Post: #1
Title: سيناريو النيل والنخل
Author: حبيب نورة
Date: 05-27-2009, 00:30 AM
يانيل أعلن زفافك للجروف ................... بطِّل عوارة بتبعدك
تشهــــــــِر زواجك للملح !!!
راجياكا من زمن القراية
نخلاية زينة مأصلة .......... قارية فاتحة علي الوطن!!
لا تخونوا لا تطــــــــاطي الجريد ......... الا كان يا السمحة يصبح سعف
فوق ضلوا ينجم الحبيب !
تقطع سبايطك كل شك ..... يجعل تميرك منو فك
والنيل بيرفل في عظمتوا و في جلالو البيه أصبح لينا مك!!!
مشاويرك عديلة علي الخدار ........... حارساك مصنقرة في الجفاف
نخلة بايرة !! ما طلب أيدا الغمام
لا جاها بي سيرة المطر!!!!!
كانت بتسمع حس دلاليك السمـــــا ... جلع الطنابير النايمة في سدر المسادير و الغنا
تتكرَّّف ضريرة الغيم عشم
في بالا قيدومة العصر و السيرة مرقت للبحر و أنشاء الله بالمال و التمــُر !!
و أنت يا نيل واصل حوامتك في زقاقات الخرايط
أبقي عشرة علي نخيلة شاربة من صلصال نزيفك ......... وخل خريفك
يغشي للمحل البنتـــــِّف كل صفقة جليدا ناير
أمسح جبين كل الجزاير
يبقي مهرك للحبيبة يوم لقيطك
سبيطة تعرق في الرؤوس الفاضية رقصة
شبال بتاوق للسما
زغرودة تقدل في الفضـــا .......... وعشم علي وش البلا
يا نخلة
أنتي يا الكبرتوكي وجرتقوك!!
ماروق ودلكـــــــــــــــة ومحلبية
طورية بتعوسلك فطير .......... جدول بجيب حق الفطور!!
تربال بودي المدرسة!!!
ساقية بتراجع في الحصص !!! حواشة لي لعبة شليل !!! من غير حوامة و مسخرة!!
ما مرقتي لي شحدة رغيف ... لا كشفتي وشك لي غريب
لا جبتي خبراً من قريب ........... قالوهو في قعدة مشــــــــاط!!
سيّروا سيّروا
الصلاح بِروا
شوفوا النيل وصل جدودوا السبعة جوا
سيرتوا ما بتقيف
لو غاب الخريف
شوفوا النيل وصل عاد النخلة كيف
في جبينوا الهلال
شاقي للتلال
شوفوا النيل خطب نخلة في الشمال
سيّروا سيّروا
الصلاح بِروا
شوفوا النيل وصل جدودوا السبعة جوا
|
Post: #3
Title: Re: سيناريو النيل والنخل
Author: Amira Elsheikh
Date: 05-27-2009, 03:08 AM
Parent: #2
Quote: و أنت يا نيل واصل حوامتك في زقاقات الخرايط
أبقي عشرة علي نخيلة شاربة من صلصال نزيفك ......... وخل خريفك
يغشي للمحل البنتـــــِّف كل صفقة جليدا ناير
|
وانت برضو واصل..
|
Post: #4
Title: Re: سيناريو النيل والنخل
Author: حبيب نورة
Date: 05-27-2009, 10:39 PM
Parent: #3
أميرات
ياخي تسلمي
ما قصرتي
وشكرن لمرورك
شكرن كتيرن!
|
Post: #5
Title: Re: سيناريو النيل والنخل
Author: عبدالله داش
Date: 05-28-2009, 12:44 PM
Parent: #4
غلطان خالس
دا
سيناريو الخوف والنحل
يااااخ انت .....
|
Post: #6
Title: Re: سيناريو النيل والنخل
Author: Emad Abdulla
Date: 05-28-2009, 01:13 PM
Parent: #5
يا مجنون ياخ ..
أصلك ما تقيف .. إتدفق قدر ما الله يديك ..
و اتفلت جنس تفلتك ده .
....
ينصر دين الكلام الجديد ..
