القروش .. القروش .. وده الجنن بس عبدالقادر !! ..

القروش .. القروش

نلاقيك فرحان ديمه تنطط ..
تبرج وتعرض بره الداره ..
زي عاشقاً معشوق ..
وتقول غفيان دون إحساس ..
ما قروشي أنا ..
الساكنة جيوبي ودفيانه ..
قرشاً أبيض ..
لي يوماً حار سوادو غطيس ..
بقولها صحي ..
من قلبي الصاحي ..
وما غفيان ..
أنا ما بعرف شي ..
ولا داير شيء ..
غيرك يا قروش ..
قروشي كتاااااار ..
مكنتره بس في جوووه الكيس ..
تظلم .. تضرب ..
تسرق .. تنهب ..
تطلع أكتاف ..
هدفك بس ..
في لم القرش ..
وتقولها بفخر ..
هنا .. هنا .. يازول ..
أياهن ديل ..
الورقة أم مية وطربانه ..
تخش الجيب ما تطلع تب ..
الله .. الله ..
إذا كان في الجيب ..
خمسميايه كمان ..
خليك دفيان ..
ما تكوس الناس ..
وماك داير الحن ..
وما ليا صديق ..
غيرك يا قروش ..
الله .. الله ..
الدفا ما فيك ..
الهنا ما فيك ..
والحن طاير ..
والناس بوراهو ..
يغدوا الطايرات ..
وشن الفايدة ..
الفايده يا ناس ..
بس في القرشين ..
يبقن ميات ..
وكمان ألفين ..
لو ما عارف ..
خليك ديمه ..
منطط عينيك ..
زي ملك الجن ..
لكني حأقولك ..
بالحق حأقولك ..
ما خايف منك ..
يا زول يا غافل ..
يا زول يا جاهل ..
داير أوريك ..
أكان ينفع ..
بيض نيتك ..
أرجع عقلك ..
الدفا في الناس ..
والحن في الناس ..
واللمه الحلوة ودفيانه ..
ماليها تمن ..
بالوفا والحب ..
يدوك إحساس ..
ما بتلقاهو ..
لو عندك كان بس مال قارون ..
يغنيك عن مال كل الدنيا ..
الزايله صحي وخربانه كمان ..
رجّح عقلك ..
نضّف نفسك ..
بيضْ نيتك ..
فتّش ناسك ..
شوف آخرتك ..
سويلها تمام ..
وأنسى الدنيا ..
وعمايلها ديك ..
رجّع حنك ..
واصل رحمك ..
أرحم أهلك ..
بر الوالدين ..
والجار يا زول ..
أوعك تنسا ..
أديهو الحق ..
الفرّضو عليك من رب الكون ..
صلي وزكّي ..
أرحم مساكين ..
وحتلقى أكيد ..
في الآخر بس ..
ياكا الكسبان ..
خير في الأعمال ..
خير في الدنيا ..
والجنة أكيده ومضمونة ..