما تخاف ياخ الموضوع راح يكون سر بيناتنا التلاتة !!
- سر .. انتو بتعرفوا سر ... لو بايدى كنت لبستكم كمامات ... ارح .. فوت قدامى !!
( مكتب عماد ميرغنى Rent a car- – دوار الدراجة )
- اهلا ابو زاهر .. اهلا محمد ... شنو الليلة الشقا الغريبة دى ... كتلتو ليكم زول ولا شنو ؟؟
- شوف يا عمده ... بدون اى مقدمات .. جواز ام زاهر راح .. وانت عارف انحنا مسافرين بعد بكره !!
- راح وين ؟؟
- ..............
- قول ليه يا امير راح وين ؟
- راح فى عربية الفقر دا !!
- فتشتو العربية ؟؟
- قلبناها قلب ما لقيناه !!
- طيب .. حسى الحل شنو ؟؟
- يا سلام .. و امال احنا جاينك … نأجر سيارة ... قوم .. عايزين لينا جواز جديد ؟
- طيب قوماكم ... عملتو البلاغ .... عندكم صورة الجوز .. صور للمدام ؟؟
- امرق بس ... كلو جاهز !!
( نفس اليوم ... خارج القنصلية ... من داخل سيارة عماد الكابرس الاسود )
- اها يا ابو زاهر كلو تمام ؟؟
- تمام ياعمدة ... يديك العافية ... نمشى على الخروج و العودة
- وقع ليك كلامى يا ابو زاهر ... قلت ليك العمدة بحل ليك الموضوع !
- انا ما عارف بس خائف من ........................
- يا ابو زاهر خت فى بطنك بطيخه صيفى ... ما فى اى زول ح يعرف اى شىء عن الموضوع دا !!
- انتو الاتنين ... عارفكم مشاطات !!
- ( الاتنين معا ) ... ها زول انت اخونا !!
- نشوف !
( ميناء جدة الاسلامى – العصرية محمد خير و عماد ميرغنى فى وداع امير كباشى )
- ( مع اقتراب مواعيد الباخرة ) ... اها يا حبيب خليناكم بعافية !
- طيب يا ابو زاهر خلى بالك من نفسك ... و الطريق الجديد بتاع عطبرة ما تسرع فيه !
- ما تخافو انشاء الله نعمل حسابنا !
- بعدين يا امير عشان ما تتأخروا فى سواكن و انت عفشك كتير ... حضر ليك شوية فكه عشان تمشى حالك !
- لا .. جاهزين ليهم تمام التمام !!
- اى وصايا يا ابو زاهر
- لا كتر خيركم ... بس موضوع الجواز ما فى شيطان يعرف عنو حاجه !!
- لا ما تخاف !!
- كلمتكم .. و خاصة القصير داك ( جنابو ) ... ما تجيبو ليه اى سيرة .. خاصة انت يا محمد خير ... القصير كان لقى ليه
طرف موضوع عنى بنزله فى سودانيز اون لاين
- ياخوى اطمئن جانبو الايام دى مشغول الحكومة بتاعتو معاه ... سودانيز اون لاين ليه زمن منها ... كلما يعقد فى
الكمبيوتر ... الحكومة تقول ليه ( باب شريف ) ..
- اها الوصية فى الزمة ... العفو و العافيه ..... لا الله الا الله
- محمد رسول الله
( قبل ما يرفعوا الهلب بتاع الباخرة كانت القصة بحزافيرها منقولة على الهواء مباشرة الى جنابنا )
( قلنا ابو زاهر ماشى اجازة ما فى داعى نشوش عليه و قلنا للاخوين محمد و عماد .. نخلى اخونا امير يستمتع باجازته
بعدين لمن يرجع نشوف طير الجواز وين ... ولكن بعد قصة استثمار بوابة عبد القيوم ... بقت المواضيع ما بنقدر نمسكا فى بطونا ... )
الى اللقاء مع : .... جدو امير !!!
|
Post: #24
Title: Re: بعد غيبة 14 عام ... امير كباشى ضحية لعملية نصب كبرى بام درمان- 2 !!
Author: يوسف محمد يوسف
Date: 06-15-2009, 06:34 AM
Parent: #23
تقرير : عن سير الاجازة السنوية لـ ( ابو زاهر )
من خلال متابعتنا اللصيقة للاخ الحبيب امير كباشى و هو يقضى اجازته
السنوية بالسودان - ام درمان / حى العرب . افادنا الاخوة الذين كلفهم
الاخوة / محمد خير و عماد ميرغنى بمرافقة الاخ امير و تقديم كل مساعدة ممكنة لتسهيل
اجازته و ما فيها من مشاريع يود الاخ امير البدء فى تنفيذها - خاصة بعد
عملية الاحتيال التى كادت ان تعجل بانهاء الاجازة - ان الاخ الحبيب امير كباشى
يعانى الامرين فى تواصله مع الاجيال الجديدة فى ام در و خاصة حى العرب ...
و كما هو معروف ان الاخ امير كباشى اغترب بالمملكة العربية السعودية اواخر ستينات
القرن الماضى ( 1969 ) .. كانت خلالها زياراته الى السودان قصيرة و متقطعة ، اخرها كان
قبل اكثر من 14 عاما ( 1995 ) .. !!
|
Post: #25
Title: Re: بعد غيبة 14 عام ... امير كباشى ضحية لعملية نصب كبرى بام درمان- 2 !!
Author: ALZOLZATOO
Date: 06-15-2009, 07:01 AM
Parent: #24
حمد الله على السلامة
الصورة مهداة يا احباب لكل سمساري نصاب ماعليك الا تديهم عجاج العربية
تحياتي
زاتوووو
|
Post: #26
Title: Re: بعد غيبة 14 عام ... امير كباشى ضحية لعملية نصب كبرى بام درمان- 2 !!
Author: يوسف محمد يوسف
Date: 06-15-2009, 09:29 AM
Parent: #25
زولنا ذات نفسه
الشكر ذاتو ليك يا زولنا
دى ما عربية امير ذاتا بـ بوهيتا و طاقيتا و رفرفا
ياخوى انت عندك مكتب استثمار فى ام درمان - حى الملازمين ؟؟
|
Post: #27
Title: Re: بعد غيبة 14 عام ... امير كباشى ضحية لعملية نصب كبرى بام درمان- 2 !!
Author: ALZOLZATOO
Date: 06-16-2009, 07:12 AM
Parent: #26
Quote: زولنا ذات نفسه
الشكر ذاتو ليك يا زولنا
دى ما عربية امير ذاتا بـ بوهيتا و طاقيتا و رفرفا
ياخوى انت عندك مكتب استثمار فى ام درمان - حى الملازمين |
حبيبنا يوسف
قربت اعمل لي مكتب استثمار لكن الموضوع مازبط لوووووووووول يكه
قلت لي الجماعة عايزين يبيعوا ليهو الطابية
شكرا لتنبيه اخوانا المغتربين
تحياتي
زاتووووو
|
|