.. و دينك .
|
Post: #8
Title: Re: سيناريو النيل والنخل
Author: حبيب نورة
Date: 05-28-2009, 07:25 PM
Parent: #6
عمدة يا حبيبو
ينصر دينك أنت دة !!
|
Post: #7
Title: Re: سيناريو النيل والنخل
Author: حبيب نورة
Date: 05-28-2009, 07:22 PM
Parent: #5
يا داش
أخبارك يا مان
وحشة والله
|
Post: #9
Title: Re: سيناريو النيل والنخل
Author: خالد المحرب
Date: 05-28-2009, 07:38 PM
Parent: #7
حبيب عملت ايه 00 انا فى انتظار الرد منك ارجو الرد 00 شكرن كتيرن
|
Post: #10
Title: Re: سيناريو النيل والنخل
Author: حبيب نورة
Date: 05-28-2009, 07:45 PM
Parent: #9
خالد المحرب
الليلة جاهز نفسياً للمهمة
بس عايز تفاصيل أكتر
رسل لي ميل
[email protected]
|
Post: #11
Title: Re: سيناريو النيل والنخل
Author: baha eassa
Date: 05-29-2009, 03:23 PM
Parent: #10
Quote: يانيل أعلن زفافك للجروف ................... بطِّل عوارة بتبعدك
تشهــــــــِر زواجك للملح !!!
راجياكا من زمن القراية
|
فعلا الشعر والجنون والشجاعة والخوف .. اصدقاء
|
Post: #12
Title: Re: سيناريو النيل والنخل
Author: حبيب نورة
Date: 05-29-2009, 05:15 PM
Parent: #11
بهاء الجميل
ياخي ألف شكر
راجياكا من زمن القراية
نخلاية سمحة مأصلة!!
|
Post: #13
Title: Re: سيناريو النيل والنخل
Author: حبيب نورة
Date: 05-29-2009, 08:46 PM
Parent: #12
سيناريو القمرة و أبو الدرداق
يا زمن أنت عولاق !! واللا شينة الساعة في بعد الحبيب ؟؟
شايف الزمن مشلول مع بعد السفر
راكب قطار ما بغشي المحطات الوصول !! شان ألقـــاك و أقول
أحبك بألحـاح أكتر من كباية ليمون خدرااااء و اليوم هجير
و أشتهيك بحرقــة أكتر من حشا السنابل المهرية أحتراق
وريق السما أكتر نشافاً من صقيعة أضانا طرشت من نقـّة الغيم و المطر
أحبك بفنجرية لم تسمع بها الضفاف وهي تمنح أوراق اللوبيا حق اللجؤ
وتفجر شرايينها نزيفاً أخضرا
وأحبك وانتي تضخــِّي في عروق الغاب سلسبيل الكلوروفيل
و أحكيلك!
و احكيلك زمان يا قمرة !!
كان في نورة في نص السما ,, ماشطة الضفائر في جيدا بي سلّة نجوم
تقلِّب في دفاتر السنسنة الحمراء
وتقرأ الضو فوق خشم طفلة فـارّة السـِّن قصيد
و أحكيلك
حجــا المغس النبت بعدك ,, وعن عتمور سرق نيلك ,, وعن هبباي
شفط نســًّام دة كان هِيلك ,,, أحكيلك و أغنيلك
غنـــي الوتر المشاتر سكة الايقاع
و أعزفلك بيوت شعراً مودًّر وضـاع
زمان يا قمرة كانت في نورة أسمها نجمــة!
عم علي بياع الزيت ,, جاب مرتو وداها البيت
جاها الغول أب سبعة أرواح
شق أحلاما علي نصين!
النص الأول خلي الرؤيا طشيش !
التاني الشوق الطاش من دربوا الضـي! وساب الملمح زاتو طشاش!
و باقي النص !!
في آخر السكـة
الشارع مدخل تمرق منو تفوت لا جوة !!
تعيد تصنيع الشوق من أول
زماااان يا نورة كانت في بت أسمها قمرة!
قبل زمننا يكون عولاق
كنا بنعرف كيف نشتاق
الحلم الفينا نشوفونهــاري ,, لا هم لا غم لا خوف لا فراق!
وكان الممكن دايماً يحصل
عررس القمررة و أبو الدرداق
|
Post: #14
Title: Re: سيناريو النيل والنخل
Author: Sidig Rahama Elnour
Date: 05-29-2009, 09:32 PM
Parent: #13
كلامك هبّش العصب الجوة
ودفق في الوانو بنفسج
أدى الفكرة ملامح دهشة
وخلى الفرحة شعاع يتوهج
|
Post: #15
Title: Re: سيناريو النيل والنخل
Author: حبيب نورة
Date: 05-29-2009, 09:41 PM
Parent: #14
صديق يا حبيبو
دايماً رائع
ودايماً أجمل
Quote: كلامك هبّش العصب الجوة
ودفق في الوانو بنفسج
أدى الفكرة ملامح دهشة
وخلى الفرحة شعاع يتوهج |
أحلي كلام
من أحلي أنسان
شكرن كتيرن!
|
Post: #16
Title: Re: سيناريو النيل والنخل
Author: عاصم ابوبكر حامد
Date: 05-29-2009, 09:46 PM
Parent: #13
خبيب نورة
تحياتى لك ...
