Post: #1
Title: ما اتهافت عديل لوالي ولا اتوسلت عيون ارباب: قصيدة لهاشم صديق
Author: عمر الفاروق عبد الله الشيخ
Date: 06-09-2009, 03:08 PM
قصيدة انا لا وارغو لا افياني للشاعر هاشم صديق
التكوين
إسمي خميس ود كوة العاتي
كان عجلاتي
وأمي مهيرة وأبوها بشارة
كان ساعاتي
أبوي من بارا
وأمي إتولدت في حلة غميسة
ما بتنشاف في أي خريطة
بأي طريقة بأي شطارة
كان بي عين أو نضارة
أمي وأبوي صدفة اتلاقو
في الدنيا الشاسعة والرحمة الواسعة
في قطر الهم الدرجة الرابعة
كانو عوايل في السفر الصدفة
ملح وملاح ونسة وعرفة
تسالي وترمس وقهوة بقرفة
وفي الونسة السمحة في قطر الزحمة
قلب الوالد حن ورف
وقلب الوالدة اتخج وخف
بعد شهرين صبحو اتنين
زوجين طيبين اتلمو في اسرة
في بيت (البقعة) وسط ( العرضة)
أبوي فقران لكن بدبارة
مهر الوالدة كان سحارة
تلاتة جنيه.. سعفة ووردة
وفركة وفردة
تبروقة ومصحف .. وبمبر ومبخر
تربيزة يتيمة .. نص دسته كبابي
كفتيرة قديمة .. وكم هبابي
جابونا تلاتة.. بتين ووليد
ربونا بكسرة.. كسونا السترة
شربنا اللبن الصافي الاصلي
ما اتمطقنا اللبن البدرة
شبينا كبرنا.. فهمنا نطقنا
وكسبنا القدرة
وأنا كنت مقرم .. وود تفتيحة
والدنيا دي كانت طيبة فسيحة
سينما (برمبل).. باسطة (بيَن)
الترماج
حبوبة عجوبة
والنفاج
قصبة سكر وعنكوليب
نبلة قوية وقلوبية.. شرك الطير
رحلة عيد لجزيرة توتي .. أو الباقير
شدر كافوري سواقي الحاج
جنينة النزهة..
زنكي اللحمة ..السوق الزحمة
وقهوة نوري
والدافوري قيامة عجاج
أنا كنت حريف والكورة شراب
أحاور نملة في جحر الضب
وأبهدل أجندل أشطر باك
أو هباك
أفرشو رررب
روضت الكورة
بدل مأسورها بقت مأسورتي
المجنونة بت الكلب
وأترقيت للتيم الاول
وكبرت بقيت مفتل شاب
اتنورت عن الأوطان
وإتفتحت علي الاحزاب
العرضة جنوب .. العرضة شمال
خور ابو عنجة .. بيت المال
شارع الطابية.. تيم الطاغية
كار المافيا .. جنينة سيدي
سور القبة ..ضرايح بحري
شرايف بري
رافع الراية
تيم القعدة والانداية
ناس شاشاما.. نادي شليل
الحولية .. دق النوبة
في حمد النيل
الشامراب .. نادي الكاب
……. والخ .. والخ
بخا بخ في العجن اللخ
ولأني حريف وود لعاب
سكنتني عيون من باب لي باب
إتسجلت في تيم مغمور
مرقت سريع لي تيم مشهور
والبلد أتيام والناس أقسام
شارع خاص .. شارع عام
أتيام فارعين .. أتيام أقزام
أحزاب فارغين .. أحزاب أعلام
دروب وحروب .. صدام وكلام
وأنا كنت خميس ود كوة العاتي
بقيت موضوع تصفيق وشيوع
مرات محبوب أحس بسلام
ومرات أتخاف .. تقول بعاتي
مرات إخلاص لشعار التيم
مرات معدود في الحال متواطي
(2)
الوعي
من تيم الشوف الضيق ضقت
إتأملت الحال المايل
وشفت الناس في خصام وقبايل
فكيت تسجيلي بايدي وعقلي
وأتسجلت في تيم الشعب الثوري الغالي
وأنا أصلي مصحصح وود تفتيحة
ولاعب فقري
مرقت سريع من ضيق الحارة
للميدان الواسع دوغري
أنا لا وارغو ولا إفياني
لا ود طمبل لا مساوي
إتسجلت بحق طعمية
شراب مقدود ..وكدارة هدية .. وكيس تمباك
وإتفننت أكون رأس حربة
وإتجننت عديل في المحور
وإتقطعت أكون مساك
إتراقبت كتير بالصف
وإتكعبلت كتير من خلف
ولأني خميس ود كوة العاتي
أقع وأقوم كمكان سداري
تقول عجلاتي
وقعت كتير لكني وقفت
حاورت دفرت بعزم الشعب
وصلت المرمي
كم سددت ..كم سجلت.. كم دافعت
كم مررت .. كم قومت نفس عراضة
مع اني مراقب ديمة بلاعب
لاصق فيني كأنو قرادة
ومرات ممسوك بي زول عتالي
جابوهو عشاني خصوص من مالي
شعارو الغالي لا باص لا بصة
يتابع يراقب تقول مرسال من جهة مختصة
لكني طرحتو .. جمعتو .. قسمتو
جدعتو بعيد في برة الخط
إتمدد يقنت زي ضكر البط
ولأنو الكورة والدنيا الصعبة
بحر ممدود لا حد لا شط
إتعذبت في درب الواقع
أكتر وأكتر
التحكيم الفاشل ياما
شهر في وشي الكرت الاصفر
ومرة الاحمر
وجرايد النقة كانت أخطر
ألف إشاعة وكم شماعة
سموم وحراب .. دمار وخراب
كم سووني بعت وخنت
أو ساومت وإتقاعست
بعت قضية قبضت رهاب
وإتهافت عديل لي والي
أو دقيت في السر لي باب
وإتوسلت عيون أرباب
مع إني خميس ود كوة العاتي
ود تفتيحة .. مصحصح وفقري
مرقت عديل من باب الحارة الضيق ضايق
للميدان الواسع دوغري