اين انت يا بطل ..والله دائما تمطرنا بالاشياء الرائعة والجميلة يا شاعر ..
لكننى مصر على راى السابق بان لك سطر او سطريين طاشئ منك
تسلم يا شاعر
|
Post: #17
Title: Re: سيناريو النيل والنخل
Author: حبيب نورة
Date: 05-29-2009, 09:54 PM
Parent: #16
عصومي
ياعمك انت قاعد تغطس وين؟
| Quote: لكننى مصر على راى السابق بان لك سطر او سطريين طاشئ منك |
شنو يا باشا ح تعمل لي سمعة تاني
انا ما صدقت عملت لي فايل وبقيت ود عوايل
دايرهم يصنفوني تاني من أرباب الكديسات حاقد دة
|
Post: #18
Title: Re: سيناريو النيل والنخل
Author: لؤي احمد الطيب
Date: 05-29-2009, 10:09 PM
Parent: #17
واصل يا مبدع
|
Post: #19
Title: Re: سيناريو النيل والنخل
Author: حبيب نورة
Date: 05-29-2009, 10:20 PM
Parent: #18
ابو اللول
ياخي تسلم
والله بقينا نجابد في المود مجابدة
تسلم لجميل المرور
|
Post: #20
Title: Re: سيناريو النيل والنخل
Author: حبيب نورة
Date: 05-29-2009, 10:28 PM
Parent: #19
وهذه سيناريوهات بنفسجية
غافلتها
قُبيل قبلة لم تقع !
بُعيد شوق
وتركت لها رسالةٌ خضراء الطعم
بل كانت زرقاء الدواخل
لون البحر
وسرب من النوارس يهوم في المدي الفسيح
فقالت
أين من عينيك ذياك الحريق
البريق المطل خلف عتمة
كنت اظن أنني بنيت من أجل أن تضي
ألف شمس وشمس
ولكن !
|
Post: #21
Title: Re: سيناريو النيل والنخل
Author: حبيب نورة
Date: 05-29-2009, 10:33 PM
Parent: #20
وهذا سيناريو للصمت المعلن!
أياك يا هذا الدفــــــــــــــا
فرحاً ندثرُ رعشـــــــــــةً
تصفع مسام غطائنا برداً
تهرس عظام سماءنا ثلجاً
والريحُ تزأرُ بالصقيع
لم يكن سهواً أني هجرتُ فراشنا
من ثم في نهديكِ أعلنتُ البيـــــــــــــات !
تالله جئتُ أنشدكِ الرضـــــــــــاعةَ
بعد أن طال الفطام
و أناملي ضلّت تتوهُ بصدرها
أن أعوذُ بمُرضـــِعة !
لا تشبع حبيبـــــــــــــاً أو رضيع !!
أتري أتاكي حديث ظمــأي ؟
وأنا أفتش في النيلين كأس خمرٍ
فلا ماءٍ شربت
ولا نجيع
!!!!
|
Post: #22
Title: Re: سيناريو النيل والنخل
Author: حامد محمد حامد
Date: 05-29-2009, 10:35 PM
Parent: #18
حبيب لنورة يا اجمل حبيب
سألت النخلة الصغيرة جارتها التى تعانق السماء طولا , متى اصبح مثلك لارى النيل من علو شاهق واغازله
تحسرت الاخرى قائلة وهى تهش سيعيفاتها القليلة ..الماء تحتك بالجداول ترتوين وانا اعانق السماء ,الهواء والبرد اللعين وتود انت ان تنظرين؟!!!!
ولم تفعلين ..!!!!
حبيب هل كانت غاضبة تلك النخلة تندب حظها طولا؟
ام هى الغيرة؟
واصل ابداعاتك ياخى الحبيب
|
Post: #23
Title: Re: سيناريو النيل والنخل
Author: حبيب نورة
Date: 05-31-2009, 01:19 AM
Parent: #22
حامد يا عسل
تلسم لي انا
برجع ليك أهترش مع النخلات
خلي سيناريو الفرح مستني!
|
|