فكيت تسجيلي بإيدي وعقلي
وإتسجلت في تيم الشعب
الثوري الغالي
|
Post: #2
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: khaleel
Date: 06-09-2009, 03:27 PM
Parent: #1
عموري
بدراسة نقدية للقصيدة
ثبت جليا ان هاشم صديق موردابي
|
Post: #3
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: عمر الفاروق عبد الله الشيخ
Date: 06-09-2009, 03:33 PM
Parent: #2
Quote: عموري
بدراسة نقدية للقصيدة
ثبت جليا ان هاشم صديق موردابي |
قد تكون مصيب في ذلك ولكنه أمرؤ فيه هلالية الم تقرأ قصيدته في المرحوم والي الدين
|
Post: #4
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: Nasr
Date: 06-09-2009, 03:45 PM
Parent: #3
شعر جميل
وهاشم صديق دائما متعود
كرت أحمر للنقاد الهنا ديل
إنتو ما ناقشين ولا شنو؟؟؟؟
|
Post: #5
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: عمر الفاروق عبد الله الشيخ
Date: 06-09-2009, 03:55 PM
Parent: #4
Quote: كرت أحمر للنقاد الهنا ديل
إنتو ما ناقشين ولا شنو؟؟؟؟ |
شنو؟؟؟؟
هاشم صديق شاعر من شعراء الشعب
يعيش الشارع السوداني ويصوره في قصيدة
كنت اتجول في قصيدته في حواري امدر عبر فرقها المختلفة وتيم الشعب معروف!!!
ناقشين ولا شنو؟
مع تحياتي اخي ناصر
|
Post: #7
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: haroon diyab
Date: 06-09-2009, 05:17 PM
Parent: #6
الفاروق
سلامات والتحايا لشاعر الشارع هاشم صديق
ناذر ياصاحب
سلام
| Quote: راس حربة في (تيم) الشعب الثوري الغالي أنا لا (وارغو).. لا (إيفياني) !! |
مداخلة انتظرتها من الضهر
وش متذكر....!!!
|
Post: #8
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: Nasr
Date: 06-09-2009, 05:28 PM
Parent: #7
طيب وقت ناقشين مالكم بتعملوا كدا؟؟؟
خوفتوني
كنت قايل الناس هنا فاهمين الحكاية كلها هلال مريخ
|
Post: #9
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: عمر الفاروق عبد الله الشيخ
Date: 06-09-2009, 06:16 PM
Parent: #8
اول بالتبادي هارون دياب لك التحية
Quote: طيب وقت ناقشين مالكم بتعملوا كدا؟؟؟
خوفتوني
كنت قايل الناس هنا فاهمين الحكاية كلها هلال مريخ |
هلال / مريخ اصبحا جزءً من اللعبة السياسية
اين تيم الشعب
|
Post: #10
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: باسط المكي
Date: 06-09-2009, 06:35 PM
Parent: #9
Quote: ]من تيم الشوف الضيق ضقت
إتأملت الحال المايل
وشفت الناس في خصام وقبايل
فكيت تسجيلي بايدي وعقلي
وأتسجلت في تيم الشعب الثوري الغالي
وأنا أصلي مصحصح وود تفتيحة
ولاعب فقري |
|
Post: #11
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: ناذر محمد الخليفة
Date: 06-09-2009, 06:44 PM
Parent: #10
سلام هارون
Quote: مداخلة انتظرتها من الضهر
وش متذكر....!!! |
وشايفك متداخل أول واحد بي هناك ومعاها الصفقة ..
مرات كدة الواحد بيلقى بوستات مكررة فبتكون فرصة لمراجعة القديمة وضمها للجديدة لفائدة النقاش
شكرا للجميع ..
|
Post: #12
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: haroon diyab
Date: 06-09-2009, 10:05 PM
Parent: #11
ياناذر
كيفنك....؟
| Quote: وشايفك متداخل أول واحد بي هناك ومعاها الصفقة .. |
ماعشان كده قلته ليك وش متذكر
بالمناسبة....
دي حاجة تتنسي.....؟
الاجازة قربت ياعمكـ
|
Post: #13
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: محمد حيدر المشرف
Date: 06-10-2009, 02:41 AM
Parent: #12
يا سلاااام ..
|
Post: #14
Title: Re: ما اتهافت عديل لوالي ولا اتوسلت عيون ارباب: قصيدة لهاشم صديق
Author: عمر الفاروق عبد الله الشيخ
Date: 06-13-2009, 04:59 AM
Parent: #11
Quote: سلام هارون
Quote: مداخلة انتظرتها من الضهر
وش متذكر....!!!
وشايفك متداخل أول واحد بي هناك ومعاها الصفقة ..
مرات كدة الواحد بيلقى بوستات مكررة فبتكون فرصة لمراجعة القديمة وضمها للجديدة لفائدة النقاش
شكرا للجميع .. |
تحياتي للجميع
عذرا لم ار البوست الاول علي كل لو في طريقة ريس بكري يضم التنين ولك قصب السبق
|
|